من أول عضو رد عليك فى المنتدى؟

[Spider]

الأنطباع الأول يدوم

أعتقد ان هذه المقولة صحيحة 100 % وهذا ينطبق على أشياء كثيرة فى حياتنا ولا ننسى أنطباعاتها الأولى فى أذهاننا...

بأختصار شديد لاحظت ان كثيرا من الأعضاء يتذكرون أول عضو قام بالرد عليهم فى هذا المنتدى على أعتبار أن هذا الرد هو من الأنطباعات الأولى التى لا ينساها الفرد الجديد ...

وفى منتدى آخر قام أحد أعضاءه بالترحيب فى موضوع منفصل بالأخ الطفشان على أعتبار أنه أول من رد عليه هنا حينما كان هذا العضو مشارك هنا....

ومنذ أيام قليلة ذكرنى الأخ عرباوى بأنى كنت من أوائل الناس الذين قاموا بالرد على مداخلة أو موضوع له...

وأنا بدورى أتذكر أن الأخ مصرى(الله يمسيه بالخير) كان اول من رد على موضوع لى وهكذا دائما الأنطباعات الأولى تدوم رغم أن هؤلاء الأعضاء الذين قاموا بالرد لا يتذكرون أو لم يفكروا فى هذا الأمر لأنهم أعضاء قدامى مشاركين منذ زمن ولكن هذا الحدث يبقى فى ذهن وذاكرة الشخص حديث العهد بالمنتدى ولا ينسى هذا أبدا...

عموما :

من هو أول عضو قام بالرد على أول مداخلة لك عند بداية أشتراكك بهذا المنتدى؟ حد فاكر؟؟؟

[مصرى]

مساك الله بالخير يا سبيدر .. فكرتنى بالذى مضى ..

لم يرد أحد على أول مداخلتين لى فى المنتدى

وفى الثالثة رد عضو إسمه خالد عنان .. وكانت مداخلته الأولى والأخيرة فى المنتدى !!

وبعدين رد على عضو آخر إسمه متابع .. وعينك ما تشوف الا النور 6 مداخلات فقط وبطل يتابع !!

ثم رد على مداخلاتى عمنا إخناتون ربنا يديم عليه الصحة والعافية

ثم الأستاذ الفاضل عادل أبوزيد

[Spider]

أهلا أخ مصرى صاحب أول تفسير لمعنى كلمة كوسة فى المنتدى

كلامك يثبت أننى صح 100 %

شوف حضرتك فاكر بالضبط أول وتانى لحد رابع مداخلة كمان وأذا كان حد قام بالرد عليهم أم لا وتتذكر أيضا من هم...

شىء غريب مش كده

لم يرد أحد على أول مداخلتين لى فى المنتدى

الحتة دى قطعت قلبى

ممكن حضرتك تقولى همّا فين وأنا سأقوم بالواجب

مش عارف ليه دائما ما أحن للماضى ولمداخلات كتبت من قديم الأزل ولما أقرأهم أبق عايز أعيط!!! آه والله

هل هذا مرض يا دكتور أبو حلاوة؟؟؟

حد يطمنى على نفسى يا جماعة...

حد تانى فاكر أول عضو رد عليه فى المنتدى ولا الكل بقى شيش بيش؟؟؟

[بنت شعنونة]

موضوع سككككر يا اخي سبايدر :)

انا اول مشاركة ليه كانوا في الشعر

كانوا موضوعين

واحد اسمه كان يا مكان

والتاني تشتري مني يا هانم

:)

اول الأعضاء اللي ردوا عليا كان د.رجب ربنا يخليه وعمي فري

ومتسائل

صحيح كان متشككين فيا جدااااااا وفاكريني عضوة تانية وخدت على دماغي اول مادخلت "وش بيفتكر الماضي"

لكن بعد شوية نقاشات كدا في خلال يومين عرفوا انه مش انا المقصودة

ونفدنا "وش ميت ضحك"

[Spider]

شعنونة!

كنت منتظر مداخلتك

أنا كنت بتكلم على أول عضو قام بالرد وبمناسبة أن أحنا ممكن نتذكر العضو الثانى فأبشرى لقد كنت أول عضوة ترد على مداخلة لى بعد الأستاذ مصرى...بجد والله مش تهريج...

خلاص الأستاذ مصرى عدى ودخل التاريخ من أوسع أبوابه!

أول موضوع لى كان بعنوان "واحسرتاه" يناقش مشروع توشكى والضجة التى حدثت عند بدايته والرخاء الذى سوف يعم البلد على أيدى هذا المشروع ثم أختفاء أخباره تماما بعد فترة من الطبل والزمر...

الأخ مصرى رد ثم شعنونة ثم أعتقد الأستاذ فارو ويمكن متسائل(مش فاكر أوى)...

أبشر هؤلاء بأنهم قد حجزوا أول مقعد لهم فى ركب الحضارة وحفر أسمهم بحروف من ذهب على كتب التاريخ

أى خدمة يا شعنونة

أبشر كل من سيشارك هنا بأن مكانه محجوز على بوابة القرن الواحد والعشرين وستكتب حروفه من ذهب ونور (حسب الطلب)...

"وش عنده تخلف عقلى"

سبايدر

مفتاح بوابة التاريخ فى جيبه

[mnman]

وسع وسع وسع...منماااااااااااااااااااااااااااااان وصل يارجالة منز .......

انا بقي اول من رد عليا كانت الاخت مدام سيدة ابوزيد وكان ردها شديد قوي و بصراحة كان عندها حق (وش واحد مكسوف جدا) ... وتاني رد كان من الاخ واحد وكان في اول توبك انا فتحتة و هو كان بعنوان علاقة الشرطة والشعب....

سبيدر ياخويا... متخدنا معاك ندخل بوابة التاريخ هو احنا ملناش نفس يعني ولا ملناش نفس......

[الطفشان]

و الله انتوا عالم فايقة قوي

بقى انا فاكر اكلت ايه امبارح لما افتكر مين اول واحد رد عليا؟

الظاهر انتوا لسة بصحتكوا و بتفتكروا حاجات كثير

احنا بقى (عجايز المنتدى) بننسى

[جـورج]

و الله انتوا عالم فايقة قوي

الظاهر انتوا لسة بصحتكوا و بتفتكروا حاجات كثير

احنا بقى (عجايز المنتدى) بننسى

انا بقى لسه بصحتى و لسه طازه ( يعنى عضو جديد )

اول واحد رد عليا كان انت يا اخ سبايدر و كانت كلمة ترحيب رقيقه منك

و بعد كده كان الاستاذ الطفشان و قالى

اللـى حيدفع راح يدخل و اللى ما يدفعش يمشى

ثم باقى الاخوه و حقيقى خليتوا الواحد يحس كأنه فتح أوضة الصالون و لقى فيها شله من الاصحاب و الكل بيرحب بالكل

[مصرى]

شوف حضرتك فاكر بالضبط أول وتانى لحد رابع مداخلة كمان وأذا كان حد قام بالرد عليهم أم لا وتتذكر أيضا من هم...

شىء غريب مش كده

أبدا .. ما غريب إلا الشيطان

الموضوع ببساطة إنك تعمل كليك على إسم العضو فى أى قائمة بالمنتدى .. ستجد بعدها نافذة مفتوحة لبيانات هذا العضو .. إعمل كليك تانية لإستعرض مداخلاته .. وبعدين هات من الآخر ستجد أول مداخلة له وتصفحها على مهلك !!

تكنولوجيا .. مش كده .. زى شكة الدبوس .. فى دقيقة واحدة تقدر تعرف ..

[مصرى]

بقى انا فاكر اكلت ايه امبارح لما افتكر مين اول واحد رد عليا؟

الظاهر انتوا لسة بصحتكوا و بتفتكروا حاجات كثير

احنا بقى (عجايز المنتدى) بننسى

أنا بقى فاكر ..

أقولك ..

أول مداخلة لك يا عمنا كانت فى موضوع "هيكل كان رئيسا لمصر" وكانت بالإنجليزى (يعنى مخالف مسبقة لقواعد الكتابة فى المنتدى)

وكان أول مداخلة بعدك للعضو free وأعتقد أنه شخص آخر غير صديقنا الحالى فرى فرير ..

لكن أول تعليق جاء على مداخلتك كان من الصديق الدكتور رجب الذى أثنى على قدرتك على التحليل ..

أيه رأيك بقى

[الطفشان]

ما شاء الله ما شاء الله

ناس لسه ما ضربهاش الالزهايمر

(و الا تكون بتضحك عليا و جبتها من البروفايل؟ يا عفريت!)

http://www.egyptiantalks.org/bforums/viewt...highlight=#1585

على فكرة

لا اظن ان هذه اول مشاركة

لان المنتدى كل فترة بيمسح القديم

و لو لاحظت، من كلام رجب، تلاقي ان فيه مداخلات اخرى قبل ذلك

و اظن قبل ذلك ب 5 او 6 شهور تقريبا

على فكرة الاخ free هو freefreer نفسه

و الافتتاحية بتاعته "اخواني و حبايبي و حتة من قلبي" كانت trademark له من زمان، و هو مشهور بها

هو غير اسمه من فترة لسبب او لاخر

و ايضا، الانجليزي كان مسموح به وقتها

و بعد فترة خلينا كله عربي

و انا احتست عشان اعرف اكتب عربي، و كانت حاجة اخر لخبطة!

[Salwa]

اول واحد رحب بى وقاللى اهلا بك فى بيتك كان استاذنا الكبير الافوكاتو .

وفعلا ده اسعدنى جدا وخصوصا انه قال مرحبا بك مرة اخرى ...لانى كان سبق وسجلت نفسى ولم اكتب شىء ...فاعتبرت هذا ....دعوة لى للانضمام لهذه النخبة الرائعة ..

وبصراحة ...كلكم بعدها تقبلتونى كأنى واحده من العائلة ...وربنا يديم المعروق ....

وعلى ضمانتى ....اذهبوا لركن القصص والقوا نظرة على الحكايات ...شجعونى علشان احكى لكم حكاية تانيه ......

سلامى.

[Spider]

سبيدر ياخويا... متخدنا معاك ندخل بوابة التاريخ هو احنا ملناش نفس يعني ولا ملناش نفس......

أعتبر نفسك دخلتها يا منمان

هو أنا حلاقى أعز منك وبعدين المفاتيح فى جيبى .. هنيئا لك(وش بيضحك)

جورج كتب

اول واحد رد عليا كان انت يا اخ سبايدر

الأخ جورج لقد أخذت عهد على نفسى أن اهب نفسى لغيرى...

كده أتفتحتلك طاقة القدر

(وش مبسوط شوية)

الطفشان كتب

بقى انا فاكر اكلت ايه امبارح لما افتكر مين اول واحد رد عليا؟ 

الظاهر انتوا لسة بصحتكوا و بتفتكروا حاجات كثير

على مين الكلام ده يا أخ طفشان

متخفش محدش حيسدك .. العيون كلها مركزه بكامل أتساعها على الأستاذ مصرى اللى فاكر أول أربع مداخلات له ومين رد عليه ...

ولمّا زنقناه قالك تكنولوبيا(عدّة عليا أزاى دى)

"وش عنيه بظّة لبرة"

[Spider]

وعلى ضمانتى ....اذهبوا لركن القصص والقوا نظرة على الحكايات ...شجعونى علشان احكى لكم حكاية تانيه ......

سلامى.

أيه ده؟؟؟!!!

دعاية فى الموضوع بتاعى على موضوع ليكى

فين الرسوم؟

حبعت لحضرتك أستمارة تكلفتها 5 قروش تضعى عليها دمغة ب 150 جنية ثم تبعتيهالى عشان العملية تبق رسمى...

(وش بيعيط على حياة اليومين دول الصعبة)

[Lancelot]

من حوالي 6 شهور تقريبا (في يوم 8 القادم يكونوا ستة أشهر بالضبط) .... إشتركت في المنتدي .... رغم إنهم بيقولوا إن الأوقات الحلوة بتعدي بسرعة إلا إن الستة شهور دول عدوا بالراحة .... و كانوا من الأوقات الحلوة أوي أوي أوي .... و المفيدة جدا كمان .....

بعد المقدمة العاطفية .... ندخل في الموضوع ..... أنا مفتري ... أول مداخلة ليا في المنتدي هنا كانت موضوع جديد ... و كمان في باب السياسة الخارجية ... مش بأقولكم مفتري .... الموضوع كان بعنوان "من يدير الإعلام" ... و كان عن سيطرة الصهاينة علي الإعلام الأمريكي .... الموضوع كنت مترجمه من الإنجليزية عن واحد إسمه "ديفيد ديوك" و هو راجل سياسي أمريكي ... كنت معجب بيه أوي لأنه كان بيتهم إسرائيل بكل حاجة وحشة إسرائيل بتعملها .... المهم نقلت الموضوع مترجم طبعا ... و كنت حاسس إني الواد اللي جاب الديب من ديله ... أوعي ...

أول ناس ردت عليا علي ما أفتكر .... كانوا الأستاذ مصري و الأستاذ محمد أبو زيد و الأستاذ الأفوكاتو (أول واحد رحب بيا .. شكرا يا أستاذ أفوكاتو) .... لكن أول واحد رد عليا كان الأستاذ الطفشان .... تجاهل كل اللي أنا كتبه و قاللي إنه مش المفروض أقول عليهم يهود المفروض أقول عليهم صهاينة ... و كمان بلاش أنقل عن ديوك لأنهم راجل عنصري و بيكره السود و اليهود النهاردة ... الله أعلم ممكن تكره مين بكره ...

طبعا أنا قعدت أأوح و أقول ليه ما أنقلش عن ديوك .... طبعا الأستاذ الطفشان تعب معاي أوي لغاية لما فهمت إني لما أنقل عن مصدر نص كم يبقي كلام نص كم حتى لو كانت المعلومة المنقولة صحيحة ....

و من الموقف ده ... بدأت أتعلم كل شوية من وجودي هنا في المنتدي ....

شكرا لكم جميعا ... لكل من رد علي كلامي أو قرأه أو أي حاجة ...

بدأنا بمقدمة عاطفية و كان لازم نختم بواحدة ... "وش عاطفي مووووووووووت"

[Lancelot]

لكن اللي مش هأنسأه هو الموضوع اللي كتبه حبيبي س س الشهير بـ"سي السيد" .. كتب موضوع بعنوان "ترحيب" ... يرحب بكروس فيلد و نورا و العبد لله ... و بيقول علينا بنعمل مشاغبات في كل موضوع ....

فعلا كنت طاير من الفرحة بالموضوع ده ... شكرا يا سي السيد ... هأبعت لك 4 روميات مجاملة ردا علي مجاملتك الرقيقة .... "لازم أحط وش هنا و خلاص" ...

[الطفشان]

طب حيث كدة بقى

يبقى نعمل رسوم تضاف الى الاشتراكات اللي بالمها

العضو اللي فاكر مين رد عليه، يبقى مدين للعضو اللي عبره اول واحد

و نبدأ بلانسيلوت!

[Lancelot]

طب حيث كدة بقى

يبقى نعمل رسوم تضاف الى الاشتراكات اللي بالمها

العضو اللي فاكر مين رد عليه، يبقى مدين للعضو اللي عبره اول واحد

و نبدأ بلانسيلوت!

أنا بأعتذر جدا عن الغلطو ديه يا جماعة .... خطأ مطبعي ...

أول واحد رد عليا هو ........

أنا .. "و أنا خلاص أخدت الفلوس من نفسي "

"وش هربان من الغرامة اللي عليه"

[crossfield]

أنا بقى قلبى اسود مووووووووووت

و لن أنسى لكم يا منتدى ان أول كام مداخلة محدش رد عليهم فقررت أن أكتب لنفسى و أقرأ لنفسى و أحلل مداخلاتى بنفسى.

وش حاقد مووووووووووووت و ناوى يعمل هاك على المنتدى.

[Lancelot]

أه ... علي فكرة يا أستاذ طفشان ... الأستاذ فري بيقولك الفلوس اللي عليك إديهالي و أنا هأوصلها له .....

عايزين نضيف سؤال تاني .... إزاي سمعت عن المنتدي ....