البك المدير

[Sysanalyst]

منذ بضع أيام وأنا أكلم صديق قال لى أنا جالى مكالمة تليفونية من محمد بس كانت الساعة 2 باليل و أنا إفتكرت دلوقتى ولازم أكلمه(محمد هو شخص طيب جدا, صديق من أيام الكلية و عرف عنه بأخلاقه ) و فى اليوم التالى كلمت صديقى وسألته عما حدث قال لى أن اللى اتصل مش محمد ولكن أمه والظاهر أن فى مشاكل فى البيت بس محبيتش أتكلم معاه فى الموضوع ده أرجوك كلمه أنت.

فقلقت جدا لأنى حسيت إن هناك مشكلة جامدة فكلمته على الفور وسلمت عليه فوجدت فى صوته حزن شديد زى ما يكون واحد عمال يخقنقه وإحنا بنتكلم. قلته مالك يا محمد إنت الظاهر فى عند مشكلة جامدة, قال لى أبدا أنا متضايق وقرفان من كل حاجة ونفسى أسيب الشغل..... , قلت له هو فى عندك مشاكل فى البيت , فقال لا الموضوع مش كده , أنا بشتغل كل يوم وبطحن رأسى تفكير وتعب وفى الأخر لا حد بيقدر ولا حاجة.

وعرفت من كلام محمد أنهم عينوا واحد ليس عنده خبرة ولا قدرات خاصة ولا حتى بتاع شغل مدير عليه وحتى أصغر من محمد ليس بسبب كفائة ولكن ولأسباب سياسية بالمصنع, ومحمد شخص ذكى جدا ومخلص فى شغله من خلال ما عرفته أنه يبذل أقصى ما فى طاقته, وكثيرا كان محمد يرجع البيت الساعة 12 باليل من المصنع ويرجع تانى يوم ليبدأ العمل صباحا من الساعة 8, وكان يبذل ما فى وسعه لينافس الناس بإخلاصه وقدراته ليثبت جدارته فى العمل. ما النتيجة الأن؟ النتيجة أن محمد إنخفض قدراته بعض الإحباط وقعد يسأل نفسه طب وأنا بعمل ده ليه إذا ما كنتش حاخد عليه حاجة, ولأن محمد كان عارف النظام ماشى إزاى كان زمانه كل يوم بيصبح على المدير ويتملقه لينال نقط فى صالحه, ومحمد راجل قليل الكلام كثير العمل والكلام ده ما بينفعش فى مصر لأن تقييمك لا يعتمد على قدرتك ولكن وعلى لسانك.

من أين جاء هذا؟

لأن المديرين فى مكان فى الغالب ما بيقدرش الشخص على النتائج التى حققها . فى الغالب بيكون بينزل يشوف العمال ويقول لهم انتوا اللى بتعملوه ده غلط ومن ضمن أسبابه جهله بالفنيات, والعمال وجدوا حلا بأن يتوقفوا عن العمل عند وجود المدير , لأنه اللى بيشتغل سيقول له المدير أنت شغلك غلط وهتاخد جزاء!!! وعلى اى عامل عرفته سابقا كان يقول لى أنه كان يعمل بشركة كان ماسكنها أجانب ولما مسكها مدير مصرى خربت, فكان العامل يرى زملائه قاعدين ما بيتشغلوش و هو لما شافهم راح ماسك الشغل بتاعهم ومكمله وهم قاعدين يتسامروا ويضحكوا وفى الأخر بسبب المجهود المضاعف طبيعى أن تخطئ خطئا بسيطا فتجد نفسف تعاقب عليه, والمضحك أن العمال اللى ما بيشتغلوش أخذوا مكافأت!!! مخدوش عقاب من أساسه فبقت السياسة إشتغل أقل أخطائك تبقى أقل تأخذ مكافئة أما إذا إشتغلت كتير أخطائك تبقى أكثر تأخذ جزاء

وعجبى

[se_ Elsyed]

بص يا عم سيستم اناليست ..

- الإدارة لابد ان يكون فيها نوع من الديكتاتورية ، بمعنى إن انا لو مدير وشغال معايا 200 موظف مش معقول لما أخد قرار أجتمع بيهم كلهم واقولهم هانعمل كذا وكذا أو لما اجي أعين واحد أخد رأيهم ندفع له كام وأيه الإمتيازات اللي هايحصل عليها؟

- يعني لازم صديقك يريح دماغه ويبطل تفكير في الآخرين طالما ماحدش أعتدى على حق من حقوقه أو سبب له مضايقات ... هنا فقط ممكن يتكلم ..

- أما إذا كان حاسس بظلم ما واإهم عينوا شخص أقل منه خبره وبمرتب أكتر منه بكتير فممكن يريح نفسه ويقدم إستقالته ويروح مكان تاني فيه ناس بيقدروه ..

- لكن صدقني في كل مكان سيجد هذا لأن يا صديقي ما يراه المدير مختلف تمامًا عن ما يراه الموظف العادي ...

س س مدير حالياً وموظف عادي سابقاً كان بيحس نفس الاحاسيس بتاعت محمد لكن لما أترستأ وقعد على الكرسي المريح أبو سوسته وبقى يحط برفان الوضع أختلف تماماً ...

[Sysanalyst]

انا معاك يا سى السيد أن الإداره لابد من وجود بعض الدكتاتورية

لكن صاحبنا محمد هنا مدير عمال أساسا ويعرف معنى الإدارة جيدا, وشئ أخر أن المدير لو إفتقر الخبرة الكافية هتلاقى الناس هتضحك عليه لأنه مش فاهم الشغل كويس, وإذا ما كانش الشغل كويس يبقى الإنتاج حيخرب بإذن الله واللى إتعين مدير ده ليس عنده أى نوع من المهارات الإدارية سوى أنه يجيد التملق بس , اتفرج بقى لو وقعت مشكلة فنية مين اللى حيحلها؟ ليست المسألة هنا إدارة تسويق أو مبيعات بل هى إدارة عمال ليصنعوا منتج وهذا مختلف نوعا ما وإن يكن ليس كليا.

والمدير الناجح يأتى من قدرته على الإنتاج الفعلى, فتسأل نفسك هذا السؤال هل هذا الرجل منتج أم لا؟ وجوده فى مكان أخر سيزيد من أنتاجه أم لا؟

طبعا الكلام ده أشوفه بعينى مش تخمين و صاحبنا محمد شكله حيريح دماغه ويقلل من مجهوده بسبب جهوده الضائعة

[فــيــروز]

لا مش صح

مش صح انه يياس و يستسلم و يقلل من مجهوده نتيجه لاحباطه

بالعكس كلما زادت جودة عمله كلما كان هذا رد عملى جدا على من اختاروا من اهم اقل كفاءه و فى النهايه لا يصح الا الصحيح ومهما تكلم الآخرون و تملقوا العمل الجيد يتحدث بصوت اعلى عن صاحبه

وصدقنى حتى لو البشر لم يروا ربنا شايف و بيكافئ الانسان بما يستحقه فى النهايه و ده كلام عن خبره مش مجرد امنيات .. عشان كده خلى صديقك يستغرق فى العمل حتى اذنيه .. لان دى طريقه مفيده انه ينسى الظلم الذى تعرض له .. و الشغل الجاد افضل طريقه تنسى الانسان همومه و تشعره بقيمته و باهميته ولغاية ما ينال ما يستحقه يخلى عنده امل كبير فى ربنا و ثقه فى عدله

[سقراط المصري]

اوافق على رأي فيروز ، ورأيي مثلما قالت.

سقراط

[محمود تركى]

أرجوا أن يستمر محمد فى عمله بنفس الإخلاص و التفانى,

و فى نفس الوقت, سيظهر الفرق بينه و بين المدير المحسوبي, حيث سيكشف التفاوت بين كفاءة الإثنين مدى جهل المدير الجديد الذى يعتمد على نفوذ الأكابر الذين سنراهم فى المستقبل فى موضع المساءلة

[wa7d]

او محمد بيشتغل فى شركة قطاع عام ، يبأه مافيش فايده ، لأن القكاع العام لم ينشأ إلا للمحاسيب . وقوله يدور على واسطه . لو مفيش لا يتعب نفسه ، مفيش أمل . بس ياخد باله لأن الكدير الجديد لابد حيعمل فيه مقلب . عذا هو القطاع العام .

أما إذا كان يعمل فى القطاع الخاص فلابد إنه سوف ياخد حقه آجلا أو عاجلا . بس يحاول يظهر بشغله شوية . يعنى بعد ما يخلص الشغل ويدى الشغل حقه ، يبدأ دور المنظره ... يعنى شوية منظره لا تضر هيه الدنيا كده .

[se_ Elsyed]

وصدقنى حتى لو البشر لم يروا ربنا شايف و بيكافئ الانسان بما يستحقه فى النهايه و ده كلام عن خبره مش مجرد امنيات ..

يا سلام عليكي يا فيروز يا خبره lol

أنا كده مصمم أعرف إسم الحلاق بتاعك علشان أتعرف على الإنسان اللي بيظبط الدماغ العاليه دي ..

تعرفي أن كلامك ده مطابقاً لقول الله في القرآن " إن الله لا يضيع أجر من أحسن عملا ً " وطبعاً لازم يكون العمل ده أساساً لوجه الله يعني الواحد ما يتملقش حد او يشتغل ويستنى المكافأة او الثناء من الآخرين ..

وتصدقي بالله إني كنت بأشتغل شغل نار أول ما اتعينت وكان المدير اللي فوقي يأخد التقارير والشغل بتاعي ويحط عليها إسمه ويقدمها للإدارة العليا وياخد مكاافأت عليها وأنا أخد صابونة .. بس ماكنش في دماغي وكنت بأقول لنفسي إني بأشتغل عند ربنا وهو المطلع وشايف كل حاجة ... لحد ما جه الوقت اللي إتعينت انا بدل المدير بعد 3 سنين وأفاجأ بإن رئيس مجلس الإدارة بيقولي أن طول السنين اللي فاتت دي كنت عارف أن إنت اللي بتعمل الشغل وفلان بيحط أسمه على الورق بس وعلشان كده خلعنا عليك لقب مدير إدارة .... ساعتها بقى الواحد بيزيد يقينه وإيمانه بالله وبيحس أن مجهوده ماضعش هباءً .

انا عايز أكتب قصة حياتي في كتاب وأنزله السوق .. أيه رأيكم ؟ بس فكروا معايا في إسم كتاب يكون فيه تشويق وإثارة ومغامرة

[فــيــروز]

وعلى راى الست حميده سيدة اعالى البحار :

اشكركم اشكركم .. موش عاوزه هتاف خاص .. عاوزه هتاف عام

يعيش البحر الاحمر المتوسط

والله يا س.س. اخجلتم تواضعنا

هو الصراحه مش حلاق اللى بيظبط الدماغ .. هى بس هوايه غريبه شويه .. هى الفرجه على الناس .. مش من باب التعالى عليهم لا سمح الله ولكن بجد الواحد اما يتابع البشر واحوالهم يتعلم علام !! من غير ما يتحرك من مكانه حتى ..

نعود للموضوع الاصلى ..

انا ايضا تعرضت لموضوع انى اعمل شغل و ناس تانيه تنسبه لنفسها بس كنت باكبر دماغى لانى كنت محتاجه انى اشتغل جامد عشان ماكانش عندى خبره .. وفى الحاله دى بتضطر تتجاهل ان شغلك ينسب لغيرك ..

وكمان فيه عندك الاسافين اللى بتاخدها بحسن نيه او بسوء نيه ..

يعنى فى عملى السابق اول ما رحت كان لى اصدقاء فيه يعرفونى من بره الشغل

كنا بناخد مع بعض كورس قبلها

وللاسف خلال الكورس ده -كانت مدته طويله- كان اول تعرفى على الانترنت وكانت بالنسبه لى زى صندوق باندورا كده .. يعنى كنت باعمل تشات مع طوب الارض وطول النهار اتسنكح على النت !! واصدقائى دول كانوا عارفين الموضوع ده

بس اللى ماكانوش عارفينه ان الواحد وهو بيدرس بيكون فى وضع واما يشتغل بيعقل شويه

فكنت الاقيهم -بعد ما التحقت بالعمل الجديد وياهم و هما كانوا سابقينى هناك- يدخلوا عند المدير و اما تيجى سيرتى يتطوعوا مشكورين بذكر ادمانى السابق للسايبر !! وطبعا الراجل يتعصب و يتخيل انى مش باشتغل !! و العلاقات بيننا ساءت جدا جدا .. لدرجة انى قلت له بعد التحاقى بالعمل بفتره بسيطه انى ممكن اسيب الشغل لو شغلى مش عاجبه ومفيش داعى للكلام اللى من تحت لتحت !! وقال لى يومها جمله محبطه جدا ساعتها وهى ان اللى بيتاخد عنه انطباع سيئ فى الشركه مهما عمل مش بيتحسن الانطباع ده !! حتى لو الانسان ده اتحسن !!

المهم بقى بعد توتر العلاقات جدا بقى هو مايتعاملش معايا و يصدر النائب بتاعه فى التعامل معايا و الحقيقه الراجل كان مقتنع انى كويسه مش عارفه ليه .. بس فى الحقيقه كان ده له تاثير كبير جدا عليا لانه كان بيتعامل معايا بثقه من الاول وبطريقه احسن كتير من المدير التانى وكان بيدينى شغل كتير جدا .. يمكن عشان مايسبليش اى فرصه ادخل على النت وكنت فى الاول باحس انه بيعجزنى بالشغل ده

بس بالتدريج لقيت انى سعيده جدا و اهم شئ عندى انى اخلص الشغل فى وقت اقل حتى مما توقعه هو .. كأنى فى سباق مع نفسى وباتحداها .. وشويه شويه بقيت مسئوله عن شغل كتير اكتر من باقى الزملاء المتطوعين بالكلام و نقله .. واكتر من الآخرين اللى بيتكلموا اكتر ما بيشتغلوا .. حتى الناس اللى الشركه بتتعامل معاهم بقوا يطلبوا يتعاملوا معايا بالاسم ويطلبوا ان شغلهم اللى مع ناس تانيين يتحول ليا انا !!

وبعد ما مروا سنتين فى الشغل ده بقى الانطباع عنى فى الشركه هايل جدا .. وكل ما افتكر جملة المدير الاولانى الخاصه بالانطباعات ابتسم .. خصوصا بعد ما عرفت من النائب بتاعه اللى بقى مديرى المباشر ان الانطباع عنى فى الشركه ممتاز .. وفى اليوم اللى قررت امشى من الشغل عملوا لى حفله جميله اوى .. محدش فيها كان فاكر اصلا اى انطباع سيئ اتاخد عنى فى الاول .. بالعكس كانوا بيعبروا عن اسفهم الشديد انى قررت امشى ..

عشان كده يا اخ محمد ياللى مش سامعنا .. ماتياسش خالص .. فيه حاجات كتير فى حياتنا تبدو فى الاول مثبطه للهمم و معوقه لكن لو قررنا اننا اعلى منها هنبقى بالفعل اعلى منها .. لازم يبقى الانسان عنده ثقه بربنا و ثقه بنفسه و بقدراته

مع خالص تمنياتى لك بالتوفيق

[فــيــروز]

انا عايز أكتب قصة حياتي في كتاب وأنزله السوق .. أيه رأيكم ؟ بس فكروا معايا في إسم كتاب يكون فيه تشويق وإثارة ومغامرة

س.س. سيره و مسيره على فكره ده اسم مسلسل اذاعى عملوه عن حسنى مبارك من كام سنه

س.س. من طبق العدس الى النضاره الشمس

اوعى تزعل من موضوع العدس ده انا باهزر معاك :-)

[Sysanalyst]

ومدير محمد طبعا مش هيسيبه يثبت نفسه على حسابه ولكن أنا شخصيا أنصحهه بإنه يدور على شغلانة جديدة لأن وجود مدير غير مؤهل فوقه يعرض مستقبله المهنى إلى خطر وربنا يستر

وكمان فيه عندك الاسافين اللى بتاخدها بحسن نيه او بسوء نيه ..

الله هو أنت كمان؟ :)

كنت بأشتغل شغل نار أول ما اتعينت وكان المدير اللي فوقي يأخد التقارير والشغل بتاعي ويحط عليها إسمه ويقدمها للإدارة العليا وياخد مكاافأت عليها وأنا أخد صابونة ..

بس هو كان متعين مدير قبل منك مش كده؟ :?

[doha]

قصة سين سين وقصة فيروز يستحقوا التامل

كما العاده .. للرفع