من ذكريات جدى الشيخ حسن

[achnaton]

خالى حسين ابن جدى الشيخ حسن من مراته الأخرانية.. بعت لى جواب ..

بيسأل عليا وصحتى ؟! .. يشكر ..! وف آخر جوابه عتاب ..؟

آل إيه .. عاوزنى أبعت له قنطار بصل من النوع الشديد

اللى كتب عنه اخونا الأفوكاتو .. لأن بصلنا بالعفن الأسود إنصاب ..

----------------------------

وكان جدى الشيخ حسن –رحمة الله عليه – زارع تلات فدادين ونص قيرط

جنب الدوار الكبير .. فدان ونص برسيم والباقى بصل وجرجير وفجل وكرات

وف وسط الكلام ده كله منحل كبير للعسل الأبيض فيه أكتر من ميت خلية ..

و خمس عمال .. بيجمعوا العسل والواح الشمع فى السنة تلات مرات

----------------------------

ويوم جمع العسل .. كان بالنسبة لينا .. عيال العيلة .. “ يوم اللحس الكبير “

كل عيل أو عيله ماسكة حتة شمع بتمص فيها .. والطعم يومها كان خطير

حتى جدى الشيخ حسن كان لامم من الغيط شوية بصل أخضر

يحط زر البصل فى كوباية العسل وأقرش ياجدى واحبس بحزمة جرجير

----------------------------

كل ده .. راح .. العيال باعو الأرض .. حتى نصيب أمى ..

هما خلانى صحيح .. لكن سابو الزراعة للوظيفة ..آل إيه بيقلدوا عمى

باعو الجاموس .. واشتروا اللبن المبستر .. والعييش الفينو ..

حتى البيض والخياروالجبنة البيضا كله من المول اللى جنبى !!

---------------------------

سابوا بس الكام فدان اللى جنب الدوار الكبير .. واللى كانت مزروعة بصل

وهملوها .. وسابوها للغفر يزرعوها .. وضاع الفجل والجرجير وخلايا العسل

وبدل السماد البلدى من الحمام والجاموس اللى باعوه .. إشتروا سماد البطريق ؟؟!!

فسمم المحصول ورموه .. عليك يارب العوض .. ماهو ده الجهل مالم يكن الهبل !!

---------------------------

شوفوا بقى الخيبة التقيلة .. بعد ما كان جدى بيبعت لنا فى البندر مقاطف العيش !!

والفراخ والبط مدبوحة ومحمرة .. غير العسل والزبدة والرز فى شكاير خيش !!

ومات جدى الشيخ حسن .. رحمة الله عليه .. وسبنا الزراعة وتربية الحيوان ..

وياريت لمصنع . او لورشه .لأ .. لمكاتب الحكومة وشركات التجارة بلا حيا أو خيش ؟؟

----------------------------وغدا إن شاء الله نستكمل حكاية الخيبة التقيلة اللى احنا فيها .. الله يرحمك يا أمى ..

كان زمانك الوقت بتصوتى عليا ..

أخناتون المنيا الحزين

[ragab2]

ياخسارة

على الزمن الجميل والأيام الحلوة

قل الزمان ارجع يازمان