رحلة اللاندنج

[Queen]

السلام عليكم و رحمة الله و بركاته،

اخواني و اخواتي لقد انقطعت عن المنتدى الجميل ( طبعا كلكم افتقدتوني جدا و بعتولي رسايل يامه wst:: ، الله يسامحكم) و ذلك بسبب سفري لعمل اللاندج و قضاء باقي الاجازة الصيفية بمصر.

احمد الله تعالى على التوفيق في رحلة كندا و لو هناك من يريد سؤالي عن اي شئ بخصوص اللاندنج (طيران ، اجراءات ، تكاليف، خلافه) انا في الخدمة.

[samehelassad]

الاخت الفاضلة والعزيزة كوين.

الف الف الف حمدلله على سلامتك.

يارب تكون رحلة موفقة. واعتذر عن تقصيري لكن الحقيقة انا كنت في اجازتي السنوية في مصر وانتي بتعملي اللاندنج.

بصي بقى ياستي ياريت لو تحكيلنا بالتفصيل عن الرحلة وكل حاجة وعملتلا لاندنج فين وناوية على اية وانطباعك اية وتنصحينا باية.

ياريت ماتتاخريش احنا مستنين نسمعك.

وحمدلله على سلامتك مرة اخرى.

[AboAsem]

الأخت كوين

حمد لله على السلامه ، إن شاء الله تكونوا توفقتم فى رحله الاندنج

الأسئله ، عملتوا لاندنج فى أى مدينه ؟ أسباب الإختيار ؟

كم المده اللى قعدوتها فى كندا ؟ و هل خلصتوا الأوراق المهمه خلال هذة المده ؟

حاولتوا تدوروا على شغل ؟؟ فيه أى إنطباعات عن سوق العمل ؟؟ ما هى تخصصك أو تخصص زوج حضرتك ؟؟

يا ترى إيه الخطه المستقبليه ؟ ناويين تستقروا فى كندا إمتى ؟

مبروك و بالتوفيق

أبو عاصم

[hosiny]

حمد الله بالسلامة يا كوين.....انتي لسه هتسألي اذا كان حد عايز يسأل عن حاجة و لا لأ؟؟؟

عايزين كل التفاصيل و الصغيرة قبل الكبيرة.....و اعمليلنا حلقات عن كل حاجة خطوة بخطوة و الحجات اللي قابلتيها و خبراتك اللي ممكن نستفيد منها لان كل واحد سافر كندا شاف حجات غير اللي غيرة بيشفها.....مستنييين حلقات

Queen trip series

[msheikh]

حمدا لله على سلامتك ياخت كوين

مصر نورت بيكى برجاء اعطائنا تفاصيل رحلتك من البداية الى العودة ولكي جزيل الشكر. ولا تنسى الاجابة على الاسئلة السابقة

شكرا لك والسلام عليكم ورحمة الله وبركاته

اخوك محمد الشيخ

[Queen]

السلام عليكم،

انا بسألكم عن اسئلة علشان يكون الرد عليها سهل لأني بحس اني معنديش ملكة كتابة قصة، و لكن ححاول.

اولا احنا كنا مقدميين فدرالي في اغسطس 2004، استلمنا الباسبور بعد معاناه في يوليو 2008، حجزنا للسفر لكندا في اغسطس الماضي.

و لاننا فدرالي كان علينا اختيار اي مكان غير كيبك للاندج، و لان لينا اصدقاء في تورنتو اختارنها لعمل اللاندج فيها.

الطيران:

احنا محجزناش رحلة الطيران من بدري و لذلك ادبسنا ، رحلة مصر للطيران لكيبك هي ارخص طيران بس كل الاماكن محجوزة حتي منتصف سبتمبر (من الافضل ان كان الواحد عارف ميعاد السفر انه يحجز من بدري اوي)

كان لازم نسافر في اجازة الصيف علشان كده اضطرينا نحجز في Air France الى تورنتو ، فرق الاسعار كبير . بس Air France بتعمل عروض قوية جدا بس في منتصف سبتمبر. الرحلة كانت مرهقة جدا و خصوصا بالاطفال.

ممكن الواحد يسافر مصر للطيرن لكيبك، ومن هناك ممكن يروح تورنتو لو عايز باي وسيلة Via Rail او coach canda أو طيران داخلي يحجزه من Expedia مثلا.

الفندق:

حجزنا مع Expedia في Days Inn في Downtown المكان كان كويس و الاسعار معقولة و قريب من كل حاجة

المواصلات:

لاننا كنا downtown كنا نستخدم TTC مترو الانفاق بتاعهم بيروح في كل حته ممكن تتخيلها.في Subway و في street cars و ليه خريطة بتسهل كل حاجة.

الاوراق و الاجراءات:

في المطار كانت اجراءات الاندج piece of cake ، كنا مجهزين CORP( اوراق بتستلمها مع الباسبور و الفيزا) و ايضا نماذج B4، و العنوان اللي عايزنهم يبعتولنا عليه PR(عنوان اصحابنا طبعا)

عملنا كمان SIN(ممكن معرفة مكانه من النت)، و حساب في بنك RBC (الاكثر انشارا و الاكبر في كندا)، كله سهل

كنا عايزيين نعمل رخصة سواقة و لكن ملحقناش.

الفسح:

Toronto Zoo

Toronto Island

CN Tower

Niagra Falls

China town

Wonderland

Duffrein Mall

الاكل:

انا كنت فاهمه ان موضوع اكل حلال يعني مانكلش خنزير و خلاص، و لكن طلع الموضوع اكبر بكثير، منكلش كمان اي ذبيحة غير حلال فراخ او لحم

يعني كده كل محلات الفاست فود المعروفه لينا مش حلال، مفيش غير محل واحد اسمه Popeyes بيقولوا بيقدم اكل حلال. اول يوم اكلنا في KFC و ربنا الهمني اني ابص جوه الساندوتش لقيت حطين شريحة Beacon فيها ، و طبعا قرفنا من الاكل جدا و تقريبا مكلناش بقيت الرحلة.

اللي رايح كام يوم بيتبهدل في الاكل، و لكن اللي رايح يستقر حيجيب لحوم و فراخ ذبيحة حلال و يطبخها و يظبط حاله.

طبعا في اماكن اكل حلال، محلات صغيرة في اماكن متفرقة قدرنا نعرفها في اخر كام يوم.

بالنسبة للسوبر ماركت في No frills موجود في Duffrein Mall ممكن يتراح بال Subway.

اسعار كل الاكل غالية، ما عدا الفراخ و اللحوم ارخص من مصر.

كفاية كدة النهاردة، بكرة نكمل موضوع الانطباعات، و الاستقرار في كندا ، و ساعدوني باسئلتكم.

[agmaa]

حمد الله على السلامة

لى سؤال على "و لاننا فدرالي كان علينا اختيار اي مكان غير كيبك للاندج، و لان لينا اصدقاء في تورنتو اختارنها لعمل اللاندج فيها" هل او فيدرالى ما ينفعش أديهم عنوان فى كيبيك يبعتوا عليه ال PR؟

شكرا

[ELSHAMY]

حمد الله على السلامة

لى سؤال على "و لاننا فدرالي كان علينا اختيار اي مكان غير كيبك للاندج، و لان لينا اصدقاء في تورنتو اختارنها لعمل اللاندج فيها" هل او فيدرالى ما ينفعش أديهم عنوان فى كيبيك يبعتوا عليه ال PR؟

شكرا

ينفع

[Queen]

السلام عليكم،

كما تفضل الدكتور الشامي ينفع باذن الله.

الفيدرالي لازم يعمل اجراءات اللاندج في اي مكان غير كيبك، المقدم على كيبك بيكون معاه CSQ ودي لازمة لعمل اللاندج في كيبك، الورقة دي مش بتكون مع المقدم فدرالي.

و بعد انهاء اجراءات اللاندج للمقدم فيدرالي في مطار تورنتو مثلا ممكن يروح في اي حته هو عايزها جوه كنده حتي كيبك، و بناءا عليه ممكن ان حضرتك تديهم عنوان بكيبك لارسال الPR عليه مفيش مشكلة باذن الله.

[hosiny]

حلوة الحتة دي والله

وبالنسبة لاسلوبك يا كوين انا شايف انه ممتاز و يغلب عليه الطابع العملي....ومش لازم يا سيتي الطابع القصصي

عارفه المواضيع بتجر بعضها و بتفكرك ببعضها....يعني حاولي تحكيلنا عن اي موضوع حتي لو صغير هيفكرك بموضوع كبير و هكذا هتلاقي السلسة و الافكار تدفقت و مستنيين .....مواضيع اكتر و معلومات كمان

[samehelassad]

اية يااخت كوين هتفضلي محنسانا كدة ولا اية؟ خشي على الكلام الحلو التقيل عاوزين ندعيلك وتفيدينا بتجربتك.

[arora]

حمد ا لله على السلامة يا كوين

وحياتك يا اختى لو اعرف انك مقدمة فيدرال لا كنت بقيت صاحبتك الانتيم من زمان وكنت سالت عليكى وغرقتك ايميلات

لانى حاسة انى فيدرالية وحيدة فى المنتدى ده اللى كله كيبكاوى

لكن الحمد لله ربنا عوض صبرى خير ولقيتك :rolleyes:

حمدا لله على سلامتك وسعيدة بمعرفتك

قوليلى بقى لما قدمت الابليكيشن ومعاه امتحان الايليتس ولغاية لما ردوا عليكى (4 سنين)

هل طلبوا منك اعادة الايليتس ؟؟؟؟لمرور اكتر من سنة عليه

يا ترى ناويين تستقروا امتى فى كندا ؟؟؟

وماذا عن اولادك ؟؟؟ فى اى مراحل دراسية وماذا عن وضعهم فى كندا

[Queen]

السلام عليكم،

نخش على موضوع الانطباعات.

نبدأ بالانطباعات الحميدة.

النظام:

كل حاجة في البلد ليها نظام، انا انبهرت بالنظام و انبهرت اكتر من قدرة الناس على اتباع النظام . الsubway ليه نظام و الطوابير في كل حته حتى على washrooms ليها نظام، عبور الشارع ليه نظام مفيش حد يعدي حتى لو الشارع فاضي تمام حتى تضاء اشارة العبور،لو عايز تتطلع sin بيقى مطلوب منك كذا و كذا تجيبهم تخلص تخرج، تطلع رخصة يبقى تجيب كذا و كذا تخلص و تخرج، كله موجود على النت، كل حاجة بمعنى الكلمة. النظام ده مخلاش عندنا خوف ان احنا نتوه او نحتاس. لو عايز تروح المشوار الفلاني، تبص على مكانه على النت و ايه المطلوب منك و ساعات العمل و تاني يوم تروح و تخلص. النظام هو من اكتر الاشياء اللي فعلا بتفرق كندا عن مصر. البلد هي الحاطة نظام لكل حاجة و الناس بتمشي عليه، بتجبر الناس على احترام النظام، و الدليل ان احنا عمرنا ما مشينا على نظام في بلدنا و اول ما نروح هناك بنمشي على النظام.

النظافة:

البلد نظيفة و محدش بيرمي او حتي بيفكر يرمي حاجة في الشارع، كل اتنين تلاته متر في مكان للمهملات.

washrooms:

لو انت في مصر في الشارع و بتدور على washroom مفيش امامك غير محلات الفاست فود او ترجع البيت طبعا ، لكن هناك في كل مكان في public washroomsو معظمها نظيف.

السماحة و حب مساعدة الغير من غير سبب:

الموقف الاول: عند وصولنا المطار هناك كنا بنبحث عن حاجة تاخدنا للفندق، من غير ما نسال لمجرد انه حس ان احنا ملخوميين جه ضابط المرور و قالنا خدوا الshuttle للفندق، انا قلتله ممكن ناخد ليموزين للفندق قالي لا ليه ليموزين الshuttel حيوصلك لمعظم فنادق الDowntown و ارخص طبعا.

الموقف التاني: سائق ال shuttle و كان مصري، سألنا عن اي فندق احنا رايحيين، لما قلناله قال shuttle مش بيعدي على الفندق ده ولكن انا حاوصلكم علشان معاكم اطفال.

الموقف الثالث: بنجيب حاجة اسمها Day pass لل subway واحد لكل واحد ممكن نركب بيه طوال اليوم بس في الاجازات بيكون واحد بس لكل العائلة، و مكتوب عليه انه لا يمكن ارجاعه و استرداد الفلوس، الموظف في الsubwayلقى ان احنا جايبيين 2 في يوم الاجازة و حس ان احنا جداد و مش عارفين النظام فرجع لينا تمن واحد.

مواقف كتير بسيطة و لكن تشعر منها ان الناس هناك عندهم ذوق و احترام شديد للآخر.

انا مش بقول ان مصر وحشة و مفيهاش كذا و كذا، و لكن دي الحاجات اللي من وجهة نظري حسيت انها مهمة و مش موجودة بشكل كافي فبلدنا.

تم تعديل 8 أكتوبر 2008 بواسطة Queen

[Queen]

الانطباعات السيئة بقه:

الاكل:

كل المحلات بتقدم لحم الخنزير على كل حاجة و في كل حاجة كأنه ببلاش. محلات الحلال قليلة جدا ، الفاكهة و الخضار غاليين، و الفاكهة المصري احلى. الاجبان غاليه و اللبن معظمه خالي الدسم. الحاجة الوحيدة اللي عجبتني هناك هي Lays الشيبس.

اللبس:

معظم الناس لابسه من غير هدوم في الصيف.

المجانين و الشحاتيين:

في ناس كتير بتكلم نفسها في الشارع، و الشحاتيين و المدمنين و المخموريين كتير في الشارع. مش كتير اوي بس قعدت عشر ايام Downtown تقريبا بشوف 2 شحاتيين و و احد بيكلم نفسه كل يوم.

الشواذ:

مناظرهم استغفر الله حاجة تقرف، و لما الاولاد بيلحظوا و يسألوا هو الراجل ده عامل كده ليه بتبقى مشكلة. شفتهم بمعدل و احد يوميا و خاصة بعد المغرب.

بليل:

اول يوم كنا في الشارع بعد المغرب، اول ما الشمس بتغرب الناس شكلها بيتغيير، الناس الصبح فايقة و نشيطة في اديها القهوه و رايحة شغلها، بليل بيكون المخموريين كتير في الشارع و تجمعات السود بتكتر و الشواذ بيطلعوا ، و علشان كده كنا بنحاول نرجع الفندق اول ما الدنيا تضلم.

موقف:

في محل للأكل، واحد سكران وقف في نص المحل يرقص و يحاول يضايق البنت اللي بتشتغل في المحل و محدش قادر عليه، و بيهددوه انهم حيطلبوله البوليس و خرجوه مرتين و يرجع تاني، و اولادي مش فاهميين ده ماله، اول ما خرجنا من المحل كان في واحد ماسك شنطة حريمي و صابغ شعره، و لابس اكسسوارات، و احنا راجعين جري على الفندق كانت محلات بيع Adultsفيديو ورا بعضها، و بجوارها محلات لبيع الملابس الغير محترمة، الكلام ده في شارع Younge Street، اليوم ده الواحد حس ان تربية الاولاد في مكان زي ده Wont be an easy job ، لما يكون العادي انهم يشوفوا الكلام ده كل يوم.

[Queen]

الاستقرار في كندا:

كندا بالنسبة لينا مشروع، دفعنا فيه و تعبنا فيه ، باذن الله لازم نكمله، يعني لازم نرجع علشان ندرس و نشتغل و نخوض التجربة و نتمنى من الله انها تكون ناجحة.

ان شعرنا ان اولادنا في خطر لازم نسيبها، لان اولادنا هم اهم حاجة عندنا.

ناويين نرجع للأستقرار في الصيف القادم باذن الله.

شكرا استاذ حسني على ذوق حضرتك

شكرا يا arora، بالنسبة للأيلتس انا مطلبهوش مني و لا من زوجي كان waived. بالنسبة لاولادي واحد 6 و الثانية 3 سنوات، وانا موجودة لو عندك اسئلة تانية.

[hosiny]

يا سلام عليكي يا مدام كوين....عارفة احلي حاجة في اسلوبك المباشرة و روح الصدق و الحيادية

وفعلا اسلوبك جميل و مباشر و وواقعي وانا معاكي في نفس تفكيرك بخصوص كندا بالضبط.....انا هاروح و اجرب و لو حسيت ان فيه خطر علي اولادي هارجع علي طول بردو...بس انا يمكن عندي اختلاف بسيط اني مش ناوي اقعد هناك لما الولاد يوصلوا فترة المراهقة لان ساعتها المقاومة بتبقي صعبة و لازم يتحطوا في مكان امن علي دينهم بالذات ان عندي بنوتتين و البنات تربيتهم غير الولاد....

استمتعت جدا باسلوبك و منتظرين المزيد عن اللي شفتيه هناك و رؤاك للدنيا و العيشة و الناس...

ايه اخبار المساجد حواليك و الجالية الاسلامية....

كلمينا عن السكن من وجهة نظرك و متوسط المصاريف بتاعتكوا في الفترة دي (الفترة الاولي)

انتوا قضيتوا الشهر ده كفسحة فقط ولا كان فيه انشطة تانية؟؟

دي مجرد نقط كـ Brainstorming و مستنيين اللي يجي علي بالك

[dracoola]

ما شاء الله فعلا الأسلوب المباشر أنفع لمن يريد أن يستفيد من تجارب الآخرين

صحيح الأسلوب القصصي بكون ممتع

لكنه لما بزيد عن اللزوم بكون بشع وممل

تشجيع كبير للأخت Queen

والله يوفقك

[arora]

شكرا يا arora، بالنسبة للأيلتس انا مطلبهوش مني و لا من زوجي كان waived.

ما معنى هذا iI can,t understand

تم تعديل 8 أكتوبر 2008 بواسطة arora

[Queen]

السلام عليكم،

شكرا استاذ حسيني و استاذ دراكولا على تشجيعكما لي، ان شاء الله اكتب مداخله عن النصايح اللي ممكن في رأيي تفيد اللي هيعمل لاندج قريب.

بالنسبة للمساجد في مسجد Downtown toronto في تقاطع شارع Bay مع Dundas و كنا راييحين علشان نصلي فيه الجمعة، ولكن لم نتمكن من الوصول اليه مش عارفه ليه، قعدت اسئل كل محجبة في المنطقة المحيطة بالمسجد علشان حد يوصفلي مكانه لكن محدش كان عارفه، اصدقائنا قالولنا انه كان قريب جدا مننا و لكن مفيش نصيب.

المسلمين كتير و منتشريين من جنسيات مختلفة و بشتغلوا في كل حاجة، لكن محلات المسلمين للأكل الحلال قليلة و علشان كده حفتح محل للأكل الحلال و ان شاء تيجوا تاكلوا عندي بتخفيض اتنين ونص في المية.

بالنسبة للسكن احنا ما دورناش كتير لاننا مكناش حنستقر المرة الدي، بس هناك مجلات كتير اوي مجانية فيها اعلانات كتير جدا عن اماكن الايجار ، و انا شايفة ان الايجارات في متوسط 1200 الى 1400 للشقة.

بالنسبة لرحلة اللاندج (عشرة ايام) من غير مصاريف الطيران و الفندق، شاملة الاكل و الفسح في حدود 2000 الى 2500 دولار

الطيران على مصر الطيران 20000 جنيه مصري لاسرة اربع افراد و ده لحد مونتريال

الفندق كويس عشر ايام في Downtown toronto في حدود الف دولار

احنا قعدنا عشرة ايام فقط ، اول يوم SIN و بنك account و بقية الايام فسح

كان ممكن نعمل الرخصة و الكارت الصحي و لكن كسلنا و قلنا المرة الجاية.

arora ساعات بتوع الهجرة بيطلبوا من ناس حاجات زيادة و يعفوا بعض الناس من حاجات تانية، زوجي واخد ماجستير من امريكا و علشان كده اعتقد عفونا من الأيلتس لانه اكيد حتكون انجليزيته كويسه. بس طبعا مش شرط كل حالة و حظها. احنا اتعفينا من الايلتس بس تعبنا اوي في حاجات تانية.

[alaashabana]

الله على موضوعك يا مدام كوين ...

بجد من اشد المتابعين .. ويارب تحكيلنا كمان وكمان .. وبالتفاصيل المملة جداااا.. لننا بجد مستمتعين انك تتكلمى عن الحلو والوحس فى كندا..

حسيت انى عايش هناك بجد..

ربنا يوفقكم جميعا يارب