عايز أنا أخس أخس

[الجدار]

السلام عليكم أخواني

مشكلتي في الآتي زيادة وزني عن المعدل الطبيعي ب 30 كيلو تقريباً :unsure: ،

أواظب الآن على رياضة الجري يومياً لمدة نصف ساعة والحمد لله أشعر بنشاط

ولكن لم ألاحظ تغيير في الوزن أقوم بتناول وجبتين فقط في اليوم الإفطار والغداء.

فكرت في الآتي : قلت لنفسي لماذا لا أتبع كورس لحبوب إنقاص الوزن :unsure: وبعد الوصول للوزن المناسب أحافظ عليه بالرياضة والإعتدال في الأكل.

السؤال هل حبوب انقاص الوزن خطر في الإستخدام ؟؟ هل هناك أنواع آمنة ؟؟

نرجو ممن جرب هذه الحبوب افادتنا بخبرته ومن الأطباء الرأي العلمي

[الجدار]

ايه يا جماعة ماحدش عنده خلفية عن الموضوع ؟؟ :)

[بنت فاضل]

اختى الجدار .... اسعد الله مساؤك

انا فعلا زهقت جدا من وزني بس عندى يأس رهيب مجنني

قدامي حبوب التخسيس وقدامي الاعشاب وشاى الاعشاب كمان

ومع ذلك انا ضعييييييييييييييييفة قدام الاكل وخصوصا قاعدة البيت

وقاعدة النت - ياريت لو نمشى على نظام انا وانتى ونحط اسس ابقى شاكرة ليكي جدا

تصدقى انى ممكن اكل وانا مليش نفس او مش جعانة لمجرد انى ادوق الاكل بس

ودة بقى يجنن - كمان انا مدمنة لب - بتمنى انزل العب رياضة بس كسولة

او اجيب جهاز مشي كهربائي

ياريت الناس اللى معانا تقولى وتنصحنى بايه اجيب جهاز مشي

ولا اقوم اعمل حلة محشي وكشرى واكبر الليلة دى كلها

منتظرة الرد .... بيس اعتبرينى زميلة ف الكفاح ونعمل سوا رجيم ونشوف الاسبوع دة هننزل قد ايه

معاكي وفاء

[الجدار]

أحم

الأخت بنت فاضل ألف شكر على اهتمامك بالموضوع وردك وحماسك

بس ليا سؤال انتي عرفتي منين اننا أخت !!

ههههههههههههه الأسم الجدار مش الجدارة

انا معاكي ان الموضوع شكله أنثوي خالص بس ايه المانع ان الراجل يهتم بمظهرة ولياقته

اقبلي تحياتي وأعتبريني أخ لكي وخاصة انني بالكويت مثلك تماماً

ويا رب نخس سوا

يا جماعة مافيش صيادله هنا ولا دكاترة ؟؟؟؟؟؟؟؟؟

[emano]

أحم

الأخت بنت فاضل ألف شكر على اهتمامك بالموضوع وردك وحماسك

بس ليا سؤال انتي عرفتي منين اننا أخت !!

ههههههههههههه الأسم الجدار مش الجدارة

انا معاكي ان الموضوع شكله أنثوي خالص بس ايه المانع ان الراجل يهتم بمظهرة ولياقته

اقبلي تحياتي وأعتبريني أخ لكي وخاصة انني بالكويت مثلك تماماً

ويا رب نخس سوا

يا جماعة مافيش صيادله هنا ولا دكاترة ؟؟؟؟؟؟؟؟؟

الاخ الجدار والاخت بنت فاضل ياريت تنضموا معنا فى برنامج التخسيس بتاع الاخت الفاضله ام بلال حتلقوه فى صفحه المطبخ وهو برنامج حلو خالص وهو الاكل كل 3 سا عات ياريت اشفكم هناك مستنياكم

[بنت فاضل]

الجدار ........ أخ يا لخويـــــــــــــــــــــــــــتي

متزعلش مني انا طبعا متخيلتش او مجاش على بالى خالص

ع العموم انا بعتذر واسفة جدا

بس انا معاك ف الخسسان فكر وقرر وحط منهج ويلا نبتدى

اما بخصوص الاستاذة ايمانو مش ايمانو برضة استاذة ولا استاذ (احولونا بقى )

فانا والله معاكم يلا بينا هوبا بس تأكلوني كثير وعاوزة طول ما انا قاعدة بوئي يفضل ياكل

خلاص مستنياكو

وفاء

[doha]

تعالوا لي بقى جيتوا للمكان المناسب ..

بما اني خبرة طويييلة وصحبة قديمة مع الوزن الزايد والرجيم .. وبما اني الف حمد وشكر لله خلصت من وزني الزايد كله وبقيت شيك وسمبتيك وبما اني محرومه نتيجه لذلك من كل مالذ وطاب عشان احافظ على مكاسب الثورة فيسعدني بل ويشققني من السعاده اني اضمكم معايا لحزب لا للطعام الي دخلته من سنتين تلاته ..

الرجيم الي ماشية عليه سهل اوي يعيبه انه بياخذ وقت شويه لكن ميزته حاجات كتير .. اولا هتاكلوا كل الي نفسكم فيه من اكل البيت العادي يعني مش هتضطروا تطبخوا لنفسكم اكل مخصوص .. ثانيا نتائج الرجيم ده زي ريد كده تدوم وتدوم وتدوم .. يعني الميزه ان مش زي الرجيمات التانية نخس عشرين كيلو في شهر ونرجع نزيدهم في اسبوع ..

هو مش رجيم بالمعنى الدارج للرجيم لكن تقدروا تقولوا اسلوب حياه .. وبما اني جربته بنفسي وخلاص بصمت بالعشرين ان هو ده احسن شيء لخفض الوزن فيله مع بعض نبدأ بسم الله ونقول ..

اول حاجه نعود نفسنا نوأد الفتنة في مهدها .. يعني حاجات معينة متعودين عليها وبناكلها بشراهة وملهاش لازمه او مش هتعود على جسمنا بفايده يبقى نمنع دخولها البيت من اساسه عشان منضطرش ناكلها ف لحظة ضعف .. على راس الحاجات دي .. الآيسكريم , الشوكلاته , اللب والسوداني والمكسرات اجمالا, المربى , العسل , العصير الصناعي ويفضل الطبيعي كمان , المشروبات الغازية بانواعها حتى الدايت. . الشيبس والسناك ..

اكل البيت نطبخة بزيت مش بسمن ممنوع دخول السمن للبيت .. عشان اكون امينة معاكم انا بطبخ بالزيت بس بعض الاكلات الي مينفعش تتاكل غير بالسمن خاصه الاكلات التراديشنال بطبخها بزيت بس بحط ملعقة صغيره سمن بلدي للطعم فقط لكن الاساس هو الزيت وبرضه نادرا مابطبخ الاكلات الي بتسمن دي يعني بخليها في المناسبات بس وساعات بطبخها وماكلش منها او اكتفي بتذوقها بس .

لو هنطبخ بشوربة يفضل نبردها الاول ونشيل طبقة الدهن من على الوجه .. الصراحة كنت بعمل كده في بداية الرجيم بس لما وزني نزل مبقيتش بلتزم اوي بالحكايه دي لكن بلتزم اني ماكلش كتير من الحاجه الي قدامي .

لما ناكل متلخبطش الاكل على بعضه وتاكل .. يعني متعملش سندويتش طعمية مثلا .. لاه .. كل العيش قطمة لوحده والطعمية قطمة لوحدها .. برضه متحطش رز على خضار وتاكل اكبر غلط .. كل الخضار بالمعلقة في جنب والرز في جنب .. وهكذا .. خلط الاكل بيفتح النفس لكن اكل كل حاجه لوحدها ( في نفس الوجبة) بيقلل كمية الاكل كتير ..

لما تاكل قطع الخبز قطع صغيره يعني اقسم الرغيف اربعه وكل بالربع مش بالرغيف .. يعني حط لنفسك مقنن ربعين مثلا ولو خلصوا بالعافية ادي نفسك ربع ثالث وكفايه .. عن نفسي باكل ربع بس وطبعا مش هتيجي معاك من اول مرة بس مع التعود هتكتفي باقل قدر .. برضه امنع خبز السندويتشات ( البعض بيسموه فينو او صمون او صامولي او كايزر او عبد الصمد المهم قصدي على العيش الي بينعمل منه السندويتش ) فيه سعرات حرارية اكتر من الخبز المفرود العادي ونفس القيمة الغذائية تقريبا ونفس درجة ملأ البطن يبقى الصح تعتمد على الخبز المفرود بشكل اساسي ويفضل الاسمر مش الابيض فوائده اكتر كما ان الابيض بيفتح النفس فبتاكل منه اكتر ..

السكريات عامة بتفتح النفس للاكل والموالح بتعمل نفس الشيء .. يبقى امنع السكريات تماما من اكلك الا على شكل فاكهة او ملعقة صغيرة على الشاي او القهوة الصبح وخلاص .. لو قدرت تشرب القهوة بربع كوب حليب وبس احسن لك الف مرة من لو حطيت عليها سكر .. ولو اضطريت تحط يبقى كفايه ملعقة صغيره .. في البدايه هتحس بطعمها غير مستستاغ لكن مع الوقت هتتعود عليها ومش هتقدر تشربها غير كده .. برضه بنفس المبدأ هنمنع المخللات والزيتون تماما .. ولو انت مدمن موالح زيي يبقى دخلهم هم كمان قائمة الاشياء المحظور دخولها ..

الاجبان اكبر عدو للرشاقة .. على قدر ماتقدر امنع الجبن الشيدر والرومي والدوبل والمثلثات والكاسات والجبن المطبوخ عموما .. مسموح بالجبن القريش وكل الاجبان الي تسد النفس مقبوله في الرجيم .. في البدايه يمكن متعجبكش لكن بعد كده هتحب طعمها وكله في سبيل الجينز الضيق يهون ..

الفواكه حلوة اوي في الرجيم جهز دائما صنف او اثنين على الاقل عندك في البيت كبديل صحي ومقبول للسكريات .. تعمل حسابك تمنع نهائيا المانجو والعنب والموز والتمر والتين وفي رواية الجوافا .. كده باقي لك البرتقال والتفاح والكمثرى والشمام والبطيخ والكيوي وحبتين تلاته فراوله وحبتين برقوق ممكن .. الخ .. يفضل متزيدش الكمية كل يوم عن ثمرتين بس على مدار اليوم وطبعا لما تختار الفاكهة تاخذ حاجه حجمها وسط مش تروح على اكبر برتقاله وتاكلها كذلك بالنسبة للبطيخ شقة بطيخ بحجم الكف تقريبا دي تعادل ثمرة فاكهة من اي صنف اخر وهكذا ..

لو نفسك راحت اوي لحاجة ممنوعه شوكلاته مثلا او آيسكريم مفيش مشكلة .. ممكن كل اسبوع كده ولا اسبوعين تاكل لك حته على الماشي .. او ممكن تعمل زيي احيانا بجيب علبة آيسكريم نصف لتر حته وحده واقعد اكل فيها لما اقول بس .. لكن ده بيكون مرة كل شهر مثلا وبعتبرها عشائي يعني مباكلش معاها عشا ومبعملش كده غير يوم اكون اصلا فطرت خفيف وتغديت خفيف وبرضه اكون بقالي مده وزني كويس مش في فترة يكون وزني زايد فيها .. ننبه برضه انك كل مالاحظت ان وزنك زاد كيلو ولا اثنين بالكتير شد الحزام عشان ينزلوا ومتبقاش مأساه بعد كده ...

لما تاكل متشربش مع الاكل خاصه المشروبات الغازية .. طبعا احنا قلنا انها ممنوعه بس اكيد محدش هيلتزم اوي بالحكايه دي فان كان ولابد خليها بعد الاكل مش معاه .. يعني لو بتاكل بيتزا مثلا ولا برجر يبقى ممنوع معاها البيبسي خليه بعدها لو ضروري . .

الاضافات الي ملهاش لازمه زي المايونيز او الزيت في السلطه شيلها بلاش منها لو متعود تاكل اكله معينه بمكون بيخليها دسمه زياده عن اللزوم شيله .. مثلا بتاكل جبنة بالبطاطس المحمرة ( كنت ومازلت بموت فيها ) شيل البطاطس المحمرة وكل الجبنة بس احسن خلي نفسك تنسد فمتاكلش كتير ..

حاول تنام بدري وتصحى بدري لاني لاحظت بالتجربة الواحد بينفجع اكتر شيء بليل ..

وانت قاعد على النت حط جنبك زجاجه مياه صغيره كل شويه اشرب منها شويه .. لاحظت ان اكتر اكلي كان على النت .. لب .. سناك .. بيبسي .. منعك الكلام ده كله واستبدلته في البداية بماء بس وبعدين الحمد لله بطلت اكل من اساسه .

الدهون زي السكريات تعود .. حاول تقللها في اكلك على قدر ماتقدر .. يعني لو بتطبخ بملعقتين سمنة خليهم ملعقة زيت .. لو بتحط ملعقتين كبار على الشاي حليب بودرة خليهم ملعقة وحده .. لو بتعمل بابا غنوج بالطحينة اعمله بالزبادي وهكذا .. في البدايه ممكن الطعم يتغير لكن بعد كده هتتعود .. بس على فكره انا عندي مبدأ مهم برضه احيانا بشوف منتجات خاصه بالدايت زي مثلا مربى للحمية .. بصراحة دي انا عمري ماجبتها ولا هجيبها مبدئي هو ان مكانش الواحد ياكل الحاجه صح بلاش منها من اساسه .. بعمل كده مع الحاجات الممكن الاستغناء عنها زي المربى والايسكريم والبسكويت لكن الحاجات الهامه اوي زي الشاي بحليب او النسكافيه بالكريمه الصبح بستبدل باقل حاجه ممكنه ..

خليها عاده عندك تقرأ السعرات الحرارية المكتوبه على الحاجه قبل ماتاكلها .. يعني دائما اقرأ علبه الزبادي دي فيها كام سعر .. باكو البسكويت ده كام .. العصير ده فيه قد ايه سعرات وهكذا .. كل المنتجات المغلفة تقريبا دلوقت عليها سعراتها الحرارية .. اقراها من باب العلم بالشيء ومع الوقت هيصعب عليك تاكل حاجه سعراتها كتير خاصه لما تقارنها بحاجه تانيه .. يعني مثلا لما تلاقي ان كيس الشيبس فيه سعرات كأنك اكلت ربع فرخه هتلاقي نفسك تلقائيا مش عاوز تاكله لانك هتحس قد ايه هو هيطخنك على الفاضي .. برضه اعمل سيرش في النت هتلاقي مواضيع كتير فيها جداول للسعرات الحرارية اقراها كذا مرة مش مهم تحفظها لكن على الاقل تبقى عارف ايه الي بيطخن وايه مبيطخنش هتتفاجيء ان كوب الحليب مثلا فيه بتاع مية وعشرين سعره تقريبا بينما قبضة ايد من اللب فيها مابين 400 الى 500 سعر .. متخيل بنعمل في نفسنا ايه لما بناكله .

الحكمه الي قريتها كتير ودائما ماتثبت صحتها انك لما تحس بالجوع اشرب مية الاول لان احيانا بنكون عطشانين ومش واخدين بالنا اننا كده وبنترجم احساسنا بالعطش على انه جوع .. اشرب بعدين فكر في الاكل ..

حاول تلتزم بثلاث وجبات ومتحذفش وجبه ابدا لان اكل اقل من ثلاث وجبات في اليوم بيطخن بدال مايخسس ..

حاول برضه كل يوم رياضه ولو نصف ساعه ولو حتى مشي وطبعا وانت ماشي مش تقعد تلم في اكل من هنا ولا شرب من هناك .. هي المية بس الي مسموحه ومع الوقت هتتعود تمشي مسافات طويلة بدون ماتحتاج اكل او شرب ..

لما تغرف لنفسك الاكل في الطبق اغرف بالملعقة مش بالمغرفة .. ولما تاكل متملأش الملعقة للآخر كل بطرفها بس يعني يادوب نصف الملعقة .. ولو اكلت بالشوكه يكون افضل وافضل .. امضغ اللقمة كويس وخذ وقتك فيها ده ممكن يقلل كمية اكلك لاكثر من النصف بدون اي مبالغه ..

متجوعش اوي عشان متاكلش كتير يعني حاول دائما تاكل قبل ماتوصل لمرحلة الجوع القاتل .. ودائما وابدا حطها حكمه امامك .. جهز اكلك قبل ماتحتاجه .. لاحظت من زماااان ايام لما كنت بعمل رجيم بيعتمد على اكلات معينة اني برجع البيت ميته من الجوع باكل اي حاجه قدامي سواء بتاعت رجيم او غير رجيم .. اكتشفت اني لو قبل مااخرج جهزت اكل الرجيم برجع اكله عادي ومباكلش غيره وبشبع منه لكن لو رجعت وملقيتش اكل مبنتظرش اني اجهز المطلوب وباكل اول حاجه اشوفها قدامي مهما كانت بتطخن او بتزود الوزن .. فعود نفسك دائما تجهز اكل بكرا من دلوقت ولو على الاقل المكونات يعني عارف بكرا هتاكل دجاج مثلا وسلطه يبقى من دلوقت عندك الدجاج وعندك خضار السلطه وهكذا ..

دائما لا تقطع الخضار من البيت خاصه الي بيتاكل ني .. يعني الخيار الخس الطماطم الجزر .. الخ كل ده خليه دائما عندك في الثلاجه ينفع سناك وقت الجوع

في الوجبة ولو قدامك اصناف كتير حاول تبدأ الاول بالماء بعدين الخضار الاخضر بعدين الخضار المطبوخ بعدين البروتين بعدين النشويات واخيرا الحلويات .. وبيني وبينك لقيت افضل طريقة للرجيم هي طريقة الصنف الواحد في الطعام .. يعني زمان كنت اكل مثلا بامية ولحمه ورز .. دلوقت اكل صحن بامية مع لقمة عيش وخلاص .. ممكن اكل معاه حته لحمه او ماكلش معادش يهمني مركزه على المفيد .. لو هاكل رز احط ملعقتين كده جنب الاكل وخلاص بس بيبقى اكلي تركيز على صنف واحد بس .. برضه لو هاكل مثلا مكرونه بشاميل خلاص ده اكلي مش هاكل غيره وبرضه اكل بهدوء عشان ماكلش كتير ..

لو هتاكل لحوم شيل الجلد والدهن منها خالص ولو هتاكل تونه اغسلها الاول من الزيت وترتيب الافضليه في الاكل المسلوق او المشوي وامنع المقلي نهائيا يعني لا تاكل مقلي ولا تخلي المقلي ياكل معاك . .

ده كان جزء من خلاصه ماتوصلت له من اساسيات تساعدك على تخفيض وزنك بدون ماتحس بحرمان اوي وبدون ماترجع تزيد الي نزلته تاني .. توصلت لها بعد سنين مع الرجيم والوزن الزائد.. رحت لدكتور وقرأت كتير وفي النهايه اعتمدت على ربنا وبدأت رحلة الكفاح الي الحمد والشكر لله تكللت بالنجاح في النهايه ..

في بدايه تطبيقي للنظام ده كنت ملتزمه جدا بالممنوعات لاني عاوزه انزل وزني بسرعه .. كنت ملتزمه اوي بالمشي في الشارع كل يوم بهمه ونشاط . . الحمد لله بعد مانزل وزني للمطلوب معدتش ملتزمه بنفس المقدار لكن برضه محافظه جدا على الاساسيات .. يعني الحاجات الي بتطخن ملهاش لازمه وتتاكل كل فين وفين ولو كلتها يبقى بدال وجبة وبحاول برضه اعمل مجهود ولو في البيت عشان احرق شويه من السعرات الي باكلها وكمان قدر الامكان بحاول امشي يعني لو مشوار بسيط وقريب بحاول اروح وارجع مشي وهكذا ..

بصراحه تعبت من الكتابه وكمان عاوزه انام فهكتفي بهذا القدر و باذن الله لو افتكرت حاجات كمان هرجع اكملها بعدين وعلى الله تكون تجربتي مفيده لكل الي عاوز يخفض وزنه بطريقة صح ..

[الجدار]

والله العظيم مش عارف اقولك ايه

بجد انتي تعبتي قوي في الرد استاذه ضحى

نصايحك غالية قوي وان شاء الله حبتدي اطبقها

بس سؤال تقريباً ده بينزل أد ايه في الشهر ؟؟

مرة تانية ألف شكر على مشاركتك الغالية

[doha]

لو عاوز رجيم ينزل كام في الشهر عندي لك رجيم ينزل مابين خمسة الى ثمانية كيلو وممكن اكتر لو عملت رياضه .. وعامة مقدار نزولك في الرجيم بيعتمد بدرجه كبيرة اضافة لمدى التزامك بيه على ده الرجيم رقم كام في حياتك .. يعني لو انت اول مرة تعمل رجيم هتنزل كتير اوي والحد الاقصى للنزول على اقل تقدير ان لم يكن اكتر .. اما لو كنت من معتادي الرجيم ( دايما متعود ) يبقى هتنزل اقل لان الجسم مع تكرار الرجيمات بيعمل مقاومة فمش بينزل بالدرجه الكافية او المطلوبة ..

لو عاوز احط لك رجيم ينزلك كتير مفش مشكلة واذكر مرة زمان عملت رجيم كيميائي بينزل ثلاثين كيلو في الشهر بس عيبه انك بترجعهم بعد اسبوعين بالظبط .

الي حطيته لك هو اسلوب حياه يعني مش مهم تنزل كام بس المهم انك في خلال سنة بالكتير هتكون منزل وزنك الزائد كله وجسمك رياضي ورشيق .. ومش هتكون حرمت نفسك من حاجه برضه في نفس الوقت ..

على كل حال خذ ياسيدي الرجيم ده الي كان مديهولي الدكتور ايام لما كنت بتابع معاه وده بينزلك زي ماقلت مابين خمسة لثمانية كيلو في الشهر على الاقل هتنزل في اول عشر ايام بتاع اربعه كيلو ..

الفطار علبة زبادي ( من بتاع مصر مش هنا يعني بالكتير 120 جرام ) او بيضة مسلوقة او قطعة جبن قريش أو اربع ملاعق فول ..

يعني هتاخذ اي حاجه من السابق دول حاجه وحده بس زائد

قطعة خبز اسمر بحجم كف اليد .. او رغيف عيش سن لو انت عايش في مصر هتعرفه طبعا .

زائد كوب شاي بدون سكر مضاف له ربع كوب حليب ( يعني اعمل كوب الشاي واملأ ثلاثه ارباعه بعدين الربع الباقي زوده حليب )

ممكن تبدل الشاي بالنسكافيه وممكن تلغي الاثنين بس عن نفسي لاحظت النسكافيه الساده دي بتسد النفس بشكل لا تتخيله .. في الاول ممكن متحبهاش بس بعد كده هتحب طعم الشاي بحليب بدون سكر نهائي .. الربع كوب حليب ده مهم جدا عشان منع الامساك لان الامساك بيكون شائع مع الرجيم عشان مفيش دهون او نشويات كتير ..

الغداء ربع دجاجة او سمكه او قطعتين لحم او علبة تونه بدون زيت

زائد ربع رغيف خبز او اربع ملاعق رز او اربع ملاعق مكرونه

زائد صحن خضار مطبوخ و صحن سلطه او واحد من الاثنين

العشاء نفس الافطار يعني مش لازم تاكل نفس الي اكلته في الافطار وانما نفس المسموح بيه في الافطار ممكن تاكله في العشا

ملاحظات :

في اليوم كله مسموح لك بثمرتين فاكهة .. تاكلهم مع الوجبات او تاكلهم مابين الوجبات زي ماتحب

السكر ممنوع نهائيا ولا ملعقة صغيره

ممنوع نهائي تطبخ الاكل بسمن او زيت او ماجي .. يعني كنت بسلق الخضار مع شويه بصل وفص ثوم وملح وتوابل في ماء قليل

اللحوم مشويه او مسلوقة بس

الفواكه هي الانواع الي مبتطخنش وسبق ووضحتها لك .

كل عشر ايام مسموح لك بيوم فري لازم تاكل فيه كل الي نفسك فيه .. يعني اكل بيطخن ولا بيسمن بالعكس حلو انك تاكله في اليوم ده عشان جسمك لا يعتاد الرجيم

خذ الوزن قبل بدايه الرجيم مباشرة وسجله عندك وقيسه كل ثلاث اربع ايام بس اهم ميزان هو الي قبل اليوم الفري يعني في عاشر يوم .. قارن الوزن هتلاقيك باذن الله نازل كتير

اهم حاجه ان مش مسموح ابدا تحذف وجبة ولا تستبدل وجبة مكان الثانية لكن مسموح انك تحذف من مكونات الوجبة نفسها .. يعني ممكن تتعشى قطعة جبن قريش بطماطم على ربع رغيف ..

وطبعا تلتزم بكل الملاحظات السابقة مثل ان اللحوم بدون دهن والدجاج بدون جلد والمخلل والسكر ممنوع .. الخ

لو استمريت على الرجيم ده ممكن تنزل الثلاثين كيلو الي عندك في خلال اربع او خمس شهور بالكثير .. وهيمروا بسرعه لان انت بتبقى منتظر العشر ايام يمضوا باي طريقة وكل همك اليوم الفري ييجي فمش بتحس بالوقت وتلاقي الايام مرت .

جرب كده وقولي عملت ايه

ملحوظة : احيانا كنت بعمل تحايلات على الرجيم ده يعني بغير في الاصناف شويه بس بنفس المقادير . يعني مثلا ممكن تشوي بطاطس في قصدير في الفرن وتاكلها مع العشا ... كنت بعمل سندويتش خضار بدون خبز .. يعني اجيب مثلا خس اعمله زي العيش واحط مابين ورقتين خس جبن وطماطم .. او بدال الخس احط خيار مقشر .. برضه كنت بدال مااسلق البيض اكسر بيضه في مقلاة تيفال صغيره بدون اي زيت او سمن واتركه بلا تحريك لما يستوي ( بيض عيون ) واحطه على ربع الرغيف واكله .. طبعا الاكل بهدوء في الحاله دي بيشبع لان الكمية بتكون صغيره ولما تاكلها وحده وحده هتكفيك .. برضه احيانا كنت بعمل سلطه مكونه من عيش سن او ربع رغيف اسمر ناشف مكسر زائد طماطم مقطعه صغير جدا زائد خيار برضه صغير جدا زائد جبن قريش .. اقلب الكل وارش عليهم ملح وفلفل ونعناع ناشف .. يعني حاجه زي الفتوش بس بدون دهون .. والطبق ده كان بيبقى العشا ..

واحذرك احترس من البطيخ يخرب اجدع رجيم لان بالرغم من ان بيقولوا سعراته كتير بس لاني بموت فيه فكان وزني بيثبت لما باكل بطيخ ..

برضه السمك المشوي في الفرن كويس في الرجيم ده والدجاج المشوي ممتاز ( دجاجه مقطعة ومنقوعه في زبادي وبصل وملعقة صغيره خل وتوابل وممكن مسطرده ) انقعها من بليل ووقت الغدا حطها في صينية مع بصل جوانح وفلفل اخضر جوانح برضه وادهن وشها بشويه صلصه في الاحوال العاديه بنحط شويه زيت لكن في حالة الرجيم مبنحطش .. حط لها شويه مية ودخلها الفرن .. لا بتاخذ وقت ولا بتزود الوزن ولذيذة ومناسبة جدا للرجيم ..

تم تعديل 22 مارس 2009 بواسطة doha

[مسافر زاده الخيال]

طب يعمل ايه الواحد لو ميعرفكش يطبخ خـــــــــــــــــــــــــــــــــالص ولا يعمل شاي واعتماده على المطاعم زي حالاتي؟؟؟؟؟؟؟؟؟؟؟؟

انا اول مره جربت الرجيم الكيميائي وكان وزني 100كجم نزلت 20 كجم

ومرت الايام والشهور زاد وزني 115كجم وعملت الكيماوي ونزلت 15 كجم

ومرت الايام وعملته تالت مره ونزلت 6 كجم

والان وزني 122كجم (والشيطان الرجيم وازني على الرجيم الكيماوي برضه) لكني اشتركت في نادي رياضي بس لغاية امتى؟؟؟؟؟؟

المدربين ممتازين(مصريين بالمناسبه) بس حاسس انه علي حكم تأبيد في الجم.........

ونا نفسي اعمل حاجات كتيير

اللى مساعدني ان طولي 180 سنتمتر مما يوزع وزني الزائد

نسيت اقول ان وزني لما اتخرجت من الثانوي 1992 كان 62كجم (الله يعودها من ايام)

فايه احسن رجيم ممكن لو سمحتم؟؟؟؟؟؟؟؟؟؟؟؟

[se_ Elsyed]

فايه احسن رجيم ممكن لو سمحتم

خدها من واحد وزنه مثالي - اللهم صلي عالنبي -

ُكل كل اللي في نفسك لكن بكميات معقولة ( وكلوا وأشربوا ولا تسرفوا ) ... تراك كل مرة تطلب مندي أو مظبي وتفترس الخروف لوحدك يا مسافر مع الرز والسلطات .. وعايز تخس ؟ :) -

المجهود المجهود المجهود ... يعني أعمل لنفسك نظام ثابت للرياضة حتى وإن كانت بسيطة كالمشي أو تمرينات السويدي أو جيب جهاز جري إن شالله مستعمل من حراج بن جاسم ( هو حراجكو في جده إبن مين ؟ :blush2: ) .. يعني ما تستعملش الكابرس حتى لو رايح تصلي في المسجد اللي بيبعد عن بيتكم 5 متر ...

كنا زمان بناخد في الإنجليزي - تقريباً في إعدادي - حكمة بتقول don't eat between meals ...

يعني كانوا بيقولوا لنا " ما ترمرمش "

في ناس يا مسافر ياخويا غاويه تالويش .. عارف التلويش ؟

التلويش بيبقى بالإيد والفم .. يعني إيده عمال تلطش يمين وشمال .. لقى شوية شوكولاته محطوطين على ترابيزة السفرة يروح ضاربهم ... كل شوية يزور التلاجة ويشوف إيه الأخبار جوه .... لا مانع من شوية لب .. سوداني ... مقرمشات .. معجنات ... المهم ما يخليش لا إديه ولا بؤه فاضيين طوال الوقت ..... وهوووب يا عم الحج .. سنة والتانية يبقى زي كده

أقول لك على سر ؟

قعدت ييجي 10 سنين وزني ما يتحركش قيد أنملة .. وتقريباً تحت المعدل المثالي بحوالي 10 كج .. وفرحان بذلك ومبسوط .. على أساس إن مع التقدم في العُمر كده كده الواحد بيزيد .. لكن قولت في عقل بالي : يا واد يا س س ما فيش مانع تزيد العشرة دول دلوقت .. لإن ممكن تيجي علينا أزمة إقتصادية عالمية فالواحد لازم يبقى عنده مخزون داخلي ينفعه في الأيام الصعبة دي

وفعلاً .. وضعت نظام رمرمه محترم .. وبقى مكتبي والتلاجه مليانين شوكولاتات ... وفطاير فواكه عاليمين ... وقهوة بالحليب عالشمال .. ومياة غازية ... وفواكه وحركات .. والحمد لله إبتديت أضرب وإبتدى يتكون عندي مشروع كرش صغير بتاع موظف حكومي قرب يطلع معاش لكن مرتبه ضعيف ...

بس مش عايز أتخن تاني يا عم مش ناقصه مرض ..

[شموع]

انا كمان لي باع طويل شويه ونص في مجال الرجيم

عملت الرجيم الكيماوي والحمد لله بعد ما خصلته وزني زاد اكتر من الاول

بعدين اعدت مع نفسي اناقشها .... مش كتير

قلت يا جسمي انت مليان وعامل زي التفاحة بقالك كم سنه ؟؟

وبعدين قررت ادي لنفسي فرصة اخس خلال سنه ... معقول

وبديت الرجيم ... النظام يقول لي هتخسي خلال اسبوع 2 - 4 كيلو ... حلو اوي

امشي عليه ... نيجي نعمل زيارة للميزان الاقي نفسي خسيت نص كيلو .... ابتدي ازعل

اقول اييييييه ... احنا اتفقنا على سنه ... خلينا نكمل لما السنة تخلص نبأة نشوف هنعمل ايه

كملت وبقيت امشي ع البحر كل يوم بعد صلاة الفجر امشي لي بتاع 6 كيلو بس وارجع اخد شاور واروح الشغل

يا سلااااااااااااااام .... كنت بشوف الدنيا بمبي بمبي ..

المهم خسيت لي 18 كيلو خلال 5 شهور ... حلو اوي ... لما بطلت ... طبعا مش مرة واحدة ... كانت المفاجأة ان وزني ثبت ومرجعش لعهده القديم تاني .. لحد دلوقت اديلي 5 سنوات الحمد لله وزني ثابت تقريبا .... ده ميمنعش اني بعمل زيارات متكررة للميزان

وبعمل كنترول من وقت للتاني ... الحمد لله

نصيحة :

المهم التأهيل النفسي والارادة

بلاش نخس بسرعة ادي لنفسك مجال ووقت

الاستمرار

[شروق وغروب]

طب سؤال ياجماعه

انا معنديش شراهه الاكل خالص

ومش باكل اوى

بس مدمنه فاكهه واعتقد ان الفاكهه متضرش اوى كده

بحب التفاح جدا واحب اكل الفاكهه وساعات بستبدلها بالاكل مش عشان اخس لكن عشان بحبها

ومش بحب الحلويات يعنى البسبوسه وما شابه او شىء اتحطله عسل ماليش فيه

والشيكولاته واللب باكلها صدف نادره جدا

واكلى برده بالزيت ومش بحبه مالح بالعكس انا اكلى دايما بعمله ناقص ملح لانى مش بحب الملح

وبالنسبه للسمنه مش بعمل بيها اى حاجه نهائى الا البيض المقلى وده عشان زوجى ومش كتير باكل معاه

وبالنسبه للخبز انا ممكن اقعد اكل فى رغيف يومين مع انى بطول فى الاكل جدا

يعنى لو قاعده انا وجوزى بقوم بعده بكتير ويجيى يشوف اكلت ايه يلاقى الخبز زى ماهو بس انا من النوع اللى باخد وقت فى المضع ومش باكل بسرعه .

وكمان عندى انيميا ومع ذلك انا وزنى 65 وطولى 150 يعنى فى زياده 15 كيلو وجايه مش زى التفاحه

لا زى اغلب السيدات المصريات فى الجوانب مثلا

ومش عارفه انزل خالص مع انى تابعت من سنه مع دكتور تخسيس وتابع معايا لمده 4 شهور

وادانى شربه الكورنب وفوجئت انى لما نزلت نزلت نسبه الدهون لكن مش الجسم

بس على فكره انا عندى مشكله جامده جدا الله اعلم هى السبب والا لا

انى مش بحب المايه ومش بعطش الا نادر جدا ولو شربت بيبقى ربع كوب فى اليوم كله واوقات بيعدى

يومين 3 مش بشرب وبكتفى بالعصير او المشروبات الدافيه

فياريت حد يقولى انزل ازاى وميقولش قللى اكل لانى كده هموت من الجوع

[بندق أفندى]

لو أن ما بى من حب ووله على جمل لما دخل النار كافر ..

بيت شعر بليغ للمرحوم الشاعر الأمير عبد الله الفيصل .. خلاصته انه الحب يخلى الجمل زى الفتلة

وبمناسبة الجدار .. مرو على الديار ديار ليلى أقبل ذا الجدار وذى الجدارا .. فما حب الديار شغفن قلبى ولكن حب ساكنى الديارا ..

ممكن تحب وتتلوع وهتخس ان شاء الله

تم تعديل 22 مارس 2009 بواسطة بندق أفندى

[مسافر زاده الخيال]

فايه احسن رجيم ممكن لو سمحتم

خدها من واحد وزنه مثالي - اللهم صلي عالنبي -

ُكل كل اللي في نفسك لكن بكميات معقولة ( وكلوا وأشربوا ولا تسرفوا ) ... تراك كل مرة تطلب مندي أو مظبي وتفترس الخروف لوحدك يا مسافر مع الرز والسلطات .. وعايز تخس ؟ :Exclam: -

المجهود المجهود المجهود ... يعني أعمل لنفسك نظام ثابت للرياضة حتى وإن كانت بسيطة كالمشي أو تمرينات السويدي أو جيب جهاز جري إن شالله مستعمل من حراج بن جاسم ( هو حراجكو في جده إبن مين ؟ ) .. يعني ما تستعملش الكابرس حتى لو رايح تصلي في المسجد اللي بيبعد عن بيتكم 5 متر ...

كنا زمان بناخد في الإنجليزي - تقريباً في إعدادي - حكمة بتقول don't eat between meals ...

يعني كانوا بيقولوا لنا " ما ترمرمش "

في ناس يا مسافر ياخويا غاويه تالويش .. عارف التلويش ؟

التلويش بيبقى بالإيد والفم .. يعني إيده عمال تلطش يمين وشمال .. لقى شوية شوكولاته محطوطين على ترابيزة السفرة يروح ضاربهم ... كل شوية يزور التلاجة ويشوف إيه الأخبار جوه .... لا مانع من شوية لب .. سوداني ... مقرمشات .. معجنات ... المهم ما يخليش لا إديه ولا بؤه فاضيين طوال الوقت ..... وهوووب يا عم الحج .. سنة والتانية يبقى زي كده

أقول لك على سر ؟

قعدت ييجي 10 سنين وزني ما يتحركش قيد أنملة .. وتقريباً تحت المعدل المثالي بحوالي 10 كج .. وفرحان بذلك ومبسوط .. على أساس إن مع التقدم في العُمر كده كده الواحد بيزيد .. لكن قولت في عقل بالي : يا واد يا س س ما فيش مانع تزيد العشرة دول دلوقت .. لإن ممكن تيجي علينا أزمة إقتصادية عالمية فالواحد لازم يبقى عنده مخزون داخلي ينفعه في الأيام الصعبة دي :ninja:

وفعلاً .. وضعت نظام رمرمه محترم .. وبقى مكتبي والتلاجه مليانين شوكولاتات ... وفطاير فواكه عاليمين ... وقهوة بالحليب عالشمال .. ومياة غازية ... وفواكه وحركات .. والحمد لله إبتديت أضرب وإبتدى يتكون عندي مشروع كرش صغير بتاع موظف حكومي قرب يطلع معاش لكن مرتبه ضعيف ...

بس مش عايز أتخن تاني يا عم مش ناقصه مرض ..

يا استاذ س س انا مش من هواه المندي والمظبي الا نادر النادر

لكني اعشق الباستا والشكولاته والايس كريم والعصائر

والاكل الصيني(المعدل بمواصفات اكل ادمية)و

بعد ما اشتغلنا اصبحنا ننام بعد العمل ومفيش كوره

وطبعا اشتريت دراجة ثابته -دراجة جديده لنج لا من حراج قاسم ولا الصواريخ بتاع جده-وكملت 4ايام الا دب الملل في نفسي

وانت محظوظ جدا ان كانت طبيعة جسمك لا تزيد فالبدانة شر مستطير

وكان الله في عون النسوان لان المسأله بالنسبالهم اكثر حرجا لاسباب جمالية و صحية

[التونسى]

رأيى الخاص ومن واقع حياتى .. مع احترامى طبعا لاراء الاخرين .. ان مسألة السمنه والنحافه ترتبط اساسا بطبيعة الجسم ومزاجه .. كل جسم وله تركيبته الخاصه ..

ح اشبه الجسم الانسانى بالسياره .. فيه سيارات زى ما بسمع ((جعانة او فاجومية بنزين)) لانها بتحرق او بتستهلك بنزين كتير .. بينما سيارات تانيه بتعمل نفس المسافات لكنها مصممه داخليا انها تحرق بنزين قليل .. يعنى عربيتين من ماركتين مختلفتين يعملوا نفس المسافه .. واحده تحرق 50% من وقودها .. والتانيه تحرق 20% بس .. وكلامى ده اقدر اطبقه على نفسى وعلى ناس كتير حواليا عاشرتهم مصريين ومن جنسيات متعدده ..

انا مثلا من حوالى كده 10 سنين مكنتش فعلا باكل كتير وكان الاكل شئ مهمش فى حياتى .. وكان وزنى اقل من الطبيعى بحوالى 20 كيلو (انا 180 سم ووزنى من 10 سنين كان 60 الى 61 كيلو )) كنت شبه الاخوه بتوع الصومال كده اللى خارجين من مجاعه wst:: .. وسبحان الله .. قررت العب رياضه ((العاب قوى)) ووزنى بسبب الرياضه دى اللى كلها جرى ومجهود زاد حوالى 8 كيلو .. يعنى الرياضه اساسا ممكن تتخن مش بس تخللى الواحد يفقد وزن .. لان لما لعبت رياضه لاقيت نفسى اتفتحت على الاكل بشكل بشع .. لدرجة انى كنت باكل فى فطارى حوالى خمس ارغفه كبار وانا اساسا قبل ممارسة الرياضه كنت نادرا لما بفطر :amb:

حاليا بقى انا باكل بشراهه منقطعة النظير .. وبوقى شغال مضخ اناء الليل واطراف النهار :lol: .. ويادوب وزنى بتراوح من 73 الى 75 كيلوا يعنى .. وبصراحه قلقت من الموضوع ده.. يعنى اكل كتير اوى وزياده محدوده فى الوزن .. عملت تحاليل .. ورحت لدكتور .. قاللى ان طبيعة جسمى بتحرق الاكل .. ودايما جسمى فى حالة فقد للطاقه .. قلت الحمد لله على كل حال

دا عن تجربتى الشخصيه .. اما عن الاخرين فى حياتى .. فانا باختصار عشت مع ناس كتيره بحكم غربتى .. وكنت باكل وبشرب معاهم .. وكان اكلهم عادى مقارب جدا لكمية اكلى .. يمكن كنت باكل اكتر منهم كمان :lol: .. لكن ما شاء الله كانوا هضاب .. وكنت انا عوصفر :Exclam: ..

اذن الخلاصه واللى عايز اقوله .. مينفعش حد بيعانى من السمنه او نفسه يقلل وزنه .. انه يقوم باتباع نظام شخص اخر بطريقه متطابقه.. وبتقليد اعمى ..حتى لو كان برنامج رجيم نجح نجاح منقطع النظير مع الشخص الاخر.. لأن اللى ينفع لجسم الاخرين .. مينفعش لجسمى ..والعكس صحيح

.. الصح واللى مفروض يتعمل لكل من يعانى من السمنه ...من وجهة نظرى يتلخص فى حاجتين .. انه اولا يراقب نفسه .. ويدرس بنفسه طبيعة جسمه ..وايه الشئ اللى بيلاحظه على نفسه فى عاداته الغذائيه .. ومن هنا يبدا بقى بعد جمع المعلومات الذاتيه عن نفسه ...انه يضع الخطه اللى تناسب ظروفه وطبيعة جسمه .. لو بقى مقدرش يعمل الموضوع ده .. يبقى عليه وعلى اخصائى او دكتور فى مسألة التخسيس وهو اللى يوضع له البرنامج المناسب لطبيعة جسمه ..

وعلى فكره .. ساعات الوزن الزائد بيكون طبيعة الجسم .. ولو الواحد نزل عن الوزن الزائد ده بيحصلله خلل فى السيستم الخاص به .. والعكس صحيح .. لو الواحد رفيع .. وحط وزن فوق وزنه ممكن تصميم جسمه ميستحملش الوزن ده حتى لو كان وزن مش كتير ..

ولله فى خلقه شئون .. لو يعلمون

مع خالص تحيتى

التونسى :ninja:

تم تعديل 22 مارس 2009 بواسطة التونسى