كلمات أغانى

[هشام عبد الوهاب]

شعراءنا الكبار

اين الشعر الغنائى . (كلمات الاغانى)

عدد من الملحنين الاصدقاء سألنى عن شعراء جدد للأغانى .

وخاصة للمطربات . هل هناك من يرغب .........شكرا للجميع.

[بنت شعنونة]

الكلمات دي انا الفتها عشان خطوبة اخويا

ولحنتها

وهوا تفضل مشكورا انه سجلهالي على سي دي عشان تبقى دي رقصة السلو :D :roll: :roll:

بتقول

اخيرا انا بين ايديك

قلبي ب يناديك

عمري كله ليك

حبيبي انا روحي فيك

حبيبي يا ملاك

منايا اعيش معاك

انا من غيرك هلاك

حبيبي يا حنون

يا قلب واحلى عيون

صدقني مهما يكون

مش ممكن اعيش بلاك

المقطع الجاي بيتقال كلام بس و الموسيقى خلفية

حكايتنا احلى حكاية

يتعلموا منها الصبايا

احلى حب في احلى كون

و يكمل

اخيراانا بين ايديك

الخ

:D

حــــقـــــــوق الــــــــطــــبـــــع مـــــحـــــفـــــوظـــة لــشــــعــنـونــة

:D :D

[Katamando]

أعتقد أن لحن أغنية مصظفى قمر يمشي مع الكلمات دي

ولا ممكن أكون بيتهيألي

عموما مش مشكلة

وألف مبروك

وعقبالك يا شعنن

[ragab2]

الحقيقة

كلمات جميلة وسهلة ومعبرة

بس ياريت تنزليها باللحن والغناء فى المنتدى عن طريق mp3

وبأى صوت مش مشكلة

حتى نعطيكى رأينا المتواضع فى اللحن

علما

بأنى قمت بتلحين الأغنية الثانية مرة على الأورج ومرة على العود

حكايتنا احلى حكاية

يتعلموا منها الصبايا

احلى حب في احلى كون

ودمتم

[بنت شعنونة]

من عنيا والله يا دكتر رجب

حضرتك تأمر :)

بس انا مسجلها بصوتي فعلا وانا بغنيهعا

هوا صوت مش فظيييع يعني

ومش مرعب ان شاء الله :roll: :roll: :D :D

اولما اخويا يرجع من بره ها اخليه ينزلهالي هنا انشاء الله

بسهيا كلها بالجيتار على فكرة :roll: :oops:

ويامسهل تعجبكم

كان نفسي اسمع لحن حضرتك بجد :oops: :oops:

[ragab2]

شكرا

ياأختنا الفاضلة شونشون

وفى انتظار سماع أغنيتك الجميلة

ان شاء الله

[daktara]

ايه الكلام الحلو اللى انا ياشوفه ده

كلمات الاغانى كتيره يا استاذ هشام بس هل فيه ملحن جاد فعلا وعايز كلمات؟ انا عندى اغانى متلحنه وجاهزه ونشرت هنا حاجات كتيره وبعد اذنكم اعيد نشر بعضها تانى

بعتّ جواب

بعتّ جواب ما رديتشى وادينى تانى باكتب لك

ورغم الغربه مانسيتشى أطمّن فى البعاد قلبك

و خايفه زحمة الايــام تخلّى حبنا أوهـــــام

وخايفه تقول لى ما فضيتشى بعت جواب ما رديتشى

***************

كتبت بكل أشواقى كلام م القلب له معنى

دموع العين فى أوراقى و نبض القلب فى المعنى

كلام اتقال كتير بينّا ما بين قلبك و إحساسى

فى يوم ما الحب قابلنا أنا فاكراه و ليه ناسى

و خايفه زحمة الايام تخلّى حبنا أوهـــــام

و خايفه تقول لى ما فضيتشى بعت جواب ما رديتشى

****************

ياريت مايكونشى بُعد العين منسّى القلب أحبابه

يا ريت يجمع ما بين قلبين سهاد الحب و عذابه

و تفضــل لهـفة الاشـــواق تروّى زهرة العشاق

و عين الحب ما تنامشى بعتّ جواب ما رديتشى

****************

سافرت و عدّت الايام ما فكرتش تكلمنى

لانا عارفه فاضل لك كام ولا عايز تطمـّنى

يا قلبك كل دى قسوه أوام راحت كده النشوه

دا حتى الحب لو نزوه حلاوته برضه ما تهونشى

وانا حبيت بإحساسى و قلبى لسه بيقاسى

ولو كسلت أو ناسى أدينى تانى باكتب لك

وخايفه زحمة الايام تخلى حبنا أوهام

وخايفه تقول لى ما فضيتشى بعت جواب ما رديتشى

[إبن مصر]

شىء جميل فعلا وهوايه رائعه وغالبا الكل بيكتب كلامه متلحن..

المهم .. اذا سمحتولى عندى حتتييييييين صغيرين يارب ينفعوا يخشوا لجنه الاستماع .:

فى ليله والنجوم نايمه

وروحى فى الفضا هايمه

قابلنى فى الخيال فارس

على حدود الحنين حارس

سألته عن طريق فجرى

شاورلى وابتديت أجرى

ولما بعدت نادانى

ومن بحر الهوى روانى

ونادمته ونادمنى

وكلمته وفهمنى

ولما الليل بدا يسافر

وضى الفجر جه يشاور

لملم سنينه وسنينى

ورسم الفجر فى عينى

وعدنى انه هايجينى

لما النجوم تنام تانى

ومن يومها وانا فى لهفه

فى شباكى ابات وافقه

اقول للنجمه ماتنامى

وانده عليه فى احلامى

وليلى طويل قاعد سهران

حالف ما يخلى نجم ينام

واقوله يا ليل يا ليلى حرام

نيم نجومى علشانى ..........

بس ... لو عجبتكوا ابقى اكتب التانيه وعلى فكره الى بتغنى هنا بتغنى لفارس خيالى وده الجديد ما بتغنيش لحد ..

ابن مصر

[ragab2]

الاخوة ابن مصر ودكترا

الحقيقة

كلها كلمات وأغانى جميلة

ياريت نخصص هذا الموضوع للأغانى المعبرة كهذه

الله ينور

[بنت شعنونة]

الله الله الله الله الله

ايييييييه الجمااااااااال دا

جمييييييييلة جدااااااااافعلا

الله ينور يا دكتراانت وابن مصر :cry:

ابن مصر حروفك دي جميييييييييييلة جدا والله

وخسارة انها ما تتنشرش او تتغنى لأنها رقيقة وبريئة جدااااااا

فكرة مميزة :wink:

:cry:

[هشام عبد الوهاب]

شعرائنا الكبار

كل ما كتبتم هنا رائع وجميل .

كنت اقصد كلمات الاغانى بنفس الصيغة المتداولة الان فى عالم الاحتراف

وهى كما تعلمون عبارة عن مذهب وهو الجزء الاول من الاغنية وفيه فكرة الموضوع او مقدمه له وعادة ما يكون الرجوع لجزء منه بعد كل كوبليه.

ثم ياتى الجزء الثانى وهو الكوبليه الاول ويفضل فيه تغيير الوزن الشعرى عن المذهب وتكون نهايته مرتبطه بالجزء الذى سيعاد من المذهب.

ثم الكوبليه الثانى ويكون بنفس الوزن الشعرى للكوبليه الاول ومساويا له فى كل شئ .

مثلا اغنية لا بينا حلم

ماخليتكش تحبنى

وأدى أنت شوفت

أنا كنت بأبعد قد إيه

ولا يوم ضعفت

أنت اللى ما فهمتش كلامى صح

وانا غلطتى انى فضلت ساكته وانكسفت

لا بنا حلم 000 ولا بنا وعد

مجرد أتنين عرفوا بعض

****

سألتني إيه جوه قلبى وقولتلك

جاوبت وأنا باختار كلامى ليقتلك

ما كنتش باوهمك ماتقولش لعبت بيك

حاولت افهمك ومضحكتش عليك

لا بنا حلم 000 ولا بنا وعد

مجرد أتنين عرفوا بعض

***

سامحنى انا مقصدش ابيعك

و لااجرحك

مافيش فى ايدى اى حاجة

تريحك

وقتك لو ضاع هدر

ضيعته انت بايديك

اللى حصلك قدر

وانا عمرى ماكنت ليك

لا بنا حلم 000 ولا بنا وعد

مجرد أتنين عرفوا بعض

[daktara]

لو بينتى الحب .....ح ابيِن

وان حنتتى انا قلبى حنين

ليه نفتح أيواب لعذابنا

ونصعَب كده ليه فى الهين؟

لو بينتى الحب .....ح ابيِن

*************

لو بينتى انك رايدانى

ادفع عمرى واشوفك تانى

بسى ابتسمى ....لو يتقال قدامك إسمى

وابقى اترسمى ..قدام كل الناس من تانى

لو بينتى الحب .....ح ابيِن

**************

لو بينتى لى الحنيه

والاشواق من غير مداريه

كنت اطَمن ...برضو واطمن

قلبى على اللى عليه النيه

لو بينتى الحب .....ح ابيِن

****************

ليه نبعد عن بعضنا ليه

ايه اجمل من حبنا ايه

دا ان رحنا له احنا باشواقنا

ولا فى يوم قلنا له اشتقنا

ح يجمِل نفسه ويتزين

لو بينتى الحب .....ح ابيِن