تقدر تقوللي....انت مسافر ليه؟

[هشام الكندي ان شاء الله]

اولا دي اول مشاركه ليا في المنتدي العبقري دا

انا دخت علي النت كتيييييييييير و صفحات توديني و صفحات تجيبني لحد ما استقريت هنا

المهم

انا اخوكم هشام من مصر و نفسي اهاجر كندا و خطر ببالي الموضوع دا

كل واحد يكتب هوا عايز يسافر او يهاجر ليه ؟ و ليه اختار الدوله اللي هوا رايحها دي بعينها مش دوله تانيه؟

و يا ريت اللي سافروا خلاص يقولوا عن احلامهم قبل السفر و اللي هما شايفينوا دلوقتي.

و اولا هابدا بنفسي

انا عايز اهاجر من مصر بصفة عامه و اروح بلد غربي بغض النظر ايه هوا البلد

س: ليه يا هشام عايز تهاجر اصلا؟

ج: لاني باجيد الانجليزي و اشتغلت في السياحه و عرفت ان الاجانب ناس كويسين جدا رغم بعض العيوب الاخلاقيه اللي فيهم و انا اصلا بحب اتكلم عامه بلغه غير لغتي , كمان انا اشتغلت حاجه غير تخصصي خالص علشان كدا عايز اهاجر و ادرس من جديد و اشتغل و اكون بني ادم جديد و مارجعش تاني.

س: اشمعنا كندا بالذات اللي عايز تهاجر ليها؟

ج: لانها اقل شروط في الهجرة و اسهلها كمان الشعب الكندي الشقيق شعب مسالم و مش غاوي اجرام زي الشعب الامريكي مثلا

كمان انا بجدد البيعه للرئيس الكندي حفظه الله لقياده كندا حرة مستقله و العبور بكندا الي بوابه المستقبل و الاستقرار و الامان في هذه اللحظه التاريخيه الحاسمه

معلش انا لسه مصري برضه

[مصرية و مغتربة]

اولا دي اول مشاركه ليا في المنتدي العبقري دا

مرحبا بيك معانا

انا عايزة اهاجر ليه؟

لاني طموحاتي كبيرة ومش قادرة احققها في مصر ولا في اي دولة تانية وكمان عشان العدل الاجتماعي في الدول الغربية وامتيازات ازدواج الجنسية واني اشتغل في مجالي بغض النظر ان فيه واسطة او اني بنت شغلي يعتمد فقط علي مؤهلاتي وقدراتي وتقدير الغير ليها.

س: اشمعنا كندا بالذات اللي عايز تهاجر ليها؟

ج: لانها اقل شروط في الهجرة و اسهلها وطبيعة الحياة فيها فعلا تشجع علي الهجرة وان نسبة العرب فيها كبيرة جدا

[هشام عباس]

انا هشام كمان بس هشام عباس ولما فكرت في السفر لأسباب اقتصاديه وبس

انما بعد ما بقالي دلوقتي حوالي 13 سنه مسافر اصبح سفري ليه اسباب تانيه خالص وهي

1- عاوز اربي ولادي في جو بعيد عن الي بسمعه في مصر لأن انا عندي ولد وتلات بنات وسامع عن الانحرافات بتاعت الشباب الصغير والجواز العرفي وما الى ذلك انما هنا في سلطنة عمان البلد جميله وهاديه وكمان قادر اتحكم لدرجه كبيره في تربية ولادي لأن المجتمع مش مفتوح زي مصر وبمعنى اوضح الدنيا هنا ملمومه وكمان بلد عربي يعني نفس عادتنا وتقاليدنا

2- انا لما جيت اسافر بصراحه مفكرتش اني اروح بلد غربي لأني كنت ناوي اتجوز واعمل بيت واجيب اولاد ولاقيت ان التقاليد الغربيه هتكون بالنسبه ليا ومن وجهة نظري غير ملائمه لتربية الولاد وناوي ان شاء الله لما ارجع مصر بصوره نهائيه يكونو ولادي اكبر شويه لأن ابني الكبير عنده 9 سنوات وكمان ناوي ان شاء الله اني اعيش في مدينه جديده زي القاهره الجديده لأن الطبيعه فيها شبه هنا في عمان يعني المنازل مبنيه بطريقه جميله والكثافه السكانيه ماذالت قليله والجو بصفه عامه هادي ولسه نقي وديه البيئه الي احب اكمل تربية ولادي فيها

وأكيد اتغيرت فكرتي تماما عن اهدافي من السفر قبل وبعد السفر فكل ما كنت اطمح له قبل السفر اني اقدر اجيب شقه جنب اهلي في مدينة نصر وعربيه صغيره ومبلغ معقول

انما دلوقتي فلو عرضوا عليا شقه ببلاش في مدينة نصر مش هاخدها !!!! او ممكن اخدها وابيعها

لأني 3- عاوز اسكن في مكان هادي ومش زحمه وكمان العربيه الصغيره دلوقتي مبقتش تنفعني خالص بما ان عندي 4 اولاد ولو قعدوا كلهم جنب بعض بيعملوا مشاكل وبيضربو بعض وما ادراكم ما هي شقاوة الاولاد

وده معناه ان الاحلام قبل السفر بتكبر وتتغير كتير بعد السفر ومش بس السفر الي بيغير الاحلام انما السن والظروف الاجتماعيه الي بتتغير مع الوقت اكيد هيي كمان بتغير الاهداف

[دعاء]

:rolleyes:

انا عايزة اهاجر علشان اغير نظام حياتنا كأسرة جوزى بيشتغل كل يوم لحد الساعة 11 او 12 مساءا والاولاد ايام يشوفوه وايام لأ - عايزة يكون عدد ساعات محدد للعمل وبعدها نرجع نتلم مع بعض - ويكون فيه اجازة نهاية الاسبوع اللى ممكن اننا نخرج فيها للترفيه عنا جميعا - وكمان نعيش فى بلد مافيهوش زحمة وضغوط وتلوث وابسط الحقوق انك تطلع مواصلة وتلاقى كرسى تقعد عليه مش موجود - وارضاء لطموحى العملى كاخصائية مكتبات لان التخصص ده هنا مركون على الرف كانه كمالة عدد وهذا على عكس الدول الغربية فى الاهتمام بالمكتبات والانشطة الثقافية التى تساهم فى خلق جيل واعى ومثقف وقادر على تحمل المسئولية

ليه اخترت كندا ؟

علشان كندا فيها افضل مستوى للمعيشة - وهى تعتبر البلد الاول فى الاهتمام بالاطفال من حيث التعليم الممتاز والرعاية الصحية عالية الجودة وايضا وسائل التثقيف والترفيه البناءة التى تساعد على بناء المواهب الخلاقة القادرة على الابتكار وبالتالى افادة المجتمع - ناهيك عن انها بلد قليلة الكثافة السكانية وبالتالى نسب التلوث منخفضة جدا بالاضافة الى النظام الغربى المنظم فى كل شئ - المساحات الخضراء الشاسعة التى تريح النظر فى كل مكان حولك بدلا من اكوام (....) المحيطة بنا هنا - النظافة والنظام والهدوء

[هشام الكندي ان شاء الله]

اولا شكرا ليكم جدا علي ردودكم علي الموضوع اللي انا شايفه هام و اول خطوة للخروج من مصر و لو نفسيا.

ثانيا: فيه رساله وصلت لي من الاخ سي السيد لكني مش قادر اقراها يا ريت يبعتها في رد في الموضوع دا.

ثالثا احب اعقب علي كل من شارك برد علي الموضوع دا

بالنسبه للمصريه المغتربه

احب اقولها ان افكارها و طموحاتها كبيرة جدا و انها لو هتكمل حياتها في مصر او بلد عربي يبقي بتجني علي نفسها و الحل بالنسبه لها هوا الهجرة لبلد غربي فعلا و كانت كندا هي الاسهل في الشروط. لذلك انا شايف ان الاخت مصريه و مغتربه نجحت في الجزء العلمي و المادي من اسباب الهجرة و اتمني لها دوام النجاح مع اسرتها في كندا.

بالنسبه للاخ هشام عباس

احب اهنيه علي الشريط الجديد.......ههههه

و احب اقوله ان القاهرة الجديدة و التجمع و المعادي و القطاميه و كل المناطق دي هيا فعلا اماكن مش زحمه و نظيفه الي ابعد الحدود لكن احب اقوله ان اعلي معدلات الانحراف في المناطق دي فعلا

للاسف مصر مليانه انحراف اخلاقي و لو مش مصدقني شوف فيلم حين ميسرة لان دي مصر بجد

انا احب اقولك لو عايز اولادك يفضلوا باخلاقهم بلاش ترجع مصر علي الاقل حاليا و ارجع لما تعملهم مشروع لان فرص الشغل في مصر اكيد انتا عارفها و التعليم الخاص اللي بحق و حقيقي زي الجامعه الامريكيه و الالمانيه و الكنديه بيتكلف شئ و شويات و انتا عندك 4 و ربنا يخليهملك

بالنسبه للاخت دعاء

واضح انك لسه ما سافرتيش كندا و واضح برضه انه مالكيش قرايب او اصحاب في كندا

احب اقولك الحقيقه اللي انتي لسه مش عارفاها

لما تسافروا ان شاء الله جوزك هيشتغل يمكن اكتر ما بيشتغل في مصر و انتي هتشتغلي زيه تمام علشان تكفوا ايجار الشقه و مصاريف الاولاد لو كان عندكم حاليا اولاد

و لازم تحوشوا مبلغ علشان تعملوا كريدت في البنك تقدروا تاخدوا علي اساسه قرض علشان تدرسوا انتي و جوزك لانكم لو ما درستوش هناك هتفضلوا شغالين في اعمال قليله المستوي بالنسبه لمؤهلاتكم زي محطات البنزين و المطاعم.......... الخ

اوعي تفتكري ان كندا او غيرها هيا الجنه الموعوده اكيد فيها منغصات من نوع اخر ناهيكي عن الاولاد اللي مش هتقدري بقوة القانون انك تسيطري عليهم زي هنا في مصر

لكن زي ما قلتي المواصلات متوفرة و الشغل كتير و الدراسه سهلة و السكن متوفر

الفكرة باختصار هيا ان في مصر فيه قرف و في كندا او اي دوله تانيه فيه تعب, فالسؤال هوا تختار تتعب و لا تقرف؟ و دي راجعه لظروف كل شخص

و اتمني لك التوفيق بالفعل لو كنتي في كندا حاليا و اتمني لك التوفيق برضه لو لسه في مرحله التقديم

اخوكم هشام الكندي

ان شاء الله