السلام عليكم من كنـدا - 1 - نتعاون لنفهم الدنيا اكثر

[Kleobatra]

أخي الطفشان

اوافقك 100% على ان السكن في الاحياء الفقيرة - تظهر بها هذه الاشياء.  وهذه النصيحة اقدمها لمن اراد ان يهاجر - ان يكون لديه دخل محترم ويستطيع ان يسكن في مكان جيد - لآنه ضروري جدا للأبناء والتي تؤثر على نوعية الاصدقاء والطلبة في المدارس .

اخي - حكى لنا امام المسجد قصة احد ائمة المساجد في امريكا والذي تركه ابنه ولم يعد يصلي معه وذهب . وقال لنا ان الدين هنا بالنسبة للأولاد هو اختيار - وطبعا للآبناء الحرية التامة والتي تكفلها لهم الدولة والقانون . ونحن نربي اطفالنا كما تم تربينا - بالرغم من اختلاف البئيتن . المهم - لا ادري لماذا اشعر بانك مطمئن وانه ليس هناك خوف - بالرغم من ان المخاطر كثيرة - وخصوصا في ظل عدم وجود جالية اسلامية قوية تحتضن هؤلاء الابناء وخصوصا في كندا .

(Edited by Kleobatra at 10:55 am on Aug. 30, 2001)

[NonSuperior]

مراسلات ممتعه جدا للسيد فرى و باقى الاخوه الافاضل :) انا تقريبا فاتحه بقى من الانبهار بما يحكيه السيد فرى و ده جايز لان كل ما يحكيه وردى و تقريبا زى الحلم :) انا اول مره فى حياتى اسافر بره مصر كانت من اسبوعين بس :) وتقريبا انا الوحيده اللى فى الشارع اللى ماكنتش بامشى على الرصيف لانى مش متعوده خالص على الموضوع ده فى مصر :) ولقيت صعوبه شويه فى الالتزام بالحكايه دى :) ويا سلام باه اما شفت الاتوبيس واقف على المحطه فى يمين الشارع و مستنى الركاب مش زى عندنا يفضل يجريهم وراه اما ينقطع نفسهم :) فعلا كنت منبهره للغايه مع انها امور مفترض انها بسيطه جدا :) انا فعلا باتعب اوى اما اقرا الحاجات اللى تعقد دى :)

[semsemah2000]

عزيزى فرى كفاية كلام عن كندا و نظام كندا و الناس المحترمين فى كندا أحسن العين وحشة و الناس اللى بتعانى هنا كتير !!!!! و ياريت تجيب حتة خشبة جنب الجهاز و تمسكها و انت بتكتب و جتنا نيلة فى حظنا الهباب - على راى عمك السماوى -

[freefreer]

الأخوات العزيزات نان سوبريور و سمسه2000 شكرا على مداخلتكما الجميلتين و انا بمنتهى الصراحه اقصد ان اذكر الناس بما يعيشون فيه و بم المفروض ان يعيشوا فيه .. بعدين زمان كنت بتمنى حد يحكيلى بالتفصيل عن الحياه فى هذا القطاع من الدنيا و لم اجد .. لذا فانا اريد تعويض ذلك لأخوانى و حبايبى و حته من قلبى من باب المعرفه على الأقل .. الأخت سمسه يحضرنى مثل

" حسدوا الغجر على ضل الشجر "  :)

و الى لقاء قريب نستكمل الحواديت .. :)

(Edited by freefreer at 8:15 am on Sep. 4, 2001)

[الطفشان]

الاخ فري فري

بالنسبة للتلفزيون في حاجة هنا في امريكا مش عارف ان كانت عندكم في كندا، هي اسمها Parental Control or V-chip

دي عبارة عن تكنولوجيا جوة التليفزيون و يصاحبها اكواد معينة في الارسال، يمكن ان تبرمجها بحيث انها تمنع البرامج اللي انت تحددها

دة يعتمد على الارسال اذا كان فيه الخاصية دي و الا لا، و التليفزوين فيه الميزة دي و الا لا

و طبعا بتعتمد على ال ratings بتاعة هيئات تصنيف الافلام و البرامج، يعني مقبول عند الامريكان ان الاطفال يشوفوا بنات في مايوهات بيكيني مثلا، لكن عندنا لا، و بالعكس افلام الاكشن بيعتبروها عنيفة و عندنا مش مشكلة ان الاطفال يشوفوها

فالموضوع مش حيمنع 100% من الاشياء التي تعترض انت و انا عليها، و لكن لو منع 80% فبرضه احسن من مافيش

http://www.brandsmartusa.com/new_tech/vchip.htm

الاخت كليو

حكاية اخذ الاطفال دي زي ما قلت موجودة هنا و في كندا، لكن دة استثناء، و دي غلطة بنقع فيها كثيرا كمصريين، ناخد الاستثناء و نعممه و نعمل منه قاعدة

موضوع تدريس ان الشذوذ مقبول، معناه ان التلميذ يتعلم ان هناك شواذ في المجتمع و يعيشون كما يشائون، و ليس حض الاطفال على الشذوذ، و الامر يرجع في الاخر على البيت ان يعلم الابناء ما هو الصح و ما هو الخطأ، فمثلا دين اغلبية زملاء الفصل ليس الاسلام، و على البيت ان يراقب باستمرار امر الدين، و هذا اتفقنا عليه، فيضاف الى هذا اعلام الطفل في البيت ان الشذوذ غلط

اما عن وجود اطمئنان و عدم خوف، فالموجود هو قلق و ليس خوف، و ليس ايضا اطمئنان مطلق، دة اسمه Risk و كل ريسك له Risk Management يعني طالما ان الواحد صاحي و الاسرة مترابطة و يمارسوا ما يقولوا من اخلاق و مبادئ و قيم و دين، و تسمع لابناءها في كل وقت،  و تحضهم على الصح، و تقوم بغسيل مخ مستمر مضاد للاعلام و المدرسة، فموضوع فساد الابناء بعيد مهما كانت البيئة، طالما البيت يربي صح

اعرف امثلة كثيرة من ناس مصريين و عرب و مسلمين عندهم بنات و تربوا على الفضيلة في وسط المجتمع الغربي، و من انحرفوا قلة قليلة جدا، فيجب ان يوضع الموضوع في حجمه الصحيح، و تعملي اللي عليكي و الباقي على الله

و حجم الجالية ليس هو محدد النجاح او الفشل، فهناك اماكن في امريكا هنا يحب الانسان البعد عن الجالية من كثر مشاكلها من نميمة و غيبة و خوازيق و حسد و مقالب، فالجالية لن تربي لك ابناءك

المهم البيت، ثم البيت، ثم البيت

[ragab2]

ياعم فرير

الرحمة حلوة

شوية شوية علينا خليها على جرعات عشان نستوعب

وفيه بعضنا قلبه خفيف ما يستحملش الانبهار

ناس من أمريكا وناس من كندا , بعد كدة هانوفاجأ باللى يكلمنا من فوق المريخ

وياريت تبعت لنا شوية كندا دراى من عندك أحسن ريقنا ناشف

وتسلم لنا ع الحاج عبد المتجلى

تحياتى

[NonSuperior]

والله يا استاذ رجب هو ده اللى كنت عاوزه اطلبه و بعدين لاحظت ان الاستاذ فرى بقاله مده مش بيحكى عن ارض الاحلام الجميله كندا قلت امرى الى الله :) ياللا يا اخ فرى فى انتظار المزيد من المداخلات الجميله :)

[Red Horse]

معليهش بجرب بس

[Red Horse]

أنا عضو جديد واتمنى ان يكون لى مكان بين هذه النخبة من المثقفين المصريين المغتربين  أثارنى حديثك العذب يااستاذ فرى عن كندا وكل الحكايات المشوقة التى  طرحتها وذكرتنا بواقعنا المرمرارة العلقم والذى عشنا ولازلنا نعيشه على امل ان يغير الله حالنا بعدما غيرنا مابأنفسنا والمناسبة انا مقدم على الهجرة الى كندا منذ عام وقد اخطرونى بالموافقة على طلبى ولازلت بانتظار الميديكال فورم وبعدها انشاء ربى  سأكون هناك فى خلال ستة أشهر لذا امل منك ان  تعطى لى بعض من خبرتك عند نزولك كندا لأول مرة خاصة اننى ايضا لااعرف احدا بكندا  وسأذهب انا وعائلتى المكونة من زوجتى وابنى وابنتى    ولكم الشكر

[ragab2]

أهلا بك يا أخى الريد هورس

ونقرأ لك دائما كل جديد ومفيد ان شاء الله

ولكن أمانة عليك لو نزلت كندا انشاء الله تبعت لنا شوية تراب من أرض كندا الحبيبة

كندا الشموخ والرقى

وأهلا بك فى منتدى الوفد العامر

[freefreer]

(Edited by freefreer at 8:45 am on Sep. 9, 2001)

[freefreer]

(Edited by freefreer at 8:47 am on Sep. 9, 2001)

[freefreer]

[

بسم الله الرحمن الرحيم .. اخوانى و حبايبي و حته من قلبي.. السلام عليكم و رحمة الله  و بركاته.. .

اعتذر لأنشغالى قليلا .. و مازلت مشغولا و لكن ارد اليوم ليظل حبل الود موصولا .. عزيزى الطفشان .. شكرا لك و هذه التكنولوجيا سمعت عنها زمان ايم الضجه اللى عملتها و اقرار الكونجرس لها .. ولم اسمع عن وجودها فى كندا .. فشكرا لك انك ذكرتنى بها لأخليها فى بالى ..و انا معاك فى موضوع اهمية البيت فى التربيه .. واذكر ان اليهود عاشوا فى جميع اصقاع العالم و لم ينسوا يهوديتهم .. على فكره احسان عبد القدوس تطرق لهذا الموضوع فى عدد من القصص مثل  "انا حره" او" فى بيتنا رجل" ..

اخى الحبيب رجب شكرا على مداخلتك و كندا "دراى" بتنشف الريق اكثر !! :) .. و الحاج عبد المتجلى بلغته سلامك و الراجل طار من الفرح و مش مصدق انك فاكره بعد المده دى كلها .. و بيرجوك تتصل بيه عن طريق الميسينجر ..   :)

الأخت نانسوبريور .. احنا تحت الأمر و امر الأمر كمان .. من عينيه الأثنين .. حاضر.:)

الأخ العزيز ريدهورس .. ياميت الف اهلا و سهلا بيك فى الوفد و كندا فى ان واحد .. و من هذه اللحظه و عد الحر دين عليه اعتبرنى اخوك فى الغربه .. و معاك لحظه بلحظه ان شاء الله .. و لو اخليت بعهدى اشتكينى لاخوانى و حبايبى و حته من قلبى اللى حضرتك و الأسرة الكريمه صاروا  اجدد اعضاء انضموا لهم ..موضوع الحضور مع الأسرة فى نفس الوقت يعتمد على كمية السيوله المتوفرة لديك .. تخصصك و مدى الأحتياج له .. سن الأولاد .. قدرة الزوجة و تخصصها لتعمل هى ايضا .. و كل هذا نناقشه على الأيميل ان شاء الله .. لآن فيه مشكله صغيره فى السكن محلوله ان شاء الله و ساكتب مداخلة عنها ..

و لكن فى كل الأحوال افضل .. ان تحضر اولا لوحدك حتى ولو لشهرين او ثلاثه .. و عند الوصول الى درجه محدده ممكن الأولاد يشرفوا بالسلامه .. و بعدين ما فيش داعى يتعرفوا على كندا و قت الثلج .. اوائل الصيف زى ما انا عملت تبين انه افضل حل .. و اهلا وسهلا بك مرة اخرى و اعتمد على الله سبحانه و تعالى ثم العبد الفقير الى الله ..:):)

اخوانى و حبايبي و حته من قلبي.. السلام عليكم و رحمة الله  و بركاته

[

(Edited by freefreer at 8:39 am on Sep. 9, 2001)

[sanyung]

Dear Mr. Free,

i would like to introduce my self , i'm egeyptian working in gulf arae for more than 10 years and last week i prepared my documents to apply for the Canadian Immigration Visa but yesterday u know what happened in USA ,and  now i'm afraid now that if i send my immigration papers they will be disregarded, so i would appreciate if u provide me with ur feedback regarding this matter to me e-mail SAMAYEM@BANAWIGROUP.COM

Thanks & Best Regards  

[freefreer]

عزيزى سانيونج

اهلا بك فى المنتدى و فى كندا على حد سواء

لا تقلق ان شاء الله .. توكل على الله و قدم ورقك ..الكنديون هم قوم متفتحى الذهن جدا .. ارجوا عدم التردد فى توجيه اى اسئله اخرى .. الرد عن طريق الأيميل ارجوا ان يكون قد وصلك .. تحياتى و السلام

[NonSuperior]

طيب ممكن نعرف ايه هى الشروط و المواصفات المطلوبه فى طالبى لهجره الى كندا؟ :) لو فيه موقع على النت يبقى فل جدا :)

[freefreer]

يا سلام يا اخت نانسوبريور .. غالى و الطلب رخيص .. الشروط عموما ان يكون تخصصك مطلوب فى كندا عموما .. معاك مبلغ ( او مقتنيات يمكن اسالتها ) يغطى نفقات ( المهاجرين ) فى حاله عدم استطاعتهم العثور على عمل لمدة سته اشهر ( لأنه يحق لك بعدها طلب مساعده حكوميه ) و بالتالى المبلغ يتناسب طرديا مع عدد المهاجرين ( شخص واحد - زوج - اسره .. الخ)

اذا كان لديك اقرب هناك يكون افضل .. ان يكون سنك مناسب .. السن الأصغر افضل .. يعنى 44 فيما فوق مش كويس .. عكس 30 مثلا مناسب جدا .. السفاره الكنديه بجاردن سيتى فى العمارة التى بها البنك ( اظن الأفريقى و لا حاجه زى كده ) ..ستجدى فيها الأبليكيشنز .. وكل حاجه .. و شرح كثير و اوراق للدجى و كذلك مواقع الأنترنت .. المعلومات لا تنتهى .. اجراءات الهجره تستغرق حوالى عام ..

و هذه المواقع تعطيكى بعض الأفكار

http://www.gc.ca/main_e.html

http://www.cic.gc.ca

http://www.tdsb.on.ca/

و انا بالأمانه ارحب بمساعدة الجميع الى النهاية و باقصى طاقتى .. و ارجوكى عدم التردد فى توجيه اى اسئله خاصة او عامه فى المنتدى او الأيميل .. تحياتى.

(Edited by freefreer at 3:50 am on Sep. 17, 2001)

[freefreer]

[

بسم الله الرحمن الرحيم.. اخوانى و حبايبي و حته من قلبي.. السلام عليكم و رحمة الله  و بركاته..

كنت قد وعدتكم بان اكتب عن موضوع السكن هنا فى تورونتو .. ولاية اونتاريو .. هنا مشكله .. حيث ان معظم المهاجرين يحضرون الى هذه الولاية .. و هذه المدينة بالذات .. و كانت القوانين هنا .. تمنع المالك من زيادة الأيجار فجأة .. و لكن بنسب محددة مئوية .. و هذا مازال موجودا .. ولكن كانت هناك قوانين اخرى تمنع المالك من طرد المستأجر اذا امتنع عن دفع الأيجار .. .. و هكذا بلطج الكثيرون .. حتى ثار الملاك .. و اخبرا بدأت القوانين تتعدل .. و مع هذا و مع زيادة الطلب على العرض .. فاصحاب العمارات صاروا يتدللون كثيرا قبل منحك شقه .. و هناك كثيرون يرفضون تأجير شقه لمهاجر جديد .. طبعا هم لا يذكرون هذا صراحة .. ولكن .. يطلبون منك تعبأة طلب سكن .. و فيه يسألون اسئله سخيفة من عينة .. كنت ساكن فين قبل كده .. بتدفع كام .. سيبت سكنك القديم ليه .. ما هو اسم و عنوان مالك سكنك القديم .. بتشتغل ايه .. مرتبك كام .. عندك رصيد فى البنك .. ما هو رقم الضمان الأجتماعى الخاص بك .. و بعضهم يطلب  اخر كشف حساب البنك بتاعك  .. وهكذا .. انا تغلبت على هذه النقطة بان سكنت بعبدا عن وسط المدينة .. ثم انى احضرت خطابا من شركة كنت اتداول معهم فى مشروع ما  .. ذو قيمة مالية كبيره .. يثبت انى بصدد افتتاح هذا المشروع .. فوافقوا فورا ..

بعض الأخوة اضطر الى ان يدفع 6 شهور مقدم ليثبت ان معاه فلوس كثيره .. .. و هكذا .. فان من يحضر الى هنا يجب اما ان يكون لديه معارف يساعدونه فى الفترة الأولى .. و اما .. ان يحضر بنفسه اولا اوائل العام .. و يوضب اموره و يستكشف البلد .. وبعدين يحضر الأولاد بعد شهرين ثلاثة حوالى مايو او يونيو .. يكون الجو اتعدل .. و يستغلوا الفترة من يونيو الى دخول المدارس فى التعرف على المجتمع الكندى و دراسة اللغه الأنجليزية ..

اسكن  فى عمارة 7 طوابق .. بها سكيورتى و الدخول و الخروج بالكارت .. و كاميرات المراقبة .. شقتي غرفتين و صاله .. و تم تجديدها بالكامل قبل ان ادخل اليها .. طلاء .. تغيير خشب الأرض و دهانه .. دواليب المطبخ .. ثلاجة كبيره بابين جديدة .. بوتاجاز 4 عيون كهرباء جديد .. الأيجار 865 دولار كندى شامل التدفئة ..

ادفع الكهرباء  .. حولى 30 الى 40 دولار شهريا ( فى الصيف .. لسه مش عارف حدفع كام فى الشتاء .. مع ملاحظة انى لا ادفع التدفئة ) ..التليفون 50 الى 60 دولار شهريا .. .. انا اشتريت احدث تليفون هنا .. بشاشة كبيره يتم تعديل ارتفاعها و انخفاضها .. ممكن تتوصل بالأنترنت علشان تشوفلك بريدك .. تعطيك اخر مكالمات و المكالمات التى جاءت و لم ترد عليها و توضح لك اذا كان لديك رسائل صوتيه .. و تكشف لك رقم المتصل و اسمه فى شركة التليفونات و اسمه عندك لو انك ضايفه على قائمة دليل تليفونك .. يحتفظ التليفون بحوالى 6 صفحات المكالمات الواردة السابقه .. و يمكن ان تطلب تفاصيل اى مكالمه ليعرض لك التاريخ و الساعة الخ الخ  و هناك صفحة اخرى للأرقام التى قمت انت بالأتصال بها .. غير الدايركتورى .. التاريخ يتم تحديثه مع كل مكالمة تصلك .. وهناك اختيار يسمح لشركة التليفونات بعرض اعلانات احدث  اخبارهم و عروضهم الخ الخ

طولت عليكم فالى لقاء قادم .. .... ..... ........

اخوانى و حبايبي و حته من قلبي.. السلام عليكم و رحمة الله  و بركاته

[

[Mike]

[Arabic]

أستاذ Free

تبدو المكانة الخاصة التي تحتلها في قلوب الأعضاء القدامى واضحة وجليه من الترحيب الحار الذي خصوك به مجرد رؤية اسمك علي الساحة مره أخري. وقد تأكد استحقاقك لمثل هذه المعزة الكبيرة بعد متابعتي لمداخلاتك المتعددة والتي تتسم بالأدب الجم والأسلوب الرشيق الشيق وروح الاصاله والشهامة المصرية المعهودة الممزوجة بخفه الدم المهذبة الراقية.

عموماً …. ربنا يديم المحبة والود بين كل الاخوة في هذا المنتدى العزيز.

واسمح لي أن أسألك, بناء علي خبرتك الطويلة في العديد من بلاد الله , عن اقتناعك الشخصي بمدي صحة العبارة  "في بلاد الغرب قد تجد المعيشة ولكن الفلوس صعبه, وفي دول الخليج تجد الفلوس ولكن المعيشة صعبه, وفي مصر مافيش فلوس و مافيش معيشة" !!

علماً باني اقدر انك ما زلت في مرحله"شهر العسل" مع كندا وقد يكون من المبكر إعطاء تقييم عام علي الاقامه في الغرب.

[freefreer]

اخى العزيز مايك .. شكرا يا اخى على الكلام الجميل الذى اتمنى انى استحقه فعلا .. و ياريت عندى المكانة اللى بيقول عليها  فى نفوس رواد المنتدى .. شكرا مرة اخرى

بصراحة انا كنت بابحث عن شيئ اخر تماما غير الفلوس و المعيشة .. اللى عشت ادور عليه .. و فى منتهى الضمأ ليه هو .. العزة الكرامة الحرية .. 48 سنه فى مصر - العراق - الجزائر - السعودية ثم الكويت .. مرورا على المغرب و اسبانيا و فرنسا و انجلترا و الأردن و لبنان ..  لم اجد ضالتى الا فى اشهر معدودة فى انجلترا و ايام فى فرنسا .. و فى الأخر هاجرت كندا .. و اشهد امام الله سبحانه و تعالى .. انى لم ارى السعادة الا هنا .. ولا حسيت بانسانيتى الا هنا ..  المسأله مش مسأله شهر عسل .. انا بعد وصولى الكويت بايام معدودة بدأت تسود الدنيا فى عينى و فى خلال شهرين تقريبا كانت الدنيا كثقب الأبرة الأسود فى عينى .. نفس المسأله فى السعودية شهرين و نصف .. ولأن فيه صراعات فى المؤسسة التى كنت بها صحيت يوم الصبح و حلقت دقنى و لبست .. و انا متجه للباب خبط .. فتحت لقيت ابن الكفيل بيقولى لم اغراضك طيلرتك بعد ساعتين .. و طلعت من المطار و الظابط بيسلمه شهادة بانى خرجت علشان يجيبوا غيرى ..

انا لى الأن اكثر من 8 شهور و شهر العسل شغال على ودنه ..

فلتحيا كندا .. و لتحيا الحرية و الديمقراطية .. افضل اتسول فى كندا ولا ابقى مدير عام فى بلادنا ..

هذا رأيى بصراحه و  شهادتى امام الله .. وربنا يجازيهم عنى و عن زوجتى و اولادى خيرا .. و من يصنع خيرا لابد يلاقيه ..

و الله اعلم