قبل ما تستخرج جواز جديد ... حاسب لتروح في حديد

[se_ Elsyed]

زمان ولحد وقت قريب كانت العملية سبهللة وكان ممكن الواحد يبقى معاه اكثر من جواز سفر ... بالرغم من إنك لما كنت تروح تستخرج جواز جديد يسئلوك معاك جواز قبل كده ؟ ... فكنت بتقول لأ وممكن يخليك تستخرج حاجه إسمها " شهادة تحركات "من مجمع التحرير عشان يتأكدوا ..

ومع كده الموضوع كان بلاميطه وهيصه وما فيشي نظام بيكتشف ذلك ..

دلوقت ومع إصدار الجواز الجديد المربوط بالرقم القومي ...

خلي بالك

فلقد تمت موافقة مجبس الشورى على تغليظ العقوبة لمن يحمل أكثر من جواز سفر او أنكر إنه كان معاه جواز سابق

ونص التعديل على توقيع عقوبة الحبس مدة لاتقل عن 3 أشهر ولاتزيد على سنة وغرامة لاتقل عن ألف جنيه ولاتزيد على خمسة الاف جنيه أو باحدى هاتين العقوبتين لمن يثبت حمله أكثر من جواز سفر عادى ، وذلك لاحكام السيطرة على بيانات جواز السفر من حيث الموافقات وتأشيرات الدخول والخروج والتجنيد

[ahmedarab]

العـــــــــــــــــــــــب،

هى بقت كدة ؟؟؟؟

طب وبعدين ....لو حد دلوقتى معاه الجواز القديم وعايز يطلع واحد تانى يغير فية محل الاقامة ولا المهنة ولا اى مصلحة من الحجات دى ..هايعمل اية ؟؟؟؟

[tahereyad]

العـــــــــــــــــــــــب،

هى بقت كدة ؟؟؟؟

طب وبعدين ....لو حد دلوقتى معاه الجواز القديم وعايز يطلع واحد تانى يغير فية محل الاقامة ولا المهنة ولا اى مصلحة من الحجات دى ..هايعمل اية ؟؟؟؟

متهيألي ان الموضوع معناه عدم وجود جوازين شغالين لنفس الشخص,, يستخدم أيهما يشاء,,,, بمزاجه.. يعني يقلب علي أي واحد براحته, و يغير رقم الجواز في الأوراق الرسميه براحته,, لكن لما تروح تغير أو تجدد البازابورت القديم هايكتبلك عليه لاغي و يختمه بختم لاغي,,,,

أنا حاليا دلوقتي معايا جوازين واحد لاغي بس لسه فيه الفيزا بتاعت الامارات ساريه عشان كده بارفقه دايما بالجديد اللي بيتختم عليه الدخول و الخروج من اي مطار,,, يالا عقبال مانطلع البازابورت الجديد اللي زي البطاقه ده بدل الكشاكيل ال 80 صفحه اللي احنا ماشيين بيها

[حلواني]

طيب مش قبل ما ينزلو قررات زي دي يشوفو عندهم سجون كفايه ل 15 مليون

مش عارف ليه حاسس ان كل واحد مصري عنده في جوازه حاجه غلط

مش تزوير لاسمح الله بس خطا في البيانات

يا المهنه يا العنوان ياالموقف التجنيدي يا التاشيره يا الصوره يا الختم يا تاريخ الميلاد يابيانات المضافين

بس في مصر كل حاجه وليها سكه محدش يقلق بس اللي يعرف السكه الاول يبقي يقولنا

تحياتي للجميع

[Nina Hussien]

طالما مافيهاش اعدام يبقى خير :)

لما يبقوا يطبقوا باقي القرارات نبقى نشوف ده

و بعدين كل واحد حر في جواز سفره

يعمل واحد و لا اتنين و لا عشرة هايجرى ايه يعني :)

[أسد]

الطبيعي ..

المنطقي .. في أي مكان في الدنيا ..

ولأي شخص سليم . ووضعه قانوني ..

أن يكون له بطاقة واحدة وجواز سفر واحد ..

والطبيعي في أي مكان في العالم .. أنه من غير القانوني أن يحمل هويتين مختلفتين لنفس الشخص ..

إذا كان هذا يحدث تحايلاً .. وتسيباً ..

فليس من المفروض أن يستمر ..

وأنا مع القرار ده .. وأؤيد تشديد العقوبات لتكون أكثر من ذلك حتى ..

[se_ Elsyed]

يا جماعة الموضوع واضح وضوح الشمس

هناك فرق بين اللي معاه جواز سفر وعايز يعدل بياناته أو صورته .. وده ما عندوش أي مشكلة وبيروح يقدم لهم الجواز وبيعدلوه له .

وبين شخص معاه جواز سفر بافعل ورايح يستهبل وينكر ... فلما بيكتشفوا ده .. وهايبقى سهل جداً بإستخدام الرقم القومي .. فده اللي هايتحط في العمبوكة ونروح نزورة بعيش وحلاوة ....

تخيلوا إن الفنان حمدي احمد وهو عضو في حزب الوفد ... سمعته في برنامج " ساعة صفا " بيتكلم عن حكاية المساجين اللي بقت عادة مقدسة إنهم يزوروهم بعيش وحلاوه وأستغربت جداً ..

فاتضح إنهم ما بياكلوش الحلاوة دي .. ولكن لما بيطلبوها من أهاليهم وهما في السجن بتبقى عشان السجون بتجيب لهم عيش ناشف زي الحديد وغير قابل للأكل .. فبيروحوا مولعين في الحلاوة اللي بتحتوي على نسبة كبيرة من الزيوت وبتولع بسهولة .. ويسخنوا عليها العيش وبالتالي يقدروا بقى يأكلوه حاف او يغمسوا به السيمون فيميه أو الكبد والكلاوي اللي بيجيبوها لهم في السجون ... ده كان زمان في المعتقلات والسجون ...

هــا مين بيحب الحلاوة ؟

[Modest]

الطبيعي ..

المنطقي .. في أي مكان في الدنيا ..

ولأي شخص سليم . ووضعه قانوني ..

أن يكون له بطاقة واحدة وجواز سفر واحد ..

والطبيعي في أي مكان في العالم .. أنه من غير القانوني أن يحمل هويتين مختلفتين لنفس الشخص ..

إذا كان هذا يحدث تحايلاً .. وتسيباً ..

كنت أتصور ذلك و أراه منطقياً إلى أن عملت مع سويديين.

لا أعلم عن باقي دول أوروبا أو بالتحديد الدول الاسكندنافية للتشابه بين قوانينها و لكن في "السويد" يُسمَح للمواطن بحمل أكثر من جواز.

و عندما يزورنا من حين لآخر أشخاص من السويد ، نسأل في كل مرة عن رقم جواز سفر الزائر لعلمنا بحمل الكثير منهم لأكثر من جواز و لربما فضّل أن يأتي بجواز غير ذلك المُسَجَّل في ملفّاتنا.

[se_ Elsyed]

لا أعلم عن باقي دول أوروبا أو بالتحديد الدول الاسكندنافية للتشابه بين قوانينها و لكن في "السويد" يُسمَح للمواطن بحمل أكثر من جواز.

و عندما يزورنا من حين لآخر أشخاص من السويد ، نسأل في كل مرة عن رقم جواز سفر الزائر لعلمنا بحمل الكثير منهم لأكثر من جواز و لربما فضّل أن يأتي بجواز غير ذلك المُسَجَّل في ملفّاتنا.

عشان كده الروس ظبطوهم في الماتش بتاع إمبارح يا معلم

هينرك لارسن بييجي عندكو يا موديست ؟ قصدي بتقعد معاه يعني صون فا صو كده وتحتسوا أقداحاً من القهوة سوياً ؟

لأ بجد ... إيه الحكمة سواء هنا او هناك إن الواحد يكون معاه اكتر من جواز ... غير إنه يكون عليه احكام نفقة ولا بيقضي فترة مراقبة مثلاً ؟

[Modest]

هينرك لارسن بييجي عندكو يا موديست ؟ قصدي بتقعد معاه يعني صون فا صو كده وتحتسوا أقداحاً من القهوة سوياً ؟

لأ بجد ... إيه الحكمة سواء هنا او هناك إن الواحد يكون معاه اكتر من جواز ... غير إنه يكون عليه احكام نفقة ولا بيقضي فترة مراقبة مثلاً ؟

لارسون و هانسون و أولوفسون و ماجنوسون و ماتسون و جوهانسون و "سون سون" كمان لو عايز تنضم للكتيبة :winner:

زي ما بيقولوا هنا سي "بن" السيد عندهم برضه في السويد "سون" يعني "بن" بس بيحطوها في الآخر طال عمرك يعني يبقى إسمك بالسويدي "سي السيدسون" :wub:

ما سبق كان درس سويدي لابد منه

الحكمة بقى من تعدد الجوازات (أقصد "الباسبورتات" علشان ما تفهمنيش غلط :happy: ) .. إن من كانت سفرياته كتير يمكنه استخراج أكثر من باسبور بحيث يرمي واحد في سفارة منيا القمح على ما يطلعوا عينه و يعملوا له التأشيرة يكون هو سافر أسيوط بالباسبور التاني و رجع .. و هكذا يعني.

ناس طيبين أوي زي ما انت شايف :Laie:

[بندق أفندى]

وهم المفروض يسألو؟

المفروض يقولو انت معاك جواز سابق سارى هاته نلغيه ..

[ozoozo]

ممكن تروح تطلع الجواز الجديد المميكن عادي خالص وبياخدوا القديم يتختم بختم لاغي وتاخدوا تاني....بس ده في حاله انك اعترفت انك معاك واحد قديم يعني بتاخده بس ملغي......لكن لو كام معاك وانكرت؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ الله معاك هاتسخن العيش علي الحلاوه

[وطني حر]

انا مع تصحيح البيانات . وفق البطاقه القوميه والرقم القومي بكون هو مصدر البيانات والتعديل يكون في البطاقه .

وبعد كدا . في جاله طلب باسبورت او رخصيه قياده . تكون وفق البطاقه

وبكدا تبقي العمليه عمليه رسوم علي كل نسخه اضافيه .

فيحق لكل مواطن ان يحصل علي كرت لاول مره .. وبعدين كل كرت اضافي برسوم

[ابراهيم عبد العزيز]

انا شايف انها خطوة ممتازة جدا من الحكومة المصرية وهى ربط كل مواطن برقم قومى يظهر بياناته كلها , بل انه شىء احنا كمصر تاخرنا فيه جدا وسبقتنا لها دول العالم

بسنوات طويلة , واكيد القانون لن يتم تطبيقه بأثر رجعى مثلا فلا داعى لقلق بعض الاخوة من المعلقين , ولكن فى المستقبل يجب الاخذ فى الحسبان ذلك عند استخراج جواز السفر .