عودة شعنونة

[هشام عبد الوهاب]

وحشتينا .... جداااااااااااااااااااااا...الف حمد الله على السلامه ....

:) cld: mf(

[Lancelot]

حمد لله ع السلامة يا شنشن ....

سمعنا أغنية يا حشيش ....

(فيه شوية تغيرات هنقولك عليه يا شعنونة .... أغاني حشيش أولها) ....

[بنت شعنونة]

السلام عليكم..

وحشتوني جدا جدا جميعا والله العظيم

لكن للأسف جئت اليكم هذه المرة محملة بالأحزان و الأحمال

حاولت ان ارسم قناع الضحكة على وجهي لآكتب لكم ما يسعدكم ويرسم الضحكة على شفاهكم كما احب ان اراكم

لكني فشلت

لا اعرف هل اكتب ام اسكت

ولكن قريبا سأتكلم

سامحون على شوية الغتاتة دي

لكن بجد غصب عني

وبجد

وحشتووووووني اووووووي :unsure:

[حشيش]

تم حذف الأغنية والمزاح المرفق بمعرفة حشيش بعد أن قرأت القصة الحزينة لهذا الطفل المسكين...اللهم عافنا مما إبتليت به كثيرأً من عبادك وأرحمنا برحمتك ياأرحم الراحمين...حمداً لله على سلامتك ياشانا

حشيش

تم تعديل 3 يناير 2004 بواسطة حشيش

[مصرى]

حمدا لله على سلامتك يا شانا .. منورة

رهيب والله رهيب ..

:unsure:

[se_ Elsyed]

أيه يا عم حشيش الحركات دي ....

ماتسيبك يابني من الياباني وخليك في المحلي :unsure:

شــــــــــــــــــــعنونة .... ويلكم باك ..... وحشتينا والله ... المرة دي إنتي طولتي الغيبة علينا

أنا عازمك على حاجة ساقعة في باب الإبتسام روحي هناك وادخلي على طول من غير ماتخبطي .. إنتي صاحبة بيت .

حاولت ان ارسم قناع الضحكة على وجهي لآكتب لكم ما يسعدكم ويرسم الضحكة على شفاهكم كما احب ان اراكم

لكني فشلت

لا اعرف هل اكتب ام اسكت

أستر يــــــــــــــــــــارب .....

موتي مين تاني ؟ .. إوعي تكون جت المرة دي في شيخ قبيلة السلالمه ...

[بنت شعنونة]

انت بتقول فيها يا س س

بس المرادي جت فيا انا شخصيا...

عندي طفل 9 سنين عنده ورم سرطاني خبيث في العضم

دا حسب تقرير العينة اللي معمولة في مطروح "واللي انا مش واثقة فيها ابدا طبعا"

عملتله اشعات وتحاليل اللي ممكن تتعمل عندنا هناك

الأشعة قالت انه فيه ورم فعلا والدكاترة الأخصائيين اجمعوا على انه لازم يتعمل للطفل بتر من فوق الركبة

اسألهم طب انتوا متاكدين مية المية انه كدا اكيد دا ورم سرطاني؟؟

"لآنه الولد راح معهد الأورام خد جرعة كيماوي واحدا وبعدين طلعوه وقالوله انت ما عندكش ورم...؟؟ الكلمة دي جننتني وخلتني قلقانا جدااااا ولازم اتاكد قبل ما يطيروا رجل الواد"

وكل ما اسال واحد منهم انت متاكد انه من الأشعة كدا سرطان

يقول اااه

اعيد السؤال يقوم يخاف ويقول تقريبا!!!!

المهم فضلت اماطل في موضوع العملية دا لحد ما يوصلوا الأستشارين بتوعي من مصر زي كل اسبوع

لكن هما خدوا القرار ونزل الولد الساعا 9 بالليل يوم التلات عشان يعمل البتر

طبعا انا نزلت معاه عشان هوا كان اتصرع رعب لما عرف انه داخل عمليات وها يقطعوا رجله

"انا كنت مدياله فكرة انه دا ممكن يحصل عشان ما يتجنش لو حصلت فجأة"

ونزلنا واحنا عمالين نقنعه اننا بنعمل اشعه

اتخدر وابتدت العملية

ورغم ان قلبي خفيييييف جدا

الا اني صممت اني احضر العملية كاملة عشان كنت خايفة عليه اوي وفي نفس الوقت اشوف البتر ازاي بيتعمل؟

فضلت متمااااااسكة لحد ما قربوا ينشروا العضم ساعتها جبت كرسي وقعدت عشان ما ااقعش منهم

ودكتور التخدير قعد يتحايل عليا اخرج هوا و الممرضات وانا مصممة استنى (عمالة اقول انا جدعه انا جدعه) bxg::

فصلوا العضمة... ساعتها انا دورت وشي الناحية التانية عشان ما قدرتش اشوفها خاااااالص

كان ساعتها جابوا قدامي صندوق كبييييير كدا فيه كيس احمر

كنت عارفة انه عشان الرجل تتحط فيه

راح واحد معفففففففن من الدكاترة زمايلنا راح ماسك الرجل وبعزم ما فييييييييييييه

وراح راميها هوباااااا في الصندوق اكنه بيرمي علبة ببيبسي في صندوق بعيد عنه

طبعا الرجل نزلت حدف قدامي تمااااام لآن البيه كان بعيد عن الصندوق وهوا بيحدفها

وانا الرجل اتحدفت قدامي من هناااااا وانا اتصرعت من هنااااا وطلعت اجررررررري من الرعب برا اوضة العمليات وانا عمالة اعيط من الفزع اللي حصلي

شوية وطلع واحد من زمايلنا يتطمن عليا

لقى كل حتة فيا بتترجف من الرعب وعمالة اعيط بجنون

يقول يا بنتي اهدي خلاص خلصنا وانا اقوله مش قادرة يا محمد سيبني والنبي

شوية وطلع واحد تاني من زمايلنا يقولي طب اقعدي برا

اقوله لو خرجت كدا قدام اهله ها يفتكروا ابنهم جراله حاجا سيبوني هنا

طب اهدي؟؟

مش قادرة

راح الأخصائي منادي عليا فدخلت على الباب كدا بخوف

لقيته بيقولي مالك بس.. احنا خلصنا اهو خلاص

وراح متاخر كدا لقيتلكم رجل الواد المقطوعة قدامي ولسا بيقفلوا فيها

رحت معيطة اكتر وجريت من وشوه وانا عمالة اقوله كدا برضه يا دكتر؟؟؟؟؟

العملية خلصت وناا واقفا على باب العمليات وكللللللللللل واحد خرج من الأوضة قعد يتريق عليا

وضحك وانا منهارة تماما ومش مستحملة حرف من حد

المهم الجراح قال انه الولد يطلع القسم عندي

انا سمعت كدا

و رحت جري قلتله

يا دكتر

والله العظيم تلاتا الولد دا لو فاق عندي في القسم

انا ها اموت

والله العظم تلاتا يا دكتر انا ها يجلي سكته قلبيه فعلا لو الولد دا فاق وسألني عن رجله فين؟؟ bngn::

ساعتها الدكتور حس فعلا اني بتكلم جد جدا راح موديه العناية

طلعت انا بقى معاه للعناية ومنها رحت اخد اييييييي حقنة عشان كان عند صداع جبار

طبعا البشوات زمايلي ما سكتوش وهاتك يا تريقة

لدرجة انه وانا باخد الحقنة الوريد بتاعي انفجر وعمل كدمة دم مرعبببببة فزعت الدكتور ال اداني الحقنة

جيت اخدها تاني انفجر الوريد تاني

لدرجة انه خاف عليا وقالي في ايه؟ انتي مالك؟

قعدت 3 ايام من يومها اخد حقن منومة عشان اعرف انام

والولد قدامي لا بياكل ولا بيشرب وعنده حالة اكتئاب وهمية ومش عارفة اعمل ايه

رحت واخدا اجازة وجايا عشان قربت اتجنن بجد من الرعب والقلق عليه ومن عصبيتي على البني ادمين اللي خلالالالالالاص بقوا يعتبروا اي ذرة انسانية شيء غلط غلط غلط غلط غلط

[moody00x]

يا ساتر ايه الماساة دى يا شانا...

اناانفعلت جدا والله وانا باقرا الحكاية المتعبة دى...

بالنسبة للدكاترة اظن من كتر الحوادث اللى شافوها والعمليات

اللى عملوها اكيد بقى عندهم لا مبالاة فى المواضيع دى

بصراحة على قد ماهى مهنة نبيلة لكن لا اتمناها لنفسى

ربنا معاكى وتقضى اجازة سعيدة

[بنت شعنونة]

يا مودي مش معنى انهم شافوا مصايب كتير انه ستهين بخلقة ربنا كدا ويرمي الرجل اكنها علبة فاضية بيرميها ف الزبالة؟؟؟

دي المفروض انها شيء كان حي من ثواني معدودة لازم يكرمه ويعامله بمنتهى الأجلال

دا اكرام الميت دفنه

يقوم البيه يرمي الرجل كدا؟؟؟

ومش عشان حاجا

عارف عمل كدا ليه؟

عشان البيه كان عاوز يضحك الناس عليا شوية عشان كان شايفني قاعدة مرعوبة

قالك اما اضحكهم حبة على رد فعلها

شوفت قلة الذوق

تم تعديل 3 يناير 2004 بواسطة بنت شعنونة

[se_ Elsyed]

شكراً للأخت شعنونة .... روحي الله يسامحك ... أيه فيلم الرعب ده حرام عليكي إحنا عندنا عيال عايزين نربيهم وفيه عيال كمان مخططين بإذن الله إننا نخلفهم .... لكن بالصلاة عالنبي حكايتين من بتوعك دول والموضوع ممكن مايتمش ....

بصي يا شعنونة لو تفتكري كلام عمو س س زمان لما قال لك " إن المؤسسات الخدمية زي المستشفيات وأقسام البوليس لو تعاملوا مع كل حالة على إنها محور الكون ويا حرام ويا عيني ياختي والكلام ده .. كانوا هايبقوا زي سيادتك كده وهايسيبوا اوض العمليات ويجروا ويجلهم إستبحس ... "

لكن فعلاً زي ما قال مودي إن من كثرة البلاوي اللي بيشوفوها فقلبهم بيبقى جامد .. يعني بالله عليكي موقف الناس اللي شغالين في المشرحة أو بلاش كده الراجل عشماوي اللي بيشنق المشانيق .. لو كان قلبه طيارة ورق ورهيف ... ماكنش قعد فيها يوم "

حكيت لك انا عن صديق لنا واحنا في ثانوي القطر طير رجله الأتنين فطبعاً العبد لله قلبه زي حتة البسبوسة المتلغمطة قشطة وأي شوية هوا يطيروها فماقدرتش أروح المستشفى فأخويا هو اللي راح معاه والولد بعد ما فاق من العملية جاله إنهيار عصبي وقعد يصرخ " عايز رجلي .... عايز رجلي " جه الدكتور اللي عمل له العملية وراح شاخط فيه وقال له بتصرخ ليه يا بني أدم ... أيه يعني رجل اتقطعت طب مانا رجليه الاتنين مقطوعين اهو وراح موريلوه رجليه وطلع مركب جهازين تعويض " bngn:: ...

انصحك إنك تتفرجي على قناة حورس وقناة نفرتيتي الفضائيتان على النيل سات دول بيجيبوا فيهم عمليات " live " تـشيب .. انا مابشوفش هما اللي بيحكوا لي .

إجمدي كده اومال ده إنتي لسه ياما هأتشوفي ...

بس الحكاية كانت باينة من ساعة ماخافت من البرص .... يا عم شعنونة دي أساساً كان التكليف بتاعها المفروض تقضيه في كنتاكي ..أو قويدر على أقصى تقدير ..

[فــيــروز]

لاحول ولا قوة الا بالله العلى العظيم

الحقيقه يا شعنونه لك حق يحصل لك كل ده و اكتر

اذا كنا احنا بنقرا الموضوع بس و حاسين بالم وغثيان

لا حول ولا قوة الا بالله

الحمد لله على كل شئ وربنا يشفى كل مريض او يخفف آلامه bngn::

[sos]

اتمنى لك اجازة سعيدة....يا شانا....بدون دكتورة ....ليه...

...قلتى لى ليه....

لانك الان فوق ارض الواقع....

احمد شوقى له بيت شعر كان يدرس فى الثانوى (على م اذكر) يقول

ومن ام يذق حل الزمان ومره=فما هو الا طائش اللب نافر

<script>doPoetry()

طائش اللب نافر = مجنون

اتمنى لك التوفيق والثبات

[se_ Elsyed]

طائش اللب نافر = مجنون

قصدك أيه يا SOS ...

يعني شعنونة بتأزأز لب وتعد ترمي القشر عالناس bngn:: ؟!!!

س س مشرف وموقعاتي

[Guest Mohd Gramoun]

بسم الله الرحمن الرحيم

لا إله إلا الله...تخيلوا هذا الطفل و حالته يدخل غرفة العمليات و هو مريض بالمرض الخبيث و يخدر تخديرا كليا بالبنج فيفقد وعيه ليقوم الطبيب بمهارته بقطع رجله المريضة....هذا موقف..

و هناك موقف آخر لبنت عراقية... سليمة معافية كانت تلعب و تضحك و فجأه إنهمرت القنابل الصليبية لتنفجر في قدمها بدون مقدمات و بدون مخدر و بدون ذنب أو حاجة لتقطع رجلها فتتفتها و يتطاير لحمها كما تطايرت رجل الصبي المريض و لكن ليس في غرفة العمليات و لكنه في بيتها و امام أبيها الذي حملها و قد فقدت الوعي نتيجة الحادث المؤلم و لنا ان نتخيل مقدار الالم و الاهات المحشورة و التي صدرت ترافق صراخها قبل فقدان وعيها...

مجرامون: تم حذف الصورة لبشاعتها ... رفقا بأخوتك يا رجل .

هشام عبد الوهاب

اللهم أرحم اطفال المسلمين... اللهم أشف مرضاهم و خفف آلامهم.....

اللهم عليك بالصليبيين و اليهود و المنافقين... حسبنا الله و نعم الوكيل

حسبنا الله و نعم الوكيل

حسبنا الله و نعم الوكيل

حسبنا الله و نعم الوكيل

[sos]

ايه يا س س انت قررت تفتح مقلة والا ايه.....

لعلمك .....شانا ....مزاجها مش حلو النهارده.....وهى عارفه انك بتحاول ...تلطف من الجو...

ايه رأيك.....انا قلت اوصلك انى بافهم.....

وفى نفس الوقت باخطب ودك.......

علشان تخفف ايدك فى الحذف.....يا.......يا......مشرف......يا.....يا....موقعاتى...يا....يا...عاتى....

بس كفايه

تم تعديل 3 يناير 2004 بواسطة sos

[Salwa]

حمدلله على سلامتك ياشانا ياحبيبتى ..

انا عارفة كويس جدا انتى حاسة بايه ....

الله يكون فى عون الولد ...واهله ..

ربنا يصبرهم جميعا وينولوا الهدوء والسكينة ..

حاجة محزنة ..

لكنك ياشانا لم تذكرى لنا ........هل كان فعلا ورم خبيث ؟؟

وهل فى حالة الشك ....يجب سرعة البتر ؟؟؟

على كلامك ان الدكاترة عند الحاحك فى السؤال ..كانوا شبه متشككين ..صح ؟

طيب بناء عن ايه ...تم البتر ؟؟ وخصوصا انك تشكين فى تحليلات مرسى مطروح .

ثم ...مهما كان الأطباء قلبهم جامد ومش عارف ايه ؟؟؟ وعاوزين يضحكوا بعض عليكى ؟؟؟

هل هذا سبب .....منطقى ...اخلاقى...لكل التهريج اللى حدث فى حجرة العمليات ؟؟؟

يعنى ايه يرمى الرجل بطريقة ترعبك ؟؟؟

آسفة ياشانا ........................لو كان ماحدث ......حدث كما تصفيه ..

فهؤلاء اقل مايقال عليهم ......................رعاع.......سوقة ..

لك الله يامصر ...............

لاداعى لتبرير المهازل ....بالقول....هم قلبهم جامد وواخدين على كدة ؟؟؟

صح....واخدين على الفوضى ...

شانا ........

حاولى تمشى من هناك بأى وسيلة .......معرفش ازاى ؟؟؟

لكن وجودك هناك ...مع هؤلاء .....والنصاب......مسئول التعيين ...//جريمة //

مفروض يكون هناك مسئول قوى ...عنده ضمير ..

لاعليك ياشانا .....انتى اعظم طبيبة فى مطروح ..بلا جدال .

سلامى.

[Sherief AbdelWahab]

عدت يا شنشن و العود أحمد.. bngn::

صبرك الله على ما يحدث بعيدا عن أعين الحكومة الأولى و الجريدة الأولى و الصحفي الأول..

خلص الكلام

[الأفوكاتو]

عود حميد بإذن الله

[بنت شعنونة]

س س

شكل كدا مش ها يجمدلي قلب ابدااااااااا :huh:

فيروز... بجد ما اتمناش لحد انه شوف المنظر دا ابدا

sos

بجد يوم عن وم انا احترمك اخ سوس.. ربنا يكرمك يارب bngn::

اخ مجرمون

الله سامحك

بقولك بنام بمهدئات تقوم تعمل فيا كدا wst:: bsh:)

ماما سلوى

انا مش عاوزة امشي

بجد انا بتعلم هناك مش الطب بس لا وبتعلم الدنيا كمان

ربنا يستر

شريف وعمي الأفوكاتوا

الله يسلمكم يارب ويخليكم ليا.. bxg::

[DARWEEN]

عزيزتي شعنونه

بعد حمدالله عالسلامه ووحشتينا وأزيك والذي منه ...

وبعد كمية حقد مهولهههههههههههه كل ماأتأكد أنك حبيبة الكل في المنتدى هنا

(وش واحد أصفراوي) bngn:: bxg:: :huh:

طعا أنتي عارفه أني بأهزر :P :P :P

شوفي بقى يادكتورتنا ... wst:: bsh:) cr((:

مع كل تعاطفي مع هذا الطفل وأحترامي لمشاعرك الجميله اللي أنا عارفها كويس

على قد ما أعرف أن تعاطف الدكتور مع المريض بتاعه مهما كان لازم يكون بحدود

يابنتي أنتي لسه على أول سلمه لو عملتي في نفسك كده مع كل مريض يبقى تقعدي في البيت أحسن

وبعدين دا أنتي في قسم أسمه مرعب أصلا ... وبعدين آخرتها أيه ؟؟ لو على كده طيب حولي قسم تاني يكون أخف شويه من موضوع الأورام دا ( اللهم أحفظ الجميع يارب )

حاولي تتعاملي مع الموضوع بشوية أحترافيه

بالنسبة للظريف اللي رمالك القدم المقطوعه علشان يخوفك ... فمش عارف أقول أيه بصراحه غير أن الذوق أصبح عمله نادره جدا الأيام دي

أم موضوع التوقيع .. فأفتكري كده أحنا قلنا أيه قبل ماتسافري أول مره أصلا

الحذر والحذر ثم الحذر .... رجاء تلمسي أي حاجه أقبل ماتمسكيها ... وأختبري أي واحد قبل ماتكلميه ... وأختاري بدقه وبهدوء وأوأحذري المسائل الأداريه

ربنا ينجيكي من كل شر