إرهاصات سين سينيه عن زيارتة للأراضي المصرية في إجازته الصيفية الأخرانية

[se_ Elsyed]

دلوقتي بس عرفت و قدّرت انت ليه ما كنتش عايز تشوفني في الأجازة في مصر

كان الله في العون يا سونسون :D

سؤالي بقى:-

ايه هي الاجراءات اللي تشتري بيها شقة من المالك الأول؟

يعني تلبس اللي على الحبل و تروح تقول له أنا طالب القرب في شقة حضرتك و بعد ما تتفقوا على المهر تطلعوا تكتبوا الكتاب في الشهر العقاري و خلاص على كده يا معلم؟ wst::

و لا إيه الي بيحصل بالضبط في هكذا موقف؟ smk:

اسهل اجراء انك تشتري من مالك اول

فلو ابو العروسة معاه عقد مسجل يبقى قشطة ومافيش مشاكل وبتروح بالعقد الجديد بتاعك مع عقده ومعاه هو شخصياً وتخلصوا الجوازة في شهر العسل قصدي الشهر العقاري

اما لو ما معاهوش يبقى على الاقل يكون معاه توكيل بالبيع والتصريف والحركات من صاحب العقار .. وبكده برضووا ممكن تروحوا الشهر وتخلصوا

انت ناوي تشتري نص نقل وحش النص ولا مش يا موديس ؟

[se_ Elsyed]

أنا مش مسرور من قانون المرور

كنا بقى لنا فترة بنسمع عن مناقشة قانون المرور في مجلس الشعب وهناك شد وجذب وحركات ... المهم إنهم طبخوه وسلقوه وطرحوه أرضاً ومع ذلك كنت فرحان أو بأوهم نفسي إني فرحان وقلت أخيراً هايبقى في حزم وقوة في تطبيق قانون المرور لإن اللي في مصر ده لا علاقة له بأي قانون مرور في العالم وهو حالة أشبه بحالات الشمبرلاح المتفلطح... ويوجد مثله حاله واحده فقط مُطبقه في جمهورية شمبونجو حيث القرود اللي بتتكلم والشمبانيزهات اللي بتعمل حركات وهي جمهورية تقع في أقصى شمال الكرة الأرضية وإنت داخل على دوران شبرا ... غير كده كل العالم المحترم اللي عندهم عربيات وحركات بيعرفوا يمشوا إزاي بعربياتهم من غير تعقيد ..

المهم كنت منتظر 1/8 ده ييجي بفارغ الصبر ... وقلت يا س س يا إبني لا تنهى عن خُلق وتأتي بمثله .. عار عليك إن فعلت عظيم ..

وبما إن بقى لي فترة طويلة بأسوق في مصر بوصل النور وماحدش بيبمبك معايا لإن خال والدة أخو خالتي كان يشغل منصب امين شرطة متقاعد - عقبال أولادكو - وشايل أنا كرته بين رموشي منين ماروح وأي سخص بيكلمني في الطريق بأطلع الكرت وأتصل بأونكل درامللي أو بطنط شيرويت مراته وأخليه يقلب الدنيا .. فقررت إني أواكب العصر وأطبق القانون على نفسي وأروح أطلع رخصه وأبقى راجل مترخص .. وبالفعل ... ولكن سامحيني يا مصر فكنت مضطر أخد معايا صينية كوسة بالباشمل وأنا رايح المرور ( عارفين طبعاً جوز طنط شيرويت اللي حكيت لكم عنه ) .. ليس من باب الوجاهة والله ولكن عشان عارف الفولة ومتوقع اللي هايحصل .. وقد كان يا سادة .. فروحت تقريباً في نص شهر 7 ومعايا أوراقي الكاملة بتاعت الرخصة وعينك ما تشوف إلا الضلمه ... زحام رهيب وكإنهم بيفرقوا لحمه ببلاش في إدارة المرور ... ناهيك عن قلة أدب الموظفين هناك سواء بتوع الشرطة أو الموظفين المدنيين ( وشوفت بعيني موظفين بيعتدوا على مواطنين غلابه باللفظ والضرب والسحل لو حاول يفتح بؤه أو يعترض وده لإنه سواق غلبان أو راجل عنده عربية بيسترزق منها أو مواطن عادي معاه حته نصر موديل 70 وجاي يجدد ورقها ) .. ولو مشيت قانوني من غير الكوسة أم باشمل بتاعت طنط شيرويت اللي بتاكل أصابعينك - على رأي اللبنانيين - وراها .. يبقى حلني يا معلم وقدامك شهر ولا إتنين على ما تاخد الرخصة ويمكن على ما تطلعها يكون قفاك ورم من الضرب .. وكانت ماما قالت لي زمان ان كُتر الضرب على القفا بيضعف النظر وأنا أساساً من كتر القاعدة قدام الكمبيوتر بقيت ألبس نضارة .. وبالتالي كان قفا واحد من دول كفيل إنه يحولني إلى إنسان كفيف وما انفعش أشتغل إلا فِقي على باب أي تُرب وحتى دي ما أنفعش فيها لأني أحفظ قصار السور فقط وبالتالي خدتها من قصيرها وأخترت طريق الرز ابو لبن قصدي الكوسة بالباشمل ...

المهم طباخ الكوسة نفسه كان معايا ودخل بي غرفة البيه الباشا الظابط المكيفة ... بالمناسبة أقسم بالله لو جربت ووقفت شوية بره مكاتبهم منتظر دورك كباقي الجمهور اللي بالمئات عشان تنجز معاملتك .. تحس إنك هاتنصهر من شدة الحر والرطوبة وهدوم الواحد بتبقى عامله زي اللي لسه خارج من ساونا وإنتوا عارفين الحر والرطوبة في شهر سبعة وتمانية وكل ده إضربوا في الخلاط مع الزحمة يطلع لك كوكتيل قرف له العجب .. ومافيش حتت مروحة توحد ربنا حتى تهوي على الناس اللي بتموت دي وريحتها قرب تفوح ... المهم البيه أخد الورق ولطع أمضته وقال لي روح ميدان الإختبار بس سعادتك عشان الظابط اللي هناك يمضي لي الورق ويبصم إنك ناجح وفالح ...وياريتني ما روحت ..

فقعدت شويه كده في الميدان داخل سيارتي المكيفة لحد البيه النقيب ما شرف ولقيته جمع الناس وأنا مش منهم ، أنا مستثنى يابا وراجل إختار طريق الكوسة - وراح واقف وسط الناس على كرسي ماعرفش ولا دكه وقايل خطبة عصماء كلها قلة أدب وألفاظ سوقية لا تصدر إلا من واحد زبال ولم يختشي ويلم نفسه على الأقل لإنه شايف سيدات وفتيات وقورات محترمات كانوا جايين يمتحنوا برضوا وفضل يهدد ويتوعد كل من سولت له نفسه وحد من العيال أمناء الشرطة الموجودين في الإختبار عشمه إنه هايعديه وأعرب السيد الزبال عن إن مزاجه عنب النهاردة وهاينجح كل الناس في إختبار إشارات المرور ( وعرفت دلوقت سبب " الشمبرلاح الفوحلقي " الموجود في مصر إيه سببه... ومضى لي البيه عالورق وروحت إتصورت وطلعت الرخصة زي السكينة في الجاتوه ...

آه بالمناسبة .. أخويا كان شاري السيارة بقى له شهر وعشان يروح يطلع لها لوحات .. إنسى يا معلم ولو ما بتحبش الكوسة بالباشمل يبقى هاتقلب العربية الجديدة دي عربية كارو وتجيب لها حمار يسحبها وتعيش حياتك وده أسهل من إنك تنال الرضا السامي وتحصل على لوحة عبارة عن حتت صفيح وعليها أرقام .. وبرضوا الراجل خدها من قصيرها وحود على طنط شيرويت وأخد كرت أونكل درمللي - والله الراجل ده بيتعب معانا وبيعمل شغل وزي الفل - وحكى علي المنظر المرعب الموجود في المرور وعن العذاب اللي الناس بيتعذبوه هناك فشر بتوع جوانتانمو .. وقال لي إن البية الظابط خرج من مكتبه عشان يقصر على المواطنين - وبرضوا الكلام اللي هاقوله ده حصل بالنص على لسان أخويا - فقال البيه المسئول : ياخواننا اللي جاي وعايز لوحات عربية وما معهوش واسطه - على بلاطه ووش كده على طول إحنا هانخبي ونداري ليه ؟ - .. يبقى يروح عند العسكري اللي هناك ده يسجل إسمه في قوائم الإنتظار وييجي كل كام يوم يراجعنا عشان يشوف اللوح جت ولا لأ .. واللي معاه واسطه ييجي الناحية دي .. وكل ذوات الوسطات اخدوا لوحات وفوقيها بوسه ..

عارفين الإعلان بتاع " لينك داتا " بتاع الدي إس إل لما الولا اللي كان عايز أغاني المطرب الحنجوري المشهور " جاستن " فلإنه لينك راح واخد الاغنية على طول بلا طوابير بلا قرف .. وهو ماشي مروح واحد كبير في السن واقف على عكاز في الطابور مسكه من أيده وقال له ": هو احنا بقينا سنة كام ياني ؟ اهو ده اللي حصل فلقد قابل هناك أخويا ناس بقى لها شهور مش عارفه تحصل على لوحات لعربياته لإنهم مش موصلين إنترنت من لينك داتا :blush2: ا ...

المهم : قعدت يا سادة إسبوعين في شهر 8 قبل ما اسافر كل اللي باعمله إني وأنا ماشي في الطرق المختلفة يمين وشمال وفوق وتحت ودايري وكباري وأنفاق أراقب سلوك الناس عامله إزاي بعد تطبيق القانون ... وفعلاً قلت صدق اللي سماه " تطبيق القانون " أي انك تجيب الورق اللي فيه القانون وتطبقة وترميه في الزبالة ... لإن النهاردة كان شبه إمبارح والقانون كان المقصود به الجباية ولسع ظهور الناس بالغرامات الفورية اللي موجودة بس في مصر ويا تدفع يا تتكحرت يا حلو وتتراكم عليك الغرامات ..

ويكفي ان بقى لهم 3 شهور دلوقت مش عارفين يعني إيه مثلث عاكس او يعني إيه شنطة حمزة .. حمزة مين ؟ صاحب الشنطة وهي المسماه بشنطة الأسعاف الهلاميه ...

كله كوم والراجل " اللواء شريف جمعه " مدير ادارة الشرطة المتخصصة واللي منصبة يأتي بعد منصب وزير الداخلية على طول .. كوم تاني ... فيادوب مافيش إسبوع عدى على الأنون إلا وألاقيه في التليفزيون كل شويه ولا السوبر ستارز بتوع التمثيل وفي احد البرامج بعد ما سمعته عالهوا فضلت أضرب دماغي في الحيط لحد ما أتفشفت 100 حته وجم العيال لموها ولحموها بالسليكون وركبوها لية تاني ..

أولاً البرنامج كان على القناة الأولى ومباشر والمفروض إنه يتلقى تليفونات السادة المواطنين ... وأقسم بالله طول البرنامج لا في رقم تليفون ظهر عالشاشة ولا تنويه ولا أيوها حاجتن تكون ... فقلت يمكن البرنامج ده عائلي وعالضيق ومش عايزين شوشرة ...

ثانياً : واحد اتصل وقال له إن شنطة الأسعاف عايزة دكتور يكون فاهم في الأسعافات الأولية والكسور وأمراض العيون والقلب المفتوح ..

فاللي هاقوله ده حصل وإتقال بالحرف الواحد من السيد زكي جمعه الشهير بشريف جُمعه والله على ما اقول شهيد .. فقال إيه زكي بيه جُمعه : قال له يا سيدي الفاضل تأكد تماماً إن مافيش حد في مصر بيحصل على رخصة قيادة إلا ويكون حاصل على دورات في الأسعافات الأولية وممتحن فيها وناجح كمان وده شرط من شروط الحصول على رخصة القيادة في مصر ....

لحد هنا وروحت مصررررررررررررررررررررخ بلعو حسي وقلت : جااااااااااااااااااااااااااااااااااااااااااااااي .. سيبوني عليه أخنقه وأشرب من صفارة رقبته ... وأصيبت بحالة هياج وقيء ورعشة في الاطراف الصناعية وقعدت أضرب راسي في الحيط لحد ما الحيطه وراسي إتكسروا ...

أثناء ما كنت بأضرب راسي في الحيطه كانت وداني لسه سليمة وسمعت طراطيش سؤال من واحده ست محترمة بتقول له : هو حضرتك قانون المرور ده بيتطيق الصبح فقط ؟ لإني ما بأشوفش حد من المرور بعد المغربية

فقال لها : نعم وده لأسباب أمنية اهمها الحفاظ على سلامة المواطن لإننا لو نزلنا كمائن ولجان ليلية فممكن العربيات اللي واقفة في الكمين او اللجنة تيجي عربيات تانية من الخلف تصطدم بها ....

وانا سمعت كده وروحت مكمل تكسير في البقية المتبقية من راسي لحد ما وصلت للحته اللي فيها اللُغد المكعور اللي في الزور ...

ناهيك بقى على مشاهدة التريلات والعربيات النقل على الطريق الدائري نفسه وهي ماسكه أقصى الشمال ويا ويلك لو عاندت مع حد منهم لما يقلب لك نور وما توسعلوش ...

أو منظر عربية ملاكي صغيرة ومحندقه وهي معلقة مثلث الرعب على الزجاج الخلفي في منظر مُضحك وكإن ده دور المثلث العاكس إن إحنا نعلقة زي الحجاب في العربية دليل على العفه ...

ويا مثلثاتك يا مصر .. كله موجود .. مثلثات خشب وعليها أستكير بلاسيتك ... شغال . حاجه كده شبه البعكوكه ومدهونه احمر في أصفر وعلى شكل مثلث شبه منحرف .. الله ينور ....

وكل ده يدل على جهل مسئولي الدولة وإنهم لا يعملوا إلا لصالح أنفسهم أو لصالح كل ما يجلب فلوس من أي سبوبة ، أما سلامة المواطنين اللي أغلبهم معدومي الثقافة .. فلا تهمهم وبالتالي خلوا الناس تعتقد إن القانون الجديد ما هو إلا مثلث وشنطة إسعاف فيها شاش وقطن وميكروكروم ... أما باقي مواد القانون فتعيش إنت يا حج ..

وزي ما قلت إن مازال العك مستمر ولحد لدوقت كل الخبراء الجهابزة في البلد مش عارفين مواصفات المثلث ولا الشنطة . ولجان عماله تتكون .. ومكونات عمالة تتلجنن وماحدش لسه عارف السر

وبرضوا كله كوم ومصيبة التكاسي كوم ...

فعندك في مصر حاجتين دلوقت :

1- تاكسي العاصمة الأصفر المكيف أبو تعريفة بتبدأ من 3 ج وكل كيلو بجنية ... وده أشبه بالكائنات الفضائية التي تسمع عنها ولا تراها ونفسي حد يقول لي أنا ركبت ذات مرة هذا الشيء ويوصف لي شعوره

2- تاكسي الخرابة : وهو عبارة عن كائن أسود في أبيض كئيب يعود إلى حقبة العصور الوسطى وبدون مبالغة في عربيات من الستينات لسه شغاله وبتعمل شغل زي الفل في قلب القاهرة ولو تجرأت إدارة المرور وما جددتش ترخيصة فبقدرة قادر بتتحول إلى ما يشبه التوك توك وشوفت بعيني اللي هايكلهم الدود عشرات التكسيات الكُهنه القديمة بدون لوحات بتشتغل على خطوط سير محددة زي الميكروباص جهاراً نهاراً امام أعين المرور .. تخيلوا إني سألت وعرفت إنها بتكسب اكتر من التاكسي العادي ولا ترخيص ولا رسوم ولا صيانة ولا قرف وبيروح المشوار اللي لا يتعدى إتنين كيلو بجنيه واحد وبيحمل 3 أشخاص وغالباً بيشتغل من امام احد محطات مترو الانفاق إلى داخل المنطقة شويه كده رايح جاي وبيعمل شغل زي الفل ويدير هذا المشروع مجموعة من عصابات المافيا المنظمة المُسلحة - دي حقيقة - ولو معاك عربية تنطبق عليها تلك المواصفت القذرة فتروح على طول وتتفق مع المافيا على الإتاوة اللي هاتدفعها يومياً وتنزل تستلم شغلك من الساعة دي ... .. تلك الكائنات بقى تسير في الشارع مخلفةً وراءه كمية من الرماد والدخان الأسود لزوم التمويه عشان ما تشوفهمش .. وينبعث منه أصوات نشاز وخبط ورزع وموسيقى منفره لأصوات أشبه بأصوات الحمير ... وكل ده لا تشعر به إلا وهو مارر من امامك وبالرغم من إنك شاورت له إلا إنه لا يلتفت إليك لإنه جايب البتاع ده لمزاجه وما بيعبرش حد وماشي يتفسح في الشوارع ... الغريب بقى إن البتاع ده ده الكيلو فيه بيتحسب بستون قرشاً في ظلم فادح وقلة أدب من الدولة وكإن تاكسي العاصمة بيمون بنزين وعشان كده تعريفته جنيه والبعكوك ده بيمون ميه من الترعة وتعريفته 60 قرش ...

وبرضوا كونوا لجان .. ولجنو اكوان وفشلوا برضوا في تحديد التعريفة الجمركية للتكاسي المصرية وتفتق ذهنهم عن فكرة جهنمية وهي إنه يسيبوها لكل مجلس محلي بتاع أي مدينة يحددها على مزاجه ..

يعني مجلس محلي القاهرة ممكن يحدد التعريفة بجنية للكيلو .. يقوم مجلس محلي إسكندرية ضارب السعر وعامله جنيه وربع وهكذا ... وعك وليس .. كله كويس ... وبرضوا لسه مافيش شيء تم ... ولي مع موضوع المجالس المحلية حكاية أخرى عشان شوفت عجب العجاب منهم ولهم وعليهم

والخلاصة إن كروش مسئولي المرور بعد القانون ده هاتزيد وهايبقى كرش كل واحد فيهم قد فنطاس الميه اللي بيغذي العمارة كلها .. وبدل ما كنت بتدفع رشوة 5 جنيه عشان العسكري يسيبك تخالف ويصهين .. دلوقت عشان السجاير غليت وعشان العولمة والأزمة الإقتصادية لموضوع الرهن العقاري بأمريكا .. هاتضطر تدفع بريزة فما فوق وعلى رأي المثل " إبرز ... تنجز " ....

وسلم لي عالمترو ...

خليك معانا وإوعى تروح في أي حته

[Virus]

مش ها أقدر أعلق دلوقت لما خلص كريزة الضحك الهيستيري دي..

ربنا يسعدك يا أخي..كنت مكتئب ومش قادر أقوم أخلص الشغل اللي ورايا متأخر في يوم الأجازة..هونت علي

بس الحتة دي مسخرة بصراحة

وفعلاً قلت صدق اللي سماه " تطبيق القانون " أي انك تجيب الورق اللي فيه القانون وتطبقة وترميه في الزبالة

:blush2: :blush2: f((: bk: gra:- gjy:: kis)- mc(: :lol:

تم تعديل 18 أكتوبر 2008 بواسطة Virus

[magedcozaki]

اضحكني جدا واعجبت بالرمز للفساد والاتاوة او الوسة بما اسميتهم طنط شيروت وانكل درملي حيث رمزت للفساد بعلية القوم فيما مضى اصحاب النفوذ القادرين على التخليص وهما معني يوحي بان الملكية القديمة وعصرها لم يغيبا عنا بل موجودين ولم يرحلوا فقط تبدليت المسميات من ملكية لجمهورية ومن ارقام سنين سابقة لارقام سنين حالية

احييك بشدة وارشحك بلا مبالغ لان تكون احد الرواد المعاصرين في الكتابة الساخرة الهزلية

كل اجازة وطنط شيروت وانكل درملي بخير

[se_ Elsyed]

شكراً للزملاء الأفاضل الذي علقوا على إرهاصاتي الحلزونية ..

---------------

الحلقة دي بعنوان

" سلامات .. سلامات .. سلامات .. سلامات يا محليات "

عند الحديث عن المحليات يقفز إلى ذهني مباشرةً المقولة الخالدة للزعيم الراحل " زكريا بيه عزمي " عندما وقف في مجلس الشعب من كام سنة وقال بعلو صوته : الفساد في المحليات بقى للرُكب .... بعدها على طول قفز إلى ذهني المقولة الخالدة للشاعر الإنجليزي الراحل مانشتسر هامشير عبد الواحد عندما قال : look >> who's talking لإن زي ماحنا عارفين وخبزين وعجنين إن زكريا عزمي هو اللي هرب صاحبه الآنتيخ الزعيم الراحل ممدوح إسماعيل من المطار بعد ما قتل 1030 نفس بشرية في العبارة الشهيرة وهو اللي رشحه وكتب إسمه بإيده عشان الزعيم الراحل مبارك يلطع إسمه ويوافق على تعيينه في مجلس الشورى ... ما علينا .. دول ناس رحلت عن دنيانا - الخيالية طبعاً - ومش عايزين نجيب في سيرتهم وخلونا في المحليات

المهم يا سادة يا كرام ولا يحلى الكلام الا بذكر النبي عليه الصلاة والسلام .... نزلت الاجازة ولاحظت في حتتنا اللي فيها بيت العيلة لاحظت إن حوائط البيوت كلها متلطعه ومتوسخة بمنشورات الدعاية بتاعت أعضاء المجلس المحلي ... وشعارات وحركات قرعه واخدين عليها وحاجات من دي ... بس لاحظت إن كل الناس المترشحة دول أعرفهم .. فسألت أخويا : هما مش العيال دول كانوا أصحابنا وإحنا صغيرين ودي عيل فاشلة اساساً ؟ قال لي : آه عقبال أملتك نجحوا بإكتساح في المحليات وبقوا محليين قد الدنيا والحزب الفاشي واقف وراهم بإيده وسنانه ..

فقلت له بإستغراب وأنا دماغي قربت تنفجر من كتر الأنفجار المتفجر : هو مش ده الولا بتاع الكاوتش ( والله العظيم بتاع لحام كاوتشات عربيات وتخصص نفخ كمان ) ؟ قال لي : آه

قت له : آههههههه .. لازم الحزب إختاره عشان يُنفخ اعداء الشعب .. وتوسم فيه القُدرة على لحم الأخرام الموجودة في ثوب الوطن .. بس أنا خايف تطلع ذمته كاوتش ويزودها حبتين ساعتها ما فيش بد إلا إننا ندق أخر مسمار في حياته السياسية .

ومين التاني ده ؟ مش ده الولا فلان اللي دخل ثانوي تجاري واخد الدبلوم وأشتغل ميكانيكي وفشل وبعدين لقيناه بيشتغل صحفي - فاشل برضوا - في احد الجرائد الصفراء وفشل وبعدين فجأة بقى عضو في الحزب الفاشي يقوم دلوقت يبقى عضو مجلس محلي ؟

قال لي : آه يا حبيبي آه

وقلت له : وثالثهم ده .. مش الولا ده اللي عنده بقالة أخر الشارع ؟

فالراجل تعب معايا بصراحة من كتر الآهات ..

إلى هنا نظرت إلى أخي الكبير - أكبر مني بحوالي سنتين - وقلت له : الفقري هايفضل فقري ... ماكنتش زمانك إنت بدالهم دلوقت خصوصاً وإنت عضو بارز في الحزب الفاشي من حوالي 5 سنوات ... بالمناسبة .. اخويا عمل زي ناس كتير ودفع 5 جنيهات فقط لا غير ورمى لهم صورة بطاقة ومن ساعتها بقى كدر من كوادر الحزب .. السنة دي موت على نفسي من الضوحك لما لقيتهم رقوه بالأقدمية وبقى أمين عام اللجنة العمالية عن دائرتنا .. آه والله .. بالرغم من إنه ما بيعتبش مقر الحزب ولا يعرف الفرق بين جمال بيه مبارك وجمال بيه عبد الناصر ... ومع ذلك ندهوا له وأدوله الكارنية بتاع الامانة ده وبقى ماشي طايح به في البلد ...

طب هاضحككم على موقف حصل قريب : واحد من العمال اللي شغالين عند اخويا إتمسك تحري لا لشيء إلا إنه كان ماشي في الشارع الساعة إتنين بالليل رايح يتشري جبنة ولانشون عشان يتعشى .. فالظاهر الحكومة بتلم اللي بيتعاطوا اللانشون والحاجات المُخلقة دي اليومين ددول ... المهم باقي العيال بلغوا اخويا الصبح إن فلان إتصل بهم وإنه ممسوك تحري في القسم من بالليل ... فراح صاحبنا لابس لبس الكوادر بتوع الحزب ومطلع الكارنية من الدرج وراح القسم ودخل على المأمور وقال له : معاك فلان بك الفلاني كدر من كوادر الحزب وامين اللجنة العمالية عن الدائرة .. إنتوا إزاي تمسكوا عامل من عمالي وأنا امين اللجنة العمالية ؟ والله يا جماعة المامور إعتذر له وقال له : خد الواد في إيدك وروح ..

إلى هنا هتفت وقلت : الله اكبر .. يحيا العدل .. أخويا بقى جزء من منظومة الفساد وبقى كدر قد الدنيا .. يحيا الكدر يحيا الكدر

وفعلاً منخششة في نفوخه يدخل إنتخابات المحليات المرة الجاية ومن بعدها انا بنفسي هارسم له خطة التسلق والوصول إلى قبة البرطمان ويبقى صاحب حصانه ونقب بقى على وش الدنيا ونستولى على أراضي بوضع اليد ونتاجر في المخدرات وناخد قروض من بنك التسليف الزراعي وما نردهاش ونعيش بقى ...

بالمناسبة : إنتخابات المحليات الأخيرة كانت شفافة ونزيهة وعفيفة بدرجة 100 % ولم يثبُت أي شبهة تزوير ولو بسيطة فيها

وذلك ببساطة لإن الصناديق إتقفلت بدري بدري وفاز أعضاء الحزب الوطني المرشحين بالتزكية وتم سحل ورفض طلبات أي واحد مش كدر وخدوا على قفاهم كلهم والعملية إتطبخت على نار هادية وعلى ميه بيضا ...

انا ما همنيش إن عضو المجلس المحلي يبقى بتاع كاوتش أو ميكانيكي .. لكن اللي همني وشيلني الهم وغظني بجد إني إكتشفت إن الحكومة المصرية قامت باكبر عملية نصب منظمة على الشعب المصري في موضوع " الزبالة المتكهربة " وهي إنها فرضت من كام سنة زي ماحنا عارفين رسوم إجبارية لجمع القمامة من البيوت وكل شقة في مصر بقت تدفع شهرياً من 3 إلى 5 جنيهات على فاتورة الكهربا .. أما المحال التجارية والمصانع وما شابه فحدث ولا حرج دول بيتنفخوا والرسوم عالية جداً عليهم ... وراحوا جابوا لنا ناس خواجات يلموا الزبالة إشي شركات فرنسية على اسبانية وبصراحة ربنا والحق يقال لاحظت إن الناس دي عملت شغل حلو قوي ووظفت ناس محترمة وكانت بتدفع مرتبات مجزية لدرجة إني أعرف ناس مؤهلات عُليا - إوعوا تفتكروا إني باكتب كلمات هزلية عشان أضحك او أضحك الناس ... بالذمة مش حاجة تكسف إن واحد بكالوريوس تجارة تبقى أخرته يلم زبالة ؟ - وبيعطوهم راتب مبدئي حوالي 600 ج وجابوا عربيات محترمة قوي .. وغرقوا شوارع مصر صناديق شيك للم القمامة والموضوع في أول ايامه كان ماشي زي الفل

لحد ما التتار نزلوا الشوارع وناس كتير إستحلت دم الناس دي وسرقوا الصندوق يا محمد لكن مفتاحه معايا .. وشوفت بعيني بعض تلك الصناديق البلاستيكية الحضارية إتسرق وإتعمل إما :

1- خزانات مياه بعد ما يركبوا له بزبوز بحنفية شيك وبقى خزان زي الفل وشكله منور فوق السطوح .

2- ثلاجات حاجه ساقعة .... وكسر تلج فوق البيبس وسقع وأسقيني يا فرج الله .

3- ثلاجات سمك ... وصاحي وبتلعب يا قراميط ...

وبقى في ناس عندها هوايه إنها تسيب الصندوق الحديد الكبير وترمي خارجه .. وبتوع فرنسا يا عيني نازلين لم ورا الحثالة دول ومش ملحقين بصراحة ...

لحد ما الحكومة فسخت التعاقد معاهم لإنهم تقاعسوا عن تأدية دورهم - حركة قرعه ومعروفة - ورجعت ريمه لعادتها القديمة وما بقاش فيه زبالة بتتلم وبقيت تمشي كيلوهات شرقاً وغرباً من غير ما تلمح خيال صندوق واحد في الشارع ... وبقت أكياس القمامة تملأ القاهرة ... والحكومة كانت أساساً قضت على الزبال أبو عربية بحمار اللي كان بيعدي علينا يوم ويوم وكان مهنينا ومش مخلينا عايزين حاجه .. يعني خربت من كله .. وكل واحد بقى يتصرف مع نفسه .. فإما ينتع الكيس على قفاه ويلف به بلاد الله لخلق الله لحد ما يلاقي صندوق ... أو يعمل زي الجيش ما قال له ويتصرف ويلقح الكيس في الشارع .. ييجي بقى على دماغ حد ما يضرش .. يدفسه تحت عربية من العربيات اللي راكنه .. شغال .. واهو كل واحد ومقدرته على التصرف .

وثبتت طبعاً الرسوم زي ما هي على فاتورة الكهربا وعلى المتضرر إنه يشرب من البحر ..

أنا بقى عندي عقده نفسية من النظافة وقلت : وكتاب الله مانا ساكت ..

وبالفعل إبتديت أتصل بالصحف وأشتكي لهم خصوصاً بأتصل على الخط الساخن بتاع الجمهورية وهو 139 وقرفتهم في عيشتهم ... وقلت كمان هاتصل بالعيال توع المحليات دول .. ففوجئت باخويا بيقولي سيب لي الطلعة دي ورفع التليفون ولقيته بيقول : أيوه يا سيادة النايب ... أخويا س س عنده شكوى من موضوع الزبالة وإن ما بقاش في صناديق بالمنطقة .. فممكن لو سمحت ترجعوا الصناديق تاني ؟

انا سمعت كلمة النايب وروحت مطلع الحيطة اللي بأخبط راسي فيها طلعتها من جيبي وفضلت أرزع راسي فيها لحد ما جابت جاز ... فقلت له حالاً نيبته وبقى نائب في البرلمان ؟ آه يا نيبتي ياني ياما ... فرد سيادة النائب على سؤال المواطن وقال له : معليش أصلنا شيلنا الصناديق لما ناس كتير إتشكت من كتر الزبالة قدام بيوتها فلو وافقت هاجيب لك صندوق قدامك بكره ... فقلت له وتجيبه قدام أم البيت ليه يا سيادة النايبه .. ما ترمي أهله في الميدان زي ما كان وتبعتر باقي الصناديق في الشوارع العمومية على جنب ..

وقضيت أجازة ما يعلم بها إلا ربنا .. لدرجة إن أكياس الزبالة كنت بانساها في شنطة العربية يومين وتلاته او باكون مسافر حته وعلى ما أوصل أكتشف ان الكيس زي ما هو في الشنطة ... وحاجة تقرف ..

يُتبع

[ELSHAMY]

تسجيل متابعة يا زعيم

تحياتى

[بركة]

على قدر ما أضحكتنا أبكيتنا

بفكر أغير أسم بركة في المنتدى وأخليه "متغربة وبحمد ربنا "

وآآآآآآآآآآآآآآآآآآآآآآآآآآآآآآآآآآآآآآآآآآآآآآآآآه وألف خسارة يابلدي