الدعايه الطبيه

[abdooovet]

انا عايز اناقش مع حضراتكم موضوع الدعايه الطبيه ومشاكلها ومستقبلها واضرارها وفوايدها

اولا حكاية الدعايه الكطبيه كالآتى:

شركات الدواء المصريه او الاجنبيه بتاخد خريجين صيدله وبيطرى وعلوم وتدربهم وتطلقهم فى سوق الاطباء وطبعا بيلفوا عالدكاتره يقنعوهم يكتبوا ادويتهم والصيادله يوفروها وبيطالبوا بمستهدف من البيع الشهرى لازم يتباع يعنى عدد معين من العلب

للى يعرف منهكم طبيعة الشغل ده ياريت يقول

فوايده واضراره ومستقبله ومشاكله

[حسام يوسف]

قلبت علينا المواجع يا دكتور

مجال مش محترم بالمرة

وممارسات تحدث تجعل ابليس طفل برئ فى المهد

توب علينا يارب

[abdooovet]

ههههههههههههههههه

ربنا يتوب علينا يا دكتور

بس يا دكتور انا بحاول الاقى لنفسى مبرر يخلينى استمر فى المهنه ده

عايز حد يقولى فوايدها لانى وانا شغال فيها شايف اضرارها بس

ياترى ايه فوايدها؟؟؟

[adrianocrespo]

ياترى ايه فوايدها؟؟؟

الفلوس

معظم القطاعات الطبيه تتجه اليها رغم علمهم بالشبهات الكثيره التي فيها نظرا للعائد المادي الكبير

[abdooovet]

لو الفلوس هى الفايده الوحيده يبقى انا هستقيل من بكره

طيب انا طبيب بيطرى يا ترى افتح عياده واصبر عالدخل المحدود ولا استمر فى الدعايه

مع العلم ان معظم خريجى بيطرى وصيدلة وعلوم شغالين مندوبين دعايه

ده بقيت مشكلة راى عام

مالهمش نقابه تحميهم ولا اى حقوق

[adrianocrespo]

لو الفلوس هى الفايده الوحيده يبقى انا هستقيل من بكره

طيب انا طبيب بيطرى يا ترى افتح عياده واصبر عالدخل المحدود ولا استمر فى الدعايه

طيب يا دوك

يبقي الفلوس هي السبب في استمرار الناس فيها

حضرتك قلت

انا طبيب بيطرى يا ترى افتح عياده واصبر عالدخل المحدود

[ozoozo]

مستحيل هاتلاقي حد شغال المهنه دي وبيحبها لكن كلنا بنشتغلها عشان....................................طبعا الفلوس

[abdooovet]

مشكلة الدعايه يبقى معاك كل حاجه ومش عارف تستمتع بيها

عربيه معاك بتمسك فلوس فى ايدك صعب كتير من الخريجين اللى لسه متخرجين يمسكوها لكن مش بتستمتع بكل ده وبتعيش حياه صعبه جدا

[adrianocrespo]

معظم اصدقائي اللي شغالين في الدعايا بيقولوا ان فلوسها مفيهاش بركه و مبيحوشوش زي مالناس فاكرين

[batman]

كنت فيها والحمد لله خلصت منها

[عندى أمل]

الحمد لله

ربنا تاب على من شغلانة الدعاية الطبية من زمان

أنا اشتغلتها فى شركتين

أول مرة كانت شركة مصرية صغيرة و على أدها مكتب علمى يعنى و المرة التانية كانت شركة كبيرة و بتمثل شركة أجنبية فى مصر

لكن للأسف الاتنين كان ليهم تعاملات غير شرعية و غير أخلاقية و الحمد لله سيبتهم و دعيت ربنا أنه سبحانه و تعالى يبعدنى عن الدعاية الطبية و يبعد الدعاية الطبية عنى و الحمد لله ربنا سبحانه و تعالى استجاب دعائى

لازم تعرفوا إن فيه حديث نبوى ما معناه أنه لا يجوز إعطاء العاملين فى مصالح الدولة أى هدايا و طبعا أنتم فاهمين إن فى الدعاية الطبية بتروح المستشفيات و الصيدليات الحكومية و مخازنها و تظبط الناس اللى فيها

ده غير شبهة الرشوة فى التعاملات اللى بينا و بين الاطباء و بالذات فى الاماكن الحكومية ده بالاضافة الى الغش و التدليس و إيهام الاطباء بمميزات الدوا اللى قد تكون فيه مبالغة ده غير طبعا إخفاء العيوب و الاثار الجانبية للأدوية

و طبعا فلوس العداية برغم كترها لكن مفيش فيها بركة خالص

فى مرة قابلت سوبرفايزور "مدير" يعنى من شركة أدوية كبيرة و اتكلمنا شوية و كنت لسه بادىء فى شغلانة الدعاية

هو حاول يساعدنى و لخص لى موضوع الدعاية فى جملة واحدة

لو إديتك كبسولة فيها "نخامة" بلغم يعنى لازم تعرف تيبعها و تقنع اللى أدامك بيها

سيبونا نموت بشرفنا

قول مأثور من فيلم "رامى الاعتصامى"

[Virus]

أخواتي صيادلة واستشرنا شيوخ في الموضوع وأكدوا حرمة كثير من ممارسات هذه المهنة

ولو حبيت تمشي عدل يبقى مش هتسلك خالص..إلا من رحم ربي

فايدة المهنة دي الوحيدة في رأيي هي إنك لو قعدتلك بتاع سنتين كده وكانت دماغك حلوة ..ممكن تقلب على مجال ال Marketing وده مجال شغله محترم وفلوسه زي الفل..طبعا مش أي حد بيروح الكارير ده بس لو خدت كورس الماركيتينج بتاع ال AUC اللي هو SMC على ما أتذكر - هتسهل مشوارك جدا..وياسلام بقى لو محوشلك قرشين و خدت دبلوما CIM بتاعة ال AUC برضو ..يبقى انت كده عديت ومحدش هيعرف يكلمك بعد كده

تم تعديل 4 مارس 2009 بواسطة Virus

[عندى أمل]

حتى التسويق و المبيعات فى غير مجال الادوية بردوه فيها معاملات حرام و غش و تدليس

للأسف المجال ده سىء للغاية سواء أدوية أو غيرها