سمات الشخصية المصرية

[goold]

ازيكم

فى الحقيقة اهم صفه فى المصريين

التآلف والعشرة

بين المصريين تلاقى نفسك مش غريب تحس بالدفئ مش عشان انا مصرية .. لكن عشان عشت من صغرى فى الخليج وعرفت جنسيات عديدة ولمسة النقطة دة

خفة الدم بقه دة حاجة تانية

شعب شهم

الرجاله رجاله حقا وقت الشدة تجدهم شوف مات كام فى مظهرات ضد الحرب عدد اكثر مما ماتوا فى حرب العراق نفسه

شعبنا شعب بيفهم

يعنى الاغلبيه تجدهم عاقلين فى معظم امور الحياه

انا هنا بالتعامل مع جنسيات كثير بلاقى الناس فاضية فارغه من الداخل

من عيوبنا

عدم الاصرار

لو عندنا اصرار لكنا ارتقينا مثل اليابانيين او حتى الهنود :twisted:

المصلحجيه

ده صفه لو الاحوال مبحبحه مع الناس والامور ماشية مكنتش هتتواجد بهذه الطريقه ..

لكن فى كل الاحوال المصريين احسن ناس على وجه الارض بحلوهم ووحشهم ..

[se_ Elsyed]

فى رأيك الشخصى ايه هى سمات الشخصية المصرية عموماً ؟

الإيجابيات

1- الذكاء الحاد حتى سن 6 سنوات ( قبل دراسة المناهج العبيطة )

2- التدين ( ولا يغرنكم بعض الفقاعات والنماذج السيئة المسلطة عليها الَواء فهي لا تمثل إلا نسبة ضئيلة من عدد الشعب )

3- الشهامة والتراحم

4- حب الوطن ( بغض النظر عن كرهه لحكامه المستبدين منهم فقط )

السلبيات ( كتير فنحن شعب المتناقضات )

1- الفهلوة بعبط ( فممكن يسرق جنية واحد يعمل فضيحة في حين ترى جنسيات آخرى بدون تحديد وأنتوا عارفينها يسرق مليون بشياكة وفى صمت )

2- عدم إحترام الوقت ( إلا إذا سافر الخارج )

3- الغوغائية وعدم النظام ( إلا فى مترو الأنفاق )

4- السلبية والتبلد ( وقتية مش دائمة )

5- الزمبئة ( جايه من زمبة ... أحلى زمبة ماتجيلكش إلا من مصري زيك خاصة لو انت عايش بره مصر )

6- محدودية الطموح ( على سبيل المثال كل طموح المصري إنه يبقى عنده شقة حلوه وعربيه ورصيد فى البنك ... طيب فين التقدم العلمي أو البحث عن عمل يظهر فيه قدراته )

[farasha79]

اكثر سمة غالبه على المصريين و اعتقد ان دي بتحبب الناس في المصريين اوي دمهم الخفيف

بالاضافه الى الطيبه و الشهامه

لكن الحاجه اللي مش حلوه و تنرفز اوي الفضولية و التدخل في شؤون الناس بدون داعي.....

:sar: طبعا انا مش بتكلم عن الكل

صوابع ايديكم مش زي بعضها

[Lancelot]

من الصفات اللي ذكرتوها ... صفتين أوحش من بعض ...

الفضول (الحشرية) ..

و اللامبالاة و الأنا مالي ....

و المفروض إن الإتنين عكس بعض ... لكن للأسف عندنا مش عكس بعض ....

تلاقي الواحد هيموت و يعرف فيه إيه و بعدين لما يعرف إنها مصيبة .... "هيه هيه مصيبة" ... يقف يتفرج شوية و بعدين يفقل الشباك ... "يا عم و أنا مالي" ....

ما هو حاجة من الإتنين يإما تكونوا فضوليين و حشريين يإما تكونوا معندكوش مبالاة لكن الإتنين ... حراااااااام .....

يا أخ لينيكس ... يا ريت تشرح لنا إزاي إحنا عنصريين ... علشان مش فاهم ....

[yasser6666]

لو سمح لي الاخ لينيكس اجاوب بالنيابة عنه...العنصرية اللي عندنا تتثمل في مفهوم

1- انا واخويا علي ابن عمي وانا وابن عمي علي الغريب (كاننا في حرب!! والعملية متقسمة احزاب وفرق

2-دائما ننظر الي الاشخاص بمكان ميلادهم او نشأتهم ...يعني في الجيش او العمل او خلافه نقول فلان الطنطاوي او علان البورسعيدي ده لو احنا مجموعة قاهريين او اسكندرانية مثلا واحيانا للاسف يكون هذا الفلان او العلان له معاملة خاصة

3- عادة تختلف المعاملة باختلاف الديانة...مثلا فلان مسيحي و صورته تنطبع في ذهنك انه مختلف عنك وكل مرة تراه فيها تتذكر ذلك ....

احيانأ اتخيل وانا في الغربة ماذا لو كانت مصر بلد غنية قوي واوروبا بلاد عالم ثالث يسعوا للحصول علي تأشيرات لدخول مصر والعمل فيها بأي وظيفة!!! هل ياتري كنا سنعاملهم بالحسني ومافيش فرق خالص بيننا الا بالكفاءات ???ونحن نعلم انهم بياخدوا فلوس البلد ويحولوها لأهلهم في اوروبا !!!! الاجابة طبعأ لا لاننا عنصريين جدأ واكتر منهم بمراحل

واكبر دليل انظرالي الخليجيين وكيف يعاملون الفلبينيات الخادمات وكأنهم اشتروهم او ورثوهم وليس مجرد عامل او عاملة بوظيفة له ادميته وحقوقه.....واتذكر هنا احدي الاخوات الاعضاء في المنتدي من الكويت ولها خادمة فليبينية تقريبأ وذكرت اكثر من مرة عندما تتحدث عنها ب (الفليبينية بتاعتنا )!!!!!!!!!!!!!!كانها قطعة اثاث او سيارة مركونة امام المنزل ...................................ياراجل بلاش الواحد يفضفض علي العنصرية عندنا....امال لو ربنا عطانا قوي حنعمل ايه ??

[أسد]

للمصريون عيوب ..

ولكني أرى أن لها تبريراتها ... وقد تحدثت عن ذلك في موضوع سابق .. وقد ذكرت من الأسباب ...

قد كانت مصر في عصر ديمقراطي ما قبل الثورة .. وكانت كما سماها البعض الديمقراطيات الفاسدة. ثم أتى حكم العسكر .. بكل ماله من سلبيات .. وتوجهات اشتراكية .. ومجتمع منغلق على نفسه .. وديكتاتورية .. وشعارات وهمية .. وهزيمة كبرى .. ثم حرب وانتصار .. وانفتاح اقتصادي .. ثم سلام ... ثم فساد .. وقطط سمان ... وغيلان للفساد .. وامبراطوريات من الأغنياء الفاسدين والجهلاء ... ثم فساد أكبر من الفساد السابق .. وتيارات سياسية متعددة .. يسارية .. وإسلامية ... وحكومة تردع الجميع وتبطش بهم ... وتعاظم التافهين .. لاعبين كرة ومطربين وراقصين ... ثم الحديث عن ديمقراطية نتمتع بها .. ولا تجد لها أثر ملموس .. سوى في تصريحات المسئولين .. وفقر شديد .. وبطالة ... وفساد ... وقهر .. وقهر ... وظلم ... وقهر إضافي ...

نتج عن كل هذا وجود أجيال مصريين يحتاجون إلى العلاج .. فكل تلك الهزات تؤثر على نفسية وعقل أي إنسان ... والمصريون الآن يحتاجوا إلى العلاج ... للتخلص من كل تلك العادات السيئة .. أو معظمها ..

[yasser6666]

لم يتكلم احد علي اخطر عيب موجود فينا وفعلأ بيضايقني جدأ بل يصدعني احيانأ ......وهو كترالكلام.......بالمقارنة مع كل شعوب الارض نحن بالصلاة علي النبي اكتر ناس ( بتحرق لغة ) كما نسميها يعني ممكن تلاقي موضوع صغير جدأ او مشادة حصلت بين شخصين وتمت وانتهت في خمس دقايق نقعد نتكلم عليها يوم بطوله ونعيد ونزيد ونقلب وندرس ونحللها يمين وشمال ولو اليوم ما كفاش نقوم تاني يوم نفتح نفس الموضوع علشان نكمله !!!والله العظيم مش بهزر انا اكتر حاجة بتقلقني لما بانزل مصر هو كتر الكلام (حرق اللغة ) واحيانا بتزعل مني صحابي وقرايبي لما اخرج عن شعوري واقول (كفاية بقي ...حرااام ...هو مش احنا اتكلمنا في الموضوع ده عشرين مرة....دماغيىىىى)

[أسد]

احيانأ اتخيل وانا في الغربة ماذا لو كانت مصر بلد غنية قوي واوروبا بلاد عالم ثالث يسعوا للحصول علي تأشيرات لدخول مصر والعمل فيها بأي وظيفة!!! هل ياتري كنا سنعاملهم بالحسني ومافيش فرق خالص بيننا الا بالكفاءات ???ونحن نعلم انهم بياخدوا فلوس البلد ويحولوها لأهلهم في اوروبا !!!! الاجابة طبعأ لا لاننا عنصريين جدأ واكتر منهم بمراحل

أنا مع هذا الكلام ...

والعنصرية من أهم ما يميز المصريون ...

وتراه بشكل كبير إذا استمعت لأي مناقشة بين مصري وأي شخص من أي جنسية أخرى ....

وخصوصاً إذا كان عربي ....

[linux]

يا أخ لينيكس ... يا ريت تشرح لنا إزاي إحنا عنصريين ... علشان مش فاهم ....

الأخ العزيز Lancelot

بالأضافة لرد الأخ yasser6666، أضيف الأتى:

فية أيضا عامل لون البشرة. مين فينا مامرش عليه، أثناء اى مرحلة من مراحل التعليم، ولد أو بنت تعرضوا لمضايقة لمجرد سمار لون بشرتهم؟ تفتكر أبراهيم يوسف لاعب الزمالك لما جمهور الأهلى كان يشتمة كان بيقولوا له أيه؟

أنا شخصيا أعرف مصرين هنا فى أمريكا و على أعلى المستويات العلمية و لما يتكلموا على كاناليزا رايس بدل ما يهاجموا أسلوب تفكيرها يطلقوا عليها السب بسبب لونها !!

طبعا لازم أوضح هنا أن ده مش خاص بشعبنا بس، بالعكس الأمثلة كثيرة جدا لشعوب و ثقافات عديدة. أيضا، ده مش معناه التعميم و ان كل الشعب كده. بس كمسلم دى حاجة من الحاجات اللى بتضايقنى جدا لأن تعاليم ديننا عكس ذلك أساسا.

____________________________

لينكس برقوق لينكس لوحده

حاكمدار و شيخ حارة كمب شيزار

[الطفشان]

كان في موضوع فتحناه من كام شهر عن هل توجد عنصرية في مصر

لكن لا اذكر العنوان او الباب

ياريت حد يحط لنا وصلة

[yasser6666]

الاستاذ طفشان ..بحثت في كل صفحات المناقشة العامة ال26 علي موضوع بهذا العنوان ولا يوجد !! انت متاكد ان فيه موضوع فعلا بعنوان العنصرية في مصر ??? لانني فعلا احب اقرأ اكتر في الموضوع ده لو تمت مناقشته قبل كده في المنتدي

[freefreer]

هل يوجد تفرقة عنصرية على أساس اللون فى مصر

الوصلـــــــــــــة

[الطفشان]

يا سلام يا اخ فري

دايما تجيب التاهية!

[Lancelot]

هل يوجد تفرقة عنصرية على أساس اللون فى مصر

الوصلـــــــــــــة

خبــــــــــــــــــــــــــــــرة

:) :)

[freefreer]

الله يحفظكم جميعا .. :)

[Set_Amina]

الميزات:

صلة الرحم

الشهامة

خفة الظل

الصبر على الشدائد

الايمان والقدرية

العيوب:

الطبقية

المظهرية

الفضول

الحشرية

الكسل

الهمجية