معايا مية الف جنيه اعمل ايه بيهم مشروع ولا اهاجر ؟؟؟؟

[عنبو]

بص يادكتور

المبلغ قليل قوى على انك تنزل بيه مصر

ثانياً موضوع الهجره ميفعش تاخده كهروب لازم يكون مدروس ومحسوب كل خطوه فيه

ولو عاوز تهاجر يستحسن تكون متزوج ومعاك مراتك وتكون دماغها نفس دماغك هتهون عليك اقوى بداية الموضوع لانه بيكون صعب وليس سهل وممكن تشوف الاخوه الى هاجروا عملوا ايه وتعمل زيهم بس بجد موضوع توزيع المهام ده فكره ممتازه ممكن تدخل وتقرأها

وخد فى اعتبارك انك لازم تاخد موافقة والديك قبل لما تهاجر ولو انت الوحيد يبقى مينفعش بجد حتى لو هم وافقوا

راى الشخصى لازم تصبر شويه كمان فى السعوديه لحد لما تجيب مبلغ اكبر من ده وبعدين تقرر اذا كنت هتهاجر او تستقر او تقدم على الهجره وانت هنا وتمشى فيها اصل الموضوع بياخد وقت بالسنين مش سهل يعنى ؟؟

[أحمد سيف]

مش متفق مع رأي أخويا العنبي في موضوع الانتظار والزواج ... كل ما تاخذ القرار في وقت مبكر كلما كان ذلك أفضل ... حكاية تجميع الفلوس صعبة خصوصا إذا تزوجت وزادت مسئولياتك ... أنا عن نفسي باتمنى كنت ابتديت مشوار الهجره في مرجلة أبكر من حياتي كان هيبقى اسهل وأريح كثييييير بالنسبة لي من غير ما ابقى حامل همّ زوجه وأطفال ... الأوضاع في الخليج تتجه للأسوأ بالنسبة للمصريين وكل يوم بنسمع أرقام مرتبات اقل من اللي قبله لذا لا تتوقع قفزة معتبرة في دخلك خصوصا إذا ظللت بنفس المهنة والشهادة... السن الأفضل لبدء مشوار الهجرة أو مشروع العمر هو سن حضرتك وأي تأخير سيصعب عليك المشوار ... أمامك فرص في المهجر للعمل كصيدلي بعد إكمال المعادلة أو للعمل بشركات الأدوية في مجال التسويق والإدارة عند حصولك على MBA أو في مجال الأبحاث والتطوير لدى حصولك على الدكتوراه ... شوف انت ميال لأي اتجاه فيهم وابتدي خطط واحسبها كويس وربنا يوفقك.

تم تعديل 15 أكتوبر 2009 بواسطة أحمد سيف

[الترجمـان]

اعتقد إن المبلغ اللي مع حضرتك دا ينفع في مشروع شراكه في صيدلية في مكان شعبي او في التجمعات العمرانيه الجديده أو حتى في الأرياف لو حضرتك أهلك ساكنين هناك أصلا ..

يعني ممكن يكون حد من معارفك او دكتور كان زميل حضرتك ومعاه نفس المبلغ الي معاك وعايز يستثمر في مشروع صيدليه ..

وبعدين مشروع الصيدليه غير إنه مربح في كثير من الأحيان حسب المكان والخدمات الإضافيه اللي ممكن تقدم من خلاله " ومتفهمنيش غلط " فهو آمن واعتقد إن مشاكله مش كتيره ..

وبالتوفيق دائما ..

[بحار الغربة]

..... فكر انك تغير مهنتك كصيدلي ......

علي النعمه الراجل ده بيكلم صح wst::

ياريت ..... حد يقولى على طريقة وانا جاهز من دلوقتى

[om marawan]

سلام عليكم

بص يا دوك .. انا هقولك كلمتين ملهومش اى علاقة واضحة او مباشرة بكلامك

انما اتعب و اقراهم و فكر فيهم براحتك

انا راجل بشتغل شهر و شهر اجازة ... وموجود فى مصر بصورة مستمرة

مفكرتش انى اخد اجازتى و اطلع على اى بلد تانية زى ما معظم زمايلى بيعملوا

و جيت ف الاجازة اللى فاتت .. و تعب الوالد رحمه الله تعبا شديدا و اضطرينا نعمله عملية و فضلت معاه لغاية ما قام بالسلامة

و ابتدأ رحمه الله يتحرك و نخرج سوا و اموره الصحية بقت تمام التمام

لدرجة انى و انا مسافر .. اصر انه يودينى المطار زى العادة

و سافرت و انا مطمئن عليه تماما بفضل الله

بعدها بحوالين 25 يوم بالظبط تعب بابا و دخل المستشفى تانى و بقيت بتابعهم بالتليفون كل يوم

على امل انى نازل مصر بعد 10 ايام بالكتير

توفى والدى يوم الجمعه و عرفت الخبر لحظتها و ملقتش طيران الا فى صباح السبت

يعنى اتحرمت من انى اشوف والدى قبل وفاته

اتحرمت من انى اشارك ف غسله و تكفينه و دفنه

اتحرمت من انى اكون اول واحد ياخد عزاه

مقمتش بالدور المطلوب منى فى ان املى عيون امى بوجودى جنبها فى موقف بالصعوبة دى

مقمتش ب ولا حاجة من ده رغم انى الابن الاكبر

قولى بقى يا دوك

الشهادات و الدولارات و العمارات تساوى موقف زى ده

صدقنى

متساويش

اولا ياباشمهنس ياسر البقاء لله ربنا يغفر له ويرحمه ويرزقه الجنة والفردوس الأعلى ويرحم موتانا وموتى المسلمين

وعاوزة اقول لحضرتك ان ده نفس اللى حصل لى فى وفاة والدى باسثناء انى كمان كنت بقالى شهور ماشفتوش وكان برضه اتحسن الى حد ما قبل وفاته رحمه الله

انا عارفة شعورك لانى الى حد ما شغلنى كتير تفكير انى ليه ماشفتوش و هل ده لانى بعدت وسافرت .....احساسى بالتقصير اخد منى كتير ومازال طبعا

لكن ابو مروان اللى شفته قبل قرار سفرنا تحت رجل والده حتى لحظة وفاته قالى ان التقصير ده احساس طبيعى ناحية الاب لاننا مهما عملنا مقصرين

الحمد لله على كل حال و رحمة ربنا سبحانه وتعالى خلتنى افكر فى ان كل شىء هو ترتيب من الله وكل حاجة حصلت كانت لحكمة لا يعلمها الا الله يمكن مانعيش الحكمة فى وقتها ولكنها اكيد الافضل والاحكم

عاوزة اقولك هون على نفسك اللقا نصيب وخللى الموضوع ده حافز لانك تكثر من الدعاء له فى كل وقت وطبعا لو فى السعودية تقدر تعمل له عمرة

وصدقنى وقت ماهتكون قدام الكعبة بتدعى لوالدك هتحس انك اقرب ماتكون له من قربك له وقت الدفن

وحتى لو ماكنتش بجانب والدتك ربنا يصبرها فى الوقت ده زى انا كمان كبنت كبيرة ماكنت فتاكد ان ربنا سبحانه وتعالى كان بجانبها وهىء لها من الصبر اكثر ماكان فى وجودك

اسفة على خروجى عن الموضوع

لكن من منطلق نفس الكلام عاوزة اقول لبحار الغربة انه لا يقدم على اى خطوة بدون الاكثار من صلاة الاستخارة

هى الحاجة الوحيدة اللى ممكن تنهى تماما اى ندم ناحية اى طريق هياخده

هيحس ان اى حاجة مرت عليه او هتمر عليه مهما كانت مش حلوة فهى خير واختيار ربنا عز وجل له

بالنسبالى وعن رأيى الخاص

بالرغم من كل مميزات الهجرة فأنا ضدها قلبا وقالباااا

[عبير يونس]

..... فكر انك تغير مهنتك كصيدلي ......

علي النعمه الراجل ده بيكلم صح smk:

ياريت ..... حد يقولى على طريقة وانا جاهز من دلوقتى

حضرتك لازم تحدد ما يناسب ميولك و امكانياتك

تشوف ايه اللي بتحب تدرسه

ما ينفعش حد يختار لحضرتك

و بعدين زي ما قالت الأخت ضحى

عشان تدرس برة لازم تكون بتحب الدراسة

لأن دول ناس مش بيلعبوا

دراسة يعني دراسة

عشان كده لازم تكون حابب اللي حتدرسه

ده واحد من المواقع اللي فيها كليات الصيدلة في كندا

http://www.a2zcolleges.com/medical/Pharmacy/CANADA.html

لو كنت حابب مهنتك

ممكن تدرس في برامج في الجامعات دي

يعادلوا لحضرتك اللي درسته و تكمل الباقي

الصيدلة مستقبلها حلو في كندا

طبعا لو حضرتك عايز تغير الكارير

فده موضوع تاني

و لازم برضه حضرتك اللي تقرر

كمان في حاجة مهمة جدا جدا

اللغة أخبارها ايه؟

انجليزي أو فرنساوي لكندا

و انجليزي قوي جدا لأستراليا

دي نقطة في غاية الأهمية

أصلا قبل الفيزا لازم تمتحن ايلتس اكاديمك و ده أصعب من ايلتس جنرال

و لازم تجيب فيه اسكور عالي كمان

غالبا الجامعة اللي حتقدم فيها هي اللي بتحدده

و خللي بال حضرتك

لو رايح تدرس

حتحتاج تشتغل برضه بارت تايم مع الدراسة عشان طبعا المبلغ اللي مع حضرتك مش حيكفي الدراسة كاملة

و طبعا لازم تكون الدراسة بالنسبة لحضرتك متعة

عشان تقدر توفق بين الدراسة والعمل

عدم وجود مسئوليات كالزوجة و الأولاد ممكن يساعدك

حضرتك ممكن تسأل الصيادلة اللي راحوا هناك

و همة يدلوا حضرتك أكتر

دور في مواضيع قسم الحياة والهجرة لكندا

أنا رأيي لو تقدر على الدراسة

سافر عليها و ما تستناش الهجرة

ومن هناك تعمل الهجرة

زي ما هوموجود في الرابط اللي كتبته في مداخلتي الأولى عن الدراسة في كندا

و ده الأسرع

لأنك مش حتقدر تلاقي وظيفة من غير دراسة كندية أو خبرة كندية

خللي بال حضرتك لازم عشان تقدم طلب فيدرال للهجرة

لازم تكون مهنة حضرتك في الليستة

و حسب الليستة مهنة صيدلي مش موجودة حاليا

عشان كده أكتر من صيدلي

حولوا للهجرة لكيبيك

ممكن حضرتك تسأل الأستاذ حسام يوسف على الخاص على التفاصيل

و عموما دي الليستة و هي بتتغير كل فترة حسب حاجة سوق العمل الكندي

مين عارف يمكن ترجع تاني

http://www.cic.gc.ca/english/immigrate/ski...ctions.asp#list

و ده لينك بيعملك سيلف اسيستنت

http://www.cic.gc.ca/english/immigrate/ski...s/Education.asp

ربنا يوفقك

تحياتي

wst::

[Alrefaey]

..... فكر انك تغير مهنتك كصيدلي ......

علي النعمه الراجل ده بيكلم صح wst::

ياريت ..... حد يقولى على طريقة وانا جاهز من دلوقتى

شوف ياعزيزى تعالى نكلم كلام عملى شوية

اولا الهجرة لكندا فيدرال مينفعش عشان مهنة صيدلى خارج اللستة لو معاك لغة فرنسية احسب درجات وشوف موضوع كيبك , قبل ما تفكر فى الهجرة الى استراليا احسب اختبر ايلتس وشوف درجاتك كام لو توتال اسكور 7 يبقى تمام

عشان تمسك جميع الخيوط فى يدك ولكى يصبح الهدف محدد انت عايز جنسية وباكج كبير (100 الف ليس هو المبلغ المناسب حاليا لبناء مستقبل شاب صيدلى مبتدء)

تعمل ايه ,الاول شوف امكانياتك ومتطلبات الهجرة اولا

لو وجدت امكانياتك متناسبة مع الهجرة الى دول ما قدم على الهجرة من الخليج ,انزل بعدها مصر نهائى على اعتبار ان الخليج بالنسبه لك صعب انك تكمل فيه بهذا الوضع

استغل وقت انتظار الهجرة فى مصر كوقت ايجابى كيف ؟

غير المهنة قدم فى اى جامعة مصرية دبلومة تسويق او MBA فى مجال الماركتينج وحاول تشتغل فى الدعايا فى مصر + الاستعداد للهجرة + اذا كنت هتخطب اوشىء +استثمر بقية المبلغ فى اى مشروع

لو ربنا تم عليك بخير زى ما انت مرتب بعد السنتين هيكون ايه الوضع ان شاء الله

- الاندنج لبلد المهجر

- وظيفتك PRODUCT manegerاومسئول تسويق او ماشنديزر فى شركة صيدليات او مدير مجموعة او وظيفة فى شركة ادوية

- مؤهلك هيكون فى مجال التسويق ولا تفكر المعادلة لأن طموحك ليس الاستقرار فى بلد المهجر ولكن الحصول على الجنسية والعوده الى بلدك

بعد الاندنج ارجع على الخليج واشتغل شوية حتى تحصل على الجنسية وبعد خمس سنوات

انت الان كندى او استرالى وعملك هو ماركتينج مانجر فى شركة ناشونال او انترناشونال فى الخليج ويبقى كدة حققت طموحك باذن الله

ماكتبت اعلاه ليس حلم صعب الوصول اليه اخى الكريم ولكنه واقع اراه بعينى يوميا فى مجالنا

[se_ Elsyed]

والله نفسي انسدت من الاراء المكسرة للمجاديف دي

تصبحوا على خير مش لاعب معاكم ولا هاتكلم عن افكار ولا احلام طالما الحياة بقت كلها كوابيس

[بحار الغربة]

تم حذف جزء غير لائق من الموضوع

سي السيد

الادارة

الاخ سى السيد .... كلمة غير لائق ربما يظن البعض بها اننى كتبت كلاما قبيحا .... الوصف الذى وصفت به الشعب السعودى كان نتيجة ما اشعر بيه من تفرقة عنصرية كلنا نلمسها بوضوح

شكرا

[ibnalnafees]

بسم الله الرحمن الرحيم

السلام عليكم ورحمة الله وبركاته - اخي الكريم انصحك لله واستخير الله بعد ذلك

1- انت خرجت من مصر المحروسة وماعندك حاجة يعني ( صفر اليدين ) الان رب العالمين اكرمك وصار عندك دراهم معدودة لو قارنت نفسك بصغار التجار في مصر وماتملكه الان مش حيكفيك خلو مكان لمشروع المستقبل الذي انت تفكر فيه .

كذلك هذا المبلغ لن يكفيك في كندا او استرليا او امريكيا اكثر من ستة اشهر وبعدها راح تبقى على الحديدة ولا شئ معك وشهادة الماجستير التي تفكر فيها لن تفعل لك شئ في مصر فمثلك كثر في مصر بلا عمل .

من قال لك انك تستطيع ان تاخذ الجنسية باربع سنوات بكندا ؟ بوضعك الحالي لن تأخذها ممكن تأخذها لو دخلت هجرة من مصر او لجوء من اي بلد اخر او تزوجت بامراة كندية

فلو اخترت الامر الاخير تكون خسرت نفسك ولا اريد ان اقول دينك لكن دين اولادك من بعدك والعياذ بالله ولن تستطيع ان تجلب والديك لعندك الا اذا كان مرتبك عاليا - ومن ناحيتك لن تستطيع العودة لمصر والعيش فيها وعلى فرض انك تستطيع فان زوجتك واولادك لن يستطيعو ا وسوف ترى نفسك وحيدا وتجبر على البقاء الى ماشاء الله - اسئل كم يعانون اصحاب العائلات في كندا او استرليا من ناحية التربية الخلقية للابناء والزوجات .

لهذا اخي الكريم انصحك بأن تبقى في مكانك حيث انت طالما رب العالمين مسهل لك الامر فانت بنعمة تحسد عليها من قبل الاخرين - واغسل همك وحزنك بزيارة الحبيب المصطفى بعد زيارة بيت الله الحرام في كل مرة .

واعمل طلب زيارة لوالديك واتركهم عندك ينعمون بالجوار ورغد العيش واطلب منهم الدعاء لك بالزوجة الصالحة التي سوف تنسيك ماانت فيه الان من وحشة وضيق صدر

واحتمل اخوانك المسلمين مهما كانوا على درجة من السوء فهم اخوانك وارحم من الاخرين

اما عن الفلوس التي بحوزتك اشتري بها شقة او ارض او مخزن وبالتدريج سوف تمتلك باذن الله وعندها تؤجر وتستفيد باذن الله

اياك ثم اياك ثم اياك ان تستقل النعمة التي انت فيها فعقوبة عدم الشكر زوال النعم والله اعلم اخ لك بالله جرب اوربا والسعودية وبعض الدول العربية

ووصل اليك هذه الخبر’ والتجربة

[om marawan]

بسم الله الرحمن الرحيم

السلام عليكم ورحمة الله وبركاته - اخي الكريم انصحك لله واستخير الله بعد ذلك

1- انت خرجت من مصر المحروسة وماعندك حاجة يعني ( صفر اليدين ) الان رب العالمين اكرمك وصار عندك دراهم معدودة لو قارنت نفسك بصغار التجار في مصر وماتملكه الان مش حيكفيك خلو مكان لمشروع المستقبل الذي انت تفكر فيه .

لهذا اخي الكريم انصحك بأن تبقى في مكانك حيث انت طالما رب العالمين مسهل لك الامر فانت بنعمة تحسد عليها من قبل الاخرين - واغسل همك وحزنك بزيارة الحبيب المصطفى بعد زيارة بيت الله الحرام في كل مرة .

واعمل طلب زيارة لوالديك واتركهم عندك ينعمون بالجوار ورغد العيش واطلب منهم الدعاء لك بالزوجة الصالحة التي سوف تنسيك ماانت فيه الان من وحشة وضيق صدر

واحتمل اخوانك المسلمين مهما كانوا على درجة من السوء فهم اخوانك وارحم من الاخرين

فعلا كل مكان فى العالم فيه ناس وناس

لكن السعودية الوحيدة اللى فيها المكان اللى ينسيك همك او حزنك

أحييك على صدق النصيحة

وخاصة دعوته لوالديه بزيارة السعودية ان كان فى استطاعته من حيث استخراج الزيارة وغيرها من المعاملات

وفقكنا الله واياكم لما يحبه ويرضاه

[بحار الغربة]

اياك ثم اياك ثم اياك ان تستقل النعمة التي انت فيها فعقوبة عدم الشكر زوال النعم والله اعلم اخ لك بالله جرب اوربا والسعودية وبعض الدول العربية

ووصل اليك هذه الخبر’ والتجربة

اخى الكريم جزاك الله خيرا على النصيحة

انا لا اتقل نعمة اللله ابدا وله المنة والفضل ... فقد كنت معدما ونشأت فى اسرة فقيرة ولم يكن حلمى فى يوم من الايام ان امتلك مبلغ حتى 20 الف جنيه ولكن يا اخى كلما كبر الانسان فى الحياة تعلم الكثير ... صدقنى معاملة الشعب السعودى لاى انسان يتعامل مع جمهور فيها نوع من الاستعلاء وانا اشد ما ابغض ان يلمح لى شخص انه افضل منى ( ناهيك عن اننى مقتنع اننى الحمد لله الافضل ) او يلوح بحال بلدك المتدنى ومابها جوع او ان يقول لك انت من بلاد الراقصات ... والاسبوع الماضى تناقشت مع احدهم فقال لى اننا افضل شعب فى العالم ولهذا اعطانا الله البترول ولان الفلسطينى وسخ ( قالها بنفس اللفظ ) لهذا يذيقه الله مرارة الهزيمة والذل على ايدى اليهود فقلت له لو قست الامور بهذا المقياس فالامريكان افضل منكم لهذا اعطاهم الله العلم فقال نعم الامريكان والسعوديين هم افضل الشعوب يكفى اننا ما بنتغرب ونتبهدل خارج بلادنا ( يلمح على مصر ) .... واخر وهو من اهل العلم واحسبه شيخا تقيا يقول لى انا اعلم ان النصر للامة سيأتى من مصر لكنى حقيقة انا لا احب المصريين لأنهم كانوا سبب فساد كل العالم العربى ... وسمعت ماهو افظع من ذلك وهذا شيخ ومربى اجيال ( ناظر مدرسة ) ومن اهل الدعوة .

مع احترامى لرأى حضرتك .... انا استطيع ان اهاجر واعيش فى بلد كلها يهود وسأتقبل الامر ولكن هنا لا ... لان الاسلام جعلنا احرارا ومهما ظلمك اليهودى والنصرانى فهو على غير ملتك اما ما يحدث لنا جميعا هنا والله فيه مهانة عظيمة

[بحار الغربة]

غير المهنة قدم فى اى جامعة مصرية دبلومة تسويق او MBA فى مجال الماركتينج وحاول تشتغل فى الدعايا فى مصر + الاستعداد للهجرة + اذا كنت هتخطب اوشىء +استثمر بقية المبلغ فى اى مشروع

لو ربنا تم عليك بخير زى ما انت مرتب بعد السنتين هيكون ايه الوضع ان شاء الله

- الاندنج لبلد المهجر

- وظيفتك PRODUCT manegerاومسئول تسويق او ماشنديزر فى شركة صيدليات او مدير مجموعة او وظيفة فى شركة ادوية

- مؤهلك هيكون فى مجال التسويق ولا تفكر المعادلة لأن طموحك ليس الاستقرار فى بلد المهجر ولكن الحصول على الجنسية والعوده الى بلدك

بعد الاندنج ارجع على الخليج واشتغل شوية حتى تحصل على الجنسية وبعد خمس سنوات

انت الان كندى او استرالى وعملك هو ماركتينج مانجر فى شركة ناشونال او انترناشونال فى الخليج ويبقى كدة حققت طموحك باذن الله

ماكتبت اعلاه ليس حلم صعب الوصول اليه اخى الكريم ولكنه واقع اراه بعينى يوميا فى مجالنا

كلام حضرتك جميل اوى و ان شاء الله هاخده فى الحسبان ... جزاك الله خيرا

مازلت اوجه شكرى لكل من علق على الموضوع وابدى رأيه

[khaleds]

يا اخى هاجر ميه فى الميه او ماترجعش مصر

مصر مالهاش مستقبل فى اى حاجه

وانتا مش هتفيد اهلك بحاجه لما تقعد جمبهم وانتا حالتك الماديه تعبانه ونفسيا ندمان على وضعك ؟؟

يا اخى صدقنى هتندم كتير بعد 10 -15 سنه لو قعدت فى البلد دى

والله انا عندى استعداد اقعد فى البلد فى على حالتها دى لكن للاسف كل سنه بالظبط البلد بتتغير

تغيير كبير للاسوء والله اعلم الايام مخبيه ايه

بالنسبه للتدين والاخلاق وده على الوطن العربى عموما ومصر خاصه انا شايف للاسف معدش يفرق كتير اتفرج على مناظر البنات فى الجامعه واتفرج على الحشيش والسجاير والشيشه بقت حاجه عاديه جدا جدا جدا وترك الصلاه والعلاقات والكلام ده (انا بتكلم على اغلب الشباب الى بشوفهم ) الانحراف بقه سهل جداللولاد والبنات

والانحراف بقه رغبه (انا عايز اصيع)

اتفرج على الناس الى ما بتصليش الا فى صلاه الجمعه و صلاه العيد وصلاه القيام ليليه 27 ... ولا تعليق طبعا

بالنسبه للتعليم .. انا فاكر فى ثانوى كان بيصعب عليا المدرسين من كتر ما العيال بيقعدو يشتغلوهم .. وطبعا انتا عارف الدنيا ماشيه هنا ازاى فى التعليم دروس..تلقين ...ثانويه عامه ....كليات قمه ...العسكريه والشرطه

بالنسبه للاجتماعيات وكده .. انا شايف ان الناس طيبه وكل حاجه بس الدنيا بقت صعبه ومعدوش زى ما كان التلفزيون بيقول

بالنسبه لاقتصاديا مرتبات حقيره ومشاكل وروتين .. مضاربه بالعقارات والاراضى .. اقتصاد كل اعتماده على مصادر خارجيه (السياحه وقناه السويس والعاملين بالخارج) ... تضخم بالعبيط ... بطاله .. عشوائيات بكل مدينه .. فساد بالهبل ..بنيه تحتيه اقل من التحتيه

جهل وتخلف ..

صحيا .. وزراه الصحه بتجيب امراض

امنيا .. مصر تنعم بالامن والامان والشرطه فى خدمه الشعب ونظامها ديموقراطى نزيه ( الحق يقال)

الخلاصه

مصر سيئه جدا جدا جدا جدا و الدول الخليجيه سيئه جدا جدا والهجره سيئه جدا

وانتا اعمل حساب المستقبل كويس جدا علشان ترجعش تندم

ربنا يوفقك ويوفق البلد دى

تم تعديل 16 أكتوبر 2009 بواسطة khaleds

[بحار الغربة]

كده نسبة الناس المشجعة على الهجرة اعلى كتير من الناس اللى بتأيد انى اقعد فى مصر او الخليج

ومازال الاستفتاء قائما ؟؟؟؟

صوتك أمانة

[Alshiekh]

1- انت خرجت من مصر المحروسة وماعندك حاجة يعني ( صفر اليدين )

ربما لم يكن يملك المال

ولكنه كان ولايزال يملك ماهو اثمن وافضل واغلى من المال

انه يملك العلم والعقل وهما افضل وادوم من المال الذى نصنعه نحن.

الابن الفاضل / بحار الغربة

لو كانت فكرة الهجرة الى استراليا مضمونة ، فتوكل على الله ، واعمل اتصالات بالجامعات هناك قبل السفر فربما تجد وظيفة research assistant لو كنت من محبى البحث والتحصيل العلمى ، فتضمن بذلك مرتبا يكفيك لتدبير مصروفات الاقامة حتى تتم دراسة الماجستير ، وربما تتطور الامور معك وتستكمل دراستك للدكتوراه.

الـ 100 الف مبلغ صغير لبدأ مشروع مستقل هذه الايام خاصة انك تريد ان تنتقل للاسكندرية ، لكن يمكنك البحث عن عمل مناسب فى احدى الشركات الكبيرة فقدر علمى انهم يعطون رواتب معقولة قد تفوق ماتحصل عليه فى السعودية.

وبالتوفيق ان شاء الله

[herohero]

سيدي انسى موضوع المشروع او المناسب انك تفتح صيدليه متواضعة لان اسعار الصديدليات ف اسكندرية اكيد غالية طبعا

لكن عليك وعلى الهجرة اولا دينك تقدر تمارسه عادي وانا ليا قريبي اوالاده احسن من اولاد ف مصر كتير جدا والهجرة مستقبل ليك ولاخواتك ولاسرتك والله كلها

جنسية تضمن لحاملها الاحترام ، انا لا اعيب ع الخليجي ف تعامله مع المصريين وع فكرة السعودي ارحم مليون مرة من الكويتي ، الكويتي بيتعالى ع السعودي والسعودي يتعالى ع المصري وف الاخر لا مصر ولا السعودية ولا الكويت لهم اي وضع ف الخارج الهند لها قوتها عن اي دولة عربية

يعني انا بعتبر تعالي السعودي ف تعامله نوع من النقص وهو مش كلهم كده بصراحه يعني ف مناقشات معينة ممكن تلاقي ده ولو قالك ان المصرية راقصة فهو محق

هل اعلامنا اظهر مصرية غير كده اعلامنا بيحاول يظهر نا اننا شعب اما عشوائي ومتعاطي للمخدرات ومنحرف ومرتشي او قواد ونساء عاريات

تنزل مصر مش هتلاقي كده انا اتقالت لي انا نزلت مصر مالقيتش العري اللي ف الافلام ده طب بتعملوا كده هل مستوى اعلري ف الافلام هو ده اللي ف الشارع

انا لا انظر لتعليق الخليجي لكن هل ده بيسعدنا لما نلاقي افلامنا كمصريين بقت كلها تصور لك ان المجتمع بقى فوضوي اه المجتمع فيه سلبيات كتير بس صورتنا احنا بنشوها قوي

وياريت كمصريين مانغلطش ف بلدنا ادام الغرب بينا وبين بعض ننتقد انما ادام الغريب لا

وياريت بلاش نقول ان البلد ده محدش عارفنا فيها فنعمل كل شيئ والله بيتقال مصري مش محمد ولا احمد بيتوصم كل المصريين بفعلتك

لكن سيدي توكل ع الله ف الهجرة ولك كل التوفيق ولا تحكم ع الخليج من السعودية وخاصة اهل الرياض وضواحيها لانهم بدو منغلقين ع نفسهم غير اهل جدة

سيدي انا كنت ف دبي من يومين قمة الرقي ف التعامل وبصراحة حسيت ان ف بلد مرغوب فيا الراجل بتاع الجوازات بيقولي انا بحب مصر واي مصري بحترمه لانه ناس محترمين وقمة الرقي ف التعامل وده سببه ايه مع ان الامارات كانوا بدو السبب هو الانفتاح ع العالم مما ادى الى تغير ف الشخصية اما مجتمع مغلق ع ذاته عايش ف الوهم انه شعب الله المختار وهو مليئ بالتناقضات هتنتظر منه ايه

[doha]

بسم الله الرحمن الرحيم

السلام عليكم ورحمة الله وبركاته - اخي الكريم انصحك لله واستخير الله بعد ذلك

1- انت خرجت من مصر المحروسة وماعندك حاجة يعني ( صفر اليدين ) الان رب العالمين اكرمك وصار عندك دراهم معدودة لو قارنت نفسك بصغار التجار في مصر وماتملكه الان مش حيكفيك خلو مكان لمشروع المستقبل الذي انت تفكر فيه .

كذلك هذا المبلغ لن يكفيك في كندا او استرليا او امريكيا اكثر من ستة اشهر وبعدها راح تبقى على الحديدة ولا شئ معك وشهادة الماجستير التي تفكر فيها لن تفعل لك شئ في مصر فمثلك كثر في مصر بلا عمل .

من قال لك انك تستطيع ان تاخذ الجنسية باربع سنوات بكندا ؟ بوضعك الحالي لن تأخذها ممكن تأخذها لو دخلت هجرة من مصر او لجوء من اي بلد اخر او تزوجت بامراة كندية

فلو اخترت الامر الاخير تكون خسرت نفسك ولا اريد ان اقول دينك لكن دين اولادك من بعدك والعياذ بالله ولن تستطيع ان تجلب والديك لعندك الا اذا كان مرتبك عاليا - ومن ناحيتك لن تستطيع العودة لمصر والعيش فيها وعلى فرض انك تستطيع فان زوجتك واولادك لن يستطيعو ا وسوف ترى نفسك وحيدا وتجبر على البقاء الى ماشاء الله - اسئل كم يعانون اصحاب العائلات في كندا او استرليا من ناحية التربية الخلقية للابناء والزوجات .

لهذا اخي الكريم انصحك بأن تبقى في مكانك حيث انت طالما رب العالمين مسهل لك الامر فانت بنعمة تحسد عليها من قبل الاخرين - واغسل همك وحزنك بزيارة الحبيب المصطفى بعد زيارة بيت الله الحرام في كل مرة .

واعمل طلب زيارة لوالديك واتركهم عندك ينعمون بالجوار ورغد العيش واطلب منهم الدعاء لك بالزوجة الصالحة التي سوف تنسيك ماانت فيه الان من وحشة وضيق صدر

واحتمل اخوانك المسلمين مهما كانوا على درجة من السوء فهم اخوانك وارحم من الاخرين

اما عن الفلوس التي بحوزتك اشتري بها شقة او ارض او مخزن وبالتدريج سوف تمتلك باذن الله وعندها تؤجر وتستفيد باذن الله

اياك ثم اياك ثم اياك ان تستقل النعمة التي انت فيها فعقوبة عدم الشكر زوال النعم والله اعلم اخ لك بالله جرب اوربا والسعودية وبعض الدول العربية

ووصل اليك هذه الخبر’ والتجربة

ماشاء الله تبارك الله .. ربنا يكملك بعقلك .. كلام موزون وبصراحه لم اكن استطيع ان اكتب افضل منه .. ياريت الاخ الفاضل صاحب الموضوع يتوقف عند الرد ده بالذات ..

[الباشمهندس ياسر]

سيدي انسى موضوع المشروع او المناسب انك تفتح صيدليه متواضعة لان اسعار الصديدليات ف اسكندرية اكيد غالية طبعا

انا نفسى اقعد احكيلكم قصص نجاح فوق الباهرة بدأت بمبالغ ضعيفة

و الكلام ده ف خلال الخمس سنين اللى فاتت مش من ايام الانفتاح ولا حاجة

و ان شاء الله هعملوكم موضوع عن كده

[Alrefaey]

تعقيبا على نصيحة بعض الاخوة الافاضل للاخونا بحار بالابقاء على وضعة الحالى .

اولا لازم يكون للانسان هدف وطموح وامال ولكى يحقق هذا الهدف ويصل الى طموحة لازم يكون هناك مناخ مناسب يحيطة هذا بالاضافة الاساسية وهى توفيق الله لهذا الشخص

يا أخوانى الصيدلى فى الخليج وخصوصا صيدليات الشوارع (, retail pharmacy & st,pharmacy,) بيواجه يوميا سيل من الاهانات والعنصرية واحيانا الطعن فى زمته والتعدى علية باساليب كثيرة بالاضافة الى دوامة الشاق الذى يتعدى 12 ساعة يوميا ويترك فى صيدلية مع عامل وحيد فى صيدلية عهدتها تتجاوز المليون احيانا واى سرقة او عجز بيخصم عليه هذا بالاضافة الى حجم الضغط النفسى من ادارته .

الصيادلة ومن له قريب صيدلى هيعرفوا معنى الكلام ده ولكن اللى بيشوف المهنه من بعيد بيعتقد غير ذلك وبيرى الجانب المادى فقط وياليت الجانب المادى مجزى

يا اخوانى متوسط رواتب الصيادلة اللى انتم بتشفوهم مابين 4 و5 الاف وبدل سكنه لا يتجاوز 7 و8 الاف مما بيجعله يضيف راتب ثلاث شهور الى بدل سكنه كى يأخذ سكن مناسب .

الاخ بحار قدر يوفر ما وفره اعلاه عشان كان عازب وبيوفر من بدل سكنه لكن لو اتجوز وعمل استقدم ونزل كل سنه اجازه هيعقد مش اقل من 8 سنين اضافية كى يكون نفس المبلغ .

ما عجبنى بعض المداخلات التى مفادها احمد ربك على اللى انت فيه ولا تتبطر على النعمة لتزول

ومين قال ان الرجل مش حامد وشاكر بس الفكرة انه عنده طموح وامل انه يحسن من وضعه فى مناخ مختلف وهو شايف ان المناخ الحالى مش هيقدر يتقدم فيه خطوة

عزيزى بحار شوف الصيادلة القدامى هنا فى الخليج واللى بقالهم 10 سنوات واسألهم انتم عملتم ايه فى مصر ,بعدها هيتضح لك الامر استفيد من اخطاء الناس القدامى ولا تكن نموذج مكرر للاسف بعتبرة فاشل من وجهة نظرى .