اشتركت خصيصا لهذا القسم

[fatfouta]

ربنا يديكى الولاد اللى انتوا عاوزينهم يا رب ويملوا عليكى حياتك

حاسة بيكى لان الحياة هنا كئيبة جدااا

بس اصبرى شوية لغايت ماتكملى العلاج هنا ويمكن ربنا يديكى بعد مايخلص

الموضوع عاوز صبر شوية سواء التعود على هنا او اى وضع تانى انا معاكى انها صعبة شويتين البلد دى فى انك تتعودى عليها لكن مش يمكن ربنا بيجمدك شوية عشان تتحملى تبقى ام

وكمان بطلى شوية التفكير فى اهلك لانك طالما اتجوزتى خلاص بعدتى عنهم مش بقولك بعدتى خالص يعنى بس يعنى بقالك حياة مستقلة عنهم

وعشان انتى بتقولى انك لما تجوزتى هو كان بيشتغل هنا وانتى قاعدة فى مصر فأخدتى انك تبقى وسط اهلك وهو يبقى بعيد عنك فخلاص اخدتى على كده بس صدقينى لما يمر الوقت هتحسى انه عادى وتعرفى انك مالكيش غير جوزك وبيتك وان شاء الله قريبا ولادك يا رب

اعرف واحدة صاحبتى جت هنا واتجوزت كمان هنا كانت بتقول ذيك كده وكانت تجيلى وتقعد تعيط وتقولى هى دى بقى السعودية اللى بيحكوا عنها ده انا لما جيت لقيتها مش ذى ماتخيلت خالص.... وكانت مصرة انها تنزل مصر وتسيب جوزها قوم ايه يا ستى بقى ربك رزقها بالحمل والحمد لله وعقبالك برده وتصدقى بعد ماربنا رزقها بابنها بقت مشغوله بيه ونسيت بقى موضوع انها ترجع تانى بلدها ورضيت بالامر الواقع وقعدت مع جوزها

وكووووووووولنا لقينا مشاكل كتييييير اول ماجينا وماتعودناش بسرعة على الغربة حتى اسالى اى ست هتقولك كده ولغايت دلوقتى لسه بنلاقى مشاكل بس هنعمل ايه بنرضى ونقول الحمد لله

فعشان كده حاولى تتعرفى على ناس مثلا زوجات زمايل جوزك فى الشغل او جيرانك واندمجى معاهم وهتلاقى الحياة بتمشى والايام بتجرى

الصبر الصبر ثم الصبر على الغربة لانها صعبة بجد

اتمنالك الخير

تم تعديل 15 مارس 2009 بواسطة fatfouta

[dongol]

ارحل بنفسك من ارضٍ تضام بهـا .........................................ولا تكن من فراق الأهل في حرق

فالعنبر الخام روث فـي مواطنـه ............................................وفي التغرب محمولُ على العنـق

والكحل نوع من الأحجار تنظـره .............................................في أرضه وهو مرمي على الطرق

لما تغرب حـاز الفضـل أجمعـه ................................................فصار يحمل بين الجفـن والحـدق

أختي العزيزه

ايها اصعب ان تتحملي البعد عن الاهل لفتره طالت او قصرت سوف تنتهي وبعدها تبدأ الراحه اللي انتي اكيد عايزاها لاسرتك ولا ترجعي انتي و جوزك لمصر و تبدأ مشكلات الاكل و البيت و المصاريف

انا رايي ان الغربه اهون الف مره من ان الواحد يرجع مصر و يعيش في دوامه البيت و المصاريف

دمتي بخير

[وهيج الجبيل]

مرحبا اختى

والله انا ذيك سجلت اليوم فقط يعن حسيت ان الشباب هنا فيهم خير ويفكرو الواحد بمصر وانا التمس لك العذر عشان عايشة فى الرياض الى حد ما الرياض مثل ما قالو الشباب الرياض جافة شوى بس بشكل عام الغربة كلها كدة

على العموم نتمانى لك ولكل مغترب من مصر وقت سعيد مع اخونة هنا فى المنتدى الرئع

مع اطيب تمنياتى وارق تحياتى

[شروق وغروب]

حقيقى انا سعيده من كلامكم وردودكم عليا ونصائحكم الغاليه

وانا معاكم ان حياه مصر شاقه وعايزه مصاريف

لكن مشكلتى ان حسبتى مختلفه عن جوزى

جوزى هنا فى الرياض عمله حر يعنى لا تبع شركه ولا تبع كفيله حتى

هو بيشتغل لوحده واللى بيدخله بنعيش منه اكل وشرب

المشكله انى بس حاسه ان الحكايه محصله بعضها مش هتفرق كتير

لان احنا اتجوزنا فى البدايه فى شقه ايجار جديد واتعمدنا اننا هنبنى على قطعه ارض يملكها هو واخوة

بانيين عليهم مكان ورشه عمل ليهم هما الاثنين ..(يعنى فى مكان لعمل فى مصر وعمل خاص )حتى لو كان المكان ده لسه على الطوب مش هتفرق هو شغله فى غرف النوم والديكور المنزلى

المهم انه جيه بعد سنتين وكل اللى معاه من فلوس كانت له بره من سنين سابقه 18 الف جنيه

وباع عشان يكمل بناء الشقه مكن كان بيشتغل عليه فى السعوديه فبدأ من غيره من السفر

المهم ان الشقه اتبنت وفضلت واقفه على المحاره لها 3 سنين لا عارف يوضبها ولا نفرشها

ولما سافر بعدها ورجعلى بعد سنه ونص كل اللى معاه 5 الاف جنيه وطبعا طول فتره اقامته اكلنا بيها وشربنا

ورجع سافر تانى واصبحت حياتنا كده .

على فكره جوزى بياخد مقاولات على شغله هنا فى السعوديه مش وحش

لكن تخيلوا لما يتقاول مع واحد على 8000 ريال ونتفاجىء انه كل شهرين بيدينا 300 او 600 ريال

وطبعا ملناش هنا راتب فبناكل بيها غير علاجنا واكيد عارفين ان علاج تأخر الحمل هنا غالى جدا سواء ليا او له

يعنى اوقات مش بينفع نجيب العلاج رغم اننا اوقات بنعجز عن تحليل مطلوب مننا او دواء معين خصوصا ان كلها مكلفه جدا ... انا اسفه طبعا انى طولت عليكم

لكن انا محتاره يعنى مثلا لو دخلنا مبلغ نعمل منه اقامه ليا هنا فى حين اننا اللى بندخله بناكل ونشرب منه

بس وعلى مدار فتره الجواز اللى داخله على السنه السادسه مش قادرين نوضب شقه

والا ناخد المبغ نوضب منه شقتنا وننزل نعيش فى شقتنا ويحاول يعمر مكان عمله ويشقى ويتعب فيه

وعلى الاقل ان هناك مكان عمله ملكنا وشقتنا كمان . وان كان على مصاريف الاكل والشرب اعتقد اننا حتى لو تعبنا شويه هيكون زى تعب السعوديه بس هناك وسط اهالينا لو وقعنا هنلاقى حد يقف معانا

فياريت بعد ماحكيت القصه كامله تقولولى ايه رايكم ؟

تم تعديل 16 مارس 2009 بواسطة شروق وغروب

[doha]

ردي انك كده بتحطي العقده في المنشار .. الوضع هنا مش عاجبك وبتحملي زوجك مسؤوليته كامله تجاهه وبتطلبي منه يرجع مصر عشان الوضع يبقى افضل ..

فكري في زوجك شويه .. هو معاكي في المشكلة نفسها بل انه متورط فيها اكتر منك .. يعني هو كمان اكيد شايف ان وضعه مش كويس وان الالتزامات المطلوبة منه اكتر من امكانياته في الوقت الحالي واضافه لضغطه في شغله وضغطه في الالتزامات الي وراه انتي اضفتي عليه ضغط جديد بالحاحك على السفر .. مينفعش كده صدقيني لان كل انسان له طاقه والخوف لو صبره نفذ وفجأة ..

مش هقولك غير ان الحياه كفاح واحنا اصلا كبني آدمين جايين الدنيا عشان نتعب فيها ده لو بني آدمين عاديين اما لو مصريين بقى فضربي الشقا والتعب في اثنين .. يجوز ربنا خلقنا من سلاله الفراعنة عشان ناكل الزلط والطوب ونحفر فيهم بظوافرنا كمان .. ربنا يعين ..

ظروف زوجك حاليا صعبه مقلناش حاجه لكن مين قال انها هتفضل كده .. بعدين عمله في شغل خاص معناته انه ممكن يتعب شويه على مايحصل فلوسه وممكن متكونش فلوس دائمه لكن في المقابل ممكن ( تفرقع معاه ) وياخذ مقاولات بالاف مؤلفه ويمكن ملايين كمان .. مين عارف .. ربنا كبير والرزق في كل مكان وطالما بيسعى فباذن الله مش هيخيب رجائه ..

اهم حاجه متكونيش سلبية ويكون لك دور في كل الي بيحصل .. مبدئيا دوري على شغل باي طريقة طالما انك فاضيه لو حتى تفتحي بيتك لاستقبال الاطفال في سن الحضانة .. في البدايه ممكن يكون الشغل صعب لكن لو راعيتي ربنا فيه واشتغلتي بضمير واهتميتي بالاطفال دي كويس هتلاقي الي يجيب لك اطفاله وبمبالغ كويسه جدا منها تستفيدي من القعده ومنها تشبعي رغبة الامومه عندك لغايه ربنا مايفرجها ..

ومن هنا على ماتلاقي شغل لازم متقعديش تزني عليه اربعه وعشرين ساعه عاوزه امشي وطول النهار ماده البوز شبر .. على الاقل يكون لك دور ملطف للوضع الي هو عايشه يعني كلمه كويسه ولا طبطبه ولا وش متفائل اكيد هتساعده يستحمل الشقا الي بيشوفه كل يوم .. انا عارفه انك مضغوطه انتي كمان واعصابك مشدوده ويمكن مش بالساهل تمثلي عليه انك سعيده او راضيه لكن اعمليها لوجه الله ومتنسيش ان تبسمك في وجه اخيك صدقة .. تعالي على نفسك وقدري الوضع الي هو فيه وهونيها عليه ولو بالكلمه

واخيرا نصيحه .. اصبري شويه في البدايه عشان على قدر ماهتصبري على قدر ربنا ماهيفتحها عليك بعدين وبكره تفتكري كلمتي دي بس ابقي ادعي لي ..

[شروق وغروب]

جزاكم الله كل خير على الارض

وانا ان شاء الله هستخير ربنا

هو المفروض كان عايز يكلم ناس على انه يعملى اقامه كامله هنا

لان طبعا كان حاطط فى دماغه انى اقعد من غير اقامه بس لقينا فيها غرامه بتوصل ل15000 ريال

فقولنا بلاش خليها احسن باقامه

فهو اقتنع بفكره انه يسعى فى الاقامه ولو كملت وتمت على خير

ان شاء الله هنستمر هنا وشويه هنا وشويه هناك فى مصر

حتى لو حب انه يشوف الاحوال فى مصر ويقعد 9 شهور المده المسموحه له

فقال لو نفعت ومشيت فى مصر وحسينا ان الوضع هيكون مش وحش قال هنقعد ونروح نجدد

الاقامه بس كل فتره وخلاص

لكن لو منفعتش ساعتها هنرجع تانى وكويس اننا مخسرناش فرصه السفر وبنجدد

وان شا ءالله هصلى صلاه الاستخاره فى حكايه انه يمشى فى ورق اقامتى هنا

وهتوكل على ربنا وهسيبها على الله

وطالبه منكم الدعاء لاختكم فياريت متبخلوش عليا بيه