إعلانات زمممممممممممممممممممان بتعليقات الآن

[se_ Elsyed]

وقعت لكم على كنز ثمين من إعلانات واخبار زمان وتحديداً من جريدة المصور ييجي من 100 سنة فاتو .. وكل يوم هاحاول أضع عدة إعلانات ونعلق عليهم ونتحسر على أيام زمان .. أيام الخير والبركة .. أيام ما كان جوز الحمام 5 فرد وعود القصب كان بزعزوعتين ...

---------------

نبدأ بسم الله ونطلب من ربنا إنه يسهلها لنا ..

ونحط إعلان عن شربة أمريكاني إنما إيه .. هاتخلصك من الدود وعفونة البطن .. ولا تنسى .. الشربة الأمريكاني .. عشانك وعشاني

وعشان الموضوع يسخن .. يبقى لازم له بابور .. وإزاي قولنا البابور يبقى ما فيش غير " بريموس "

عزيزتي ست البيت .. عايزه تتمنظري على جيرانك وتدبي صوابعك في عنيهم ؟ يبقى هاتي بريموس وإتنططي عليهم

وبما إن الليل ليل علينا .. يبقى لازم نولع النور عشان نعرف نشوف وما نلطشش في بعض .. وإذا قولنا النور .. يبقى بنتكلم عن اعظم لمبة في العالم وهي لمبة " بترومكس " بترومكس لمبة بتولع في اعتى رياح العالم .. ولا هوا الدنيا يقدر يطفيها

بترومكس لمبه .. هاتنور حياتك

عزيزي المُدخن .. ربنا يتوب عليك ... ولحد ما ربنا يكتبها لك .. إليك أفخر نوع سجاير في القطر المصري .. " سجاير العنبرول " سنجاير العنبرول للرجل اللي مش معقول

لعاشقات الأناقة والجمال ... إليكي عزيزتي كريم البشرة " بوند " ... إتبعي تعليمات الدهان اليومي من حُق كريم بوند .. وإنتي هاتلاقي بشرتك ولا بشرة جيمس بوند

[HDarwish]

إيه ده يا س س ... الحاجات دي من أيام الهكسوس ولا إيه؟

مساء الفل

[HDarwish]

بقولكم إيه ... سيبكوا من الحاجات اللي سي السيد بيفكرنا بيها دي اللي هيا أساسا من العصر الحجري

وخليكوا معايا وإنتوا تكسبوا قصدي خليكوا يعني في ذكريات الجيل الحالي ...

إتفرجوا وعايزكوا كل ما تشوفوا صورة تقولوا ياه .. فين أيام زمان وحلاوة أيام زمان ... في الملف المرفق

______________________.doc

[HDarwish]

طيب الحاجات اللي جابها سي سي وقلنا عليها دي قديمة قوي وجايز يكون مننا ناس كثير ما حضروش الحاجات دي ولا عمرهم سمعوا عنها

طيب الحاجات اللي أنا جبتهلكوا ما عجتكمش كمان ولا إيه ... ولا إنت بخلانين علينا حتى بتعليق صغير ....

وسؤالي خاص أكثر بال 9 أفراد اللي حملوا الملف يعني أكيد شوفتوه ... حتى لو ما عجبكوش قولوا وحش مش هنزعل والله

تحياتي

[Folana]

السلام عليكم ورحمة الله....

باعتبارى أحد الذين قاموا بتحميل الملف فأحب اقول لحضرتك انه هايل وخصوصا صورة "بقلظ"...رجعتنى خمسين سنة لورا....تسلم ايديك...وكل سنة وحضرتك طيب..

ومش معقول ادخل الموضوع واخرج بايدى فاضية....

سيجارة شيك. ترضيك...تقصَر حياتك..وتريحك من حماتك :sad:

(مين نبيل ده؟؟؟)

أبو عصمت ده لو عايش للنهاردة كان غير الاعلان واعلن عن قفازات ملاكمة للدفاع عن النفس من المدرسيين اياهم..وبكده يبقى فعلا بيرحب بعودة الابطال لبدء الدراسة واستئناف جهادهم فى سبيل الحفاظ على حياتهم (الدراسية) :closedeyes:

[HDarwish]

:closedeyes:

سيدتي كنت أطمع في تعليق صغير ليس إلا ...

لكن أن أحصل على تعليق من أم غالية مثل حضرتك أكن لها كل التقدير والإحترام فهذا كرم كبير ...

كل عام وحضرتك بخير وسعادة وهناء ....

شكراً على الحاجات الجميلة دي ... بس للأسف أنا أول مرة بشوفها لكن أكيد هي لحضرتك وكمان ل س س ذكريات جميلة مفتقدينها

تحياتي

[se_ Elsyed]

:closedeyes:

لكن أن أحصل على تعليق من أم غالية مثل حضرتك أكن لها كل التقدير والإحترام فهذا كرم كبير ...

كل عام وحضرتك بخير وسعادة وهناء ....

شكراً على الحاجات الجميلة دي ... بس للأسف أنا أول مرة بشوفها لكن أكيد هي لحضرتك وكمان ل س س ذكريات جميلة مفتقدينها

تحياتي

.. هاتوحشنا يا إتش درويش ... يالله مع السلامه أنت دلوقت عشان نينه فلانه هاتيجي تتصرف معاك ...

[HDarwish]

ما أنا أعملك إيه يا عم ... المفروض فعلا أقول نينة فولانة وجدو سي السيد وكمان أجي أسندك لا تقع مننا ولا حاجة ونكملك صف الاسنان اللي اتطرم ده

بعد الصور اللي انتوا جايبينها دي

قال إيه سجاير العنبرول ... أراهن إذا كان حد يعرف حاجة عن السجاير دي إلا اللي عدوا ستين سنة

طيب ماشي ... ولا كريم قبل مبارحة المنزل ... إيه الإسم الغريب ده "قبل مبارحة المنزل" ههههههههههه

لمبة بترومكس الأصلي ... أنا آخر حاجة حضرتها كانت لمبة عشرة بتاعة الجاز والكُلُوب لكن لمبتك دي ما سمعتش عنها قبل كده

ولا نينة فولانة

إيه سجاير نبيل دي ... برغم إني مدخن وكمان Heavy smoker وجربت معظم أنواع السجاير القديمة والحديثة لكن أول مرة أسمع عن دي

وعودة البطل ... محلات أبو عصمت

بس على فكرة إذا كنت حابب تتريق علشان قولت أم غالية ... فاعذرني يا أخي إذا كنت أنا محترم زيادة عن اللزوم إنت لو شوفت في مداخلة الفاضلة فولانة قالت رجعتني خمسين سنة ورا يعني زمانها في عمر أمي فعلا ... ومن باب الذوق والاحترام إني لما بلاقي حد في سن والدتي بقول يا أمي ...

عالعموم ... دعواتي ليكوا ربنا يديم عليكوا الصحة والعافية ...

تحياتي

[se_ Elsyed]

بالصلاتو عالنبي إحنا كفاءة ولا بيهمنا محلات أبو عصمت بتاعت فلانه ولا محلات ولاد ابو إسماعيل حتى ... لإن اللي زار صيدناوي وشملا وشيكوريل .. عُمره ما يفكر في حد تاني .. وأسعارنا لا تقبل المنافسة ..

وده حديث دار بين زوج وزوجته سنة 1929 بخصوص هذا الأوكازيون ..

مدام سي السيد : نهارك سعيد يا سي السيد أفندي ... كيف أصبحت ؟

سي السيد أفندي بارم ديله : نهارك سعيد يا هانم ... نحمد ربنا ... الصحه عال العال والقشية معدن ..

المدام : كنت عايزة أستأذنك إني اخد فتحية الشغالة وننزل نستقضى شوية حاجات من محلات سليم وسمعان صيدناوي وشركاءه ليميتد .. سمعت إنهم عاملين تخفيضات عظيمة .

س س : إذاً انا امنعك ... وطبعاً هاتقوليلي هانركب السوارس وممكن تتأخروا بره للساعة 4 بعد العصر .. يعني ترجعي لي في نصاص الليالي ؟

المدام: لكن يا س س أفندي المشوار مش هاياخد مننا اكثر من ساعة واوعدك إني هارجع الساعةة 4 إلا 10 العصر . يعني قبل الليل ما يليل .

س س : أسف يا هانم .. ما عنديش ستات تخرج وتفضل بره البيت لبعد الضُهر ... الناس يقولوا عليه إيه ؟ .. إديني مقاسات الفستان والحاجات اللي إنتي عيزاها وأنا أعدي على صيدناوي وأنا راجع من كازينو بديعة وأجيبهالك لحد عندك .

مدام : يخليك ليه ويفضل حسك في الدنيا ...

س س : والحاجات دي بكام إن شاء الله عشان أعمل حسابي ؟

المدام : انا عايزة فستانين دانتيلا بكرانيش .. ودول يقفول بمتين ساغ .. وبرنيطة خرج نجف بشراشيب بخمسة وعشرين ساغ وإسم الله على مقامك جزمة كريب جورجيت مقاس 57 ودي تقريباً بعشرين ساغ .. يعني العملية كلها حسبت إتنين جنيه ونص ..

س س : والله عال ... إتنين جنيه ونص ... ليه ؟ قالوا لك عليه حرامي أو مُرتشي ؟ يا هانم أنا موظف درجة تاسعة ومرتبي كله بالعلاوات 3 جنيه وستين قرش وتلاتة مليم .. فلما سيادتك تشتري لي برانيط وفساتين وجزم بإتنين جنيه ونص .. تقدري تقوليلي نعيش إزاي بجنية وبريزة باقي الشهر ؟

إستني إستني هافنطهالك انا عشان ما تتعبيش نفسك ..

- 15 ساغ إيجار الشقة

- 43 ساغ 20 رطل لحمة خزين الشهر

- 12 ساغ صندوق بيض يحتوي على 100 بيضة

- 8 ساغ صفيحة سمنة بلدي لزوم الطبيخ

- 22 ساغ خضروات وفواكه

- 3 ساغ واحد قاروصة سجاير العنبرول لزوم مزاجي وعشان أبقى في المود

- 33 ساغ نثريات

يبقى إجيب لك منين يا ست هانم ؟ إقصري الشر وقولي يا صبح بلا فساتين بلا برنيط بلا كلام فارغ . ولا زودتي كلمة واحده هابعتك عند أمك قد شهرين تلاتة .

مدام : امرك مطاع يا سي السيد أفندي واللي تشوفه هو الصح .

[HDarwish]

[Folana]

السلام عليكم ورحمة الله....

حصل خير ياجماعة..حصل خير..صلوا على النبى..انا حأحل لكم المُشكل...

ابنى الفاضل اتش درويش...ربنا يعزك ويبارك فيك....ده اناا اتشرف انك تعتبرنى زى والدتك....

انت فى سن خطيب ابنتى..وهو بيقولى يا ماما....

ومافيش شك طبعا ان حضرتك محترم وزيادة سواء قلت لى ماما ولا نينة او اكتفيت بمدام فلانة...لم يرزقنى الله بابناء ذكور ولكنى اعتبركم كلكم ابنائى ...بما فيكوا سى السيد كمان....

باشكرك على جميل كلماتك.....

مامتك

فولانة

[HDarwish]

لا شكر على واجب ... ماما فولانة

تحياتي

[محمد عبدالعزيز]

حلو قوى إعلان نبيل ده, تحس إنه إعلان عن صنف مخدرات جديد

قال إيه "وعلو الصنف يحبب فيها كل (كييف) حقيقى يدخن لمزاجه لا عن مجرد عادة" :rolleyes:

المفروض الإعلان ده يتعلق على مدخل غرزة مش فى جريدة محترمة.

شوية صور ممتعة جداً يا HDarwish, بجد رجعتنى لورا لحد ماخبطت فى الحيطة

[Modest]

سيجارة شيك. ترضيك...تقصَر حياتك..وتريحك من حماتك :)

(مين نبيل ده؟؟؟)

لأ اسمحي لي يا نينة الواحد برضه يقول اللي له و اللي عليه .. سجاير نبيل دي لا تُقارن بسجاير كوتاريللي.. إتلاكاً بوتاتاً يعني smk:

سجاير كوتاريللي دي حاجة ممتازة أوي جداً خالص

دي اللي دخنها الشاب الوسيم حسين صدقي في فيلم جعلوني مدخناً .. آه مانا لسه شايفُه عمنوّل في السينما.

.

[Modest]

س س : والحاجات دي بكام إن شاء الله عشان أعمل حسابي ؟

المدام : انا عايزة فستانين دانتيلا بكرانيش .. ودول يقفول بمتين ساغ .. وبرنيطة خرج نجف بشراشيب بخمسة وعشرين ساغ وإسم الله على مقامك جزمة كريب جورجيت مقاس 57 ودي تقريباً بعشرين ساغ .. يعني العملية كلها حسبت إتنين جنيه ونص ..

أيامكم كانت أيام خير يا سيد سين سين

دلوقتي علشان تحصّل عدم اللامؤاخزة جزمة "كريب جورجيت :) " و بعد الخصم 20% مش أقل من 65 ساغ .. و ممكن توصل لـ 240 ساغ لو الهانم عايزاها كعب عالي و حركات.

لأ ده شيء كتير كتير يا سي السيد أفندي.

[MZohairy]

دي اللي دخنها الشاب الوسيم حسين صدقي في فيلم جعلوني مدخناً .. آه مانا لسه شايفُه عمنوّل في السينما.

.

محمود ذو الفقار ياسطى موديست مش حسين صدقي :)

[se_ Elsyed]

الموضوع سخن . .. وزُهيري أحرج موديست فنياً .. وطبعاص موديست مستحيل يسيب تارة ...

--------

عندي كذا إعلان عن حفلات مرسحية ( مسرح يعني ) من سنة 1925 ... وقعدت أقرأ كذا إعلان وكانت دماغي هاتولع ...

تصوروا سعر تذكرة المسرح كانت بتبدأ بعشرين جنيه ؟

أينعم الإعلان اللي هاضعه الان عامل اوفر والتسع حفلات بـ 22 ج ...

لكن ليه ؟

ده العشرين جنيه دي بيتهيألي كانت تشتري بيت من بابه ويمكن بالعفش كمان أيامها

وإذا كانت العربية الفيخمة والماركة زي كرايزلر وفورد كانت بـ 140 ج .. يبقى ثمن 7 تذاكر مسرح كانوا يجيبوا عربية ؟

أينعم هاتلاقي طبقى معينة هي اللي كانت بتحضر .. بس برضوا 20 ج كانت حاجه جامدة جداً ومش لاقي لها تفسير ...

يا جدعان إذا كنت سنة 78 كنت باخد مصروفي قرش ساغ وكنت بزقطط به ... وكنت بادخل سنيما حدائق القبة بسبعة ساغ ...

[Folana]

لأ اسمحي لي يا نينة الواحد برضه يقول اللي له و اللي عليه .. سجاير نبيل دي لا تُقارن بسجاير كوتاريللي.. إتلاكاً بوتاتاً يعني :blink:

سجاير كوتاريللي دي حاجة ممتازة أوي جداً خالص

دي اللي دخنها الشاب الوسيم حسين صدقي في فيلم جعلوني مدخناً .. آه مانا لسه شايفُه عمنوّل في السينما.

.

السلام عليكم ورحمة الله...

موديست باشا عندنا...يامرحبا يامرحبا

منور المطرح ياسى الفندى ..تاواك ماشرفت...(وش واحدة شكيب مش عارفة هى مين فيهم)

بصراحة معاك حق..كوتاريللى ده كان حاجة يعنى غريبة صراحة.....

هم كانوا بيسموا السجاير على اسم باباهم ولا ايه الحكاية؟؟؟ smk:

طلع محمود ذو الفقار ياسيدنا ...ابقى اتفرج على الافلام كويس وخليهم يعلوا الصوت لتوضيح الرؤية...

على كده بقى الممثلين كانوا بيطلعوا فى الاعلانات من زمان مش حاجة جديدة يعنى....

زى كده...

وبتعليق دلوقت ...نقول ...

قاصد كريم...رغوته تدوم

قاصد كريم يبقــع الهدوم....

:)

[esocial]

هههههههههههههههههههههههههههههههه

انتوا بتجيبوا الحاجات دى منين

هههههههههههههههههههههههههههههههههههههههههههههههه

والله دمكم زى العسل يا ولاد الأيه

[Folana]

السلام عليكم ورحمة الله......

هذا الاعلان أهديه الى كل من يهمه الامر......

دار يا دار ...يادار

بقى ده اسمه كلام..يانهارررر!!!!!!! :wub:

بس والله فكرة جميلة ...ان الواحد يبقى شعره لونيين كده...حتى يليق على أى هدوم..... md2:

ثم ايه هى "ألمعية" الشعر دى؟؟