بيان الحكومة

[ابو حلاوه]

كل سنة و انتم طيبين ... بيان الحكومة إتسمع امام مجلس الشعب ...

أنا عندي كام سؤال و الكسبان هنديله تاج الجزيرة .....

الحكومة هتوفر كام الف وظيفة السنة دي؟

الحكومة هتبني كام الف شقة لمحدودي الدخل؟

الحكومة هترفع نسبة النمو لكام في المية؟

الحكومة هتدعم الصحة و التعليم بكام مليار؟

قارن بين مشروع توشكي و مشروع القرية المنتجة اللي الحكومة هتصرف عليه 25 مليار جنية...؟

ما هو الفرق بين بيان الحكومة هذا العام و الاعوام السابقة؟........

..... مسموح الغش من بيانات الحكومة السابقة.............

نتيجة المسابقة العام القادم مع بيان الحكومة القادم .... و ربنا يديني طولة العمر علشان اكتب في الموضوع ده السنة اللي جاية و السنة اللي بعدها و اللي بعدها

http://weekly.ahram.org.eg/2003/619/eg4.htm

[مصرى]

الكسبان هنديله تاج الجزيرة .....

السسسسسلطانيييييية :D

شوف يا أبوحلاوة .. لا هذا العام ولا الأعوام السابقة .. حكوماتنا بتقدم بيان لمجلس الشعب ..

كل الموضوع مجرد روتين لتحقيق بند فى الدستور .. يطلع رئيس الحكومة ويقرأ قائمة بالانجازات .. ولكن بيان بالمنى المفهوم يعنى يطلع الشعب فى صورة نوابه على كشف حساب السنة السابقة وخطة عمله فى السنة اللاحقة .. فهذا ما لم يحظ به الشعب من قبل .

لكن هذا العام بيان عاطف عبيد "النخع" كان عالى حبتين ، ربما لخلو منصب "أبولمعة" حتى إنه ضم 9 ملايين تلميذ ضمن انجازات الحكومة .. تقولس مثلا خلفهم يعنى .. وضاف كمان للانجازات البترول الموجود فى باطن الأرض وقدره بمبلغ 206 مليار دولار .. واللى موش مصدق يتفضل يوزن بره .. :D

وكل بيان وإنت طيب .. لما يبقى فيه شعب واعى الأول يبقى فيه مجلس شعب .. ولما يبقى فيه مجلس شعب يبقى فيه بيان للحكومة بحق وحقيق ..

ونقعد نتكلم عن الوعى سنة .. وبعدين ساعة الجد نقول اللى تعرفه أحسن من اللى ما تعرفوش .. ثم نجد من يخاف على البسطاء "ياحرام !!" من الاعلام الحر !!

وبرضه .. كل سنة وانت طيب :?

[الطفشان]

الاخ مصري

قعدت اضحك لغاية ما دمعت عيناي على التلاميذ اللي خلفهم البيه عاطف، و البترول اللي حنوزنه بره

و بعدين تذكرت الابيات اللي بتقول

و كم ذا بمصر من المضحكات *** و لكنه ضحك كالبكا

[مصرى]

و كم ذا بمصر من المضحكات *** و لكنه ضحك كالبكا

لازم نضحك يا عمنا .. والا نطلب من عمنا اخناتون وأخونا داروين يحجزولنا معاهم فى المستشفى :(

[achnaton]

كانوا زمان يركبوا الكذاب الحمار بالمقلوب ..!

ويلفوا بيه الشوارع والحوارى .. ويحدفوه بالطوب ..!

الوقت بيطلع " مارديان " باللفت آخر دور

يشرب ويسكر .. وإن شالله تغرق ويلعن ابو المنكوب ..؟!

------------------

الناس خلاص .. نسيوا الضحك والإبتسامة .؟؟

والفقر سيطر .. والكساد والفلس حفر على جبينا علامة !؟؟

ما تقولوا لغراب الخراب يرحل ..

دى جهنم الحمرا مستنياه يوم الحساب .. يوم القيامة !!

-----------------

الناس خلاص .. نسيو الضحك يا مصرى ؟!!!

وموكب النفاق ..سد الأفق على مدى بصرى ..!!

وغراب الخراب وأعوانه من لا قى حد يهشه

دا قاعد يمص فى دمنا صبح وضهر وعصر !؟؟

------------------

والوقت بنبكى الضمير .. بعد الفساد ما ســـاد !؟

ودولة العز والحضارة صارت طابونه لعبيد ملك الكساد ؟؟؟

يكدب علينا ليل نهار .. وقبل الأكل وبعده

فى كل أيام السنة .. حتى فى الأعياد ؟؟!!

-------------------------

وكفاية كدة النهاردة نفسى انقطع منهم لله

اخناتون المنيا :( :( :( :( :( :( :( :( :( :( :(

[elbana]

لما شفت بيان الحكومة ، والجرأة اللي بيتكلم بيها الباشمهندس عاطف عن إنجازات الحكومة الفاشلة ، افتكرت رؤساء وزارء اليابان ، باقول اليابااااااااااان ، لما يقفوا وركبهم بتخبط في بعض علشان يعرضوا قدام الناس تقرير عن الموازنة ، وممكن ينتهي الأمر بسحب الثقة فيه أو استقالته نتيجة إن الموازنة فيها عجز 15 ين مثلاً ، أما عندنا فرئيس الوزراء وقف يخطب ويزعق وصوته علو كده ، ويلقح في كلام ، واللي يسمعه يفتكر إن الراجل راجع من انتصارات عظيمة ، ولا بيعرض تقرير عن أفضل اقتصاد في العالم .

صحيح يا جدعان اللي اختشوا ماتوا .

[مصرى]

المهم إن كله بتوجيهههههاته :D

على الدرب سائرون .. وللعهد راعون :twisted:

"عاطف الثانى"

:D