أفضل مطعم أكلت فيه في مصر !!

[linux]

فول:

الجحش بتاع السيده

كباب:

ابوشقره فى القاهره

بئش فى اسكندريه (مش بطال ابدا)

حوواوشى:

الدهان بتاع الحسين

شاورمه:

واحة فرعون بتاع الهرم

سمك مشوى:

مصر واسكندريه وبورسعيد أساتذة سمك!!! اى مكان ينفع

زيفريون فى ابو قير كويس بس سياحى (غالى)

طورشى:

اى محل طورشى بلدى من الحلميه القديمه

عصير قصب:

مش فاكر اسم المطعم ... امام فندق ماريوت فى سفينه ... يديك شووب لو راجل خلصه :D :D

لب:

مقلة صلاح الدين فى مدينة نصر

عامة:

الدار فى طريق سقاره

اندريا (فراخ مشويه)

[abofasad]

يا ناس حرام عليكم

جريتم ريقنا على الأكلات المصرية الحلوة ونسيتم ان احنا في الغربة نسمع فقط عن الأكلات ولكننا لا نستطيح حتى شم ريحتها الحلوة.

أرجوكم خفوا شوية،

إذا كنتم عاوزين تستمروا في هذا الموضوع . اقترح أن تكون المطاعم منزلية يعني كل واحد يتقن أكلة حلوة يقوم بوصفها واحنا هنا في الغربة نجربها وندعيلكم

واتفضلوا معانا

[ابو يوسف]

فرغلي بتاع العصير تاخد شوب مانجا...افضل محل عصير في مصر...

الموضوع ده ح يجننى !!!!

ليه فرغلى احسن محل عصير فى مصر ؟؟؟؟

هو بيعمل ايه زيادة ؟؟؟

كل مرة اشرب عنده ما الاقيش اى اختلاف ..

و لما حد يسألنى عن احسن محل عصير فى مصر بأقول .....

فرغلى

:shock: :shock: :shock: :shock:

أرزاق

[وسام]

لمحبى بلبع فى اسكندرية نصيحة جربوا عبد الوهاب فى الساعة

حاجته احسن و بعدين فيه ميزة ان كل حاجة بتتعمل قدامك حتى العيش ....الريش و النيفا والموزة هناك مالهمش حل :D

بلبع فى اخر سنة بعد ما اتحرق بقى اى كلام

وكمان لو عايزين فول و خلافه يبقى محمد احمد ... و متنسوش تجربوا صحن الجبنة المقلية ...الوحيد فى اسكندرية اللى بيعمله

بالنسبة للعصاير و الكوكتيلات فمحلاته منتشرة على طويل الطريق فى ميامى و كلها بتتفنن فى اشكال العصاير و الفخفخينا :)

بالنسبة للسمك فيش ماركت و هوا فوق تكا جريل بتاع راس التين بس السعر حراق شوية

و كمان واحد فاتح جديد فى العصافرة على شارع ابو قير ( مش فاكر اسمه)

عن نفسى انا بحب اشترى السمك من السوق و اخليهم يعملوه زى مانا عايز طاجن ,مقلى او فى الفرن ويسرفسوه 5 نجوم و يبقى فى منتهى الرخص و اللذة

جربوا و ابقوا افتكرونى

[MuslimaEgyptian]

بصراحه...كلللللل شئ فى مصر حلو جدا جدا علشان مفيش حاجه هنا ليها طعم مع ان الاكل وانواعه لا يعد ولا يحصى. حتى ولو كان كيس شيبسى من البقال فطعمه أحسن بكتير من هنا :( وما شاء الله على انواع أكياس الشيبسى، أنواع بها إبداع...ولا الجبنه الرومى والفينو...يا عينى على الفينو :inlove: :inlove:

بس ممكن نقول أمثله علشان نتفاعل مع الموضوع وبما إنى أيضا أحب الاكل والمطاعم، فكما قال الاخ براود هى من الخروجات القليله النظيفه وخاصا هنا..

-حد جرب Swiss Air فى الجيزه..شارع النيل؟ عنده سكالوب محصلشى.

-Flying Fish للأسماك (بس بصراحه كل محلات السمك بمصر مش ممكن، الأنواع والبرسنتيشن خطيره).

-Chilis ، لأنه اى كلام هنا ولكن عجبنى فى مصر خالص (بس أمريكى يا اخ براود).

-Cortigiano

-Le Chantilly

-الميريلاند إتحسن وبقى فيه مجموعه مطاعم يعنى..مش بطاله

-التابعى إتكلمت عنه كثير هنا...فطار يجنن ما شاء الله...برضه فطار فلفله مش بطال..

-كنت بحب مؤمن لاكن برضه أقاربى مؤخرا قالولى حاجات عليه تخوف..

ف Bon Appetit بداله للشاورمه...

يا ريت الموضوع ده نعلقه دليل فى باب المغتربين، مفيد خالص.

جزاك الله خيرا يا اخ براود

(دلوقتى بس عرفت سبب شكواك فى باب إستشارات طبيه) :)

[Spider]

-Flying Fish للأسماك (بس بصراحه كل محلات السمك بمصر مش ممكن، الأنواع والبرسنتيشن خطيره).

المطعم ده هو المفضل للممثل عمر الشريف

[Proud Muslim]

و الله بالنسبة للسمك ..

يبقى بورسعيد .. فيها واحد هناك غريب ..بتاع شوربة مأكولات البحر ..

بس في القاهرة ..

يبقى أسماك الدوران في دوران شبرا ..

ده أجمد واحد في مصر .. و خصوصا السمك المشوي بتاعه .. مرعب !

Bon Appetit بصراحة أصبح صـــــــــــــفر ..

أكله أصبح يعني سيء الى أبعد مدى ..

يمكن غيروا الشيف او حاجة أو نظام الأكل أصلا .. و بعدين أسعاره كمان زادت !! :D

Chilis ..بصراحة انا كنت بحبه جدا .. بس يالله ..يعني جت على ده . :(

Le Chantilly مش ده تبع swiss resturants ? كلهم من نفس العائلة الكريمة ..

طيب عارفين أحسن شاورما في مصر فين ؟؟؟؟؟؟؟؟؟؟؟؟؟؟

في واحد اسمه أبو حيدر في شارع ابراهيم ..في ميدان روكسي ..أمام شارع بطرس غالي الشهير ..

فعلا .. هو أحسن شاورما في مصر .. و تحدي

مقلة صلاح الدين .. 10/10

عندهم سوداني بالعسل و السمسم .. مرعب .. :)

واحة فرعون كمان 10/10

الفطير بتاعه ..ينصح به ..

و إن كان فطير الدوار في ميدان لبنان في المهندسين منافس جيد ..

بيعمل فطائر جديدة جدا ..

فطيرة بال nutella الشكولاته .. و فطيرة بصدور الفراخ .. و فطيرة بالجبنة الموتزاريلا و الشيدر .. و بيمعل جبنه مكس !! :?

[MuslimaEgyptian]

و الله بالنسبة للسمك ..

يبقى بورسعيد .. فيها واحد هناك غريب ..بتاع شوربة مأكولات البحر ..

بس في القاهرة ..

يبقى أسماك الدوران في دوران شبرا ..

ده أجمد واحد في مصر .. و خصوصا السمك المشوي بتاعه .. مرعب !

Bon Appetit  بصراحة أصبح صـــــــــــــفر ..

أكله أصبح يعني سيء الى أبعد مدى .. 

يمكن غيروا الشيف او حاجة أو نظام الأكل أصلا .. و بعدين أسعاره كمان زادت !!  :lol: 

Le Chantilly  مش ده تبع swiss resturants ?  كلهم من نفس العائلة الكريمة ..

فعلا، بتاع الدوران سمعته معروفه جدا فى الاسماك...مع ان الواحد مبياكلشى السمك اوى ولكن جميل جدا ما شاء الله.

وايه الخبره دى كلها ؟؟؟أفحمتنا فعلا Le Chantilly تابع للSwiss Restaurants وفيه ايضا ثالثهمLe Chateau على ما أظن

ولكن العيب ان الwaiters كتير اوى فكل ما الواحد ييجى يحط الشوكه فى بقه يلاقى واحد باصصله...الواحد يدور، يلاقى واحد تانى فى وشه :)

يا خساره Bon Appetit, نشطبه من اللسته، أصل معلوماتى بتكون مبنيه من الزياره للزياره...ومنكم نستفيد :D

[MuslimaEgyptian]

-Flying Fish للأسماك (بس بصراحه كل محلات السمك بمصر مش ممكن، الأنواع والبرسنتيشن خطيره).

المطعم ده هو المفضل للممثل عمر الشريف

ياه، طب فيه عمرو خالد :)

[felfel]

فى القاهرة : كورتيجيانو و لاكازيتا

الأسكندرية : أبو أشرف وعروس البحر ( سمك )

وبردة أكلة سمك فى أبو قير على البحر فى الشتاء بتجنن بردة

فى مطعم صينى فى الميريلاند بردة حلو

كباب وكفتة يبقى أبو رامى فى السيدة

فى مطعم فى المهندسين أسمة العامودى بيعمل أكل يمنى ( مندى ولحم تيس ) بردة حلو

أنا عدو الوجبات السريع مثل ال Kfc والPizza ......ألخ

فى قرية الأسد على طريق أسكندرية بيعمل لحم نعام وغزال وفطير مشلتت ليس لة مثيل

[se_ Elsyed]

من أول التوبيك ده وأنا معايا رغيف بلدي بالردة وعمال أغمز الريحي اللى مفحفحة ن لكن الظروف أستدعت إني اتدخل لما لقيت أن فيه ناس هاتبتدي تغلط فى الأكل الصيني لذلك أنا بأقولها عالية مدوية أن أي أعتداء على المطاعم الصينية هايبقى أعتداء علي أنا شخصياً لأن المطاعم الصينية من أنظف المطاعم سواء فى طريقة الأكل أو الخدمة اللى بتحرج الواحد من كتر أدب الجرسونات ، أخوكوا س س باه كان معزوم يوم الثلاثاء الماضي على سي فود فى فندق الهوليداي إن وماحكلكومش بأه .....أستكوزا وجمبري والذي منه حتى الثمالة .. والله ماعرفت أسوق العربية وأنا مروح .

على فكرة يا براود أبو حيدر اللى فى روكسي بيعمل بليلة بالقشطة والمكسرات انما أيه عبقرية ، وفيه المالكي اللى فى الحسين عنده رز بلبن متقولش لجورج بوش عليه.

[الطفشان]

اؤيد الاخ سي السيد في الكلام عن الصيني

و لكن الصيني ليس كله مقبولا

لا اعرف وضع المطاعم الصيني في مصر، و لكن هنا يوجد الكثير منها جيد جدا

و الموضوع كله حاجز نفسي، لاننا نشأنا و انطباعنا عن الاكل الصيني انه بيض معفن و خلافه

و صحيح هم يأكلون اشياء تقرف

و لكن معظم المطاعم لا تقدم هذه الاشياء

هنا في في سانتا كلارا (او سان هوزيه مش فاكر) بكاليفورنيا يوجد مطعم صيني مسلم، يقدم الاكل كله حلال. و اليافطة على الباب تقول Musim Chinese Food و لا اذكر اسم المطعم

و اكله اكثر من رائع

اسف للخروج على الموضوع

نرجع نتكلم على مطاعم مصر مرة اخرى

[felfel]

و لكن الصيني ليس كله مقبولا 

لا اعرف وضع المطاعم الصيني في مصر، و لكن هنا يوجد الكثير منها جيد جدا 

هناك العديد من المطاعم الصينية فى مصر على أعلى مستوى

[Set_Amina]

ده معناه ان عيش الحواوشي انقرض؟؟؟؟ :?:

كان أجمل حاجة فيه انك تاكله وتقرا معاه أخبار فاتت يجي من عشر سنين، بس لو الصدفة جابتلك صفحة الحوادث مع الرغيف ولا صفحة الوفيات ، كانت بتحصل صدة نفس مؤقتة.. مش صح؟؟ :cry: :cry:

و الله يا ست أمينة انا ما اكنتش بأزعل لما كانت تطلع صفحة الوفيات. اهى حاجه تتقرى برضه. اللى كان بيضايقنى هو "الدهن" اللى فى الساندوتش "ينشع" على "الجرنان" و اعرفش اقرأ حاجه. لا وش و لا ضهر.

انا الحكايه دى كانت مهمة جدا عندى لدرجة ان انا كنت اقاطع اى محل فول يلف الساندوتشات فى ورق كتب مدرسيه او ورق مصالح حكوميه. انا بصراحه مدين (بفضل الله)بصحتى و سعة اطلاعى الى هذا النظام الغذائى.

على فكره انا كنت باروح للحواوشى الاصلى قريب من شارع

رمسيس.

على فكرة العالم دي كانت بتسترزق مني كويس، اصلي كنت باديهم كتبي أول ما السنة الدراسية تخلص على طول :cry: :cry:

ماوقعش في ايدك اسم ست امينة (تالتة أول)؟؟ :lol:

[Set_Amina]

بس لو على الفول ..يبقى الجحش في السيدة زينب ..

جينا بقى لسيرة الجحش تخيل أنى عمرى ما أكلت من عنده

أدينى العنوان الله يخليك هو فى الميدان نفسه والا فين بالظبط معلش أصل صحبك خيبة قوى فى معرفة الأماكن :( ...

الجحش في أول شارع ماراسينا اللي في أوله قسم البوليس وهو على شمال الشارع وبيفرش ترابيزات وكراسي في الشارع نفسه لان محله دكان صغير جدا وعلى فكرة هو كان في الأول على عربية فول وربنا أكرمه وأصبح اشهر واحد في المنطقة.

[crossfield]

كفاية

حرام

الطعام فتنة! :devil:

[Horus]

ركزوا معايا أوى بقى ... عشان الكلام لما يبقى عن السيده زينب .. يبقى لازم اتدخل

انا أصلى من السيده زينب و متربى هناك ... و احلى ايام عمرى و الله

خد عندك:

1-الفول

الشهره للجحش ... و ان كان موش الافضل و لكن هى ارزاق

جنبه على طول محل فول جامد جدا اسمه ام هاشم رأيى انه احسن من الجحش بمراحل ...

اما الفول اللى عمرى ما أكلت زيه فى حياااتى .. فهو فى مجاهل السيده زينب و هاكسب فيكم ثواب و اديكم الخريطه .. بس ابقوا ادعوللى...

توصل ميدان السيده زينب .. تخللى القسم على شماللك و باتا على اليمين و تدخل .. ده شارع صغير أسمه " زين العابدين" تفضل ماشى حوالى 10 دقايق هتمر فى خلالهم على :

- محلات عصير قصب ممتازه

-احسن فرن بيعمل عيش فى مصر "حفنى" جبار

-اخطر محل كباب و كفته - صغير انما الطعم حكايه - " الحاج راشد.

-واحد بتاع طرشى بلدى .. فظييييع.

-سرجه كنت غاوى اجيب منها عسل اسود و طحينه

و اخيرا هتوصل للمحل الخرافى " بحبح" اسمه كده :D :lol: :lol:

بس خد باللك المعلم بحبح بيفتح 6 صباحا و يقفل بالكتير 11 صباحا برضه .. ربنا يزيده. :oops:

- الكوارع و لحمه الراس :cool:

و دى اكلتى المفضلله لما بانزل مصر و احس ان الواحد خرمان من اكل الخواجات الفاضى

فى اخر شارع السد من ناحيه "جامع الطيبى" محل اسمه "حبايب السيده"

ده بقى ماحصلش ... بأطلب فته و لحمه مشويه و كوارع "مخليه" بتجيللك متقطعه جاهزه فى شوربه ملهلبه و عليها الشطه و الليمون و كمان العيش و السلطات .. و باديها ....

بعد الاكل باحس انى عامل دماغ .. او مسطول مش عارف.. :lol:

ما تنسوش تدعوللى.

[Horus]

اما الاكل الصينى و انا من محبيه بس فى اوقات ...أوقات :lol: حسب المود يعنى :lol: :lol:

1-مطعم الخليج

و ده قبل ما تخرج من المعادى .. بلاش تكمل طوالى على الكورنيش ... لأ.. تدخل يمين على شارع مصر حلوان الزراعى - اسمه كده- هتلاقيه على ايدك اليمين.

المحل شيك جدا و هادى جدا و الخدمه و الاكل جامدين جداجدا ..

و كذللك الاسعار .. و لذللك فأنا بأخذ زوجتى هناك فى المناسبات الخاصه فقط.

2-مطعم بكين

و ده فى المعادى الجديده فى شارع 263 تقريبا -موش متأكد من الرقم- و ان كان قريب قوى من ميدان الجزائر .. اه و هو فى نفس الشارع اللى فيه المكتبه الجديده ىعلى الجانب الاخر من الشارع.

3-السفينه بكين

و دى تبع المطعم و ممتازه جدا فى رأى ... بل اظن انها افضل من المطعم نفسه روحت مره للعشاء مع مجموعه اصدقاء .. و استحسنتها جدا و هى بتعمل جوله فى النيل خرافيه و طبعا الاكل ممتاز. :cool:

بس الملحوظه ان الاكل الصينى فى مصر للمستويات الهاى و بيكلف كتير قوى .. مع انه فى امريكا - و الاستاذ طفشان اكيد يوافقنى فى الراى خصوصا على كاليفورنيا- بالاقى محلات فاست فوود صينى كتير و اسعارها زى اى اكل عادى و رخيص - ماكدونالد مثلا فى امريكا.

[Mohammad Abouzied]

وعندكم مطعم الاصفهاني في الابراهيمية بالاسكندرية جنب محطة الترام متخصصة في الفراخ المشوية افتكرة من ثلاثين سنة تقريبا او يمكن اكثر لما كنت بأنزل الاسكندرية علشان اخلص مشاكل الجمارك

لسه فاكر الفرخة المحمرة الى على الرز ابو خلطة وزجاجتين بيبسي كولا وبعدها طبقين رز بلبن او مهلبية او كريم كرميل او جلي

ليت الشباب يعود يوما

وحاليا اغلب اجازاتي بقضيها في شقتي بالاسكندرية على البحر وتحت مني مطعم البارون وهو متخصص في السمك وهو بين شارع اسكندر وشارع خمس واربعين في ميامي وبيرسلوا الوجبات لسكان العمارة لغاية باب البيت ومتخصصين يعملو سمك بملح طبي لا يزيد الضغط للناس الي عندهم ضغط

وفي الصبح سندوتشات الفول بتاعت جاد وهكذا حتى تخلص الاجازة

[se_ Elsyed]

فيه فى وسط البلد لما تمشي كده فى شارع 26 يوليو ( مش عارف سنة كام ) وانت رايح على شارع الألفي على ما اتذكر برضوا مجموعة مطاعم منها " شلبي " بتاع الحواوشي ده حكاية وكام مطعم كده بتوع كباب وفراخ مشوية وحاجات من دى أسعارها كويسة وجودة الأكل برضوا جيده.

وفيه مطعم التابعي الدمياطي اللى عند محطة مترو انفاق أحمد عرابي بيعمل طواجن فول ... مش ممكن وعنده كمان عدس وشكشوكة ومجموعات أكلات أخرى متنوعة .. ده الواحد بيلاقى عنده كمية اجانب قاعدين بياكلوا ولا أكنك فى الأمم المتحدة ... والخدمة هناك ممتازة جداً والقاعده ظريفة .