وما الحياة إلا ... زبادي في الخلاط

[se_ Elsyed]

إحنا تقلنا على الشيف بندق والراجل طول النهار واقف في المطبخ لما رجليه ورمت .. واللي ما في ست قالت عنك يا بندق ياخويا انقي لك شوية رز ولا اقطف لك عودين ملوخية .. وفالحين بس يقتبسوا من افكاره اللولبية لتحسين حياتهم الاسرية ولكسر الروتينيات اليومية المطبخية

فأنا بأعتباري من معشر الرجال قررت اساعد بندق في المطبخ واقدم فكرة مطبخيه بسيطة تعتبروها حلويات .. تعتبروها مقرمشات ... ما بتفرقش معايا المسميات ....

وبيني وبينكم بقيت اتعقد من كلمة بسيطة اللي بيكررها بندق في كل اكلاته وبيحسسني ان المطبخ ده جنه ... مع انه بالنسبة لناس كتير ومنهم ستات بيعتبروه جهنم الحمرا ونفسهم ومُنى عويناتهم يقضوها تونه وسلمون او ديليفري من اللي بيقطم الوسط

وكل ما اسمع كلمة اكله بسيطة افتكر حسن سبانخ في فيلم الافوكاتو اللي كل قضية يترافع فيها كان يبدأ ويقول " قضيتنا اليوم في منتهى البساطة " لحد القاضي ما زهق منه وقال له : على الطلاق لو قلت ان قضية اليوم بسيطة لاحبسك :blink:

المهم ... وصفة النهاردة يا ولاد في منتهى البساطة ومش مهم اتحبس

نرجع مرجوعنا شوية للزمن الغابر كده ... نلاقي ان ما كانش عندنا في مصر زمان غير الزبادي المُصنع عند محلات الالبان وكان بيبقى في سلطانيات فُخار .. ولسه فاكر منظر اللبان وهو راكب البسكلته بتاعته ام زمارة مميزة ومثبت ورا صندوق خشب وشايل فيه الزبادي اللي بيبيعه .. وعلى شرط بيبقى عارف زباينه .. آه ما هو سيادتك بتشتري الزبادي وبتضربه وتاني يوم ترجع السلطانيات الفخار مش تضرب عليها العواف

ويادوب ما كانش في زبادي بيتباع في محلات البقالة اللهم الا بتاع شركة مصر للالبان وما كانش عليه اقبال كتير على اساس ان الزبادي بتاع الراجل ابو عجله او اللي بيتباع في محل الالبان بيبقى طا زه وارخص

شوية شوية تطورنا وظهر في الثمانينات انواع اخرى من الزبادي منها " رايب ومربرب على المعدة يرطب يا جُهينة يا راييييييب .. وعند جُهينة الخبر اليقين " وزبادي نستله وما اعتقدتش كان في انواع تانية

كان محسوبكم س س بيتعقد بقى من حاجه اسمها زبادي بالفواكه ... اصلي بعيد عنكم ما بأحبش منتجات الالبان ... من اول الحليب اللي بيُمثل بالنسبة لي رمزاً للقهر .. ولو ماشربتش الحليب يا ولد هاجيب لك ابو رجل مسلوخه ...

فكنوع من انواع اثبات الذات مش شارب الحليب حتى لو جيبتوا لي شارون نفسه او والعياذ بالله كونداليزا رايس .. لكن لو الموضوع فيه تسيبي ليفني .. ممكن افكر اخد بؤ :happy:

ينسحب هذا الشعور على الزبادي اللي ما بأحبوش برضوا

فكان البديل لهؤلاء وتلكمو هو الزبادي بالفواكه

بس ظهرت لي مشكلة

هما عدة مشاكل بصراحة ..

1- لدي شعور قائم حتى الان كل ما اشوف علبة زبادي بالفواكه هو اني بأحس ان العلبة دي متكله قبل كده .. من صغر حجمها .. ومن شوية الزبادي اللي بالاقيهم في اخر العلبة على جنب ويادوب ما بألحقش اضرب المعلقة في العلبة الاقيها خلصت

2- سعره غالي .... يعني الواحد عشان يقول انا كلت ... فعايز له قد 5 علب مسح زور عشان يبتدي يقول : انا كلت زبادي بالفواكه يا سُعاد

فكان الحل اللي اكتشفت انه اصبح منتشر خصوصاً في الكوفي شوبات - قهاوي بالعربي - هو " زبادي في الخلاط "

اللي بقى مشروب رسمي جنباً الى جنب مع البانجو

يعني يبقى راجل طويل عريض قاعد عالقهوة كده وبدل ما يطلب شيشة زغلول او قص او حتى تفاحه .. يروح قايل للجرسون : واحد زبادي في الخلاط

يا سلام ؟!!

ناقص تاكل الزبادي وتقوم تمدد لك شوية على جنب في القهوه !!!

ما تروح يا عم تاكل زبادي في بيتكو وتموت وسط عيالك

المهم .. قلت يا واد يا س س .. بلا استغلال المحلات بلا نستله وجُهينه والناس الغريبة دي ... ما تفتكس انت زباديك في خلاطك .. ويا دار ما دخلك زبادي ...

فبقيت اجيب عبوة الزبادي العادية الحلوه اللي تملى العين ... بالمناسبة بيتباع هنا جرادل زبادي ... آه والله ... جردل كده ييجي كيلو او اتنين كيلو مليان زبادي احسن من العلب الفرط

مش في سجابر فرط وفي خرطوشة ؟

اهو ده زي الخرطوشة كده

فبأجيب الجردل ده .. اهو منه يبقى عندنا ستوك زبادي يكفينا ييجي اسبوع

ومنه الجردل الفاضي المدام تستخدمه في مسح الشقة او نقع الهدوم .. لنظافة تدوم وتدوم

المهم بأبقى ماسك الجردل في ايد والفرشة قصدي الخلاط في الايد التانية .. وادعبس بقى على اي فاكهه في التلاجه ..

يا سلام لو شوية فراولة بايتين وما حدش من الاشاكيف اللي آنيهم في بيتي وببياكلوا من خيري ماخدش بالوا منهم ..... آآآآمممممم ... اموت انا في النوع ده بالذات وبأحترم اي شخص على وجه الكرة الارضية بيحب الزبادي بالفراولة .. بأحس انه انسان مميز من مواليد برج الجوزاء ويتسم بصفات قيادية ورؤية ثاقبة لفسافس الامور

مالقتش فراولة .. يبقى لا مانع من موزه كلبوظه في زبادي عجيب

ما فيش لا فراولة ولا موز عشان احنا في اخر الشهر والعملية ماشية بالزق .. يبقى برتقانيه او يوستفنديايه

خلاص بقى احنا النهادرة 15 منه وس السيد افندي جاب جاز وعمال يعد على اوراق الشجر عدد الايام المتبقية على اول الشهر .. يبقى مشيها قورديحي يا معلم واضرب لك عليه زبادي مع شوية سُكر او لو كان في عسل نحل هنا او هناك يبقى خير وبركه واتعشت يا معلم ...

واحد لمض يقول لي : وليه الغلب ده ؟ ما تجيب يابا معلقة سكر وتدلقها على علبة الزبادي وقلب قلب قلب وزيح يا عم العيا مُر ؟

اقول له وبالله التوفيق : يابني وفين المُعاناه ؟

الزبادي المضروب ضرباً مبرحاً في الخلاط بيبقى حاجه تانية وملمس تاني وطعم تاني وما بيبقاش محتاج مجهود عاشن يتبلع

اللي ما جربش الاختراع ده .. يجربه ويدعي لي .. وهايشوف بنفسه طعم الحياة معاه هايبقى ازاي

فوتوكو بعافية

[newcomer]

يقتبسوا من افكاره اللولبية لتحسين حياتهم الاسرية

ولكسر الروتينيات اليومية المطبخية

تعتبروها حلويات .. تعتبروها مقرمشات ...

ما بتفرقش معايا المسميات ....

تحيية قوية جدا لشاعر الزبادى.......

:blink:

[سهل جدا]

إحنا تقلنا على الشيف بندق والراجل طول النهار واقف في المطبخ لما رجليه ورمت ..

بس معليش يا أستاذ س س , الأستاذ بندق مواضيعه كلها مدعمة بالصور

وصور إيه... والله أنا تقريبا كل ما أخش على مواضيعه وأشوف الصور ديه أحسن إني جوعت وعاوز آكل

أظن لو حطيت صورة للزبادي المضروب في الخلاط ضربا مبرحا :blink: ده , كل الناس هاتحبه

وكما قيل: ليس الخبر كالمعاينة..

يروح قايل للجرسون : واحد زبادي في الخلاط

يا سلام ؟!!

ناقص تاكل الزبادي وتقوم تمدد لك شوية على جنب في القهوه !!!

ما تروح يا عم تاكل زبادي في بيتكو وتموت وسط عيالك

يا راجل , دا أنا أيام ما كنت بأعد على القهاوي في مصر , ماكنتش بحب حاجة زي الزبادي اللي بالخلاط ده

وكان الجرسون لما يشوفني يعرف علطول طلبي ويقول: وعندك واحد زبادي بالخلاط وصلحووووووووووووووووو

بس لما جربت الزبادي اللي في الخلاط بتاع البيت بعد كده ما عجبنيش ..

[سهيلة]

واللة اختراع فى منتهى السهولة يا سى السيد

وبما انى من مدمنى الزبادى بالفواكة

قررت انى اجربو فوراااااااااااااااااااااااااااااااااااااااااااااااااااااا

بس اضم صوتى لصوت سهل جدااااااااااااااااااااااااااااا

عاوزيييييييييييييييييين صور :blink:

[se_ Elsyed]

شكراً لحلفائي في حلف الزبادي على تشريفهم لركن التخت الشرقي

بس إنتو فاهمن غلط ...

الفيلم ده قصة مش مناظر ..

يعني مافيش صور

أما لو مُصرين ..

فالحمد لله جوجل موجود وبيسد يعني

أدي الخلاط

حادي بادي أدي الزبادي

وأدي الفراولة بس فاميلي سايز عشان تكفي كل أعضاء المنتدى

نضرب الزبادي مع الفراولة مع السكر

يقوم مطلع لنا من الناحية التانية زبادي بطعم البرتفال

أهو

وبالهنا والشفا ومطرح ما يسري يمري ..

[HDarwish]

إيه ده ....

أنا أول ما قرأت عنوان الموضوع قولت حلو أكيد س س جايب وصفة عمل الزبادي من أوله لأخره يعني من ساعة ما نجيب الحليب ونسخنه لحد 80 درجة مئوية وبعدين نحط عليه البادئ اللي هو زي الخميرة ودي بتكون جاهزة أو لو مافيش ممكن تحط شوية زبادي أه شوية زبادي وده طبعا علشان البكتريا اللي بتفرز حامض اللاكتيك وبعدين يتحط في الحضان بشد الضاض أو لو مافيش حضان ممكن يتحط في الدولاب علشان الحرارة لازم تكون 28 درجة مئوية وتسيبه ساعتين وبعد كده بئا عايز تضربه في الخلاط ما تضربوش في الخلاط يبقى براحتك وحاجة ترجعلك.

أه والله كنت فاكر إني هدخل ألاقي الكلام ده كله لكن للأسف أحبطني

دمتم بألف خير

[se_ Elsyed]

اعزائي المحاورين والمحاورتيات

اتقدم اليكم بأسمى معاني الشُكر والعرفان لوقوفكم بجانبي في افتكاساتي الزباديية

فلقد آمنتم بموهبتي بعد انا قال لي الاخرون " يا فاشل يا فاشل "

وتبنتوني وهنتوني وستتوني بعد ان الاخرون شردوني

وبالتالي بناء على رغبات الزملاء الجامحة

هاكموا مجموعة من صور افتكاساتي اليوم

هاتلاحظوا ان الزبادي طازة عشان لسه متصور النهاردة

مش هاتكلم كتير ولكن هاقول

سين سين يا معلم ... خلي الزبادي يتكلم

[se_ Elsyed]

المهم .. هاقولكم على طريقة تحضير كأس زبادي مُعتبر متوصي عليه ..

- أنا جبت الزبادي ولقيت عندي جوافه - وأخليتها من البذر - وكيويمتقشر مع معلقتين عسل نحل وضربتهم ضرباً مبرحاً ف يالخلاط حتى أستغاثوا .. وبعدين حطيتهم في الكأس وقلت لازم ازينهم بحاجه ... المهم لقيت عندي زجاجة عصير " فيمتو " متبقيه من رمضان الماضي وقربت تبقى إكسبيرد وده بتاع كده مركز من التوت بيجيبه كل بيت في السعودية ولو حصل تفتيش مفاجيء وماحدش كان عنده فيمتو .. يبقى سنته سوخه ... ويتخفف بميه وسكر ويتشرب عالفطار وطعمه عامل زي دوا الكُحه بالظبط وأهو منه حاجه مسكره ومنه علاج ... وروحت راشش على وش الكاس بضع قطرات من الفيمتو فاعطى شكل جمالي حلو .. وجمعت أولاده حولي وقلت لهم .. ياولاد أنا سايب لكم من بعدي شيء ينفعكو في مستقبلكو .. قالوا لي إيه هو يا بابا فقلت لهم : زبادي في الخلاط ... أهو منها تاكلو الزبادي .. ومنها لو إتعذرتو يبقى بيعوا الخلاط ..

[Folana]

اعزائي المحاورين والمحاورتيات

اتقدم اليكم بأسمى معاني الشُكر والعرفان لوقوفكم بجانبي في افتكاساتي الزباديية

فلقد آمنتم بموهبتي بعد انا قال لي الاخرون " يا فاشل يا فاشل "

وتبنتوني وهنتوني وستتوني بعد ان الاخرون شردوني

وبالتالي بناء على رغبات الزملاء الجامحة

هاكموا مجموعة من صور افتكاساتي اليوم

هاتلاحظوا ان الزبادي طازة عشان لسه متصور النهاردة

مش هاتكلم كتير ولكن هاقول

سين سين يا معلم ... خلي الزبادي يتكلم

السلام عليكم ورحمة الله......

شاعر الزبادى الأعظم...جدو أبو الاعيان زبادوو...(حقوق اقتباس اللقب محفوظة للغالية newcomer)

هو ده كاتشب اللى على الوش؟.... :unsure:

خد طريقة تانية اهى...

اضرب الزبادى مع ايس كريم وياسلام لو كان ايس كريم مستكة بالفستق....وادعى لى

:unsure:

[se_ Elsyed]

هو ده كاتشب اللى على الوش؟.... :)

كاتشب ؟!!!

هانعض في بعض يا ست المُشرفة ؟

ماشي ... لإ وإنتي الصادقة .. ده دم واحد إتريق على مره واحده على الزبادي بتاعي روحت مسيح دمه ومزين بيه الزبادي ..

وبعدين إيس كريم إيه ؟ خلي كل واحد في حاله ... يعني الزبادي زبادي .. والايس كريم أيس كريم ... وعلمني العوم والنبي يا أحمد

[newcomer]

شاعر الزبادى الأعظم...جدو أبو الاعيان زبادوو...(حقوق اقتباس اللقب محفوظة للغالية newcomer)

:)

:happy:

:rolleyes: :blush2:

[سهيلة]

الصور تحفة بجد يا سى السسيد

دة انت حليت لى مشكلة كبييييييييييييرة ف البيت

نحلى باية بعد الغدااااااااااااااااا؟؟

وانا اساسا ما ليش ف الحلويات

يبقى خلالالالالااااااااااااااااااااااااااص من هنا ورايح قصدى وجاى

كل يوم زبادى ف الخلاط

وعشان التنويع نبقى نغير الفاكهة المضروبة معاة

شكر جزيل لسى السيد

[fatfouta]

عارف يا سى السيد باشا والله دلوقتى بس افتكرته تصدق انا كنت ناسية الاختراع ده من ساعة ماجيت الرياض مع انى من حوالى خمس سنين وانا فى مصر اخر مرة كان فيه مكان فى وسط البلد كنا بنحب ناخد فيه الزبادى بالخلاط ده ايام الخظوبة بقى وعليك خير

بس شكرا ليك فكرتنى بحاجات جميلة اوى كنت نسيتها منه لله اللى كان السبب بقى

تستحق الوردتين دول بجد :closedeyes: :lol:

[se_ Elsyed]

كنا بنحب ناخد فيه الزبادى بالخلاط ده ايام الخظوبة بقى وعليك خير

:

خلاص يا فتفوته ... ليكي عليه المره الجايه هاقدم لكم طريقة شوي الدره المشوي وكيفية نقع الترمس مع كيفية عمل فلوكة في النيل مع تصنيع دبدوب من بواقي القطن بتاع التنجيد وأي قماش قديم .. وبكده نبقى رجعنا لك أيام الخطوبة بكامل تفاصيلها ...

------------

د / سُهيله ..

سعيد بتشريفك للموضوع يا فندم .... وبما إن مالكيش في الحلويات مثلي ... يبقى " يعيش التحالف الحادق المقرمش "