سوق الزواج !!

[فــيــروز]

بـريــد الأهــرام

42703 ‏السنة 127-العدد 2003 نوفمبر 6 ‏12 من رمضان 1424 هـ الخميس

سوق الزواج

يشكو الشباب من الجنسين في معظم دول العالم من صعوبة العثور علي شريك الحياة المناسب‏,‏ بحيث أصبح الزواج للمرأة والرجل أملا بعيد المنال‏,‏ إلي حد أن انتحرت إحدي الموظفات ـ كما طالعتنا الصحف ـ بإلقاء نفسها من الدور الخامس بعد أن فاتها قطار الزواج‏..‏ ويزيد علي ذلك الشروط القاسية والمبالغ الطائلة التي يتحملها الرجل للتقدم إلي خطبة إحدي الفتيات‏..‏ فقد تحكم أسرة العروس علي أحد المتقدمين لخطبة ابنتها بأنه لائق من الناحية المادية وعلي متقدم آخر بأنه غير لائق ماديا‏..‏ ولقد ترتب علي مغالاة أسر الفتيات في الشروط الواجب توافرها في العريس المتقدم لها أن ارتفعت سن زواج المرأة والرجل كثيرا عما كان من قبل‏..‏ وأصبح من الأمور العادية جدا أن نري فتاة أو رجلا قد تجاوزا الثلاثين من عمريهما من دون الزواج‏.‏

كل هذه الظروف الصعبة التي تحيط بالزواج وفرت المناخ المناسب لظهور مكاتب يلجأ إليها الرجل والمرأة علي السواء لكي يتركا فيها بياناتهما الشخصية ومواصفات شريك الحياة‏..‏ وبعد ذلك يأتي دور هذه المكاتب التي تقوم بفحص البيانات ثم إيجاد الشخصين المناسبين لبعضهما البعض من حيث مطالب كل منهما في شريك الحياة الذي يريده‏,‏ وهو دور مماثل لدور الخاطبة في العقود السابقة التي كانت تعتمد فيه الخاطبة علي الصور الفوتوغرافية للتوفيق بين شاب وفتاة من المعارف والجيران‏..‏ أما مكتب الزواج فهو مؤسسة مرخص لها بالعمل في هذا المجال ويخضع لإشراف الادارات الحكومية المعنية ومتابعتها ويسلك طرقا أكثر حضارية‏..‏ وبعد أن يقوم مكتب الزواج بايجاد الشخصين المناسبين لبعضهما يبدأ في العمل علي إتاحة الفرصة لتعارفهما‏,‏ فاذا ارتاح كل منهما للآخر يكون ذلك أول الطريق للزواج‏.‏

ولقد اتضح أن الزيجات التي تتم عن طريق مكاتب الزواج الحديثة يكتب لها النجاح ربما لأنها ليست تقليدية من حيث تدخل الأهل أو الخضوع للعاطفة بل يحكمها العقل‏..‏ فاذا كان البعض يتردد في خوض التجربة لإحساسه بشيء من الاحراج بعرض نفسه‏(‏ أو نفسها‏)‏ في سوق الزواج‏..‏ إلا أن معظم الذين خاضوا التجربة كتبت لهم السعادة والهناء والفلاح‏..‏ فهل نقدم علي هذه التجربة في مصر والدول العربية؟‏..‏ انه ليس عيبا أن نعرض أنفسنا في سوق الزواج ولكن العيب أن نرضي بالعنوسة رجالا ونساء‏,‏ علي أن تخضع هذه المكاتب لإشراف الوزارات المعنية ـ الادارات ـ والمتابعة الدورية‏..‏

لواء‏(‏ م‏)‏ رشاد إبراهيم محجوب

خبير في الدراسات الاستراتيجية

سوق الزواج

[Lancelot]

أيا كانت طريقة التعارف بين الطرفين ...

هو مش في الآخر هيوصلوا لإنهم يتقابلوا وجها لوجه ... و كل واحد منهم هيشوف التاني و يعرف إذا كان يناسبه و لا لأ ....

يبقي نسبة المخاطرة مش كبيرة زي ما الناس متخيلة ... و الطريقة غريبة لأنها جديدة مش أكتر ...

زي بالضبط ... التعارف عن طريق النت ... مهما كدبوا علي بعض و تجملوا في الـ chat .. في الآخر هيتقابلوا و كل واحد هيشوف التاني علي حقيقته .. صح و لا لأ ...

كل ما في الأمر ... هو الإحراج ... الطريقة فقط تبدو للمحبطين من أمل العثور علي شريك مناسب ... زي الـ Blind dates عند الأمريكان ...

[فــيــروز]

فى الحقيقه يا لانس انا نقلت الموضوع لانى اعتقد انه لسه شويه على بال ما الناس تقتنع بهذه الطريقه فى الزواج

يمكن لان احتمال التهريج وعدم الجديه فيها كبير

احد زملائى فى الشغل مشترك فى موقع على النت للتعارف بهدف الزواج و بيعطى فرصه للناس تبعت صورها ومواصفات شريك او شريكة الحياه اللى بيطلبها المشترك

ورغم انه مشترك فى الموقع الا انه كل يوم ييجى يقول لى تعالى افرجك على حاجه !! اروح الاقيه عمال يفرجنى على بعض المشاركات لفتيات و مواصفات فتى احلامهن .. و الحقيقه انا باشمئز جدا من سخريته منهن لكن موقفه هذا هو ما دفعنى لنشر الموضوع ده لانى اعتقد ان امر كهذا لايزال الكثيرون يعتبرونه وسيله للسخريه او ايذاء مشاعر الغير ..

[Lancelot]

ما هو ده الفرق بين النظرية و التطبيق ....

النظرية دايما هايلة و كويسة رغم كل ما قد نراه فيها من عيوب ...

التطبيق هو اللي زميلك في الشغل بيعمله .... و كل تطبيق لأي نظرية معرض لإنه يكون فيه أمثال هذا التصرف ... أي حاجة من الممكن إساءة إستخدامها ... لكن ده مش معناه إنها سيئة ... فقط علينا أن نبذل كل ما نستطيع لكي نتغلب علي التطبيق السيئ ....

حد فهم حاجة .... يا ريت يفهمني .... :angry: :huh: :lol:

[Lighthouse]

من غير زعل :angry:

بصراحة باحس اننا مجتمعات معقدة ولا تقبل بتبسيط الامور بل تسعي لتعقيد حياتها ... واصدق مثال على ذلك راي الناس في طريقة الزواج

فمثلا مما سبق نجد ان الناس تلجا لهذه الطريقة ولكن مازال الكثيرين يرونها مدعاة للسخرية .

ايهما افضل

العنوسة للشباب والشابات ام فك العقد والنظر باحترام غلي وسائل التعارف المستحدثة .

فعلا عالم غريبة :huh:

[فــيــروز]

ايوه فهمت موضوع النظريه و التطبيق ده

لكن لابد ان نعترف ان الامر يحتاج لشجاعه كبيره

خصوصا انك لا تضمن رد فعل الطرف الآخر

احيان ممكن الواحد يعمل حاجه ولو لقى غيره بيعملها تلاقيه بيلوم عليه

واذا فكرته انه هو شخصيا كان بيعمل الحاجه دى يقول لك انا وضعى مختلف !!

بالنسبه لكلامك يا لايت :unsure:

زميلى مره كان بيقرا فى الموقع و بعدين لقيته متغاظ اوى

خير يا ابنى فيه ايه

يقول لى تعالى شوفى واحده طالبه واحد مش اصلع !!

قلت له طيب انت زعلان ليه ما انت مش اصلع !!

يقول لى لا بس دى تفاهه و هيافه منها !!

انا قلت له يا سلام طيب ما كتير اوى يقول الراجل فى اعلان الجواز :

عاوزها بيضا و ملفوفه ومقطوشه ومش عارف ايه !! كل واحد حر يعنى البنيه تاكل اكله مش على نفسها !! mfb:

شوف يا جدع المعايير المضروبه !!

[Lighthouse]

دي مش معايير مضروبة وبس

دي انانية شديدة

مش فاهمة ليه الرجل يشترط في المرأة الجمال والقوام ومش عارفة ايه ومش شايف ان دي تفاهة

ولو هي اشترطت اي مقاييس شكلية تبقى تافهة ومخها مضروب

عجيبة فعلا :unsure:

[wa7d]

مش دى برضه هى طريقة " الخاطبه " التى من المحتمل أنها موجوده حتى الآن . ولكن مكاتب الزواج هى الخاطبه فقط منظمه وبإسلوب علمى . وأظن فى المجتمعات المغلقة التى قد توجد فى مصر فإن هذه الطريقه مناسبه جدا . أما التصرف الغير لائق من البعض فهذا لن يخلو منه أى مشروع ، دائما يوجد من يسخر منه . لقد سخروا من العربات عندما إستخدمت لأول مره كوسيلة إنتقال بدلا من العربات التى تجرها الأحصنه ( جمع حصان - صح :unsure: ) بس فى الآخر العربات تكسب .

[فــيــروز]

طيب انا هاقول لحضرتك الكلام الذى يقال عند مقارنة الخاطبه بمكاتب الزواج

بيقال ان زمان الناس كان عندها حرص كبير على سمعتها

الخاطبه تحرص على سمعتها فى الكارير بتاعها :o

والعائلات لا تعرض نفسها لموقف محرج و بالتالى فالرجال المتقدمون للزواج عن طريق الخاطبه هم جادون فعلا فى الموضوع ولن يعرضوا سمعتهم او سمعة اسرهم للخطر وكذلك اسر الفتيات الراغبات فى الزواج

بينما المكتب ده يا ترى ما هى الضمانات التى يقدمها للطرفين؟ مع ملاحظة انه لا يمكن اجبار واحد على الزواج من فتاه لمجرد انه تقدم للمكتب "مش اتقدم له يعنى عشان يتجوزه اتقدم له بطلب الزواج يعنى mfb: " بينما على ما اظن زمان كانت معظم مشاريع الخاطبه للزواج بتنجح .. فالمكتب هنا كيف يحمى الناس الجادين من الناس اللى واخد الموضوع سخريه و تهريج؟ هذا هو السؤال الحائر فى حديث المدينه :unsure:

[Lancelot]

لكن لابد ان نعترف ان الامر يحتاج لشجاعه كبيره

أو إحباط و يأس كبير من أن يقابل شريكة حياته بالطرق الطبيعية ... و ده مش عيب ... أنا عن نفسي متطلب جدا في مواصفات البنت - سعيدة الحظ اللي أمها داعيه لها - بإنها تكون مسز لانسلوت ... و بصراحة التطلب ده قلقني أوي لأني مش شايف إن فيه واحدة ممكن تكون بالمواصفات ديه ... لكن دايما بأقول الواحد مش ممكن يضع مواصفات لشريكة حياته ... فقط لما هيشوفها هيعرفها ....

هذا هو السؤال الحائر فى حديث المدينه

ماشي يا مفيد ... mfb: :o :lol: :lol:

مش فاهمة ليه الرجل يشترط في المرأة الجمال والقوام ومش عارفة ايه ومش شايف ان دي تفاهة

ولو هي اشترطت اي مقاييس شكلية تبقى تافهة ومخها مضروب

شوفي يا ست لايت ... مع إحترامي و موافقتي علي ما تقولين إلا أن المرأة مهم بالنسبة للرجل إنها تكون حلوة و ده سبب رئيسي في إزدهار صناعة مستحضرات التجميل :D ;) ... أما الراجل فالحمد لله إنه مش لازم يكون حليوة أوي و إلا العبد لله فرصه كانت هتبقي في الضياع ups: :D :D :D (طبعا أنا بأهزر .. أحلي من دي كابريو ذات نفسه :unsure: )

[ragab2]

المكاتب

هى بالضبط مثل نظام الخاطبة

والمسؤولية تقع أولا وأخيرا على العروسين أن يسألوا عن بعض من خلال الجيران والزملاء فى العمل

[optimistic]

المشكلة الأكبر في نظري هي عدم وجود فرصة لالتقاء الشباب بالفتيات في جو صحى ملتزم و في الوقت المناسب

في الجامعة بيكونوا لسة صغيرين

و كذلك في النادي(و لطبقة معينة)

و البنات معذورة في انها مش لاقية الفرصة الجيدة للعثور على شريك مناسب

[mizo]

انا مش عارف مستعجلين و متصربعين علي الجواز ليه؟؟؟؟

اسالوا المتجوزيين بصراحه لو الزمان رجع لورا هل ستفكر في جريمه في حق نفسك تاني ,,,,,,,,,,,,,

لاظن

دعوا المكاتب وكل شئ نصيببببببببببببببببببببب

[mnman]

طيب سؤال بيطرح نفسة... هل فكرة المكاتب او الخاطبة او غيرها من الافكار سواء جديدة او قديمة هيمنع الاهل من المغالاة في المهور و تكاليف الزواج.... انك تلاقي شريك \شريكة حياتك سهل... بس الصعب حيفضل مغالاة الاهل....

طيب دة في عائلات او سؤال للعريس بيكون حتسكونوا فين ولوقال معنديش شقة وحستأجر 75% حيترفض الا اذا كانت الفتاة بتحبة وسعات مبيحصلشي... مش عارف لية الناس بتعتبر الشاب المتقدم جي ياخد جوهرة ويمشي.. طيب ماهو كمان شاب محترم وأهلة ربوة وتعبوا معاة... لكن فذلكة معظم الاهل ومغالتهم بتفركش معظم الجوازات... طبعا اهل العريس سعات بيكون ليهم سلبيتهم لكن في مصر 75% بيكون اهل العروسة السبب في فركشة الجوازة...

[فــيــروز]

ردود سريعه ومتاخره :o

د. رجب

اكيد طبعا مسئولية التحقق من العريس او العروسه تقع على اسرتيهما ولكن ده طبعا بعد ان يصل الموضوع الى هذه المرحله بسلام .. ومش عارفه ليه حاسه ان حالات قليله جدا فى حالة مكتب الزواج هى التى تصل الى هذه المرحله رغم تاكيد الكاتب ان من تزوجوا بهذه الطريقه عايشين فى تبات و نبات !!

optimistic

اتفق معك جدا .. انت جبت التايهه والله رغم اننا دورنا عليها فى كل حته :D

mizo

المشكله ان اى اتنين بيتجوزوا بيبقوا مبسوطين و فرحانين و متخيلين انهم غير اى اتنين !! و ان حياتهم سوا هتبقى بمبى فى تركواز :D ومحدش خالص بيقتنع انه بيرتكب جريمه فى حق نفسه غير بعد ما يكون دخل السجن فعلا mfb:

mnman

طيب ممكن تسال والدك لو واحد اتقدم لاختك هيتعامل معاه ازاى !! ما هى العروسه اللى بتتقدم لها دى زيها زى اختك تمام مفترض ان اهلها يقلقوا على مستقبلها .. طبعا كل شئ بحدود ولكن الاهل بيحسوا انهم لو ماعملوش كده يبقوا كانهم بيرموا بنتهم او بيقللوا قيمتها امام زوج المستقبل !! وممكن حتى يا جماعه لو حد عنده بنات او اخوات فى سن الزواج فى المنتدى يفيدنا فى الموضوع ده .. الا وهو .. كيف يكون اهتمام الاب او الاسره بمستقبل العروسه معقولا بحيث لا تبدو الاسره يا اما مستغله و طماعه يا اما بايعين البنيه وعاوزين يخلصوا منها و السلام :huh:

[mnman]

فيروز كتبت:

طيب ممكن تسال والدك لو واحد اتقدم لاختك هيتعامل معاه ازاى

لللاسف يافيروز معنديش اخوات بنات علي الرغم من اني كنت اتمني ان يكون لي اخت بنت.. وعلشان كدة انا نفسي اجيب بنت لما اتجوز....

فيروز كتبت:

طبعا كل شئ بحدود ....... كيف يكون اهتمام الاب او الاسره بمستقبل العروسه معقولا بحيث لا تبدو الاسره يا اما مستغله و طماعه يا اما بايعين البنيه وعاوزين يخلصوا منها و السلام

انتي هنا انهيتي النقاش بفطنة احسدك عليها....

[عادل أبوزيد]

المؤكد أن هناك مشكلة مشكلة حقيقية كيف يلتقى الشاب و الفتاة و كيف تبدأ علاقة إنسانية بين الإثنين يمكن ان تنتهى بالرغبة فى تكوين أسرة جديدة و فى نفس السياق إتفاق رغبة الأسرتين لتكوين تلك الأسرة الجديدة.

ما سبق كان إستهلالا لابد منه

رغم التطور على كل الأصعدة خلال العقدين الآخرين من الزمان إلا أن مسالة لقاء إثنين من جنسين مختلفين معا بطريقة تؤدى لإمكان تعارفهم و تقاربهم ما زالت تعتبر عملية صعبة و إن كانت أقل صعوبة فى المجتمعات المفتوحة على بعضها أو المتقاربة مع بعضها مثل القرى فى الريف و الأحياء القديمة من المدن حيث أن العلاقة الأسرية أو الإنسانية طبيعية و تلقائية و بعيدة عن التكلف و ليس هناك الكثير مما يمكن إخفائه.

يمكنن تصور أن المشكلة تنحصر فى المجتمعات الجديدة حيث لا يعرف الإنسان إسم أو مهنة جاره الذى يقيم فى العمارة التى أمامه ... بل جاره فى الشقة التى أمامه ... من المؤكد أن المجتمعات الجديدة هذه لها أصول أو تعود أصولها - ربما القريبة جدا - إلى الريف أو المجتمعات المفتوحة التى أشرت إليها سابقا و لكنهم لسبب أو لآخر يريدون قطع صلاتهم بأصولهم و لو كانت قريبة ... سمى ذلك ما شئت تطلعات طبقية ... إحداث نعمة أو ربما تطور طبيعى فليس هناك ما يلزم إنسان ناجح جدا طبقيا أن يصر على تناول الطعام على الطبلية ؟

فى ما أسميته المجتمعات المفتوحة لا توجد مشكلة و الخاطبة كمهنة ربما لا تتواجد و يقوم بالدور - دور الخاطبة - سيدة عادية مشهور عنها الود و الإحترام و ربما يناديها الجميع بإسم الخالة أو العمة.

فى المجتمعات الجديدة قد يمكن اللقاء الطبيعى فى مجتمع العمل أو النادى أو الجامعة و لكن الأمر يأخذ وقتا أطول قبل أن يبدأ كلا الطرفين فى النظر إلى إحتمال جدى لتطور العلاقة الإنسانية بين الشاب و الفتاة.

و هنا لابد من وجود catalyst قد يكون الإخوات البنات أو أصدقاء الإخوة الذكور و ربما الخاطبة المحترفة و ربما أيضا مكاتب الزواج التى أشارت إليها الفاضلة فيروز.

مكاتب الزواج رأيت بعض مواقع تلك المكاتب و لم أرتاح إليها.

مرت أربع سنوات على هذا الموضوع ترى هل هناك تطورات جديدة فى آلية الزواج.

[badroora]

فيه يا استاذ عادل وبالدليل القاطع اهوه :unsure:

[badroora]

الاختيار صعب جدا جدا والنماذج السيئه المحيطة بنا تجعلنا نفكر الف مرة قبل المخاطرة احيانا باحسد امى وايام جوازها لما كانت البنت تفرح باى عريس يتقدم لها وتكون فى منتهى السعادة بابسط الامكانيات وزمان كنا نسمع ان الشخص بيشترى البنت لاخلاقها ونسب اهلها

اما دلوئتى الموازين اختلت ومبقاش فى مبدا الناس تختار على اساسة

يعنى انا مثلا طول عمرة مجازفة وبخاطر فى قراراتى وبفكر لنفسي ولكنى لا اجرؤ انا اخاطر وارتبط باحد

كنت الاول مفكراها شيء عادى لحد ما بقت عقدة بجد من كتر المثالية اللى بدور عليها مش حسة انى ممكن الاقي شخص اكون سعيدة معاه .

ولا حتى طرق الجواز اللى ممكن الناس ترتبط بها وهى كالاتى :

الاول عن طريق الاهل صالونات يعنى

طبعا انا كبنت ازاى ارتبط بواحد مجرد حد وصفنى له او سمع عنى من بعيد ولما اوافق اوافق على انهى اساس وانا لا اعرفه

الطريق الثانى الحب

للاسف مافيش حد بيحب حد والحب دا بنسمع عنه فى الافلام والمسلسلات

او يتولد بعد العشرة وتبقي مش عارف تفرق بين كونه حب عادى ولا تعود

الطريق الثالث وهو متفرع

خطبة او مواقع الجواز او القناه اللى فتحة جديدة للجواز دى

كلها تؤدى الى نهاية حتمية الا وهى ترتبط بشخص لا تمط له بصلة ولا تعرفة واعتقد دى مخاطرة

يعنى مثلا كل التعليقات اللى بسمعها لما ارد على امى ولا على اى حد انى مش لاقية الشخص المناسب يقولى انتى مش بتسعى يعنى مثلا اسعى اعمل ايه اصلك مش بتخرجى طيب وهل اللى هاقبلة فى الشارع ولا المول ويحاول يبصلى ولا يلفت نظرى له هيكون انسان محترم وهوافق به

بجد الموضوع دا مشكلة كبيرة ومن احد الاسباب التى تجعلنى افكر الف مرة قبل مانزل اجازة لان الاجازة كلها تضيع فى كلام فى المواضيع دى

طيب ليه بقي مش فكرنا يتطور ونبدا نفكر بحرية شوية ونسيب اللى تتجوز تتجوز واللى مش تتجوز تتجوز طالما انها محترمة ومش بتعمل شيء غلط

ليه بقي الضغط على كل بنت كبرت انها لازم ولازم ولازم مع انها ممكن توقع فى واحد ويكون مش كويس ويطلع عنيها

بجد حاجة تغيظ ومش لاقيلها حل لا انا قادرة اقتنع بالجواز بطريقة اهلى ولا انا مدية لنفسي ولا لاى حد فرصة انه يقرب منى شكلى كدا بقيت معقدة

:unsure:

[Ahmad Farahat]

شوفي يا نجفة

أنا معاكي في كل ده بس كل عقدة وليها حلال

أولا محدش كامل

ثانيا الإنسان شروة واحدة

ثالثا المسألة أبسط من كده

لازم تعرفي إن أي حد فيه عيوب وزي ما الراجل فيه عيوب ممكن لست يبقى فيها عيوب وزي ما كتير من جوازات الصالونات بتنجح زي ما كتير من جوازات الإختلاط ما بتفشل

مفيش مسلمات في الحاجات دي

ومفيش قواعد ليها

بس بتختلف من شخص لشخص

ومن ناس لناس

أرسين