خالتي فكيهه

[shahd]

المكان: المستشفى

المنظر خالتي فكيهه ورئيسة الممرضات قاعدين متربعين على السرير وشهم في وش بعض

ومجموعة من الممرضات حواليهم( نورا .. سعاد.. بهانة.....)

الحوار:

فكيهه: شوفي يا ستي :الهدوم اللي تطبخي بيها هيه اللي تنامي بيها

رئيسة الممرضات: بس كده ريحت الهدوم تبقى بصل وتوم وحاجة تقرق

فكييهه/ تقرف ايه ؟؟ ما تبقيش عبيطه ؟؟ ده هو ده اللي حيخليه يدوب في دباديبك

رئيسة الممرضات: تفتكري يا ست فكيهه

فكيهه: ايوة طبعا افتكر ونص.. اسمعي بس وركزي معايا.

رئيسة الممرضات: سامعاكي يا حاجة فكيهه سامعاكي

فكيهه: لما يقلك حنخرج نتفسح تحطي ايشي احمر وايشي اخضر وتلبسي وتبقى على سنجة عشرة .. وتقفي قدام المرايه ساعه ..

نورا برقه شديدة ونعومة: وايه كمان يا خالتو فكيهه

فكيهه: يختييييييي يا عيون خالتو فكيهه.. تعالي جمبي تعالي..

تعكنني عليه عيشته في الفسحه دي وخصوصا لو قابلتوا حد من صحابه هو ومراته تقوليه ..

مين احلى انا ولا هيه؟؟ فستاني احلى ولا فستانها؟؟

حيقلك انتِ احلى منها وفستانك أجمل من فستانها يا حبيبتي

تروحي حاطه ايدك في وسطك وتزغريله وتقولي: نعممممممممم وانت ايش عرفك اني احلى منها ولا فستناني احلى من فستانها تلاقيك كنت بتبصبصلها ؟؟

يرد عليكي يقلك يا ستي انا شايفك احلى واحده في الدنيا كلها؟

تقوليه لا يا اخوياااااا .. تلاقيك كنت بتبصص لها .. يا ابو عين زااااااااااااايغه

نورا: بس كده ممكن يزعل يا خالتو

فكيهه: ما يزعل ولا يتفلق .. قطييييييعه تقطع الرجالة وسنينهم.. وبعدين سيبك من الحنية اللي انتِ فيها دي يا بت يا نورا..و لما يزعل ازعلي انتِ كمان.. وهو حتما ولا بد حيجي يصالحك.. ساعتها بقى .. تدلعي وتتبغددي.. وماتصالحيهوش ابداااااا.. الا 6 غوايش.. او بطقم ذهب عيار 24.. مش يضحك عليكي بأبو 18

تدخل الست سعديه والممرضات ملمومين حوالين فكيهه

الست سعديه: سيبي البنات في حالهم يا فكيهه ؟؟ خلي البيوت تعمر

فكيهه:مالكيش دعوة وخليكي في حالك يا سعديه.

الست سعديه: يا فكيهه .. يافكيهه حرام عليكي..

فكيهه : حرمت عليكي عيشتك؟؟ طلعوا الست دي من هنا بتجيبلي هرش في نافوخي

سعديه: بقى كده يا سعديه دي جزات المعروف ؟؟

فكيهه: معروف ايه يا ختي .. الكام ملطوش اللي دفعتيهم حتاخديهم عـ الصرمة القديمة .. ورينا عرض كتافك يلا خلينا نشوف شغلنا.

الست سعديه : ماشي يا فكيهه ماشي .. ان ما وريتك ان ما خليت يوم اسود من قرن الخروب .. بس اما تخرجي من المستشفى.

فكيهه: سامعين ؟؟ شاهدين؟

بتهددني يا عااااااااالم ؟؟

بتهددنني يا هووووووو

رئيسة الممرضات: تهددك ايه ؟؟ هيه سايبة . قومي يا بت يا بهانة اندهي على حسنات تشيل الست دي هيلة بيلا برة المستشفى

الست سعديه: تطلع مين حسنات دي اللي حتخوفوني بيها ؟

رئيسة الممرضات: يا حسنااااااااااااااااات

حسنات: ايوه يا ست الريسه الست دي عملت ايه وتروح ماسكه فكيهه من رقبتها

فكيهه مش انا يا ست سيئات ؟؟

قصديييي يا ست حسنات .. هيه الست الواقفة هناك

حسنات : تروح لسعديه ؟ وتاخدها هيلا بيلا بره المستشفى

الست سعديه: تلاقي نفسها في الشارع..

حسنات ترجع : أي اوامر تانيه يا ست الريسه

رئيسة الممرضات: متشكرين يا حسنات .. خدي دول حلي بقك

حسنات مكشرة: ايه دول ؟؟

رئيسة الممرضات: خديهم دلوقتي بس والست فكييهه حتبسطك اول مايجي جوزها

حسنات: ماشي .. امري لله

فكيهه تستمر في كلامها مع الممرضات

فكيهه: خلونا في موضوعنا لو قالك مثلا .. الست دي انا مش عايزها تدخل بيتي

تدخليها غصب عنه.. ماهو بيتك زي ما هو بيته ولو شخط فيكي ... اوعي تسكتيله ابدااا..تشتميه وتبهدليه وتشتمي اهله واللي يتشددله ..

سعاد مصمصة شفايف:وهو يعني حيسيبك تعملي كل ده ويقعد يتفرج عليكي ده قليل ان ما رزعك قلمين على سداغك.!!

فكيهه: ما يقدرش يا ماما.. ولو فكر تخبطيه بالبلغه على دماغه..

بهانه: مندهشه: ياخبررررررررر ؟؟؟

فكيهه: ايوة ما تسغربيش .. ماهم صنف الرجالة ما يجوش الا بالعين الحمرا .. اسأليني اناااا.

رئيسة الممرضات: وبعدين يا ست فكيهه كملي كملي..

فكيهه: كنا بنقول ايه؟؟

بهانه: كنتِ بتقولي لو دتخل يقيل......

فكيهيه: ايوة افتكرت.. تشغلي الغسالة .. وتقوليه عايزة اغسل الهدوم ..

يقلك مش وقته عايز انام.. تصممي انك تغسليها .. يقلك أمري لله ويروح يتفرج عـ التلفزيون

تسيبي اللي في ايدك وتقعدي جمبه تقزقزي لب وسوداني وتطرقعي لبنان وأول ما يفتح قناه ويركز فيها تفتحي مواضيع مالهاش اول من اخر .. يقلك اسكتي عايز اشوف الماتش.. تاخدي البتاع اللي اسمه الريمولت كرتنول

نورا : اسمه الريموت كنترول يا خالتو

فكيهه: ايوة اللي انتِ بتقولي عليه ده.. تاخديه وتغيري القناه.. على أي فلم تكوني شوفتيه مية مرة

سعاد: يا مصيبتييييييي ده كده يقطم رقبتي

فكيهه: ان شا لله رقبته اللي تتقطم .. يا بت ما تخافيش واعملي اللي بقلك عليه بس.. وحتشوفي النتيجه وتدعيلي

بهانه : طب لو جاي ياعيني متضايق ومهموم وعايز يقعد لوحدة اسيبه براحته طبعا ؟؟

فكيهه: انتِ هبلة يا بت تسيبيه براحته ده ايه؟؟ لأ طبعا تقعدي في قرابيزة .. ولوك لوك لوك لوك في ودانه.

رئيسة الممرضات تبص في الساعه.

ياخبر ده ميعاد اللف عـ العنابر : قومي يا بت انتِ وهيه ما تودنواش في داهيه.

نكمل بكره يا ست فكيهه...

فكيهه: ماشي ولو ان لسه في كلام كتير قوي .. بس يلا بكره .. بكره...

يتبع........

[الباشمهندس ياسر]

:sad: :sad: :sad: :sad: :blink:

[النيل حبيبي]

مين بقي الست الناصحه اللي حتعمل بكلام فكيهههه

[shahd]

:sad: :sad: :sad: :sad: :blink:

:P :sad: md2: -_-

مزبهلون ليه يا باشمهندس

تم تعديل 2 ديسمبر 2008 بواسطة شهد

[shahd]

مين بقي الست الناصحه اللي حتعمل بكلام فكيهههه

اي ست مخها ضارب يا أستاذنا..

منوووووووور.. وفكوهه .. بتبعتلك احلى تحيه :sad: :sad:

[Scorpion]

سيدي القاضي ايها السادة المشتشارين

لاحظنا تغير ملحوظ في معاملة الزوجات لأزواجهم تزامن مع اضافة تلك الحلقات من الكاتبة اللوذعية الشهيرة شهد هانم ... و اذ نحن نشجب قشر اللب و الفول لسوداني الذي تكاثر نكاثر الأرانب في منازلنا .. و اذ نحن نعترض علي اللكلكة في الودان اللي مش عايزة تخلص من غراب البين المدعي فكيهة و هي لا تمت للفواكه بصلة ..

فها نحن يا حضرة القاضي المبجل نطالب الرقابة الأدارية علي المنتجات الزوجية بحظر تداول هذا الكتاب و منع نشره في جميع الوسائل المسموعة و المحلوقة ....و ايداع السيدة فكيهة شكل مؤسسة القناطر للتربية النفسية .. و تطبيق اشد العقوبة علي المدعوة شهد هانم برميها بجميع انواع البانسيه و النرجس المركز و لا مانع من تعزيز العقوبة ببعضآ من القرنفل ....

[shahd]

سيدي القاضي ايها السادة المشتشارين

لاحظنا تغير ملحوظ في معاملة الزوجات لأزواجهم تزامن مع اضافة تلك الحلقات من الكاتبة اللوذعية الشهيرة شهد هانم ... و اذ نحن نشجب قشر اللب و الفول لسوداني الذي تكاثر نكاثر الأرانب في منازلنا .. و اذ نحن نعترض علي اللكلكة في الودان اللي مش عايزة تخلص من غراب البين المدعي فكيهة و هي لا تمت للفواكه بصلة ..

فها نحن يا حضرة القاضي المبجل نطالب الرقابة الأدارية علي المنتجات الزوجية بحظر تداول هذا الكتاب و منع نشره في جميع الوسائل المسموعة و المحلوقة ....و ايداع السيدة فكيهة شكل مؤسسة القناطر للتربية النفسية .. و تطبيق اشد العقوبة علي المدعوة شهد هانم برميها بجميع انواع البانسيه و النرجس المركز و لا مانع من تعزيز العقوبة ببعضآ من القرنفل ....

ياسيادة البية القاضي.. يا حضرات البهوات المتشاورين

انا المدعوة فكهكه.. الطيوبة الحبوبة .. اللي كل مايهموهاااااا في هذه الحياتووووو.. عمار البيوت المخروبة.. و بناءووووووو علاكتوووووووون زوجيتووووووون عميييييييييييييييكتووووووووون بين الأزواج ومراتاتهم .. واني اعترض وبشددددددددددددددده على هذا الحكم الظاااااااااالم

أي نعم مظلوووووووومة يابييييييييييييييه ... وبطلب بالبتاع ده اللي بيقولوا عليه الاستنئاف.. لحاد ما خلص مهمتي واعمل اللي كل اللي عليا .. واتمم واجبي ناحية العرسان والعرايس .. ويبقى كده عداني العيب وماحدش يقول اني حارماه من حاجة..وفتكو بعافيه

وأحلى بوكيه ورد وفل وبنفسج معطر ببخور وعود.. لعمو كامل

تم تعديل 15 ديسمبر 2008 بواسطة شهد

[shahd]

المكان: قدام بوابة المستشفى

المنظر: نبيهه داخلة بزعابيبها ..

الحوار: انت يا ست سيئات .. انت يا زفته ...

مديرة المستشفى: في ايه مين اللي عامل الدوشة دي ؟؟

نبيهه: انا يا ست المديرة.. مش انت الست المديرة برضك ولا خيال مآته؟؟

مديرة المستشى: احترمي نفسك احنا في مستشفى محترمه

نبيهه: محترممممممممه لا والله ما هو باين اهو؟؟

حسنات: مين اللي بينده عليا ؟؟؟

نبيهه: بركه انك عرفه اسمك بقى انتِ حسنات انتِ ؟؟

حسنات: اااااااااه حسنات عصبات عن اللي خلفوك يا بوز الأخص..

نبيهه: انا بوز الأخص يا امنا الغولة!!

حسنات : انا ............

مديرة المستشفى : بسسسسسسسسسسسسسسسسسسسس

حسنات : عاجبك كده يا ست الريسة ما عملتلهاش ايتوها حاجة ونازلة فيا بهدلة اهئئئئئئئئئئئئئئئئئئ

نبيهه: ياولية يا قرشانه .. انا اللي نازلة فيكي بهدلة ولاانت اللي رميتي امي الغلبانة في الشارع... بقى دي عملة تعمليها ولا اكمنها ست عجوزة ومش حتتقدر عليكي يا اتوبيس من غير فرامل ...

حسنات: لألألألألأ لمي روحك شوية اااااااااه ده انا حسنات والأجر على اللـــــــــــــــــــــــــــــــــه وبعدين انا عبد المأمور روحي اسألي الست الريسة..

نبيهه تبص للريسة بنظرة غل ..........

الريسة: اييييييييييييه وانا مالي يا ختي .. هيه الست اللي جابتها معاها قعدت تزعق وتقول

الحقووووووووووووني الست دي بتهددني .. حتموتني .. وابصر ايه ومش عارف ايه ... فندهنا على حسنات تشيلها هيلة بيلا عشان استتباب الإمن في المستشفى

نبيهه: امن ايه اللي بتكلمي عليه ده دي حتة مستشفى جربانه معفنة

الريسة: لألألألأ احترمي نفسك واحفظي ادبك يا ست انت

حسنات: ارميها بره يا ست الريسة

نبيهه: ترمي مين يا بوز الأخص انت؟ وبعدين انت ايه اللي جابك هنا .؟؟؟؟؟ بقى دي مناظر تتحط في مستشفى!!!!!!

حسنات: وبعدين بقـــــــــــــــــــــــى في قلة الأدب ديييييييييييييييي

الريسة: سيبك منها انت يا حسنات وخلينا نروح نشوف شغلنا

نبيهه: هو ده اللي قدرتي عليه .. بدل ما تديها بالصرمة القديمة على دماغها

حسنات : بقلك ايه غوري من وشي الساعه دي.... ما تخلينش افرمك تحت رجليا .....

حسنات والريسة يسبوا نبيهه عماله تهاتي.........

نبيهه : تفرمي مين ؟؟؟ تعالي هنا ؟؟؟ انتوا رايحين فين وسايبني يا وليه انتِ وهيه؟؟؟؟؟؟؟؟ طيييييييييييييييييب

نبيهه تلف على العنابر واحد واحد لحاد ما تلاقي فكيهه قاعدة وحواليها الممرضات ...

نبيهه: انت هنا وانا عماله ادور عليكي ؟؟؟

فكيهه : مييييييييين نبيهه عروستنا الحلوة تعالي جمبي تعاااااالي

نبيهه: بقى دي عمايل تعمليها في امي يا خالتي فكيهه

فكيهه: ماهيه اللي معطلاني عن اداء مهمتي الرسمية( مش هم بيقولها كده برضه يا بت يانورا؟؟)

نورا: ايوة يا خالتو فكيهه

نبيهه: والله وبقيتي بتكلمي بالنحوي يا خالة فكيهه الله يرحم...

فكيهه: ايوة يا بت يا نبيهه.. ما هو اصل .. تعالي بس اما اعرفك عـلى الأماير دول ماهم عرايس زيك يا عين خالتك

نبيهه: ما تخدينيش في دوكة وتنسيني اللي انا جاية عشانه

فكيهه: وانت جايه ليه يعني.. مش عشان تطمني على خالتك فكيهه العيانة

نبيهه: لا طبعا وبعدين ما انت زي القرد اهو

فكيهه: قرد في عينك بت قليلة الرباية صحيح

نبيهه : انا جاية اخد حق امي ياولية يا مفتريه .. تعاليلي هنا

فكيهه: طب قربي بس وشوفي الي حيجرالك .. انا وريا نسوان تاكل الزلط

يا بهاااااااااااااااااااااااااااااانة ..

ست ابوهاااااااااااااااااا

كتفوا البت دي خلونا نعرف نتكلم

بهانة وست ابوها : حاضر ياخاله فكييييييييييييهه

ويمسكوا نبيهه ويكتفوها

نبيهه: بقى كده ياخالة فكيهه .. ده انا نبيهه حبيبتك وزي بنتك

فكيهه: لا ياشيييييييييييخه دلوقتي مش فاكرة عملتك السودة فيا انا وخالتك عطيات .. مرة من نفسي ..

نبيهه: ما انتِ رديتهالي وخليتي امي ترنني علقة ما خدهاش صبي في مولد.. وبهدلتي أمي ومسحتي بكرامتها الأرض..

فكيهه: امك دي وليه هبلة .. وانت هبلة وعبيطه زيها مش عارفين مصلحتكوا فين..

نبيهه: ياسلام وانت اللي حتعرفينا مصلحتنا؟؟؟

فكيهه: ايوه ولا نا مش ماليه عينك ؟؟

نبيهه تبص لخالتي فكيهه نظرة حقد وكره......

فكيهه: ما تبصليش كده واترزعي هنا.. لحسن حديكي بالبلغه واخليكي تروحي لعريسك بعاهه مستديمة يرجعك لأبوكي وامك..

نبيهه: يرجع مين ياخالة هو يطول اصلا ده انا نبوهه.. جمال ايه واخلاق ايه وادب ايه ورقة ايه

فكيهه: بأمارة الهبل اللي بتتعلمية من امك ؟؟

نبيهه: سيبي امي في حالها يا خالة يووووووة بقى

فكيهه: طب تعالي يا ست ابوها انت وبهانة وانا راضيه زمتكوا ..

ست ابوها : نعم يا حاجة

بهانه: ايوة يا خالة

.

فكيهه: بقى في ست عاقلة في الدنيا لما جوزها يوصل البيت شايل ومحمل تقابلة بابتسامة وتشيل الحاجة من ايده وتقله تسلم ايدك يا سبعي .. وتجهزله الحمام السخن وتجهزله الغدا وكمااااااان متقيفة ولابسه على سنجة عشرا؟؟؟؟؟؟

بهانه: ده ايه العبط ده ياخالة

ست ابوها : ايه الولية الهبلة دي؟؟؟ ده كده جوزها يقعد على دماغها ويدلدل رجلية كمان ..

فكيهه: شفتي يا عبيطة ان امك حتوديكي في داهيه .. اسمعي كلامي بس وانت تفلحي...

نبيهه: طب وحق امي .. اللي بهدلتيها

فكيهه: يييييييييييييييييه يا دي امي امي اللي انت هرياني بيها .. مالكيش دعوة انا اول ما اطلع من هنا حروح ابوس على راسها واستسمحها..

نبيهه: بجد يا خالة؟؟؟

فكيهه: اه امال انت فاكرة ايه احنا مالناش غير بعض

نبيهه: طب قوليهم يفكوني ...

فكيهه: ليه يعني؟؟

نبيهه: عشان ابوس راسك واستسمحك انا كمان...

فكيهه مزبهلة ؟؟ معقولة دي ؟؟ ده ايه العقل اللي نزل عليكي مرة واحده ؟؟

فكيها يا بت يا سعاد

نبيهه تجري على خالة فكيهه تمسكها من رقبتها وتبوس راسها جاااااااااامد

فكيهه: بس بسسسسسسسس كفاية .. خلاص .. خلااااااااااص .. اقعدي بقى خلينا نعرف نتكلم قبل ما اللي الولية المسلوعه تعدي على العنابر مع امنا الغولة اللي اسمها حسنااات

الباب يتفتح ....... تحش حسنات....

حسنات: ايييييييييه في حد بينده عليا...........

يتبع...............

[shahd]

نبيهه النبيهه وخالتي فكيهه

المكان المستشفى: غرفة الخالة فكيهه

الأشخاص: نبيهه وفكيهه والممرضات

تدخل حسنات والممرضات حوالين فكيهه ونبيهه جمب فكيهه

حسنات: في حد بينده عليا ؟!

فكيهه: لا يا ختي بيستهيألك

حسنات: بس انا سمعت حد بيقول حسنات

نبيهه: اديكي قولتيها بنفسك حسنااااات وانتِ مافيكيش ولا حسنة واحده....

حسنات: الله الله الله.. باين عليكي عايزة تتربي زي امك ...

نبيهه: طب جربي كده وشوفي اللي حيجرالك!!

حسنات:بقى كده ...طييب... استعنا عـ الشقى بالله

حسنات تشمر .. وتقلع جزمتها ولسه حترن نبيهه علقة معتبرة .. تخش مديرة المستشفى

مديرة المستشفى: الله الله.. انتوا قلبتوها قعدة نسوان؟؟وانتِ يا زفته .. ماشية حافية ليه؟؟

حسنات:اصل .. اصل.. الست دي قلة ادبها عليا يا ست الدكتورة...

المديرة: قلت ادبها عليكي تقومي تضربيها وبالجزمة كمان.. مش كفاية ايدك اللي عاملة زي المرزبة دي!

نبيهه: شوفتي يا ست المديرة .. عملت فيا ايه! اتجوز انا ازي دلوقتي.. اروح لعريسي ازااي بالمنظر ده؟؟

حسنات: هو انا لسه جيت جمبك يا مفترية ؟؟

نبيهه:يعني انا كدابة؟ ولا كمني طيبة وغلبانة ....

المديرة: ايه يا ست فكيهه.. ايه اللي حصل بالضبط؟

فكيهه: الكذب خيبة يا ختي .. كل الحكاية ان البت نبيهه والست حسنات كانوا ناوين يلعبوا مصارعه..زي اللي بتجيي في التفلزيون..بس مصارعة حبايب يعني

فحسنات قلعة الجزمة عشان تعرف تلعب وهيه مستريحه ...بس هيه نبيهه اللي فهمتها غلط!!

نبيهه: هو في مصارعة حبايب ويا ولية انتِ؟!

المديرة: ااه ؟ طيب .. طيب.. العبوا بس من غير دوشة...

نبيهه: نلعب؟!ومن غير دوشة؟! ايه المديرة الهبلة دي؟؟

ده بدل ما تديها خصم يومين ولا اسبوع حتى وتتحبس في اوضة الميتين من غير لا اكل ولا شرب !!!

المديرة: انتِ حتعلميني شغلي؟ ده نوع من العلاج النفسي للست فكيهه... لازم تشوف المبارة دي عشان نفساويتها تتصلح وتخرج من المستشفى...

نبيهه: يعني هيه تخرج واقعد انا بدلها؟؟!!

المديرة: انتِ وشطارتك!! يلا يا نورا شوفي مين اللي حيكسب وتعالي بلغيني...

نورا: ايوة يا فندم بس....

المديرة: من غير بسبسبة اعملي اللي بقلك عليه

نورا: حاضر يا فندم

المديرة : انا خارجة وحقفل الباب من برة عشان تاخدوا راحتكوا...

نبيهه: رايحه فين ياولية ..انت بتكلمي جد؟

المديرة : امال بهزر !! شوفي شغلك يا حسنات .. اتفرجي واتبسطي يا ست فكيهه...

تخرج المديرة وتقفل الباب وراها بالمفتاح

نبيهه: يا نهار اسود ومنيل .. دي قفلت الباب.. افتحي .. بقلك افتحي...

حسنات: تعالي هنا.. تعالي بقلك .. حتروحي مني فين

نبيهه: تنزل تستخبى تحت السرير

فكيهه:سيبك من البت الهبلة دي وتعالي جمبي عايزه اقلك كلمتين ينفعوكي... مش انت برضه مودام ؟؟

حسنات: لأااااا انسة

فكيهه: احسن برضه

حسنات:نعمم!!

فكيهه: قصدي مسيرك برضة حتتجوزي ويبقى لك بيت وراجل

يلمك بدل ما انتِ طايحة في الخلق كده؟!

حسنات: وبعدين معاكي !! ما تلمي روحك يا ولية .. الله !!

فكيهه: اسمعيني بس وما تتحمقيش قوي كده ..

بهانة: اسمعيها بس يا حسنات مش حتخسري حاجة

فكيهه:انا عايزة مصلحتك.. عشان لما حد يتهبل ويفكر يتجوزك ( وعهد الله اللي يفكر فيكي امه داعيه عليه)

حسنات: بتقولي ايه يا ست انتِ؟

فكيهه: بقول كل خير يا ست العرايس.. مش برضة انت على وش جنازة.. يقطعني قصدي جوازة

حسنات: ايوة الراجل الحانوتي جارنا متكلم عليا...

فكيهه:ياسلااام.. ما جمع الا اما وفق...

حسنات: قصدك ايه؟؟

ست ابوها: ولا حاجة يا حسنات ..اقعدي بس وهيا حترسيكي على كل حاجة..

فكيهه: سيبيها يا ست ابوها.. هيا باين عليها مش عايزةتسمع ولا تفهم.. سيبيها كده على عماها..

حسنات: في ايه يا ست فكيهه؟ ما تقولي وتخلصيني

نبيهه: هو انا حفضل تحت السرير كثير كده؟!

حسنات: لو طلعتن انا حفرمك تحت رجليا دول...

فكيهه: خلاص يا حسنات قلبك ابيض..سامحيها النوبة عشان خاطري

حسنات : ماشي عشان خاطرك بس.. اطلعي يا نبيهه ..

نبيهه: اطلع بجد كلام رجالة

حسنات: لا يا شاطرة كلام حسنات اللي ما ترجعش في كلمة تقولها ابدا

نبيهه: انا طالعه بس ان رجعتي في كلامك انا مش حرحمك

حسنات: شايفة قلة ادبها يا ست فكيهه

فكيهه: خلاص يا نبيهه ..اطعلي بلاش غلبة.. وانت يا حسنات حقك عليا وادي راسك ابوسها

تطلع نبيهه من تحت السرير وتقعد جمب خالة فكيهه

تقوم حسنات وتقعد جمب نبيهه

نبيهه: هو انتِ ناوية ترجعي في كلامك ولا ايه؟

حسنات: ما تخافيش مش حعضك..

نبيهه: تعضي مين ؟ ده انا كنت......

فكيهه: بسسس.. اهمدي انت وهيا خلوني اعرف اتكلم

تعالي يا حسنات جمبي هنا.. وانت يا نبيهه تعالي من الناحية التانية

نبيهه: حاضر يا خالة

حسنات: امري لله .. اما اشوف اخرتها

فكيهه: اخرتها زي الفل ان شاء الله..صلوا بينا عـ النبي

الممرضات مع حسنات ونبيهه: اللهم صلي على كامل النور

فكيهه : قوليلي يا حسنات فرحك امتى؟

حسنات: بعد 3 شهور بعون الله

فكيهه: حلو قوي لسه في وقت اقدر ارسيكي فيه حتعملي ايه؟

حسنات: اعمل ايه في ايه؟!

فكيهه: ما جيالك في الكلام اهو..

أهم حاجة في ليلة الدخلة تلبسي اوسخ جلابية عندك.. واوعي ..

اوعيي .. تستحمي ولا تغسلي رجلك قبل الفرح ..

تفضلي الثلاث شهور دي من غير حموم...

حسنات: طب ما ده عادي .. قولي حاجة تانية

فكيهه: حلاااااوتك يا ست حسنات..

شايفة الناس اللي بتفهم يا نبيهه!مش انتِ اقلك حطي زيت خروع وتاكلي بصل وثوم .. تقوليلي. لاااا ومش عارف ايه؟؟

نبيهه: ما انا فهمت خلاص يا خالة.. ومن ايدك دي لأيدك دي...

فكيهه: قوليلي يا حسنات هو جوزك بياكل كثير وبيستطعم الأكل ولا اي حاجة والسلام ؟؟

حسنات: أي حاجة ايه.. ده همه على بطنه...

فكيهه: وياترى انتِ طباخة شاطرة ؟

حسنات: ده انا طباخة بريموا...

فكيهه:لألأ.. كده وحش قوي..

نبيهه: وحش ليه يا خالة؟؟ كده تضمن انه ماياكلش بره ويوفر القرشين

فكيهه: طول عمرك هبلة يابت يا نبيهه

نبيهه: ليه بس .. مش الفلوس اللي حيصرفها في الأكل بره.. البيت اولى بيها

حسنات: نقطينا بسكاتك يا نبيهه .. كملي ياخالة ..كملي

نبيهه: بصي يا حسنات .. لما يقلك نفسي في حلة محشي ..

مثلا يعني.. تروحي عاملاله صنية بطاطسم مش مستوية..

يقلك البطاطس مش مستوية ليه ؟؟

تقولية ماانت جايبلي بطاطس مسوسة رميتها كلها في الزبالة

ولو جابلك لحمة وقاللك يا حسنات يا روح قلبي انا نفسي النهاردة في طاجن بامية باللحمة الضاني..

تطبخيلة البامية من غير لحمة..

حسنات: طب لو قالي اللحمة فين؟

فكيهه: بسيطه قوليلة.. بقى دي لحمة تجيبها ياراجل..

اخرتها جايبلي لحمة حمير.. وتعمليها خناقة مالهاش اول من اخر

حسنات: شكلك كده حتخربي بيتي يا ست انتِ

فكيهه: لا حخرب بيتك ولا حاجة .. اعملي اللي بقلك عليه بس.. وحتشوفي ...ان ما صالحك وباس على راسك

حسنات: وبعد كده؟؟

فكيهه: تطلبي وتتشرطي..

حسنات: اطلب ايه يعني؟؟

فكيهه: يجبلك طباخ ..

حسنات: يا حوستي .. ادخل راجل غريب في شقتي

فكيهه: شقة ايه يا ام شقة.. ما هو لما يجيبلك طباخ ..

لازم يبجلك فيلا كبيرة فيها مطبخ كبير .. لا تشوفي الطباخ ولا يشوفك

حسنات: اه لو كده معلش.. وانا ابقى احط السفرة بأيدي

فكيهه: لاتحطي السفرة ولا تعملي أي حاجة خالص .. انت تقعدي زي البرنسيسةفوق في اوضتك والسفرجي يجهز السفرة وتطلع الشغالة تندهلك ...

حسنات: سفرجي وشغالة وطباخ .. هو حيجيب كل ده مينن؟؟ ده يا دوب حنوتي غلبان!!

نبيهه: وانتِ مالك غلبان ولا مش غلبان؟؟ هما اللي عندهم الحاجات دي احسن منك؟؟

حسنات: لأ طبعاً...

فكيهه: خلاص .. ولو مش عاجبة تعكنني عليه عيشته لحاد ما يعملك كل اللي انتِ عايزاه

حسنات: طب افرضي رفض وعكنن عليا هوا...

نبيهه:هو بيحبك ولا لأ؟؟

حسنات: ده بيموت في التراب اللي بمشي عليه

فكيهه: خلاص يبقى حيعملك كل اللي انتِ عايزاه

حسنات: حجرب وربنا يستر !!!

نبيهه: أي والله ربنا يستر .. وما تكونيش اول واحدة يستفتح بيها ....

فكيهه: الشر بره وبعيد يا بت انتِ...

نبيهه: ما هو لو كان اللي بيتكلم مجنون .. يبقى المستمع عاقل...

فكيهه: جن اما يلخبطك

حسنات: ما تكني بقى يا نبيهه خلينا نعرف نسمع

فكيهه: قوليها يا حسنات لحسن بتقطع حبل افكاري

نبيهه:بعون الله زمارة رقبتك هيا اللي حتتقطع

حسنات: وبعدين في يومك اللي مش فايت.. بقلك الراجل بيحبني.. بيموت فيا ....فهمتي ولا افهمك بطريقتي

نبيهه: طيب ..طيب..ما تزعليش ..ده بس من خوفي عليكي..

حسنات: ما تخافيش .. انا ادرى بمصلحتي..

فكيهه: الا قوليل يا نبيهه..انتِ ايه اللي غيرك فجأة كده؟؟

نبيهه: غيرني ازاي يا خالة؟؟

فكيهه: مش عارفة يا بت.. شكلك كده ابتديت تتأثري بكلام امك الهبلة

نبيهه: مابلاش امي يا خالة كفاية اللي اتعمل فيها بسببك

فكيهه:هيه اللي جابتوا لنفسها...

حسنات: ما تسيبكوا من السيرة دي وخلونا في موضوعنا

فكيهه: هو ده الكلام .. بس انا تعبت وعايزة كباية ميه ريقي نشف

نورا: اتفضلي يا خالتوا...

فكيهه: ياخوااااتي .. اعمل ايه في السكر ده.. انتِ يا قمر عايزلك درس خصوصي في سكه تانيه خالص.. بس باين عليكي حتتعبيني برقتك دي؟؟

نورا: ليه يا خالتوا؟؟

فكيهه: عشان نصايحي مش حتحوق فيكي ؟؟اوعي جوزك يطلب منك حاجة تردي عليه بالحنية دي .. اوعييييييي

نورا: امال اقول ايه يا خالتوا

فكيهه: حبقى ارسيكي بعدين.. اما اخلص من حسنات

نبيهه: شايفة يا حسنات مش طايقاكي وعايزة تخلص منك!!

حسنات: مالكيش دعوة انتِ .. خليكي في حالك..لحسن....

نبيهه: لا يا ياختي الطيب احسن.. تعالي اقعدي في ريحي .. خلينا نسمع كلام ست الكل..

حسنات تقعد جمب نبيهه

المديرة ترجع تاني لأوضة الخالة فكيهه تقف تتصنت

المديرة: هما سكتو ليه؟؟ تكونش الولية حسنات فطست البت !! يانهار مش فايت

المديرةتفتح الباب فجأة .. تلاقي حسنات ونبيهه قاعدين جمب بعض اخر انسجام

يتبع......

[shahd]

نبيهه النبيهه وخالتي فكيهه

المكان: اوضة خالتي فكيهه في المستشفى

الأشخاص: خالتي فكيهه, الممرضة حسنات.. نبيهه.. نورا ..وباقي الممرضات....

الحوار:

المديرة:ده ايه الأنسجام اللي احنا فيه ده؟؟

حسنات: اه امال .. انتِ فاكره ايه؟!ده احنا بقينا اصحاب..مش كده يا نبيهه؟

و تحضن نبيهه جامد ..

نبيهه بنظرة غل وبصوت مخنوق: طبعا.. طبعا..

المديرة متغاظة: اممم.. يعني مافيش مصارعه؟!

نبيهه: يا وليه انتِ مديرة مستشفى ولا حكم مبارة ؟؟

المديرة: مديرة .. غصبن عنك وعن اللي خلفوكي...

نبيهه: حسنااات.. لمي الست دي .. قبل ما اديها بالبلغة..

حسنات: جرى ايه يا ست المديرة ما تحترمي نفسك .. الله

المديرة: الله الله .. بقى كده يا حسنات.. مخصوم منك....

حسنات: يا شيخة اجري وانتِ عاملة زي عود القصب الناشف..

المديرة في حالة تهيج وغيظ..

ان ما وريتكوا .. ان ما وديتك في داهيه ...

حسنات: يا شيخة اتنيلي .. حتعملي ايه يعني؟؟

المديرة: حبلغ عنك ادارة المستشفى واقلهم انك بتاكلي اكل العيانين وبتاخدي البقشيش بتاع الممرضات

حسنات:طب ان شالله اطفحه.. انا اكلت اكلك يا ست فكيهه؟؟

فكيهه: بلاش افترى يا ست المديرة؟؟ دي حسنات بتأكلني باديها الحلوين دول

بهانة: بقشيش ايه اللي بتاخده حسنات؟؟ دي يا عيني بتوزع علينا البقشيش بتاعها

المديرة: بقى كده.. دلوقتي حسنات بقت حبيبتكم وانا اللي بقيت امنا الغولة!!

نبيهه: ايوة .. بقينا اصحاب.. عندك مانع

المديرة:ابدااا.. بس غريبة يعني

نبيهه : ماغريب الا الشيطان يا ختي

المديرة: وانتِ يا نورا مش عايزة تقولي حاجة؟؟

نورا: انا .. انا.. يا فندم..

فكيهه: سيبي نورا في حالها .. تعالي جمبي يانورا .. عايزاكي في كلمتين...

نورا: ايوة يا خالتو .. بس الست المديرة عايزاني ..

المديرة: ورايا يانور وإلا حخصم منك شهرين بحالهم

نورا : حاضر .. حاضر..يا فندم

فكيهه: سيبك من المسلوعه دي وخليكي معايا تكسبي

نورا: ايوة يا خالتو بس كده ممكن تخصم من مرتبي..

حسنات: تجرب كده تخصم منك يومين بس.. وانا ابعت اجيب عريسي الحانوتي يتاويها ..

فكيهه: واهو يسترزق قبل الجوازة ويجيلك حق الفيلا...

حسنات: قلت ايه يا ست انت ؟! حتتلمي في يومك اللي مش فايت ده ؟؟

المديرة: انتِ اتجننتِ.. انتِ مش عارفة بتكلمي مين؟؟

حسنات: حكون بكلم مين يعني.. وليه مفتيرة .. ما كفاكيش كل اللي عملتيه .. كمان عايزة تفتري على البونية الغلبانة دي...

المديرة: لااا انتِ زودتيها قوي...

المديرة لسة حتطلع الموبايل

حسنات : حتعملي ايه ..

المديرة: حطلب لك الأمن

حسنات : وعلى ايه اطلبهملك انا.. بلاش تخسري حق المكالمة..

ما انا عارفاكي بخيلة وجلدة...

حسنات تطلع الموبايل تباعها وتتصل بالأمن

المديرة: ده انت ِ مستبيعه؟؟

حسنات: لا مستبيعه ولا حاجة .. دول كلهم صحابي

المديرة: نعم نعم ؟!

حسنات فاتحة سماعة الموبايل الو..ازيك يا مرسي

مرسي مسؤل الأمن: ايوة يا حسنات ايتوها خدمة

حسنات الست المديرة عايزاك تجيبلها شوية حقن وشوية فيتمينات من صيدلية المستشفى..

مسؤل الأمن: اشمعنى المرة دي .. ما هي كل مرة بتسرقهم بفسها وانا عليا ارقبلها الجو..

المديرة مندهشة:

انا بسرق حقن وادوية من الصيدلية؟؟

حسنات: اهيه حتنكر اهيه وتلبسهالك يا مرسي

مسؤل الأمن: تنكر ايه؟؟ ده انا اطلعهم من حبابي عنيها

حسنات: خلاص يا مرسي.. عندي انا المرة دي..

مرسي: على عيني وراسي يا ست الكل .. بس الست دي لا زم تتربى

المديرة: انتَ تربيني اناااا!!

حسنات: دي بتشتمك يا مرسي..

اي .. اي .. دي عايزة تضربني..

مرسي: تضرب مين.. ثواني بس اقفل بوابة المستشفى واوض العيانين والدكاترة واجيلك فريرة ..

حسنات : مستنياك يا مرسي

مرسي: فريرة يا حسنات

حسنات: اهو مرسي جاي اهو

المديرة : يجي فين؟؟ انتِ اتهبلتي..

حسنات: يجي يربيكي

المديرة : يربي مين يا متخلعة انتِ ولا ا كمني ساكتالك وممشياكي على قد عقلك

حسنات: ايه مش انتِ اللي كنت عايزاه؟؟

المديرة: عايزة ايه ؟؟ انا مش عايزة حد .. انا كنت بهددك بس

حسنات: خلاص الموضوع طلع من ايدي...

المديرة في حالة فزع....

فكيهه ونبيهه يبصوا لبعض

فكيهه: هو في ايه هيه مالها مرعوبة كده

ليه يا بت يا نبيهه.. مين مرسي وايه اللي بيحصل ده؟؟

نبيهه: انا عارفة يا خالة احنا باين علينا في وكر عصابة مش في مستشفى

فكيهه: طلعيني من هنا ينوبك ثواب يا بت يا نبيهه ...

نبيهه وفكيهه يتسحبوا على الباب بشويش خالص

يلاقوا واحد طول بعرض واقفلهم...

مرسي:رايحين فين؟؟ يا ست انتِ وهيا؟؟

نبيهه: مش.. مش .. انت عايز الست المديرة .. اهيه مستياك جوا؟؟

انا حودي الست العجوزة دي بيت الراحة ...

فكيهه: أيوة .. بيت الراحة.. قوليله يا ست حسنات.. حاكم.. خلااااص...

حسنات: سيبهم يا مرسي ..

فكيهه ونبيهه يروحوا على الحمام

مرسي يدخل الأوضة

مرسي: بقى انا ساكتلك العمر ده كله.. واخرتها قلة قيمة...

المديرة: ما عاش اللي يقل قيمتك يا استاذ مرسي

مرسي: استاذ مرسي يا سبحان الله..

ست ابوها: اشوف فيكي يوم يا مفتريه

مرسي : هيه عملت لك ايه الولية السو دي؟؟

ست ابوها: خصمت مني اسبوع يا مرسي

بهانة: وانا كمان يامرسي خصمت مني 3 اسابيع

نورا ساكته خالص

حسنات: وانت يا نورا ساكته ليه؟؟

نورا: اصل .. اصل ....

مرسي: ما تخافيش يا نورا ..

نورا برضه ساكته...

حسنات: كانت ناوية تخصم منها النهاردة ...

مرسي: قسما .. عظما .. ان مالغيتي الخصومات دي .. لا اكون فاضحك في المستشفى كلها ...

المديرة: الغيها ازاي .. ده خلاص امر الخصم صدر...

مرسي : اتصرفي ..ان شالله تدفعيهم من جيبك

المديرة : طب استنى اجيبلك دفتر الشيكات ...

مرسي: دفتر شيكات؟! يا مديرة نص كم ؟!!

حسنات: انا عندي الحل.... خدالساعه اللي في ايدها رهن لحاد ما تجيب فلوس الناس...

مرسي لسه حياخد الساعة

المديرة .. خلاص ..خلاص .. خد كل الفلوس اللي معايا .. بس بلاش الساعه.. مش بتاعي.. انا سلفاها من واحده صاحبتي

حسنات: سلفاها؟؟؟

مرسي : وعمالة تفشري علينا .. وسالفة ايه كمان؟؟

المديرة في قمة الغيظ.. والله لا وريكم ...

حسنات : توري مين يا شاطرة

مرسي: الست دي باين عليها مش ناوية تتلم

مرسي يبص لحسنات .. حسنات تشاور لمرسي

شوف شغلك يا مرسي

المديرة: لالألأ .. حتلم .. حتلم خلاص..قوليلة يمشي يا حسنات

حسنات : امشي انت يا مرسي ..

مرسي: انا ماشي عشان خاطرك بس يا حسنات

المديرة : متشكرين يا استاذ مرسي

مرسي يضحك ضحكة ساخرة

نسوان تخاف ما تختشيش....

مرسي يخرج من الأوضة..

المديرة تروح على مكتبها وباين ناوية على نيه...

حسنات : امال فين الست فكيهه والبت نبيهه؟؟

ست ابوها: دول في الحمام؟؟؟

حسنات : كل ده في الحمام اجري دوري عليهم.. ما تودواناش في داهيه

بهانه وست ابوها : حاضر يا ست حسنات

نبيهه وفكيهه مستخبين في اوضة ضلمه....

فكيهه ماسكة في جلابيه نبيهه:

نبيهه: سلام قولا من رب رحيم!! احنا فين يا خالتي؟!

فكيهه: انا عارفة يا بت .. باين علينا .. بسم الله الرحمن الرحيم.. كده مع!!!

نبيهه:عاااااااا.. احنا في المشرحة ياخالتي..

يتبع......

تم تعديل 7 نوفمبر 2009 بواسطة شهد

[shahd]

نبيهه النبيهه وخالتي فكيهه

المكان : مشرحة المستشفى

الأشخاص : نبيهه, خالة فكيهه

الحوار

نبيهه : يادي المصيبة.. حنعمل ايه دلوقتي

ياخالة وسط الميتين دول

فكيهه: والله ما انا عارفة يابت .. يظهر علينا

وقعنا ولا حدش سما علينا

نبيهه: يعني ايه؟؟ مش حنطلع من هنا؟؟ مش حتجوز

يالهوووي.. يا حظك الاسود يانبيــــــهه

فكيهه: بس يا بت اخرسي خالص .. حتفضحينا

نبيهه: اديني اتخرست اهوه..وريني حتطلعينا ازاي

من الوقعه السوده دي؟

فكيهه: ما تخافيش يابت .. هاتي ايدك

نبيهه : مالك ياخالة في ايه؟؟

فكيهه: ايه ده؟؟ ايه ده!!

نبيهه متنحه في وش خاله فكيهه

وتشهق خاله فكيهه شهقه ..شبه شهقة الملوخية

بالارانب

نبيهه: في ايه ياخاله؟

فكيهه: اسـوكتِ .. اسكووتِ .. تعرفي مين دي يابت

نبيهه: حتكون مين يعني يا خالة ؟

.

فكيهه: دي الوليه ام اربعه واربعين...

نبيهه: حرام عليكِ ياخالة..

فكيهه: حرمت عليكِ عيشتك.. اصلك مش عارفة هيا

عملت فيا ايه؟؟

نبيهه: مهما عملت.. مايجوزش عليها غير الرحمة

فكيهه: رحمة ؟؟ الهي يكحمها مطرح ما راحت..

نبيهه: ياخالة فكيهه ..ابوس ايدك خلينا نطلع

من هنا وسيبك من الست دي دلوقت

فكيهه: ودي تيجي!! ده انا ماصدقت لقيتها.. اقعدي

يابت اقعدي ..واتفرجي عليا وانا بمسح بيها بلاط

المشرحه

نبيهه: يا خالة عيب عليكِ.. حتمسحي البلاط بست

ميته.. اتقي الله.. ولا اكمنها رفيعه ومسلوعه

فكيهه: ما هي ما لومكانتش كده ما كنش....ولا بلاش...

نبيهه: بلاش ايه بس؟ انتِ حتفضلي تكلميني بالالغاز؟

فكيهه: لا الالغاز ولا حاجه يابت ..سيبني في حالي؟

اطلع كل اللي عملته فيا وهيا على وش الدنيا

الوليه السو دي

نبيهه: المسامح كريم ياخالة..ويابخت من قدر وعفي

فكيهه: اسامحها .. ودي تيجي.. ده انا يوماتي

بدعي ربنا ..اني الاقيها .. واديني لاقيتها..

نبيهه: لقيتيها ..ميته .. ميتــــه..

فكيهه: ميته بقى ولا حيه!! حمسح بيها البلاط يعني

حمسحه..

نبيهه: الظاهر انك مش حتجيبيها البر ...هاتي

ايدك ياخالة

وتشد نبيهه ..خاله فكيهه من دراعها..

فكيهه: سيبني ايدي يابت .. سيبيني افش غلي..

نبيهه: نبيهه حتفشي غلك في مين؟؟ كنت فشتيه

فيها وهيه لسه عايشه

فكيهه: هو انا يعني كنت اقدر اعمل حاجة

وماعملتهاش !!

نبيهه: يبقى خلاص ادعيلها بالرحمة وانسي كل اللي

عملته فيكِ ....

الا هيه عملت فيكِ ايه يا خاله ..هه؟!

فكيهه: طب اقعدي يا بت اما احكيلك..

نبيهه: وادي قعده.. قولي ياخالة .. انا كلي

ودان مطرطقه...

فكيهه: شوفي يا ست البنات... الست دي كانت

جارتي في شقتي القديمة انا وعمك هنداوي..

قبل ما ربنا يفتحها علينا ويرزق عمك الحاج

هنداوي من وسع..ويبقى جزار قد الدنيا...

نبيهه: هاا وبعدين ..

فكيهه:الست دي يا نبيهه يابنتِ .. كانت ولا مؤاخذه..

استغفر الله العظيم.. استغفر الله العظيم... يارب استر

على ولايانا.....

نبيهه: كانت ايه يا خاله؟؟

فكيهه: عيب يا بت ما يصحش انتِ لسه صغيره ع الكلام

ده

نبيهه:بقى كده يا خاله؟؟

فكيهه: خلاص يابت ما تتقمصيش قوي كده .. حقلك..

بس احلفي مش حتيجي سيرة لأيوها مخلوق؟

نبيهه: عيب ياخاله سرك في بير...

فكيهه تحط ايديها على خدها وتبص للست الميته

بنظرة غل وحقد..

فكيهه: اقول ايه بس يا بنت.. اصل اللي حصل لا

يتقال ولا يتحكي .. منها لله ..منها لله...

نبيهه: ماتقولي بقى ياخاله ..قبل ما اي حد يطب

علينا...

قبل ما فكيهه تبتدي تحكي لنبيهه ...

الباب يتفتح ويدخل منه اتنين رجاله طول بعرض ...

عطوة: مين اللي ساب الباب مفتوح كده؟

عبد المعطي: تلاقيه الواد .....

نبيهه توشوش فكيهه: مين دول ياخاله؟

فكيهه: وطي صوتك يابت .. دول باين عليهم اخو الوليه

حسناات وجوزها!!

نبيهه بغضب شديد: انا بتكلم جد ياخاله ..

فكيهه: مش شايفه الواد اخوها شببها الخالق الناطق ؟

نبيهه: شبهها ايه بس يا خاله!!بلاش كلام فاضي

فكيهه: بصيله كويس بس ...

نبيهه بصوت عالي: ابص ايه بس ياخاله .. بقلك ايه

طلعينا من هنا ابوس رجلك ..

فكيهه تكتم بق نبيهه....شششش

واحد من الرجاله بيكلم صاحبه اللي معاه

عطوة: انت مش سامع حاجه ياعبد المعطي

عبد المعطي: لا يا عطوة يا اخويا ..يمكن بيتهيألك

عطوة: جايز!

ويقفل عطوة وعبد المعطي الباب بالمفتاح على

نبيهه وخاله فكيهه.....

يتبع

[Folana]

السلام عليكم ورحمة الله...

وحشتينا يا شهودة....عساك بخير...

تسجيل متابعة..

[shahd]

السلام عليكم ورحمة الله...

وحشتينا يا شهودة....عساك بخير...

تسجيل متابعة..

وعليكم السلام ورحمة الله وبركاته

انتِي اكتر والله ياجميل .. اشكرك

تم تعديل 16 ديسمبر 2010 بواسطة شهد

[لماضة مصرية جدا]

السلام عليكم و رحمة الله و بركاته

معلقة العسل الصافي

طب انتي قولتي يتبع....و انا قعدت و مش لقيت حاجة

و قاعدة مستنية داخلة خالتك فكيهة علي نبيهة و وراهم عطوة

ربنا يسعد قلبك

ع جنب بقي

انتي جبتي الاكسنت المصري دي منين....اعترفي قوووووووام

مساكي....اشهي من الشهد يا شهد

[عبير يونس]

دستور يا شهد يا اختي

هو لا مؤاخذة يا حبيبتي ايه اللي حصل من الولية السو دي

قولي يا ختي سرك في بير

و ربنا يستر على ولايانا

ده الضرب في الميت حرام ( وشي و انا بامصمص شفايف و باستعجب)

:blink:

انا ياختي قاعدة و حاطة ايدي على خدي و مستنظراكي

بس اوام متعوقيش احياة ابوكي

اصلي سايبة المواعين و حتتين غسيل في الطشت

انتي عارفة الافندي بتاعي يحب البيت متروق و على سنجة عشرة

و انتي يا اختي ما يرضيكيش انضرب يا اختي و انا عضمة كبيرة كده

حلفتك بالنبي الغالي لتقولي يا شيخة

طب بصي

انا هروح اخلص اللي ورايا

و ابقى آ جي اشرب معاكي كنكة قهوة و تحكيلي

هه؟hypr:

فوتك بعافية يا شهد يا اختي

راجعة لك

:110:

[shahd]

السلام عليكم و رحمة الله و بركاته

معلقة العسل الصافي

طب انتي قولتي يتبع....و انا قعدت و مش لقيت حاجة

و قاعدة مستنية داخلة خالتك فكيهة علي نبيهة و وراهم عطوة

ربنا يسعد قلبك

ع جنب بقي

انتي جبتي الاكسنت المصري دي منين....اعترفي قوووووووام

مساكي....اشهي من الشهد يا شهد

صباحك عسل يا عسل.. اديني جيت اهو اكمل .. منوراني يا جميل وميسرسي على تعليقك اللي زي السكر

احتراماااتي

[shahd]

دستور يا شهد يا اختي

هو لا مؤاخذة يا حبيبتي ايه اللي حصل من الولية السو دي

قولي يا ختي سرك في بير

و ربنا يستر على ولايانا

ده الضرب في الميت حرام ( وشي و انا بامصمص شفايف و باستعجب)

:blink:

انا ياختي قاعدة و حاطة ايدي على خدي و مستنظراكي

بس اوام متعوقيش احياة ابوكي

اصلي سايبة المواعين و حتتين غسيل في الطشت

انتي عارفة الافندي بتاعي يحب البيت متروق و على سنجة عشرة

و انتي يا اختي ما يرضيكيش انضرب يا اختي و انا عضمة كبيرة كده

حلفتك بالنبي الغالي لتقولي يا شيخة

طب بصي

انا هروح اخلص اللي ورايا

و ابقى آ جي اشرب معاكي كنكة قهوة و تحكيلي

هه؟hypr:

فوتك بعافية يا شهد يا اختي

راجعة لك

:110:

قهوتك جاهزة ياجميل.. ما جيتيش ليه؟ولا القهوة بتاعني دلعه!!

ولا يهمك ياستي ابقى اعملك غيرها .. بس تعالي ما تعوقيش..

منوراني يا عسل

[shahd]

المكان: مشرحة المستشفى والباب مقفول على نبيهه وخاله فكيهه

نبيهه بتصرخ:

نبيهه: يا دي الوقعه السودة .. يا مصبتك يا نبيهه!!

فكيهه: ششش.. اخرسي يا بت خلينا نعرف حنعمل ايه دلوقتي

نبيهه: حنعمل ايه ؟! اتصرفي يا خالتي .. اتصرفي!

فكيهه: اتصرف اعمل ايه يعني ؟ اخرسي يا بت وخلينا قاعدين لحاد ما يجي اي حد يفتحلنا

نبيهه: نعم؟ نقعد وسط الميتين؟ ! يامصيبتي .. يا مصيبني

فكيهه: وفيها ايه يا بت ما يبقاش قلبك خفيف كده؟

نبيهه: طبعا .. ما انتِ جوزك جزار وابوكي حنوتي؟ طلعيني من هنا ابوس ايدك انا على وش جواز

فكيهه: اترزعي يا بت اهي فرصه افش غلي في الولية السو دي.. على رواق..

نبيهه: كنتِ خدتي حقك منها وهيه على وش الدنيا

فكيهه: هو انا كنت اقدر اعمل حاجه وما عملتش

نبيهه: طب بصي يا خالة.. نطلع من هنا وابقي احيكلي زي ما انتِ عايزة

فكيهه: هو انا يعني كان معايا مفتاح وحشته عنك يا بت!

وتفضل نبيهه تصرخ وتخبط في الباب .. ومافيش فايده

فكيهه: مش قلت لك ا خلينا قاعدين..

نبيهه مرعوبة: بس يا خالة ....

فكيهه: من غير بس .. تعالي ورايا ..

نبيهه: على فين ياخالة؟

فكيهه: شيلي معايا ..

نبيهه: اشيل؟ اشيل ايه؟

فكيههه: الجته المتلقحه قدامك ..

نبيهه: يالهوي حتعملي فيها ايه ؟

ا

فكيهه: حتشوفي بعينك...

وتقلع فكيهه الشبشب وهاتك يا ضرب في جتتة الوليه ...

نبيهه : بس يا خالة بس.. عيب اللي انتِ بتعمليه ده!!

فكيهه : سيبيني يا بت سيبيني .. بقى انا فكيهه على سن ورمح اترن علقة ما كلهاش صبي في مولد من تحت راس الولية ده!!

نبيهه بنظرة ساخرة : من عم هنداوي؟

فكيهه: ايوة من عمك هنداوي؟

نبيهه: طب عم هنداوي ماله ومال الوليه دي؟

فكيهه: مرة رحت لعمك هنداوي .المحل لقيت الست دي داخلة .. وهاتك يا ضحك وسهوكه.. وهييييي.. وحاجة اخر مياصه

نبيهه: هااا وبعدين

فكيهه:ولا قبلين.. مسكت في خناقها وقلعت اللي في رجلي وهاتك يا ضرب .... لما شلفطتها خالص...

نبيهه: وطبعا عم هنداوي اداكي اللي فيه النصيب؟

فكيهه: ايو يا نبيهه يا بنتي .. وقدام مخاليق ربنا ... رح شاددني من شعري .. ومسح بيا البلاط

نبيهه: كل ده عشانها ؟؟

فكيهه: شفتي يا ختي الرجالة؟؟ اقله يا هنداوي .. يا سي هنداوي.. حرام عليك! ده انا مراتك وام عيالك....

تعيط فكيهه بحرقه ونبيهه تحاول تهديها

نبيهه: بس يا خالة بس .. ما تعيطيش

فكيهه: تخيلي يرد عليا يقولي.. مراتي !! هو انتِ.. هو انتِ عاده نفسك وليه في سوق النسوان

شوفي الجمال.. شوفي الدلال...

نبيهه بصوت واطي: عنده حق .. ما انتِ اصلك وليه دكر...

فكيهه: بتبرطمي .. بتقولي ايه؟؟

نبيهه: ابدا ياخالة.. بقول مالوش حق.. ده انتِ ست الستات؟

فكيهه: قوليله الكلام ده.. ده قعد يجي ساعتين يوصفلي في جمالها ..

رحت قاليله .. خلاص يا سي هنداوي .. ما تجوزها وتريح نفسك

نبيهه: هه ؟ وقالك ايه؟

فكيهه: تصوري.. يقلي .. هو انا مستني الأذن منك؟ ما انا سألت عليها .. طلعت متجوزة!!

نبيهه: لالا مالكش حق ياعم هنداوي.. رجالة مالهمش امان بصحيح!!

فكيهه: ما انا عشان كده عايزة افطمك . بدل ما تروحي على عماكي ...

ولسه فكيهه حتبتدي تتكلم مع نبيهه ونبيهه اصلا مرعوبة من المكان..

يتفتح الباب ويدخل عطوة وعبد المعطي ....

عطوة: انت سامع صوت يا عبد المعطي

عطوة: تعالى ندور

عبد المعطي: انتِ بتعملي ايه يا ولية انتِ وهيه؟

نبيهه: أااا...ءء..

فكيهه: ابدا يا خويا اصل احنا .....اتقفل الباب علينا... اهئ .. اهئ..

عبد المعطي: تعالى يا عطوة.. شفلك حل في المصيبتين اللي متلقحين هنا ...

عطوة: اممم.. ده لو حد شافهم وبلغ .. حناخد جزا .. اقلك .. لقحهم هنا لحاد ما الدنيا تهدى شويه .. وبعدين نبقى نلقحهم في اي حته بعيده....

نبيهه تمسك في رجل عطوة .. وتصرخ

ابوس رجلك .. طلعني من هنا وانا حديك كل اللي انت عايزة

فكيهه: وانا معاها ينوبك ثواب

وفي وسط المعمعه .. تعدي مديرة المستشفى ....

يبتع...........

[MaYousof]

متابع للقصة باستمتاع كبير ..

بس كنت عايز أعرف .. القهوة اللي أنتم بتقدموها في الموضوع ده .. بن يمني ولا بن برازيلي؟ :closedeyes:

[shahd]

متابع للقصة باستمتاع كبير ..

بس كنت عايز أعرف .. القهوة اللي أنتم بتقدموها في الموضوع ده .. بن يمني ولا بن برازيلي؟ :closedeyes:

اشكرك جدا على المتابعه ..ويارب تفضل مستمتع على طول

البن .بن يمني تحويجه مصري انما ايه! :coffeenews: