Jump to content
ArabHosters
Ebn Sina

بعد ثلاث سنوات فى الغربة، وداعا يا سعودية..... وهذه هى مشاهداتى !

Recommended Posts

كنت دائما أؤمن أن هناك ثلاث تجارب فى حياة أى إنسان تثرى خبراته وتعيد صياغة شخصيته وتصقله إنسانيا ، وهم الغربة والجيش و............ السجن ! .....وها قد خضت إحدى هذه التجارب..... وإن كنت لا أستبعد أن أخوض أى من الباقيتين ...وربما كلاهما !!

قد يكون هذا الأمر لا يعنى البعض ولا يهمهم أن يسمعوا ما سوف أقوله ....فما سأقوله فى النهاية هو إنطباعات " شخصية " عن الفترة التى قضيتها فى السعودية ، وهى إنطباعات تحمل وجهة نظر صاحبها وذلك حتى تكون الأمور واضحة من البداية......وأيضا حتى لا أقع فى فخ التعميم !

و سأفرد مساحة للحديث عن بعض ممن عرفتهم فى الغربة ........ سواء من المصريين أو من غير مصريين....فهم فى النهاية نماذج قد يكون من المهم للبعض ممن لم يخض تجربة الغربة بعد أن يتعرف عليها .....فربما يقابل نماذج مشابهة وإن إختلفت الأسماء !

أزعم أننى أجيد تكوين العلاقات ....كما أننى أجيد إعادة صياغتها.... فضلا عن "فلترتها" ....إذا إستلزم الأمر !

ما بين أشخاص أعدت إكتشافهم .....وأخرون سقطوا من " الذاكرة " .....وأخرون سقطوا من " النظر" ! ..سأتحدث إليكم بكل صراحة ....سأتحدث و أعلم أن صراحتى تلك قد تثير فضول البعض ...وتأمل البعض الاخر .......وربما تثير " حفيظة " فصيل ثالث !!

سأحدثكم عن النفط وأمواله....، سأحدثكم أيضا عن "ثقافة" النفط .....كما سأحدثكم عن

" المُتَنفطّين"" من أبناء جلدتنا !!!

سأحدثكم عن مصر فى عيون شاب مغترب .....وعن مصر فى عيون غيره من المصريين ...مصر فى مشهد بانورامى من الخارج .....سأحدثكم عن مصر فى عيون غير المصريين أيضا .....سأحدثكم عن مصر-كما رأيتها من هنا - ...بين مطرقة" النفطنة "- من النفط - وسندان "التشيع" !!

كما سأحدثكم عن الشيعة وأفكارهم !

والأن وأنا على اعتاب مغادرة الخليج-إلى غير رجعة- ...آثرت أن ألخص تجربتى ، والتى" أزعم" أنها كانت ثرية فى سطور مختصرة بلا إغراق فى التفاصيل درءا للملل .

ها ايه رأيكم أتكلم ولا..........؟! لو عايزنى أذيع قولوا ذيع .....مش عايزنى أذيع قولوا ما تذيعش وأنا أوعدكم إنى

مش هذيع !!!

أنا شاب لكن عمري ولا ألف عام

وحيد ولكن بين ضلوعي زحام

خايف و لكن خوفي مني أنا

أخرس و لكن قلبي مليان كلام

عجبي !!

[/center]

Share this post


Link to post
Share on other sites

سيدي العزيز انا ف راي ان العمل ف دولة من دول الخليج ليس غربة ، فاللغه نفسها والفكر هو نفسه ، فاذا افترضنا ان الخليج سلوكيات اهله هي سلوكيات الطفرة النفطية اليست هي السلوكيات الموجوده حاليا ف مصر اليس وقت الطفرة النفطية واكبه انفتاح السداح مداح ف مصر وما افرزه حاليا من اجيال لا تختلف كثيرا عن ابناء الطفرة النفطية بل انني ازعم ان شبابنا المصري لو عنده الامكانيات المادية اللي موجوده ف الخليج لكان فجر واعني هذه الكلمة بكل ما فيها انا شوفت ابناء الطفرة ف مصر وكيف هم صدقني اللي ف الخليج ارحم سيدي عليك بالذهاب الى مساكن شيراتون ف القاهرة بعد العصر لترى العجب من فساد وانحرافات ف هذه المنطقه وبالاخص دخلة الاتوستراد

اليست هذه من ثقافة الطفرة ، سيدي طفرة الخليج جاءت مفاجئة وكذلك طفرة الانفتاح ف مصر هل تتحدث عن عدم تقييم الشهادات وهل تجد هذا التقييم ف مصرنا

ان المال هو المتسيد اليس هذا الوضع ف مصر

سيدي للاسف الغربة ف الخليج كالغربة ف مصر ، الغربة هي غربة النفس لكن للاسف من تجارب اللي اعرفهم غربة اوروبا او كندا غربة راقيه صحيح هي غربة فعلية من لغة ودين لكن سيدي سلوكيات محترمة وراقية جدا جدا

واما عن ان الغربة ف السعودية تختلف عن بقية دول الخليج عن تجربة لا تفرق ، الفرق ان ف السعودية لازم الستات تلبس عبايات وده بيفرق مع الشباب انما المتزوجين بيطون شيئ كويس لزوجاتهم لانهم مش هيشوفوا غيرهم

اللي بتختلف فعلا دبي والسبب ان المغتربين هم مصدر دخل هذه الامارة والعجيب ان احد الاخوة البنانيين قالي لو روحت ابوظبي وتعاملت مع اماراتي هتشتم رائحة الطفرة النفطيه ف كلامه عكس دبي

انا ف انتظار سماع تجاربك وسماع تجاربك لما تنزل مصر واخشى ان تصل ان الغربة ف مصر والخليج لانها غربة ذات اختلاف قيم الانسان عن ما يحيط به

Share this post


Link to post
Share on other sites

بداية أشكر كل الأعضاء الأفاضل الذين شجعونى بردودهم الودودة على أن أسرد رؤيتى لتجربة الغربة فى السعودية فى خلال الثلاث سنوات المنصرمة ، الشكر موصول للأعضاء الأفاضل احمد سيف ،Mama Nona ،أبو عمر،hosambob،Hamoudi، تامر مصطفى ،herohero،Aboueyadalex ،محمد العنبى ،Mamdowh،Aboraiamba،الرحالة باشا، Raouf والعزيزة مدام Jessica....

لا أخفيكم سرا إذا قلت اننى لم أكن "متحمسا" لنشرها باعتبارها شأن خاص ولكننى رأيت انها تجربة مررت خلالها بخبرات أصقلتنى على المستوى الشخصى وجعلت نظرتى الى كثير من الأمور أكثر هدوءا ....وأكثر عمقا ! ،مما يجعلها فى ظنى قد تكون مفيدة للبعض ولو من باب تبادل الخبرات !

وقبل أن ألخص تجربتى فى السعودية فى مشاركتى القادمة بحسابات المكاسب والخسائر أريد ان أوضح بعض النقاط التى ربما تغيب عن أذهان البعض :

1- "إنطباعاتى" عن فترة "إغترابى" فى السعودية هى" بنت" تجربتى .....تحمل ملامح هذه التجربة....وتحمل رؤيتى للمجتمع الذى إحتككت به على مدار تلك الفترة .....والأراء –كما هو معروف- تحتمل الوجاهة من عدمها .... لا الصحة ! ...."المعلومات" فقط هى التى تحتمل الصحة من عدمها .....تلك مقدمة وإستهلال لابد منه "وش الأستاذ عادل أبوزيد" wst::

2- ستجدونى فى خلال سردى "معنى" بالدرجة الأولى بمصر التى إغتربت عنها للمرة الأولى ....معنى "جدا" بالمصريين الذين قابلتهم هناك......معنى "جدا" برصد التغيرات الثقافية والأجتماعية التى طرأت على "بعضهم"....وذلك لأننى ببساطة معنى للغاية "بفكرة"..."هوية" مصر ....و"هوية" المصريين ، ولذا ستجدون فى كل ما أكتبه ربطا بين الفكرة التى أناقشها وبين مصر والمصريين بشكل أو بأخر !

ولكن يبقى كلمتان :

الفاضل adrianocrespo لست فى وضع المساءلة لكى أنتظر من أحد أن "يحكم" على رأيى.....فالكل من حقه أن يتفق أو يختلف حول ما أكتب ....فيكون ذلك سبيلا إلى إثراء الحوار ........لا وأده !

الأخ الفاضل أبو عمر ....ليس من أخلاقى التجريح فى أحد ....وما سأسرده من إنطباعات- وأبشرك - لن يكون "محايدا " بالطبع !......لأنه يحمل وجهة نظرى "الشخصية" فلسنا بصدد دراسة إجتماعية وثقافية يقوم بها فريق بحث أكاديمى !.... ولكن توصيفى لهذه التجربة التى تحمل بين ثناياها مخزونى المعرفى والثقافى ....فضلا عن "رؤيتى" التحليلية لما حولى أصنفه تحت بند "السياحة فى دنيا البشر" ....لذا لزم التنويه !

Share this post


Link to post
Share on other sites

- "إنطباعاتى" عن فترة "إغترابى" فى السعودية هى" بنت" تجربتى .....تحمل ملامح هذه التجربة....وتحمل رؤيتى للمجتمع الذى إحتككت به على مدار تلك الفترة .....والأراء –كما هو معروف- تحتمل الوجاهة من عدمها .... لا الصحة ! ...."المعلومات" فقط هى التى تحتمل الصحة من عدمها

نحن فى انتظار انطباعات بنيتها حضرتك ياسيد / ابن سينا ... على رؤية واقعية ومن واقع تجربة حقيقية ...

صدقنى ..نحترم جدا جداا آرائك حتى لو كان البعض يختلف معك فيها او عنها او عن بعضها ...لكنها على كل الاحوال تعتبر فعلا مكسب وتجربة..

ونشكر لك اشراكنا معك فى حكايتك ...وندعو الله ان تعم الفائدة ولعلك بهذا تضع قناديل على طريق المغترب القادم ..

اى كلمة او اى حكاية (( لعلك لاتعيرها اهتمام فى وقتها )) فى رحلة الغربة ...تعتبر نبراس منير لمن يأتى بعدك ويسير على نفس الطريق..

وعموما...

الغربة فيها...وفيها .

ومن يختار دائما اللون الابيض...يعتبر قصير النظر ...شأنه من يختار الأسود دائماااا...

والمهم...

اى كفة من الميزان ستكون الراجحة ؟؟

وهل فى النهاية ...ستتساوى الكفتان ؟؟

فى انتظار الحكاية ..

تمنياتى بالتوفيق ...واى اختيار هو اختيار موفق ان شاء الله.

Share this post


Link to post
Share on other sites

العزيز / إبن سينا...

مبدئياً ، أنا متفائل بانطباعاتك ومشاهداتك ، وبالعقلية اللي هتعلّق ع المشاهدات دي.

متفائل من نضج التعليقات ، وثراء الأحكام ، كما وصلني من مقدمة التوبيك.

وأتمنى أن تسرع بنقل مشاهداتك ، قبل وصولك لبلاد أخرى ، و وطن جديد سيرحّب بك ، وتسعد به ، وساعتها... هتكون فيه مشاهدات تانية ، برضه هنحب نسمعها :roseop:

ما تنساش تنوي ع التوبة وانتا رايح :roseop:

Share this post


Link to post
Share on other sites

الفاضل / ابن سينا

الموضوع دة بجد جوه كل واحد مغترب وخصوصا فى الخليج

تعرف اسمع ان المصريين اللى كانو موجودين فترة الثمانيات والسبعينات عملو فلوس كثير قوى عشان كدة كانت بتغطى على كل حاجة يعنى لو الشخص جواة انطباع معين عن غربتة بيحاول ميفكرش فية

لكن النهاردة وزى ما الكل عارف الغربة كل ما هنالك بتحقق لك حياة كريمة مش اكثر

زمان كانت ممكن تخليك ثرى دلوقتى بس ممكن بيها تعيش حياة كريمة

عشان كدة كلنا دلوقتى متغربين وبنفضل فى صراع داخلى

يا ترى الغربة دى هتعوضنى عن

مشاركتى اهلى واسرتى فى افراحهم واحزانهم اعيادهم ومناسباتهم

هتعوضنى عن انى اربى اولادى بالتليفون

هتعوضنى انى انا بعد فترة هكون بالنسبة لاولادى الحصالة بتاعت الفلوس

عشان كدة نقدر نقلك احكى وكلنا اذان صاغية

شوقتنا

Share this post


Link to post
Share on other sites

عزيزي ابن سينا

فعلا شوقتني لحاجة انا عارفها كويس

وعشتها زيك برضه 3 سنين معلمين فيا الي الان

بس اسلوبك شاددني جداااا

وان كان الي غير رجعة دي (صعبة ) انت نسيت الحج والعمرةولا ايه

عموماا انا كما ن كلى اذان صاغية :rolleyes:

Share this post


Link to post
Share on other sites

أشكر العضوةالفاضلة سلوى على تعليقها الودود .....وأتمنى أن يكون هناك استفادة ولو بسيطة ،لاسيما لمن لم يخض تجربة الغربة بعد

الأخ الفاضل dawn walker .....حضرتك شرفت التوبيك

الأخ الفاضل محمد أفندى ....أتفق معك فى "كثير" مما ذكرت....فتجربة الغربة تحكمها حسابات كثيرة ومعقدة ...المهم هو ان يدرك المرء أن تجربة كهذه لابد أن تكون مدرك لجميع أبعادها موازنا بين المكاسب التى ستحصدها ...وبين ما يمكن أن تفقده خلال تلك التجربة !

صديقى العزيز جيمى أشكرك على مجاملتك الرقيقة....,اتمنى أن نلتقى فى "كندا" عما قريب

الأختان العزيزتان Princesse و سهيلة أشكركما على إهتمامكما ...وأتمنى أن أكون عند حسن ظنكما

العزيز magedghonim أشكرك على إهتمامك ...وأقول ما قصدته ب "غير رجعة" هو فكرة "العمل" مجددا فى الخليج .....الله لا يقدر !

الأخ الفاضل أحمد هادى....أشكرك على إهتمامك

أما "حكاء" المنتدى الأول- فى تقديرى- د.تهامى..فشهادتك اعتز بها عن حق....وأتمنى أن أسمع تعليقاتك على ما سأكتب فى المرحلة القادمة....

أشكرك مرة ثانية

فى مشاركتى المقبلة سأحدثكم عن ... تجربة الغربة فى الميزان ....ما بين حسابات المكسب والخسارة !

Share this post


Link to post
Share on other sites

تجربة الغربة فى الميزان ....ما بين حسابات المكسب والخسارة !

جئت إلى السعودية وأنا فى السادسة والعشرون والأن أصبحت فى التاسعة والعشرون....ثلاث سنوات- إلا شهرين - قضيتها هنا ، كنت مقررا من البداية الفترة التى سأقضيها فى السعودية من قبل ان تطأ قدمى مطار الملك فهد بالدمام ....كنت مقررا أن وجودى فى السعودية مرحلة إنتقالية ...إيذانا لبدء خطوة و" تحد " جديد فى حياتى .....ولذلك قصة اخرى تستحق أن تروى .......................ولكن ليس الأن !!

أولا سأتحدث عن تلك التجربة- مبدئيا- بحسابات المكاسب والخسائر التى جنيتها فى خلال السنوات الثلاث تلك :

1- من أهم المكاسب- بلا شك- نقلة مادية حدثت ستساعدنى على خطواتى القادمة .

2- الحج إلى بيت الله الحرام ..فلم أكن أتصور أن أؤدى الفريضة وأنا فى الثامنة والعشرين من العمر ... لم أكن أحلم بأن الله سيكتب لى حج بيته فى هذه الفترة المبكرة من حياتى....فضلا عن أننى اعتمرت أربع مرات ....ولله الحمد والمنة .

3- إثراء تجاربى الانسانية من خلال الإحتكاك بكثير من البشر من كل الجنسيات والأعراق ...وايضا بأُناسِ كنت أعرفهم قبل مجيئى إلى هنا ....وفى الغربة تصبح رؤيتك لبعض هؤلاء أكثر " نضجا "........ وأكثر " عمقا " !!

أما عن الخسائر فهى :

الإغتراب فى حد ذاته شئ قاسى .....وخصوصا فى مجتمع تعوزه " الحميمية " التى إعتاد عليها المصريون فى علاقاتهم الإنسانية ، فأنت حتى وإن كنت تعيش فى مستوى مادى أفضل من مصر ولكن يظل دائما يساورك شعور بالإغتراب !

الكسل العقلى .....أكبر مشكلة تواجه المصريين العاملين فى السعودية –وفى الخليج عامة- هى الكسل العقلى ......هنا أنت – عادة- لا تضطر الى أن تُعمل عقلك فى أى شئ .......لانك لن تحتاجه فى الغالب..... لدرجة أننى خشيت على نفسى إن قررت عمل أشعة مقطعية على المخ حال عودتى لمصر أن يكون تقرير الطبيب هو " مخ إيه يا بنى .....انت دماغك فاضية !!........جالك إمتى المخ ده ؟ " !!!!!!!!

ثلاث سنوات مروا من عمرى فجأة ، وغيرى قضى " جُل " عمره هنا ......أن تكون سنون العمر محكومة بمعادلة رياضية مادية بحتة..... فتلك معادلة لها وجهان أحدهما مؤسف والأخر مخزى !... ،معادلة مفادها أن السنة من عمرك تقدر بمبلغ كذا من المال تستطيع توفيره سنويا وهذا هو الوجه " المؤسف " ! ....أما الوجه " المخزى " هو أن تحدد المبلغ المالى الذى تريد تحقيقه أولا ثم تحسب فيما بعد عدد السنين-من عمرك- اللازمة للحصول عليه !!!......معادلة أراها قاسية ومؤلمة......نحن نقايض على عمرنا بالمال ......وما أبخسه من ثمن !!

خوض معركتها زي جدك ما خاض

صالب.... و قالب شفتك بإمتعاض

هي كدة ... ما تنولش منها الامل

غير بعد صد و رد ووجاع مخاض

عجبي !!

Share this post


Link to post
Share on other sites
معادلة أراها قاسية ومؤلمة......نحن نقايض على عمرنا بالمال ......وما أبخسه من ثمن !!

تعليق مؤلم يا عزيزي... مش عاوز أقول لك إن قلبي انقبض وانا باقراه wst::

لسّه من كام دقيقة كنت باكلم واحد صاحبي في إدمونتون ، واتفق معايا لما قلتله (الفلوس في الخليج ، لكن الحياة في كندا) :rolleyes:

جات كلمتك دي كمّلت عليّا :roseop:

اللي عاوز أؤكدهولك ، إني منتظر على أحر من الجمر تعليقك مع بداية وصولك كندا. بجد هاستناه.

وما زلنا متابعين.

Share this post


Link to post
Share on other sites
معادلة أراها قاسية ومؤلمة......نحن نقايض على عمرنا بالمال ......وما أبخسه من ثمن !!

تعليق مؤلم يا عزيزي... مش عاوز أقول لك إن قلبي انقبض وانا باقراه wst::

لسّه من كام دقيقة كنت باكلم واحد صاحبي في إدمونتون ، واتفق معايا لما قلتله (الفلوس في الخليج ، لكن الحياة في كندا) :rolleyes:

جات كلمتك دي كمّلت عليّا :roseop:

اللي عاوز أؤكدهولك ، إني منتظر على أحر من الجمر تعليقك مع بداية وصولك كندا. بجد هاستناه.

وما زلنا متابعين.

النهارده يا محمد رحت حته اسمها بيرنابي ماونتنز

و هي جبل عالي جدا بيطل على فانكوفر كلها من فوق

و تشوف من فوق كل جبال فانكوفر الخضراء الشامخه و السحب البيضاء تغطي اعلاها بكثافه

و من تحتها مياة المحيط الشديدة الزرقه

منظر غير طبيعي لدرجة اني حسيت انها زي الجنه و حسيت اني قريب من ربنا

و رجعت قلت كلامك....الفلوس في الخليج و الدنيا في كندا و مصر هي أمي

Share this post


Link to post
Share on other sites

السلام عليكم ورحمة الله و بركاته

الأخوة الفضلاء ..

فعلا الغربة خارج بلدك سيئة سواء غربة عن ( الزوجة - الأبناء - الأهل - الأصدقاء ) او غربة عن العادات و السلوكيات التى عشتها و تربيت عليها صحيح ان الفرد منا لا يستطيع أنى يعوضها بشئ ...

لكن الغربة فى وسط كل اللى أنا ذكرتهم اسوء و اسوء و اسوء بكتييييييييير

تسوى ايه انك تبقى عايش وسط والدك و الدتك و دايما فى خلافات

تسوى ايه انك تبقى عايش مع مراتك اللى همها نفسها و كرامتها ومظهرها

تسوى ايه انك تبقى عايش وسط ابناء اللى مش لاقيهم حواليك وكل واحد منشغل بحياته

تسوى ايه انك تبقى عيش وسط اخواتك اللى كل منهم بيستنصر لنفسه على حسابك

تسوى ايه اانك تبقى عايش وسط اصاحبك اللى قليل لما يقوفوا جنبك

طبعا الظروف دى مش كلنا بيمر بيها كلها مرة واحدة و لا على طول بس نماذج لما بنعشها بتكون صعبة جدااا

كل ده كوووم و غربتك مع سدنك و عزوتك مع وطنك

الغربة جواااا بلدك افظع

معظم شعب مصر غريب جوا مصر بمعنى لا حقوق بياخدها لا حقوق تحترم مش هتكلم على فساد ولا على اهمال و لا تشتيت للعقول و لا على خدمات مش موجودة و لا على احترام للتعامل ممكن كل الواضيع دى يكون للسلطة اعذار أو ردوود

انما فيه حاجة واحدة لو واحد خليجي بلاش خليجي لو واحد من اى جنسية غير مصرية اتحط فى موقف أو فى مشكلة مع مواطن مصري تلقائي يحابي و يفضل الغير مصري على حساب المصري على العكس تماما من اللى بيحصل لو الموقف العكس فى بلد تاني

أنا مقيم بالسعودية بصراحة باحترام سياسة السعودية فى التعامل للنهضة بشعبها مع ان الشعب مش عايز و لا عنده استعداد لكن الحكومة مصره و بتحوال و بتسهل لهم كل العقبات لتحسين احوال الشعب يعنى بيشمشموا على اى حد عايز يعمل مشروع يعمل مصنع يعمل فكرة اى حد يعمل اى حاجة و يساعدوه فلوس و ارض و خبرة طبعا الكلام ده مقصور على المواطنين السعوديين فقط أو المستثمرين ... على العكس من اللى بيحصل عندنا فى مصر المحروسة - هى فعلا محروسة علشان لسه مش انتهت و عمالة تقاوح - لو واحد حب يفتح دكان صغير فى بيته بيلاقى بلدية و محضر و موظف الحي ويتحول عداد الكهرباء لعداد تجارى و يدفع عوايد للبيت و يدفع تاني ايه علشان الخدمات اللى مش بتقدمها الحكومة ...

الواحدفعلا مش مرتاح فالغربة بس مش مرتاح فى مصر اكتر بكتيييييييييير

افتكر إن الغربة بره احسن الوحشين

Share this post


Link to post
Share on other sites
السلام عليكم ورحمة الله و بركاته

الأخوة الفضلاء ..

فعلا الغربة خارج بلدك سيئة سواء غربة عن ( الزوجة - الأبناء - الأهل - الأصدقاء ) او غربة عن العادات و السلوكيات التى عشتها و تربيت عليها صحيح ان الفرد منا لا يستطيع أنى يعوضها بشئ ...

لكن الغربة فى وسط كل اللى أنا ذكرتهم اسوء و اسوء و اسوء بكتييييييييير

تسوى ايه انك تبقى عايش وسط والدك و الدتك و دايما فى خلافات

تسوى ايه انك تبقى عايش مع مراتك اللى همها نفسها و كرامتها ومظهرها

تسوى ايه انك تبقى عايش وسط ابناء اللى مش لاقيهم حواليك وكل واحد منشغل بحياته

تسوى ايه انك تبقى عيش وسط اخواتك اللى كل منهم بيستنصر لنفسه على حسابك

تسوى ايه اانك تبقى عايش وسط اصاحبك اللى قليل لما يقوفوا جنبك

طبعا الظروف دى مش كلنا بيمر بيها كلها مرة واحدة و لا على طول بس نماذج لما بنعشها بتكون صعبة جدااا

كل ده كوووم و غربتك مع سدنك و عزوتك مع وطنك

الغربة جواااا بلدك افظع

معظم شعب مصر غريب جوا مصر بمعنى لا حقوق بياخدها لا حقوق تحترم مش هتكلم على فساد ولا على اهمال و لا تشتيت للعقول و لا على خدمات مش موجودة و لا على احترام للتعامل ممكن كل الواضيع دى يكون للسلطة اعذار أو ردوود

انما فيه حاجة واحدة لو واحد خليجي بلاش خليجي لو واحد من اى جنسية غير مصرية اتحط فى موقف أو فى مشكلة مع مواطن مصري تلقائي يحابي و يفضل الغير مصري على حساب المصري على العكس تماما من اللى بيحصل لو الموقف العكس فى بلد تاني

أنا مقيم بالسعودية بصراحة باحترام سياسة السعودية فى التعامل للنهضة بشعبها مع ان الشعب مش عايز و لا عنده استعداد لكن الحكومة مصره و بتحوال و بتسهل لهم كل العقبات لتحسين احوال الشعب يعنى بيشمشموا على اى حد عايز يعمل مشروع يعمل مصنع يعمل فكرة اى حد يعمل اى حاجة و يساعدوه فلوس و ارض و خبرة طبعا الكلام ده مقصور على المواطنين السعوديين فقط أو المستثمرين ... على العكس من اللى بيحصل عندنا فى مصر المحروسة - هى فعلا محروسة علشان لسه مش انتهت و عمالة تقاوح - لو واحد حب يفتح دكان صغير فى بيته بيلاقى بلدية و محضر و موظف الحي ويتحول عداد الكهرباء لعداد تجارى و يدفع عوايد للبيت و يدفع تاني ايه علشان الخدمات اللى مش بتقدمها الحكومة ...

الواحدفعلا مش مرتاح فالغربة بس مش مرتاح فى مصر اكتر بكتيييييييييير

افتكر إن الغربة بره احسن الوحشين

في وقتنا الحالي ، أتفق معك تماما فيما قلته للأسف ، وكلامك واقعي وبليغ ،،، وأقترح أن تطرحه في موضوع مستقل ،،

فعندما يكون أمامك خيارين كلاهما مر بتبقى المسألة صعبة ، فهناك من يرى مرارة الوطن أرحم من مرارة الغربة ،،، وهناك أخرين ظروفهم مختلفة فيتقبلوا مرارة الغربة عن مرارة الوطن...وهناك من يحب دائما ان يقيس أيهما أشد مرارة وأشد وطأة على النفس ولكن هذا القياس غير ضروري لأن الناس تختلف في الطبائع وفي الظروف والاحوال ، وفي النهاية للأسف كل واحد بيختار المرارة التي يتجرعها...

ولكن للإنصاف يجب أن نذكر فوائد الغربة...كما سنذكر مرارتها لأنه رغم مرارتها إلا أن خلفها مصلحة كبيرة وإلا لماذا أقدمنا عليها.

وأعتقد ان هذا سوف نعرفه عندما نقرأ باقي الموضوع....

Share this post


Link to post
Share on other sites

أما عن الخسائر فهى :

1- الإغتراب فى حد ذاته شئ قاسى .....وخصوصا فى مجتمع تعوزه " الحميمية " التى إعتاد عليها المصريون فى علاقاتهم الإنسانية ، فأنت حتى وإن كنت تعيش فى مستوى مادى أفضل من مصر ولكن يظل دائما يساورك شعور بالإغتراب !

2- الكسل العقلى .....أكبر مشكلة تواجه المصريين العاملين فى السعودية –وفى الخليج عامة- هى الكسل العقلى ......هنا أنت – عادة- لا تضطر الى أن تُعمل عقلك فى أى شئ .......لانك لن تحتاجه فى الغالب..... لدرجة أننى خشيت على نفسى إن قررت عمل أشعة مقطعية على المخ حال عودتى لمصر أن يكون تقرير الطبيب هو " مخ إيه يا بنى .....انت دماغك فاضية !!........جالك إمتى المخ ده ؟ " !!!!!!!!

3- ثلاث سنوات مروا من عمرى فجأة ، وغيرى قضى " جُل " عمره هنا ......أن تكون سنون العمر محكومة بمعادلة رياضية مادية بحتة..... فتلك معادلة لها وجهان أحدهما مؤسف والأخر مخزى !... ،معادلة مفادها أن السنة من عمرك تقدر بمبلغ كذا من المال تستطيع توفيره سنويا وهذا هو الوجه " المؤسف " ! ....أما الوجه " المخزى " هو أن تحدد المبلغ المالى الذى تريد تحقيقه أولا ثم تحسب فيما بعد عدد السنين-من عمرك- اللازمة للحصول عليه !!!......معادلة أراها قاسية ومؤلمة......نحن نقايض على عمرنا بالمال ......وما أبخسه من ثمن !!

يـــــــــــاه

الكلام تقيل وصعب ..

إنت زي ما تكون جبت شوية ماية تلج طالعين من الفريزر وقمت صاببها على واحد حرارته فوق الـ 40

هو الواحد كان مش عارف ولا بيعمل نفسه مش واخد باله !

خايف من الحقيقة ولا بيهرب منها!

فعلا العمر في الغربة وفي الخليج عامة بيتحسب بطريقة قدرت توفر كام السنة دي .. للأسف الهدف دائماً وأبدا بيكون المال

لا عمر المال بيكون هدف ولا حيكون .. ما هو إلا وسيلة

مبادئ كثير بتتغير بدون وعي أو إدراك

أُحييك على المشاركة الغنية والمُثمرة واللي تستدعي الوقوف عند كل نقطة فيها

Share this post


Link to post
Share on other sites

أولا محدش طلب مننا نقيش غربتنا بمقدار ماندخره من اموال يعني مثلا البناني عايش حياته صح ومش حارم نفسه من شيئ ع عكس جنسيات اخرى وبرده الراجل تفكيره مادي لكن عايش حياته انما المصري للاسف الشديد بيقول انا مش هقعد كتير وبيقعد عمره كله لا منه اتمتع بعمره ف الغربة ولا عنده عمر فاضل يتمتع ولا صحة لما يرجع مصر

الكل بيقول الناحية المادية لا طبيعة وسهولة الحياة

انزل مصر ومارس حياتك وانت راكب افخم سيارة وشغال ف مكان كويس وعندك فيلتك ياسيدي وريني هتغير سلوكيات الناس ازاي

هتمشي ف الشارع ازاي هتضمن تعليم لاولادك كويس ازاي انت ف الخليج من ناحية الخدمات والبنية التحتية متوفرة شوف للاسف مستوى الخدمات عندنا بلاش روح اتعامل مع بنك مصر ولا بنك الاهلي ياترى نفس نظام البنوك ف الخليج هل مكن الصرف الالي شغال بنفس الكفاءة ف الخليج

انتوا ليه محسسني ان احنا عايشين ف اسى وحزن لا اي حد مننا لما سافر سافر بمحض ارادته هتقولي غربة ابعت هات ابوك وامك واظن الاب والام كل همهم سعادة ابنهم حتى لو ع حساب حرمانهم من رؤيته

للاسف احنا دايما بنحب كشعب نعيش وضع التعاسة نادر لما تلاقينا بنفرح ونبقى مبسوطين

عيش واتمتع بحياتك محدش قالك ان طموحاتك تبقى كتير ، طبعا معظم المصريين بتكون طموحاتنا بعيدة عن تنمية ذاتنا وطبعا لاننا روحنا مجتمعات مادية بحته قارن بين مغترب الخليج ومغترب اوروبا القصه سهلة مغترب الخليج بيجي بعد غربته حاطط قرشين ف البنك يجوز العيال ويشتري شقق ليهم وطبعا ممكن يكون فكر ف عمل مشروع وبيتنصب عليه وف الاخر بيقعد ف البيت لا منه متكيف مع بلده ولا منه بيبطل مقارنة

عكس مغترب الغرب بيكون فكره اتغير واتطور واسمحولي بيكسب ف الاخر بيسافر مهندس بيرجع بفكر جديد ويمكن ماجيستير ولا دكتوراة ودماغه بتتغير

انا عندي التجربة ده احنا رجعنا بالبيت وجواز العيال وبتاع امريكا رجع بالفكر والمستقبل لاولاده اللي احسن من مليون بيت

زي ما بنقول ف اوله غربة الغرب قليل دائم انما الخليج كثير منقطع

وعن طعم الحياة هل يعني احنا كنا ف مصر متمعين بالفسح والترفيه يعني ما اظنش اللي كان ف القاهرة بيكون سعيد وهو ماشي ف الزحمة بسيارته ده لو كان راكب سيارة فما بالك بالمواصلات العامة يعني بذمتكم كان له نفس للفسح ، ودلوقت ف الاجازات هل نقدر نستمتع ببلدنا بنضطر نهرب بعيد ف المناطق الساحلية

الغربة ليست بهذا السوء لان الغربة داخل الوطن اصعب بمراحل انا حاولت ف مصر كتير اني اكون مش غريب فيها لكن فشلت ومستعجلتش اني اسافر واهرب 4 سنين بدون نجاح ف التكيف

ومش حكاية فلوس ياجماعة غلطان اللي يقول الغربة عشان الفلوس مصر فيها فلوس بس محتاجه ناس معينة لكن هل تبقى متكيف ف الحياة حياة الرشاوي والفساد الاداري وللاسف الخلقي

ياريت نبقى واقعيين مع نفسنا

Share this post


Link to post
Share on other sites
عكس مغترب الغرب بيكون فكره اتغير واتطور واسمحولي بيكسب ف الاخر بيسافر مهندس بيرجع بفكر جديد ويمكن ماجيستير ولا دكتوراة ودماغه بتتغير

انا عندي التجربة ده احنا رجعنا بالبيت وجواز العيال وبتاع امريكا رجع بالفكر والمستقبل لاولاده اللي احسن من مليون بيت

بالضبط يا استاذ هيرو انا معاك ف الكلام دة

الاستاذ الفاضل صاحب الموضوع ابن سينا بيقول انو حاسس ان دماغه فاضى وعقله ف اجازة ف الغربه

ليه ما نطورش نفسنا واحنا ف الغربه

ليه ما نكملش دراسه ماجستير او دكتوراة او تاخد كورسات جديدة تنفعك ف اى مكان سواء ف الغربه ترفع من مستواك او ف بلدك لما ترجع

ليه فترة الغربه بتحسبوها بالوجع وجمع الاموال فقط

انا شيفه ان فى ناس ف الغربه بتنجز اكتر لان كل حاجة متاحه هنا وسهله عن مصر

لو انت طموح فعلا تستغل وقتك

وف نفس الوقت تتمتع بحياتك

انا عن نفسى انا وزوجى معتبرين الغربه حياة كريمه وعيشه كويسه لنا والاولادنا لان ف ظل الغلاء دة ما صعب ان حد يحوشش وف نفس الوقت انا بنزل ف فترة الاجازة ادخل امتحانات الماجستير بتاعتى

اقصد ان الحياة موش متوقفه

كمل مشوارك اللى انت كنت هتمشيه لو كنت ف مصر وما اتغربتش

تحياتى

Share this post


Link to post
Share on other sites

يا سيدي الفاضل والله إحنا واقعيين جدا

حضرتك في كلامك بتقارن كثير بين غربة الغرب وغربة الخليج وزود عليهم كمان العيشة في مصر وفي رأيي الترتيب الصحيح من الأحسن للاسوأ .. غربة الغرب - الحياة في مصر - غربة الخليج ..

مفيش شك إن الإنسان بطبيعته بياخده الحنين دايما لمسقط راسه مهما كان سيء .. حضرتك معاك العذر في إنك ما تعرفش تتكيف مع الحياة في مصر في خلال اربع سنين بطبيعة الحال لإنك إتولدت في الخليج واتربيت على نظام معين وبعدين نزلت على مصر تدرس في الجامعة وبعدها أربع سنين شغل وما قدرتش تتأقلم في مصر وده شيء متوقع طبعا.. والآية معكوسة معانا .. واحد اتربى في مصر وطلع على الخليج ومش قادر يتأقلم مع الخليج ... زيي مثلا اتولدت في الريف وبعدين خلصت الثانوية العامة واتنقلنا للمدينة بئا عندي تشتت ومش قادر اتأقلم مع المدينة وكل ما أتضايق أرجع على الريف من تاني وبرغم مساوئه وعيوبه لكن بحس فيه بالراحة والإطمئنان ..

إسمحلي إن مختلف معاك في نقط كثير ..

ومش حكاية فلوس ياجماعة غلطان اللي يقول الغربة عشان الفلوس مصر فيها فلوس بس محتاجه ناس معينة لكن هل تبقى متكيف ف الحياة حياة الرشاوي والفساد الاداري وللاسف الخلقي

الحكاية مش حكاية فلوس .. طب الحكاية إيه .. بُعد عن الرشاوي والفساد الإدارة وللأسف الأخلاقي .. طيب وهو الكلام ده مش موجود في الخليج وألعن كمان؟! .. لو الإجابة أه يبئا كده مصر زي الخليج مفيش فرق طالما الحكاية مش حكاية فلوس ...

وللحديث بقية

Share this post


Link to post
Share on other sites
ليه ما نكملش دراسه ماجستير او دكتوراة او تاخد كورسات جديدة تنفعك ف اى مكان سواء ف الغربه ترفع من مستواك او ف بلدك لما ترجع

أنا كانت طموحاتي كبيرة جدا والسبب في موتها كان غربة الخليج .. للأسف

واحد خريج كلية الزراعة بيحب جدا قسم الهندسة الوراثية وحلمه إنه يكمل ويعمل الماجستير والدكتوراه ويعمل حاجه في المجال ده .. سافر الخليج كمرحلة سنة اثنين بالكثير علشان يكون جاهز مادياً ومش مشكلة الحلم يتأجل كمان السنتين دول أحسن من الاستمرار في الاعتماد على الوالد في كل شيء .. تحصل شوية خربطة منها عدم توافر فرصة وظيفية مناسبة في البداية لفترة ليست قصيرة وبعدها زواج و .. و .. وهكذا .. وبين كل فترة كان الحلم بيصحى جواه من تاني .. قال يعمل الماجستير في الخليج راح للجامعة يقدم ويشوف وهو على استعداد تحمل المصاريف مهما كانت ولو فيه مواد اضافية هيذاكرها .. يكون رد الجامعة يلا يا ابني بعيد إحنا ما بنقبلش مقيمين (إنت عايزين تلهبوا فلوس وتعليم كمان؟!) .. طيب رحت على الكلية في مصر يا جماعة الخير أبئا أذاكر وأنزل على الامتحانات .. قالوا لأ ما ينفعش (شرط لازم تكون موجود في مصر) وب كده الحلم ضاع وادينا رايحين جايين مع الموج مطرح ما يرمينا يرمينا...

Share this post


Link to post
Share on other sites

انا كل اللي اتمناه اننا نبص للامور بموضوعية

للاسف الشديد لو شوفته الزحمة اللي ع حجز امتحان IELTS ف مصر ويوم الامتحان وفخامة السيارات يعني ناس مش مهاجرة عشان فلوس عشان معيشة معينه

فالحكاية نسبية اللي بيسافر للخليج بيحاول يرفع من مستواه المادي كبداية ومن ثم طموحاته بتتغير وانا معايا ناس كتير كده كان عايش ف مصر مبسوط لما سافر بدأ يقارن وبدأ يفكر ليه انا اضطر اعيش كده لازم اغير من حياتي وفعلا بدأ ف موضوع الهجرة

وهي كده الغربة ليست دائما بهذا السوء الاشتياق لاماكن لنا فيها ذكريات شيئ جميل لكن لن نعيش ف الذكريات ع طول

ومازلت بقول في وقت معين هتلاقي انك عايش بره مصر ومش مهم انك تحوش شيئ لان انت مرتاح بتروح شغلك مرتاح وبتمشي بعربيتك مرتاح

ده بيحصل بعد 5 سنين وكل ماتزيد الفتره كل ماتحس بانك اتعودت ع نظام معين وبيبقى نمط حياة

وعن الفساد ف الخليج موجود وف اي حته موجود احنا مش ملايكة لكن ف الخيج ممكن تحصل ع الحد الادنى من حقوقك يعني لو روحت المرور ف مصر هتطلع الرخصه بسهولة

ف الخليج لو بتسوق هضطلعها انا ف مصر كان لازم ادفع رشوة كله بيعمل كده هتعمل ايه هل في مصر بكل بساطة بتخلص ورقك من التجنيد

بلاش يوميات حياتك كانت ف مصر سهلة ، هوده اليل اقصده بتتعود ع نظام حياة معين

هات فلوس واركب سيارة فخمة وامشي فيها ف مصر ، اتحداك لو كنت مرتاح لان هيضطلع لك سواق ميكروباص

ياجماعة انا بتكلم ع مجتمع للاسف الشديد بقى عشوائي ف كل شيئ

الغربة لها فوائد كتير يمكن مش من اهمها الفلوس لانك ممكن تعمل الفلوس بلدك لكن ف بلدك كنت بتحتك بعقليات مختلفة الناس اللي بتحتك بناس مش بتتكلم عربي ايه مستوى اللغة ماتحسنش عندهم ، عقلية الادارة اليل كانت عندنا ف مصر مااتغيرتش هنا ف الغربة لما احتكيت بعقليات مختلفة

انت ف الخليج بتتعامل مع الهندي والفلبيني ف الشغل والاوروبي والامريكي هل كل الناس كان متاح لها ذلك ف مصر

هل ف مصر كان متاح لك استخدام تكنمولوجيا كل ده بيضاف للشخص صحيح مش بيحس بيه لكن لما بيجي يقارن بيلاقي نفسه استفاد

فمازلت بقول ليست دائما الغربة الام واوجاع

Share this post


Link to post
Share on other sites

الاستاذ: ابن سيناء، Herohero، HDarwish،elneshawy و الاستاذة سهيلة

مشاركتكم اكتر من رائعة

انا عمري ما سافرت برة مصر ، بس كلامكم حسسني بجد بمعنى الغربة و عيوبها و مميزتها.

كان لي سوأل للاخوة الي بيشتغلوا في الخليج هل فعلا المصريين مضطهدين هناك؟

و الاستاذة سهيلة بما أن حضرتك عايشة في الخليج هل بتتعرضي لمضايقات علشان انتي مصرية؟

اقصد اقول ان هنا في بلدنا ، المصريين بيتعرضوا لمواقف صعبة و بتكون فيها إهانة لكرامتهم، فيا ترى ايه الوضع في الخليج؟

Share this post


Link to post
Share on other sites

Join the conversation

You are posting as a guest. If you have an account, sign in now to post with your account.
Note: Your post will require moderator approval before it will be visible.

Guest
Reply to this topic...

×   Pasted as rich text.   Paste as plain text instead

  Only 75 emoji are allowed.

×   Your link has been automatically embedded.   Display as a link instead

×   Your previous content has been restored.   Clear editor

×   You cannot paste images directly. Upload or insert images from URL.


×
×
  • Create New...