المعرى!!!

[dimage]

ياعم حشيش الف مبروك

ياسيدي ولا يهمك ، انت حاتخلص تحويشة العمر

وبعدين تبدأ من جديد تحويشة عمر

عشان ، تغير الشقة ، وتشتري شالية في الساحل الشمالي

وبعدين تبدأ ثاني تحويشة عمر عشان العيال ومصاريفهم

وبعدين تبدأ تحويشة عمر ثاني عشان جواز العيال

الي ان يقضي اللة امراً كان مفعولاً

نصيحة ما تعملش زيي وكبر دماغك ، برضة كنت نازل في اجازة وعملت الفرح ، في مكان علي غير رغبة العروسة ( لا يليق بطموحها )

ومازلت اعاني من ذلك حتي تاريخة بالتبكيت ، والسخرية بعد ( 15 ) سنة وتقول لي ياراجل بقي مستخسر فيا فرح في مكان فيف استار ، فقلت لها انا مستعد اعمل فرح ثاني ، ونكسب خير ، ناخد واحدة من ال 9 مليون عانس اللي مصر

:D

[Faro]

كل عروسة ولها سعر, وأنت محظوظ زوجتك القادمة ليست .. سكندهاند ... لأن السكندهاند تطالب بأكثر من تحويشة العمر وعندئذ سيكون اللقب أبو حشيش المتعري

سؤال برئ،

ما هو تعريفك للمرأه ال"سكند هاند" ؟

أنا بصراحه سمعت عن عربيات بتكون كده...ملابس...ولكن كونها إمرأه دى جديده شويه !

:s2:

زوجة ذات خبرة سابقة

[ragab2]

ياسيد حشيش

الزواج

ربنا بيسهل فيه مثل المبانى

يعنى كل أشكال تعمير الأرض ربنا بيسهلها ويساعد فيها

ثم ان كل المصاريريف التى تصرف على الزوجة فهى خير وبركة وفى مكانها وستعود عليك يوم من الأيام وستكون لديك فى بيتك

وياما زوجات وقفت بجوار زوجها فى الشدة من شبكتها أو ماتملكه سواء كان هذا المال منك أصلا أو منها بشرط أن ترد لها أى مال يخصها بعد أن تتحسن حالتك

حتى ثمن الشقة فهى لك لأن العقد سيكون باسمك فى غالب الأحوال

ماعدا مصاريف الفرح التى يجب أن تكون فى الحدود المعقولة وهى فقط التى ستذهب ولا تعود

وكل قرش يصرف على الزوجة سيرد لك سعادة وهناءا مع الزوجة الأصيلة

ولكن لأنك جديد فى عملية الزواج لم تشعر بعد أنها جزء منك ومكملة لك

وتوجد زوجات كثيرة تخاف على أموال زوجها وتحافظ عليه أكثر من نفسها

بس المهم أن تشعرها أنك لا تبخل عليها فى غير تبذير طبعا وأنك لا تفضل القرش عليها

ويكفى أن استقرار الزوج مع زوجته تجعله يتفرغ فى عمله ويبدع فيه ويستقر نفسيا واجتماعيا ولا تنسى أيضا أن الله جعل الزوج غطاءا للزوجة ماليا وعاطفيا واجتماعيا واذا صلح الغطاء وكان كافيا سينصلح ماتحت الغطاء ولا يعطب

هذه هى تجارب بسيطة من الحياة

والله الموفق

[Proud Muslim]

طبعا الأخ حشيش . مبارك عليكما و بارك الله لكما , ربنا يوفقكم و يرزقكم بذرية صالحة . عقبال الجميع . :D :D

و لكن يا جماعة البعض يتكلم عن الفرح و الفندق و الراقصة و المطربين , بالله عليكم مش ده حرام ؟؟ و بعد كده نقول حال البلد ؟؟

هل هذا يصح من المسلم ؟؟ يدفع البعض أحيانا أكثر من 50 الف جنيه و يصل الى 100 ألف جنيه في راقصة عارية و مغني ماجن ء ؟؟

يا جماعة و الله ده حرام .

و البعض يقول ال سكاند هاند , يا سيدي الفاضل المراة المسلمة لا يقال عنها سكاند هاند أبدا , هي ليست سيارة و ليست سلعة تباع و تشترى , هل أصبح المستعمل أيضا لفظ يطلق على النساء ؟؟

الحمد لله الذي انعم علينا بدين يعفنا عن هذه الألفاظ و عن تلك التشبيهات , ثم نقول بعد ذلك التحضر و التقدم , أي تقدم و تحضر هذا و المرأة ينظر اليها وكانها سيارة ؟؟؟؟؟؟؟؟

و مع احترامي لمن قال ذلك , هذا الكلام لا يقال يا أخي الفاضل حتى لوكان على سبيل المزاح , ليس لأنه توجد اخوات , بل لا يصح ان يقول الرجال هذا الكلام بينهم , لن تلك الساكند هاند قد تكون اختي أو أخت اي مسلم آخر , و لا يؤمن أحدكم حتى يحب لأخيه ما يحب لنفسه .

و يقال الدين يظلم المرأة ؟؟؟؟؟

سبحان الله .

و الله يا أخت الاسلام ماظلمك الا من قال لك اخلعي حجابك و اخرجي لتشاركي الرجل في العمل .!!!!! :( :( :(

ثم كنت أحسب ان النقاش قد يتطرق الى اختيار الزروجة , أين ذات الدين ؟؟ اين مربية الأجيال و صانعة الرجال ؟؟؟

أين بنات امهات المؤمنين ؟؟؟

أليست الزوجة الصالحة خير متاع الدنيا ؟؟؟

أذكركم و اذكر نفسي بقتوى الله .

و الله من وراء القصد .

[freefreer]

مبروك يا استاذ حشيش .. و انا اتمنى ان يفوق الشعب المصرى و يبطل مظاهر فارغة بلهاء ..

حاجة تانية يا استاذ حشيش .. انا فى فرحى لم احضر راقصة .. اظن ان هذا تقليد سيئ .. مع احترامى للجميع الذين احضروا راقصة فى افراحهم ..

[Horus]

عزيزى العريس الجديد الاستاذ حشيش

اسمحلى اشارك معاكم و افتكر معاك اللى جرالى... يالهوىىىىىى ( مع الاعتذار ل شعنونه)

شوف يا سيدى.. طلعت على المانيا و منها على هولندا و اخيرا استقريت فى كاليفورنيا- ماتسالنيش على اى تفاصيل ...

المهم اتمرمطت و اشتغلت ميت شغلانه و شفت الدنيا زى ما كنت عاوز و نزلت مصر بعد غياب حوالى 4 سنيين.

كان معايا كله حوالى 80 الف جنيه.. (انا برضه كنت عايش و شايف نفسى ) المهم عزمت ع الجواز و بنت الحلال موجوده و الحمد لله.

خد عندك يا سيدى....( خد بالك ان فيه مصروفات مداريه ممكن تكلفك كتيير قوى و انت موش واخد بالك) :

1- شقه فى احدى المدن الجديده دفعت 40000 عشان الاستلام بعد سنتين و الباقى على 20 سنه.حاليا مقفوله لانها عايزه كمان 40000 تشطيب.

2- 6000 شبكه خاتم سوليتيير يا سيدى اللى طلعلنا ف المقدر.

3- 6500 كمان فرح فى احدى دور القوات المسلحه و ده مايجييش نص تكلفه فرح 3 نجوم خد بالك.

4- 4000 تكلفه 10 ايام (عسل) فى شرم الشيخ و بالطياره و حياتك.

5- 3000 رقم تقريبى لهدايا فتره الخطوبه .

6- 3000 -رقم تقريبى برضه - لخروجات و فسح نفس الفتره.. ايوه ماهو لازم كام مسرحيه و كام سينما على كام خروجه كده.

7- 2000 نثريات .. ماتنساش المأذون اللى بياخد 2% من الصداق المسمى- و الدبل اه و كمان فستان العروسه يا معلم.

المهم ماطولش عليك الفكه اللى فضلت عملت بيهم مشروع صغير و الحمد لله على كل حال قفلت المشروع بعد خساره كامله و ديون متلتله و ادينى اهو باحاول من جديد - ارض الله واسعه يا بنى- على راى حسين رياض الله يرحمه.

المهم انه فعلا الحكايه ماشيه زى الخطط الخمسيه بتاعه الحكومه ... تعمل قرشين ... و يطيروا فى حاجه ... و بعدين تعمل قرشيين تانيين و برضه يطيروا فى حاجه تانيه.....و هكذا.

لكن فعلا كله يهون لو ربنا بيحبك و انعم عليك بالزوجه الصالحه - بنت الحلال فعلا- و يا سلام كمان لما ربنا يرزق بالذريه الصالحه.. ساعتها بتحس ان اى حاجه تهون.

ربنا يوفقك و انا حاسس كده ان اهل العروسه ناس مهاوديين و طيبيين و ممكن بشويه اقناع نتقابل فى منتصف الطريق و الحكايه تمشى.

و الف مبروك مره تانيه.

[kokowawa1979]

من الواضح ياجماعة أن فيه حاجة غلط في موضوع حفلات الزواج الآن فعلى الرغم من أن أمور الزواج الآن في غاية الصعوبة إلا أن أهل العروس مايصدقوا عريس يتكلم على بنتهم إلا وهات ياطلبات على الرغم من أن بنتهم كان من الممكن أن تعيش عانسا للأبد في ظل الحالة الاقتصادية حاليا وعدم تمكن الشباب من فتح بيت وعلى الرغم من أن حفلات الزفاف تتكلف مايفوق تكاليف الزواج وأصبح هم أولياء الأمور كيف يتم عمل فرح فخم يرد به على فرح بنت الجيران لدرجة أنك تجد أن أهل العروس لايدققون الآن في نوعية العريس المتقدم للزواج من ابنتهم هل هو ذو علم ودين أم هو مدمن المهم المهم أن يكون عريس متريش ويدخل السجن بعد الجواز مش مهم

المهم إن الدين للأسف أصبح آخر شيئ ينظر له من ناحية العريس وفي بعض الأحيان من ناحية العروس

إحنا عاوزين هزة جامدة ياخوانا في موضوع المغالاة في المهور وياريت الدولة كانت صرفت نصف ماصرفته في مشروع توشكى على إنشاء مساكن متوسطة للشباب تعينهم على الزواج .

وياايها الشاب انوي نية خالصة لله في موضوع الزواج يفتح لك أبواب الرزق ودور على عروسة لديها دين لأنها لن تطلب منك أن تأتي بحكيم ( المغني ) علشان يقول اس اس اس السلام عليكم بعد مايكون لهف فلوسك !!!!!!!!!!

[Set_Amina]

وجرى إيه ياست أمينة

انت عاوزة تفشكلي الجوازة واللاإيه وماله فندق ( والله ماعارف أقول اسمه) خليهم يفرحوا وينبسطوا وعلى رأي فاتن حمامة ليالي العمر معدودة يا أحمد

بيني وبينك انا خفت بجد اكون بالطريقة دي بافركش الجوازة، لكن أرجع وأقول لا لزوم للفرح وحكاية ليلة في العمر دي زي ما شعنونة قالت ويمكن حد تاني كمان فانا غير مقتنعة بيه بالمرة، ليالي العمر كتيرة وممكن تكون جميلة بخوف الزوجة على فلوس زوجها من الضياع هباء وحرصها على أن يبدأ سويا حياة بدون ديون ده أهم شيء وبعدين الفرح ده كما سبق وقلت منظرة وفرجة للمعازيم اللي رايحة تاكل وتسهر سهرة بالوشي وياريت بيسكوتوا بعد كده، بالعكس النميمة بتستمر أسابيع بعدها على العروسة اللي كانت مطفية وخاسة، يمكن ياختي مش مقتنعة بالعريس، ولا أم العريس اللي كانت ضربة بوز، طبعا ماهي العروسة مش من مستواهم ، وغيره وغيره..

أتمنى ان حشيش يصمم على رأيه وبلاش فرح بس برضه بلاش يفركش الجوازة، ازي معرفشي.

[Sayyeda Abouzied]

صحيح انا جيت هنا بعد ما تزوجت وجبت عربية وشقة وكان وضعي مستريح ولكن عندي ليك رئ انك تأجل حكاية الشقة شوية وخذ واحدة بالتقسيط المريح ومش ضروري يا سيدي انك تعمل فرح في فندق كفاية عليك تعمله في نادي الشرطة وكل اقاربك ظباط شرطة واذا مقدرتشي اكلملك مدير النادي بتاع الشرطة ما انت عارفه العميد هشام حشيش ابن عمك دا كان زميلي جوزي في فريق الجودو ما هو حزام اسود برضه وياما انضربو سوا

عموما لو انت جبت مراتك وسكنتو البحرين تقدرو تساعدو بعض وتكونو مستقبلكم وليكم زيارة فانا ساكنه في الظهران وعادتا اسافر عن طريق البحرين لان مطار البحرين اقرب لي من مطار الدمام وطالما بدفع عشرين ريال ثمن الفيزة للبحرين يبقى نزوركم بيها واهو يبقى لها فايدة وزورنا الحابيب

[Set_Amina]

ولو ليك دلال عليه ممكن تاخدها ب 1500الديجي بقى يبدا من 500 في اقل الأحوال و 800 في العادي وكبيره قوي 2000 بس مافيش السعر دادلوقتي

يعني هتلاقيه 800

الدخان يعمله من 100 ل 150 ج

:cool:

ياشنشن أنا مش فاهمة حاجة خالص من الكلام اللي فوق ده!!!

دخان ايه؟؟ هو التدخين في القاعة بفلوس كمان؟؟؟ وايه الدبجي ده؟

معلش بس عاوزين نفهم بجد :)

[moustafa]

الأخ حشيش

أولا مبروك الخطوبة وربنا يعينك على بقية المصاريف... بالنسبة لفندق موفنبيك هو فندق 4 نجوم بطريق المطار بمصر الجديدة وهو فندق جميل وسيكلفك عمل الفرح هناك حوالى 25000 جنيه وهذا شامل القاعة والباند والزفة وتورتة العروسه والعشاء والراقصة وتصوير الفيديو

والاقامة بالفندق لمدة ليلتين وتستطيع دعوة 100 شخص...موضوع الفندق ده موضوع نسبى بمعنى اذا كان عندك مثلا مليون جنيه او حتى نصف مليون فلا مانع ان تفرح عروستك ب 25000 جنيه...ولكن اذا كانت ال 25000 جنيه دى تشكل ربع ما تملك فالاجابة بالقطع تكون لالالالالالا...ويكون عمل الفرح فى اى نادى هو الحل المنطقى ويؤدى الغرض...تحياتى ومبروك مرة اخرى.

[علي]

دخان ايه؟؟ هو التدخين في القاعة بفلوس كمان؟؟؟ وايه الدبجي ده؟

الدي جي Disk Jokey

والدخان ده اللي بيرموه ويطلع منه العرسان وهما بيقولو شبيك لبيك، أصلها ناقصة فزع إنساني!

وكله كوم ، واللي بيتعمل في العرسان كوم تاني: بيفضلوا يرقصوا ويتنططوا 5 ساعات (والا يبقي دمهم تقيل وكبة كدة!) علشان لما يروحوا يناموا علي طول!

والا الأشياء اللي بتحيي الأفراح وبيهفوا 10 تلاف جنيه في النص ساعة علشان يقعدوا يتهايفوا ويخلوا العرسان يحسوا أن جالهم داون سيندرومز وبيتعاملوا معاملة الأطفال!

ولا الإمسيي اللي بيقعد يتهايف وهو بيأكل العروسة والعريس حتة التورتة علشان يخليهم يبوسوا بعض في مشهد كوميدي فارس زهقنا منه!

والمفروض من العريس ، بعد اليوم الكبيس ده ، وبعد مايكون ياعيني عمال يخس بقاله شهر بيجهز في الشقة والعفش أنه كمان يشيل العروسة لحد الشقة!طبعا بكره يخترعو ونش ويتضاف علي تكاليف الفرح!

أحنا علينا حــــاجــــــــات!!! ياتري فيه أي بلد في العالم بتعمل اللي أحنا بنعمله ده؟

[freefreer]

مممممممم معلش اسمحولى بنقطة نقد اخرى ..

ازاى الوحد يضييع ذكرى محورية فى حياته زى ليلة الدخلة فى فندق و فى غرفة استخدمها عشرات الناس من قبل ..

ثم يترك الغرفة و الفراش و الذكرى و يودعهم الى الأبد ..

بقى العريس و العروسة يصرفوا دم قلبهم علشان شراء جهاز جديد فى جديد بعدين يقضوا ليلة الدخلة فى غرفة مستعملة و مش بتاعتهم ..

عجايب .. عجايب صحيح يعنى

[الطفشان]

و انا اتمنى ان يفوق الشعب المصرى و يبطل مظاهر فارغة بلهاء .. 

انا فى فرحى لم احضر راقصة .. اظن ان هذا تقليد سيئ .. مع احترامى للجميع الذين احضروا راقصة فى افراحهم .. 

لا لزوم للفرح وحكاية ليلة في العمر دي زي ما شعنونة قالت ويمكن حد تاني كمان فانا غير مقتنعة بيه بالمرة، ليالي العمر كتيرة وممكن تكون جميلة بخوف الزوجة على فلوس زوجها من الضياع هباء وحرصها على أن يبدأ سويا حياة بدون ديون ده أهم شيء وبعدين الفرح ده كما سبق وقلت منظرة وفرجة للمعازيم اللي رايحة تاكل وتسهر سهرة بالوشي وياريت بيسكوتوا بعد كده، بالعكس النميمة بتستمر أسابيع بعدها على العروسة اللي كانت مطفية وخاسة، يمكن ياختي مش مقتنعة بالعريس، ولا أم العريس اللي كانت ضربة بوز، طبعا ماهي العروسة مش من مستواهم ، وغيره وغيره.. 

أتمنى ان حشيش يصمم على رأيه وبلاش فرح بس برضه بلاش يفركش الجوازة، ازي معرفشي.

اتفق مع فري و ست امينة

مافيش لزوم للمظاهر و الراقصة و الفرقة و هذا الكلام

و هم اولى بالفلوس يصرفوها في حاجة تفيدهم

و قول انها ليلة في العمر يذكرني بقريبة لي اتعمل لها فرح ما حصلش، و رزقها الله بزوج صعب شويتين لم تكن سعيدة معه في اغلب احوالها، بل كانت مهمشة تعامل اقرب الى الخادمة

و لكن كانت دايما تقول انها فاكرة الزفة بتاعتها و فرحانة بيها!

شوف الكلام!

و اعرف من الناس من صرف في فرقة و رقص و دي جي و الحاجات دي كلها، ثم بيتهم ينقصه اساسيات!

طب ليه؟ هم الغرب اولى؟

و اعرف من خطب و تزوج و كل خطوبة في فندق شكل و رقاصات، ثم تصل المشاكل الى الطلاق مع وجود اولاد ايضا

دة كلام؟

الفرح في حد ذاته احتفال و لا يجب ان نحرم الناس منه ( العروسين اولا، ثم الاقارب و الاصدقاء)، و عشان البيوت ضيقة و المعازيم كثير ممكن ييتعمل برة لزوم المكان المتسع، لكن ايه لزوم فرقة و دي جي و مغني و رقاصة و دخان و زفة اسكندراني و بورسعيدي و صعيدي و معرفش ايه؟

و المبيت في الفندق كام يوم مش وحش، بدل ما تقوم العروسة تاني يوم تحضر الفطار و تغسل مواعين (حتعمل كدة كثيييييير، بس احنا الرجالة ندعلهم كام يوم بس في الاول كدة!)

[Seafood]

إن ما يحدث في الأفراح و كل ما يتعلق بالزواج ... لهو دليل على أن حكومتنا الرشيدة لم تأتي بجديد في سياساتها و كيف تتصرف بغير حكمة في تسييس الدولة ...

فالحكومة التي تصرف ببذخ على الإحتفالات , و الأعياد , و البعثات الترفيهية للخارج للمسؤلين ... و على إستقبال الضيوف الأجانب ... و الصرف عليهم من مال الشعب ... هذا غير مواكب الوزراء , و رئيس الوزراء ... و الرئيس و عائلته ... بينما باقي الشعب يشحذ لقمة العيش , و تستدين الحكومة لشراء القمح له ...

هذه الحكومة التي تفعل ذلك ...أساسها في الشعب الذي يهتم بالمظاهر ...و يعطي الأولوية لزفة و راقصة و شهر عسل في أوروبا ... أكثر من الأهمية التي يعطيها لكيفية إختيار الزوج أو الزوجة على أساس صحيح ...

فلماذا نلوم الحكومة ؟ ألسنا نفعل نفس الشئ ... ؟ ألسنا نهتم بالمظاهر على حساب الجوهر ؟

[se_ Elsyed]

أولا ألف مبروك ياحشيش وربنا يجعله جواز اخضر ومرعرع عليك :cry:

لأ فعلاً انا مُت على نفسي من الضحك يا أمونه يا عسل إنتِ ، لا الغرابة أمين تغيب تغيب وتيجي تقوم ضربة مداخلة فى الجون ... بس أنا أول مره أسمع دعوه زى دى ، بس تصدقى يا أمينة الدعوه فيها ماتشنج ماحصلش ... الف مبروك يا " حشيش " جواز " أخضر " " مرعرع " حسيت إن أنا فى غيط برسيم.

[se_ Elsyed]

ربنا يتمم بخير يابو حشيش ... وعايز أقولك أن ديننا الأسلامي دين وسط لا أسراف ولا تقتير ، أفرح وأتبسط أنت والعروسة والأهل والأحباب فى حدود المعقول ومن غير ماتغضبوا ربنا .

وأنا مش هاتكسف عن نفسي لما أقولك ان زوجتى هي اللى أقترحت من نفسها بدون إيعاز مني لما جينا نعمل الخطوبة وبعد كده كتب الكتاب فى الحالتين هي اللى صممت على تأجير فستان الفرح مع ان الحمد لله الواحد عنده مقدره يجيب 20 فستان وانا فعلاً قدرت لها هذا الموقف العقلاني ده وعوضتها عنه فى حاجات انفع ، لكن لازم الواحد يفكر تفكير عملي ويشوف الحاجات اللى تنفعه هو مش تنفع الناس ،

ومع احترامي لأراء الجميع أنا بأشابه موقف البذخ والمنظره اللى بتحصل فى حفلاتنا زى بالظبط المرأة اللى بتتعطر وتضع المكياج وتلبس ملابس مثيرة وتخرج للشارع ... فهي ماعملتش كده إرضاءً لنفسها ولكن عملته للمنظرة امام الآخرين وده غلط وحرام طبعاً .

وزى مالناس الخبرة قالولك الناس يا حشيش يابنى مابيعجبهمش العجب ولو عملت فرحك فى جزر الكناري وعزمتهم ببلاش كانوا برضوا هايقولولك ليه ماعملتوش فى جزر هاييتى حيث أجواء التروبيكال والحاجات الحلوة اللى هناك .

وأخيراً أقولك اتجوز يا حشيش يابنى وتعالى أقف معانا فى الطابور وأنت عارف الباقي.

[Set_Amina]

أولا ألف مبروك ياحشيش وربنا يجعله جواز اخضر ومرعرع عليك :D

لأ فعلاً انا مُت على نفسي من الضحك يا أمونه يا عسل إنتِ ، لا الغرابة أمين تغيب تغيب وتيجي تقوم ضربة مداخلة فى الجون ... بس أنا أول مره أسمع دعوه زى دى ، بس تصدقى يا أمينة الدعوه فيها ماتشنج ماحصلش ... الف مبروك يا " حشيش " جواز " أخضر " " مرعرع "

الحقيقة ياسي السيد اسم حشيش دخل مخي جدا ولذلك لقيتني تلقائيا المباركة اتكتبت بالشكل المزهزه ده :D مع ان رأيي مكانش له لون ولا طعم أكيد لأنه كان رأي متعصب ورافضة ومصرة اصرارا الا يكون هناك فرح. شفت بقى لما أمينة بتربس بتعمل إيه؟ :D

[MuslimaEgyptian]

السلام عليكم،

الموضوع به الكثير من العبر لعلها تنفعنا جميعا ان شاء الله وتعيننا على التخلص من العادات الباليه التى أصابت موضوع الجواز فى مجتمعنا وجعل منه عادات وتقاليد تتعارض مع ديننا الجميل...والآن الى بعض الردود

الأخت مسلمه 

شكراً على التهنئة وجزاكى الله خيراً فقد اعادت كلماتك بعض الأمل إلى قلبى أن يتبقى شئ من تحويشة العمر بعد إتمام الزواج...السوليتير الذى اشتريته هو عبارة عن خاتم عريض من الذهب الأبيض وبه فص من الماس(فص واحد يتيم) يسمى فى لغة العرايس محبس...يعنى مش كتير 4600 جنيه دبل وخاتم...ربنا يطمنك 

الاخ حشيش

لا شكر على واجب يا أخى...لكن أعفينى من تقديرى للمثال الذى ذكرته وما تراه صائبا أنت وشريكه حياتك بالنسبه لهذا الموضوع خاص بكما ويتعلق بأسس ستبنون عليها حياتكم فيما بعد ان شاء الله ..أقصد ان أقول ان أكيد إختيارك كان مبنى على مبادئ أساسيه وجدت خطيبتك تشاركك فيه، فإذن، بإذن الله لن يكون هناك خلاف على شئ تراه مبالغ فيه او تعارض مع قيمنا الاسلاميه حينما تناقشه معها...

وفقك الله ان شاء الله

و بعدين انا مش فاهم ايه حكاية .. انتم هتاخدم بنات الناس ببلاش دي يعني .......... هو لا سمح الله الراجل بيتجوز الست علشان يستعبدها .. و لا الجواز بيعني ان الست بتضحي تضحية كبيرة من اجل الراجل و لا ايه بالظبط ............

----------

الأخ ابو حلاوه،

لأ طبعا لم أقصد ذلك إطلاقا...فكانت مزحه عابره لكى أقول للأخ حشيش ان الزواج مكلف بطبيعته...وهذا ليس إستعباد للمرأه لا سمح الله، ولكنه شئ شرعه الله للرجل فى التكفل بزوجته ...والفرق هنا هو "نوع" التكلفه ..وشكلنا متفقون جميعاان بقى فيه تبذير ومبالغات ماليه فى الزواج لا يرضى دين ولا منطق بالمره..

انا و اعتقد ان هناك الكثيرين مثلي لما اردت ان اتزوج لم افكر في ان اشتري و احدة بشبكة و مهر و لكن اردت ان اشارك انسانة حياتي و مستقبلي ......... و اعتقد ان دول اهم من الفلوس كتييييييييير قوي

أتفق معك فى مغزى ما تريد ان تقوله، ولكن لى تعقيب هو ان المهر يا أخى ذكر بالقرآن ولا يعنى ذلك إطلاقا شراء المرأه..والشبكه هديه من الرجل خاصه به ولكن موضوع إنها يجب ان تكون سوليتير وخلافه ده إبتكرها المجتمع....غير ذلك، ارانا متفقون

---------

وأخيرا، جزاك الله اخى Proud Muslim

فى ردك عن موضوع المرأه السيكندهاند، فأرددت لى جزء من المهانه التى استشعرتها بسبب هذا المثال...

[حشيش]

شكر واجب

أتوجه بالشكر لجميع الأخوة والأخوات الذين هنئونى بالخطوبة سواءً بالبرق أو بالحضور واخص بالشكر السيد رئيس الجمهورية ورئيسى مجلسى الشعب والشورى والسادة الوزراء والسيدة الفاضلة فيفى عبده والعاقبة عندكم فى المسرات.

رهين المحبسين

أبو حشيش المعرى

:shock: :shock: :shock: