هاجر كندا - تدخل الجنة

[montrealAlex]

استاذ ايهاب اتسرق يا رجالة

ورحت القسم-- وعملت محضر-- واديت الامين 20 جنيه--وقالل ابقى قابلنى قصدى ح نبقى نتصل بيك

على العموم اللى يورح فى كندا --دا يبقى سيفونير من مواطن لاخوة المواطن

على فكرة بتعجبنى ردودك --لا تبخل علينا

[ايهاب سالم]

ربنا قال " السرقة حرام" ودا بقى احنا ماجستير فيه

_ عمر ما عربيتك او شقتك او موبايلك او حد من عيالك (ابنك نفسه ) اتسرق

_ دهب المدام اوشنطتها عمرهم ما اتسرقوا

_ عمر ارضك ما اتسرقت

طبعا مستحيل اكيد اتسرقت وممكن اكتر من مرة كمان

أنا عمري ما إتسرقت في مصر ...... لكن محفظتي إتسرقت في كندا

لأ إفتكرت ... أنا محفظتي إتسرقت في مصر قبل كده .. . بس الحرامي رجعهالي بنفسه لما لقا مفيهاش فلوس ... أنا أصلي عمري ما بشيل فلوس في محفظتي .... الظاهر صعبت عليه لما لقى كارنيه الجيش في المحفظه و كان عارف إني هأتسجن فيها

في حين الحرامي بتاع كندا مرجعهاش

برضه الحراميه في مصر أصحاب مبدأ

عمار يا مصر المره دي

تم تعديل 18 سبتمبر 2009 بواسطة ايهاب سالم

[Anesthesia]

أستاذ montrealalex أنا عاجبنى حماسك لكيبيك..طيب ممكن حضرتك تقولنا أنتا وصلت فى مشوار الهجرة لحد فين؟و حضرتك بتشتغل ايه؟و ايه مؤهلاتك؟و خطتك للعمل فى كيبيك من معادلات و خلافه علشان نستفيد و شكرا

[montrealAlex]

عزيزى الاستاذ Anesthesia

انا دبلومة فى المحاسبة المالية وزوجتى ماجستير فلسفة -- عندى عملى الخاص -- ارسلت الملف 4 2009 -- انا فى الوايتنج الان

خططى ان ح اعمل ان شاء الله -- CGA فى مونتريال --كمعادلة للمحاسبة

اة انا عندى حماس وولاء لكيبيك -- لانى مقدم لكيبيك مش كندا

لو عايز حاجة تانى انا تحت الامر

كل سنة والكل طيبين -- عيد سعيد --والسنة الجاية ان شاء الله يبقى العيد فى كيبيك

[wagdi]

الفاضل montrealAlex أرجو أن تتقبل مني هذه النصيحة...

لو معندكش حماس وولاء لبلدك إلى أنت أتولدت فيها وعشت فيها وأهلك فيها وصحابك فيها والناس إلى بتحبهم وبيحبوك فيها وعندك حماس وولاء لبلد أنت أصلاً مشفتهاش وحياه أنت أصلاً معشتهاش وناس أنت أصلاً معرفتهومش وماعشرتهومش يبقى أنصحك جدياً إنك تعيد حساباتك وأولوياتك كلها من أول وجديد...

الظروف في مصر مش مساعداك وعايز تهاجر وماله... شايف إن البلد الفلاني أحسن من البلد العلاني وماله... حاسس إنك حتبقى مستريح في مكان عن مكان تاني مافيش مانع... بس أجل موضوع الحماس الزائد والولاء المسبق ده شوية...

تحياتي

[hamoudi]

الفاضل montrealAlex أرجو أن تتقبل مني هذه النصيحة...

لو معندكش حماس وولاء لبلدك إلى أنت أتولدت فيها وعشت فيها وأهلك فيها وصحابك فيها والناس إلى بتحبهم وبيحبوك فيها وعندك حماس وولاء لبلد أنت أصلاً مشفتهاش وحياه أنت أصلاً معشتهاش وناس أنت أصلاً معرفتهومش وماعشرتهومش يبقى أنصحك جدياً إنك تعيد حساباتك وأولوياتك كلها من أول وجديد...

الظروف في مصر مش مساعداك وعايز تهاجر وماله... شايف إن البلد الفلاني أحسن من البلد العلاني وماله... حاسس إنك حتبقى مستريح في مكان عن مكان تاني مافيش مانع... بس أجل موضوع الحماس الزائد والولاء المسبق ده شوية...

تحياتي

يااااااااه

wagdi

كنت اتمنى انى اشوف ردودك من زمان ولو كنت اعرف ان موضوع زي ده يرجعك كنت انا الى كتبته

ياالف اهلا وسهلا

ونتمنى ان نرى مشاركاتك دائما

[montrealAlex]

الى الاستاذ وجدى -- شكرا على النصيحة -- ولكن

هناك فرق بين ولاء لمصر والولاء للمصريين -- وعلى العموم هى كلمة الولاء اصلا كلمة اصبحت من التراث-- شوف كام مليون فى الخليج -- وكام واحد على ابواب السفارات

وكام واحد هجرة غير شرعية --وكام واحد عايز يسافر --سيدى الفاضل مصر بقت عاملة زى تايتنك بتغرق والكل بيجرى ويقول يالله نفسى

وعلى راى واحد فى المنتدى لو كندا فتحت الهجرة -- ال 80 مليون مصرى تانى يوم ح يبقوا فى كندا

سيدى الفاضل ال80 مليون كلهم بيقولوا يالله نفسى انا وبعدى الطوفان -- مش عايزين نحط راسنا فى الرمل ونقول ان احنا ايد واحدة والمصريين اهمة --لان دا مش موجود اصلا

واعتقد ان المهاجرين نوعين -- الاول بيذكر فساد والسلوك المتردى اللى وصلنا اليه وذلك حتى يبرر لنفسه الهجرة والغربة -- والتانى بيقول مصر هيه امى ويا اصحابى يا اهلى يا جيرانى انا نفسى اخدكوا فى احضانى ( طيب سبتها ليه بقى ؟) طبعا عامل فيها سفير مصر للنوايا الحسنة

مين اللى قال انى معشرتش الكيبيكوا --انا اعرف ناس كيبيكوا اصليين وكل يوم مع بعض على النت --بالاضافة الى ناس كتير من الجالية الاسلامية بكيبيك --و مين اللى قال انى معرفش العيشة هناك انا عارف معلومات كتيير عن تفاصيل الحياة هناك

اما بالنسبة لموضوع الولاء لكيبيك دا مش عيب سواء فى اول مشوار الهجرة او فى نهايتة او سافرت او ما سافرتش --اللى انا شايف انها انسب مكان للاقامة فى كندا

ودى طبعا --وجهه نظرى

[montrealAlex]

استاذ وجدى -- دى نسخة من مداخلة الاستاذ قناوى بتاريخ 24 1 2009

كل منا حالة متفردة ومتميزة كوننا بشر نختلف

الشعور الشخصي لي

امتهان لكرامة الانسان في بلادي

مستوي تعليمي متدني

مستقبل مظلم للاولاد

فلتذهب النقود الي الجحيم

اذا ابدلناها بباسبور له معني يحميك ويحترم انسانيتك

مالي ومال المال

الشعور بالانسانية افضل من المال المفقود

المال المفقود ابخس من الكرامة المهدرة علي نقاط التفتيش في بلادنا وكاننا في اسرائيل

هل سمعت عن كلمة كمين الا في مصر والعراق واسرائيل

والكمائن انواع

كمين مرور

كمين مباحث

كمين امن دولة

كمين شرطة عسكرية

كمين وخلاص وده بقي لا تعرف صفة اصحابه

المطلوب ابراز هويتك وتفتيشك وعدم التبرم

اذا امتعضت تدخل في الجولة التانية انزل من السيارة ولو لك صفة علي قدر صفتك تعامل

كفي

هو ايضا لازم يراجع حساباتة معايا ولا اية؟

[wagdi]

الفاضل montrealAlex....

أولاً كل سنة وحضرتك طيب... :rolleyes:

ثانياً أعذرني لو بدت لك مداخلتي إنتقاداً أو تجريحاً... أنا لم يكن عندي وقت أشرح أكتر وجهة نظري... ومعلش سامحنى أنا ممل حبتين...

بداية أنا مش معترض على أي حاجة من إلى أنت قولته... كل السلبيات -لا بلاش سلبيات - كل القرف إلى موجود في مصر موجود وزيادة... ما أنا مش ياباني... أنا أتولدت وعشت هناك وعارف إلى فيها... وكمان أن مش معترض إن الأدمية أهم من الفلوس ... ومش معترض إنك لو ضاقت عليك بلدك تهاجر بلد تانية... ما أنا أصلاً مهاجر... ولكندا... ولكيبك... وبقالي فيها بتاع ست سنين أهو... والحمد الله وفضله عايش هنا أحسن عيشة... والحمد الله وفضله كنت برضه عايش في مصر أحسن عيشة...

أنا أعتراضي على العواطف الجياشة إلى بشوف الناس -ولا أخص حضرتك هنا- في المنتدى بيتعاملوا بيها في موضوع الهجرة.. وعنوان موضوعك "هاجر كندا...تدخل الجنة" أحسن دليل أهه..

إيه دخل كندا بالجنة وإيه دخل كيبك بالولاء وإيه دخل الكمين في كل ده... أنت عارف العالم هنا ببيعجبوني في حاجة أوي... بيحسبوا كل حاجة بعقلانية بحتة... بيشوفوا ظروفهم ونقاط قوتهم وضعفهم بيشوفوا الظروف المحيطة بيهم بيشوفوا الفرص إلى قدامهم بيحسبوا المخاطر وبياخدوا القرار... حاتقوللي قديمة... حاقولك بس التريك إنهم مش بيعملوا كدة مرة واحدة وخلاص لا بيعملوه كل يوم... أياً كان القرار إلى أخده قابل للتعديل أو الإلغاء على حسب مستجدات الظروف... يعني لو كان في مصر وحسبة الورقة والقلم قالتله روح كيبك حايروح... بعد سنتين تلاتة الظروف أتغيرت وحسبة الورقة والقلم قالتله روح أونتاريو حايروح... ولو الحسبة في يوم من الأيام قالتله روح تانزانيا برضه حايروح... عقل وحساب ولو فيه دين يبقى توكل على الله...ودمتم... ماحدش بياخد قرار ويغني له قبل حتى ما ينفذه إلا إحنا المصريين... ماحدش بيعمل فيلم تسجيلي عن مشروع لسة ماتعملش أصلاً إلا أحنا... ويمكن علشان كدة مابتنجحلناش مشاريع.... على الله أكون قدرت أوصلك أنا عايز اقولك إيه...

حاجة تانية صغيرة على جنب...حضرتك قلت المهاجرين نوعين وذكرتهم... لأه... المهاجرين مليون نوع زي المقيمين ماهم مليون نوع... مافيش أبيض بس أو اسود بس... فيه رمادي بدرجاته... و"المهاجر" إلى بتحاول تصنفه ما هو إلا إنسان عادى زائد أبليكيشن أو كارت إقامة أو باسبور... يعني أحمد زي الحاج أحمد... الكريم في مصر كريم في كندا... والوضيع في مصر وضيع في كندا... وإلى عنده أخلاق بتسافر معاه على الطيارة...وإلى ماعندوش فللأسف مافيش محلات بتبيعها هنا...

حاجة تالتة برضه على جنب -معلش أنا قولتلك إني ممل... أوعى تصدق إلى يقولك إن باسبور حيخليك محترم أكتر أو أقل... إن شاء الله ربنا حايوفقك وتيجي وكمان تلات أربع سنين تحلف وتطلع الباسبور وإن شاء الله نتقابل وتقوللي زاد عليك إيه في اليوم إلى أخدته فيه عن اليوم إلى قبله... لو كنت ناجح قبله مش حيزودك نجاح...ولو كنت فاشل مش حاينجحك... ولو كنت محترم مش حايخليك محترم أكتر أو ٌأقل في عيون إلى حواليك...

مرة تانية كل سنة وأنت واسرتك بخير... وإن شاء الله ربنا يكتب لك إلى فيه الخير لك ولأولادك...

وماتزعلشي إني بقولك عيد حساباتك... لأ عيدها وعيدها كل يوم... دي مش حاجة وحشة أو عيب...

تحياتي...

تم تعديل 19 سبتمبر 2009 بواسطة wagdi

[MZohairy]

واحشني يا وجدي

[wagdi]

وأنت كمان والله... بس أنت إلى غدرت...

انت إلى رحت عند الصينيين...

كان زماننا بنلعب جولف دلوقتي...

[montrealAlex]

الاستاذ وجدى -- شكرا على ردك

اولا بالنسبة لحماسى لموضوع الهجرة --معلش انا طبعى كدة اى موضوع بخش فيه باخدة على صدرى وحماس لا حدود له --علشان كدة اعتقد ان انا انسان ناجح فى مصر --على العموم سيبنا يكون لينا حماس لحاجة حتى لو ممكن ماتكملش ( بعد الشر )

ثانيا انا عارف ان مافيش حاجة سهلةوجميلة 100 فى 100 -وان فى كيبيك ح تختفى مشكلات كتير وحتظهر مشكلات اخرى -- بس مافيش مقارنة ما بين العربية ال 28 والمرسيدس --حتى المرسيدس ليها عيوب ( تمنها وتمن قطع غيارها وضرايبها ) يعنى كندا ليها عيوب برضة

ثالثا بالنسبة لموضوع الباسبور ( دى جت منك اوت ) اسمح لى ان اقولك حكاية مختصرة

واحد جارى مصرى فرنسى لما كان فى فرنسا وراجع بالباسبور المصرى شنطتة اتبهدلت وتعالى كدة وروح كدة فى مطار القاهرة

لما السنة اللى بعديها رجع بالباسبور الفرنسى اتفرج على الاهتمام واتفضل يا فندم واسمح لى اشوف الباسبور سيلفو بليه الخ

رابعا بالنسبة لاسم التوبيك -- انا قصدى ان فى مصر بناخد نوعين من الذنوب نوع الواحد بيعمله قاصد ونوع بنعمله مضطرين (نتيجة انعدام الاخلاق و غياب القانون )

اما فى كندا ح ترتكب الذنوب اللى انت مسئول عنها فقط ( وطبعا دى مش مسئوليتنا ) لكن الذنوب اللى انت مضطر تعملها ح تختفى --يعنى ذنوبك ح تقل

على سبيل المثال --لما حد يكسر عليك وانت سايق وتقوله يا حمار (شىء عادى ) دا كدة ذنب

ولما ترشى حتى ولو غصب عنك-- اعتقد ان دا ذنب برضة-- اصل متقوليش انك مش ح تدفع 50 جنيه لامين الشرطة بدل ما تدفع 2000 جنيه غرامة عكس الاتجاة ( قانون المرور الجديد )

كفاية علشان الامثلة كتير -- ارجو ان يكون وصلك اصل فكرة الموضوع