اذهب الي المحتوي
إنشاء باب جديد بعنوان سد النهضة الإثيوبي لكل الموضوعات المتعلقة بسد النهضة ×

المصريين والألقــاب


Recommended Posts

الجماعة ولاد الهرم ‏والنيل(إللى انا منهم) يموتوا في ‏حاجه اسمها ألقاب

‏مـش عـارف ليه أو من ‏غير ليه (على رأي المرحوم عبد الوهاب) ‏

‏‏ وكـان مـن أهداف‏ انقلاب 23 يوليـو القضاء ‏على الألقــاب ولكن ‏يبدو أن العكس صحيح ‏كما هو الحـال

في ‏الأهداف الخمس ‏الأخرى

فعندك مثلا لو ناديت على أي واحـد ربنا ‏كرمهُ وحصل ‏ على ‏شهادة عالية ب أسمه ‏الذي أعطاه الله إياه ‏يقوم كده يبصلك ‏ويقولك : هـو

فلان ده ‏بيلعب معاك؟ انت مش ‏عارف بتكلم مين؟

إزاي ‏بقي لازم تقوله يا ‏دكتور / يا باش ‏

مهندس/يا أستـاذ ‏حتى ولو كان ساقط ‏إعدادية

( زي العبد لله )‏لازم تديـله لقب اُمال فين

الاحترام؟؟؟؟؟؟؟؟

ولما تييجى تقوله ‏يا عم على مهلك كده ‏وخليك متواضع ‏

ساعتها بس يـقوم يقولك ربنا ‏ قال وجعلناكم ‏طبقات

‏ (وتلاقيه ما ‏بيركعـهاش ومايعرفش فين الجامع)

عندك مثلاً ‏‎خد

‏اعرف لواء ‏سـابق(وهذه مهنه ‏تنتهي بنهاية الخدمة)

‏لكن سيادة اللواء ‏بيزعل أوي لو

اى واحد ‏يريد مخاطبته ولم يسبق اسمه بلقب ‏سيادة اللواء طب يا ‏سيادة اللواء هل ‏تسمح بأن أناديك ‏وأقولك يا سيادة اللواء ‏السابق؟ ‏

يا إخوان إذا كان ‏الموضوع موضوع ‏احترام

فيكون ‏للشخص أو السن ‏وليس للمهنة مش ‏يكون يادوب الوله ‏واخدله حته شهادة ‏ولسه بياخد المصروف ‏من بابا او ماما ويبص كده ‏من البلكونه أو من بير السلم وينده ‏علي راجل في عمر ‏أبوه (يا فلان روح هات ‏لي كذا)!!!!!!!!!!

‏راحــت روحك يا بعيد و ‏خلى عند البعيد دم ‏

واحترم سن الراجل

وياسلام بقي لو الله ‏لسه متخرج من كليه الشرطة يا سلام سلم ‏البيه راح والبيه جهه ‏وكمان الباشمهنس ‏لسه متخرج بابا جاب ‏له واسطة وأشتغل ‏في عثمان يقوم بقي ‏الواد كده ييجي الصبح ‏عا المكتب واول حاجه ‏يقولها للساعي ‏الغلبان: قهوة مظبوط ‏يافلان آل أية الواد ‏صاحب مزاج قوي ‏

ولعلك يا سيدي ‏الفاضل رأيت الكثير من ‏أمثال هؤلاء

الصيدلى لازم تقوله يا دكتور الواد او البت من دوول يكون لسه فى اعدادى طب او صيدله تلاقيه معلق البالطوالابيض على ايده ويا ويل من لم يناديه بأسمه بدون لقب دكتور

حاول كده مثلا ان تقدم طلب تعين بشركه لاابد وان تكتبفى الاول السيد الاستاذ الدكتورالمهندس الكيميائي رئيس مجلس الاداره فلان الفلاني

وحتى اللى ربنا كرمه وجاله عقدعمل بالسعوديه لازم لما يرجع تقوله يا حاج

رابط المشاركه
شارك

ربنا ما يجبش حاجة وحشه .. الاحترام غير المبالغ فيه شيىء طيب واحدى سمات المجتمع المصرى والشرقى عموما .. مثلما هو الحال فى فرنسا حيث الألقاب أيضا محفوظة .. عكس الحال فى المجتمع الانجليزى أو الأمريكى حيث لا يمثل استخدام الألقاب أو الدرجات العلمية أهمية فى التعامل الدارج عدا استخدام مدلول استخدام لقب العائلة فى التخاطب أو استخدام الاسم الأول .. وفى المجتمع المصرى حيث هناك أهمية للغة التخاطب بين الصغير والكبير .. أوجد المجتمع بدائل للألقاب لمن لا يملكها مثل يا حاج فلان أو يا شيخ فلان أو يا أبو فلان نسبة الى اسم أكبر أبنائه أو أكبر بناته اذا لم يكن لديه أبناء من الذكور .. وهو تقليد عربى واسلامى الجذور .. فسيدنا عمر بن الخطاب كان يكنى باسم "أبوحفص" نسبة الى ابنته .. ونفس الشىء عند التخاطب مع النساء .. ولازال الريف المصرى الى الآن لا يستخدم كلمة "مدام" بل حاجة أو أم فلان .. واصطلح المجتمع على اطلاق اسم أم عبدالرحمن على العاقر أو التى لم ترزق بأبناء .. وهو نوع من التأدب وأدب المعاملات ويمثل خصلة حميدة وليست عادة مرذولة حتى ولم تكن معروفة فى أمريكا.. تحياتى

:)

رابط المشاركه
شارك

يا سيد مصرى الاحترام مطلوب فى كل مكان وللعلم يجب ان يكون للانســـان وليس للمهنه حتى رجال الشرطه هنا عندما يخاطبون مجرم فيينادونه يا مستر فلان ماحدش بيقوله رد عا البيه يابن ............(الكلام الحلو اللى انت عارفه)

حاجه تانيه عمري ما سمعت اى واحد ينادى رئيسه بلقب ولكن باسمه فقط هل يكون هذا عدم احترام

مثال تانى حينما كنت اعمل بشركه البوينج لصناعه الطائرات فوجت وقت الغذاء بشخص يجلس على مائدتى يعرفى بفسه قا ئلاً انا فلان مش المهندس فلان (هذا الشخص كان رئيس لإحدى الجامعات)

وهوالان رئيس للشركه يعمل تحت يده 50 الف عامل

وللعلم الكل حتى عامل النظافه ينادونه بأسمه

وللعلم الكفاتريا للكل مفيش واحده للوزير واخرىللغفير

رابط المشاركه
شارك

احيانا تضطرك الظروف

مثلا انا لا اطيق حد يناديني يا دكتورة الا فيما ندر

مثلا امبارح كنت عند دكتورة الاسنان

العيادة فيا دكتور استاذ ودكتورة تحت التمرين يعني اصغر مني بكام سنة

دخلت لقيتهم معوجيين علينا قوي في الكلام وبيتكلموا انجليزي قال يعني بقى احنا مش هانفهم

واول ماسالني بتشتكي من ايه.. قلتله جايا اخلع ضرسي

راحوا بصوا لبعض بظرة ذات مغزي كدا وقعدوا يضحكو بسخرية :mad:

المهم عديتها لأني متاكدا انه لازم يتخلع

الراجل مشي وسابلي البنت تجرب فيا الأشعة لما كانت ها تطلع روحي في ايدها وعنيا دمعت وكانت حالة

المهم مرات بابا اتفرست من عوجانها فراحت قالتلي امال لو مكنتيش دكتورة كنتي عملتي ايه....

والله العظيم بدون مبالغة زي ما بحكيلكم كدا حصل

لقيتها اتعدلت في قعدتها

وبصتلي قوي واتعدلت في كلامها وقالتلي انتي دكتورة؟

قلتلها بعوجاااااااااااان بقى "ماهي فرتصتيييييييي بقىىىى"

طـــــــــــبــــــــــــعـــــــأ

قالتلي..ااه....دكتورة ايه بقى

رحت اتعوجت اكتر وانا بقولها بــــــــشري :wink: :) :lol:

بعدها بشوية جه الدكتور بيتكلم انجليزي راحت قالتله... لا ما خلاص ماهي طلعت دكتورة :mad:

بس يعد ما كان دمي اتحرق يعني

في حالة زي دي غب عنك اجبروني على اني استخدم اللقب اللي امتلكه بصورة مستفزة كمان...!!

حاجا تانية

مثلا

بابا بيناديلي باسم اخواتي الصبيان لما بنكون في الشارع او السوق

اعتقد ان دا لقب محمود

وغيره وغيره

المهم الأستعمال ازاي

:roll:

رابط المشاركه
شارك

بصراحةاصبحت ظاهرة تفقع المرارة :? :? ... الواحد من دول شايل لقب قااااااد كددددة ولو ناديتة باسمة يزعل ويتقمص وازاي ومش عارف اية... الاحترام واجب ولكن في مصر بنبالغ حبتين واصبحت الالقاب زي الهم علي القلب ومالهاش علاقة بالاحترام اصبح ليها علاقة بالمركز... فمثلا طول عمرنا نعرف ان الصغير يحترم الكبير عمر ما ابويا ولا امي قالولي ان المهنة لها علاقة بالاحترام.. واكبر مثال قالوة بن البلد علي البواب ولا حارس العمارة .. والامثلة كتير...فالمصريين دلوقي بيحترموا المركز مش الشخص الا من رحم ربي..

تعالوا نشوف الغرب كلهم سواسية من اول الست الي بتنضف المكاتب حتي المدير ومفيش حاجة اسمها فراش يعمل قهوة وشاي ونمشورة من غير حتي كلمة شكر ولا احترام لسن ما هو فراش يعني في قاموسنا مواطن درجة عشرة.. وفي الغرب كلة بيتنادي باسمة من غير لقب وزي مقال بن البلد المطعم للكل مفيش خيار وفقوس كلة ياكل نفش الاكل ويقعد في نفس المكان.

طول ما في المظاهر الفارغة بتعتنا والبية راح والبية جة وانت مش عارف بتكلم مين عمر مصر ماحتتقدم... كفاية بقة ونفوق وبلاش انعرة علي خلق الله ... :s: :s2:

رابط المشاركه
شارك

مصر مافيهاش وسط ..يعني اما احترام زايد قوي ومبالغ فيه يا اما قلة ادب و قلة قيمة وهذان النوعان يظهران بشدة بين عوام الناس

النوع الاول وهو بتاع سيادتك وحضرتك وتشيله الشنطة وتفتح له باب العربية؟؟ ليه هو لامؤاخذة اكتع مش قادر يشيل شنطته او يفتح باب عربيته بنفسه !!!!حاجة تجنن والله ...

والنوع التاني وهو النقيض تماما وهو عدم الاحترام علي الاطلاق وفلان ده مسخرة وسيبك منه او بلاش تدق علي كلامه (يعني ايه ؟؟ غبي والا لسه عيل؟؟ ) لذلك تجد معظم الناس تفضل ان تاخذ موقف من اولها وتوري العين الحمرة او تظهر انها معاها فلوس علشان تجبر من امامها علي الاحترام....وتقول باعلي صوت ( لاااا خلي بالك..انا من النوع الاولاني مش من النوع التاني )

..

اما عن المقارنة بالخارج فلا اجد ماقوله الا ان الناس سواسية بمعني الكلمة ربما مختلفين في الدرجة العلمية والوظيفية ولكن لا ينظر اليهم علي انهم (بيئة ) او شبهة ولكن فقط لم تتح لهم الفرصة ليكونوا افضل من هذا ....

وليس عندهم النظرة المتدنية كما عند المصريين ( للاسف ) ..اعرف انت مين الاول علشان اشوف واقرر اذا كنت ناوي احترمك والا لا ..!!!!! كما حصل مع الاخت شعنونة في عيادة الاسنان بس القرار جاء مغالطا ثم تم تصحيحه !!!!

صحيح مصر ام الدنيا ...!!!!!!!!!!

رابط المشاركه
شارك

الاعتماد الزائد على الالقاب من سمات تخلف الشعوب

مثلا من عادات العرب في اول الاسلام، ان ينادوا الشخص بكنيته سواء كان امير ام وضيع، و هذا مثال للتبسط و المساواة في الخطاب

اما في مصر الان، فتجد انها عقدة نقص، و لازم تكلم كل شخص بلقب، و الا فهو انتقاص منه

كنت مرة اقدم طلب لجهة حكومية، فقالت لي الموظفة ان اكتب "السيد الاستاذ الدكتور المحاسب فلان"، و لما تعجبت من كل هذه الالقاب، لم يعجبها، و قالت اني لو ماكتبتوش كدة، الطلب حيترفض!

و هذه عادة متأصلة فينا، فحتى على المجال العائلي، جدي لامي كان رجل ريفي، و لما حصلت على الدكتوراة، اصبح لا يناديني او يكلمني الا بلقب دكتور! و هذا تكليف زائد لا داعي له

و لما جائت الثورة و ادعوا الغاء الالقاب، اصبحت هذه الالقاب (باشا، بيه) تطلق على ضباط الشرطة، فمن رتبة كذا الى كذا، يكون بيه، و اكثر من كذا، باشا

فالانسان بمصر لا يقيم بخلقه و تصرفاته، بل بشهاداته و القابه و ماله و منصبه، و هو منطق غلط

رابط المشاركه
شارك

لأ و ألذ حاجة لو ناديت واحد دكتور بلقب محترم برضه بس مش دكتور..ز زى يا أستاذ مثلا. أو يا باش مهندس..... ممكن يطلب إقامة الحد عليك...

بس المسألة كلها عبارة عن مركب نقص فى الشعب المصرى نتيجة نظرة الطبقة الحاكمة ليه من أكتر من 2500 سنة....

فمنذ أن نزع سلاح الشعب لمصرى منذ سقوط الدولة الفرعونية و حتى اليوم و المواطن المصرى ينظر له على أنه فلاح. حتى أصبحت كلمة طفلاح" مرادف لكلمة "مصرى".. كما تقول الست أنورين هانم فى مسلسل فارس بلا جواد "فلاح لار"....

وبعد قيام ثورة يوليو المجيدة، ظن الشعب المصرى أن ظروفه قد تحسنت بسقوط الطبقة الأرستقراطية..و لكن ما لبثت أن ظهرت طبقة حاكمة أخرى طبقة ضباط الجيش.. ثم طبقة الانفتاحيين من المقاولين و المهربين و غيرهم... و أخيرا طبقة المهلباتية...

فلم يعد للمصرى فى الدنيا شىء يتفاخر به سوىىىىىىىى

لقـــــــــــــــــــب

رابط المشاركه
شارك

:( :( أنا بقه عندى سؤال هيجننى. كل ما ظابت جيش أو بوليس يطلع على المعاش برتبة "عميد" تلاقى كل الناس تقول له " يا سيادة اللواء" و هو عمره ما كان لواء و حتى رتبة العميد لم يعمل بها و لا يوم واحد. ده يا دوبك أخدها علشان يطلع معاش. طيب ليه الناس تقول سيادة اللواء و يزعل أوى أوى لو حد قال سيادة العميد ؟ هى الحقيقة بتزعل ؟؟ أعتقد كذلك.

طيب هى رتبة عميد هينة علشان يزعل منها ؟؟ لأ طبعا بس الظاهر أننا تعودنا بأن نتعالى على اللآخرين بما ليس فينا و وقع كلمة لواء أكبر من كلمة عميد. مش هم الحقيقة فين. المهم أنك تبهر من أمامك باللقب حتى و لو كان كذب.

رابط المشاركه
شارك

لقب ياباشا دة بقي زي اللبانة بس مش لاي واحد

اذا كنت في مصر تركن سيارة يقوم المنادي بافساح مكان لك ، وطبع مقرونا بلقب ياباشا ( فيحصل نوع من الانشكاح ) ، فتعطي لة المعلوم ، فيزداد ترديد اللقب بصوت عالي ، متشكرين ياسعادة الباشا

ولو كنت في مطعم ، او بنزينة ، او اشتريت اي حاجة وتركت المعلوم ، فسيصل لاذنك لحن الباشا ، وتحس بانتفاخ الصدر .

وياويلك لو كنت زي حالاتي ، عايش برة واتعودت علي نظام عدم الدفع ، او فقدت الاحساس بالزمن ، وفاكر ان بفشيش زمان ( الربع جنية ) بقي بقشيش ، وقمت باي من العملين ( عدم الدفع ، او دفع ربع جنية - وحاليا جنية - )

ستمسع ما لم تسمعة من قبل ، وقد حدث معي مرة اثناء احدي الاجازات ان طنشت الدفع وسمعت تلك الجملة الشهيرة والتي علمتني درسا لن انساة حفظا علي وضعي امام الست حرمي ، فقد سمعتة يقول : يتكم نيلة وانتوا فقر .

رابط المشاركه
شارك
dimage Posted: Thu Dec 05, 2002 2:26 am    Post subject  

 

يتكم نيلة وانتوا فقر .

وهل تعتبرها اهانة كما قالت الاخت شونشن انت محظوظ... ففي العادة لو كنت في محطة بنزين وراكب عربية من وجهة النظر المصرية للاغنياء فقط وهي والله العظيم عربة الشركة مش بتاعتي وباخدها لما انزل اجازة وطنشط او دفعت حتي جنية ستسمع ما هو اقبح من ذلك والخيار امامك اما ايثار السلامة او الخناق مع عاملي المحطة وطبعا الحل الاول افضل. .. وبعد كدة تدفع علي الاقل 5 جنية خصوصا لو معاك خواجة في العربية بيتكلم عربي لبلب.

اما بالنسبة لموضوع الالقاب... فحمي اخي راجل طيب جدا وكل مايشوفني ..اهلااااا باشمهندس ... واكتر من مرة اقولة ياعمي انا زي ابنك بلاش لقب يقوم يقول امال طلع عنيكم في الدراسة لية مش علشان تبقي مهندس اقولة بس انا مش مهندس انا بكالريوس علوم كميائي يعني.. يقول يعني السباك ولا الميكانيكي احسن منك.. وراسة والف سيف ينادينا كلنا حتي اولادة بلقب بلقب دكتور او باشمهندس او استاذ كل علي حسب شاهدتة.... وهو راجل متعلم ويعمل مدير مدرسة.. يعني في ناس واخداها منظرة وناس بتعتبرها فرض لحصولك علي شهادة وناس عندها نقص وبتعوضة باللقب..واعتقد في مصر النوع الاول والتالت منهم كتير اووووووووووووي ي ي ي........

رابط المشاركه
شارك

طرائف الالقاب

فيه واحد كل مايكلم اخو المدام وحماتى ترد يقولها طيب لما يرجع قوليله المعيد فلان الفلانى .. وهكذا لمدة شهرين .

اخر مازهقت قالتله اسمع يابنى هو انا لو قلتله فلان الفلانى بس مش هايعرفك.

صاحب السوبرماركت ظل ينادينى بيادكتور لمدة شهور ( الشغاله حبت تخدم :D ) لحد ماطلب منى علاج للبواسير ولم يصدق انى لا دكتور ولا يحزنون وقاللى طيب خلاص ادينى عنوان العيادة وانا اجيلك.

واحد صاحبى وقف فى لجنة مرور ولم يكن معه رخصه السيارة . خرج للضابط وقاله انا ابن العميد فلان الفلانى واخرج له كارنيه النادى بتاع والده ومكتوب فيه العميدفلان. فتركه الضابط.

الطريف انه عميد احد المعاهد التعليمية .

رابط المشاركه
شارك

عقدة النقص .............

زمان كانت منصب و لقب الباشا و البيه و الافندى و الضابط و الدكتور مخصص لعليا القوم فى مصر فهم الناس المتعلمين المتنورين اللى عايشين فى رغد و كانهم فى ابراج من العاج صعب الوصول اليهم

انما باقى سكان مصر ....... فلاحين بيشتغلوا عند الناس دى

و دى نظرة اترسخت فى عقل المجتمع الباطن مع الزمن

ولما اتغير الزمن و بقى سهل قوى ان الواحد يكمل تعليمه شىء طبيعى انه لا يرضى الا ان يحمل لقب احد هؤلاء لدلالة على انه مش فلاح

و اكيد لاحظتوا فى مسلسلات رمضان مصطلح ( دة فلاح) مش (مصرى) مهما ارتقى و اتعلم

اذكر مرة فى حفلة تخرج فى كلية الهندسة كنت بابارك لاصحابى اللى تخرجوا وغلطت و ناديتهم باساميهم و فجاة لاقيت واحد منهم متنرفز و بيقوولى لو سمحت انا البااااااااشمهندس فلان حقك علينا يا سيدى

برضه فلاح :D

اخ

اسف كليو انا قريت اول عنوان و رديت عليه و بعدين اكتشفت انك سبقتينى و قلنا نفس الكلام تقريبا :D

مش مشكلة

زعل يوك :D

رابط المشاركه
شارك

أعتقد أن الرأي الذي ذكره الأخ وسام معقول جدا

وأضيف أن الألقاب موجودة أيضاً في بعض الدول العربية ولكن ليس كمصر طبعا

فمثلا لقب دكتور يصر عليه كثير من العرب وقد يجد ( غضاضة ) ان لم تتاديه بالدكترة بتاعته ( على فكرة حرف الدال الذي يسبق الاسم اكتشفت أنه عقدة عربية مؤصلة )

وأيضاً في الشام والأردن يحبون لقب ( بيك ) خصوصاً للناس الأكابر

ويستخدمون في الشام مثلاً لقب ( خانم ) بضم النون , للسيدة المتزوجة

في لبنان خصوصا في المجتمع المسيحي يستخدمون الألقال الفرنسيه ,, مسيو ,, دموازيل ,, مدام

في الخليج والسعوية واليمن يستخدمون الكنية وهي أبو فلان وأم فلان وتعتبر قمة الاحترام من أصغر فراش في مصلحة الى أتخنها شنب

يعني لو ناديت الشيخ زايد أو الملك فهد بأبو فلان بدون أي لقب تعتبر مقبولة

كذلك يستخدمون كلمة ( طويل العمر ) اذا ناديته بغير لقب أو كنيه أو اسم ,, وخصوصاً للأمراء

وهذه نكتة تذكر عن أحد العاملين عند أحد الأمراء

سألوه أهله كنت فين اتأخرت ؟؟ قال لهم كنا بندفن طويل العمر مات النهار ده:D

من الألقاب أيضاً الألقاب التي تطلق على علماء الدين والدعاة

في مصر ودول المغرب العربي مثلاً بينادو الشيخ ( يا مولانا )

في الخليج ينادوه ( يا شيخ )

بس في المغرب لو تقول لست يا شيخة ( حتسمع منها كلام مش مظبوط ) :D

الغريب ومن خلال سماعي لأشرطة العلامة الشيخ الألباني رحمه الله لاحظت أن خواص طلابه المقربين كانو ينادونه ( يا استاذنا ) أو ( أستاذنا )

من الأشياء المؤثرة فعلاً وتوفقت عندها هي عند سماعي لبعض أشرطة العلامة الشيخ ابن عثيمين رحمه الله

كان في درس اسبوعي مفتوح لعوام الناس ,, يسألون أسأله مفتوحه

وكان بعض الحضور ينادي الشيخ بــ ( يا فضيلة الشيخ )

وبعد انصراف الشيخ لدقائق ( لكي يتوضاً أو شيء كهذا )

قال أحد مرافقيه من طلابه لبعض الحضور ( لا تنادوا الشيخ بـ ( يا فضيلة الشيخ ) هذا يضايقه ,, واكتفوا بقولكم ( يا شيخ أحسن الله اليك )

لأن كلمة ( فضيلة ) فيها من التزكية والثناء في وجه الشيخ وهذا منهي عنه

بس فين اللي زي الشيخ ابن عثيمين رحمه الله وأسكنه فسيح جنانه

كذلك اذكر أن الشيخ الألباني رحمه الله كان اذا تحدث عن نفسه يقول ( طلبة العلم أمثالنا ) أو ( طويلب علم مثلي ) ولم يكن يصنف نفسه من العلماء , وهذا هو دأب العلماء حقا

معلش خرجنا برا الموضوع ولكن الكلام جر بعضه

رابط المشاركه
شارك
ولو كنت في مطعم ، او بنزينة ، او اشتريت اي حاجة وتركت المعلوم ، فسيصل لاذنك لحن الباشا ، وتحس بانتفاخ الصدر .

والله مش معاك يا أخ ديماج في الحتة دي !!!

ده الواحد من كتر ما بيسمع ألقاب أصبح لايهتم هو بيتقال له أيه ???

ومن كتر ترديد الألقاب في مصر أصبحت فاقدة المعني واللون والرائحة !!!

ولا بيحصل انتعاش ولا انتفاخ صدر ولا غيره !!! ولما واحد يقولي يا باشمهندس والله بأبقي مش عارف إذا كان بيكلمني أنا وألا العربجي اللي واقف ورايا !!! بصراحة بقت حاجة تخبل !!!

رابط المشاركه
شارك

yasser6666

!!! ولما واحد يقولي يا باشمهندس والله بأبقي مش عارف إذا كان بيكلمني أنا وألا العربجي اللي واقف ورايا !!! بصراحة بقت حاجة تخبل !!!

هو العربجى مش انســــان مثلك والا انت شايف انك احسن منه

رابط المشاركه
شارك

انضم إلى المناقشة

يمكنك المشاركة الآن والتسجيل لاحقاً. إذا كان لديك حساب, سجل دخولك الآن لتقوم بالمشاركة من خلال حسابك.
Note: Your post will require moderator approval before it will be visible.

زوار
أضف رد على هذا الموضوع...

×   Pasted as rich text.   Paste as plain text instead

  Only 75 emoji are allowed.

×   Your link has been automatically embedded.   Display as a link instead

×   Your previous content has been restored.   Clear editor

×   You cannot paste images directly. Upload or insert images from URL.

  • محاورات مشابهه

    • الإنجازات تمت بأيدي المصريين و ليست بكائنات فضائية ... أين الإحصائيات التي توثق جهود الإنسان المصري

      إحصائيات بناء هرم خوفو نعرفها الآن و بعد مرور مايزيد على أربعة آلاف سنة عارفين التفاصيل - عدا طبعا إحصائيات الأمن و السلامة. ما سبق كان إستهلالا لابد منه أنا لا أقلل من حجم و قيمة الأعمال التي تمت و تتم لكن من حقنا أن نعرف أكيد هناك أرقام قياسية ممكن نفخر بها من سويعات تحدثت مع المهندس عمر الكومي - من أكبر خبراء إسالة الغاز الطبيعي في العالم - و كان المسئول الأول عن مشروع مصنع إسالة الغاز في دمياط  ذكر لي أنه كان مستهدفا إستكمال المشروع ٣٥ مليون ساعة عمل بلا حوادث - لكن بعد مرور ٣

      في رسالة إلى مسئول

    • لماذا لايحب السودانيين المصريين

      معظم السودانيين وبالذات في ارض المهجر تجدهم يختلفون في كل شئ ولكن يتفقون علي شئ واحد وهو عدم حبهم للمصريين او التعامل معهم وبالذات في دواوين العمل المختلفة والسؤال هو هل هناك اسباب تاريخية أو نفسية آدت الي هذا التنافر الشديد وهذا مجرد سؤال اطرحه للنقاش فهل من اجابه شافية ؟

      في سياسة دولية

    • إضحكوا مع المصريين على خليك في البيت

      اضحكوا مع المواقف المصرية في خليك في البيت   ● ما تخافوش ٢٠٢٠ مش نهاية العالم .. أنا اشتريت علبة جبنة صلاحيتها ٣ سنين 😂😂ة😂 ● سأل احد الحكماء ماذا تريد المرأه؟ فاجاب: لا انا موووش حكيم للدرجة دي🤭 ● عمري ما كنت اتخيل اني اصرف كل الفلوس دي علي الكحول من غير ما اشربه 🙄................................ ● درجة التعقيم اللي في البيوت بقت تسمح انه يتعمل فيها عمليات قلب مفتوح على الحوض😂................................ ●عاااااجل ... بعد انتهاء ازمة الكرونا ان شاء الله .. الحكومة هاتوز

      في دعوة للأبتسام

    • الأستيلاء علي محاورات المصريين

      تنويه هام  الزملاء  الأعزاء  استغلالآ لحالة الركود التي تمر بها البلاد ... و شبه  انعدام رغبة الكثيرين في القيام بالمشاركة في مناقشات اجتماعية .. استغل عضوآ من المحاورات تلك الفرصة و التي انتظرها لمدة 17 عامآ .. و قام بتغيير الباسوورد العمومي و من ثم استولي علي جميع ابواب المنتدي .. حاليآ هناك اجراءات قانونية لأسترجاع المنتدي مرة أخري  يواكبها محاولات الفريق الفني لتعديل الباسوورد العمومي ...  و يساعدنا في ذلك وثيقة مصورة تثبت تسلل هذا العضو الي السيرفر المركزي للمحاورات نرفق

      في الملتقى العام لزوار محاورات المصريين

    • المسيحية في محاورات المصريين

      تلك بعض المواضيع التي تم تجميعها .. و من خلالها ستجدون عرضآ بسيطآ لمساحة أفردتها محاورات المصريين لعرض وجهة نظر مسيحية حول الدين المسيحي من جهة و ما يخصه في الدين الأسلامي نفسه من جهة أخري .. و تفاعل بعض الأقباط مع مشاكل مجتمعهم و مشاكلهم نفسها في هذا المجتمع ... مجرد دعوة للتفكير و التعريف للبعض .. و أخري للمشاركة بما ان مجموعة جميلة من الأخوة المسيحيين قد انضموا مؤخرآ الي اسرة محاورات المصريين الرائعة .. قد يجدون في تلك المواضيع ما يغريهم بالمشاركة الفعلية بصفتهم و قبول دعوة صادقة للخروج

      في المسيحية و المسيحيين في المحاورات

×
×
  • اضف...