حمل كتاب "عشان مانتضربش على قفاك"

[محمد عبدالعزيز]

أثناء تصفحى لأحد المواقع وجدت نسخة PDF من هذا الكتاب الذى صادرته وزارة الداخلية, ولا أعرف لماذا تمت مصادرته!!!

الكتاب أثار ضجة عند صدوره لأنه يتضمن معلومات مهمة عن حقوق وواجبات كل مواطن عند التعامل مع وزراة الداخلية, وتم تجميع هذه المعلومات فى صورة سؤال وجواب بصيغة بسيطة وسهلة أى حد ممكن يفهمها:

لتحميل الكتاب إضغط هنا

[aimen]

شكرا جدا ونتمنى الكتاب الأصلى عن قريب وربنا يحمى المؤلف من الجبابرة

[se_ Elsyed]

بالرغم من إن الكتاب بيقدم بعض النصائح القانونية بإسلوب سلس أقرب إلى الكلام الدارج الشائع بين الناس ..

إلا أنني لا أحب أسلوب التهويل والتضخيم .. فالأخ عمر عفيفي تمت إستضافته في برنامج العاشرة مساءً الأسبوع الماضي وكان كل ما المذيعة منى الشاذلي تسأله عن حاجه يحاول يعمل فيها دور الشهيد ويعمل دعاية للكتاب بإن وزارة الداخلية بتتضايقه وإن في تهديدات بتوصهل عشان ما ينشرش الكتاب ... وعمل فيها شهيد الواجب

وهنا في الكام صفحة اللي حملناهم دول كاتبين في أخر الكتاب إن صاحب الكتاب إضطر إلى الهجرة إلى أمريكا لإن الداخلية قالت إنها هاتسكته بأي ثمن ...

!!!!

إيه التهريج والإستخفاف بعقولنا ده ؟

دي المواقع الألكترونية والمدونات والجرائد المستقلة المتداولة في مصر فيهم بلاوي زرقا أكتر من اللي في الكتاب مليون مرة ..

فياريت نجعل كل شيء في حجمه الطبيعي

[ahmedarab]

شكرا جزيلا استاذ محمد

انا فعلا كنت بدور على الكتاب دة

وخصوصا لما عرفت انة اتصادر

تحياتى

[محمد عبدالعزيز]

بالرغم من إن الكتاب بيقدم بعض النصائح القانونية بإسلوب سلس أقرب إلى الكلام الدارج الشائع بين الناس ..

إلا أنني لا أحب أسلوب التهويل والتضخيم .. فالأخ عمر عفيفي تمت إستضافته في برنامج العاشرة مساءً الأسبوع الماضي وكان كل ما المذيعة منى الشاذلي تسأله عن حاجه يحاول يعمل فيها دور الشهيد ويعمل دعاية للكتاب بإن وزارة الداخلية بتتضايقه وإن في تهديدات بتوصهل عشان ما ينشرش الكتاب ... وعمل فيها شهيد الواجب

وهنا في الكام صفحة اللي حملناهم دول كاتبين في أخر الكتاب إن صاحب الكتاب إضطر إلى الهجرة إلى أمريكا لإن الداخلية قالت إنها هاتسكته بأي ثمن ...

!!!!

إيه التهريج والإستخفاف بعقولنا ده ؟

دي المواقع الألكترونية والمدونات والجرائد المستقلة المتداولة في مصر فيهم بلاوي زرقا أكتر من اللي في الكتاب مليون مرة ..

فياريت نجعل كل شيء في حجمه الطبيعي

والله يا س س أنا اللى أعرفه إن الكتاب تمت مصادرته, موضوع الهجرة ده ماعرفش عنه حاجة. وكمان مكتوب فى آخر الكتاب إن النسخة لسه مش كاملة.

أعتقد يا س س إنك متحامل على الراجل شوية, أنهى جرائد مستقلة اللى بتتكلم عن نفس الموضوع ومين اللى بيقرأها؟ أنا بصراحة ماعرفش, الكام صفحة اللى قرأتهم لقيت فيهم معلومات أول مرة أعرفها بحكم خبرتى القليلة فى المواضيع دى.

يمكن المواقع الإلكترونية والمدونات فيها آه, بس هل هى بالتركيز ده؟ وبرضه هسألك تانى كام نسبة اللى ممكن يقرأو المواقع والمدونات بالمقارنة بنسبة اللى ممكن يقرأوا الكتاب؟

تفسر بإيه طيب يا س س مصادرة الكتاب؟

[se_ Elsyed]

لسه ما كملتش كلامي إلا وألاقي الخبر ده نزل حالاً على موقع العربية

هرب ضابط مصري سابق إلى الولايات المتحدة الأمريكية خشية اعتقاله، بعد مصادرة كتابه "عشان ما تنضربش على قفاك" الذي يقدم نصائح حول أسلوب التعامل مع أقسام وكمائن الشرطة وأوامر الضبط والاعتقال.

وقال عمر عفيفي الذي عمل ضابطا لمدة 20 عاما في أقسام الشرطة ومباحث أمن الدولة إن مكتبه تعرض لحملة تفتيش وواجه مطاردات يومية من ملثمين، وتهديد محاميه وشقيقه بالاعتقال إذا لم يسلم لهم أصول الكتاب وكافة النسخ التي طبعت منه.

وأضاف في اتصال هاتفي من أمريكا مع "العربية.نت": سافرت خوفا علي حياتي التي أصبحت مهددة داخل مصر ليلا ونهارا بحثا عن كل النسخ التي بحوزتي وعن أصول الكتاب الجديد الذي انتهت من تأليفه ولم يتم نشره بعد. وكان قد كشف في تصريحات سابقة نشرتها "العربية.نت" أن الكتاب "يضم خلاصة تجربته مع السياسة والمواقف التي حدثت". ويعتقد عفيفي أن هذا الأمر "اربك كثيرين في وزارة الداخلية المصرية خاصة وأنه خدم في عدة أماكن حساسة".

فهمت الرسالة وغادرت

وقال عفيفي لـ"للعربية.نت" انه اتخذ قرار السفر فجأة بعد تلقيه اتصالات من أصدقاء وصفهم بأنهم مخلصون له في وزارة الداخلية، نصحوه بمغادرة البلاد بأقصي سرعة، لأن وزارة الداخلية ستصدر قرارا باعتقاله خلال ساعات.

وأضاف "ما أكد كلام أصدقائي هو موقف مدير مباحث أمن الدولة بالقاهرة اللواء هشام أبو غيده، الذي اتصلت به لأستفهم منه عن النية في اعتقالي، فأنكر نفسه، وقال لي الرقم خطأ، رغم أنني أعرفه جيدا وأعرف صوته ورقمه الخاص جداً، الذي لا يمكن أن يكون بحوزة شخص سواه، وهي طريقة اعرفها جيدا، فإذا كانت هناك أي نيه لاعتقال او احتجاز أو حتي إهانة شخص لدية علاقات كثيرة، فان الاوامر تصدر بتجاهل الرد علي تليفوناته والهروب منه بأي طريقة حتي يتم عقابه سواء بالاعتقال أو بالاهانة، كما حدث مع شخصية هامة تم تجاهلها رغم انها كفيلة بإلقاء الرعب في النفوس".

وتابع: فهمت الرسالة وهي انهم سيعتقلونني بالفعل ولهذا قررت أن أهرب من مصر، لأنه لا يمكن لأحد أن يدرك ما سيحدث في المعتقل الا من جربه أو من كان شاهدا عليه.

لماذ أمريكا

وأردف عفيفي: "أتفهم أن كثيرين سيغضبون مني لأنني اخترت أمريكا لكن لم يكن لدي أي خيار آخر، ولم يكن لدي أي مكان يمكن ألجأ إليه، فالوقت كان ضيقا وقرار العتقال كان سيصدر ربما خلال دقائق، وتنفيذه سيكون سهلا، ولم أجد أمامي سوي التأشيرة التي كنت قد حصلت عليها قبل فترة للزيارة وتنتهي بعد أسبوع، ولهذا اتجهت فورا الي المطار وليس في جيبي بعد أن دفعت ثمن تذكرة السفر سوي 50 دولارا ولا أعرف ماذا سأفعل. كل ما فكرت فيه هو أن أهرب من مصير أعرفه جيدا كما أعرف وأتوقع ما تم ترتيبه".

وأكد عفيفي أن الناس ستتعاطف معه اذا عرفت الحقيقة وعرفت المصير الذي كان ينتظرني وسيلتمسون لي مليون عذر لأنهم يعرفون الظروف المأساوية التي عشت فيها مؤخرا لدرجة أنني هربت من مصر تاركا ورائي أطفالي الخمسة وزوجتي دون أن أخبرهم بسفري ألا وأنا في المطار.

لم أعذب أحداً

وأكد عفيفي أنه سيعود الي مصر حين يتأكد له أنه لن يتم التعرض له بأذى، وأنه سيلقى محاكمة عادلة لأنه لم يذنب في شيء، وأن كل جريمته هي أنه "أراد أن يعرف الناس حقوقهم وحمايتهم من أي ضابط ظالم يريد أن يبطش بهم".

وحول بعض التعليقات التي قرأها في "العربية.نت" عند نشر تقرير مصادرة كتابه، والتي تتهمه بأنه كان يعذب الناس، قال عفيفي "يعلم الله انني لم أعذب ولم أرتكب أي شيء أريد التكفير عن ذنبه. ولو كان في سجلي التاريخي أي جريمة لتم الاعلان عنها فورا في صحف الحكومة لتشويه صورتي".

وردا علي سؤال يتعلق بمصير أولاده الخمسة وزوجته بعد أن تركهم وغادر البلاد، قال عفيفي لـ"العربية نت " هذه منطقة محظورة لا اتمني أن تقترب منها أجهزة الأمن مطلقا، لأنه لو تعرض أحد أولادي أو زوجتي لأي أذى من أي نوع، حتى لو كان بمكالمة تهديد، فسيكون رد فعلي قاسيا جدا لن يتحمله أو يتوقعه أحد، خاصة وأنني ضابط شرطة سابق في الاساس، وأعرف كل الألاعيب التي تلجأ إليها أجهزة الأمن، وبالتالي ادرك جيدا في أي ملعب سيلعب خصمي.

وعبّر عن أمله في انتهاء الازمة سريعا في اطار داخلي حتي لا يضطر الي اللجوء الي جهات خارجية لحل الموضوع وقال "اذا استمر الوضع هكذا فليس أمامي خيارات أخرى".

مش قلت لك سبوببببببببببببببه

[محمد عبدالعزيز]

معلش يا س س

أخوك الصغنن حلاوة فهمه على قده, ياريت تفهمنى فين السبوبة فى الموضوع.

صدقنى مش فاهم تقصد إيه؟

[Handasah]

مش عارف الراجل دة ياما كان مزنوق فى قرشين وقال اجيبهم من عمل حتة كتاب يعمل ضجة ياما بحق وحقيق كل الموجود حقيقى وهو دة اللى موجود فعلا فى مصر وانا اميل للاقتراح التانى ..........

[se_ Elsyed]

السبوبة باينه

الراجل مألف كتاب ... عادي جداً

وعشان يلفت نظر الناس إليه يروح للسفارة الأمريكية ويطلب اللجوء .. ويسيب عياله في مصر وهو وصل لرتبة عقيد شُرطة لأ ويقولك إيه

وردا علي سؤال يتعلق بمصير أولاده الخمسة وزوجته بعد أن تركهم وغادر البلاد، قال عفيفي لـ"العربية نت " هذه منطقة محظورة لا اتمني أن تقترب منها أجهزة الأمن مطلقا، لأنه لو تعرض أحد أولادي أو زوجتي لأي أذى من أي نوع، حتى لو كان بمكالمة تهديد، فسيكون رد فعلي قاسيا جدا لن يتحمله أو يتوقعه أحد، خاصة وأنني ضابط شرطة سابق في الاساس، وأعرف كل الألاعيب التي تلجأ إليها أجهزة الأمن، وبالتالي ادرك جيدا في أي ملعب سيلعب خصمي.

إيـــه هاتصوت وتلم عليك الناس ؟ ولا تكشف راسك وتدعي عليهم ؟

ويطلع في كل البرامج ويقولك بيحاربوني وبيهددوني بالقتل .. ومش عارف مين في امن الدولة بيتصل به ويغير صوته ويهدده

والحبشتكانات دي كلها ..

عشان الممنوع يبقى مرغوب

وتبدي الناس تدور عالكتاب اللي بيتباع عادي على الأرصفة في مصر

وهي طريقة لا أحبذها بصراحة ..

يعني بإختصار .. ما بحبش حد يشتغلني .

[محمد عبدالعزيز]

إيه يا س س يا حبيبى

إنت كنت بتتفرج على فيلم هندى ولا إيه؟

بالله عليك يا راجل فى رجل شرطة -يعرف بالظبط إيه اللى ممكن يحصل له لو اعتقلوه- يدخل عش الدبابير برجله عشان يتشهر ولا يعمل سبوبة من الكتاب؟!!!

ده كلام يدخل العقل برضه؟

طب ماعنده مليون حاجة هايفة يكتب فيها ويكسب من وراها فلوس بالكوم ومش بعيد ياخد جوايز من الدولة كمان على هيافته ويقولوا عليه ده مبدع, يعنى أنا برضه اللى هأقولك الكلام ده يابو السيد؟

يا عمنا الراجل مقدم بلاغ رسمى للنائب العام ضد وزير الداخلية, حتى اقرأ بنفسك:

http://www.almasry-alyoum.com/article.aspx?ArticleID=100801

واٍرجع تانى وأقولك... مجنون مين اللى يعمل حاجة زى دى وتكون كتبه بتتباع على الرصيف زى مانت بتقول كده-ومش عارف بصراحة إنت جبت الكلام ده منين- وأى عيل صغير ممكن يروح جايب نسخة من اللى إنت بتقول عليهم على الرصيف دول ويقوله ماكتابك بيتباع عادى أهو, إيه البلاغ الأهبل اللى إنت مقدمه ده بقى؟

لا واللى يعمل الكلام ده كله يبقى رجل شرطة سابق كمان.

فى حد يروح يلعب مع الأسد برضه يا سى السيد؟

أنا بصراحة لم أكن أتوقع إن الموضوع يتحول لهجوم على المؤلف وألاقى نفسى فى موقف دفاع عنه, وزى مانتم شايفين أنا فتحت الموضوع فى قسم الخدمات العامة , واللى شكرنى بأقوله العفو أى خدمة, واللى مش عاجبه الموضوع ممكن بكل بساطة مايحملش الكتاب ويا دار ما دخلك شر.

[se_ Elsyed]

يابا الحاج محمد عبد العزيز إستأنى شويه الله يكرمك

انا أتفرجت على حلقة العاشرة مساءً بتاعت الراجل من إسبوع وهو نفسه اللي إعترف إن الكتاب بيتباع عادي وعمال يهول الموضوع لدرجة المذيعة إتضايقت منه لما حول الموضوع كله من مناقشة محتوى الكاتب إلى إنه بيعيش في خطر وإنه الحكومة بتطارده وإنهم هايحطوا السيخ المحمي في صراصير ودنه

وبعدين ما هون ممكن أنا أقدم بلاغ ضدك للنائب العام وأقول محمد عبد العزيز بيغلس عليه :)

هي حكاية

وبعدين في الأول والاخر .. انا مع الكتاب ومحتواه قلباً وقالباً ...

ولكن ضد اللي حصل في فيلم بخيت وعديله لما هييجوا الدنيا وقالك الحكومة خطفت بخيت وموتته والناس هاجت وماجت وطلع راقد في المستشفى بيتعالج وهو اللي هرب وراح الشاليه عشان يعمل دماغ ...

صباحك فُل

فين بقت الكتاب بقى خلينا نعمل دماغ زي بخيت ؟

[محمد عبدالعزيز]

يعنى تبلغ عنى النائب العام وعاوزنى أجيبلك بقيت الكتاب كمان, ده إيه الاستغلال ده؟ :)

وبهذه المناسبة بفكر أألف كتاب وأسميه "عشان مفيش مشرف فى المحاورات يستغلك" وأهو الواحد يعمل من وراه قرشين أحسن العيشة بقت ناااااااااااااار يا حبيبى نااااااااااار

معلش يا س س يا أخويا, أنا لا بشوف العاشرة مساءً ولا دياوله لأنى ماعنديش دش ولا وصلة حتى, وراضى بالبيت بيتك والمذيع أمين الشرطة إياه أتفرج عليه شوية لغاية ما يحرق دمى وأروح قافل التلفزيون.

بس بجد يا س س, وجهة نظرك معتبرة, ولكن الله أعلم بالنيات مش يمكن الراجل كان بيستغل الفرصة عشان يعمل رأى عام مضاد يحسس وزارة الداخلية إن ممكن الدنيا تهيج عليهم لو فكروا إنهم يضروه فى حاجة؟ يمكن الله أعلم.

المهم فى الموضوع كله محتوى الكتاب, والموقف اللى احنا فيه ده بيفكرنى بنكتة سمعتها زمان بتقول إيه؟

اتنين مساطيل قاعدين بيحششوا , واحد بيسأل التانى وبيقول له هو الحشيش حلال ولا حرام؟

قام التانى قال له مش عارف, بس إذا كان حلال أدينا بنشربوه... وإذا كان حرام أدينا بنحرقوه.

يعنى... أدى الكتاب أهو بين إيدينا إذا كان الراجل قاصد الخير من وراه وإنه يعرفنا حقوقنا وواجباتنا أدينا بنقرِوه.

وإذا كان قاصد من وراه مكسب مادى وشهرة, أهو الكتاب بيتوزع على النت مجاناً وطلع من المولد بلا حمص.

صباحك زى العسل يابو السيد

[واثق الخطوة]

أخواني هل تتخيلون أن هذا الكتاب سيحميني -عن نفسي _ من الضرب علي قفايا !

حسنا ساحمل نسخة في جيبي

اتذكر أيام الثانوية العامة وكنا لتونا قد استخرجنا بطاقات شخصية ورقية .. كان هذا في عام 1991 تقريبا ..

قبضوا علي عدد من زملائنا ..

اقتادوهم قسم الشرطة وهات يا ضرب

صرخ أحد زملائنا - هو في فرنسا حاليا _ وقال : لا أنا ما انضربش أنا مواطن ومعايا بطاقة شخصية ...

المخبر بكل بساطة قاله : طيب مش تقول لنا انك معاك بطاقة .. هيه فيه ..

استخرجها زميلنا بكل فخر وأعطاها له بكل كبرياء ..

والمخبر أخذها ومزقها ارباً ارباً بكل بساطة و رش فتافيتها على رأس الزبون!

الولد من صدمته انهار وبكى ..

عذراً سيستمر ضربنا على قفايا ..مع كامل احترامي للقفا الذي تحمل ويتحمل كثيراً ...

عن نفسي اتمني ان أبوس وأقبل قفايا احتراما ولكن المشكلة اني حاولت ولم استطيع !

[ابتسامة رضا]

السلام علينا وعلي عباد الله الصالحين

اطلعت علي الكتاب وقرأت منه كام صفحة

هو عبارة عن نصائح مكتوبة بلغة سهلة جدا يفهمها أخويا اللي واخد دبلون صنايع و مأظنش أبدا ان الداخلية تصادر كتاب بيعلم الشعب يعرف حقه وحقوق غيره ومش ده الكتاب اللي يتصادر ويطاردو المؤلف أظن دي وسعت حبتين منهم علشان يرغبوا الناس تقرأ الكتاب أصل الناس بتحب تجري ورا الممنوع و الحكومة فهمتها وتعاملت مع الشعب بالمنطق اللي يفهمه أشاعو ان الكتاب اتصادر وكمان المؤلف هرب خوفا من الاعتقال هههههههه برافو خلوا الناس تدور علي الكتاب

[osaimi]

عشان ما تتضربش علي أفاك - الكتاب الذى تم مصادرته

Afak.pdf

[jgeorge]

شكرا بس الكتاب ناقص، فين الباقى؟

[Modest]

شكرا بس الكتاب ناقص، فين الباقى؟

فضلاً إضغط هنــــــــــــــــــــا لتحميل النسخة الكاملة من الكتاب بصيغة PDF

و هنــــــــــــــــــــا لتحميل النسخة الكاملة من الكتاب بصيغة Word

:blush2:

[moheltohamy]

أحب أقول تعليق صغير... الكتاب ده فكرة عامة ، فــ ... محدش يحاول يتفزلك مع الشرطة... من حق الظابط يغلس عليك ويتغابى عليك وعلى أهلك كمان!

ولو عشت الدور وقلت الدستور والقانون والحريات المدنية وحقوق الإنسان ، هيفتشك ، ويفتش بيتك ، ويلبسك حتت حشيش كمان ، وياخدك القسم ، وتاني يوم هيجيبلك إذن من النيابة (بأثر رجعي) ، وكله قانوني! والكلام ده من ظابط شرطة كنت بادردش معاه عن الكتاب ده! أفراد الشرطة ليهم سماحيات ، وهوه مصدّق عنّك ، هيقول لك هوه مالوش مصلحة يكذب ، وعندك مثال ؛ مخالفات الرادار مثلاً ممكن تيجيلك في منطقة عمرك في حياتك ما رحتها. ما حصلش ، اتفضل اثبت! (قالو للحرامي احلف! ما كلكو بتقولو ما حصلش!)

ولو مثلاً في كمين وحبيت تغلس شوية ، وكلام من ده ، ممكن يوقفك ، ويفتش العربية ، ويقطع الفرش والكراسي (يقطعهم بجد) ، ويقول لك ، إحنا عندنا التحريات بتقول إن فيه شحنة مخدرات جاية! حجة قانونية تماما.

تعرفوا حاجة ... مرة وانا راكب تاكسي ، السواق وسط كلامه بينصحني "بص يا بيه ، لو حصل وفي كمين الظابط شفته عمال يتفحص صدر مراتك وهيه جمبك ، سيبه يبص ، وما تقوللوش حتى دي المدام ، آهي بصة وهتعدي ، بدل ما يقول لك إركن على جنب ، ويبدأ يتغالس عليك بأي سماحية ممنوحة له ، وهيه (السماحيات) كتير مع الأسف! :protest:

م الآخر ، محدش يستظرف مع الشرطة ، ولا يحاول يعمل تتش معاهم إلا لو التتش حصل لوحده ... يبقى ساعتها ... الله يكون في عونكم... خبّط بقى واللي يحصل يحصل! آل هيسخطوك يا قرد ... آل هيخلّوني إيه؟!

تم تعديل 29 مايو 2008 بواسطة moheltohamy