ليه - أحيانا - اللى بتقول له "ربنا يهديك" بيزعل ؟

[فــيــروز]

طيب و طالما الهدف نبيل و الدعوه عامّه للجميع بالهدايه لماذا لا يقول المتحدّث

- "هدانا الله و إيّاكم"

أو يقول

- "ربنا يهدينا جميعا" !!

مش بردو يصح الخير يعمّ؟ mf-:

[سهل جدا]

فى علم المعنى فى اللغويات

فيه اسئلة كتير مهمه.....من ضمنها

من مين ......لمين......ازاى....الخ

علشان نفهم معنى الكلام.....ده حتى نبرة الصوت و تعبير الوش بتأثر فى المعنى ......

فبالرغم من جمال معنى الدعوة دى

لكن الحقيقة ..... المعنى المقصود بيكون مستفز ( زى ما الزملاء الافاضل وضحوا)

و غالبا بيكون القائل و المتلقى فاهمين بعض كويس اوى !! ;)

أهلا بالأخت الفاضلة نيو قمر

الكلام ده جيد وقرأت عنه في علم البرمجة اللغوية العصبية

فعلا السياق ونبرة الصوت وطريقة العرض هي اللي بتفرق

لكن المشكلة اللي ملاحظها إن مجرد الدعوة نفسها (لو شيلنا كل الملابسات الأخرى) فيه ناس كثير بيزعلوا منها

شكرا لك mf-:

لو قصد فعلا الهدايه او الرشاد فما عليه الا ان يجعلها دعوه عامه شامله لهم هما الاثنين

كان يقول ربنا يهدينا جميعا لما فيه الرشاد

فلا احد فى غنى عن هدايه الله له

والله اقتراح جيد جدا يا أختي مغتربة

لو واحد بيزعل أوي من الكلمة ديه ممكن نتكلم عنها بصيغة الجمع

ولكن أخشى إن في ناس تزعل حتى من الجمع ده

شكرا لك

ومش خسار فيكي الوردة ديه

:wub:

[مغتربة]

ومش خسار فيكي الوردة ديه

طبعا يا سهل جدا انا عارفه و متاكدة ان مش خسارة فيا حاجه خالص

حتى لو كانت وردة بس احنا من عادتنا الكرم و الى يهدينا بواردة (واحده )

نردها احنا ليه mf-: :wub: ;) :blink: :blink: :sad: :sad: wst:: wst::

بوكيه

[أحمد سيف]

طالما سعادتك من المهتمين بعلم البرمجة اللغوية العصبية (مع إن لدي شكوك كثيرة في كونه علم ... لا سيما بالطريقة التي يدرس بها في منطقتنا) فلا بد أنك تدرك أن الموقف الذي تلقى فيه الكلمة وأسلوب إلقائها له دور كبير في كيفية تلقي المستمع لها.

فكلمة بسيطة مثل "توكل على الله" قد يفهم منها تمنى الخير والنصيحة الصادقة إذا صدرت من صديق أتيت تستشيره في أمر يحيرك

ونفس الكلمة يلقيها شخص بلطجي في الشارع لخصمه بصوت مرتفع يفهم منها التهديد والوعيد

فضلا عن أن عباره معينة لدى شعب ما قد تعني شيئا مختلفا عند شعب آخر ... فموضوع تلقي المصريين والسعوديين لنفس العبارة بطريقة مختلفة ليس لخطأ في أي من الشعبين بل هو اختلاف لغوي وثقافي طبيعي

وحتى لو كانت العبارة مكتوبة ولا تحمل أية انفعالات فإن السياق الذي تكتب فيه يحدد الى حد كبير مدلولها

عموما يا سيدي لو فيه ناس بتزعل من الكلمة حتى لو كانت نيتك حسنه وانت بتقولها يبقى ليه تقولها من الأساس

هناك عشرات الأدعية الأخرى التي يمكن أن تدعو بها لأخيك المسلم والتي لا تنطوي على هذا المعنى الضمنى بأنت تتهمه بالضلال ... يمكنك أن تختار منها ما تشاء (إذا كانت نيتك فعلا أن تدعو له)

ربنا يهديك ويهدينا جميعا

تم تعديل 19 فبراير 2009 بواسطة أحمد سيف

[لولا]

اكررها كما انا مقتنعه جدا بها .. فى المنتديات هذه الكلمه هى اسلوب انتقااااااااااااااااااااااااااااااص مرفوض وليس لها مكان من الإعراب فى الإستخدام فى النقاشات

معليش سؤال بسيط، أأمل من حضرتك الجواب بنعم أم لا, هل لو قلت لحضرتك: ربنا يهديكي ويهديني , بردو هاتزعلي ؟

تعرف يا استاذ سهل .. للتوضيح فقط

عندما اشارك فى مواضيع عموما فى القسم الجاد ، هدى الإسلام كما هو الحال هنا اشارك لأناقش فكره ، طرح ، معلومه ..الخ

تهمنى جدا النظره الشامله وليس الشخصنه فى الحوار بترك الفكر والقفز للشخصنه .

ورغم ذلك ..

كلمات كهذه وكما وضحت لا اجد لها موقع اعرابى فى المنتديات وعندما اسمعها لاتزعجنى ابدا .

تعرف لماذا ؟؟ لأنها تجعلنى استوعب مع اى فكر اتحاور . الفكر يرد عليه بفكر ، المنطق بمنطق ، الحجه بحجه .

والحريه الفكريه مكفوله للجميع من يحشر دعاوى الهدايه فى الحوارات هو شخص دائما يعانى ازمه من تقبل ما يخالفه وضعف حجه فى الرد عليه .

فى الحياه من اكثر ما يسعدنى دعوه ابى وامى "ربنا يهديك ويكتبلك فى كل خطوه سلامه " لأنها صادقه جدا ومليئه بالحب .

باقى دعوات الهدايه للإنتقاص والتى اعرفها جيدا لاتعنى لى شيء ولا تمثل لى شيء .

اللهم اصلح من خلقنا وخلقنا يارب .

تحياتى

لولا

[سهل جدا]

طالما سعادتك من المهتمين بعلم البرمجة اللغوية العصبية (مع إن لدي شكوك كثيرة في كونه علم ... لا سيما بالطريقة التي يدرس بها في منطقتنا) فلا بد أنك تدرك أن الموقف الذي تلقى فيه الكلمة وأسلوب إلقائها له دور كبير في كيفية تلقي المستمع لها.

أخي الكريم أحمد سيف

بالنسبة للبرمجة اللغوية العصبية فهي تحوي الغث والسمين؛ وفيها النافع والضار ..

ولكن عن نفسي استفدت منها في بعض الأمور الحياتية, ولا أنصح بالتوغل فيها إلا لمن عنده خلفية شرعية ولو بسيطة ..

وبالنسبة لموضوعنا وهو كلمة (الله يهديك) فأخشى أن يكون سبب رفضها -عند بعض الناس- هو الغرور (أكرر عن بعض الناس)

والمفروض إن المؤمن يعترف دائما إنه مقصر، فلما يقال له كلمة كهذه ولو ممن هو أقل منه يتقبلها

وقد أعجبني جدا رد الإمام أبي حنيفة رحمه الله، حينما جاء إليه رجل غير معروف فقال له: اتق الله يا أبا حنيفة!!

فما كان من أبي حنيفة رحمه الله إلا أن انتفض (من خشوعه) وقال: جزاك الله خيرا، ما أحوج الناس كل وقت إلى من يقول لهم مثل هذا.

وعن نفسي لو قال لي أحد (مهما كان): ربنا يهديك

فسأقول له: جزاك الله خيرا..

الأخت الفاضلة لولا:

كلامك جيد , لكن لا أرى أي مانع من أن نمزج بين مناقشة الأفكار بجدية مع بعض الشخصنة التي قد تفيد في الموضوع لمعرفة تأثير هذه الكلمة من الناحية النفسية على الآخرين..

على فكرة..

حضرتك ما جاوبتيش على سؤالي؛ مع إني وضعت في خيارين بس (نعم - لا)

ممكن تستعيني بصديق لأني مش هاينفع أحذف إجابتين

[الحياة حلوة]

وبالنسبة لموضوعنا وهو كلمة (الله يهديك) فأخشى أن يكون سبب رفضها -عند بعض الناس- هو الغرور (أكرر عن بعض الناس)

انا بقى شايفة ان المغرور هو اللى فى كل مواضيعه بيفتح المواضيع للنقاش ومع ذلك هو مصمم على رايه وبيهاجم الناس ده مايبقاش عنده غرور وبس لا كمان يبقى متكبر وعمره ماهيتعلم مهما كان سنه يا ساااااااااااااااااااااااااااتر ربنا يهدى

تم تعديل 19 فبراير 2009 بواسطة الحياة حلوة

[الباشمهندس ياسر]

المفروض لما حد يقولك ربنا يهديك ==تقوله ايانا واياك

لكن الرد ده لما يبقى اللى بيقولهالك بنى ادم محترم وبيقولهالك بطريقة تحسسك انه بيدعيلك

انما لما تتقالك بطريقة المتعااااااااااالم

فاعرف انك قدام نسخة مصغرة من ابو جهل و ام جهل وجهل نفسه

و متردش عليه اساسا لانه ميستاهلش انك ترد عليه

[newcomer]

أهلا بالأخت الفاضلة نيو قمر

الكلام ده جيد وقرأت عنه في علم البرمجة اللغوية العصبية

فعلا السياق ونبرة الصوت وطريقة العرض هي اللي بتفرق

لكن المشكلة اللي ملاحظها إن مجرد الدعوة نفسها (لو شيلنا كل الملابسات الأخرى) فيه ناس كثير بيزعلوا منها

شكرا لك

أهلا بحضرتك يا استاذ سهل......و مرسى على الوردة

بس فيه لبس حصل فى كلامى حابه اوضحه

انا كنت اقصد علم المعنى ال semantics فى علم اللغويات الlinguistics

مش ال Neuro-Linguistic Programmingالبرمجة اللغوية العصبية

و لو ان العلوم دى متداخلة شوية .....

لفت نظرى ان حضرتك ما بتشجعش دراسة البرمجة اللغوية العصبية الا للى عنده علم

بالعلوم الشرعية ؟؟؟؟؟؟ يا ترى ليه؟؟ ايه الرابط بين الاتنين ؟؟

[newcomer]

بالنسبة للبرمجة اللغوية العصبية فهي تحوي الغث والسمين؛ وفيها النافع والضار ..

ولكن عن نفسي استفدت منها في بعض الأمور الحياتية, ولا أنصح بالتوغل فيها إلا لمن عنده خلفية شرعية ولو بسيطة ..

وبالنسبة لموضوعنا وهو كلمة (الله يهديك) فأخشى أن يكون سبب رفضها -عند بعض الناس- هو الغرور (أكرر عن بعض الناس)

والمفروض إن المؤمن يعترف دائما إنه مقصر، فلما يقال له كلمة كهذه ولو ممن هو أقل منه يتقبلها

لو حضرتك تقصد ان اللى بيزعل ده ....عنده غرور بعلمه و دينه

و مش محتاج ( و العياذ بالله) لمزيد من الهدايه......

فامعتقدش ان فيه مصرى طبيعى هايكون ده سبب زعله

لكن لو حضرتك تقصد ان اللى بيزعل عنده غرور ...انه شايف ان اللى بيدعيله اقل منه

فبيتهيأ لى انه بيزعل ان اللى بيدعيله بيوحي له انه بيتقى الله و بيخشاه اكتر منه

يعنى كأنه بيبص له من فوق ....... ( اكيد حاجة تغيظ !!)

بالمناسبة ....افتكرت القصة اللى بتحكى ان الحسن و الحسين رضى الله عنهم

لما شافوا راجل كبير بيتوضأ غلط ......

بكل ادب و تواضع قام احدهم بالوضوء و كأنه بيعلم اخوه....

من غير تعالى .....و لا تكشير فى وش الراجل.....و لا استفزاز

اكيد ما فيش حد هايزعل لو كلنا تأكدنا اننا مش عارفين مين فينا احسن من مين

و مين فينا دعوته مقبولة و لا لأ ......و ان احنا اكيد كللللللللننننااااااااااا

محتاجين الهداية من الله ....

اللهم اهدنا فيمن هديت و عافنا فيمن عافيت.......امين

[سهل جدا]

بس فيه لبس حصل فى كلامى حابه اوضحه

انا كنت اقصد علم المعنى ال semantics فى علم اللغويات الlinguistics

مش ال Neuro-Linguistic Programmingالبرمجة اللغوية العصبية

و لو ان العلوم دى متداخلة شوية .....

لفت نظرى ان حضرتك ما بتشجعش دراسة البرمجة اللغوية العصبية الا للى عنده علم

بالعلوم الشرعية ؟؟؟؟؟؟ يا ترى ليه؟؟ ايه الرابط بين الاتنين ؟؟

شكرا أستاذة نيو قمر على توضيح المعلومة

واللي خلاني أحذر من العلم ال (N . L . P) بالرغم من إعجابي الشخصي بي إلا إني وجدته كثيرا ما يقدس النفس لدرجة خرافية, بل ويجعلها تتجاوز الحد الطبيعي اللي ربنا خلقنا عليه ..

مثال:

أكيد تعرفي حضرتك كتاب اسمه: (السر) اللي انتشر انتشار واسع جدا اليومين دول

أهو دا كله قايم على فكرة تسمى قانون الجذب, وكاتبة الكتاب اللي مش فاكر إسمها كانت بتقول: إن الإنسان بأفكاره بيجتذب الخيرات إلى حياته عن طريق أفكاره التي تتشكل على شكل موجة كهرومغناطيسية ... وهذه الموجات تجذب إليه الخير ... إلى آخر هذا الترهات

ويوجد كذلك أمثلة كثيرة في هذا العلم فيها مخالفات عقدية.. عشان كده قولت يفضل إن اللي يدخل فيه يكون عنده خلفية شرعية ولو بسيطة عشان يعرف يفرق بين الحق والباطل..

و مرسى على الوردة

انبسطي من الوردة .. :sad:

طيب خذي حضرتك 3 وردات كمان

يعني هو أنا دافع حاجة من جيبي :wub:

تم تعديل 20 فبراير 2009 بواسطة سهل جدا

[MZohairy]

ربنا يهديك يا سهل جدا على الموضوع ده

[لولا]

ربنا يهديك يا سهل جدا على الموضوع ده

بيقولوا دعوة الجماعه ان شاء الله مستجابه ..

ربنا يهديك يا سهل جدا يارب .

[لولا]

حيث ان الموضوع فى قسم هدى الإسلام ..

احببت ان اضيف هذا الدعاء الجميل

اللهم اهدينا في من هديت وعافينا في من عافيت وتولنا في من توليت وبارك لنا فيما اعطيت وقنا واصرف عنا شر ما قضيت واغفر لنا يا مولانا ذنوبنا وتقصيرنا واجعلنا من عبادك المخلصين

آمين آمين آمين يااااااااااااااااارب العالمين

دفعنى الموضوع للقراءه عن الهدايه ووجدت ادعيه جميله وتشعر معها براحه عميقه وصادقه .. وحتما تدوالها وان يدعو لك بها احد امر جدا طيب .

اخى سهل .. لا اقول شكر ولكن وكما الموضوع ..

ادعو لك الرحمن ..

هداك الله اخى سهل .

تحياتى

لولا

[سهل جدا]

ربنا يهديك يا سهل جدا على الموضوع ده

جزاكم الله خيرا أبا لؤي

ربنا يهديك يا سهل جدا على الموضوع ده

بيقولوا دعوة الجماعه ان شاء الله مستجابه ..

ربنا يهديك يا سهل جدا يارب .

مرسي خالص مدام لولا

بس مش لايقة علي مرسي دي :)

خلاص هأقولك: جزاكم الله خيرا

وأبشرك أنتي والأخ الفاضل زوهيري بهذا الحديث الشريف:

قال صلى الله عليه وسلم: (مَا مِنْ عَبْدٍ مُسْلِمٍ يَدْعُو لِأَخِيهِ بِظَهْرِ الْغَيْبِ إِلَّا قَالَ الْمَلَكُ وَلَكَ بِمِثْلٍ)

[لولا]

ربنا يهديك يا سهل جدا على الموضوع ده

جزاكم الله خيرا أبا لؤي

ربنا يهديك يا سهل جدا على الموضوع ده

بيقولوا دعوة الجماعه ان شاء الله مستجابه ..

ربنا يهديك يا سهل جدا يارب .

مرسي خالص مدام لولا

بس مش لايقة علي مرسي دي :)

خلاص هأقولك: جزاكم الله خيرا

وأبشرك أنتي والأخ الفاضل زوهيري بهذا الحديث الشريف:

قال صلى الله عليه وسلم: (مَا مِنْ عَبْدٍ مُسْلِمٍ يَدْعُو لِأَخِيهِ بِظَهْرِ الْغَيْبِ إِلَّا قَالَ الْمَلَكُ وَلَكَ بِمِثْلٍ)

انتا كمان مليون ميرسي ياسيدى ,,

وخد بوكيه الورد دا

وممكن لوحبيت تدعى لحد تستعمل دعاء الهدايه الجميل اللى كتبته واللى كلنا اكيد نعرفه واللى بيكون اثره رائع فى النفوس ولا يمكن بحال ان يزعج

المتلقى .

واللهم اهدنا فيمن هديت وعافنا فيمن عافيت يارب .

تحياتى

لولا

[مسافر]

شوف يا سهل جدا باشا

أنا عملت نفسي ناصح وحبيت أخرج من المطب ده

عملت إيه

قلت

ربنا يهدينا ويهديكم

برضه زعلوا مني

ليه؟؟؟؟؟؟؟؟

ليه تدعي لنفسك قبل ماتدعيلنا

وعجبي

[الدكتورة أم أحمد]

شوف يا سهل جدا باشا

أنا عملت نفسي ناصح وحبيت أخرج من المطب ده

عملت إيه

قلت

ربنا يهدينا ويهديكم

برضه زعلوا مني

ليه؟؟؟؟؟؟؟؟

ليه تدعي لنفسك قبل ماتدعيلنا

وعجبي

سبحان الله أنا عملت مثلك أخي مسافر لأن هذا من هدي الرسول ولأن نفسي أولى مني بالبر( فقلت أسأل الله لي ولكم الهداية)راح واحد منهم (أقصد اللي بيزعلوا)قال على سبيل الغمز اللمز: واخد بالك بتدعي لنفسها الأول !!!!!!!!! على أي حال ممكن يكون الزعل بسبب السياق الذي قيلت فيه والأسلوب الذي قيلت به ، والدعاء للنفس معه هو المخرج واللي يزعل بعد كده لا أجد له حل

وربنا يهديك يا أستاذ سهل جدا وتبقى سهل من غير جدا

تم تعديل 24 فبراير 2009 بواسطة الدكتورة أم أحمد

[Amr Assad]

لا استطيع قراءة الموضوع

[سهل جدا]

وربنا يهديك يا أستاذ سهل جدا وتبقى سهل من غير جدا

آمين وإياكم جميعا وأولاد حضرتك بإذن الله والأخ مسافر كمان

لكن بالمناسبة البداية بالنفس في الدعاء بالهداية بقول: (ربنا يهدينا وإياكم) فيه نوع من التواضع

يعني كأن القائل يقول: أنا أحوج إلى طلب الهداية من طلبها لغيري لأني مقصر

فمن المفروض إنها ما تزعلش حد خالص , إلا إذا كان هو كاره للهداية نفسها ..

وربنا يهدينا جميعا لما يحب ويرضى