المنتوف!!!

[حشيش]

قصة الجطه أحكيها كما سمعتها حرفياً على قدر ما أتذكر والعهدة على الوله المتخلف مطاوع :lol: :) :) :) :) :) :) :) :) :)

كان الناموس والحر وريحة دورة المياه من ناحية وحواديت الوله مطاوع عن العفاريت والنداهة من ناحية هى القاسم المشترك لكل ليلة من ليالى السجن السبعة...حكى لنا مطاوع المتخلف إن واحد جريبه اسمه جنديل(قنديل) كان ماشى مره فى الغيط بعد السمس ما غابت يجى بساعتين وكان معاه تلت تنفار من البلد...جعدوا عا الراكيه يشووا درة وكانت ليلة 3 رجب والجمر(القمر) يدوب لسه هلال...المهم خلصوا جعدتهم وجالوله ياله ننهض الوجت خدنا...جال لهم اتكلوا انتو على الله أنى جاعد شوية...يدوب همه مشيوا من هنا وده سمع صوت جطة بتنونو...شوية لجه الجطة صوتها بيعلى ومهوش شايفها...يبص يمينه وشماله ماهوش شايف حاجه لكن صوت الجطة حيخرم ودانه :shock: :shock: :shock: ...مفيش دجيجه إلا والجطه واجفه جدامه وبتجوله (سا الخير ياجنديل..إنته مش عارفنى)!!! :shock: :shock: :shock:....أنا سمعت الكلمتين دول وسخسخت على روحى من الضحك وقولت له إنته عبيط ياوله :) :) :)...ابدى الأخرين استيائهم لمقاطعتى لمطاوع وقال لى احدهم (ياخى اسمع وانت ساكت) :) :) :)...استرسل مطاوع قائلآ لما جنديل لجه الجطه بتكلمه نط واجف من الخوف وحدفها بطوبة خرمت عينها!!!!والجطه كأنها فص ملح وداب...ركض جنديل خايف ياولداه عايز يبعد عن الغيط بأيتها طريجة...فضل يجرى يجرى لحد ما وجع من طوله ما دراش بعدها إلا وهوه واجف جدام خادم الجطه(اللهم احفظنا تحت الأرض) :twisted: :twisted: :twisted: ...جال له الجنى الجطه اشتكت لى إنك خرمت عينها :shock: :shock: :shock: وجدامك حل من اتنين ياخرم لك عينك زى ماخرمت للجطه عينها يتتجوزها!!!!!!!!!!!!!...ماكملش يفكر ياولداه إلا ولجه الجطه داخله عليهم وعينها بتخر دم ولابسه طرحة الفرح!!!!!!!!!....قلت له يابنى ارحمنى :) :) :)...طيب كانت لبسه طرحه وفستان ولا طرحه عاللحم :) :) :) :)...استرسل مطاوع دون أن يعير لسؤالى إهتمام :) :) :)....جال للجنى لأ اتجوزها....وكانت ليلة سعده...الجطه بجت سنيوره كسم ورسم ولا احلى حرمة فى البلد والجنى ناوله صندوج فيه من كل خيرات ربنا دهب وفلوس...تعالى شوفه النهارده...شارى نص طين البلد....ربنا يوعدنا...بنى فله عالسكه الحديد وربنا رزجه منها الذريه الصالحه!!! :shock: :shock: :shock: ...إنتهت جصة الجطه لحد هنا...وتعالت بعدها كلمات الإعجاب بين إخوانا المتخلفين مابين قائل سبحان الله...الكلام ده بيحصل كتير ياخوانا...الجن اتذكر فى القرأن.....................يتبع

[ashraf1000]

EBN ELBLD said

حشيش :

نعم موضوع الجرايه والتعيين ممكن ان يصل الى وزير الدفاع بسهوله

وقدحدث فعلا حينما كنت بمركز تدريب القوات الخاصه ان صاح احد

الجنود(غير مؤهلات) للعميد قائد المركز اثناء طابور الصباح

انا جعان يافندم والتعيين لا يكفينى وبعدها انقلب المركز رأسأُ على عقب لمده اسبوع وحضر الى المركز لجنه من اداره الشئون الاداريه ولجنه من اداره المخابرات العسكريه لدراسه الموضوع وتم احاله المقدم قائد الشؤن الاداريه بالمركز للتحقيق

فكلامك ده مايدخلش العقل

طبعا موضوع التعيين اقل ده مش ميرى بس ده ما يمنعش انه بيحصل وهو يعنى لما قال ان العساكر انضربوا بالقايش ما اعترضش ----- يا عنى ده هو اللى ميرى----- بس بيحصل ولا لاء ----و سلم لى على وزير الحربية --- اسف الدفاع

[Falcon Egypt]

الاخوه الاعزاء

اوافق على كلام الاخ ابن البلد فى موضوع الاكل والشرب والذى يصل الى اعلى المستويات وبسهوله

ففى اثناء خدمتى العسكريه كتبت شكوى عن سوء الطعام وانا كنت اعتمد على الاكل الملكى اما الاكل

الميرى فكنت اكل المنتجات الجافه فقط مثل الجبن والحلاوه والمربه ولكن فى ذلك اليوم بالذات

ومع سوء الاحوال الجويه وكسلى من ان انزل البلد قررت وبعد تشجيع من زملائى ان اجرب الطبيخ

وبينما اخذ يوزع الصول الاكل وجدت اكثر من ذبابه على وش القدرة ولما نبهته قلب بمعلقته العملاقه

الطبيخ وقاللى فين مافيش حاجه اهو, فتركته وقمت بعمل الشكوى وبعد ذلك بعده ايام فوجئت بطائره حربيه

جاءت من القاهره وعلى متنها عدد كبير من اللواءات بغرض التفتيش على ا لطعام بكافه المنطقه العسكريه

الغربيه وانقلبت الدنيا لمده ثلاثه ايام . اما الضرب بالقايش والكلام ده فطبعا هذا الكلام ضد القانون العسكرى

ولكن اذا حدثت مخالفه فى ذلك فان المخالف غالبا يعلم ان الجنود غير موْهلات ولن يشتكى احدهم اما

لجهلهم بكتابه الشكوى او لعدم قدرتهم للمثول امام القائد و الكشف عن المخالفات بصوره رسميه.

[mnman]

يادماعة متجطعوش حشيش سيبوة يكمل.... كمل ياحشيش ها وبعدين الجطة كانت سيامي ولا بلدي ولا رومي... تفرج جوي جوي يابوي في شكل السنيورة ... سيامي تبجي علي ياباني ... بلدي تبجي علي مصري ... رومي تبجي علي اوروبي....

[Cleo]

يادماعة متجطعوش حشيش سيبوة يكمل.... كمل ياحشيش ها وبعدين الجطة كانت سيامي ولا بلدي ولا رومي... تفرج جوي جوي يابوي في شكل السنيورة ... سيامي تبجي علي ياباني ... بلدي تبجي علي مصري ... رومي تبجي علي اوروبي....

دى الجطة؟؟؟ :D :D

[مصرى]

فى منطقة التجنيد .. صاح الأمباشى ملوحا بالقايش :" إقفوا صفين .. العساكر العادة هنا .. والعساكر المؤهلات هناك"

كان أحدهم قصير جدا .. وأتجه للوقوف فى صف المؤهلات .. لكن الأمباشى صاح فيه آمرا .. رايح فين ؟ تعالى أقف هنا مع العادة ..

لكن المجند القصير رد محتجا " أنا عندى ماجستير " ولكن الأمباشى أصر على موقفه قائلا " والله لو كان عندك بلهارسيا .. برضه تيجى تقف هنا " :)

[حشيش]

وبينما اخذ يوزع الصول الاكل وجدت اكثر من ذبابه على وش القدرة ولما نبهته قلب بمعلقته العملاقه الطبيخ وقاللى فين مافيش حاجه اهو

الأخ فالكون مصر

من المعروف بالضرورة فى الجيش أن الذباب والسوس فى الطعام هو إضافة للقيمة الغذائية للوجبة :) :) :)

أما عن موضوع التعيين فأنا أذكر ما حدث كما رأيته بدون التطرق لموضوع هل هو قانونى أم لا...يعنى مثلاً ضرب العساكر العادة بالأقلام على وشهم وسبهم بألفاظ نابيه مثل يابن ال000 مشفتوش إنته قبل كده فى الجيش!!!...أنا شفت عسكرى بيضرب فى المستشفى بالقلم على وشه من الطبيب...هل ده ميرى؟؟؟...الضرب بالقايش عمال على بطال...هل ده ميرى؟؟؟...لكن كل الأخوة اللى دخلوا الجيش عارفين إن ده بيحصل فى كل الوحدات كل يوم...فى الميرى هناك شتايم ميرى مثل (ياعسكرى ياتحفة) (ياعسكرى ياكحول) لكن كل ما يتعدى ذلك هو غير قانونى...لكنه للأسف الشديد هو القاعدة فى الجيش وليس الأستثناء........تحياتى

[مصرى]

من المعروف بالضرورة فى الجيش أن الذباب والسوس فى الطعام هو إضافة للقيمة الغذائية للوجبة

بروتين :D

فى أوقات الحروب يعلو شأن الفرد .. وتتعمق العلاقة بين الأفراد وقادتهم من الضباط والصف .. حيث الخطر المشترك ماثل أمام الجميع .. ويواجهونه فى عمليات مشتركة يعمل فيها الجميع بروح واحدة .. وكأنهم رتبة واحدة .. بل أن الجميع ينزعون رتبهم العسكرية حتى إذا سقط أحدهم فى الأسر لا يعرف العدو رتبته العسكرية .. ولا يكون هناك تعسف من القائد مع الجندى خوفا من رد الفعل أثناء العمليات الحربية .

فى وقت السلم .. الوضع يختلف وتكثر الممارسات القمعية المظهرية وتظهر الميول السادية لدى البعض فى تعاملهم مع الرتبة الأدنى .. الأمر الذى يتطلب تشديد الرقابة من القيادة وتنبهها لهذه الظواهر لما تسببه من تأثيرات خطيرة على الروح المعنوية والشعور بالانتماء ..

والظاهرة ليست مصرية ولكنها عالمية .. وفى الولايات المتحدة وإسرائيل تصل الظاهرة حد التحرش الجنسى وإغتصاب المجندات ..

[Masrawy Abroad]

أعزائي الأفاضل

الحقيقة موضوع يوميات "حشيش في الجيش" من أمتع السير الذاتية اللي قرأتها في المنتدى....وياريت ما نقاطعش الراجل لأنه بيحكي تجربة شخصية بحتة مع اضافة مكسبات الطعم والأسلوب الفكاهي اللذيذ ...فلا داعي أن نتحول لمؤرخين عسكريين ونفضل نقف له على غلطة أو على مصطلح طلع منه بعفوية فأصبح يحاسب عليه كأنه زيف التاريخ... :?

الراجل بيكتب قصته وبيضيع وقته لامتاعنا بدون مقابل أو شيء... فلا تحبطوه....ممكن تحاسبوا يونان رزق بتاع الأهرام أو حسنين هيكل....

نقطة تانية وهي يا ريت نقفل تماماً الموضوعات الجانبية التي انفتحت وتمس الجيش والمعاملة داخله سواء من قريب أو من بعيد لأن ده منتدى عام، وده مش موضوع نتكلم فيه على الملأ حتى لو شفنا ان كلامنا لا يعني شيء.

أحبائي: دي وجهة نظري أطرحها على الجميع وليس لفرد بعينه وكلكم على رأسي من فوق.

[الطفشان]

يا حشيش

طب و ماحدش جال لجنديل مين الولية اللي حداه في البيت؟

و لما سألوه جال لهم جطة و جني؟

و وافجوه على اكده؟

يبقى دول من كفر الهنادوة بجى!

المهم

كمل يا بني كمل

خلينا نضحك بلا هم

ماحدش واخد منها حاجة

[علي بابا]

و النبي يا با حشيش تكمل.... :D

دي الحدوته دي حلوه جوي جوي يا با حشيش... :shock:

الواد مطاوع جال ايه تاني؟ و الجطه ..... :roll:

كمل با'ه يا عم حشيش...

[بنت بحري]

الحمد لله يا ربي أنك خلقتني بنت ومتبهدلتش بهدلة الرجالة في الجيش . كمل ياحشيش بس أنا عايزة أعرف الدكتور جابلك الفلوس والأكل ولا لأ .

أنا حاسة كأني مستنية الحلقة الأخيرة من مسلسل ذئاب الجبل .

[حشيش]

يا حشيش  

طب و ماحدش جال لجنديل مين الولية اللي حداه في البيت؟  

و لما سألوه جال لهم جطة و جني؟  

و وافجوه على اكده؟  

يبقى دول من كفر الهنادوة بجى!  

ايوه يابوى وافجوه على اكده...وكل واحد فيهم نفسه تطلع له الجطه عشان يخلص من وش أم العيال والبليه تلعب معاه...عجبالك ياطفشان لما تطلع لك إنته كمان...خليك شايل فى جيوبك طوب أحتياطى علشان لو طلعت لك تخرم لها عينيها الإتنين وبعدها حتشوف العجب...اوعدنا يارب :D :D :D

الأخ على بابا (أنا معجب جداً بالوجو بتاعك) ,الأخ مصرى ابرود, الأخ مصرى, الأخت بنت بحرى أشكركم جداً على تشجعيكم والأن إلى التكملة.....

[حشيش]

قبل أن أكمل يوميات حشيش فى مركز التحشيش ححكيلكم حكايه تانيه من حكاوى الوله مطاوع المتخلف عن النداهه (مزنوق فيها لازم احيكها) :D :D :D…بجه فيه واحد بلدياته راح عالترعة يصطاد سمك بعد العصر كده بشويه…جعد ساعه ساعتين ربنا ما رزجوش بحاجه…شويه لجه واحده إجت جعدت فى ريحه…اططلع ناحيتها لجاها جمال إيه سبحان الخلاج العظيم :D :cry: :cry: …يجول ماسافهاس جبل كده فى البلد ولا مره… جالت له مش عايز مساعده يابو هنيه؟؟!!!…جال لها إنتى مين وعرفتى اسمى إزاى؟…جالت له مانى رحت لك البيت اسئل عليك والمحروسه بنتك جالت لى إنك عالترعة بتصطاد!!!…جال لها بس أنا معرفكيش إنتى مين وبتسئلى عليه ليه؟؟؟…جالت له بس إدينى السناره اصطاد أنا بدالك…جال لها يعنى إنتى اللى طاهره وانا نجس!!! :shock: :shock: :shock: …ده رزج بتاع ربنا…وكرر مطاوع هذه العبارة للدلاله على أهميتها…جال لها إيه… ده رزج بتاع ربنا…هوه جال كلمة ربنا ولجاها انتفضت وجامت جعدت بعيد عنه شويه :twisted: :twisted: :twisted:…وهى بتجوم وتجعد بانت رجلها من تحت…يجول لك لجى رجلها عليها شعر عامل لا مؤاخذة زى وبر الجمل!!!…جالت له تانى بس هات السناره اصطاد لك طاوعنى…جال لها خدى السناره اهه…مدت إيدها تاخد السناره يجول لك لجه ضوافرها لا مؤاخدة زى ضوافر الكلب!!! :twisted: :twisted: :twisted:…جال اعوذ بالله من الشيطان الرجيم إنتى مين ياست إنتى…هوه استعاذ بالله من هنا ودى فطت جايمه من جنبه!!!…جال لها رايحه فين هاتى السناره جالت له تعالى خدها ومشت بعيد وهوه مشى وراها!!!…وهنا قاطعه الزملاء (غلطان…ماهوه ده مرادها)!!! :shock: :shock: :shock: …فهمت إنهم كلهم على نفس الموجه :) :D :D ...فضلت أن اؤجل أسئلتى لما بعد نهاية الجصة…استرسل قائلاً...المدهول جام مشى وراها فى مجية مين الشيخ أبو بكر…راجل من الجاريين كتاب ربنا وواخد العهد…قاطعته سائلاً عهد إيه؟؟؟…قال عهد الله!!!…قلت له أيوه يعنى فيه إيه العهد ده ومين اللى اداهوله؟؟؟!!!…قال مستنكراً مين اللى اداهوله ده إيه…متجوم تنام ياأخى ولاسيبنى أكمل!!! :shock: :shock: :shock:…شعرت باستنكار الأخرين لمقاطعتى لمطاوع فسكت…هوه إلتفت يمة الشيخ يرد عليه السلام ودى كانت فص ملح وداب…حكى للشيخ الحكايه وجال له إنها أخدت السناره بتاعته!!!…سئله الشيخ إنهض معايا هى مشت من أنهى ناحيه؟؟؟…جال له من الناحيه دى…فضلم ماشيين ما هو لو ماجبش منها السنارة أو أى حاجة تانيه تكون خدتها منه يبجى عليه العوض فيه…يوم ولا اتنين وحتندهو :twisted: :twisted: :twisted:…سئلته تندهوا إزاى يعنى وتندهوا ليه وتندهوا تقول له إيه؟؟؟…شخط فيه قائلاً إنت ياجدع إنت ما بتفهمش…بجولك النداهههههههه تجول لى تندهوا ليه؟؟؟!!!…وضحك المتخلفين ساخرين من غباوتى!!!!!…ماعلينا استرسل الوله مطاوع المتخلف قصته قائلاً مشوا يجى نص ساعه يدوروا عليها أبداً...لحد ما الشيخ جال له إستنى انته هنا يابو هنيه…شايف الخروف اللى واجف بياكل تحت السجرة اللى هناك دى؟؟؟…جال إيوه شايفه…جال له طب إعمل نفسك مش واخد بالك منه…ومشى الشيخ ببطئ ناحية الخروف يتمتم بعض الكلمات من كتاب الله واذكار كده إلا ويلاجى الخروف عمال يتنطط كأن حيه لدغته!!!…اقترب الشيخ اكثر فأكثر من الخروف يقرأ فى كلمات من كتاب الله حتى تحول الخروف إلى كلب!!!…اقترب الشيخ من الكلب أكثر فأكثر وهو يقرأ فى الكتاب فتحول الكلب إلى ثعبان ودخل فى إحدى الشقوق الموجوده فى جدار بيت قديم!!!!…حاول الشيخ عبثاً إخراج الثعبان من الشق دون جدوى…وخبط إخوانا البعده ايديهم كفاً على كف حزناً على فشل الشيخ فى إخراج الثعبان وكأنهم قد فهموا نهاية الجصة…بس أنا مش فاهم!!!…سئلت وإيه يعنى أهمية أم التعبان إن كان خرج ولا مخرجش….لم يجب أحد على سؤالى باعتبار أن الكلام معى غير ذى جدوى!!!…ألحيت فى السؤال ما هو مش معقول يعنى بعد كل غسيل المخ ده أطلع كمان مش فاهم إيه اللى حصل لأبو هنيه؟؟؟!!! :D :D :D…قال لى مطاوع بقرف ياجدع خلاص خلاص…بجول لك اخدت سنارته وزاغت!!!…قلت له وبعدين؟؟؟…قال لا إله إلا الله بعدين إيه؟…ياجدع تبجى خلاص ندهته… مش فاهم أنا إنته فهمك تجيل كده ليه…امال مؤهلات إيه وسخام إيه :shock: :shock: :shock:…الجيش صحيح ياما بيلم :shock: :shock: :shock: …وضحك المتخلفين من خشاشة قلوبهم على نكتته السخيفه…وقال ميلاد بتوع مصر فهمهم تجيل…اسمع حجولك نكته عشان ماتنمش وانته خايف!!!…بيجول لك واحد كبابجى اتجوز جامت مراته فرشت له السرير بجدونس…!!!...برغم أننى قد سمعت هذه النكته يجى ميت مره قبل كده إلا أننى قد استغرقت معهم فى ضحكٍ طويل…………..............يتبع

[إبن مصر]

:) :lol: :lol:

معلش هيا القصه جميله ومفهومه خالص بس ....بس.. بعنى ايه,,, كبابجى؟؟؟؟؟...

[mnman]

شخصيات قصة حشيش في الجيش....

مدام جنديل....أوعدنا يارب

الجطة .....بعد ما جنديل خرم عينها

النداهة....

ألا يابوحشيش مجلتلناش اية مودوع العهد دة و بياخدوة شرب ولا أجراص و لا حجن...

هو مطاوع عمراتة ماشاف مرت الواد جنديل.....

:) :lol: :lol: :lol:

[علي بابا]

يا عم حشيش،،ربنا يكرمك... :lol: اللوجو ميغلاش عليك ابدآ... :?:

ده انت بعد الحدوته ال١٠٠٪ دي تستاهل احلي لوجو لآحلي كلام...

انا عملتلك لوجو مخصوص: http://www.karank.com/images/hashish.gif

لو عجبك حلال عليك يا عم....لو معجبكشي برضه حلال عليك ... :lol:

ده انت شفت ايام سوده يا جدع.....

.....شر البليه ما يضحك....... :) :lol:

[حشيش]

كان الطبيب الذى أرسلت له الخطاب والطلبات إلى مصر قد عاد وعلم بشأن المشاجرة وموضوع أنفى وأننى قد اودعت السجن…كان يحمل لى حقيبة هاند باج من والدتى وحصل على إذن بزيارتى فى السجن وبعد تفتيش الشنطة سمحوا لها بالدخول…قال لى إيه يابنى اللى عمل فيك كده؟؟؟…قلت له نصيب بقه…قالى أنا شايف إن الحشو بتاع مناخيرك نصه طلع بره ...عموماً ميعاد رفع الحشو عدى عليه يوم وده مش مفروض يقعد أكتر من كده…سأرسل إليك للحضور إلى العيادة علشان أشيل لك الحشو ونتكلم…قال لى أنا ذهبت عندكم فى البيت بدعوة من والدتك والتقيت بها واخوتك والجميع فى غاية القلق عليك…والدتك قالت لى أنها تشادت مع خالك مشادة كبيرة بسببك وقد رفض رفضاً باتاً أن يتدخل قبل أن تنهى فترة تدريبك بالمركز كاملةً وراسه وميت سيف إنك لازم حتكمل ال45 يوم كاملين وبعدها حيبقى يشوف!!!…قال لى أحضرت لك معى 250 جنيه وبسكوتات وكيك (هوهوز) وادوات حلاقة وافتر شيف وصابون وشاى وسكر وبن ونسكافيه وملابس داخليه كل اللى إنته طلبته…بعد ما تطلع من السجن تعمل بقه زى ما قولت لك مع الباش شاويش خلى الأيام الباقيه تعدى على خير…وشكرته بحرارة ورفع لى حشو الأنف وأعطانى مضاد حيوى أقوى من السلفا الثلاثى اللى صرفوها لى فى المستشفى…إنقضت الثلاثة أيام الراحة وعدت مره أخرى للعرض على العيادة وكنت قد بدأت أتحسن تدريجياً مع الراحة والعلاج…لحسن حظى قابلت نفس الطبيب الشهم د/هادى ومد لى الأجازة المرضية ثلاثة أيام أخرى لتنتهى فترة السجن على خير بفضل الله تعالى…عدت إلى اليوميات المعتادة من طوابير وعدو ورماية ودروس نظرية إلى آخره…كان كل يوم بيعدى بحس بقرب الخلاص من جهنم...تخوفت كثيراً من موضوع رشوة البش شاويش وقلت فى نفسى ربنا يهون اللى جاى زى ما هون اللى فات...الأيام كلها شبه بعضها...الملل والقرف هى الإحساس اليومى المعتاد فى مركز التدريب...ظللت على هذا الحال إلى جاء اليوم 37…يوم محفور فى ذاكرتى إلى اليوم …كنا قد بدأنا الأستعدادات لطابور العرض(التخرج) مع تدريبات مكثفة على المشية العسكرية بالسلاح ومايتعلق بها من حركات مثل كتفاً وجنباً سلاح…سلام سلاح…تدريبات لياقة بدنية يوميه تشمل بعض حركات من الجودو والكراتيه وكله هجص وكلام فارغ وكل حركة لازم تصاحبها صيحة مثل (هاااااااااا)(هوووووو)…إلى آخره…خرجنا فى الصباح للعدو لمسافة 3 كيلومترات كالمعتاد خلف العريف…بعد مسافة حوالى نصف كيلومتر وقع أحد الجنود على الأرض وذهب العريف ناحيته بعد أن خلع القايش لضربه بإعتبار أنه متمارض ولا يرغب فى تكملة العدو!!!...لكنه تراجع عن ذلك حين رأى الولد يتنفس بصعوبة واضحة..شاحب اللون..وتخرج رغاوى بيضاء ممتزجة بالدم من فمه…هرولنا ناحية الجندى وكان إسمه عبد الفتاح نحاول إسعافه بطرقنا البسيطة فخلع بعضنا وأنا واحد منهم فانلته لنهوى عليه علشان يقدر يتنفس وجلس بعض الجنود يدعكوا له فى صدره…طلب العريف أن يقوم أربعة منا بحمله إلى العيادة وكنا قد ابتعدنا عنها مسافة نص كيلو تقريباً…طلبت أن أكون من هؤلاء الأربعة فقد كنت أشعر بالجميل تجاه هذا الرجل فقد كان من أول من هبوا لتخليصى من أيدى ميلاد أثناء المشاجرة وكان يردد بطيبة وبساطة (صلوا عالنبى ياخوانا إنتو اخوات) وكان يحاول جاهداً أن يخلصنى هو وبدوى من أيدى ميلاد…إضافة إلى ذلك فهو دمث الخلق دائم القراءة فى كتاب الله…حملناه وجرينا فى إتجاه العيادة قدر ما مكنا الله من سرعة…وصلنا إلى العيادة أخيراً ودخلنا للدكتور/هادى نلتقط أنفاسنا وحكينا له ما حدث…قال لنا طيب خلاص سيبوه إتفضلوا إنتم…لم نبتعد كثيراً عن العيادة…رأينا د/هادى يخرج مهرولاً ليعود ومعه الطبيب الأخر الذى كان قد رافقنى فى سيارة الإسعاف إلى المستشفى (لا أذكر إسمه)…دخلوا العيادة مهرولين…شعرنا أن حالة عبد الفتاح على مايبدو غير مطمئنه…بعد دقائق وجدنا سيارة الإسعاف تتجه صوب العيادة…دقائق أخرى ووجدنا قائد السريه يتبعه قائد الأمن بالمركز يتجهوا أيضاً صوب العيادة…لم تمر دقائق قليلة أخرى حتى رأينا سيارة الأسعاف تنصرف من حيث جاءت!!!…انقبض قلبى واقتربت من العيادة بصحبة أحد الجنود الثلاثة الذين كانوا معى…شخط فينا قائد السريه (واقفين هنا بتعملوا إيه كل واحد يرجع مكانه)…انصرفنا ونظرى لا يزال معلق بالعيادة…لحظات وخرج الضباط من العيادة فانتهزت الفرصة ودخلت دون أن يرانى منهم أحد…قابلنى د/هادى لدى دخولى…سئلته بلهفة عبد الفتاح جراله حاجة؟؟؟…قال بمزيج من الحزن والقرف البقاء لله…..صرخت فيه دون أن أشعر (مات)!!!!….قال أنا مش عارف الواد ده دخل الجيش إزاى؟؟؟!!!…إنتم جبتوه العيادة وكان بيخلص…وضعت السماعة على قلبه…فوجئت بلغط على القلب ناتج عن ضيق شديد بأحد صمامات القلب…اعتقد قال صمام الأورطه أو شئ من هذا القبيل…استرسل د/هادى قائلاً مستحملش الجرى والمجهود المسكين فحصل عنده هبوط حاد فى القلب…حاولت أسعفه بشتى الطرق لدرجة أنى لجأت لحقنه بدواء داخل القلب مع عمل تدليك للقلب واكسوجين وادويه أخرى كثيره حقناه بها ولكن نفذت مشيئة الله…ثم يعيد د/هادى ما قاله سابقاً إزاى الواد ده دخل الجيش؟؟؟!!!…ده معناه إن محدش حط سماعة على صدره أثناء الكشف الطبى (القومسيون) الذى يسبق التجنيد واتكتب له فى نتيجة الكشف (لائق) بدون كشف فعلى…استرسل يقول كتير من العساكر العادة ما بيكونش عارف إنه عنده مشكلة فى القلب حتى يجد نفسه داخل الجيش لا حول له ولا قوة!!!…ولو فكر يشتكى يعامل على إنه متمارض حتى تسوء حالته مثل عبد الفتاح ويتشال شيل إلى العيادة!!!!!!!!….تسمرت قدماى داخل العيادة لا أصدق ما أسمعه!!!…لقد أفطرنا فى الخيمة سوياً وصلينا الصبح سوياً مع الأخرين…وكنا نجرى معاً…مش ممكن يكون مات!!!…طلبت من د/هادى أن أراه ولكنه رفض…رجوته…قال وما جدوى هذا…قلت له معلش ريحنى…دخلت معه إلى الغرفة التى يرقد فيها…كانت الملاءة مبتله بدمائه التى لم تكن قد جفت بعد…رفعت الملاءة من فوق رأسه…بدأت الدموع تترقرق فى عينى حين رأيته…لم استطع أن أكمل قراءة الفاتحة حيث تقطع صوتى وغلبتنى دموعى…أعاد د/هادى الملاءة على وجهه وقال لى أخرج دلوقتى قبل ما حد يجى يعملى ويعملك مشكلة…خرجت مش شايف قدامى…إنتشر الخبر بين الجنود…حزن الجميع عليه…العريف بتاعنا لما عرف هوه والشاويش وشاف الحزن فوق الوجوه استذوق معانا وخفف علينا بقية اليوم….إقربت الشمس من المغيب…توضأت وذهبت إلى المسجد قبل موعد الصلاة بحوالى نصف ساعة حتى أختلى بنفسى قبل قدوم المصلين…صليت ركعتين تحية المسجد ثم جلست أقرأ فى كتاب الله واهباً ثواب ما أتلوه إلى روحه سائلاً الله عز وجل أن يتقبله فيمن عنده…فتحت المصحف وبدأت أقرأ من الصفحة التى فتحت المصحف عليها…كانت الدموع تترقرق فى عينى أكثر وأكثر وأنا أقرأ أيات القرآن الكريم…وصلت إلى أية يقول الله تعالى فيها (ولقد جئتمونا فرادى كما خلقناكم أول مرة وتركتم ما خولناكم وراء ظهوركم) إنفجرت فى بكاء لم أبكى مثله فى حياتى من قبل…بللت دموعى صفحات الكتاب الكريم…أغلقت المصحف واسندت ظهرى إلى جدار المسجد لا أملك أن أمنع نفسى من البكاء…..لم أكن أعرف هل أنا أبكى عليه أم على نفسى أم على بلدٍ قد ضاعت يوم ضاعت قيمة الإنسان فيها………………………………يتبع

[علي بابا]

لآ..لآ....متفقناش علي كده....

كده برضه يا حشيش....يا آخي خليت الدمعه تجري من عنيه....

الله يرحمه و يرحم كل موتانا....

البلد بتدفع آغلي ثمن للفساد........دم ولادها.....

لآ يا عم انا عاوز الجته....و النداهه....

[أسامة الكباريتي]

بسم الله الرحمن الرحيم

أخي حشيش ..

شر البلية ما يضحك ..

والله .. لم ترتسم على شفتاي مجرد ابتسامة لما أسلفت في مسلسلك هذا .. على الرغم من الجهد الذي تبذله لتغلف الحدوتة بروحك المرحة ..

فهذا هو أصل البلاء فينا .. وهذا هو الفرق بين أن نكون مجاهدين في سبيل الله .. يخرج أحدنا وهو متمنيا على الله إحدى الحسنيين "النصر أو الشهادة" .. وبين أن نساق سوقا إلى "الخدمة العسكرية" على طريقة الأنكشاريا .. والتجنيد "الإجباري" وحتى المتطوع في الجيش يكون "ممتهنا" لا معنى للجهاد عنده ..

نعم يا إخوتي وأخواتي

هذه هي جيوشنا كما يعملون على إعدادها .. ليس دفاعا عن الأوطان .. بل حماية للكراسي ..

حتى جند معاوية في مواجهة سيف الله "علي" كان حالهم أفضل من جنودنا اليوم .. فهم كانوا "مأجورين" .. أي مرتزقة .. والبعض منهم مضلل ..

أما جيوشنا .. فتبعة هوان أمرها .. والفشل تلو الفشل .. فعلينا جميعا .. لا أستثني أحد منا .. والراعي قبل الجميع .. وكلنا راع وكل منا مسؤول ..

لقد انحرفت عن السياق الذي تسيرون فيه .. ولكن روحي تتعذب وأنا أقرأ مأساة أخي حشيش .. وأتذكر إخوتي من زملاء الدراسة وكيف عاشوا تجارب لا تقل مرارة مما يسرد هنا اليوم ..

يحدث هذا في كل الجيوش العربية .. وبخاصة في دول الطوق التي تحيط بفلسطين ..

أكمل سردك أخي حشيش .. فالقلب قد مر بجلطة قبل أيام .. وليس لديك ما أخاف منه .. فعندي من الهموم ما لن تزيد عليها بشئ