500 سيارة إسعاف لـ 3 مناطق بس !!!!!

[se_ Elsyed]

إذا كان المتكلم عاقل يبقى المستمع مجنون .. والعكس صحيح ...

فلو سمحتوا إقرأوا الخبر ده عشان أنا دماغي سخنت وقولوا لي حتى ولو في رسالة خاصة .. هو انا اللي إتهطلت ولا هما اللي اتهبلوا ؟

الجبلي أمام لجنة الصحة بالشعب: لا خصخصة.. للإسعاف

500 سيارة جديدة.. دخلت الخدمة في الساحل الشمالي ومدينة نصر ومصر الجديدة

مشروع قرار جمهوري بإنشاء هيئة تابعة لوزارة الصحة.. تخدم كل المواطنين

كتب- مجدي عبدالرحمن:

وجه الدكتور حاتم الجبلي وزير الصحة انتقادات حادة إلي بعض الصحف ووسائل الإعلام التي روجت لخصخصة مرفق الاسعاف وقال في حدة أمام لجنة الصحة في مجلس الشعب برئاسة الدكتور حمدي السيد ان الحكومة لن تصدر قانونا إلا لصالح المواطنين.

وأكد الجبلي ان هناك مشروع قرار جمهوري بإنشاء هيئة اسعاف مصر تكون مسئولة عن تقديم الخدمات لكل أبناء مصر وستكون هيئة تابعة لوزارة الصحة ولها شخصية اعتبارية.

وأشار إلي وصول 500 سيارة اسعاف جديدة من بين 1213 عربة اسعاف تم شراؤها وتم تجهيز عدد منها ودخلت الخدمة في مناطق الساحل الشمالي ومدينة نصر ومصر الجديدة .

500 مرة واحده .... إزاي لا مؤخذه ؟

إيه هايسبحوا التكاتك - جمع توك توك - والتكاسي - جمع تاكسي من الشوارع ويخلوا عربيات الإسعاف تشتغل عالخط وتبقى هي وسيلة المواصلات الموجودة في مصر وتوصل الناس لشغلهم ومدارسهم ومصالحهم وأهو لو حد جرا له حاجه في الطريق يبقى منه فيه ويلاقي اللي يحطوا له مكركرون على الواوا أو لو ما فيش مكر كرون يبقى يبوسوا له الواوا ؟

وبعدين هو يا مافيش خالص وممكن تمشي في مصر 1000 كم ما تلاقيش بسكلتت إسعاف واحدة ضاله في الصحراء وإسألوا المرحوم الدكتور احمد شفيق اللي مات بسببهم برضوا في الساحل الشمالي .. لهوووب بالصلاتو عالنبي 500 عربية إسعاف في الساحل الشمالي ومصر الجديدة ومدينة نصر بس ؟

وبعدين ليه الطبقية المغرضة دي اللي بتحسسني إني مواطن درجة عاشرة ولازم يقام علي الحد او أُباع وأُشترى في سوق العبيد مع البط والحمام في منطقة السيدة عائشة ؟ يعني إذا ماكنتش من قوات المارينز - نسبة إلى مارينا - أو من عباس العقاد او من ميدان روكسي ... يبقى أتعامل معاملة طبقة الـ Untouchable بتوع الهند ... وهم بالعربي كده طبقة الجربانين - آه والله - اللي ماحدش هناك بيسلم عليهم ولا يتعامل معاهم وبالرغم من إنهم بالملايين إلا إنهم منبوذين داخل وطنهم مع إنهم هنود أراري وبيركبوا الأفيال وبيحركوا دماغهم يمين وشمال زي رقاص الساعة بسرعة 100 هزة بمقياس رختير في الدقيقة .. فإذا ما كنتش من هاتوكا المناطق يبقى أولع بقى ؟

ما يتحرق الساحل الشمالي بجاز ؟ والله ما اقصد أي حد شريف هناك

بس قصدي هو عشان شوية ناس يتعدوا عالصوابع بيروحوا يصيفوا يومين تلاتة في السنة نروح مروشنينهم ومنطورين عربيات إسعاف في كل شبر هناك وتولع باقي البلد ؟

طب لو كان قالوا في محافظة الإسكندرية كانت هاتبقى مبلوعة واهم حبايبنا وهي العاصمة الثانية في مصر والدكتور الشامي من هناك وراجل سُكرة وحبيبي من أيام الجيزة ..

وبرضوا ليه مدينة نصر ومصر الجديدة بس ؟ أنا عارف إنها بداية لكن ليه ما تكونش مدينة نصر وعين الصيرة أو المنيل أو الوراق مثلاً ؟

واهو إحنا فيها .. أرجو من مراسلينا في الخطوط الامامية بمدينة نصر وخصوصاً عادل بيه أبو زيد عُمدة ومؤسس مدينة نصر من أول ما كانت أوشلاقات للجيش ..... وصديق البرنامج الإبن موديست يعني شباب روكسي الروشين طحن يعني رجالة نادي هليوبوليس .. امانة عليكو وهأمنكو أمانة .. إنكم تمشوا في الشوارع بتاعت المنطقة وتعدوا عربيات الأمبولنس الموجودة ولو طلعوا ناقصين عربية واحده وبقوا 499 هافضح الحكومة المفضوحة أساساً وهاخلي اللي ما يشتري يتفرج عليهم ..

لإن 500 دي انا حاسس إن محرر الخبر نسي وحط صفرين زيادة .. وبصراحة برضوا مش مصدق بوء سامح ده ولا حاتم الجبلي بتاع إنفلونزا الطيور ..

[egyptien]

بص ياحاج اولا انا معاك ان مليون الميه الرقم غلط ثانيا مبلاش الحقد على الناس المتدلعه دى ههههه ولو حتى يبعتولهم دبابات بدل العربيات منشله تولع بيهم قول امين