أسئلة للمستشار .. فى نادى للأطفال ..

[achnaton]

لى ثلاثة أيام .. مش عارف أنام .. بعد اللى شفته فى التليفزيون الألمانى .. عن زيارة للمستشار الألمانى لأحد نوادى الأطفال .. أسمه " نادى الليجو " وكل ما افكر اكتب عن اللى شفته .. أو أحكى عن اللى سمعته الاحظ أنى قاموس اللغة العربية مقفول قدامى .. وحبص الاقى واحد يقوللى عيد لنا الكلام بالعربى تانى ..؟؟!! وفضلت السكوت الى كان ليلة أمبارح .. وتابعت برنامج " المحاور اثناء تصويره عند الجيران فى هولاندا .. فالحت على فكرة نقل أسئلة الأطفال لرئيس دولتهم المستشار الألمانى .. رغم أن الأسئلة كانت بالألمانى اللغة التى يجيدها الأطفال فى كل ربوع المانيا الأتحادية .. وللأسف ما يعرفوش اللغة العربية .. واللى نفسه يسمع الحوار باللغة العربية ما عليه الا أن يكتب رسالة لأخوانا بتوع إستراحة وزارة الإعلام المصرية فى برلين .. وانا أكتفى بثلاثة أسئلة حتى لا اطيل .. وجعوا لى دماغى .. وسيطروا على احلامى ..

خلع المستشار جاكتته .. – كانت الدنيا حر – وظهر على الشاشه وحده بين أطفال " نادى اللوجو " يداعبهم ويداعبونه .. و كان أول سؤال من احد الأطفال " عامل إيبه فى الحر ده .. ؟؟ " .. وده سؤال عادى خاصه عندما لا يكون إعداد سابق للأسئلة أو شلة منافقين يلقنوه ... أما السؤال التانى فكان سؤال عجيب والرد عليه أعجب ..!! سأله احد ألأطفال على غرة .. " أنت بتقبض كام فى الشهر .. وبتعمل بالمرتب إيه ؟؟ " وبكل بساطة وبدون مستشارين ولا منافقين.. يرد المستشار – طبعا بالألمانى ومش بالعربى - مش عارف انا باقبض كام .. اللى يعرف الحكاية دى زوجتى .. ولو انى اعتقد أن مرتبى حوالى 20 الف يورو .. ولا أعرف عنهم شيئا .. اللى يعرف الكلام زى ما قلت هو زوجتى .. "

اما السؤال الثالث.. فسأله أحد الأطفال وهم محيطين بالمستشار وحده .. " أنت جاى النادى لوحدك .. هو أنت مالكش حرس ..؟؟

ورد عليه وكأنه يحكى حدوته النوم للأطفال يعنى ببساطة والفاظ سهلة .. لأ .. المسئول منا لا يمكن يتحرك الا ومعه حراسة .. وأحسن الحراس اللى الجمهور ما يشوفهمش .. وانا معايا احسن الحراسات ..

إيه رأيكم .. ؟؟ انا لن أعلق فأطيل ..

اخناتون المنيا

[Excellence]

واضح إن العيال دي متخلفة

إلا ما في واحد طلع بقصيدة ترحيب و هوة بيعيّط من التأثر

أو ماي فاذر الحنيّن شرودر

أو حتى باحبك أكتر من نفسي و هاموت و أخد بوسة من حضرتك

[crossfield]

عيال متخلفة صحيح يا اكسلانس

بقى ده اسمه كلام؟

دى عيال أهلها معرفتش تربيها صحيح

أمال فين أناشيد نبوس الجدم اللى بنعلمها لأولادنا من الصغر؟ فين الجبن و المطاطية و الاحسا س بقلة القيمة قدام أى حد من المسئولين؟ فين مهرجانات الطفولة و التسول و أغانى الست صفاء أبو السعود آه منك با صابونة يا شقية يا مجنونة ؟؟؟؟؟؟؟؟؟؟؟؟

ناس معندهاش دمممممممممممممممممم.

وش مطرشأ .

[سقراط المصري]

نشيد الأطفال:

شرودر ياحبيبنا .......يامالي علينا الدنيا

احنا اختارناك.......وبدمنا روحنا فداك

انت نورنا ...................انت املنا

انت بابا وماما.............وريري كمان

اخترناك اخترناك......وبدمنا روحنا فداك

اهو كده الشغل ..........مقوله لإستيفان رستي

او

اتعلموها بقى ........... مقوله لأحمد عدويه

سقراط

[عادل أبوزيد]

خلع المستشار جاكتته .. – كانت الدنيا حر – وظهر على الشاشه وحده بين أطفال " نادى اللوجو " يداعبهم ويداعبونه .. و كان أول سؤال من احد الأطفال " عامل إيبه فى الحر ده .. ؟؟ " .. وده سؤال عادى خاصه عندما لا يكون إعداد سابق للأسئلة أو شلة منافقين يلقنوه ... أما السؤال التانى فكان سؤال عجيب والرد عليه أعجب ..!! سأله احد ألأطفال على غرة .. " أنت بتقبض كام فى الشهر .. وبتعمل بالمرتب إيه ؟؟ " وبكل بساطة وبدون مستشارين ولا منافقين.. يرد المستشار – طبعا بالألمانى ومش بالعربى - مش عارف انا باقبض كام .. اللى يعرف الحكاية دى زوجتى .. ولو انى اعتقد أن مرتبى حوالى 20 الف يورو .. ولا أعرف عنهم شيئا .. اللى يعرف الكلام زى ما قلت هو زوجتى .. "

الفاضل إخناتون

منذ سنوات كان هناك جريدة أسبوعية فى مصر إسمها الدستور و كان يرأس تحريرها عادل حمودة ....

و فى أعقاب تعديل وزارى نشرت تحقيقا - على ما أذكر على حلقتين - و كان عنوان التحقيق تكلفة التعديل الوزارى و أذكر أن التحقيق تكلم عن المزايا العينية و المادية للسادة الوزراء الجدد و ذكر من ضمنها قطعتين أرض بالساحل الشمالى يقوم الوزير ببيع أحداهن ليبنى الأخرى و أشياء أخرى كثيرة منها شيك من رئاسة الجمهورية بقيمة عشرون ألف جنيه مصرى بإسم الوزير شخصيا و فهمت أنه من أجل ميزانية بيته !!!!!

لا أذكر باقى المحتويات و لكنى أذكر أنى قلت وقتها لزوجتى هذه المجلة ستغلق و قد كان بعدها بمدة قصيرة و لا أذكر السبب الذى من أجله أغلقت

الفاضل إخناتون

هنا فى مصرنا المحروسة لا يمكنك و أكرر لا يمكنك أن تعرف مرتب أى شخص و أقصد بالمرتب كمية النقود التى تدخل جيبه أو حسابه شهريا نعم يمكن معرفة راتبه الأساسى !!!!!

و حتى لا نخرج على الموضوع - و أظن أن تركيزى على هذه النقطة يعتبر خروجا عن موضوعك الأساسى - أعتقد لو أجريت دراسة حقيقية على مرتبات و مزايا الوزراء لوصلنا إلى أرقام كبيرة تستحق الترشيد فعلا .....