شريحة سمك فى الفرن بصوص البصل والليمون والخل

[بندق أفندى]

اليوم الوصفة بسيطة للغاية..

دى ضمن حفلة تسليم مهام المطبخ .. وسوف أضيف الأكلات التى كانت فيها تباعا حتى تعم الفائدة وحتى لا تكون مستفزة

سمك شرائح (طرنشات) يوصى بنزع الجلد منه .. ينفع ديراط .. كنعد .. ناجل .. هامور حمرا كبير .. حريد (ببغاء) أى سمكة كبيرة مفيش فيها شوك ..

ننقع الشرائح فى خل مع ملح وزيت وفلفل أسود حوالى ساعة ..

ندخله الفرن كما هو .. لمدة حوالى 40 دقيقة (تختلف حسب سمك الشريحة)

الصوص عبارة عن بصل يتحمر فى الزيت .. نصفيه ونضيف قليل من الزبد وعصير ليمون وخل بلسمك .. مع التقليب حتى يتكثف ..

نضعه على شرائح السمك ثم نعيد للفرن لمدة 10 دقائق وهنا وعافية

[se_ Elsyed]

حرررررررررررررررررررررام

شكلها تحفه ومكوناتها بسيطة

مش عارف نفسي أقول لك حاجه بس مكسوف يا شيف ؟

حاسس إن الأكل الفيلية أو الفراخ المخلية من العظم أو اللي بيسموها ستريبس .. حاسس إن مافيهاش بركة ..

يعنل لو كنت باكل 2 ك سمك من اللي فيه شوك والواحد بيعاني لحد ما يفصصه .. وبعدين أشبع

دلوقت مع الفيلية ممكن اضرب لي 4 ك وأقزقزهم من غير مجهود ..

أنا عايز معاناة وتعب في الأكل

عارف يا بندق .. هاقولك سر من أسرار الفلاحين .. بجد مش تهريج ...

الفلاحين عشان بيبقى عندهم عدد الأُسر كبير .. فبالصلاتو عالنبي يقولك هانلاحق عليهم لحمه منين يا عم الحج ... فإيه الحل ؟

يقولك إحنا نطبخ اللحمة وما نخليهاش تستوي قوي .. بحيث اللي بياخد نايبه حتتين تلاتة ... لأ ياخد حته واحده مش مستوية .. ونخليه يتعذب وهو عمال يشد فيها بسنانة لحد ما يزهق ويشبع .. أحسن ما نسويها ويزقلط اللحمة زلط وبعدين يتدور وياكلنا إحنا ..

نسيت اقول لك ..

عندي عزومة لناس مهمين يوم السبت الجاي وزوجتي محتاره تعمل لهم إيه

أنا رأفةً مني .. ممكن أشيل الليلة دي وأعمل الغد أنا سيراً على خُطاك ... وهي تعمل الرز والسلطة والاطباق الجانبية ..

بس أمانة لو إختفيت يوم الحد .. إبقى اديني ميسد كول أحسن أكون إنضربت ...

[بندق أفندى]

هأعلق على كلامك بعدين .. بس خلينا فى المهم دلوقتى .. لو عاوز أى مساعدة أخوك جاهز .. كم ساعة وأكون عدك ..

[se_ Elsyed]

ما نستغناش عن خدمات معاليك يا شيف

عايزك تنفحني وصفة من تذكرة داود لعمل سمك كبير صحيح بس تكون مفتكسه

هاقولك ليه

- النهاردة كنت في كارفور فروحت قسم الاسماك ولقيتهم منزلين شوية سمك " ناجل " برتقاني على احمر على اصفر وحجمه حجم عائلي .... وبصراحة لقيت السمكاية من دول بتندهني وتقولي " خدني في حضنك يا س س ... هات بوسه يا سونسون " ولأنني كنت لابس بدله فخقت تتزفر .. مع انها كانت الحته الزفرة اللي عالحبل .. لكن خفت من الزفارة اكتر ... وبيني وبينك مالهاش عندي صرفه وقلت مش عايز اخد حاجه واحتاس بها

مازال هناك وقت يا شيف ... ارزعني انت الوصفة وانا هانفذ يوم السبت ... ساعة لاصفر هي الساعة 314 بعد الظهر بالليل شويه

[بندق أفندى]

شوف يا عم سى السيد .. أمس كان المنتدى مش شغال وكان عندى صداع .. وطبعا اجازتى الخميس والجمعة من كل الدنيا اتأخرت عليك ..

أولا الفيليه لو حسبتها هتلاقيه بيعمل أكل أكتر من السمك العادى .. بس هو دائما بيكون الفرق في هل هناك أصناف كثيرة أم صنف واحد؟

ثانيا بقى اللحمة فى الريف لم يكن هناك تعمد انها ما تكونش مطهبة جيدا .. الحال كان انه فيه ناس زى العبد الحرف (جزار متخصص فى كبار السن من الذبائح) لأنه سعرها رخيص .. وبالتالى عمرها ما هتستوى حتى لو قعدت 6 سهور على النار بدون مساعدة كيميائية مثل الملح محسن الطعم والذى يجعلها تنضج تماما .. هذا مجرد وجهة نظر بعد أن فكرت فى الموضوع مليا وتذكرت ما كان يقال عن العبد الحرف والذى كان يزف ذبيحة مثل العروس الصغيرة .. ثم يذبح العجوز التى أكل عليها الدهر وشرب ..

أما بقى السمكة الكبيرة كيف تعملها بعد ما عدت العزومة .. تعتمد على نوع السمكة .. يعنى لو سلمون هتكون مختلفة .. أما الباقى فهناك طرق مختلفة منها الطريقة التى وضعتها بالطحينة .. لكن هيختلف انه هتشرح السمكة من الخارج للداخل على بعد حوالى 2 سم حتى تصل للعظام من الجهتين

أو انك تجيب حولى كيلو بصل وتقطعه معبات وتدبله فى الزيت فى صينية تستوعب السمكة وتضيف ماء وهو على النار وتتبله بالملح والفلفل الأسود وكمية كسبرة مطحونة جيدة وتغلى الخليط ثم تضع فيه السمكة مع التقليب على الوجهين (السمكة مشرحة أيضا) ثم تدخلها فرن ساخن مسبقا لمدة جوالى ساعة تقريبا أو أكثر (اعتمادا على حجم السمكة ..

كفاية دول على ما أفتكر حاجة تانية وتحياتى

[se_ Elsyed]

التشريح ده لزمته إيه ؟

يعني عشان التتبيلة توصل للداخل يا شيف ؟

[بندق أفندى]

التشريح ده لزمته إيه ؟

يعني عشان التتبيلة توصل للداخل يا شيف ؟

أكيد عشان السمكة كبيرة .. وعشان كمان تنضج كويس ..

بالمناسبة ممكن تجيب السمكة وتشرحها كما قلت .. وتقطع بصلتين جوانح وتدبلهم ومعهم كم فص ثوم .. وكم عود كرافس .. وحبتين طماطم لو تحب ..

تضيف لهم الماء مع التتبيل وتغلى الماء فى صينية فرن

وتحط كم حبة كابوريا وكم حبة جمبرى ولو فيه استاكوزا يبقى تمام ومعاهم السمكة وتغليها 5 دقائق أيضا مع قلبها وتدخلها فرن حامى بنفس الطريقة السابقة

[وردوفل]

نسيت مع الثم -كمون و2فلفل اخضر -ومع الكرفس 2حزمة بقدونس والطماطم و شرائح طماطم على الوجه و2ليمون شرائح ايضا ---وادعيلى

[بندق أفندى]

نسيت مع الثم -كمون و2فلفل اخضر -ومع الكرفس 2حزمة بقدونس والطماطم و شرائح طماطم على الوجه و2ليمون شرائح ايضا ---وادعيلى

لأ .. مش هأعمل كده .. بس ممكن أدعيلك ههههههههههه

ده أكل غير تقليدى يا ورد وفل .. والا ما كنتش حطيته هنا