قاموس سياسى جديد

[butterflyspirit]

ارسلت لى صديقة بهذا القاموس السياسى الجديد ....

العولمة : عملية تحول اجتماعي وثقافي وفني تتزعمه فيفي عبده

>>الشفافية : سمة ضرورية للملابس المستخدمة في العولمة

>>النظام العالمي الجديد : ويندوز اكس بي

>>الجات : مصيبة وجات على دماغنا

>>التنوير : عملية تتم في الشوارع عندما يسكنها وزير

>>صندوق النقد : ما يفرقش كتير عن صندوق الزبالة

>>الخصخصة : تحدث في الحدائق يوم شم النسيم مع أكل الفسيخ

>>النظام الملكي : عند وفاة الملك ينتقل الحكم لابنه ليصبح هو الملك

>>الجديد

>>النظام الجمهوري : عند وفاة الرئيس ينتقل الحكم لابنه ليصبح هو الرئيس

>>الجديد

>>المبايعة : ورقة بتكتبها لما تبيع عربية قديمة

>>الدستور : كلمة تقال للحماية من الآسياد لما الواحد يدخل بيت مسكون

>>دستور يا اسيادي....العفو والسماح

>>الديموقراطية : نوع من الفنون الزخرفية يستخدم لتزويق صورة الحكومة

>>القانون : آلة تصدر أصوات جميلة لما تلعب فيها بصوابعك

>>الحرية للجميع : للشعب أن يقول ما يشاء ، وللحكومة أن تفعل ما تشاء

>>حرية النشر : تمارسها النساء على السطوح في المناطق الشعبية

>>رأي المرأة : ستات مصر قالوا كلمتهم ؛ السمنتين نخلتهم

>>الدبلوماسية : أحسن هدية تصالح بيها مراتك بس بشرط الماس يكون حر

>>العمل السياسي : يمارسه كل من يعمل سايس في جراج

>>السياسي المحنك : رجل يتسم بسعة الصدر عند المناقشة وسعة الكرش فيما

>>عدا ذلك

>>اليساري : شخص طيب يقود سيارته على الجانب الأيسر من الطريق ويشتم كل

>>السواقين اللي جايين في وشه لأنهم عملاء الإمبريالية ويسيرون ضد

>>الحتمية التاريخية

>>الصراع الطبقي : خناقة كل بيت على مين اللي حيغسل الأطباق النهاردة

>>الحرب الأهلية : حرب البنت مع أهلها عشان تتجوز الواد اللي هي عايزاه

>>حرب الشوارع : قيادة سيارة في شوارع القاهرة

>>حرب التحرير : معركة شهيرة يخوضها كل من يريد استخراج جواز سفر من

>>مجمع التحرير

>>العمل الثوري : مذكر العمل البقري

>>عملية السلام : زي عملية اللوز بالضبط ، تنتهي برمي اللوز في الزبالة

>>الشريط الحدودي : الشريط الجاي لعمرو دياب

>>اليهود : شعب يعيش على الأساطير، يألفها في الأول ويصدقها بعد كده .

>>يعني بالعربي أسهل شعب ممكن ينضحك عليه , الله يرحم اللي انضحك عليهم

>>مرتين

>>الوحدة العربية : أن تعاني كل دولة عربية الشعور بالوحدة

>>

يا ترى حيقبضوا علينا ؟؟؟ ربنا يستر....

[Lancelot]

أولا مرحبا بيكي يا أخت (تقريبا أخت) ButterflySpirit في المنتدي .... و إن شاء الله معانا علي طول .....

يا ترى حيقبضوا علينا ؟؟؟ ربنا يستر....

لا متخفيش إحنا معاكي ..... "وش واحد بيؤمن إن الجري نص الجدعنة" ...

[butterflyspirit]

ميرسى يا فندم ....ربنا يخليك....على فكرة انت اول واحد يخاطبنى بصيغة المؤنث :oops: مش عارفة ليه :)

على فكرة انا مقدرة جدا لتشجيعكم و مؤمنة بمبدأ الجدعنة نفسه :D

[optimistic]

ها ها ها

موضوع حلو خالص

و يعبر عن نقد ساخر للاوضاع

احم

ثانية واحدة البس الكوتشي لزوم الجري

[butterflyspirit]

على فكرة انا بدات اقلق من موضوع الجرى.... يا ترى قصدكوا ان احنا هنجرى سوا والا هتجروا و تسيبونى؟؟؟؟ لأ احنا ماتفقناش على كدة!!!

[optimistic]

و الله ده حسب سرعتك في الجري

اصل احنا عندنا خبرة طويلة فيه

خصوصا الباشمهندس لانسلوت خبير جري و كهربا

اهلا بيكي في النادي

بالمناسبة .. انتي لسة مدفعتيش الاشتراك و احنا سايبينك كده يعني

[Lancelot]

بالمناسبة .. انتي لسة مدفعتيش الاشتراك و احنا سايبينك كده يعني

أيوه ... أنا بألم الإشتراكات هنا .... حولي 100 يورو أو دولار علي حسابي .... "وش خايف لأحسن الطفشان أو سي السيد يطبوا عليه لأنهم بيلموا الإشتراكات برضه و ممكن يخطفوا منه الزبون" ...