حد راح طابا قبل كده؟

[فــيــروز]

يا جماعه عندى فرصه جيده للذهاب فى إجازه إلى "طابا" بس زملائى فى الشغل بيقولوا إن مفيش أى حاجه هناك ممكن تتعمل غير الجلوس فى الفندق أو الاسترخاء أمام البحر مش زى "شرم الشيخ" مثلا فيه مدينه كبيره فيها أنشطه عديده ..

الحقيقه أنا متحمّسه جدّا للذهاب بس الكلام ده عامل لى قلق خوفا إن الموضوع يطلع مملّ زياده عن اللزوم .. أينعم الهدوء مطلوب للأجازات بس أمّا يزيد عن حدّه ممكن يضايق .. حد عنده أى أفكار بنّاءه؟

[jamalpody]

ده يعتمد علي الفتره الي حضرتك حتقضيها هناك لو اسبوع ماشي لكن اكتر من كده حتملي

انا كنت هناك سنة 1994 ولم يكن هناك غير الفندق فقط والوضع لا اعتقد انه تغير منذ ذلك الحين لكن بصراحه

الهدوء والجبال والجو هناك خرافه والطبيعة هناك في منتهي الجمال

تم تعديل 22 مارس 2009 بواسطة jamalpody

[التونسى]

يا جماعه عندى فرصه جيده للذهاب فى إجازه إلى "طابا" بس زملائى فى الشغل بيقولوا إن مفيش أى حاجه هناك ممكن تتعمل غير الجلوس فى الفندق أو الاسترخاء أمام البحر مش زى "شرم الشيخ" مثلا فيه مدينه كبيره فيها أنشطه عديده ..

الحقيقه أنا متحمّسه جدّا للذهاب بس الكلام ده عامل لى قلق خوفا إن الموضوع يطلع مملّ زياده عن اللزوم .. أينعم الهدوء مطلوب للأجازات بس أمّا يزيد عن حدّه ممكن يضايق .. حد عنده أى أفكار بنّاءه؟

هى العمليه نسبيه اختى الفاضله .. تختلف من شخص لاخر ..انا لفيت وعشت ببلاد كتيره سواء داخليا او خارجيا عربيا او اوربيا .. وكان ليا نصيب اعيش واعمل فى طابا ما يقترب من العام .. والكلام ده سنة 2000 ومكنش فى طابا تحديدا .. كان فى منطقه بين طابا ونويبع .. وبجد من غير مبالغه ومن وجهة نظرى الخاصه جدا جدا جدا انه احسن مكان عشت فيه واستمتعت بيه .. مقارنة بكل البلدان اللى عشت فيها بره وجوه مصر ..وفعلا لو مكنتش جاتلى فرصة الهجره انا كنت قضيت حياتى هناك بين الطبيعه الخلابه الساحره لطابا .. اكيد دلوقتى طايا اتغيرت للاحسن .. على ايامى مكنش فيه خدمات على مستوى .. يعنى كنا كل اسبوع شركتى بتودينا مرتين لطابا البلد عشان نتكلم فى التليفون .. لان مكنش فيه سنترال عمومى فى المنطقه بتاعتى اللى بينها وبين طابا حوالى عشرين كيلو

وفعلا على ايامى طابا كانت هادئه جدا .. لا صخب .. ولا زحام .. ولا اجانب كتير .. 90 فى الميه من مرتادىها كانوا اسرائليين معظمهم عرب 48 بيجوا طابا بالعربيات بتاعتهم نظرا لرخصها مقارنة بفنادق الاحتلال الاسرائيلى .. لكن دلوقتى ومن سنوات قليله بدات تجتذب السياح من كل مكان فى العالم خاصة اوربا.. دا حتى المدير العام لشركتى وهو هولندى الجنسيه كان فى طابا السنه اللى فاتت وشكر فيها جدا جدا وبعتلى مخصوص عشان يقو للى كده كنت فاكره طالبنى عشان يرفدنى :Exclam:

لو عايزة رايى اتكلى على الله وروحى .. ولو حسيتى بالملل من طابا سهل جدا انك تروحى شرم او نويبع او دهب تغيرى جو هناك وترجعى فى نفس اليوم لان المسافه مش بعيده .. ودى فرصه كمان تتمتعى بالمناظر الطبيعيه ومناظر الجبال واولوانها العجيبه اثناء سفرك ..

[فــيــروز]

ألف شكر لكم على الاستجابه السريعه المشجّعه :)

الحقيقه أنا نفسى جدّا أروح مكان فيه جبال و مارحتش "طابا" خالص قبل كده و المدّه مش هتكون طويله إن شاء الله يا دوب أربع أيام :waving:

[MoHaMMeD EgYpT]

والله انا ما اعرفش حاجة علي طابا لكن كما نصح العضوين الاعزاء استاذ جمال و استاذ التونسي انك تروحي طابا

يالا تروحي و ترجعي بالسلامة بس ما تنسيش تبقي تحكي لنا عن طابا بعد رجوعك :) لاني انا كمان عمري ما شوفتها

[ghallab]

فعلا طابا هاديه جدا و تقريبا مفيهاش غير الفندق و كام محل

[arora]

انا كنت هناك يناير2007 و2008 وكنت فى اجازة انا واسرتى لمدة 4 ايام

والمناظر والجبال كانت اكتر من رائعة والهدوء اللى انا كنت محتاجاه فعلا لا يقارن

وفى سنة من السنتين اللى كنت فيهم هناك

الجو قلب شويه (يناير) فاخدنا ميكروباص لقرية اسمها صلاح الدين

ومنها ركبنا عبارة الى قلعة صلاح الدين فى طابا واتفرجنا على المنظر من القلعة

اكتر من رائع

اتكلى على الله يا فيروز واستجمى واستمتعى بالطبيعة الخلابة

وسيبك شوية من الشوبينج

تم تعديل 22 مارس 2009 بواسطة arora