أطلب نصيحة من الاخوة المقمين فى السعودية

[صعيدي]

الأخوة الكرام

السلام عليكم ورحمة الله وبركاته

أنا أعمل حاليا فى احدى الجامعات فى اليابان وحصلت على فرصة عمل فى احدى الجامعات الاقليمية فى السعودية وبصراحة أنا قلقان فالحياة هنا فى اليابان أكثر من رائعة ولكن مشكلتي فى أن أولادي بيتكلموا ياباني بطلاقة والعربي بتهتهه وكمان عندي بنت بدأت تكبر و وطبعا مشكلة المدارس والامتحان السنوي فى السفارة وكلها مشاكل بتصدع أم العيال وهي من أنصار العودة او الذهاب الى أي بلد عربي

المهم حتى لا أطيل عليكم عاوز اقولكم ايه النقاط اللى قلقاني فى السفر للسعودية وطبعا اعذروني أنا بقارن كل شيئ باليابان:-

• أسمع عن ان اسلوب تعامل السعوديين مع المصريين يشوبه التعالي (طبعا هنا فى اليابان تقدر تحط ايديك فى عين التخين طالما انك على حق, واذا احتجت خدمة من قسم الشرطة تعامل وكأنك داخل شركة سياحة.
  
• أسلوب تعامل الطلبة السعوديين مع أساتذهم فى الجامعة
  
• نظرا لقلة عدد المصريين نسبيا فى اليابان فان اسلوب تعامل السفارة المصرية يتسم الى درجة كبيرة بالرقي ولكن أسمع ان الامر يختلف فى السعودية.
  
• أخاف ان أهرب من الانحلال الخلقى الى التزمت والتطرف.
  
• طبعا انا لسه معرفش حاجة عن مدي توفر الامكانيات البحثية فى الجامعات السعودية
  

أما الباقى فهو استفسارات

1. ما هو متوسط الراتب للاستاذ المساعد فى كليات الهندسة فى السعودية
   
2. مدي سهولة الحصول على رخصة قيادة سعودية علما بأني حاصل على رخصة مصرية وأخري يابانية
   
3. هل من الضروري توافر باركنح للسيارة قبل شرائها
   
4. السؤال المهم: بالنسبة للاولاد هل من الضرورى الامتحان كل سنة تبع السفارة المصرية أم امتحان المدارس السعودية يكفي (بما فيها المدارس الدوليةinternational school)
   

مع خالص تحياتي

[se_ Elsyed]

إيه يا عم .. إنت روحت وقولت عدوا لي ؟

على العموم القرار يرجع لك يا دكتور في موضوع الإستقرار وخلافة ..

لكن إعلم تماماً إن كل بلد فيها وفيها .. وخصوصاً بلادنا العربية ...

وكلمة حق ... إذا كانت معاملة السعوديين للمصريين وحشة .. ما كنتش هاتلاقي أكثر من مليون مصري يعملون هنا ...

لكن لو الظروف إقتضت إنك تتعامل مع واحد مش مثقف أو عنده عقد نفسية .. فبالتأكيد سيكون إستثناء لا يجب تعميمه على الجميع ...

ولا أعتقد إن طالب علم في كلية هندسة سواء سعودي أو غيره رايح الجامعة يتعلم هايتنطط على دكتورة او مُدرسة ... أومال هايسيب إيه لبتوع إبتدائي ؟

يشهد الله إن أسلوب تعامل السفارة المصرية مع المواطنين أصبح مختلفاً تماماً في السنوات الأخيرة .. من ناحية التعامل اليومي .. لكن الوضع يختلف لو مصري عنده مشكلة كبيرة مثلاً ما بيقدروش يساعدوا فيها .. وغالباً إنت ممكن تقعد 10 سنين هنا وما تزورش السفارة إلا لما تحتاج لورقة أو مستند معين .. إلخ

- بخصوص التزمت والتطرف ... غير ملاحظ بالدرجة اللي إنت متخيلها .. وإذا كان عدم إختلاط النساء مع الرجال بشكل ملاحظ في الأماكن العامة تطرف .. يبقى مرحباً به .. غير ذلك لو كنت تعتقد إن غلق المحلات التجارية اللي في الشارع ساعة الصلاة فقط ولمدة نصف ساعة عند كل صلاة .. يبقى اهلاً وسهلاً ... كمان مافيش مدارس أو جامعات مختلطة هنا

- لو معاك رخصة مصرية بتبقى سهل جداً تبدلها برخصة سعودية بعد إختبار السير بالسيارة وجنبك عسكري لمدة 50 أو 100 متر وكل سنة وإنت طيب

- توافر باركنج مين يا عم ... قول يا باسط .. البلد واسعة وإركن مطرح ما تحب .. وبالتأكيد هاتلاقي باركنج في السكن وفي الجامعة كمان ..

- المدارس هنا راقية جداً جداً ... أقصد الإنترناشونال ... على فكرة مره شوفت مدرسة ياباني هنا تابعة للسفارة اليابانية .. بس إنت لو مصري يبقى ولادك هايدرسوا ياباني ليه ؟ ... لكن هناك مدارس إنترناشونال بتدرس مناهج ممتازة جداً .. هي غالية حبتين تلاته لكن لازم تعمل حسابد .. يعني لو عايز مدرسة صح الصح .. يبقى مش هاتقل عن 20 ألف ريال للطفل في السنة الواحدة بتزيد مع تقدمة في سنوات الدراسة .. أما إمتحان السفارة فبيكون للناس اللي بتدرس المنهج المصري وتذاكر في البيت طول السنة وتروح السفارة تمتحن ...

وبعدين هانروح بعيد ليه .. ما صديقي الدكتور أحمد جه من اليابان من حوالي سنتين وشغال في الجامعة هنا وهو بقى يكلمك عن البحث العلمي والحاجات دي .. إينت فين يا دكتور تعالى ساعد الراجل الصعيدي الياباني ده ؟

[صعيدي]

السلام عليكم يا س س

كويس ان لسه فيه حد فى المنتدى فاكرني

بالمناسبة فين صورة الأسد و لا هو خوف الولد الامور ده وجري!!!!!

أولا أنا شاكر جدا على ردك ونصائحك وقلقي كان مصدره اللى شوفته فى موسم الحج سنة 2004 بالاضافة الى ما تنشره بعض الصحف

بالنسبة للاختلاط أنا هربان منه فى اليابان ومتنساش اني صعيدي ولكن أخشي من التضديق على طفلتي (10 سنوات ) وخاصة فى موضوع زي النقاب

بالمناسبة الدكتور أحمد صديقك (هل هو د. أحمد حسن فى جامعة الملك عبد العزيز؟؟؟)

[doha]

لاه مهو انت عشان تاخذ اولادك من الدار للنار مره وحده وتنزل بيهم مصر ده يبقى انتحار .. انت محتاج مرحلة انتقاليه مابين اليابان ومصر يبقى احسن حاجه تعملها تروح السعوديه .

بالنسبة للتزمت والتطرف والنقاب ..

لبس النقاب او تغطية الوجه هنا اجباري لكن في ناس مش بتغطي عادي خاصه في الامكان الراقية خاصه اكتر لو انت في مدن معينة زي جده او الدمام دول عادي جدا تمشي الست من غير تغطية وجه وفي رواية من غير حجاب اساسا .. انا في الرياض ولسه جايه من السوق النهرده وكان في ستات ماشيين بالعباية السوده وشعرهم مكشوف .. عادييي ... بس طبعا لا ننكر هم قلة مندسة ..

عن نفسي بغطي وشي هنا ومش حاسه باي مشكلة بالعكس ..

بالنسبة لتعامل السعوديين مع المصريين فده على حسب السعودي نفسه من اي بيئة والمصري برضه من اي بيئة .. يعني السعودي المثقف مستحيل غير يشيلك فوق راسه .. هم عارفين قيمتنا كويس اوي .. اما السعودي الي يعني نص نص .. بيعاملك للاسف معامله نص نص .. بس على كل حال انت كدكتور في الجامعة معتقدش هتحتاج تتعامل مع النص نص دول الا فيما ندر وهنا هيفيدك الشق التاني من المعادله وهو ان المصري المثقف خاصه لو شخصية قويه بياخذ وضعه في اي مكان سواء هنا او في اي حته تانيه .. باختصار مظنش هتلاقي مشاكل هنا بوضعك كأستاذ جامعي ..

على كل حال لو فرصة العمل جايه لك براتب كويس ومميزات تانيه زي بدل السكن والتعليم وماشابه يبقى هتسكن في منطقة راقية وهتدخل ابناءك مدارس انترناشونال وهتعيش في مجتمع انت تقدر تصنعه مفيهوش اي مشاكل باذن الله .. التعب هنا بيكون للي رواتبهم ضعيفه او مستواهم البيئي اصلا تعبان فبيكون هنا امتداد للوضع الي اعتادوا عليه ..

طبعا مش هقولك ان السعوديه زي اليابان لكن بصراحه هي متطورة جدا مقارنة ببلد تانيه بلاش الواحد يجيب سيرتها عشان الضرب في الميت حرام .

بس اكيد الرأي لوحده مش كفايه والاستخاره هي الاساس في موضوع مصيري زي ده ..

ربنا يوفقك وتختار القرار الصح ..

[أبو أماني]

اللى اعرفه ان الراتب الأساسي للاستاذ المساعد ((السعودي)) في حدود 20000 ريال في الشهر

[صعيدي]

أولا أنا أعتذر للجميع لان موضوعي كان سبب خلافات بين البعض

وانا شخصيا بحب الكبسة وأكلتها من سيع سنين فى منزل أخ سعودي هنا فى اليابان وأعتقد انها زي الفول عندنا, جزء من الثقافة لا يمكن الاستغناء عنه مها قيل عن العيوب.

شكرا للاخت ضحى على اهتمامك, ولا أعتقد ان النقاب سيسبب مشكلة لزوجتى ولكن أخشي من اجبار ابنتي على ارتدائه فى هذا السن.

والعقد فعلا يشتمل على تأمين صحي و سكن ومدارس انترناشونال وكنت اتسأل, هل المناهج التي تدرس فى تلك المدارس موازية للمناهج المصرية ولا تحتاج الى امتحان سنوي فى السفارة أو الى معادلة فى مصر.؟؟؟؟؟؟

الاخ أبو أماني

شكرا لاهتمامك وياريت معلومة عن راتب الاستاذ الاجنبي

وعلى الرغم ان هنا فى اليابان و أعتقد فى معظم دول العالم المتحضر , يكون التقييم على اساس الخبرة والشهادات وليس على اساس الجنسية ولكني أيضا احترم الدول التي تقدر مواطنيها , على الاقل احسن من عندنا حيث ان نتعامل مع اى اجنبي على انه خبير حتى وان كان لسه متخرج امبارح.

بالنسبة لموضوع امكانيات البحث العلمي فى الجامعات السعودية أعتقد ان الوحيد اللى ممكن يفيدني هو شخص يعمل فى نفس التخصص فى السعودية

تحياتي للجميع

[أسد]

تم حذف بعض المداخلات التي خرجت عن سياق الموضوع

رجاء من الأخوة الأفاضل مراعاة عدم الخروج عن أصل الموضوع .. وعدم الدخول في مناوشات فردية ..

شكراً لتفهمكم

أسد

فريق الإشراف

[صعيدي]

السلام عليكم

أولا شكرا على الردود ولكن الجزء التاني من المشكلة صعب شوية وملوش علاقة بالخبرة فى العمل فى السعودية او غيرها ومتهيألي محتاج طبيب نفسي

فى البداية كما ذكرت أنا أعمل فى احدى الجامعات اليابانية ولكن فى مشروع كبير(اعادة تأهيل المحطات النووية) وأنا بصراحة دايما أميل للعمل الهندسي التطبيقي (يعنى انا مهندس دكتور مش دكتور مهندس), الراتب فى حدود 4500 دولار, الحياة فى اليابان كما ذكرت من قبل أكثر من رائعة من جمال الطبيعة وسهولة الحياة وكمان الخبرة المكتسبة فى عمل انا أحبه.

طيب ايه المشكلة

أولا المشروع اللى انا بعمل فيه هينتهى 3/2010 طبعا وارد اني ابحث عن مشروع جديد واستمر واحتمالية الاقى حاجة تانية فى حدود 75%

الاولاد, طبعا الاولاد مستمتعيين فى اليابان لانها جنة للاطفال ولكن اللغة بدات تعملي مشكلة ومتابعة الدراسة للمناهج المصرية بالعربي صعب جدا.

أحد أبنائي من ذوي الاحتياجات الخاصة وبالرغم ان الرعاية هنا أكثرمن رائعة الا ان جميع المتخصصين أجمعوا انه لابد من توفير بيئة ذات لغة واحدة (طبعا العربي) لزيادة المهارات اللغوية

أفضل ان بنتي الكبيرة تمر فى فترة المراهقة فى بيئة اسلامية محافظة.

طيب وبعدين

راسلت أحدى الجامعات الجديدة فى السعودية ووفقت فى الحصول على عقد عمل براتب فى حدود 10500 ريال بالاضافة الى بدل سكن وتعليم وموصلات وكل الحاجات المعروفة للعاملين فى هذا المجال.

الجامعة كانوا متعاونين لدرجة كبيرة فأنا قلت لهم اني لابد من الحصول على عقد عمل لزوجتي علشان اجي مرافق زوجة, بعتولي عقد لزوجتي بوظيفة محاضر (هي معاها ماجستير ولكن لا تعمل فى التدريس) براتب 6000 ريال.

سألتهم عن الاجهزة العلمية المتوفرة والامكانيات البحثية قالوا ان الجامعة جديدة وأي جهاز هطلبه هيجيبوه مهما كان, طبعا الجزئية دي شفوي مش فى اى عقود.

لغاية كده مفيش مشكلة

ولكن

بعد ما عملت كل الاجراءات فوجئت ان السنة الاولى هقوم بتدريس علوم اساسية, يعني ايه.................., يعني كيمياء وفزياء ورياضيات, وده لان كلية الهندسة لسه أول سنة تشتغل وبعد كده ممكن أدرس المواد اللي فى تخصصي.

يعني اسيب تخصصي و17 سنة خبرة ( من تاريخ التخرج) وادرس علوم ورياضيات (مع احترامي للجميع بس ده مش تخصصي)

وذي ما ذكرت أنا بحب العمل الهندسي أكثر من العمل الاكاديمي واشتغلت من قبل فى مصر كإستشاري فى كثير من الشركات, وكن الظريف اني لما براسل اي شركة فى الخليج وابعتلهم السي في والخبرات يقولو لي احنا اسفين انت اوفركواليفيد Overqualified

للاسف رأي زوجتي ان دي فرصة فى السعودية قد لا تعوض ولابد من التجربة حتى ولو لفترة محدودة

انا متردد

يعني هشيل دماغي فى الثلاجة سنتين واشتغل بدماغ تانية وادرس فزياء وكيمياء وحساب مثلثات ولا أرجع مصر وأحاول استفيد من الخبرات اللى اكتسبتها

افيدوني بالنصيحة ,جزاكم الله خيرا

[doha]

يفضل تنسى نهائيا فكرة الرجوع لمصر دلوقت طالما موضوع خبرتك المكتسبة ده يهمك لان للاسف لا علاقه للجامعات المصرية بما يجري في جامعات الخارج ويلزمك تتأهل في امور تانيه كتير اوي ملهاش اي علاقه بالعلوم عشان تقدر توصل في هيئات التدريس فيها وتبقى شخص لك مكانتك المعترف بيها .

بالنسبة لعرض السعوديه هو كويس لكن اعتقد والله اعلم شخص بامكانياتك يستحق عرض افضل بكتير ..

نصيحتي لك انك تستخير طبعا بخصوص عرض السعوديه انت وزوجتك وبرضه انك تراسل جامعات تانية في السعوديه او دول الخليج التانيه .. ركز على الجامعات الكبيرة والمشهورة والناس دي لما بتقدر بتقدر صح .. شوف دول تانيه زي قطر مثلا انا سامعه انهم بيهتموا اوي بحكايه التعليم وبيستقطبوا احسن ناس ( بصراحه مشفتش حد معين بس بنسمع كده في الاخبار ان عندهم مشروع للنهضه بالتعليم ) جرب في الكويت والامارات شوف الجامعات الكبيرة اوي فيها اسماءها ايه وراسلهم محدش عارف يمكن يكون لك نصيب معاهم ..

الجامعات الناشئة مهما كانت امكانياتها مش هتكون زي الجامعات الكبيرة وبرضه خذها قاعده الكلام الشفوي ( البؤيئي ) لا يعترف بيه في اي مكان ولاعبره الا بما نص عليه في العقد الي بينك وبينهم فمتخليهوش في الصورة لما تيجي تاخذ قرارك ..

ربنا معاك ويهديك لما فيه الخير ..

[لونا]

المهندس الدكتور صعيدي

بعد التحية ,

الراتب اللى حضرتك جاي عليه يعتبر كويس جدا لأى واحد جاى من مصر...لكن لحضرتك لا أعتقد !!

لأنكم اتعودتم في اليابان على مستوى عال فى المعيشة و التعليم و غيره و لذلك مبلغ 10000 قد يكفي لمعيشة على مستوى جيد ,

و لكن لن يبقى منه الكثير للإدخار , و لا تنسى انك سوف تحتاج زي س س ما قال ل 20000 ريال للطفل الواحد فى مدرسة على مستوى يتناسب

مع دراسة اولادك فى اليابان.

و بالنسبة لموضوع فرض النقاب على بنتك فهذا لا يحدث فى مدارس الانترناشيونال فقط فى المدارس الحكومية.

أما الحياة هنا فهى سهلة جدا و لكن لا يوجد شيء اسمه مناظر طبيعية و لا جنة للاطفال و لا حاجة!!

الولاد هنا لا ينزلون لشراء شىء من السوبر ماركت اللي تحت البيت ( صبيان و بنات )

و أنا الحقيقة من رأي ضحى انك تدور على فرصة تانية ليس فقط بمرتب أعلى و لكن أيضا لكى تعمل فى مجالك الذي تحبه

و طبعا حضرتك بتفكر صح ان بنتك تقضي فترة المراهقة في بلد اسلامى دى حاجة مهمة أوي.....ربنا يوفقك

[بندق أفندى]

فى بداية الحوار اعتقدت انه الجامعة فى المنطقة الشرقية .. وفى نهايته تغيرت القناعة الى أنه ربما كانت جامعة الملك عبد الله للعلوم التكنولوجيا فى رابغ (تبعد عن جدة بحوالى 170 كيلو متر ) المشروع ضخم ويصاغ على مستوى عالى من التطور .. دا اذا كانت هى ..

بداية يمكنك الحصول على عمل هنا براتب أفضل كثيرا .. لكن المشكلة فى التخص نفسه والذى يحتاج مراكز بحثية أو دول كما فهمت .. السعودية بصدد تطوير مشروع من هذا القبيل (محطات نووية لأجل انتاج الكهرباء) ووجودك يمكن أن يتيح لك التعرف على الموجود أكثر .. الراتب المعروض كراتب أستاذ جامعى فى تخصص كهذا راتب قليل ويمكن التفاوض حوله .. أو على الأقل يدفعوا تكاليف المدارس للأولاد وتوفير سكن وسيارة والذى منه .. يوكن الراتب خالص بعيدا عن هذه القصص .. المعلومات مزدحمة فى رأسى ولا أعرف كيف أرتبها .. المهم ايه المنطقة وساعتها نناقش مرة أخرى وتحياتى ..

بلنسبة للسعودية كل منطقة تختلف عن الأخرى

[السيد توفيق]

الراتب قليل جدا ممكن تتعاقد مع جامعة البترول والمعادن بالدمام او جامعة الملك عبدالله أو جامعة اهلية لاني اعرف اساتذه مصريين رواتبهم 14 الف + بدل سكن 25 الف + تذاكر سفر سنويا +بدل تأثيث لمروة واحده

أما بشأن رايك بأن هناك تعالي على المصريين من قبل السعوديين فهذا كلام غير صحيح وماعمري شفت هالكلام دا من تاريخ تعاقدي بالسعودية عام 1988 يعني من 22 سنة

تم تعديل 22 أبريل 2009 بواسطة السيد توفيق

[صعيدي]

شكرا جزيلا للأخت ضحى ولجميع الاخوة على التفاعل

أولا أنا سألت الاخوة فى المنتدي عن راتب عضو أستاذ مساعد وفهمت ان الراتب بالشكل ده مناسب لان فيه بدل سكن 25000 سنويا وبدل تأثيث 12000 (مرة واحدة) ومصاريف مدارس 25000 وأجازة 60 يوم مدفوعة بالضافة طبعا لتذاكر السفر, وكما علمت ان النظام ده ئابت فى جميع الجامعات السعودية اللهم بغض الفروقات البسيطة.

والجامعة فى منطقة حائل وأنا بحثت عن المنطقة وللاسف هي مش متقدمة ذي المدن الكبرى مثل الرياض والدمام وجدة وكمان وسائل الترفيه شبه منعدمة وان كانت الاسعار فيها أقل نسبيا من باقي المناطق.

فى النهاية هو ده العرض المتاح حاليا وهما مستعجلين على الرد والسفر لازم يكون قبل شهر 9, والمشكلة حاليا على الافل مش مادية ولكن السؤال هل العرض يستاهل اني اسيب تخصصي (هندسة مواد) وادرس حاجات تانية بعيدة جدا مع العلم ان الكلام ده اول سنة او سنتين الله أعلم.

كنت اتمنى ولا أزال ابحث عن عمل فى الشركات ولكن حاليا البديل اما الاستمرار فى اليابان او العودة الى مصر فايه رأيكم

جامعة الملك عبدالله رائعة ولكنها الان تركز على تكنولوجيا المعلومات والحاسب الالي.

تم تعديل 22 أبريل 2009 بواسطة صعيدي

[Handasah]

اخى العزيز مهندس دكتور

اخى انا كنت مقيم بمنطقة حائل لفترة 4 سنوات واعتقد انا لى علم الى حد ما بطبيعة اهل ومنطقة حائل وذلك لتعاملى معهم يوميا .

اخى العزيز من وجهة نظرى ان حائل لاتناسب مكانتك العلمية او الفكرية وهذة وجهة نظر شخصية لاتعتمد على اى ضغائن او احقاد شخصية لاحد من حائل ولكن بحكم وجودى بالمنطقة لفترة وتعلمت فيها االكثير على سبيل المثال . اولا منطقة حائل منطقة بعيدة نسبيا عن باقى مناطق التنمية المتمركزة فى مدن المملكة الرئيسية مثل مكة والمدينة وجدة والرياض والدمام وهذا البعد اعطى للمنطقة بعد عن التنمية وخصوصية متعصبة فى اوقات كثيرة بين القبائل وبعضها طارة وان كانت غير معلنة وبين الاشخاص والمغتربين طارة اخرى .

ثانيا عدد المتعلمين والحاصلين على شهادات عليا قليل جدا فى المنطقة ومستوى التعليم متوسط وهذا مؤثر تاثير كبير على طبيعة اهل منطقة حائل فمنهم الكثير الذى يعمل بالتجارة او الزراعة ووجود عدد كبيير من المزارع المحيطة بمدينة حائل فطبيعة الاشخاص تميل اليهم طبيعة البدو فى الحياة وهم دائما معترفون بذلك .

ثالثا منطقة حائل مفتقرة نسبيا الى خدمات كثيرة مثل وجود مراكز تسويقة او ترفيهية كبرى وان الموجود منها محدود ومناسب لاهل المنطقة وان كانو غير راضيين عن مستواهم المعيشى فى المدينة ودائما يوجد وجه مقارنه بينها وبين المدن الاخرى ومفتقره نسبيا الى عدم وجود ايضا المدارس الانترناشيونال والمدارس الموجودة غير مناسبة لاطفال درسو طبعا فى مدارس اليابان واعتقد حضرتك فاهمنى .

رابعا جامعة حائل حديثة ومحتاجة الى الكثير والكثير من الكوادر فلذلك اعتقد ايضا الراتب غير مناسب لمكانة حضرتك .

اعتقد انى وضحت الى حد ما طبيعة منطقة حائل وان كان فيها اسعار المعيشة منخفضة نسبيا عن باقى مناطق المملكة ولكن المعروض بها ايضا فهو اقل ومنخفض عن باقى مناطق المملكة .

اخى العزيز رجاء دراسة الوضع جيدا قبل اخذ اى خطوة تؤثر على حياتك وهذة نصيحة اخ لوجة الله تعالى .

[شاب مصري]

أرجو ان حضرتك لا تتسرع فأنت لك مؤهلات ممتازة تتمناها أي جامعة وتتشرف بوجودك في طاقم العمل لديها

ياريت تجيب (من جوجل) قائمة بالجامعات الكبرى في قطر والكويت والامارات وتراسلهم بالبريد الالكتروني وانا متأكد أنهم سوف يسعون بقوة للتعاقد معك بشروط ترضيك

وكذلك من اليابان للسعودية صعبة شوية .. لو لقطر أو الكويت أو الامارات يكون أفضل بكتير .

[صعيدي]

شكرا جزيلا لكل من أفادني بنصحية

جعلها الله فى ميزان حسناته

[أحمد سيف]

دكتورنا العزيز ... أنا بعثتلك رأيي على الخاص ... أتمنى أن يكون وصلك

فيما يلي أسماء بعض الجامعات الجيدة في الإمارات وقطر، إذا كنت مهتما بالعمل في منطقة الخليج:

الجامعة الأمريكية في الشارقة

المعهد البترولي

جامعة الإمارات

معهد مصدر للعلوم والتكنولوجيا

جامعة خليفة للعلوم والتكنولوجيا والبحوث

تكساس A&M - قطر

جامعة قطر

غير كده ما أنصحكش

[شاب مصري]

أرجو ان حضرتك لا تتسرع فأنت لك مؤهلات ممتازة تتمناها أي جامعة وتتشرف بوجودك في طاقم العمل لديها

ياريت تجيب (من جوجل) قائمة بالجامعات الكبرى في قطر والكويت والامارات وتراسلهم بالبريد الالكتروني وانا متأكد أنهم سوف يسعون بقوة للتعاقد معك بشروط ترضيك

وكذلك من اليابان للسعودية صعبة شوية .. لو لقطر أو الكويت أو الامارات يكون أفضل بكتير .

أعتقد بردو مفيش مانع تراسل الجامعات الايرانية والمراكز الايرانية لاني أعتقد أنهم في حاجة ماسة لمثل تخصصك وأعتقد أنهم يقدرون العلماء وسوف يدفعون جيدا

وكذلك الدول العربية التي تريد استخدام الطاقة النووية.

[نبض الابداع]

[color="darkred*/*/*/*/* اقولك على حاجة وخليها في سرك */*/*/*/*/

خليك في اليابان احسن وبلاش اتكلم على بلدي

تم تعديل 24 أبريل 2009 بواسطة نبض الابداع