الحقوني بسرررررعة...

[بنت شعنونة]

عريس... دخلة الشهري 1500 جنيه فقط.. شقته في اقاصي بلاد المسلمين.. بيشتغل محاسب في شركة ادوية الصبح وبعد الضهر في مشروع اداوت طبيه بينه وبين جوز اخته (شاش وسرنجات وكدا)

عربيته نيقا.. الل هيا عربية الشركة اصلا.. جوز اخته في السعودية ف هوا اللي مسؤول عن المشروع هنا (المشروع دا عبارة عن مصنع صغير في شقة)

عصامي.. بنا نفسه ينفسه لآنه من عيلة متوسطة واصلهم صعايدة

عنده 3 اخوات واخين

البنات متجوزين و وولد في الخليج

من كلامه اول مرة دا شكله انسان عادي يعني لا ممتاز ولا قميء

العيوب....(من وجهة نظري)

عاوز يتجوز دكتورة!!! عشان كان نفسه يدخل طب..+ كان قاري فاتحا واحدة دكتورة وعجبة استايل الدكاترا + شغلة كله تبع الطب واهي ممكن تفيده ( دا كان كلامه)!!

-

اخويا النونو كان معايا.. ولا حظنا انه لا كلمه ولا سلم عليه ولا حتىىىى فكر يهزر معاه؟؟ بالعكس كان قرفان منه جدا؟؟

- ماكانش لايس ساعة ولا حاطط برفان ولبسه كان عادي جدا + شوز معففففففنه ولا اكنه جاي يشوف عروسة!!

-لما سالته اهم مواصفات الزوجة ايه.. اول كلمة قالها....تكون مش بخييييلة؟؟؟؟!!!

لدرجة اني صعقت من الكلمة؟؟

وقال يكون مخها كبير يعني احس اني بكلم نفسي!!

- السؤال دلوقتي

هل 1500جنيه تفتح بيت زوجية في عيشة كريمة يا اخوانا؟

وايه مش بخيلة دي؟؟؟؟؟؟ انا قلقانا منها اوي.. حاسا انه داخل على طمع برضه..

دبروووووووني عشان هوا ها يتكلم مع بابا النهاردا وعاوزا اخد قرار اديله فرصة والا امشيةه والا ايييه؟؟؟

[إبن مصر]

ربنا يوفقه...... مع حد تانى غير بنتنا شانا ...

لأنك طلبتى اجابه سريعه ..

اما الاسباب ففى العدد القادم ..

عمو ابن مصر

[بنت شعنونة]

والله يا ابن مصر انا حاسا اني ها اخلي بابا يقوله كدا فعلا كمان شوية..

مخي قرب يضرب من كتر التفكير من امبارح للنهاردا...

[achnaton]

عريس... دخلة الشهري 1500 جنيه فقط.. شقته في اقاصي بلاد المسلمين..

- ماكانش لايس ساعة ولا حاطط برفان ولبسه كان عادي جدا + شوز معففففففنه ولا اكنه جاي يشوف عروسة!!

-لما سالته اهم مواصفات الزوجة ايه.. اول كلمة قالها....تكون مش بخييييلة؟؟؟؟!!!

لدرجة اني صعقت من الكلمة؟؟

وقال يكون مخها كبير يعني احس اني بكلم نفسي!!

- السؤال دلوقتي

هل 1500جنيه تفتح بيت زوجية في عيشة كريمة يا اخوانا؟

وايه مش بخيلة دي؟؟؟؟؟؟ انا قلقانا منها اوي.. حاسا انه داخل على طمع برضه..

يادى المصيبة .. إيه ده يا بنتى .. وجالك نفس تتكلمى وتكتبى بعد أن استنشقت هذا الصنف من البرفانات ؟؟؟

والنبى لو حكمت .. تقعدى من غير جواز ..!! على جثثنا جميعا .. واعتقد أن الأخ حشيش .. او وايت هارت .. ممكن يلقنوه درس .. فى إحترام شعور الغير .. 

لا .. تتعجلى شجرة الحياة فتعطيك ثمار غير ناضجة .. وقريبا تلتقى بمن تسعدى به .. ويسعد بك ... 

اخناتون المنيا

دبروووووووني عشان هوا ها يتكلم مع بابا النهاردا وعاوزا اخد قرار اديله فرصة والا امشيةه والا ايييه؟؟؟

[هشام عبد الوهاب]

اعمليله شاى بزيت الخروع واقفلوا الحمام بالترباس.

[بنت شعنونة]

والله يا عمي اخناتون.. انا خايفة اكون بظلمة او اكون مفترية عشان كدا قلت اسال

لآنه لجل الحق في لمقابلة الأولى دي انا ما طلعتش بحاجا وحشة من كلامه او تصرفاته غير الكام ملاحظة اللي انا لاحظتهم دول وكلهم تقريبا بيصبوا في خانة واحدا (انه عاوز عروسة مستريحة وتريحه!!)

وبرضه لجل الحق هوا قال حاجات كويسة عن نفسه.. زي انه بيساعد ابوه ماديا.. وانه هوا اللي عمل نفسه.. وهوا اللي شايل شغل الشركة بتاعته دي

وانه كان بيطلب من خطيبته الدكتورة سابقا انها تكون رحيما بالناس

خصوصا انها كانت بتحكيله ازاي كانت بتزعق لهم وكدا

لكن كله كوووووم ومش بخيلة دي كوم تاني.. "وش واحدا مفلوقة من العياط"

و والله انا ما مستعجلة على جواز ولا بتاع

المهم ان كدا مش ظالماه ..صح؟؟؟؟!!

يعني العريس دا لو اتقدملكم... ها ترفضوه؟

استاذ هشام... انا بقول عاوزا اعرف اعمل معااااااه اييييه

مش ازاي اخلية يقييييييم في حمام بيتنااااااا "وش ميت ضحك"

[achnaton]

شوفى ياستى .. أنت تاخديه من إيده بأديك الشمال .. وتقفلى انفك باليمين .. وعلى أقرب أخزخانه .. تجيب زى ما بيقول الأخ الأستاذ هشام قزازة زيت خروع .. ما لقتيش .. خدى شوية جاز من البت فجلة بتاعة الخضار على الناصية .. وكانو زمان بيستخدموا الجاز كمسهل .. وأسقيه كوباية الشاى وانت بتقولى .. يا مسسسسسسسسسهل

حيمشى من نفسة ..

أنت فين يا حشيش ؟؟

اخناتون

[Spider]

عربيته نيقا

متهيألى قصدك تقولى ناقة ...صح؟

معقولة فى حد لسه بيستخدم الناقة لحد دلوقت

(وش غبى أوى)

[بنت شعنونة]

هوا ما فيش ولا كلمة بتعدي منك كدااا يا سبيدرررر!!!!

"وش مفرووووس"

كله بيلزق في الشبكككة عندك لييييييه "وش ميت ضحك"

انا قصدي عربية نيييييفففففاااااااا

تسمعوا عنهااا دييي؟؟

اه نسيت اقولكم

الراجل عنده 35 سنة

وبابا ها يقابلة بكرا عشان يشوفوه ويقول رايه فيه ..."وش محتارر خالص ياربي "

[se_ Elsyed]

لقد حان الوقت إني أتدخل بكل تقلي ..

شوفي يا شعنونة يا بنتي ( وش واحد عامل فيها أبو العلا البشري ) الجواز مش برفان وواحد لابس جزمة ملمعة ،

أنت ماقولتيش حاجة عن اخلاقه وتدينه وسمعة عائلته وطيبعة العلاقات الأسرية داخل هذه العائلة ..... كل اللى قلتيه حاجات سطحية .!!! أيه يعني الراجل قالك أنه نفسة زوجته ماتكونش بخيلة .. معنى كده أنه لا يحب البخلاء فبالتاكيد ممكن يكون كريم .

- لا تتوقعي أن تجدي فى ردود أى حد من أخواتك بالمنتدى الحل المفيد والقاطع لك .. فإنت ووالدك وحدكما من تستطيعا أن تحكما على الموضوع بشكل عام وذلك من خلال التعامل معه وفهم طباعه ،

وبعدين عرفتي منين أنه داخل على طمع يا شنشن ؟ هو مش فيه حاجة أسمها إتفاق رجاله فى أول الخطوبة يعني هو يقعد مع والدك ويتفقوا هو عليه أيه وانتوا عليكم أيه .. صح ؟

نقطة تانية ... هل قولتي له أنك هاتشتغلي بعد الزواج ؟ دي نقطة مهمة جداً علشان تحددوا طبيعة دخلك المادي من مهنتك هاتتصرفي فيه إزاي .

هذا والله ولي التوفيق.

مع تحيات س س المأذون الشرعي لمنطقة مصر الجديدة وبولاق الدكرور

[بنت شعنونة]

كلامك من كلام بابا يا سي السيد :((

عشان كدا هوا طلب انه يقابله وقالي نظرة الراجل غير نظرة البنت

انا ما اعرفوش اصلالالالا ولا بابا

دي جوازة صالونات واحد بيدور على عروسة فناس دلته علينا

يعني ماحدش يعرف التاني خالص "وش قلقان"

وبالنسبة لموضوع الشغل هوا عاوز مراته تشتغل وانا عاوزة اقعد في البيييييت اصلا (ما انتوا عارفيييييين اللي فيها وحبي الفظيييع للطب)

يجوز مخاوفي مالهاش اساس.. انما مجرد الربط بين كلمة مش بخيلة وانوا عاوز مراته تشتغل وانه ساب خطيبته لآنها كانت بتحب المنظرة..

قلقني حبتين....

ملحوظة على الهامش..

(في حاجا مرعببببببة حصبت من شوية)

بعتلي مسج بتقول..

انها طب للقلوب

وفيها سر الغيوب

انها كلمة لا اله الا الله

!!!!!!!!!!!!!!!

بعدها اتصل وما اتكلمش بس كنت سامعا طقطقت كي بوووووورد!!!!!!

بسم الله الرحمن الرحيم

يالهوي يطلع من اعضاء المنتدى

مش انا يا بييييييييه مش انااااااا

انصررررررف انصررررررف

[Scorpion]

شانةيا ست الكل...

أنتي فعلآ محتاجة رأيينا...أعتقد انك بالفعل أخذتي رأيك بالرفض التام.. و محتاجة شوية تشجيع... و كما هو واضح الجميع في صفك.. و الأخ طالب القرب قوليله طلبك مش عندنا...

نصيحة أخوية يا شانا.. لأي طالب قرب في المستقبل أول شرط أنه يكون عنده كومبيوتر و تخليه يقرا مداخالاتك علشان يعرف انتي مين... و أيه اللي حيستناه بعد الجواز...

اما بالنسبة لأقتراح هشام عبد الوهاب

اعمليله شاى بزيت الخروع واقفلوا الحمام بالترباس

معلهش ماينفعش.. أنا لسه جوه من تحت راس لانسلوت

[ragab2]

قرأت أول وصلة

بصراحة ردودة غريبة بالنسبة لراجل

[الطفشان]

بصي يا شعنونة

من اول جلسة ما حصلش قبول

و لذلك كنت اميل الى القول ارفضيه و خلاص

و لكن هل جلسة واحدة كفاية؟

ماتخليش الوالد يدي كلمة

و خليه يقول انكم تتقابلوا كام مرة كمان قبل اي قرار

و شوفي ايه الانطباع من المقابلات التانية، يمكن حاجة تقول آه صريحة او حاجة تقول لأ صريحة

بدل الكلام المبهم اللي ما اتفهمش من اول مرة يكون قصده كويس منه

[shakoosh]

بصراحة الأخت شعنونة عندها حق ....يعنى واحد رايح يخطب أو يشوف عروسة المفروض أن يكون متأنقا ..أو على الأقل يبدو إهتماما بمظهره !!

صفة البخل هى فى الغالب صفة خاصة بالرجال لأنه غالبا الذى يحمل المال..و صفة التبذير فى الغالب صفة خاصة بالنساء لأنهن غالبا يستولون على مال الرجال و هاتك يا بعزقة !!!

و لذلك عندما يذكر كلمة بخيلة فهى ليست فى موضعها....و أعتقد أنه يعنى أنها يجب أن تعمل و تتعاون معاه ماديا..لكن الواضح أنه مدب فى إستخدام الألفاظ و التعبير عما يريد!!

[بنت شعنونة]

اللي بيتظلم بيخاف يظلم

وانا دايما الشكل يظلمني "وش طفلة بريئة"

فعشان كدا خايفة اظلمه

و والله يا سكوربيون انا مش واخدا قرار الرفض ابدا

بالعكس انا خرجت من اللقاء زي ما دحلت

يعني لا موافقة ولا رافضة

انما زي ما قال د.رجب و د.شاكوش انها ردود غريبة من راجل

فنورت عندي لمبة حمرا انا متعقدة منها قبل كدا مييييييت مرة اصلا

ف والله انا بحاول اراعي ربنا على قد ما اقدر في التعامل مع الناس

ويا عم الطفشان بابا كان ناوي على كدا فعلا

عموما هما ها يتقابلوا بكرا بالليل وانا فهمت بابا النقطة اللي قلقاني

واما اشوف قرار بابا ها يكون ايه بالضبط

وربنا يستر

مراسلتكم من قلب الأحدااااااث شعنونة المخطوفة "وش اصفر"

[الطفشان]

لو هو بخيل

ليه قال مش عايز واحدة بخيلة؟

صح يجوز مدب و تنقصه اللباقة

بس في ناس مدب قلبها ابيض قوي

احسن من اللي بيعرف يرسم و يتمحلس و هو ثعبان من جوة

و صحيح الاهتمام بالمظهر شئ ينقصه

و لكن دي مش نهاية العالم

حتة انا عايز دكتورة دي غريبة شوية

على العموم تأني في القرار

من باب تديله فرصة برضه و العدل كويس

[Falcon Egypt]

بسم الله الرحمن الرحيم

الاخت شعنونه

تحياتى لك. انا اضم صوتى للاستاذ الطفشان حيث ان مقابله واحده ليست بالضروره كافيه لاعطاء قرار نهائى اتركى السيد الوالد يقابله وكونى مندمجه فى الموضوع لانه يخصك فى الدرجه الاولى ولكن عزيزتى انصحك باْنك لاتقطعى خطوط الموده من البدايه الا اذا كان المتقدم مش مقبول شكلا وروحا وطبعا.

وقد يكون هذا الشخص غير مناسب وهذا ماسيتضح بعد مقابلته والحديث معه وايضا ياعالم يجوز ان يكون هذا الرجل السبب فى سعادتك فمن يدرى؟

انا شخصيا لا احب المراْه البخيله وهذا ليس معناه اننى انظر الى مادياتها .فمن منا يحب الانسان البخيل سواء كان رجل ام امراْه ؟. لكن يبدو ان المتقدم اساء توصيل المعلومه وخانه التعبير. اتركى الموضوع مفتوح

ومافيش شك ان السيد والدك سيعطيكى انطباعه عن المتقدم وسيكون الاقرب الىالصواب فلن يوجد من يهمه امرك مثله .

شوفى يا شعنونه منذ سنتين زارنى صديق من مصر ومعه افراد عائلته وكان يود ان يستقر فى امريكا. وبحمد الله تمكنت من الحاق الاولاد بالمدرسه ومن خلال العلاقات الطيبه مع بعض الناس الطيبين وجدنا فرصه عمل لم يكن يتوقعها وخاصه انه لايحمل الاوراق وكانت زوجته فى منتهى السعاده ومكث عندى ثلاته اشهر كنت سعيدا

بذلك لانى اعيش بمفردى فى منزل مكون من دورين وكنت قد اشتريته قبيل قدومهم مباشره فملوءا على البيت واحسست بروح الاسره ودفئها. وانا احبه لانه جعلنى التزم بالصلاه بعد ان كنت اصلى فقط ايام الجمع والمناسبات وفى مره اخذته لنصلى العشاء فى احد المساجد الهادئه وفى اثناء السجود سمعته يقول بعض الكلام الطيب واتذكر منه فقط انه قال ربى ان كان فى وجودى انا وزوجتى واولادى فى هذا البلد خيرا فوفقنى اليه واذا كان هناك شرا لااعرفه ومعصيه لك فعرقل ولاتوفق فيما نسعى اليه.

تعرفى ياشعنونه بالرغم من حرصى انهم يقعدوا وتمسكى بهم لاننى

ارتبطت بالاولاد جدا وتحول البيت الى جنة من خلال بعض اللمسات

البسيطه التى وضعتها السيده زوجته وهى ماهره جدا عن حق حتى الحديقه تغيرت واصبحت غير التى اعرفها فالمراْه فعلا هى روح البيت ومع ذلك لن تصدقى ماحدث بعد ذلك وبدون تفاصيل فقد اجتمعت عناصر الدنيا كلها على ان يغادروا الولايات المتحده ولم يكن لهم اي نصيب ابدا ان يستقروا بالرغم من كل ماسبق من بدايه حسنه فانا اعرف ناس جاءت واخذت حجره ونام الجميع على الارض فى عز البرد حتى وقفوا على ارجلهم وابتسمت لهم الدنيا اما اخوانا فقد ذللت كافه العقبات من سكن ممتاز وعمل ممتاز و مدارس و...و...ًمع ذلك رجعوا الى مصر..

طبعا الله تعالى اعلم بما كان سيحدث من شر لهذه الاسره فيجوز ان دعاء الرجل الطيب قد استجاب . فادعى ربك وقولى يارب ان كان لى فى موضوع الجوازه من عبدك فلان خير لى ورضى لك فثبته ووفق فيه,وان كان هناك شرا لااعرفه فلا توفقنى اليه وانت من يعلم من خلق وانت اللطيف الخبير.

فموضوع الاستخاره فى مثل هذه الامور المصيريه مستحبه

والله المستعان

[صعيدي]

بدون تكرار ما قاله الاخوة

لما قال مبيحبش البخيلة ليه اخذتيها من الناحية المادية مش ممكن يكون يقصد انه مبيحبش البخيلة فى عواطفها

كل الرجالة و انا اولهم لا نحب الستات البخلاء فى عواطفهم

بالنسبة للمظهر ده ممكن يبقى دور الزوجة فى المستقبل فى تاحفاظ على مظهر و هندام زوجها

حاجة تانية انتى متكلمتيش عن درجة تدينه لان دى نقطة هامة لو هو بيتقى الله فى عمله وفى حياته هيحافظ عليكى و يتقى الله فيكى

وفى النهاية اضم صوتى للاخوة اللى قلوا مقابلة واحدة لا تكفى لا بد من مرة تانية بس فى البيت برضه او عند أقارب

و كمان صلاة الاستخارة دى مهمة جدا جدا

وربنا يوفقك

[kokowawa1979]

الدكتورة شنشن كتبت :

العيوب....(من وجهة نظري) 

عاوز يتجوز دكتورة!!! عشان كان نفسه يدخل طب..+ كان قاري فاتحا واحدة دكتورة وعجبة استايل الدكاترا + شغلة كله تبع الطب واهي ممكن تفيده ( دا كان كلامه)!!

إذا كان إحساسك ده لمستيه بالفعل من كلامه فيابنت الحلال اخلعي من دلوقت لأنه هايطلع عقده كلها عليك لأنه بينظر للجواز من جانب مصلحته هو فقط وليس لإنشاء كيان أسري مستقر مبني على التفاهم .

وأنا في رأيي إنه يرغب في الزواج من دكتورة حتى يتباهى أمام أصدقاؤه وباقي عائلته بأنه تزوج دكتورة أي لم يضع الثقافة العالية للدكتورة في المقام الأول بل شهادة الدكتورة وفي رأيي يا أخت شنشن ده هايوريك مرارة الدنيا كلها

أما طلبه بأن تكون الزوجة غير بخيلة فده يوضح إنه بخيل جدا وليس كريم علشان هو دخل مشروع الجواز بلعبة مصلحتي وبس علشان الزوجة تعطي وماتاخدش !!!!

أختي شنشن خديها نصيحة من أخوكى كوكوواوا ابعدي عن هذا العريس وغني له !!!!!