متى تفكر في الاستقرار ببلدك

[MOOOM]

السلام عليكم ورحمة الله وبركاته

بصراحة فيه موضوع دايماً شاغلني .. ويمكن يكون شاغل تفكير ناس تانية كثير

أنا مصري ومقيم في أحدى دول الخليج منذ فترة ، وكنت قد سافرت لقضاء بعض الالتزامات وتحسين مستوى الدخل طبعاً .. ولكن مع مرور الوقت وعندما انتهت الضرورة التي سافرت من أجلها .. وجدت ان الضرورات لا تنتهي ، وكل سنة أقول .. أخليني السنة دي علشان أخلص كذا وكذا .. وهلم جرا .. ومع الوقت تقريباً تعودت على الغربة

وكل لما أفكر بالاستقرار .. لا أجد أحداً من أصدقائي أو معارفي يحبذ هذه الفكرة .. وذلك في ظل الظروف الاقتصادية والسياسة في البلد .. وخاصة بعد تعديل بعض مواد الدستور التي تسمح بدخول الأمن لأي بيت أو القبض على أي شخص بمجرد الاشتباه به وذلك دون أمر نيابة أو محكمة .

حتى إن سألت عن الدخل المعقول الذي يكفي لمعيشة أسرة في مصر .. لا أجد إجابة وافية ..

فأنا صراحة تعبت من السفر لكنني متردد جداً في اتخاذ القرار بالعودة والاستقرار بمصر

وأعرف أيضاً أن كل شخص هوه وحدة القادر على اتخاذ قرار في هذا الشأن لأن لكل واحد ظروفه وهي تختلف عن الأخر .

حتى المشاريع التي يمكن إقامتها لضمان دخل ثابت .. لا أجد من يحبذ هذه الفكرة والكل يقول .. أكيد هيتنصب عليك .. أكيد هتخسر ومش هتعرف تعوض الفلوس دي تاني لو خسرتها ..

ياريت لو أجد آراء عن هذا الموضوع .. ومتى تفكر جدياً أو تتخذ قرار بالعودة والاستقرار بمصر وما هي المشاريع التي يمكن إقامتها هنا ..

والسلام عليكم ورحمة الله وبركاته

[مصري بالوراثة]

جزاكم الله خيراً أخي الفاضل على طرحك لهذا الموضوع

وأوافقك على كل كلمة ذكرتها في طرحك هذا ... وأرجو من أهل الخبرة ومن لديه فكرة أن يشارك بها حتى يستطيع الجميع اتخاذ مايناسبه من قرار في هذا الشأن الذي أعتقد أنه يشغل مساحة كبيرة من تفكير كل مغترب .

مع خالص تقديري

تم تعديل 25 مايو 2007 بواسطة مصري بالوراثة

[otaka]

النظره الامميه للاشياء بتقول كل الدنيا هى وطنى

حته سؤال

فعلا عقدتنى و لا املك اجابه عليه بتاتا

اعتقد ان الغربه مبكرا تقتل شعور الغربه تماما لانها تصبح الاصل و العوده للوطن هو الاستثناء و انا ابتديت بدرى شويه لانى كنت فى سن 17 سنه تقريبا

[Ghost]

و الله القول الاخير لك , بس كلمتي لك , انك ممكن تكون اتعودت على نمط حياة و صرف معين لو مشيت به في مصر هتتعب , لان الدخل قليل الصرف هيكون كبير.

هنا في مصر اي مشروع هتعمله هتلاقي كام راس هتاكل معاك فيه , ضرايب و مرافق و .... الخ , ولو مدفعتش الاتاوة ممكن تخسر قوي , لازم كل شويه رشه حلوة علشان يسبوك تاكل لوحدك.

الحياة للاسف هنا ملوثة اقتصاديا و سياسيا و بيئيا ....... الخ

في مصر هتعيش غريب وسط اهلك , يبقى خليك بره غريب احسن لك, و زي ما قالوا , البلد ديه مش بتاعتنا احنا , دي بتاعتهم هم و احنا خدامين عندهم

سلام

[amrhoras]

موضوع جميل يأخ موووم بجد الصراحة انما انت لو عاوز ترجع بلدك اسأل نفسك سؤال

ماذا سأعمل في بلدى؟

متوسط الراتب الذى ستحصل عليه هناك كام؟

ماهى احلامك التى تريد ان تنفذها وسط اهلك؟

وعشان اكون واضح معاك بالنسبة للمشاريع الصراحة ومتزعلش منى اللى عمل مشروع وعمل لنفسه اسم هو اللى نفد انما عشان تروح تفكر في مشروع مش حتلاقي لانك حتى لو لقيت مشروع حلو وفتحته مليون واحد غيرك حيبصلك ويفتح جنبك غير الضرايب كل شويه مأمور ضرايب ولا مأمور ولا حاجة باش كاتب يعدى عليك وتلاقي واحد بيسجل هب اتنين تلاته اربعة وان مش جاريته ورميتله عظمه سوري يعنى حيطلع عليك مخالفات من 30 سنه مع انك لسه فاتح جديد حيقولك المحل او المبني او الشقة دى عليها مخالفات يالدفع يا نشمعهالك بالشمع الاحمرانا مش بسددها في وشك تعالى بقى عشان التراخيص عقبال ما تطلع ترخيص نشاطك قدامك اقل حاجة 6شهور ان كان معاك وسطة لو مش معاك انتظر في الصف يعنى كام سنه كدة

بعد كل ده حتصرف اد ثمن المشروع مرتين وتيجي في الاخر تقول انا زهقت وتفكر تبيع دى الصراحة حاجات حصلتلي وحصلت لاصحابي

بالنسبة للمصاريف حتلاقي نفسك انضغطت جامد لانك حتعيش على نفس المستوى اللى انت عايش عليه الان والنسبة للجنية وقيمتة المتدنية حتلاقي كل حاجة رخيصة قدامك وحتصرف وتلاقي فى الاخر انك بتصرف اكتر من مصاريفك بره

بس أرجع واقولك ان العيشة وسط اهلك بالدنيا كلها صدقنى تهون الفلوس وتهون كل حاجة حتى السعاده تهون قدام ساعة تعيشها تضحك وسط اهلك خصوصا لو كان ليك اولاد او تشوف والديك واخونك واصحابك وتترمى في احضانهم انا مش اقدر افيدك الصراحة لانى انا خططت لنفسي فتره معينة بعدها ارجع مصر واشتغل ان شاء الله حتى باليومية مش مهم بس وسط اهلى بالدنيا كلها خصوصا لو كنت انت محور الاسرة وملهمش حد غيرك ربنا يوفك ويوفق الجميع ويوفق كل المسلمين ويهدى كل عاص نرجو منكم الدعاء لشباب المسلمين عشان بجد أيامنا دى اصعب أيام ظلمونا بجد سابو بلدنا للحرامية والكلاب ينهشو في خيرها اصبحو غمامة في سماء الوطن اخفت كل أمل لكل شاب وشابه لكل رجل وامرأه حتى الاطفال بدأو يتعقدوا والناس الكبار مش عارفين يعملولنا حاجة بس بيحاولو لانهم تعبو وبدال ما نريحهم تعبناهم اكتر بمشاكلنا

وذمتكم ده مش حراممممممممممممممم اللى بيحصل فينا ده اين صرختكم ايها الشباب بس اصرخو براحة عشان الحكومة مشغوله في مصالح الشعب كان الله في عونهم وخصوصا طنط عيشة مبتنمش بتدرب الخادمين في برامجها لكى ياسيدتى سلامو عليكم

[MOOOM]

السلام عليكم ورحمة الله وبركاته

وألف شكر لكل من شارك برأيه في هذا الموضوع .. ونتمنى مزيداً من الأراء حوله

وبالنسبة لروتين تراخيص المشاريع فدي طبعاً حاجة طبيعية عندنا والعكس هوه الشاذ وكذلك الضرايب

بس متهيألي فيه مشاريع يمكن ميكنش فيها تعقيدات كثيرة .. مثل المزارع مثلاً .. أو البناء والعقار .. أو الاستيراد والتصدير

بس الأهم من كل ده .. إن الواحد يحسبها الأول .. هيصرف كاااااااام علشان يجيلو كام في الآخر؟؟

وهوه ده السؤال .. ولو حط الفلوس في البك هيكون أفيد ليه ولا لو عمل مشروع ؟؟ طبعاً مع تجاهل مسألة الحرام والحلال في موضوع فوائد البنوك .. علشان تعرف تعيش

[GoldenTiger]

وليه تجاهل مسألة الحلال والحرام

انت ممكن تحطهم في بنك إسلامي علشان يبقى حلال

[amrhoras]

السلام عليكم ورحمة الله وبركاته

مع احترامى للاخ جولدن تيجر بصراحة مفيش حاجة الواحد متأكد انها حلال 100% تسألنى ليه ياعم ماهى البنوك الاسلامية شغالة

اقولك انا كلها خرطة بيطه تحت مسمي اسلامية بالعكس السرقة فيها على ودنة

اقولك ايه اقولك ان كل سنه يخصموا مبلغ من المال حق الزكاة والله اعلم طب المفروض مين اللى ياخد الثواب انت ولا البنك انت زكى بنفسك مش مبلغ ينصرف منك تحت بند الزكاة والله اعلم بيروح فين

تانى حاجة البنوك الاسلامية مش ممكن يكون كل شغلها مكاسب ان كانو ماشيين على مبدأ المكسب والخسارة على البنك وصاحب النقود لغاية دلوقتى انا مسمعتش بنك اسلامى خسر في عملية تجارية

تالت حاجة الفوايد في البنوك العادية هى هى المرابحات بس بعد خصم الدمغة هههه و بتكون بفايدة اقل من البنوك العادية

رابع حاجة البنوك عامة مفيش قرار بالنسبه ليها محدد في فرق كتتتتير ناس تقول حرام حرام حرام وناس تقول جزء منها حرام وناس تقول بالعكس حلال حلال حلال وناس مش في دماغها كل اللى احنا كسبناه كان ايه وجع الدماغ والانشغال عن امور اخرى زيها زى الكورة والثانوية و الغلا و و و و سيبك انت

يا أخ موووم عاوز ترجع فكر صح رب هنا رب هناك انت بس خططها كويس عشان مش ترجع تندم احسبها فى دماغك ومش تتسرع وخد آراء اهلك برده بس الناس اللى تخاف عليك مش اى واحد

وفى الاخر اعمل حاجة مهمه جدا توكل على الله ارمي عليه حمولك وادعيه بصدق وخليك على صلة ديما برب العباد واستخيرة هو خير من يرشدك للطريق الصواب ان شاء الله تعالى

[badroora]

متى تفكر في الاستقرار ببلدك؟؟؟

لما بلدي حالها يتعدل !!!

[GoldenTiger]

مع احترامى للاخ جولدن تيجر بصراحة مفيش حاجة الواحد متأكد انها حلال 100% تسألنى ليه ياعم ماهى البنوك الاسلامية شغالة

اقولك انا كلها خرطة بيطه تحت مسمي اسلامية بالعكس السرقة فيها على ودنة

اقولك ايه اقولك ان كل سنه يخصموا مبلغ من المال حق الزكاة والله اعلم طب المفروض مين اللى ياخد الثواب انت ولا البنك انت زكى بنفسك مش مبلغ ينصرف منك تحت بند الزكاة والله اعلم بيروح فين

تانى حاجة البنوك الاسلامية مش ممكن يكون كل شغلها مكاسب ان كانو ماشيين على مبدأ المكسب والخسارة على البنك وصاحب النقود لغاية دلوقتى انا مسمعتش بنك اسلامى خسر في عملية تجارية

تالت حاجة الفوايد في البنوك العادية هى هى المرابحات بس بعد خصم الدمغة هههه و بتكون بفايدة اقل من البنوك العادية

رابع حاجة البنوك عامة مفيش قرار بالنسبه ليها محدد في فرق كتتتتير ناس تقول حرام حرام حرام وناس تقول جزء منها حرام وناس تقول بالعكس حلال حلال حلال وناس مش في دماغها كل اللى احنا كسبناه كان ايه وجع الدماغ والانشغال عن امور اخرى زيها زى الكورة والثانوية و الغلا و و و و سيبك انت

أولاً بالنسبة للبنوك الإسلامية إذا مكنتش متأكد إنها حلال 100% ولا حلال نص نص ومش عارف هما بيعملوا إيه فانت بتبقى أعذرت إلى الله وبتقول يارب أنا بحبط في الحاجة الإسلامية فلو عملوا حاجة غلط بعد كدة وانت معرفتش عنها خلاص هما اللي هيشيلوها

وبالنسبة للبنوك في طبعا ربا ومش زي الكورة والثانوية والغلا ووو لا الربا ده من الكبائر وربنا أنذر اللي بيتعامل بالربا بالحرب من الله ورسول

(الَّذِينَ يَأْكُلُونَ الرِّبَا لاَ يَقُومُونَ إِلاَّ كَمَا يَقُومُ الَّذِي يَتَخَبَّطُهُ الشَّيْطَانُ مِنَ المَسِّ ذَلِكَ بِأَنَّهُمْ قَالُوا إِنَّمَا البَيْعُ مِثْلُ الرِّبَا وَأَحَلَّ اللَّهُ البَيْعَ وَحَرَّمَ الرِّبَا فَمَن جَاءَهُ مَوْعِظَةٌ مِّن رَّبِّهِ فَانتَهَى فَلَهُ مَا سَلَفَ وَأَمْرُهُ إِلَى اللَّهِ وَمَنْ عَادَ فَأُوْلَئِكَ أَصْحَابُ النَّارِ هُمْ فِيهَا خَالِدُونَيَمْحَقُ اللَّهُ الرِّبَا وَيُرْبِي الصَّدَقَاتِ وَاللَّهُ لاَ يُحِبُّ كُلَّ كُفَّارٍ أَثِيمٍ (276) إِنَّ الَّذِينَ آمَنُوا وَعَمِلُوا الصَّالِحَاتِ وَأَقَامُوا الصَّلاةَ وَآتَوُا الزَّكَاةَ لَهُمْ أَجْرُهُمْ عِندَ رَبِّهِمْ وَلاَ خَوْفٌ عَلَيْهِمْ وَلاَ هُمْ يَحْزَنُونَ (277)يَا أَيُّهَا الَّذِينَ آمَنُوا اتَّقُوا اللَّهَ وَذَرُوا مَا بَقِيَ مِنَ الرِّبَا إِن كُنتُم مُّؤْمِنِينَ (278) فَإِن لَّمْ تَفْعَلُوا فَأْذَنُوا بِحَرْبٍ مِّنَ اللَّهِ وَرَسُولِهِ وَإِن تُبْتُمْ فَلَكُمْ رُءُوسُ أَمْوَالِكُمْ لاَ تَظْلِمُونَ وَلاَ تُظْلَمُونَ (279))(سورة البقرة)

فانت لما تحط في بنك إسلامي مش زي ما تروح تحطها في أي بنك تجاري ربوي وتقول مهو كلو زي بعضو

تاني حاجة انت بتقول إن مش كل شغلها ممكن يكون مكسب

هقولك إنه فعلاً مش لازم كل شغلها يكون مكسب بس ممكن البنك يعمل حاجة اسمها مخصصات ودي يعني لما يكسب السنة دي مثلاً 100 ألف مش هيوزعهم كلهم لأ هيوزع مثلاً 50 بس ويخلي ال50 الباقيين عنده في حاجة اسمها مخصص

بحيث إنه السنة الجاية لما يخسر هيغطي الخسارة من المخصص ده ويديك بردو مكسب

ياريت تكون حضرتك فهمت النقطة دي

بس أولاً وأخيراً مش هيتساوى بأي حال من الأحوال واحد بيقول يارب أنا مفيش قدامي حاجة غير إني أحط في البنك اللي بيقول إسلامي واللي بيقول إنه بيتعامل بأوامرك زي اللي يروح فاتح صدره يحط في بنك ربوي ويقول مهو كله زي بعضه إطلاقاً لا يستويان أبداً

وعلى العموم خلينا نرجع للموضوع متى تفكر في الاستقرار ببلدك

أنا عن نفسي لسة مسافرتش برة مصر بس أعتقد إني لو سافرت أي حتة مش هفكر أرجع مصر إلا سائح فقط أسلم على معارفي واصحابي وبالكتير أوي شهر وأرجع تاني مطرح ما كنت أياً كان المكان اللي هروحه حتى لو كوالالمبور

[amrhoras]

طب زعلت كدة ليه ياجولدن تيجر انت مفهمتنيش والله

انا مش بقول منحطش اى حته كل اللى بقوله اننا نفكر فى حاجة نشغل فلوسنا بيها احسن من البنوك والكلام الفاضي دة وكدة او كدة نحط وعندنا الافضل من أسوأ الاختيارات اننا نحط فى بنك بيقولوا انه اسلامي

انت متزعلش نفسك الاختلاف في الرأى لا يفسد للود قضية يا أخ جولدن تيجر انت قولت انك حتنزل سياحى شهر وارجع مطرح ماكنت في اللى بيفكر بطريقة تانية

انا عن نفسي مليش الا 3 في الدنيا دى كلها اللى يهمونى طبعا افراد اسرتى فأكسب فيهم ثواب احسن وكل سنه أبعتلهم زيارة يجو يحجوا ومنها برده اكون شوفتهم ان شاء الله هى اينعم مش وقته بس انا قررت انى مرجعش مصر دى تانى ده عن نفسي ربنا بس ييسر لنا جميعا ويفتحها علينا ويرزقنا من حيث لا ندري ولا نحتسب الرزق الحلال الطيب ويهون علينا ايام الغربة ويعطى كل واحد اللى في باله قادر ياكريم نسألكم الدعاء

[GoldenTiger]

لا أنا مزعلتش ولا حاجة أنا بس كنت بوضحلك الموضوع

وفعلاً أنا معاك أحسن حاجة الواحد يشغل فلوسه لإن الفلوس حتى لو اتحطت في أي بنك ولو إسلامي قيمتها بتقل لإن معدل التضخم أعلى من معدلات الفائدة بكتيييييييير

فعلى الأقل الواحد لو معاه قرشين أحسنله ميحطهمش في بنك ممكن يشتري بيهم شقة أرض أي عقارات على أقل تقدير حتى لو مش هيعمل بيها حاجة بس علشان دي سعرها محفوظ وبتكسب كويس وسعرها في الطالع وطبعاً حلال

وأكيد هيبقى آخر الحلول لو ملقناش حاجة نعملها هيكون بنك إسلامي ده اللي أقصده بس

وبردو حلوة فكرتك بإنك تبعت لأسرتك هما للي يجوا يزوروك مش انت اللي تنزل مصر

علشان انت لو نزلت وشفت مصر هتتعقد وهيجيلك عقدة سيكوباتية أرتكارية لمدة سنتين

ههههههههههههههه (بهزر طبعاً)

وربنا يسرلنا ويسرلك الخير إن شاء الله

وياريت متنساش تدعيلنا

[amrhoras]

وحياتك متعقد جاهز يابني ههههههههههه يله ربنا معانا ومعاكم ومع الكل باذن الله

[khatabmohammed]

أعانى مما تعانى منه ورغم أنى موظف وراتبى تقريبا جيد فى مصر ولكن مرعوب من العودة لبلدى والله حرام عليهم ولاد الحرام ربنا ينقم منهم والدور على الحريم .

[MOOOM]

والله يا جماعة أنا متهيألي إن بلدنا مش بالسوء ده أوي .. وأكيد بردو فيها حاجات حلوة كثير

وأيضاً فيها فلوس كثيرة .. والبعض طبعاً هيقول .. إن الحرامية بردو كثير .. لكن الدليل على الفلوس الموجودة فيها هيا المشاريع التي تدخل فيها دول خارجية زي السعودية والإمارات والكويت وقطر .. وهذا لا يقتصر على الشركات فقط .. ولكن فيه خليجيين كثير أفراد بيستثمروا مليارات أيضاً في مصر .. فأكيد لو كان فيها خسارة .. كانوا سحبو الفلوس دي من مصر

وأكبر عامل لنجاح أي مشروع من وجهة نظري هو عدد السكان الكثير واحتياجاتهم المتزايدة في كل شيء

عندي فكرة بسيطة ياريت لو تفيدونا بآرائكم حولها .. ليه المصريين المغتربين في كل دولة ميجتمعوش مع بعض .. ويجمعوا رأس مال معين ويقيموا أي مشروع في مصر [ عقار - مصنع - مدينة سكنية .. إلخ ] أي مشروع من المشاريع التي يكون فيها نسبة المجازفة قليلة .. فيكون المشاركة عن طرق الأسهم [ مش قصدي طبعاً الأسهم المدرجة في البورصات الخليجية ] ولكن قصدي إن كل واحد يدخل بالمبلغ الذي يقدر عليه .. وبدل ممثلاً المصريين المقيمين في السعودية لما ينزلوا إجازات ويتنافسوا على أسعار الأراضي مثلاً مما يكون سبب في زيادة سعرها بطريقة مبالغة أكثر مما هي عليه اللآن .. لا .. يجتمعوا مع بعض ويشتروا أرض مع بعض .. وبدل متكون 500 متر .. تكون 5000 متر .

وأيضاً في الحالة دي .. لو أي واحد من المشاركين فكر في الاستقرار بمصر .. هيكون ليه طبعاً مصدر دخل أكثر ممن هو مشارك برأس المال فقط .. وأكيد بردو هيكون ترددة في النزول أقل بكثير من غيره لأن مصدر الدخل مضمون [ ولا أعتقد أن الدخل سيكون قليلاً ] وأيضاً وبطريقة غير مباشرة هنساهم في تشغيل عدد من الشباب .. على الأقل من أقارب الناس المشاركة دي [ وطبعاً لو كنا سبب في تشغيل فرد واحد بس .. ده في حد ذاته مصلحة ]

ياريت تقولو لي آرائكم في هذه الفكرة

تم تعديل 29 مايو 2007 بواسطة MOOOM