هل تؤيد أن يلعب الحضري مباراة الأرجنتين؟

[Modest]

يلعب منتخب مصر يوم الأربعاء المقبل (26 مارس 2008) مباراة ودية دولية أمام منتخب الأرجنتين المُصَنَّف الأول على العالم حالياً.

و بعد مشكلة العصر التي لم تصل لنهايتها بعد، و الخاصة بعصام الحضري حارس مرمى مصر الأول.

هلللل أنت من المؤيدين لاشتراك الحضري في المباراة أم لا؟ .. و لماذا؟

اتفضلوا.. الباب مفتوح للخناق :blink:

تم تعديل 24 مارس 2008 بواسطة Modest

[semsema]

هلللل أنت من المؤيدين لاشتراك الحضري في المباراة أم لا؟

ايوه....

و لماذا؟

كده...

اتفضلوا.. الباب مفتوح للخناق

لا والله مايصحش......الكبار يدخلوا اولا

حاضر حاااااضر......هقوم اذاكر اهه

[se_ Elsyed]

خياننننننننننننننننه

60 % بيأيدوا !!!!!!!!!!!!!!!!

طب إيه رأيكم بإني أؤيد عدم لعبه للمبارة ...

والماتش هايبقى بكره وهاتقولوا آبيه سين سين قالها حكمه عالية مدوية

فجمهور الاهلي لن ينسى ما فعله هذا المخادع .. ومازال يفعله على فكرة ... فبعد الهليلة اللي عملها لما رجع ومصر هي أمي والاهلي جوه في دمي وأنا عضم اكتافي من خيره . وجدناه متواطيء من النادي السويسري وموقع على شكوى ضد الأهلي إترفعت للفيفا بإنه بقى له 8 سنوات في عذاب وان الأهلي معلقه من رجليه على باب النادي وكل ده وهو مازال يخدع مصر كلها بتصريحاته العبيطة .. ثم وجدناه يوقع الإسبوع الماضي على خطاب رغبة للعب للنادي السويسري .. كل ده وهو بيحلف ميت يمين إنه ما عملش كده وإنه لا بيعرف إنجليزي ولا فرنساوي ولا عربي حتى وكان بيوقع على ورق خلاص والنادي السويسري الوحش إشتغل سذاجته وعمل عملته السودا ...

إوعى حد يفتكر إنه بيدور على تجربة الإحتراف في الخارج وهو عنده 36 سنة .. ولكنها السبوبة اللي عايز يلهفها لوحده بالرغم من إن عقده مع الاهلي مازال ساري حتى 2010 ..

بالمناسبة شركة فودافون وعدة شركات إعلانية أخرى كان بياخد من وراها ملايين سنوياً رفعوا صورته وإعلاناته من الشوارع ولغوا عقود الترويج والإعلانات معه ... وأرقص يا حضري ...

والاخ حسن أبو شحاته اللي بيتكلم عن الأخلاق والمباديء هو نفسه من أوقف ميدو 6 شهور لإنه رفع صوته عليه في مباراة السنغال الشهيرة ..

ما بالنا في لاعب هارب من ناديه ؟

والاخ أبو شحاته هو نفسه من أعلنها إن ما فيش حد هاينضم للمنتخب إلا إذا كان جاهز وبيشارك مع نادية ...

والأخ الحضري داخل في شهرين أهو مالمسش كورة ..

سيبوكو من كل ده - وإنت بالذات يا موديست حسابك معايا بعدين .. شايف أنا اللي لابس خوزه حمرا وزانقك في الكورنر وعمال أكيل لك - ..

جماهير الأهلي ستزحف بكره نحو الخنادق الشمالية لمهاجمة الحضري وتأديبة ...

وكمان عشان تبهدل حسن شحاته لإستفزازة لجماهير الأهلي ..

من غير كلام متزوق وحلمنتيشيات .. ده اللي هايحصل بكره لو الحضري لعب وحتى لو بقى في الإحتياطي ..

هاسألك سؤال يا موديست ولو جاوبت من ورا قلبك يارب يارب الزمالك يطلع من دور الـ 16 في أفريقيا ..

لو عمرو زكي هو اللي هرب بعد ما دفعتوا فيه ملايين .. ومع أول مباراة للمنتخب لقيتوه يا زملكاوية نازل أرض الملعب بيطنطط ويطلع لكو لسانه ... هاتشجعوه وتقولوا سيبوه يدور على مستقبله ويخوض تجربة الاحتراف .؟

لو قولت أيوه ... هانقول كده .. يبقى أنا هاحب على راسك قدام نجع المحاورات وهابقى محقوق لك .. وممكن بالحق ده تطالب بربع خروف مندي على حسابي ...

[nash]

لو لعب الحضري..ودخل جون في الشبكه ليلته هاتكون مش فايته ..ده رايي الشخصي....

لو في ظروف اخري التبريرات الجاهزة هاتكون موجوده وعادي الكورة اجوال...

حفظا لماء وجهه أري الا يلعب هذه المبارة

هذا وبالله التوفيق

[Modest]

هلللل أنت من المؤيدين لاشتراك الحضري في المباراة أم لا؟

ايوه....

و لماذا؟

كده...

اتفضلوا.. الباب مفتوح للخناق

لا والله مايصحش......الكبار يدخلوا اولا :closedeyes:

حاضر حاااااضر......هقوم اذاكر اهه gt:

استنوا بس لما اشوف البنت الي مفيش يوم شفت في إيدها كتاب و بتستفزني دي

كاتبة الرد الساعة 9 و ربع مساءاً و أنا قلت 100 مرة ماعنديش بنات يدخلوا المحاورات بعد الساعة 6 ... لا الحضري هاينفعك و لا هايدخل الامتحان بدالك .... ياللا قومي ذاكري

[Modest]

راجع لك يا سين سين اتخانق معاك بس في إيدي حتتين غسيل أخلصهم و اجي على طول

[se_ Elsyed]

راجع لك يا سين سين اتخانق معاك بس في إيدي حتتين غسيل أخلصهم و اجي على طول

وأنا عندي وعدي وربع الخروف جاهز لو طلع لك حق

سمي وأدخل بصدرك

[osaimi]

مش ناقص غير تطالبو بإعدامه فى ميدان عام ولا تخلعوا عنه الجنسية المصرية عشان هيسيب الأهلي ، ياناس حرام عليكو

[Modest]

لو لعب الحضري..ودخل جون في الشبكه ليلته هاتكون مش فايته ..ده رايي الشخصي....

لو في ظروف اخري التبريرات الجاهزة هاتكون موجوده وعادي الكورة اجوال...

حفظا لماء وجهه أري الا يلعب هذه المبارة

هذا وبالله التوفيق

كلام سليم كلام معقول ماقدرش أقول حاجة عنه إلا إني أضيف ان حفظ ماء الوجه هايكون للبلد اللي ممكن تبقى فُرجة في القنوات الفضائية ..ثم حفظاً لماء وجهه.

كابتن موديست عبد ربه موديست

ناكد قروي

[Modest]

حد ينزل لنا دور شاي علشان الموضوع هايحلو

أنا بقى أوافق على لعب الحضري مع المنتخب .. و بنفس منطق النادي الأهلي .. و أقول لك إزاي بس هات سوجارة

فاكر انت ايام الغير مأسوف على شبابه تارديللي مدرب المنتخب لما الحضري (سبحان الله نفس اللاعب :closedeyes: ) اعتذر عن المنتخب لاختلافه مع تارديللي .. كان إيه رد فعل النادي الأهلي الفظيع (على وزن الرهيب و العظيم و بقية الكلام الكبير اللي بيفكرني بكلام القذافي).. كان رد فعله إنه أشرك عصام الحضري عااااادي خالص في المباريات المحلية و الأفريقية و دوري الحواري و كافة شيء ... و لا شفنا بقى حد بيصوّر الموضوع على إنه هروب من ميدان المعركة و لا خيانة للبلد و لا أي حاجة .. ليه؟ لإن محدش يقدر يفتح بؤه قدام فتوة الحارة.. ماهو الفتوة أقوى من الحارة.

هات كمان سوجارة علشان نخش في موضوع حسن شحاته :sad:

فاكر انت لما إدارة الأهلي اوقفت ابراهيم سعيد و على ما أتذكر كان هرب لتركيا .. الجوهري قام بضمه للمنتخب أثناء مشكلته و قال المنتخب لا علاقة له بمشاكل اللاعبين مع الأندية ... مع استنكاري لهذا الموقف حتى لو اللاعب عمرو زكي (دي ضمنياً إجابتي على سؤالك و استحق الخروف gt: ).. إلا إنه حصل و محدش قدر يفتح "بؤه" برضه و السبب معروف.

دلوقتي لما حسن شحاته يقول دي مشكلة بين اللاعب و النادي و إن "مصر فوق الجميع" يبقى لازم يتنعل سنسفيل جدوده.. و السبب أيضاً معروف.

إذا كان الجمهور رايح مباراة ""مصر"" و الأرجنتين علشان يبوظها بشتايم و يفرج العالم كله على الحضارة بتاعتنا زي ما فضحونا على شاشة التليفزيون بعد تسليم الكأس للنجم الساحلي...يبقى نلغي كل حاجة من البلد و نخلي النادي العظيم إياه.

إذا كان الجمهور رايح مباراة لبلده علشان يشتم لاعب و مدرب كانوا السبب في فرحة لم نكن نحلم بها يبقى ساعتها الأكثر وطنية في رأيي بالنسبة للجمهور إنهم يقعدوا في بيوتهم.

و لأني أتصور إن ده فعلاً اللي هايحصل و طز في سمعة البلد (راجع مرة أخرى مراسم تسليم الكأس للنجم الساحلي على أرضنا لما بصقوا عليهم و جابوا اللي شايل الكاس من قفاه و طرحوه أرضاً) فإني أرى إنه المفروض ما يلعبش علشان الماتش يعدي على خير و ننقذ ما تبقى من سمعتنا... و لو إني برضه حاسس إن سواء الحضري لعب أو مالعبش الماتش هايتقلب شتيمه فيه و في اللي جابوه و اللي جابوا اللي جابوه وسلّم لي على القنوات الفضائية و سمعة البلد.

إذا كان نادي من النوادي يُصِر على أنه على حق (في الحق و الباطل) و أهم من منتخب البلد نفسها و يسانده في ذلك الحملات الشهيرة و المعروف ماذا يكتب فيها مقدماً.. يبقى ليه الواحد يوجع دماغه في كلام المباديء اللي بحق و اللي مبادئش.

و للمرة العشرومية.. أنا لا أقر ما حدث من الحضري .. و إن كنت بدأت أتعاطف معه مؤخراً بعد إحساسي إن الموضوع اتقلب لإذلال لشخصه.

ثم هل بتّ انت بتعزم بقلب جامد علشان عارف إني مش باكل الضاني

[se_ Elsyed]

مش ناقص غير تطالبو بإعدامه فى ميدان عام ولا تخلعوا عنه الجنسية المصرية عشان هيسيب الأهلي ، ياناس حرام عليكو

إتفضل شاركنا الأول في الربع خروف

بسم الله .. حاجه على ما قُسم

والسؤال موجه لك

عمرو زكي متعاقد مع الزمالك بعقد ساري المفعول لمدة 4 سنوات . والزمالك دافع فيه 13 مليون

لو صحيتو بكره ولقيتوه في دولة ليخنشتاين الشقيقة ولابس الفالنه النص كم بتاعت نادي بلدية ليخنشتاين ...

ساعتها هاترفع إيدك وتدعي له بالتوفيق وتقوله إرفع راسنا في بلاد الليخنانيين وحلال عليك الفلوس اللي اخدتها من الزمالك ومن ليخنن .. وطظ في مستحقات النادي وطظ في العقد اللي شغال ويحيا الإحتراف الخارجي ؟

ياريت تجاوب بنعم أو لا

--------------

الإبن موديست

حفظ ماء الوجه هايكون للبلد اللي ممكن تبقى فُرجة في القنوات الفضائية ..ثم حفظاً لماء وجهه

إيه نظام غسيل الوش ده ؟

يا سيدي يالفاضل حسن شحاته ومعه جوقه كبيرة من المطبلتيه هاجموا الأهلي وقالوا : وهو النادي هايقف على حارس مرمى من التلاتة اللي عندكو ؟ وكمان دي غلطة الاهلي اللي إعتمد على حارس واحد طوووووووووووووووووووووال تلك الفترة لحد ما الراجل بقى عنده 36 سنة

وقام في نفس الوقت طالع ومهلل وقايل إن عصام الحضري عامود في المنتخب .....

تفتكر سيادتك هو ليه شحاته وشلته إعتمدوا برضوا على العامود واحد فقط مع إنه عندهم 3 عمدان ؟

وليه بيحلل لنفسه ما يحرمه على غيره ؟

إبني العزيز آبيه موديست ..

دعنا نتفق على عدة نقاط قبل ما تمد إيدك على الخروف عشان أنا شايف لعابك سال وهاتغرق لنا الدُنيا :

1- هل انت من المؤيدين لحكمي وحكومتي وتتفق معي على ضرورة إحترام العقود ؟ ( جاوب بنعم او نعمين )

2- هل تتفق معي إن الحضري لو وقف على رموشه وعمل عجين الفلاحة ما هوش معتب النادي الأهلي تاني ؟

3- هل تتفق معي بإن الاهلي يحق له إتخاذ جميع الإجراءات التي تضمن له حقه عند الأخ اللي هبر فلوس وكت ده ؟

4- هل تتفق معي إن الاندية هي المورد الرئيسي للاعبي المنتخب وبالتالي يجب إحترام قرارتها التربوية ضد لاعبيها لإن اللي خلاه يهرب من نادية فبالتأكيد بكره هايعملها مع المنتخب ؟

5- هل تتفق معي إن مصلحة المنتخب الذي يُمثل البلد تبدأ من مصالح الأندية أيضاً ؟

أكتفي بهذه الأسئلة ودلوقت تقدر ترجع التخشيبة تاني وأشوفك في جلسة 24/9/2009 م

خدوه من هنا دلوقت

[se_ Elsyed]

إيه ده ..

موديست ضرب مداخلتين مع إنه لسه مكلمني من العربية

الولد ده طالع بدورين في الفيلم

هاستقرا وأرجع ...

مش أرجع يعني Vomit لا يعني well be back

قشطه وضرب نار للصباح الباكر

[se_ Elsyed]

مرة أخرى

يا عزيزي موديست المنتخب بيستمد لاعبيه من النادي وليس العكس

المنتخب لا بيدفع أبيض ولا أحمر في تعاقدات النادي مع لاعبيه

يبقى النادي هو الأساس يا حاج

واللي بيخسر هو النادي يا ريس

إبراهيم سعيد ... كنت عارف إنك هاتقولها

إبراهيم سعيد كان لسه عيل ما عندوش 19 سنة وقلنا متهور وعفا الله عما سلف مع إن حركة الجوهري هي اللي بوظته بعد كده ..

انما ده شخص راشد 36 سنة وكابتن النادي الاهلي وكابتن مصر والكل شاله فوق راسه .. فكان المقابل إنه قابل ده بالخيانة ...

بالمناسبة شيكابالا عملها وهرب على اليونان ..

ولما رجع بعد كام سنة من الفشل أستقبله الجميع بما فيهم الأهلي والزمالك إستقبال الفاتحين ..

وأنت تعلم تماماً يا موديست إن لو كان لعيب من الزمالك هو اللي عمل كده ما كانتش الجماهير هاتروح عشان تقول بيب بيب مصر مصر ...

اللي بيحضر العفريت يا إما يعرف يصرفه .. يا إما مايحضروش ويقعد ساكت

وحسن شحاته أستفز مشاعر 70 مليون أهلاوي وبالتالي عليه أن يتحمل نتايج إستفزازاته

وعن إذنك رايح أتغذا وراجع لك

[Scorpion]

1- هل انت من المؤيدين لحكمي وحكومتي وتتفق معي على ضرورة إحترام العقود ؟

بسسست موديست .. خد بالك ده سؤال زومبة .. عشان انا شايف سي السيد كان بيقرأ موضوع الكنال و سيبس قبل ما يكتبه .. واخدلي بالك من السيم ...

2- هل تتفق معي إن الحضري لو وقف على رموشه وعمل عجين الفلاحة ما هوش معتب النادي الأهلي تاني ؟

ده مش بس لو وقف علي رموشه .. ده لا هو و لا أي بني آدم في مصر حيحلم بكده بعد ما الريس اصدر قراره خلاص يا ابو السيد ...الموضوع خرج من ايدي يا أستاذ .. البوفيه في الدور الرابع عالشمال ...

و ابقوا سيبولي حتة من الخروف دي .. مش عمالين تتخانقوا قدامنا و بعدين تروحوا تاكلوا خرفان مع بعض ....

[حسام يوسف]

السلام عليكم

ما فعله الحضرى مع الأهلى يخرج عن روح الالتزام

وشرف الاتفاقات والتعاقدات

وهو يستحق العقاب

لكن يستحق العقاب من النادى الذى أخطأ فى حقة

وأنا ضد الربط بين خطئة مع نادية

ومشاركتة مع المنتخب

وانا عارف ان ده مش موضوعنا لكن الشيئ بالشيئ يذكر

محمد بية بركات اللى هرب م المنتخب البطولة السابقة

وبشير باشا التابعى الذى هرب م المشاركة مع المنتخب بطولتين متتاليتين

(وده كان من الاسباب الرئيسية لفوز المنتخب والحمدلله بالبطوبتين)

والاتنين ماحدش عاقبهم

لا فى النادى ولا المنتخب

[Khiber]

لي رأي آخر سأذكره

المباراه دى جات فى وقتها ....... الإش بأه لو العيال كسبوا ......

[التونسى]

رغم انى أؤيد لعب الحضرى للمباره .. الا ان ده طبعا حيكون عامل استفزاز لمعظم جماهير مصر واللى هى بتنتمى للاهلى .. وجماهير الاهلى معذوره ... لان اللى عمله الحضرى فعلا ميعديش بالساهل .. والمباره كمان وديه .. يعنى مش مؤثره .. يعنى للاسف ممكن بكره يحدث ما لا يحمد عقباه من جماهير الاهلى اللى زى ما قلنا هى معظم جماهير مصر ..... وانا رغم تأييدى للعب الحضرى لانى لست اهلاوى وميفرقش معايا اوى اللى عمله الحضرى .. لان المنتخب عندى اهم طبعا .. لكن بصراحه ودلوقتى بس بتمنى من كل قلبى انه ميلعبش ..

[AMEIR]

نعم اويد ان يلعب الحضري مباراة الارجنتين ليش لن اللي مالو خير بمصر مالو خير بسويسرا

[Modest]

1- هل انت من المؤيدين لحكمي وحكومتي وتتفق معي على ضرورة إحترام العقود ؟

بسسست موديست .. خد بالك ده سؤال زومبة .. عشان انا شايف سي السيد كان بيقرأ موضوع الكنال و سيبس قبل ما يكتبه .. واخدلي بالك من السيم ...

و ابقوا سيبولي حتة من الخروف دي .. مش عمالين تتخانقوا قدامنا و بعدين تروحوا تاكلوا خرفان مع بعض ....

ماتخافش على أخوك يا كابتن سكوب :sad:

أخدت بالي من السيم و رحت إمبارح سهرت مع أربع محامين من سويسرا و جاي أخلّص و أخد الخروف :sad: .. حقك محفوظ يا عمي هاشيلهولك في التلاجة لغاية ما أشوفك :wub:

[se_ Elsyed]

خلصت يا معلم موديست وأكتمل الفيلم الحمضان اللي عمله الحضري على الناس كلها

موقع في الجون

رسميا .. الحضري يطلب اللعب لسيون

الثلاثاء، 25 مارس 2008 - 20:15

تلقى الاتحاد المصري لكرة القدم يوم الثلاثاء خطابا من الاتحاد الدولي (فيفا) يطلب ردا من النادى الاهلي على رغبة عصام الحضري باللعب لنادى سيون السويسري والتى أرسلها للفيفا يوم الخميس الماضى عن طريق نادى سيون والاتحاد السويسري.

وطالب الفيفا في خطابه من النادي الأهلي معرفة الارتباطات القانونية والمؤقتة للاعب خلال الفترة المقبلة.

وحدد الفيفا يوم الخميس المقبل 27 مارس الجارى للرد.

يذكر أن الحضري كان قد صرح لوسائل الاعلام عقب وصوله إلى القاهرة أنه سيعلن عن رغبته باللعب في الأهلي ومستعد لدفع أي غرامة مادية بسبب توقيعه لسيون