اسئلة امتحانات عام اخر زمن

[قاهرى]

السؤال الأول: التعبير

اكتب ما لايقل عن 650 سطر فى أحد الموضوعات التالية

لم يجد الطفل غير الشارع ملجأ نظرا لحالة البلد الهباب..فاتجه إلى السرقة والقتل والحشيش.. حتى نال جزاءه وقبض عليه متلبسا بباكتة بانجو.. اكتب قصته مع تسليم الحِرز للباشا مراقب اللجنة

شهدت بلدنا الحبيبة نهضة فى مجال التشييد والبناء وخصوصا بعد وصول سعر الحديد إلى 6500 جنيه للطن.. اكتب ما يمليه عليك ضميرك على أن يبدأ موضوعك بعبارة أنا باشتغل فى حديد عز

بعد انتشار ظاهرة أكل لحم الكلاب والحمير..من وجهة نظرك كحمار تكلم عن هذه الظاهرة ومن المتسبب فيها بدون غلط..الورق متراقب

ــــــــــــــــــــــــــــــــــــــــــــــــــ ـــــــ

السؤال الثانى: القصة

من قصة ' وعهد الله ما انت داخل الانتخابات' .. اقرأ القطعة وأجب عن الآتى:

(ثم أتى إليه وضربه بالجزمة وقال: انت عايز تترشح فى الانتخابات يامعفن؟؟ دانت عايز معجزة..مش كفاية بتاكلوا لحمة ومستورين.. عايزين إيه تانى؟)

الأسئلة:

1-ما هى اللحمة؟ أو على الأقل حدد أقرب معنى خيالى لها

2-مرادف معجزة فى اللغة ( تغيير وزارى – زيادة المرتبات – رغيف العيش) اختر يا مقلول البخت

3-لماذ ضربه الرجل بالجزمة وليس بالعصى مثلا؟؟

(أهو كسل .. لسة هيرفع العصاية؟ - عشان العصاية قلة قيمة برضه واحنا فى عصر الديمقراطية – عشان العصاية شغالة بس مش فى الضرب.. افهم انت بقى) اختر

4-حلل بمزيد من التفصيل جملة ضربه بالجزمة ومدى توافقها مع جملة مصر بتتقدم بينا

ــــــــــــــــــــــــــــــــــــــــــــــــــ ــــــــــ

السؤال الثالث القراءة

من موضوع ( الزعيم..والفنان.. والقدوة) اقرأ القطعة وأجب

(وقد نفى الزعيم عادل إمام الإشاعات التى أكدت أنه مرشح لوزارة الثقافة.. وأكد أنه فنان فقط وليس سياسيا الخبر حقيقى كما أنه يرحب بالتوريث ومقتنع بكل سياسات الحكومة)

1-دخل كاتب هذه السطور مسرحية بودى جارد للزعيم رغم قرفه منه أساسا.. فى رأيك ما السبب فى دخوله؟

(أكيد معزوم – طبيعى معزوم – وربنا معزوم).. اختر على أن تضع إيدك على المصحف وانت بتحلف للمراقب بتاع اللجنة

ــــــــــــــــــــــــــــــــــــــــــــــــــ ــــــــــــ

السؤال الرابع النصوص

أجب عن أحد النصين الآتيين

من نص ( ماشربتش من نيلها)..اقرأ ثم أجب

(ماشربتش من نيلها.. جربت تغنى لها.. جربت فى عز ماتحزن تمشى ف شوارعها وتشكى لها)

1-بعد رغبة صاحبة النص فى أن تلد ابنتها فى أمريكا لتحصل على الجنسية الأمريكية..اختر..ما المقصود بنيلها فى النص؟

(المسيسبى - الأمازون – يونج يانج)

2-هذا النص من نصوص الحزب الوطنى والدليل وجود اسم مهم من قيادات الحزب فى النص.استخرج الاسم..وبوسه من بُقـُّه ورجَّعُه مكانه

3-أكمل الأبيات إلى آخر كحكة فى الكليب

4-قوبل النص بانتقادات بسبب بعده عن الواقع..وضح من النص ما يتفق مع القول المأثور اطبخى ياجارية .. كلف يا سيدى

ــــــــــــــــــــــــــــــــــــــــــــــــــ ـــــــ

من نص (حين ميسرة)..أجب عن الآتى

1-اذكر اسم مصيبة واحدة محصلتش فى النص الأسود ده

2-وضح عبقرية أحمد بدير الإرهابى فى النص وهو يكتب رسالة على الكمبيوتر باستخدام أزرار الأرقام فقط ومفيش حروف.. ويعطى أمر التنفيذ بزرار قايمة ستارت مش بإنتر.كمبيوتر إرهابى بقى

3-فى نصى ويجا وخيانة مشروعة وضح خالد يوسف هستيريا الجنس فى الطبقات الغنية.. وفى نص حين ميسرة وضح خالد يوسف هستيريا الجنس فى الطبقات الفقيرة..عشان خطرى.. اذكر مع كامل البيانات أماكن هذه الهستيريا فى المعادى

4-سبب وجود الشرطة كل خمس دقائق فى النص

(موسم ترقيات عقبال أملتك ولازم شغل – أخو خالد يوسف ظابط ولازم يخدم أخوه – عشان الشرطة بتراقب قسم البوليس اللى جنب أحداث النص) اختر

ــــــــــــــــــــــــــــــــــــــــــــــــــ ـــــــــ

السؤال الخامس النحو

أعرب ما تحته خط.. لو مالقيتش القطعة أصلا ..اتصرف

ذهب الرئيس إلى المؤتمر .. ضع الجملة السابقة فى صيغة المثنى.. ماعدا الرئيس طبعا يابني آدم

كان ممدوح إسماعيل قاتلا .. ضع إن مكان كان.. على ألا تنصب ممدوح.. عشان هوه بينصب لوحده

فُرِضت الضرائب علينا ببشاعة ..أعرب الجملة .. وارفع الضرائب أبوس إيدك

ــــــــــــــــــــــــــــــــــــــــــــــ

السؤال السادس الخط

كوز المحبة انخرم..طرطش على كمى..ياحبيبى بطل جفا وارحم عذاب امى

اكتب الجملة السابقة ثلاث مرات بثلاث خطوط.. موبينيل وفودافون واتصالات..كما يمكن التحويل من خط لخط بنفس الرقم.. فقط اتصل بخدمة العملاء

منقـــــــــــــــــــــــول

تم تعديل 19 مايو 2008 بواسطة Folana

[somayasaleh]

ايه الجمال ده :sad: jdw::

يخرب بيت شطانك؟؟؟ :egyflag:

والله ضحكتني وانا في شدة الاكتئاب i*:

علي العموم شر البلية ما يضحك :sad:

تم تعديل 20 مايو 2008 بواسطة se_ Elsyed

[mohamed_mido87]

السلام عليكم

برغم ان الموضوع منقول

الا انه بجد فى منتهى خفه الدم ومشكور يا قاهرى على الموضوع

احلى سلام

[galaxy]

الفاضل قاهري.......... :)

شكرا علي رسمك الابتسامه علي شفاهنا. ....صحيح شر البليه مايضحك. :lol: ......تحياتي

[yassir]

الأخ قاهرى .....والله نص ساخر جدا ....و كلنا (امبسطنا) ...ان شا الله تكون (امبسطت) زى ما( أمبسطتنا )...... :)

تحياتى

[قاهرى]

الاخ الفاضل mohamed_mido87

اختنا جلاكسى - الاخ ياسر

شكرا ليكم جميعا وبجد شكرا لكلمتكم الرقيقة والجميلة فى نفس الوقت

وانشاء الله اضيف موضوعات كتيرة على المحاورات قريبا

.... شكرا لكم جميعا

اخوكم: قــــــاهــــــــــــــــــــرى

تم تعديل 21 مايو 2008 بواسطة Folana

[Folana]

السلام عليكم ورحمة الله...

الاخوة الافاضل...تم حذف جميع المداخلات الخارجة عن سياق الموضوع

كما نرجو من الاخوة جميعا الحفاظ على روح المحبة وتقبل واحترام رأى الاخر..كما عهدناكم دائما

شاكرين لكم تعاونكم معنا وسعة صدركم...

:aslam:

[ELSHAMY]

السلام عليكم ورحمة الله...

الاخوة الافاضل...تم حذف جميع المداخلات الخارجة عن سياق الموضوع

كما نرجو من الاخوة جميعا الحفاظ على روح المحبة وتقبل واحترام رأى الاخر..كما عهدناكم دائما

شاكرين لكم تعاونكم معنا وسعة صدركم...

:aslam:

شكرا للأخت فولانة...تحياتى

[قاهرى]

شكرا يا اخت فولانة

تحياتى