أغنيات مصيريه

[MZohairy]

محدثكم من مسقط :happy:

احييكم تحيه عطره من القلب

موضوعنا يا إخواني هو الأغاني التي كان لها دور رئيسي في تغيير مجرى حياتك او حياة المحيطين بك

و سأبدأ بنفسي :lol:

القاهرة نهاية سنة 1970

اسرتي الصغيره المكونه من أب و أم و طفل عمره عامان ( أنا ) :lol:

ينشأ بين الأب و الأم (رحمهما الله) اختلاف قوي في وجهات النظر يؤدي الى ترك الأم بيت الزوجيه و اتجهت الى بيت والديها و طبعا مصطحبه معها ابنها الصغير و البالغ عامين من العمر ( أنا ) :lol:

في هذا العام كانت أغنية موعود لعبد الحليم حافظ وبليغ حمدي قد حققت نجاحا و انتشارا ساحقا ماحقا

قررت الأم و هي في بيت والديها قرارا سريعا بحتمية و ضرورة الإنفصال و الطلاق و كان قرارا لا رجعة فيه

و في يوم من ذات الأيام و في منزل جدي شاهدت الأم طفلها ذو العامين من العمر ( أنا ) :lol: و هو يطل من الشباك و يغني :

موعود معايا بالعذاب موعود ياقلبي

موعود ودايما بالجراح موعود ياقلبي

ولا بتهدى ولا بترتاح في يوم ياقلبي

وعمرك ما شفت معايا فرح كل مره ترجع المشوار بجرح

و هطلت الدموع من عيني الأم هطولا :D و صعب عليها ابنها الصغير ان يقول هذا الكلام في مثل هذا العمر ( بالرغم من انها تعرف انه لا يعني شيئا مما يقول)

و لمت الأم شنطتها و خدت ابنها ذو العامين من العمر ( أنا ) :lol: و سابت بيت ابوها و راحت لبيت جوزها مباشرة و قررت ان تعود لزوجها نهائيا بدون قيد أو شرط

و هكذا كانت اغنية موعود و أدائي الخرافي المؤثر للغنوه :) سببا في لم شمل الأسره و سببا في وجود اشقائي الثلاثه الصغار الآخرين

رحم الله موتانا جميعا

حد عنده اضافات للموضوع؟

[amrhoras]

بصراحه موضوع جميل وقصه اجمل من اجمل شخص

ربنا يرحم موتانا

انا بقى فى اغنيه بعتبرها لها يد فى تغييير مجريات حياتى وكانت صدفه اه والله صدفه :D

صباح أول يوم امتحان ثانويه صباح الخير يامصر اول كوبليه واول اصطباحه منيله :lol: ( ايهاب توفيق واول كوبليه انصدم بيه الله يعوض علينا باللى يفرح عنينا) مكنش فى دماغى والله عادى مش بتشائم :)

صباح نتيجه الثانويه والاعصاب مشدوده :lol: ( بفتح التليفزيون القناه الرابعه ومنتظر النتيجه لقيت برده ايهاب توفيق ونفس المقطع الله يعوض علينا باللى يفرح عنينا ) جيبت 85% وزعلت جدااااا وبدأ الشك فى نفسي :lol:

امى ربنا يقويك يابني ويجعل فى وشك القبول والابن(أنا) مسافر للتقديم بالكليات العسكريه :happy: (برنامج ع القناه الخامسه وبرده احلى اصطباحيه الله يعوض علينا باللى يفرح عنينا) ياماما انتى بس ليه بتفتحى المخروب(التلفزيون ده) اقفليه الله يكرمك بدأت اتشائم

الحمد لله رايح انهارده كشف الهيئه لو سمحتوا محدش يفتح تلفزيون الله يكرمكم والحمد لله رحت الكشف وطلعت وبركب الميكروباص فى طريق العوده وعند تشغيل الميكروباص ليعلن بصوته الجميل العذب (الله يعوض علينا باللى يفرح عنينا)واللهى مانا راكب معاك يا اخى حررررررررام بقى :lol:

بدأت اتعقد من الاغنيه بجد خلاص اتعقدت

وجاء يوم التنسيق ولم ادرى انه يوم التنسيق ولكننى عرفت انه سيحدث لى شيئا يومها ( ساعة الظهيره وجدت نفس الاغنيه نفس الكوبليه ماما ابنك حيحصله حاجه اليوم خير يابني متخدش في بالك وخليك متفاءل

ترررررريم تررررررريم مين بيخبط انا بوسطه

خير ياحاج

التنسيق وصل ايدك على الحلاوه

طب ايه تجاره ( وذهب فكرى الى ايهاب توفيق مره اخرى ) وانت عاوز حلاوة ؟

ايوه طبعا

على ايه الوكسه امشي من ادامى قطر يلهفك

ثم جاء موعد نتيجة اختبارات الكليات العسكريه وكنت قد تناسيت الموضوع ودخلنا قاعات الانتظار

لاجد ان المايك داخل الكليه (حيث اعتدنا على سماع الميوزيك الهادىء وبعض المقطوعات الغنائيه ) وجدت ان المايك يتكلم ويقول الله يعوض علينا باللي يفرح عنينا

والله حرام حرام حرام ذهبت مع اربعة اصدقاء وكنت انا فى الوسط :lol:

25117،25118،25119،25120،25121

الجميع نجح دون رقم 25119 ومن يومها اعتقد ان هذه الاغنيه هى السبب وكرهت ايهاب وكرهت الاغانى وكرهت اليوم اللى سمعت فيه الاغانى

وهذه قصتى مع اغنيه غيرت فكرى بعض الشيء وازعجتني لدرجه لم اتخيلها

تحياتى

تم تعديل 17 نوفمبر 2007 بواسطة amrhoras

[قاهرى]

الله يكون فى عونك يا عمور .. اية النحس دة يابنى

.. انا بردوا عندى موقف مشابه زيك بس مش مع اغنية معينة لا دة مع المطرب نفسو كل لما اشوفوا فى التلفزيون او فى لاقاء او اى حاجة .. لازمممممم يحصل حاجة غلط ... انا والله مش عارف اسم المعنى دة اصل هو مش مشهور اوى ومش لية اغانى كتير . وبصراحة انا كمان مش عايز اعرف اسمو كفاية الى نبنى منوا . مبالك لو عرفت اسمو اية الى هيحصلى

سبحان الله مع التشائم والتفائل اساسا مش صح وحرام

وعلشان كدة يا عمر انا عايز اقدملك هدية انت بتحبها جدااااااااااااااااا اكيد مش هتصدق نفسك لما تشوفها

حبيبك .......... وهو بيقولك دلوقتى (الله يعوض علينا بالى فرح عنينا)

طبعا دلوقتى انت كرهتنى انا شخصياااااا

اكيدددددد مفهاش كلام

هههههههههههههههههههههههههههههههههههههه :happy:

[النسر المصري]

تم مسح مداخلاتي للانسحاب

:happy:

تم تعديل 24 يناير 2008 بواسطة النسر المصري

[MZohairy]

بصراحه موضوع جميل وقصه اجمل من اجمل شخص

ربنا يرحم موتانا

الله يخليك يا عمور

و ربنا يرحمهم رحمه واسعه اللهم آمين

و في النهايه اهديك اغنية

ملهومش في الطيب ياقلبي يا طيب

ياللي ما شافوا منك غير كل شيئ طيب

:closedeyes:

[amrhoras]

قاهرى يابني امشي جنب الحيط

استاذ مزهرى بيقولوا لو الواحد كشف راسه ودعى الدعوه بتستجاب سامعين :blink:

لو حصلى حاجه اليومين دول ذنبي فى رقبتك انت واخويا قاهرى وصيتكم العيال

:closedeyes:

[قاهرى]

والله يا عمور برغم انى مش من مستمعى ايهاب توفيق اوى الا ان الاغنية دى اكتر اغنية بحبها من اغانية .. لذيذة اوى والله وتصورها كمان جامد اوى الى هو كان بيحب جارتوا فى المنطقة ويجلها تحت البيت ويفتكر لما كانو بيحفروا اسمهم على الشجرة .. بحس فيها بزمن الرومانسية الى مش مجود تقريبا دلوقتى

والله يا عمور اغنية حلوة اوى .. بس هى موضوع تشائم بس مش اكتر

انت عارف يا عمرو .. والله تانى برغم انى مش بحب اتشائم من حاجة معينة او اتفائل الا ان فية حجات بتحصل للواحد تخلية فعلا يحصلو حاجة زى كدة يعنى مثلا انا عندى بدلة اوكى عمرى ملبست البدلة دى غير وحصل مصيبة بدرجة انى كرهتها .. اشترتها علشان احضر بيها فرح اول لبسة وانا اريح الفرح عملت حدثة بالعربية العربية ادمرت المهم ركنتها على جنب وركبت تاكسى وصلت الفرح والحمد الله .. تانى لبسة ليها كونت رايح اناقش مشروع التخرج بتاعى فى الكلية . وقتها العربية كانت بتتصلح فمكنش عندى عربية فرحت الكلية بتاكسى .. التاكسى عمل حدثة واتخبط فى الازاز واتعورت ثالث لبسة ليها كونت رايح اخطب لسة العربية واخدها من الدوكو وفرحان بيها ولبست البدلة دى بردوا عملت حدثة تانى بيها

ههههههههههههههههههههههههههههه اة والله العظيم حصل .. مش ساعتها ملبستش البدلة دى تانى ابدااااااااااااااااا ركنتها ورحت اشتريت وحدة تانية بدل مالموضوع يكبر وبدرجة انى خايف اديها لحد ليحصلو حاجة كمان ........

يلا ما علينااااااااااااااااااااااااا الله يعوض علينا باء :closedeyes:

قاهرى

[قاهرى]

mzohairy

مين البيبى الى انت حطة فى ال profile بتاعك ... دة ابنك ولا انت وانت صغير ؟؟؟

اصلو عسول اوىىىىىىىىىىىىىىىىىىىىىىىىىىىى اوى اوى ربنا يخلهولك يا رب

بسم الله مشاء الله طبعا

تسلم ايدك على الموضوع الجميل دة ...

قاهـــــــــرى

[seeem]

عموووووور

اشاركك المشاعر السلبية ناحية ((مالهومش فى الطيب))

فعلا اغنية فقر.....

انا ليا اغاني كتيرة اتربطت بحياتي بعقدة وشنيطة.....

وكمان الموسيقى وبالذات الكلاسيكية.........

افتكر انى واخويا اللى اصغر مني مكناش نذاكر الرياضيات إلا على بيتهوفن.....((يمكن علشان معقدة))

ولا فيروز في ((خليك بالبيت)) و((ياليل)) وهى معقودة بجده وليالي الخميس

اما ورده فى ((بتونس بيك)) دي بقى حكايتها حكاية ...... كل ما اسمعها افتكر ايام جميلة كنت فيها فى مدرسة السفارة المصرية بجدة ..... اسمعها من هنا وتلاقيني سافرت بعيد..... بعيد..... ويمكن لو حد كلمنى ماعرفش هوه بيقول ايه......

الموضوع ده هايل

ولسه الكلام ماخلصش

[MZohairy]

mzohairy

مين البيبى الى انت حطة فى ال profile بتاعك ... دة ابنك ولا انت وانت صغير ؟؟؟

اصلو عسول اوىىىىىىىىىىىىىىىىىىىىىىىىىىىى اوى اوى ربنا يخلهولك يا رب

بسم الله مشاء الله طبعا

تسلم ايدك على الموضوع الجميل دة ...

قاهـــــــــرى

ده يا سيدي الواد دودي ابني الصغير و البالغ من العمر عام واحد فقط لا غير

و هو طفل شديد الإيمان دائم قيام الليل wst:: و يقضي الليل ساهرا و دموعه منهمره من فرط الإيمان

و شديد الخبث ايضا ... لما اقوله قول بابا يقول ماما و لما اقوله قول ماما يقول بابا

لكن لما أمه تقوله قول اي حاجه يقولها صح على طول :D

العيال باظت يا جدعان

انا عمر ما كنت استجري اخالف كلمه يقولها ابويا الله يرحمه :lol:

فعلا جيل ما بعد تامر حسني!!

[amrhoras]

mzohairy

مين البيبى الى انت حطة فى ال profile بتاعك ... دة ابنك ولا انت وانت صغير ؟؟؟

اصلو عسول اوىىىىىىىىىىىىىىىىىىىىىىىىىىىى اوى اوى ربنا يخلهولك يا رب

بسم الله مشاء الله طبعا

تسلم ايدك على الموضوع الجميل دة ...

قاهـــــــــرى

ده يا سيدي الواد دودي ابني الصغير و البالغ من العمر عام واحد فقط لا غير

و هو طفل شديد الإيمان دائم قيام الليل :blink: و يقضي الليل ساهرا و دموعه منهمره من فرط الإيمان

و شديد الخبث ايضا ... لما اقوله قول بابا يقول ماما و لما اقوله قول ماما يقول بابا

لكن لما أمه تقوله قول اي حاجه يقولها صح على طول

العيال باظت يا جدعان

انا عمر ما كنت استجري اخالف كلمه يقولها ابويا الله يرحمه

فعلا جيل ما بعد تامر حسني!!

بسم الله ماشا الله تبارك الله فيما خلق

خفة الدم والطعامه اكيد جايبها من ابوه طبعا ربنا يقوى ايمانه بس بالنهار طبعا صوت الطفل فى البيت نعمه خصوصا اغغغغغغغغغغغغغ :rolleyes:

ربنا يخلهولك ويباركلك فيه يارب

تامر حسني هو وصل حتى للبيبيهات حسبي الله ونعم الوكيل :ph34r:

[قاهرى]

mzohairy

بسم الله مشاء الله يارب يخلهولك يا رب ويرزقنى انا كمان بيبى زى السكر زيوة كدة يا رب مشاء الله حتة سكر زى الملاك .

ربنا يخلهولك يا mzohairy

تاتش ود

[MZohairy]

مفيش حد بيسمع اغاني في المحاورات؟! :ninja:

[Ahmad Farahat]

لا توجد عندي أغنيات مصيرية

لكن هنك أغنيات لها أهمية في حياتي أيضا

اولى تلك الأغنيات مصر يا أول نور في الدنيا لمحمد ثروت والتي غنيتها في حفل المدرسة سنة 1991 وكنت في ثانية حضانة في حفل المدرسة في محافظة المنيا

ثاني هذه الأغنيات إلى حبيبي أو متى ستعرف كم أهواك يا أملا لنجاة والتي سمعتها في أواخر المرحلة الإبتدائية فقد كانت بداية استماعي إلى القصائد

ثالث هذه الأغنيات قصة الأمس والتي كانت أول ما سمعت لمطربتي المفضلة أم كلثوم ولا زال في أذني إحساسي الأول بها

ولست أدري كيف يمكن أن يبدأ مستمع لأم كلثوم لم يتجاوز الثالثة عشر بقصة الأمس تحديدا

لكن هذا ما حدث

فقط