تعرف تدفع رشوه ؟؟؟

[DARWEEN]

الحقيقه المشكله دي بتصادفني كتير في مصر كل ما أروح أخلص مصلحه معينه أو أقع في أي مشكله الاقي الدنيا كلها مكلكعه والأمور مش عارفه تمشي أبدا .. فييجي بعض الحبايب بالنصايح المعتاده

واحد يقولك أهرش جيبك تمشي أمورك

وواحد يقولك هين قرشك ولا تهينش نفسك

وواحد يقولك أسقط للأستاذ حاجه في الدرج يخلصك

هي مش حكاية مثاليه مني ولا حاجه بس المشكله عندي في نقطتين ...

أولا الحديث الشريف (( لعن الله الراشي والمرتشي والرشاء ))

وحاشا لله أن أرغب في أن أكون ملعون وعن المصلحه ما أنقضت

ثانيا أني فعلا مش بأعرف أدي لحد فلوس من غير مايطلب مني صراحه وتكون قيكمه محدده كمان أو أكون عارف رسوم الخدمه مسبقا زي تذكرة السينما أو القطار

ياترى حد من الأخوه الأعضاء سبق دفع رشوه ؟؟؟ وأزاي دفعها ؟؟؟

[فــيــروز]

لا انا لا اتذكر انى عمرى دفعت رشوه لحد

وانا ايضا لا استطيع ان ادفع فلوس لحد وهو لم يطلب !! صعبه اوى الحكايه دى رغم ان التليفزيون الله يخرب بيته بيصورها على انها شكة دبوس !!

مره والدتى ركنت فى الممنوع .. ورجعنا انا و هى و اختى للمكان فلقينا العربيه بالكلابشات !! سالنا فين الظابط قالوا فى الكشك اللى هناك

رحنا نطلب فك العربيه طلب الرخص .. والدتى سلمتهم بسلامة نيه قال لها هاتى الغرامه 20 جنيه .. دفعت وهى متصوره انه هيرجع لها الرخص قال لها لا دول عشان المخالفه انما الرخصه تروحى تاخديها من المرور !!

كلنا ضربنا لخمه لدن ده معناه بهدله بقى و ضياع وقت و الاهم ان الرخصه ممكن تضيع .. وطبعا كلنا قلنا اكيد الاخ امين الشطره عاوز قرشين بس كلنا مانعرفش ندى لحد رشوه .. انا شخصيا حسيت بتوتر شديد لانه الموقف سخيف .. امى شكلها حزين و متضايق و فى نفس الوقت مش عارفين نعمل لها حاجه بس بردو لم نعرض رشوه

هى سالت الضابط عن مكان تسلم الرخصه و سلمت امرها لله تماما وبدا ده على وجهها وبدا وضاح اننا لن ندفع حاجه ..

المهم قالت له فى النهايه طيب و هناخد الرخصه بعد اد ايه قال لها قريبب خالص .. وبعد ما شطب الاوراق لقيناه بيدينا الرخصه من غير اى فلوس نهائى .. الحقيقه انا كنت هاعيط لسببين .. انى بقى عندى قناعه انه لا شئ فى مصر يسير بغير الرشوه وجه الجدع الامير كبسنى الحمد لله :) و التانى انى اسات الظن به

وحتى بعد ما فك الكلابشات و بقى ممكن نمشى وعرضنا عليه فلوس كان ممكن جدا يعتبرها مش رشوه لانه لم يعد لنا مصلحه معه قال جمله لم انسها ابدا : قال انه كده مايبققاش عمل معانا اى واجب !! وانا وشى جاب الوان من الخجل ..

[ragab2]

كتب داروين

تعرف تدفع رشوه ؟؟؟

السؤال الأصح

هل تعرف ما تدفعش رشوة .. ؟؟؟

[White heart]

لم و لن يحدث!!!

أتذكر واقعه بسيطة حدثت لى منذ سنوات عدة عند انتهائى من اداء الخدمة العسكرية و ذهابى الى قسم التجنيد فى الحى الذى أتبعه كى أستكمل بعض الأوراق و قد استعار وقتها الصول المتواجد بالمكتب بقلم مذهب كان قد أهداة الى أحد الأصدقاء، بحجة فقده ساعتها لقلمه الجاف و حتى لا يضيع وقتى فى انتظار أن يذهب العسكرى لشراء قلم أخر!!!! و بعد انتهائة من كتابة البيانات الخاصة و اعطائى المستند قام بكل بساطة بوضع القلم فى جيبة!!! :) و نصحنى بالأسراع كى ألحق بالجهه التالية .. فشكرته كثيرا و طلبت منه قلمى!!!! و حاول أن يحتفظ بالقلم و لكنى أصريت أن يعيدنى اياة !!! و لاحظ اننى متمسك بطلبى حتى و لو قضيت باقى اليوم معه فى المكتب!!!!

طبعا خرجت بعض الكلمات منه التى لا لزوم لها من عينه : " يا ساااااااااااااتر" .. "أية دة؟؟!!" و لكنى أسترديت قلمى .... و ذهبت شاكرا اياة بكل أدب...

بصراحة المسألة مسألة مبدأ ليس أكثر ...

لا يمكن أن أقبل أى نوع من أنواع الأبتزاز تحت أى ظرف أو مسمى ...

أعتقد الصبر و الوقت و التحكم فى الأعصاب عوامل مطلوبه و تساعد كثيرا من يوقعه حظه العاثر مع مثل هؤلاء ..... و يجب محاربة هذه الأفه بأى ثمن لخطورة نتائجها السلبية على الجميع و ليس على فرد واحد و عالمه الخاص به فقط.

[Doofy]

============================================

الفترة الطويله اللي قعدتها في مصر أكدتلي أن أغلبية المجتمع حتى لو كان غص عنهم تحول الى مجتمع مرتشي....

شئنا أم أبينا فعلى الأقل أي تعامل مع مصلحة حكومية أو منطقة موظفين لازم يوصلك لأنك تهرش جيبك زي ما بيقولوا علشان مصلحتك تقضى....

أما بالنسبه لأغرب حادثة رشوه كنت بطلها....

فهي أني ثبت شارع من شوارع العباسية بخمسه جنيه....!!!

مرره كنت عايز أروح العباسية وللأسف تهت ساعتها ومكنتش عارف الف منين علشان أرجع...

لقيت عربية حودت فجأة رحت محود معاها فأكتشفت أنه بيركن ولقيت نفسي في شارع جانبي آخره بيطلع على شارع من شوراع العباسية ولكن للأسف كان عكسي ....

والمعلومه دي عرفتها لما لقيت عسكري المرور في وشي...

طلب مني الرخصه فورتهاله وشرحتله موقفي وقلتله أني مش من هنا وأن مفيش ولا يافطه مبينه أي حاجة...

فلاقيته بيقولي الرخصه هتفضل معايا لما يجي الظابط وعمال بيحور عليه ...

فين وفين لاقيته راح سايب الأشاره اللي واقف عليها وراح داخل مابين العمارات وقال أيه عامل نفسه بيدور على الظابط... كل دا وانا ببصله من فوق لتحت ومبتكلمش..

فراح قاللي ها يا بيه هتدفع المخالفه ولا نستنى الظابط...

فرحت قلتله لأ أبقى أستناه أنتى بقى, رحت مطلع خمسه جنيه من جيبي ورحت حاططهم في جيبه فجأة لقيته بيجري على الأشارة اللي سايبها وراح موقف الطريقين بعربياتهم ...

الناس طبعا أفتكرت فيه تشريفه معديه ولا حاجة... رحت بكل هدوء راكب العربية ومطلع النظارة الشمس من الطبلوه وربطت الحزام وقفلت الأزاز وولعت التكيف علشان عرقت وشغلت الكاسيت وطلعت في نفس الشارع العكسي...

والله العظيم كل داه عملته والعسكري موقف الشارع على الصفين !!!

ياعني الواحد لو حب يوقف شارع زاي رمسيس بيتهيألي مش هيكلفه 15 أو 20 جنيه على كدا...

ويجلعه عامر sdm: