مصيبة في باب المغتربين

[se_ Elsyed]

حلو العنوان الجذاب ده مش كده ؟!!!!!!!!!!!!!!!

اقسم بالله لو إحنا بنأذن في مالطة كان زمان بقى عندنا كمية مسلمين نغزو بها اوروبا وامريكا واستراليا ان امكنا .. انطلاقاً من تلك الجزيرة الصغيرة

لكن الظاهر ان الناس حطه خيش مش قطن فيي ودنها او صبة اسمنت

هي مصيبة او معضلة اني ادخل اسأل سؤال اطلب المساعدة واختار عنوان يُعبر عن تساؤلي ؟

بدل ما نقرأ عنوان في باب المغتربين بيقول " يا لهوي "

" يا خراشي ياني "

" انا مش عارف "

" الحقووووني "

ايوه انا اسلوبي جاف بأعتر ف بذلك ... لكن قرفت وزهقت وما بقيتش ادخل باب المغتربين الا مترقباً ومتحسراً ومعرضاً عن اجابة اي تساؤل لا لشيء الا اني ما عنديش جديد .. ده احنا فصصنا السعودية حته حته لدرجة ممكن شرحنا للناس كيفية دخول الخلاء في سكاكا وعرعر وخميش مشيط ....

ولم اجد فرقاً بين مهندس وطبيب وعامل بناء

الغالبية داخله بتهطرش ...

ايوه الغريق بيتعلق بقشاية ... ماشي معاكم حق

لكن لما تعرف ان الغريق ده بيعرف يعوم وقعد 16 سنة يتعلم العوم .. وفجأة لقيته في البحر وهو بيغرق ماسك كوز عمال يعبي به ميه مالحه ويشرب حتى الثمالة وجايب سكينة ونازل تقطيع في فردة الكاوتش اللي عاملها عوامه .... هل ده تتعاطف معاه وتقول مسكين محتاج مساعدة ؟

ابداً والله

مواضيع مثبتة فيها من المنقي خيار .... واعوذ بالله من كلمة انا ... انا كنت اقل واحد مساعدة للاخرين وكم كانت فرحتي برؤية هذا الكم من ايادي المساعدة من الاخوة الزملاء

ولكن ... كل واحد داخل جديد لقيته شايل في ايده جردل مليء بالطين ونازل دهان في الجدران المزينة بتلك المجهودات ...

وقطر ماشي في طريقة وماليش دعوة بغيري او بالمجهود المبذول

وايوه فليذهب الاخرون الى الجحيم

انا طبيب ومع ذلك هافتح موضوع كل ربع ساعة عن

" انا جاي كمان شهر السعودية ... يا ترى اجيب لبس شتوي ولا صيفي ... والجاكيت يكون كروهات مبطن بفروة خروف .... ولا خروف مبطن بقش رز ؟ ولو لبس صيفي يبقى تي شيرت كت ولا نص كم مع ومزين بدانتيلا ن عالوسط "

اه والله .. وكإن السعودية في كوكب المشترى حيث عدد ايام السنة 12 يوم .. فيا عيني الواحد بيحتار

وايوه لو تلقيت 10 ردور ف موضوع حيوي جداً اتكرر واتجاوب عليه 1320 مرة فقط .. مش هاقتنع وهافتح موضوع تاني فوق الاولاني والفرق بينهم ربع ساعة يمكن المحل الجديد تبقى عتبته حلوه ونلاقي زباين وابقى صاحب مِلك ....

هاقول لكم سر .. اقترحت على عادل بيه ان ما فيش عضو لسه مشترك يستطيع ان يفتح موضوع جديد الا بعد 30 مداخلة على الاقل ونعطيه فرصة للبحث عما يريده وياخد نفسه شوية ...

لكن الرجل ومعه باقي الاخوة رفضوا ذلك واستعاضوا عنه بإن التغيير لابد ان يكون في العقول وطريقة التفكير وليس في القوانين المتلتلة ....

انا كنت غلطان يا عادل بيه ويا باقي المشرفين ... وانتو صح ...

فعلاً الناس بتقرأ وتقدر جهود الاخرين وماحدش ما شاء الله بيسيب كلمة شادرة او واردة الا وقرأها

[icehearted girl]

بصراحة انا مقدرة الضغط العصبي اللي حضرتك فيه حاليا بس ياريت متتنرفزش من كلامي

انا ومثلا او غيري معدي لقي المنتدي هنا عجبه نشاطه

لقي في ساحة للمغتربين يسلام ونعم الهدف

عنده شوية تساؤلات حطها

عمر مهييجي في باله _او الغالبية يعني_ انه يبص في المواضيع المثبتة

حتي لو بص اعتقد مجهود شاق عليه انه يدور في عشرات الصفحات

يعني حضرتك حط نفسك مكانهم برده

اذا كان عالمجهود يبقي حضرتك تستعوض ربنا فيه

اذا كان غرضك فعلا خدمة الاعضاء يبقي _مع انه موضوع متعب حبتين_ تدورلهم علي اللينك اللي في اجابة سؤالهم مباشرة

وتبعتهولهم عالخاص

وتغلض موضوعهم دا او تخفيه

وميرسي مقدما لسعة صدرك

[aimen]

فكرتنى بالعبارة المأثورة " انتى جايه تشتغلى ايه ؟ سواق سواق "

سى السيد معلش يعنى من حق كل مواطن انه يسأل

عن نفسى لو ربنا اراد وجيت اعمل استقدام لزمن و حتمن لأعيش ظروف المرحلة واجى احط لى كام سؤال

مش مهم اتسال قبل كده ولا لأ

بس لازم اسأل

دا حق من حقوقى يا ناس

[بندق أفندى]

زعلان ليه بس يا س س .. ما هو لو انت شايف شغلك وكل موضوع يتفتح تقوم رايح ضايفه على الموضوع اللى قبله كانت بقت معروفة ولو فيه مواضيع مثبتة فى أول كل باب عن القصة المتكررة كانت كمان اتحلت .. ما تزعلش .. خطأ متبادل

[سهل جدا]

الله يعينك يا أخ سين سين

وإن شاء الله يكون في ميزان حسناتك

على فكرة قسم المغتربين ده تحديدا فيه باب من الأجر عظيم للقائمينعليه,

لأنه فعلا بيحل مشاكل كثير وبيعرف الناس حاجات لازم تعرفها ..

لكن المشكلة الحقيقية إن مش كل الناس عارفه طرق البحث

بل أكثرهم مش عارف إن فيه حاجة اسمها بحث

وفي ناس بتدخل ومعاها شهادات أكاديمية عالية وعقليات جبارة , ولكنها لا تفقه شيء على النت

فعشان كده بيضطروا يكررو الكلام ونفس المواضيع

اقتراح:

ليه ما تخليش مشرف أو مشرفين تلاتة تانيي معاك في باب المغتربين

يقوموا بفلترة المواضيع أو الرد عليها

أرشح لك الأخ عمرو رضوان

[se_ Elsyed]

حقكم عليه

يعني لو في موضوع عن كيفية استخراج الرخصة في السعودية .. وفي موضوع بنفس العنوان يبعد عنه 3 نانو ميتر ... صعبه دي ان الواحد يشوفه ؟

انا فعلاً اللي غلطان

وهاعين 3421 مُشرف في باب المغتربي للرد على مكالمات الجمهور

فوتكو بعافية

[icehearted girl]

صلي ع النبي بس يافندم :lol:

الموضوه يتحل بالهداوة

[mama nona]

بررررررررررررررررررررررررررررررررررررررررررررررررررررررررررررررررررررررررراحة

علينا شوية يا سى السيد

الناس الجديدة بتدخل مش عارفة هى بتعمل ايه بعد كده بتلاقى الامور اتظبطت وبقت 100 100

شكرا لجهودك معانا

:lol:

[saramath]

السلام عليكم

والله رغم اني كنت دخلت زمان وسالت سؤال يخص السفر للكويت ومن بعدها بقيت بدخل اسبوعيا علشان اتابع قسم واحد وهو قسم المغتربين

لان والله من حوالى 8 شهور كنت فى حاجه ماسه جداااا لاى معلومه عن التدريس فى الكويت ومكنتش اعرف اى حد يساعدني فى الواقع او من قرايبى

ودورت كتير على النت لغايه ما لقيت القسم دا وفعلا عرفت منه معلومات كتيره جدا وعرفتها لزمايلى ال كانو هيسافرو

ومنهم ال اعتقد ان ليا قرايب فى الكويت بيبلغوني بالمعلومات دي

واعتقد ان كل معلومه انا عرفتها ووصلتها لغيرى وغيرى وصلها لحد تاني .. تعتبر صدقه جاريه لصاحب الرد على اى سؤال

وفعلا فيه اسئله كتيره مكرره بس والله فعلا بتفيد جدااااا وانا عن نفسى بقرا كل رد وكل سؤال باهتمام كبير حتي لو كان سؤال مليش اى علاقه به ولا بحياتي

وشايفه ان التكرار دا خلى المنتدي له قيمه وان ال داخل بيحس انه ادامه زي اطلس للمعلومات عن كل بلد

وال بيبقي داخل قسم المغتربين بيبقي زي الراجل ال داخل جامع بيسأل شيخ الجامع عن حكم من احكام الدين ولما بياخد الاجابه بيخرج من الجامع لان دخوله للمسجد كان للاستفاده مش لتبادل المعلومات

وبعدها بيشوف حياته وبيعيشها على اساس الحكم ال قاله الشيخ

واكيد بيرجع تاني لما يحتاج المشوره فى حكم اخر

ودا بيختلف عن ال داخل اى قسم تاني فى المنتدي لانه بالظبط بيكون زي ال داخل نادي او مكتبه منه يتثقف ومنه يعمل مشاركه اجتماعيه مع اخرين واكيد هيرجع فى وقت فراغه للنادي او المكتبه

بس كدااااا ياريت تكونو فهمتو ا حاجه

[doha]

هدي اعصابك الموضوع بجد مش مستاهل ..

على فكره الي بيحصل في المنتدى ده سببه مش عدم الاكتراث بالقوانين وانما بالدرجه الاولى قلة الوعي بالاستخدام الامثل للانترنت والتفرقة بين خدماتها المختلفة ..

في ناس عمرها ماتعاملت مع النت بشكل جدي وبتسمع عنه انه حاجه كده زي مصباح علاء الدين ولا فتح المندل .. هتجيب لك " قرار " اي موضوع عاوزه ( وفي ثواني )

الناس دي لما بتدخل المحاورات متعرفش الفرق في كونها منتدى من كونها شات .. هم عارفين انك بتكتب على النت تسأل على الي عاوزه و ( النت ) هيرد عليك بالمفيد ( في ساعتها )

كمثال الدكتورة الي بتسأل كل شويه على موضوع الامتياز .. احتمال تكون اول مرة تتعامل مع النت وده مش عيب على فكره كفايه انها دكتورة وعلى عينا وراسنا وبقالها سنين عماله ( تدح ) في الكلية واكيد عندها من العلم الي مش عند الاكثرية فينا فمفيهاش حاجه ابدا لو مكانش عندها بعد ده كله وقت انها تقعد على النت وتعرف ( دواخله ) وتعرف الفرق مابين انها تحط استفسار وتستنى لما ربنا يفرجها وحد يشوفه او انها تلاقي موضوع نشط فيه مداخلات فتفكر وليه ماحطش استفساري هنا عشان الناس الي عماله ترد دي ترد عليه بالمرة .. هي معذورة جدا وتصرفها مفيهوش حاجه من وجهة نظري خاصه وهي جديده على المنتدى . زي مااحنا مش مطالبين نعرف العلم الي عندها من اسماء ادوية وامراض هي برضه مش مطالبة تحفظ النت واستخدامه .. وزي مش عيب اننا مش عارفين طب برضه مش عيب ابدا انها مش عارفه نت ..

البحث بالنسبة للاكثرية فينا حاجه كده زي المية والهوا وبالناسبة للناس الي داخله نت جديد او مش محترفة تعامل معاه حاجه زي اللغه الصينية نسمع عنها ولا نشوفهاش وان شفناها ندير وشنا الناحية التانيه وبلاش احراج .. فطبيعي جدا لما حد من الناس دي يدخل النت وعنده استفسار يروح بسرعه حاطط له موضوع جديد ( وميكلفش نفسه ) يدور في القديم ببساطه لانه اصلا مش هيعرف يدور حتى لو حاول ده ان كان عارف بوجود خاصية البحث من اساسه ..

ده من جهة ..

من جهة تانيه الانسان لما بيكون قلقان على موضوع مصيري بيبقى بالظبط غريق بيتعلق بقشة .. انا جربت الحكايه دي لما كان ابني الله يرحمنا جميعا برحمته موجود في الحضّانة .. وقتها حطيت استفسار في منتدى مشتركه فيه عن احتمالات نجاته او ماشابه .. مليون حد رد علي بان الموضوع ميخوفش وان اطمني ومع ذلك ولا كأني قرأت الردود دي وبرضه قعدت اسأل واستفسر وكل الي تقولي متخافيش ارجع اسألها تاني وتالت وكأني مسمعتش .. كتير وانا بكتب استفسارات عن رد معين انكتب لي وقتها اكتشف ان الرد اساسا فيه الي بسأل عليه بس غصب عني كنت برجع اسال تاني وعلى نفس الجزئية الي اترد علي فيها .. للاسف احيانا بيكون الامر شاغلنا لدرجه اننا عاوزين نطمئن ولو بالكلام.. وللاسف لما بيكون الموضوع ( كبير ) الكلام مبيكفيش فبنفضل نسال ونسأل ومهما كانت الردود الي هنحصل عليها مش هنبطل ندور على المزيد منها ..

وللاسف احيانا بيكون الامر الي شاغلنا شيء عادي بالنسبة للناس التانيه يعني لو قلت لك فلان سافر هتقول وايه يعني مالدنيا كلها بتسافر لكن لو فلان ده ابنك او اخوك او انت شخصيا اكيد هتفرق معاك كتير اوي .. اكيد لما حد بيكتب عن موضوع بيكون هام اوي بالنسبة له بينما بالنسبة للي بيقرأ مجرد موضوع او استفسار عادي بيحصل وهيحصل كل يوم ..

الخلاصة ..

متحرقش دمك وتفكر ان الناس دي مستفزه بتصرفاتها وانك ملزم باجبارهم على اتباع القانون مهما حصل وانما فكر بانهم معذورين .. اعمل الي عليك ونبه مرة وحده للمخالفة ثم احتسب الاجر عند ربنا وقوم بضم المواضيع المتشابهة من وقت للتاني وتغيير عناوين مايلزم تغييره .. انا عارفه ان الحكايه دي ( مقرفة جدا ) وبتستنزف وقت وجهد وفكر لكن لما تضح في الحسبان كم الناس الي هتقرأ المواضيع دي وهتستفيد من تعديلاتك وضمك للمتشابه منها وتوضيح العنوان للمبهم فيها صدقني هتطلع انت الكسبان في الآخر .. الاستفسارات في محاورات المصريين بالذات تمس امور مصيرية في احيان كتيره وتخيل لو ان شخص واحد بس استفاد من معلومه مهمة زي الي بتطلع من وقت للتاني في المحاورات وتخيل ان كان لك دور في الاستفاده دي نتيجة تنظيمك للقسم .. كل يوم هيمر على الشخص ده وهو عامل بنصيحة سمعها هنا وقد تكون غيرت حياته انت بتاخذ عليه ثواب وليوم القيامه .. ده لو شخص واحد فمابالك لو كان العدد المستفيد بالمآت او الآلاف ؟

اعتبر نفسك جندي مجهول بيعمل في صمت .. وظيفتك شاقة جدا وبتحرمك من متعة تصفح المنتدى بدون مسؤوليات وقد يكون فيها ضغط نفسي خاصه لما تشوف حد خارج على النظام وليس في يدك شيء لتقويمه .. كل ده اكيد ممكن يحصل لكن في النهايه هي رسالتك الي بتعملها وممكن مع الوقت تغير بيها حاجات كتير وبرضه اكيد لو احتسبت فيها الاجر هتفرق معاك برضه كتير ..

[زعلان]

طبعا فتح اكثر من موضوع لنفس العضو حول نفس التساؤل ده امر مرفوض و فتح مواضيع بعناوين مستفزة لا تدل على المحتوى زي "اعمل ايه يا جدعان" و "الحقوني و اخواتها" برضه ملوش معنى لازم الموضوع يبقى محدد يعني اسم المدينة و المشكلة باختصار وده حيساعد على وجود ردرود اكثر على فكرة

اما تكرار المواضيع لاعضاء مختلفة فده شيء يصعب ضبطه لأن كل صاحب موضوع بيشعر بأنه حالة خاصة زي المريض الي رايح للدكتور وده عايزه تقبل و تفهم من الادارة و الاعضاء

[أحمد سيف]

اللي يغيظ فعلا إنك بتلاقي الأغلبية داخله بهدف واحد بس وهي إنها تسأل السؤال وتاخذ إجابته وآدي وش الضيف ... وما تشوفهمش ثاني إلا لو كان عندهم سؤال غيره

فيه ناس ده اسلوب حياتها ... مايعرفش حد إلا إذا كان عاوز له عنده مصلحة ... وأكيد الموضوع ده مش بس في المنتدى لأ في الحياه برضه

مش مقدره إن ده منتدى يعني زي ما بتاخذ منه لازم تديه ... واللي بيساعدك النهارده لازم انت كمان تحاول تساعده بكره لما يحتاج يعرف معلومة

تم تعديل 26 أبريل 2009 بواسطة أحمد سيف

[jamalpody]

استاذ سين سين

اولا : انا بحبك من غير ما اعرفك وان كان ليه تحفظ علي بعض ارائك طبعا في ابواب اخري مش هنا

وقد كان هذا استهلال لابد منه علي راي الاستاذ عادل

ثانيا : انا والله لا ادخل محاورات المصريين الا عشان باب المغتربين

ثالثا: من وجهة نظري افيد باب موجود في هذا المنتدي هو باب المغتربين وممكن تعمل استفتاء وتشوف النتيجة .

رابعا : الصوره العامه للمنتدي مزريه كشكل وكصوره والمنتدي بشكله الحالي غير جذاب بالمره يا عم بص علي المنتديات

الثانيه وشوف الشكل والالوان والايقونات اسمحلي معلهش انتم بتستعملوا شكل منتدي من العصر الحجري

ياه الساعه 7.10 انا اتأخرت اوي

يتبع (بعد ما اودي الاولاد المدرسة )

[elfakhrany]

أخى العزيز سى السيد

أتفق مع وجهة نظر بعض الأعضاء أن الكثير ليس على دراية بالمنتديات وبخاصية البحث

ومن وجهة نظرى بالنسبة لباب المغتربين أن يكون عنوان الموضوع المثبت ( من فضلك ... لو سمحت .. قبل ان تضع استفسار او سؤال حاول تقرأ اولاً ) باللون الأحمر

حتى يكون ملحوظا من الأعضاء الجدد و ان تكون التعليمات فى صورة نقاط مبسطة أضافة لرابط خاصية البحث داخل الموضوع المثبت .... وشكرا

تم تعديل 26 أبريل 2009 بواسطة elfakhrany

[وليد صفوت]

السلام عليكم،..

الآخوة الافاضل، ليس من حق العضو أن يزعج زملائه من الاعضاء و المشرفين بحجة أنه يريد أن يسال و له الحق. لا، ليس له الحق فى القاء التساؤل بدون النظر الى باقى المواضيع.

هناك خاصية "البحث" فى محاورات المصريين و هى خاصية ممتازة؛ إذ تستطيع بواسطة هذة الخاصية البحث عن المشكلة التى تستفسر عنها.. مثال:

أريد أن اسأل عن البصمة... أذهب إلى خاصية البحث أسفل صفحة باب المغتربين و أكتب ( بصمة) ثم اضغط على "بحث"... ستجد لستة من المواضيع التى تتناول البصمة، و ستجد ايضاً كلمة البصمة فى كل موضوع مظلّلة بالأصفر...

و هكذا ليس من الصعب أبداً البحث فى المواضيع مهما كانت بعيدة أو قديمة.. فمحاورات المصريين تستخدم تقنيات حديثة و عملية جداً و بإستطاعتى البحث عن أى شيئ فى أى وقت اينما كان و فى أى باب عن طريق خاصية البحث فى الصفحة الرئيسية.

المشكلة يا سادة ليست فى حق العضو الجديد التسأؤل أو لا.. بل فى العقلية البحثية للعضو... و ثقافة التواكل على الغير.. إذ أنه بإستطاعته البحث بنفسه، بدلاً من ذلك يلقى بهذة المسؤولية على زملائه و ببساطة يذهب ليفتح موضوع جديد ربما يحتوى نفس العنوان بالنص لموضوع قديم تناول نفس النقطة...

ربما الاقتراح الذى اقترحه على س س و استاذ عادل و باقى فريق الإشراف هو أن يتم - اوتوماتيكياً - رفض أى عنوان يحمل نفس كلمات عنوان أخر ( على طريقة اختيار اسامى للأعضاء، فالنظام بالتأكيد يرفض عند التسجيل ان يتم باسم عضو موجود بالفعل) نفس المبدأ ربما لو تم تطبيقه فى محاورات المصريين سيلفت انتباه العضو إلى ان موضوعه بالفعل موجود و عليه أن يبحث عنه...

تحياتى،

[ozoozo]

انا عندي اقتراح

احنا عندنا حوالي 160 صفحه في باب المغتربين وعندنا موضوع مثبت اسمه ملف عن المعبشه في السعوديه فاقترح ان احنا نقسم نفسنا ويقوم بالتقسيم ده الساده المشرفين ان احنا نجد 16 متطوع كل واحد 10 صفحات يفلترهم ويحط اللينكات بتاعتهم في الموضوع ده واللي يحب يتطوع من الاعضاء هايقول ده هنا -وانا اول واحد- وبعدين المشرفين يقسموا الصفحات دي علي المتطوعين يعني انت من 10 الي 20 وفلان من 80 الي 90 وهكذا ويبعتو ده في رسايل خاصه لكل واحد وبكده ممكن نفلتر الباب علي حوالي 100 لينك بالكتير واللي عايز يسأل يسال في الينك الخاص به واي موضوع جديد يفتح بنفس الصيغه يضاف الي الموضوع الخاص به وهكذا

[se_ Elsyed]

إقتراح جيد يا أوزوزوو

لكن تبعت لمين ؟

إنت بتتكلم عن الأعضاء القدامى

لكن إحنا نتحدث عن بعض الأعضاء الجُدد اللي بياخدوا في وشهم زي القطر وما بيهموش تعليمات ولا إن شالله تولع بجاز واتحدى إن كان عارف المكان اللي هو داخله إيه ... ...

تخيل واحد داخل مكان ما يعرفوش .. هل نعذره لما يكون إنسان متعلم ومثقف وفي علامة واضحة وضوع الشمس مثلاً بتقول " خلي بالك ده حمام سيدات " وبرضوا ولا هامه ونلاقيه داخل عادي وما عندوش أي مشكلة في الحياة وانا ومن بعدي الطوفان ... حمام سيدات حمام التلات ماليش دعوة يا عم دي امور ثانوية تخص الأخرين ولا تخصني أنا ؟

إذا ً هناك بعض السينس اللي لا محتاج إجادة عملية البحث عالإنترنت .. ولا التعامل مع المنتديات .... ولا أي خبرة .. لكنها مسألة ذوق ومراعاة شعور الأخرين ....

إنت لما بتروح تقضي مصلحة ... وحاجه حيوية جداً .. هل عندك عذر إن إنت لا تلتزم بالنظام والطابور والإجراءات التنظيمية وتتخطى كل هذا عشان تقضي مصلحتك وليذهب الأخرون إلى الجحيم ؟.

على فكره ... بأشوفها هنا من بعض الجُهال ... نكون في مستشفى وكله ملتزم بدوره وييجي إنسان جاهل وتشوفه بعينك واحد جاي لا همه دور ولا نظام ويروح فاتح العيادة بتاعت الدكتور .. وما يهموش بقى في مريضة أو مريضة جوه بيتم الكشف السريري عليه ولا حاجه .. ولما الأمن يندهوا له الأمن يقول بمنتهى السفالة " أنا جاي هنا بفلوسي " ... تخيل ده بيحصل ؟

يا راجل يا طيب .. اقسم بالله تصلني رسائل دائمه من زملاء أفاضل يحتاجون أستشارات .. وأجيب على قدر معرفتي وخبرتي المتواضعة ويرد الزميل الفاضل بالشكر - خلي بالك من دي .. يعني الرسالة وصلت له والحمد لله المفروض إنه ارتاح - ... ومافيش نص ساعة ولا ساعة وألاقيه فاتح موضوع بيسأل نفس السؤال كوبي وبيست ..

ماشي يا عم حقك قد أكون لم اجيب الإجابة الكافية ...

لكن إيه لزمة كلام الفسحة وحدف الدبش على كافة الصنف المصري .... من عينة .... آه بقى لي نص ساعة يا نور فاتح الموضوع وماحدش رد ... هما كده المصريين ما بيساعدوش حد ( وكأنه هو من يوغوسلافيا السابقة قبل أن تُقسم إلى كرواتيا وصربيا والجبل الأسود والبوسنة والهرسك ) وإحنا كده وتربيتنا كده ... وهاتك يا ولوله حريم وكشف راس على عموم صنف المصريين القساة الجاحدين ... وما عندوش وازع ولا تأنيب ضمير أو يتقي الله ويقول أو يشير إن آه والله في واحد واحد مصري لم تُنزع عنه الجنسية رد عليه بعد دقائق من إرسالة الرسالة فشكراً له مهما كان ...................... هل دي تحتاج مهارات البحث على الإنترنت وإجادة لغة الجافا والإتش تي إم إل ؟

أما أنها طباع أنانية وجهل عند الكثيرين ؟

الأستاذ جمال بودي

: الصوره العامه للمنتدي مزريه كشكل وكصوره والمنتدي بشكله الحالي غير جذاب بالمره يا عم بص علي المنتديات

الثانيه وشوف الشكل والالوان والايقونات اسمحلي معلهش انتم بتستعملوا شكل منتدي من العصر الحجري

ما علاقة هذا بما نتحدث عنه يا سيدي الفاضل .... نحن نتحدث هنا عن ثقافة مساعدة النفس .. وليس الغير .. يعني الإنسان يساعد نفسه ؟!!!!!!!!!

يا عم ده أنا بأشوف الاجانب اللي بييجوا بلدنا او حتى هنا والله ... ماسك خريطة في إيده وبيذهب إلى أماكن انا نفسي ما أعرفهاش .. وبيتشغل على الخرائط والادلة زي العفريت ...

يبقى هل تعتقد إن شكلنا الحجري اللي من عصور ما قبل الحداثة بيؤثر على نفسية السادة زملاء وبيخليهم متلخبطين ومش عارفين هما بيعملوا إيه ؟ ...

[وليد صفوت]

السلام عليكم،..

الصوره العامه للمنتدي مزريه كشكل وكصوره والمنتدي بشكله الحالي غير جذاب بالمره يا عم بص علي المنتديات

الثانيه وشوف الشكل والالوان والايقونات اسمحلي معلهش انتم بتستعملوا شكل منتدي من العصر الحجري

معلش اسمحلى يا س س انا لم الاحظ هذة الجملة هل هى وردت فى هذا الموضوع؟

عموماً أقول لقائل هذة العبارة أنه:

1- العبرة ليست بشكل المنتدى انما بالخدمات و حجم الافادة التى يستفاد بها اعضاءه.. و ياما فى منتديات اشكال و الوان و هى فى الواقع خطر على عقلية العضو لتناولها مواضيع سافلة او تافهة او مجالس نميمة او شتم و سب فى شخصيات عامة و غير عامة.

2- المنتدى لا يستخدم (ألوان الجانجا و الفاقع و المزركش و الملون) لأنه يثقل التحميل و يبطئ عملية البحث و لا يجذب الاعضاء بقدر ما يُهيأ لك إلا إذا كان الاعضاء هم من فئة البنات اقل من 20 سنة!

3- المنتدى شكله الحالى شيك و عملية البحث تتم بسرعة و إيقوناته باللون الازرق السماوى مع الابيض و هو أهدى الالوان على الاطلاق للعين و فى رأيى هو من اشيك المنتديات على الاطلاق.

4- تقنيات المنتدى لا تقاس بشكله، و إلا لوجدت (الشو الروسى) على الصفحة الرئيسية :blink: و جدير بالذكر ان التقنيات التى يستخدمها الاعضاء لا تتعدى 30% تقريبا من الامكانيات المتاحة لمنتدى محاورات المصريين. هناك خواص كثيرة غير مستخدمة يتمتع بها المنتدى... و خاصية البحث الدقيق ليس أخرها.

5- أأمل أن تعقد مقارنة بين محاورات المصريين و المنتديات الاخرى على اساس موضوعى و ليس شكلى فقط..

تحياتى ..

[se_ Elsyed]

استاذ سين سين

اولا : انا بحبك من غير ما اعرفك وان كان ليه تحفظ علي بعض ارائك طبعا في ابواب اخري مش هنا

وقد كان هذا استهلال لابد منه علي راي الاستاذ عادل

ثانيا : انا والله لا ادخل محاورات المصريين الا عشان باب المغتربين

ثالثا: من وجهة نظري افيد باب موجود في هذا المنتدي هو باب المغتربين وممكن تعمل استفتاء وتشوف النتيجة .

رابعا : الصوره العامه للمنتدي مزريه كشكل وكصوره والمنتدي بشكله الحالي غير جذاب بالمره يا عم بص علي المنتديات

الثانيه وشوف الشكل والالوان والايقونات اسمحلي معلهش انتم بتستعملوا شكل منتدي من العصر الحجري

ياه الساعه 7.10 انا اتأخرت اوي

يتبع (بعد ما اودي الاولاد المدرسة )

أهي يا وليد المداخلة ... بتاعت الأستاذ جمال اللي نحترم وده نظره

[وليد صفوت]

السلام عليكم،..

عذراً يا ابيه س س لم الاحظ هذة المداخلة من قبل... عموماً يبدو أن وجهة نظر العضو تنم عن حبه للإنطلاق، و هذا جميل و لكن يجب على المنتدى ان يحافظ على سمته الرزينة من خلال الوانه الهادئة و ايقوناته التقليدية حتى يعبر حقاً عن محتواه الرائع.

و عموماً جزاك الله خيرا الجزاء يا س س فانت لك انشطة رائعة فى باب المغتربين من حيث الاشراف و الرد على الاسئلة فلا تبخل بما تعلم عليهم و فى هذا ثواب عظيم... و اتمنى أن تتحمل تعنت البعض من حيث الزج باسئلة مكررة سواء فى العام او على الخاص و ان تحتسب هذا عند الله، فالمسلم هو من كان فى عون اخيه، و السير مع اخيك المسلم فى حاجة خير من الاعتكاف فى المسجد النبوى شهراً و الله و رسوله أعلم...

تحياتى.

تم تعديل 26 أبريل 2009 بواسطة وليد صفوت