أيه حكاية شريف أشرف؟

[أبو حميد]

شريف أشرف القضية الساخنة الجديدة بين الأهلي والزمالك ولن أقول الأخيرة طبعا لأنهم مش هاينتهوا أبدا.

اللي أنا قريته عن الموضوع يتلخص في الأتي:

شريف أشرف راح الزمالك

الأهلي سجل شريف أشرف

شريف أشرف بيطعن في استمارة تسجيله وبيتهم الأهلي بالتزوير

الأهلي يؤكد صحة الإستمارة وعدلي القيعي يؤكد أن اللاعب وقع أمامه

الأهلي اكتشف تزويرا في إجراءات قيد اللاعب

الأهلي يعلن أنه لن يمضي قدما في محاولاته ابقاء اللاعب شريف أشرف بين صفوفه

الأهلي يطلب تحويل الأوراق للنيابة

هو في أيه؟ شريف أشرف ضحك على الأهلي ولا الأهلي بيضرب شهادات ولا اللي زوروا قلة مندسة في صفوف إدارة الأهلي.

ياريت حد يفهمنا.

[se_ Elsyed]

طبعاً الأقلام الزملكاوية الحاقدة مش على الغير بس لأ ده بيحقدوا على أنفسهم كمان .. قالوا إن الأهلي مزور توقيع الولد وماليين الدنيا مواضيع في هذا السياق ؟

طب هل يُعقل يا جماعة المجرم اللي مزور هو اللي يطلب تحويل الموضوع للنيابة عشان تفصل فيه ؟

والاهلي يزور ليه ما الولد بقى له 6 سنين بيلعب عنده في الناشئين وبالرغم من إنه هداف إلا إني شفت له كذا ماتش مع الأهلي أو مع فرق الناشئين اللي كسفينا وطوب الأرض بياكل على قفاهم عيش وشفته عادي جداً

والولد طلع في التليفزيون وبيقول إن إسمه الرابع كان خطأ في الإستمارات .. طب ليه ما يكونش هو تعمد يكتبه غلط ولا هو منزه عن الخطأ ؟

وبعدين مش ممكن حد فينا وهو بيوقع ورق يقوم مزور توقيعه او يكتب إسمه ناقص ... ولا ده مش ممكن يحصل ؟

ولو تلاحظ يابو حميد أن أي لعيب يحصل له حاجه ولو إتصاب في الملعب حتى تلاقي الزمالك والإسماعيلي يقولك السبب عدلي القيعي والاهلي بتاع المباديء .. ومع ذلك لم نسمع الرجل في مره رد عليهم .. او حتى لما بيقولوا إن حسن حمدي عليه قضايا وبيجهز شنطه عشان يتسجن - الكلام ده بقى له سنين طويلة وكإنه بيجهز مصنع شنط - ومع ذلك الأهلي ماضي في طريقه ولا يلتفت إلى مثل هؤلاء .. وعشان كده إدارته ناجحه ومستقرة وعارفه هي بتعمل إيه ولا تتوقف على لاعب ليس له أي إنجازات زي شريف أشرف أو غيره .

بالمناسبة حتى قصة بشر التابعي اللي الزمالك بيعتبرها نصر مبين وإنه قدر يخطفه من الأهلي .. بالرغم من إنهم عارفين إنهم خدوا أكبر قفا فيه وإن اللاعب هو اللي تلاعب بهم وخد اللي هو عاوزه بإسلوب ملتوي ...

الموضوع يتلخص في إن جميع مجلس إدارة الزمالك بيجروا ورا اللعيب من فترة وسافروا له كذا مره تركيا وهو بيتدلع وبيتقل عليهم وفاكر نفسه مالديني وهو سبب بلاوي المنتخب في الفترة الأخيرة لما كان بينزل يلعب وحتى في مباراة الإسماعيلي غنتو بنفسكم تحكموا على مستواه وعلى غروره الفارغ ... المهم أخيراً إتفقوا وجه مصر لقاهم عايزين يديلوا فلوسه بالتنقيط .. فرفض .. ودخلوا معاه في مفاوضات تاني ... وعلى طريقة الدمايطة الشاطرين .. اللعيب فكر وطلعت في دماغه يروح للأهلي لإستخدام ذلك كورقة ضغط على الزمالك .. والزمالك بلع الطعم

نلاحظ حاجه مهمة الزملكاوية مش واخدين بالهم منها ... إن الأهلي والزمالك لما يعوزوا يتفاوضوا مع لاعب بيبقى من رابع المستحيلات يقابلوه في مقر النادي على أساس إن اللي رايح واللي جاي هايشوفه والجو كمان ما بيبقاش جو كويس للإجتماعات ...

فلقينا إن اللعيب هو اللي راح برجله لمقر النادي الأهلي وطلب مقابلة عدلي القيعي اللي مدالوش وش وما كلموش في أي حاجه وكل اللي طلبه منه هو إثبات إنه ما وقعش للزمالك ... هوووب إمسك يا جدع اللعيب سرب الخبر - أنا كنت هناك في مصر وعرفت الموضوع بالتفصيل - قام مجلس الإدارة متحرك وباعت خالد الغندور عصفوره السلام وقالوا تعالى يا بيشو وهانديك اللي إنت عايزه ... وعشان هو دمياطي زي م قلنا وذكي .. فكان عامل الفيلم ده يوم مباراة في الدوري للزمالك .... وبعد ما راضوه نزلوه الملعب في تلك الليلة قبل المباراة وفضل يبوس في فالنة الزمالك ويلف الملعب في شو رخيص زي شو الإستربتيز كده ... والزملكاوية فرحانين ومش واخدين بالهم إنه لزقهم على ....

لإن إزاي إنت تأمن للعيب لسه كان الصبح في مقر النادي المنافس بيعرض نفسه زي لا مؤخذه الخدامة الفلبينية اللي بتعدي عالبيوت .. إزاي تجري وراه وترضخ لمطالبه وتفتكر نفسك إنتصرت ؟

قصة تاني على السريع والحمد لله الكلام موثق بتسجيلات تليفزيونية شاهدها الملايين ..

اللاعب شيكابالا ...

أولاً دعونا نُقر بإنه من امهر وأحرف لعيبة الكرة في مصر وإنه لعيب تقيل ... لا جدال في ذلك

ثانياً : اللاعب ده تمرد على ناديه اللي هو لا مؤخذه الزمالك وهرب من النادي وسافر اليونان من غير ناديه ما ياخد من وراه ابيض او أسود ... وبعد ما فشل في اليونان حب يرجع مصر ...

فكلاعب حر الأهلي فاوضه وخلاص وافق وكان على وشك إنه يوقع ... وطلع على التليفزيون في برنامج الكرة مع دريم في تسجيل موثق وقال بالحرف الواحد إنه هايوقع للنادي الاهلي وإنه لما حب يرجع بيته الأساسي اللي هو نادي الزمالك .. نصحه صديقه المقرب .... مين بقى يا حلوين يا زملكاويين ؟

جمال حمزه .. وقاله إوعى تيجي الزمالك وأحسن لك تروح الاهلي .. قال كده بعضمه لسانه

ونفاجأ بعدها بكام يوم إن الزمالك اغراه بالفلوس والولد قبل .. ومبروك عالزمالك

يبقى بعد ده كله برضوا واحد كان بايعك وهو اللي راح برجله للمنافس تقوم تأمن له وتأمن لواحد لعيب عندك بيحرض الأخرين لعدم الإنضمام للنادي ؟

تصبحو على خير

[شينكاوي]

يا عم سي سي

حرام عليك يا راجل طيب قصص الف ليلة وليلة اللي قولتها 100% صح .... بس الراجل الطيب بيسألك عن شريف اشرف هههههه يا راجل تاخدوا دور حكايات

وما رديتش علي سؤاله.... هههههه ما هقيتها منك يا ابو السيد ...... يا راجل سيبت ايه لمحمد الزرقاني وابراهيم حجازي

ماشي يا ابو جميد القصة كالتالي اللاعب ده هداف الناشئين ولاعب كان بالنادي الاهلي اوكي .... عقده مع الاهلي عقد هواة العقد خلص الراجل كان لازم الاهلي يفاوضه

الاهلي فاوضه وقاله 19000 في السنة يا ما فيش الراجل هو ولاعب تاني ظبطوا عقد عمل في بلجيكا ... قصدي عقد احتراف .. عمنا ضياء السيد استندل وبلغ سفارة

بلجيكا ان ده له عقد مع الاهلي فالسفارة لغت التاشيرة مع وعد بحث مشكلة اللاعبين مع الاهلي لان عندهم دعوة من نادي بلجيكي...

الزمالك بيتابع الموقف من غير الاحمر ما ياخد باله ... اللعب اختفي واكتشفوا في الاخر انه موقع للزمالك... الاهلي سكت كام يوم وبعدين سمعنا ان اللاعب موقع علي استمارة للنادي الاهلي والاهلي سجل اللاعب في منطقة القاهرة ... الزمالك قال للاعب ما تدربش مع الفريق ومش عاوزين يظهروا في مشكلة مع الاهلي يعني عاوزين اللعب تبقي مشكلته مع الاهلي اللاعب طعن بالتزوير واشتكي للنيابة طبعا بتحريض من الزمالك طلع ضياء السيد وحلف 100 طلاق ان اللاعب موقع امامه وبعدين اكتشفوا

ان اسم اللاعب مش قال ايه الرباعي متسجل وان الرباعي بتاعه غلط فاللاعب مش هو يعني ههههه

طبعا الكلام ده كله من موقع جماهير النادي الاهلي موقع مين اسمعها تاني ايوة اييوة جماهير النادي الاهلي

طبعاً الأقلام الزملكاوية الحاقدة مش على الغير بس لأ ده بيحقدوا على أنفسهم كمان .. قالوا إن الأهلي مزور توقيع الولد وماليين الدنيا مواضيع في هذا السياق ؟

طب هل يُعقل يا جماعة المجرم اللي مزور هو اللي يطلب تحويل الموضوع للنيابة عشان تفصل فيه ؟

يا عم سي سي اقلام زملكاوية ايه الكلام كله من موقع جماهير النادي الاهلي واللاعب النهاردة بيقولوا سحب الشكوي من النيابة يعني اللاعب اللي قدم الشكوي الاهلي يطالب بتحويل الشكوي ازاي ده طلب من الاتحاد احالة الموضوع او الشق الجنائي من الموضوع للنيابة طلب من الاتحاد .

اوكي الاهلي تراجع عن الشكوي ويعاقب الاداري المسكين انه هو اللي زور مسكين هو يزور ليه وهو ماله بالموضوع ده يا ضياء السيد بامر من عمو دولي القيعي... شغل تقيل يا معلم .

وتاكيدا للموضوع ادي رابط جماهير النادي الاهلي ....

اوكي اخطاء ادارية ههههه ههههه ههههه هههه مش مشكلة يا نادي المبادئ والقيم نعديها المرة دي علشطان خاطر سي سي الكبير

[se_ Elsyed]

أولاً أنا لم أدخل على اي موقع للأهلي أو جماهيره من شهور طويلة ..

والكلام اللي انا كاتبه ده جاء على لسان خالد الغندور مقدم برنامج " الرياضة اليوم " وهو اللي قال إن حسن حمدي رئيس نادي الأهلي هو من طلب تحويل الموضوع إلى النيابة .... هاتصدق ولا كالعادة يا شنكاوي هاتاخد الكلام من جانب واحد .

وحتى إحسبها إنت مع نفسك .. هل تعتقد إن فريق بحجم النادي الاهلي يرتكب هذا الخطأ الساذج ويزور عيني عينك توقيع بني ادم مازال على قيد الحياة ؟

شوية مخ أو سانشدوتش مخ يا شنكو يا خويا الله يرضى عليك

[شينكاوي]

يا سي سي يا ابوي هو الرابط مش واضح ولا ايه دا رابط الاهلي يا عم الحاج هو شينكاوي كتب حاجة من عنده دا كله سرد من الرابط.... نروح منكم فين يا اهلوية ... يا راجل بص دا الاعتراف بالحق فضيله... هههه ايوة فضيله

وبالنسبة لقناة دريم اسمع دي ....

قبل ما يبدأ الدوري بقدرة قادر النايل سات اختفي طيب هنتابع الدوري منين .. انصلنا علي فني هندي يوم الاحد بالليل جاه بحدود الساعة 8 طلع فوق البيت وطبعا غير الوصلة وعملي فيها ابو العريف المهم قعد فوق للساعة 11 والنايل سات ما جاش

طلعتلو حير يا بيسم قاللي شوف بابا انا الحين واجد جوعان وما يشوف عدل انا باجر ييجي يصلح ان شاء الله

بعد الدوام الاول اتصلت بيه جاء بحدود الساعة 2 الضهر ايوا الضهر المهم للساعة 4 ومش عارف يجيب النايل سات وفي الاخر قاللي انا ما يعرف ليش ما ييجي انا ما يقدر جيب وكان افتتاح الدوري بالليل طبعا كان نفسي ارميه من فوق لكن ما علينا الشمس خلصتلي حقي وشفت المباراة ع القهوة ومن يومها والنايل ما بيشتغلش فبالتالي انا غير متابع للطلة البهية بتاعة سيدي خالد الغندور....

ده حكيتهولك علشان اوضحلك ان كل مصادري في موضوع شريف اشرف من مواقع الاهلي الرسمية

من موقع النادي الاهلي يا عم سي سي يا كبير

[otaka]

هو جدبد على الاهلى التزوير يا جماعه و لا ايه

المفروض تشكروا شريف اشرف انه سحب البلاغ

قال ايه و الحاج ضياء السيد يقولك ماضى قدامى

حزب وطنى على ما تفرج

[otaka]

اغلق مجلس ادارة نادي الزمالك ملف مهاجم منتخب الشباب شريف اشرف تماما بعد المكالمة التليفونية التي جرت بين حسن حمدي رئيس النادي الأهلي وممدوح عباس رئيس نادي الزمالك والتي أكد خلالها حمدي انسحاب الأهلي من الصفقة ومحاسبة المسئول عن الخطأ في قيد اللاعب‏..‏ وأكد ممدوح عباس ان اللاعب تنازل عن شكواه ضد ناديه السابق الاهلي في واقعة تزوير استمارة قيده وسوف ينخرط في التدريبات مع الزمالك من اليوم‏,‏ وسيتم قيده رسميا بصفوف الناشئين أول سبتمبر المقبل‏.‏

وأضاف رئيس الزمالك ان اغلاق الملف من جانب الزمالك لايعني ان اتحاد الكرة يتجاهل اجراءات محاسبته للمسئولين بمنطقة القاهرة المتضامنين في الواقعة خاصة ان المنطقة تتبع اتحاد الكرة‏.‏

ومن ناحية أخري أكد عمرو الجنايني عضو المجلس ان منطقة القاهرة قيدت اللاعب في غير الموعد المحدد وأبدي الجنايني اسفه من التصريحات التي خرجت اثناء الأزمة من معسكر الأهلي تعلن ان المسئولين بالزمالك يجهلون القوانين واللوائح في طلبهم لقيد شريف اشرف‏,‏

[شينكاوي]

صباحو فل يا اوت يا اخوي ....

وبعدين يا اوت ما تزعلشي ممنا سي السيد

الزمالك هو اللي زور توقيع اللاعب وظبط منطقة القاهرة علشان يسجلوا اللاعب

اسكت مش شوبير وزاهر وحسني ومحمد علي طلعوا زملكاوية

يا رب .... ما حدش يزعل مننا ويقولك الزملكاوية

[otaka]

بمناسبه السرقه مش شعار المئويه بتاع الاهلى طلع مسروق من شعار المئويه بتاع الاتحاد الالمانى لكره القدم

طبعا عمنا ابراهيم المعلم المحترم يمكن الوحيد فى عصابه حسونه و بيبو هيطلع يقلك ان جوزيه شاف الشعار فى الحلم و احلام سعاده اوامر

[otaka]

الأهلي أشرف أم شريف أشرف؟

الثلاثاء، 21 أغسطس 2007 - 13:30

www.filgoal.com

ذكرتني قضية الأهلي وعقد شريف أشرف بالمشهد الكوميدي لعادل إمام وسعيد صالح في فيلم سلام يا صاحبي عندما قال له "امضي يا اشول" ليتمكنا من النصب على صاحب سيارة ثم التشكيك في التوقيع.

فما أعلنه الأهلي يوم الإثنين بانسحابه من قضية الناشيء شريف أشرف لاكتشافه بعدم صحة إجراءات توقيعه على استمارات القيد في النادي لها أكثر من مدلول وكلهم أسوأ من بعض.

الحالة الأولى أن يكون الأهلي قد تورط في قضية تزوير بالفعل وقد يحمل القضية لأحد الإداريين الصغار لمداراة القضية حتى لا تتسع أكثر من ذلك بعدما ضخمها الأهلي بالفعل.

فالأهلي طالب بتحويل ملف قضية شريف أشرف إلى النيابة بعد اتهام اللاعب بأن استمارات توقيعه مزورة قبل أن يتأكد من صحة مستنداته.

وفي حال تورط الأهلي في تلك القضية، أرجو من مسئولي القلعة الحمراء عدم تشنيف أذاننا بمقولة نادي القيم والمبادئ حتى نتناسى تلك السقطة.

أما الحالة الثانية أن يكون اللاعب قد وقع باسم آخر ورقم بطاقة أخر ورغم إنه أمر مستبعد حدوثه لأنه بلا مبرر فأي لاعب يملك حق رفض التوقيع إلا أنه في هذه الحالة سيكون موقف الأهلي مضحكا وقد تعرض لعملية نصب "متخرش الميه".

وفي حال تورط الأهلي في تلك القضية، أرجو من مسئولي القلعة الحمراء عدم تشنيف أذاننا بمقولة نادي القيم والمبادئ حتى نتناسى تلك السقطة.

وفي هذه الحالة تكون إدارة الاهلي قد تلقت ضربة إدارية قاصمة وأثبتت وجود خللا كبيرا في قدراتها التنظيمية التي يصفها بعضهم بأنها خارقة.

ولكن القضية بها تفاصيل عديدة وكان عدلي القيعي مدير إدارة التسويق بالأهلي قد صرح في برنامج الدرجة الثالثة على التليفزيون المصري أن اللاعب قد وقع على الاستمارات أمامه شخصيا مما يزيد تعقيد القضية.

وكذلك ضياء السيد مدرب فريق الناشئين بعدما استدعته لجنة الكرة بالأهلي لمعرفة صحة تفاصيل توقيع اللاعب للنادي والذي أكد بدوره أن اللاعب وقع أمامه أيضا!

لا أعتقد أن صرح كبير كالأهلي يدار بهذه السذاجة ولكن يبدو أن الزمام انفلت من الإدارة في هذه القضية تحديدا رغم عدم أهميتها في البداية.

اللاعب لم يقدم ما يستحق عليه تمسك الأهلي به بالباطل، ولكن يبدو أن صراعات الأهلي والزمالك ستدفع مسئولي الناديين للتفكير بأشكال مختلفة.

[شينكاوي]

بما ان اليوم يوم المنقول اقرا المقال ده

منقووووووووووووووووووووووووووووووووووووووووووووووووووول

-

►حمل المتصفح الرائع FireFox أسرع المتصفحات لمواقع الانترنت◄

-

شعر و لا دقن ... ؟

_

20/08/2007

Dr.Risha

سألنى عم ( عبده) الحلاق فجأة: ـ إنت أهلاوى واللا زملكاوى يا باشا؟! لم يكن بيننا أى تجارب حوارية كروية على الرغم من السنوات الطويلة التى ربطت بين رأسى ومقصه، لذا فلم أشأ إثارة غضبه أو استفزازه لو أجبت بأى إجابة عكس ما يتمنى (لاحظ أن رقبتى فى يده) فقلت متهرباً من السؤال:

ـ يا سيدى كلنا مصريين! سألنى مرَّة أخرى ويبدو أنه أعد الحوار جيداً: ـ شوفت منتخب العراق عمل إيه؟! أومأت برأسى إيجاباً وأنا أتابع ملامحه فى المرآة فثبِّت رأسى من الجانبين بقوة كاد معها المقص أن يخترق أذنى وهو يهتف:

ـ مش عيب لما دولة تحت الاحتلال تفوز بكاس آسيا، وإحنا ولا حاجة؟! سألته بدهشة: ـ ولا حاجة إزاى؟ إنت ناسى إننا أبطال إفريقيا واللا إيه؟! أمسك عدة شعيرات من رأسى بأصابعه، وقرب منها المقص وهو يقول:

ـ تخيل شعرك دة كاس أفريقيا، وإنت جاى بمزاجك وإرادتك علشان أقصه لك.. إيه يقدر يمنعنى؟! وتبع قوله بأن جز الشعر بالفعل، فانتفضت هاتفاً:

ـ بالراحة يا عم.. ثم إيه وجه الشبه يعنى أنا مش فاهم؟! أطلق ضحكة مدوية وهو يقول:

ـ يا سعادة البيه، بطولة أفريقيا كان لازم نكسبها، دى على أرضنا، وكل شىء كان فى صالحنا، أرض، تنظيم، قرعة، حكام، جماهير.. يعنى البطولة دى جاية وبتقول خدونى! فاهم يعنى إيه جاية لك جاهزة مجهزة مستعدة ومستسلمة وبتقول خدونى؟ زيها ـ لا مؤاخذة ـ زى…………………… خوفاً من تشبيهاته البذيئة، قاطعته بسرعة:

ـ ياما بلاد نظمت البطولة وخسرتها، مش شرط إن كل بلد تنظم البطولة تفوز بيها وإلا كانوا إدوها الكاس من غير لعب ووجع قلب.. عموماً أنا بحترم آرائك الكروية جداً يا عم (عبده) وشايف إنك لو مسكت اتحاد الكورة هتغير حاجات كتيرة قوى فى البلد! يبدو أن فكرة مسكه لاتحاد الكرة قد راقت له بشدة، فأطلق عينين سارحتين للحظات فى سقف المحل، ثم ردهما ليثبتهما فى عينىَّ ليخيل لى للحظات أن عينيه قد احولتا إلا أن ذلك كان بسبب انكسار الضوء على المرآة التى يرى كلٌ منا الآخر من خلالها، ثم قال بصوت متهدج:

ـ والله أخلى مصر دى أجدع من البرازيل! شدنى الحوار، وفكرت أن أستدرجه للتعرف على أفكاره المستقبلية، طمعاً فى أن ألتقط فكرة أو فكرتان تصلحان للتنفيذ بالفعل، فأحاول نشرهما لمساعدة تلك المسكينة المسماة بالكرة المصرية، وأجرى وأجر الرجل الطيب على الله، فسألته:

ـ هتعمل إيه يعنى؟! قال بسرعة وحماس:

ـ أول قرار، هأمر بقفل نادى الزمالك دة خالص! استدار نصفى العلوى بأكمله لأكثر من 150 درجة حتى تواجهنا تقريباً، فتراجع هو بسبب المفاجأة وصاح مرتعشاً:

ـ إيه؟ حصل إيه؟! تأملت وجهه للحظات، ثم انتقلت عيناى على الرغم من إرادتى لتلقى نظرة على المقص فى يده، قبل أن أعيدهما جاهداً للتركيز فى عينيه قائلاً بصرامة:

ـ إيه اللى إنت بتقوله دة؟! ابتسامة ماكرة أطلت من عينيه قبل أن تجتاح وجهه فتشعرنى بالألم الشديد لوقوعى فى الفخ بمثل هذه البساطة، ويزيد حسرتى على ذكائى وهو يقول:

ـ تبقى زملكاوى يا جميل! هل تعرف كيف تنفجر ضاحكاً وأنت فى قمة الغيظ؟ لا أعرف هل تعرف شىء مثل هذا أم لا، المهم أننى انفجرت ضاحكاً وأنا فى قمة غيظى، ولو لم يكن هناك شىء اسمه كدة فى الدنيا فيمكنك اعتبارى صاحب حق الاختراع فى هذا الشىء، وأكمل هو بعد أن عبر ورفع العلم كمان:

ـ أصل الحاجات دى مستحيل تستخبى، هتقول لى كلنا مصريين، كلنا ولاد تسعة، بس فى الآخر لازم هتبان، إنت واضح ولا مؤاخذة إن خبراتك الكروية ضعيفة حبتين ودة مش عيب، إنت لسة صغير فى السن، وبكرة هتشوف كتير! لا أعرف أيضاً كيف يحمر الوجه خجلاً أثناء نوبة ضحك هيستيرية تخضعك تحت سيطرتها بلا رحمة، وتحاول الكلام فلا تجد تعليقاً مناسباً فى ظل كل هذه التناقضات، فيعاجلك المنتصر متباهياً:

ـ عموماً أنصحك تقرا كتير، أنا لما كنت فى سنك كنت لازم كل يوم أقرا صفحة الرياضة فى الأهرام والأخبار والجمهورية والمسا.. إنتوا جيل محظوظين عندكم ميت جورنان وميت مجلة رياضية وقنوات وبرامج، ومع ذلك تلاقى الواحد فيكم تور الله فى برسيمه! تور الله فى برسيمه؟! رفعت حاجبى الأيمن راسماً على وجهى الغضب الشديد كبداية خطة سريعة رسمتها لإيقافه عند حده على الرغم من رغبتى الشديدة فى الوصول إلى "آخره" ومعرفة ماذا يضمر فى داخله من فكر كروى، إلا أننى بمجرد أن لمحت فى المرآة حاجبى المرفوع بصرامة متناهية فى مشهد يتناقض تماماً مع فوطة الحلاقة الملفوفة حول رقبتى وصدرى بألوانها المتداخلة والرسومات التى تغمرها، وتذكرت للمرة الثانية أن رقبتى فى يد هذا الرجل، خاصةً وأنه لا زال ممسكاً بالمقص فى يده، وعند هذا الحد قام هو بضغط فرملة أفكارى، وقال:

ـ ورغم كدة يا أخى أيامكم مفيهاش بركة، زمان كان الواحد يقعد يتفرج ع الماتش ساعة العصر وفى إيده كوباية الشاى ومعاه جيرانه وولاد حتته، يسمع صوت كابتن (لطيف) أو (على زيوار).. التليفزيون أبيض وأسود، وبيقطعوا الماتش ساعة أذان العصر آه، لكن كان فيه بركة، مش زى دلوقتى تلاقى ساعتين رغى قبل الماتش، وساعتين رغى بعد الماتش، وساعة الماتش تلاقى واحد ماسك ودانك وعمال يرغى زى (أم هانى) قبل النوم، ويصرخ ويتلوى زى اللى عنده بواسير، لحد ما يجيلك سرطان فى دماغك، لأ وإيه، عمك المخرج يسيب الماتش يضرب يقلب وياخد الكاميرا ويطلع فى المدرجات يصور لك فى شوية البنات اللى داهنين وشهم وواقفين يترقصوا بالعلم وقال إيه بيشجعوا.. أنا مش عارف إيه اللى دخل البنات فى الملعب والكورة والغم دة، بقول لك أيام مفيهاش بركة! سألته باهتمام واضح ليدرك أن ما يقوله ليس أى كلام:

ـ مين (أم هانى) دى؟! ربت على صدره بيده الممسكة بالمقص، وهو يلتقط نفساً عميقاً ويطرد الإجابة مع الزفير:

ـ دى الجماعة بتاعتى! ثم أردف وهو يمرر يديه فى شعرى، ويمسك بمجموعة أخرى من الشعر:

ـ زمان، كان الأهلاوى والزملكاوى اخوات وقاعدين مع بعض فى نفس البيت، زيهم زى شوية الشعر دول، متقدرش تفرقهم عن بعض، دلوقتى تلاقى كل واحد مش طايق التانى، الزمالك بيلعب فى أفريقيا تلاقى الاهلاوية شايلين أعلام الصفاقسى ورايحين يشجعوا التوانسة.. الزمالك بيلعب فى البطولة العربية………….. قاطعته قائلاً:

ـ مفيش جنس أهلاوى راح رفع علم الفيصلى أو لبس فانلته! قال بسرعة: ـ أيوا.. لكن فرحوا فيهم لما اتبهدلوا فى إستاد القاهرة من فريق أردنى، إنت صغير ومتعرفش الأردن دى إيه فى دنيا الكورة.. يا ابنى دول بيلعبوا كورة من أسبوع، يقوموا ييجوا يلعبوا بالزمالك هنا فى مصر بالشكل دة؟ دة مش عار على الزمالك وبس.. دة عار على مصر كلها! ثم قرب المقص من مجموعة الشعر التى لا زال يقبض عليها بأصابعه قائلاً: ـ الناس دى تستحق الدبح زى كدة! وقام باقتلاع الخصلة بمقصه الذى لو لم أكن طيب القلب لتمنيت أن أراه ذات يوم راشقاً فى رقبته، وهو يكمل:

ـ كل دة من قلة تقانا فى بعضنا.. بقول لك إنتوا أيامكم مفيهاش بركة وراكبها عفريت، عارف؟ أنا حضرت نهائى كاس أفريقيا بين الإسماعيلى والإنجلبير، وكنا قاعدين أهلاوية جنب إسماعيلاوية وزملكاوية، فلاحين وصعايدة.. كلنا بنشجع الدراويش علشان خاطر مصر… كل دة علشان كنا رجالة ووقفنا وقفة رجالة! نطق المقطع الأخير بنفس الطريقة التى نطق بها الراحل (محمود المليجى) نفس الجملة فى فيلم (الأرض) منذ عشرات السنين، وتخيلت أنه سيسارع بإحضار فأس أو منجل و"يحش" رقبتى فوراً إمعاناً فى الحماس، وبحجة القضاء على شاب معفرت من بتوع اليومين دول اللى منعوا البركة عن الدنيا، وأعاثوا فيها فساداً، ففكرت فى إلقاء أى سؤال كى ينشغل بالكلام بدلاً من أن يتحول إلى الفعل الذى أخشاه، فسألته: ـ طب إنت قولت إن الأهلاوية كانوا بيشجعوا الإسماعيلى علشان مصر، طب إيه رأيك فى اللى بيعمله جماهير الإسماعيلية فى الأهلى سواء راح يلعب عندهم أو هم لعبوا فى القاهرة، أو حتى كانوا بيلعبوا مع فريق تانى ويشتموا الأهلى، أو يتمنوا هزيمته فى أى مباراة ويحتفلوا بيها زى ما عملوا السنة اللى فاتت مثلاً وشجعوا الصفاقسى التونسى وتمنوا إنه ياخد كاس أفريقيا على حساب الأهلى؟! لن أقول لك أننى أثناء إلقاء الكام سطر الماضيين، كان الرجل سارحاً شاخص البصر، وأصابعه تجذب شعرى حتى كادت فروة رأسى أن تستسلم وتنخلع كأى باروكة، وبمجرد أن أنهيت سؤالى، فوجئت بالرجل يمرر المشط على رأسى بالطول كأنه يشق بطيخة ورسم خطاً خيالياً فى شعرى، قائلاً: ـ شوية الشعر دول نعتبرهم الأهلى! ثم رسم خطاً آخر، وأضاف: ـ والشوية دول الزمالك! ورسم خطاً ثالثاً، مكملاً: ـ والشوية دول جماهير الأقاليم، مصرى وإسماعيلى ومحلة واتحاد وكل العالم دى! ثم أبعد جذعه للوراء قليلاً، وتأمل رأسى، وقال: ـ تقدر تستغنى عن أنهى شوية فيهم؟! صرخت مفزوعاً: ـ مقدرش أستغنى عن شعراية واحدة من دماغى، وكفاية اللى إنت شيلته! أطلق ضحكة عصبية وتحدث بطريقة أى مخترع شرير فى الأفلام العتيقة: ـ إنت نفسك قولتها، يعنى الأندية دى كلها بتكمل بعض ومفيش نادى منهم يقدر يعيش من غير التانى، ولا جمهور يقدر يستغنى عن التانى، حتى لو بيكرهه! ثم التقط ماكينة الحلاقة الكهربائية، وضغط زر التشغيل وهو يقربها من رأسى، لأسمع أزيزها المريع، قائلاً:

ـ تخيل لو قصينا كل الشعر دة على الزيرو هيكون شكلك إيه؟! مجرد التخيل جعلنى أهب واقفاً، فضغط على كتفى ودفعنى للجلوس عنوة، وهو يقول:

ـ متخافش.. أنا بقول لك تخيل.. بص يا ابنى، لو إنت لا مؤاخذة شعرك فيه حشرات، هتعمل إيه؟! نظرت له بغيظ وتلاقت أعيننا عبر المرآة فكادت تنكسر من فرط بحلقتى وسمعت صوت أسنانى تتضاغط من الغيظ، وأنا أقول:

ـ ما أنا طول عمرى بحلق عندك، كنت شوفت حاجة فى شعرى قبل كدة؟! حاول تهدئتى فربت على خدىَّ، وهو يقول بسرعة:

ـ لا سمح الله، أنا بس بصور لك مثال.. عاوزك تتخيل إن دماغك دى خريطة مصر زى ما رسمت لك، إنت شعرك فى المنطقة دى بتحب تسيبه طويل شوية، وهنا الشعر قصير، وهنا حتة بدأ الصلع يزحف فيها، وهنا حتة فيها حشرات! صرخت بغضب: ـ تانى؟! لمحت المقص يتحرك فى يديه ويتوجه نحو عنقى، ولمعة سريعة فى عينيه فشعرت أن هذا تهديد خفى لى لكى أتهد وأبطل مقاطعة وأسمعه للآخر، فلجأت للصمت، ليكمل هو:

ـ المنطقة دى فيها حشرات، يبقى يا إما تحلقها خالص يا تنضفها.. اغسلها بشامبو، رش عليها بيرسول، إنشالله حتى مية نار، المهم تنضف قبل ما تعدى بقية الراس لا مؤاخذة! سألته بخبث بينما أرفع حاجبىَّ متظاهراً بالبراءة المتناهية:

ـ ودة علاقته إيه بسؤالى عن جماهير الإسماعيلى؟! هز رأسه يمنة ويسرة، وهو يمط شفتيه وسمعت هذه المرة صوت أسنانه هو، قبل أن يفتح فمه ليتكلم بينما صف أسنانه العلوى ملتصق تماماً بالصف السفلى: ـ إنت باين عليك فهمك على قدك، أهو جيلكم كله كدة، هى البركة انعدمت من شوية؟ والله إنتوا تستاهلوا اللى بيحصل لكم، تستاهلوا (زاهر) و(شوبير) و(مرتضى) و(الكومى).. تستاهلوا تتقطعوا فى الإسماعيلية، والإسماعيلاوية يستاهلوا يتغلبوا من طوب الأرض ويتكتب عليهم النكد والغلب طول عمرهم.. والزملكاوية يفضلوا يحلموا بالفوقان والضرب دايماً يجيلهم من جواهم مش من براهم، والمنتخب يفضل مهزوز وغرقان علشان الجيل اللى بتحطوه فى شعركم بيوقف الشعر ويخليه متفرق مش سايح على بعضه كله نسيج واحد، إنت زهقتنى وطلعت عينى! لم أستطع منع نفسى على الرغم من خوفى الدائم من المقص فى يده فقلت:

ـ لكن الجيل بيثبت الشعر يا عم (عبده) وإنت عارف إن الثبات ضرورى ومطلوب! ثبت عيناه فى عينىَّ وهو يقول:

ـ والله أنا شايف إن ملهاش لزوم، أنا أحلق لك شعرك على الزيرو، وتلبس كاب وتغطى دماغك أحسن، وأهى ضربة بالمرزبة ولا عشرة بالشاكوش! هززت رأسى بوقار شديد وأنا أقول والجدية تصرخ من ملامحى، والصدق يقول لها قومى وأنا أقعد مطرحك:

ـ قصدك نلغى الكورة خالص ونكفى ع الخبر ماجور أحسن؟! أطلق كلمة اعتراضية شعبية قبيحة مكونة من ثلاثة أحرف، ودفع رأسى للأمام حتى كادت تصطدم بالمرآة أمامى، وهو يهتف بغيظ: ـ يعنى فاهم كلامى وعامل نفسك طيب قوى وإنت مية من تحت تبن! ثم جذب رأسى بقوة للخلف وأصابعه مطبقة على شعرى بصرامة متناهية، لدرجة ذكرتنى بطريقة تعذيب الجواسيس فى الأفلام العربى عندما يتم دفع رؤوسهم فى البانيو ثم جذبها للخلف، وتصورت أنه سيهتف بكلمة «اعترف يا مجرم» ثم يقوم بإطفاء سيجارته فى عينى، إلا أنه لم يفعل ذلك، وإنما صرخ بالجملة الشهيرة: ـ شعر و لا دقن !!!!!

--------------------------------------------------------------------------------

--------------------------------------------------------------------------------

[otaka]

لا شك في أن التحقيق في قضية شريف أشرف سينتهي إلى أن المزور شخص مختل عقليا ويهذي بكلمات غير مفهومة

طبعا لأن الأهلي نادي القيم والمبادىء

[kokowawa1979]

سي السيد كتب :

وهو اللي قال إن حسن حمدي رئيس نادي الأهلي هو من طلب تحويل الموضوع إلى النيابة .... هاتصدق ولا كالعادة يا شنكاوي هاتاخد الكلام من جانب واحد .

وحتى إحسبها إنت مع نفسك .. هل تعتقد إن فريق بحجم النادي الاهلي يرتكب هذا الخطأ الساذج ويزور عيني عينك توقيع بني ادم مازال على قيد الحياة ؟

وحشتنا ياعم سي السيد وبالراحة شوية على الشباب !!!

ياترى وصلك إن حسن حمدي بعد ماعرف إن التوقيع مزور - رجع في كلامه واتصل بعمه ممدوح عباس علشان يطلب من شريف أشرف سحب البلاغ بالتزوير !!!

هو جديد على الأهلي التزوير حتى اسأل ابراهيم سعيد بعد مازوروا توقيعه لما سافر بلجيكا وابوه طعن بتزوير عقده الأهلي باس إيده علشان يوقع عقد جديد ويقفل على الفضايح !!!

الأهلي ياعم سي السيد أكبر نادي بلطجى على مستوى العالم فاللي مايجيش بالسرقة والاغتصاب - ييجى بالتزوير !!!

ماذا تتوقع من نادي على راسه حسن حمدي حرامي الأهرام . !!!!

ويبقى الزمالك هو الزمالك - هو المبادئ الحقيقية والأخلاق :unsure:

أخويا شينكاوي - أديت مهمتك على أكمل وجه بالتعاون مع أخونا الفاضل أوتاكا - ماحدش يحوشني سيبوا لي الأهلوية شوية - أحسن حاسس إن جتتي ريحت ;)