اسأل عن شقة فى التجمع

[se_ Elsyed]

للاسف

فى هذا الوقت مشفتش الموضوع دة خالص

ولما حبيت اخد فكرة عن الاسعار حاليا فى مدينة نصر والمنطقة المحيطة جربت اعمل بحث ..ووجدت هذا الموضوع

بس للاسف الكلام هنا اخرة فى اغسطس اللى فات والله واعلم الاسعار بقيت عاملة ازاى دلوقتى ...

محتجين تدخل كل القوات اللى ليها علاقة او تعرف الاسعار ظروفها اية دلوقتى

والى الزعيم سين سين ..اين انت ....فية ليك هنا سؤال موجه ومباشر من بنت الشاطى ولم يتم الرد علية ....؟؟؟؟؟

فى الانتظار

تحياتى

يا عم بنت الشاطيء هريتني أسأله عن الشقق والأراضي والفلل وما خليتش وفي الأخر حاسس إنها مش محدده أهدافها ... فبازهق انا بصراحة ..

بس عندي نصيحة للي عايز يشتري شُقق .. وخدوها نصيحه زين من أخوكم س س

اللي ميزانيته محدودة وبيدور على شقه ( مش محدودة قوي يعني .. أنا ما بأتعاملش إلا بالربع مليون وإنت طالع ) يبقى يخليه في القديم أو اللي مبني بالفعل .. قديم مش معناه آيل للسقوط ... لكن أقصد شقة مبنية من 10 سنوات وإنت جاي على 2008 ... ودي هاتلاقيها حنينه ... يعني صاحبها هايبقى كسبان فيها والأشيه معدن معاه .. وفي نفس الوقت مستحيل تلاقي ثمنها بنفس ثمن الشقق الجديدة او اللي لسه تحت التشطيب ء ... أي نعم هناك تكلفة فرصة بديلة ... لكنها لن تقارن بالجديد اللي صاحبه مشوي من اسعار مواد البناء العالية وبالتالي عايز يدبح اللي جاي يشتري ... وبالتالي عليك وعلى الإعلانات اللي في جريدة زي الوسيط أو موقعها الإلكتروني

wwwe.ewaseet.com

وكمان عليك وعلى مكاتب السماسرة اللي بيبقوا عارفين الكُفت وممكن لو غمزته بباكو زيادة .. يقوم متلحلح وجايب لك حاجه من فوق القفص .. والحاجات دي بيبقوا شايلينها للحبايب ..

لإن خلي بالكم في موضوع العقارات والشقق هناك إتجاه .. وهناك إتجاه مضاد

يعني صحاب الشقة عشان يوزعها ممكن يقوم غامز السمسار هو كمان عشان يديها أولوية في البيع وبيزودوا شويتين .. وبالتالي بتلاقي السمسار يفرجك على دي الأول عشان يزحلقها ..

لكن كل مشتري لازم يبقى عنده صبر وطولة بال . ويحدد اهدافه وميزانيته واهم من ده كله هو عايز يسكن في أنهي منطقة علشان مصر واسعه وهايتوه فيها وهايفض يلف حوالين نفسه لو مش عارف هو عايز إيه ..

تحياتي ،،،

[ahmedarab]

متشكرين يا زعيم على الرد السريع

وكلامك معقول برضة ...بس يعنى قصدك اهبد السمسار فوق نفحتة ..نفحة ...فيجيب من الاخر يعنى ؟؟؟؟

سؤال اخير ..... انت لية مش عجباك مساكن الضباط (هى اسمها كدة ) اللى فى الزهراء .؟؟ مع ان كتير شكروا فيها من ناس اعرفهم يعنى

اما من ناحية المناطق ..ممكن تقول الزهراء ..النزهة الجديدة ..بس اعتقد بقيت غالية اوىىىى ...... بالكتير اوىى حدايق الاهرام ..وكدة يبقى كتر خيرك

وبعدين متخفش انا مش هافضل اقلب فى البضاعة واسيبها وامشى ..انا ناوى اخلص بس انت خليك مهاود ..هههههههههههه

تحياتى

[هشام عباس]

والله انا كأني لقيت الموضوع ده زي اللقيه

لسه من يومين بس كنت بتكلم مع الجماعه على المنطقه التاسعه واننا نشوف حاجه فيها ولو حتى لسه تحت الأنشاء مش مشكله بل بالعكس بالنسبه لينا الي تحت الأنشاء تكون احسن علشان ناخد حاجه كبيره وندفع مثلا نص المبلغ والباقي يتقسط لغاية الأستلام!!!!!!!!!!! يا ترى فيه حاجه كده؟

والأسعار اخبارها ايه دلوقتي؟

يعني تقريبا المتر بكام؟

يا ريت يا س س ترد عليا علشان واضح انك دارس المكان ده كويس

اما بالنسبه لحدايق الأهرام انا شفتها لما كنت في مصر شهر 2 هي كويسه بس بعيده جدا عن مدينة نصر ومصر الجديده

وانا بفضل اخد شقه جنب اهلي واهل زوجتي لغاية ما نبني ان شاء الله ارض التجمع

ادعولي استلمها بقىانا دلوقتي واخدها من حوالي 3 سنين ولسه مفيش استلام

ربنا يسهل اخد بس الشقه الأول

احسن خلاص اهلي واهل مراتي زهقوا مننا كل اجازه مقضينها عندهم

[ابتسامة رضا]

السلام علينا وعلي عباد الله الصالحين

الاخ أبو رامي أعتقد انه يجب أولا التعرف علي الجامعة التي سيدخلها ابنك وتحاول تشتري الشقة قريبا منها وليس ما تفعله الان تشتري الشقة ويتشحطط ابنك في المواصلات ويضيع وقته من والي الجامعة ..اسأل وجمع معلومات عن كل الاماكن وليس المنطقة الشرقية فقط وبعدين اشتري الانسب

ربنا يوفقك اللهم آمييييييييييين

تم تعديل 26 أبريل 2008 بواسطة ابتسامة رضا

[ahmedarab]

عزيزتى ابتسامة رضا

لا بس حضرتك مش واخدة بالك ...الكلام دة كتابة صاحب الموضوع من فترة اقل شوية من سنة ......

يعنى زمانة حاليا فى الشقة وابنة بيمتحن او على وش امتحان سنة اولى كلية ...

تحياتى