أفيدونا عن حقيقة حسين شاهين و نشاطه العلاجى

[ام عبد الله]

السلام عليكم

كنت مترددة قبل ان اكتب هذا الموضوع ولكن قلقي علي اختي جعلني اكتبه وباذن الله ساجد الجواب كنت ابحث عن حسين شاهين وحقيقتة لان اختي على حسب ما تقول تذهب هي وزوجها واولادها للعلاج عنده واحساسي من اخبارها لي انه يستخدم بعض الاشياء انه مشعوذ وقد اريد ان اعرف عنه هل هو ساجر ام مدعي فقط و اريد ان ا نقذ اختي واولادها

هل هناك اي دليل استطيع ان اقدمه لها

جزاكم الله خيرا ويارب ان يرزقكم الجنة

[أبو محمد]

منذ حوالى 10 سنوات شاهدت برنامج كانت تقدمه إسعاد يونس إسمه " مساحة حرة " .. استضافت فيه حسين شاهين .. كل ما شاهدته ليس فى صالحه .. يعالج بالقرآن ويلحن فى قرائته .. ويقرأ بطريقة منفرة ليست من الترتيل أو التجويد .. وأفتكر إنه اتضح إنه كان محكوم عليه بالسجن ..

حاولى إنقاذ أختك من هذا المستنقع ..

كان الله فى عونك وعون أختك

[كمبورا 6]

الفاضل ابو محمد . الزملاء الاعزاء

اسعد الله صباحكم

لو تكرمت ممكن معلومات اكتر عن حسين شاهين ده ؟

مع الاحترام :sad: :sad: :sad:

[أبو محمد]

للأسف لا أذكر تفاصيل المقابلة .. ولكن كما قلت كانت مشاهدتى للبرنامج فى غير صالحه بالمرة ...

ولقد بحثت فى جوجل عنه ووجدت هذا الرابط الذى ذكرنى بموضوع الشقة التى كانت تحترق بفعل جهابذة السحر والشعوذة والتى أثارت عندى سؤال ربما يكون غبيا : "إذا كان لهؤلاء الناس كل تلك القدرات ، لماذا لا يجتمعون ويقومون بحرق إسرائيل قطعة قطعة ويخلصونا ؟"

http://www.alroqia.com/sahafa_n/news19.htm

بصراحة حاجة تقرف أن نجد من بين المتعلمين من يقتنعون بهذا الهراء :sad:

[عبده بيه]

الله يهديفعلا حالة صعبة ان الناس بترجع للوراء لزمن الجهل والتخلف والبعدعن الله الله يهدي اختك يا اختاة

[Ghost]

الفاضل ابو محمد . الزملاء الاعزاء

اسعد الله صباحكم

لو تكرمت ممكن معلومات اكتر عن حسين شاهين ده ؟

مع الاحترام

وانا كمان

[se_ Elsyed]

بكل بساطة .. هذا الحسين شاهين .. دجال ونصاب ومُدعي

ما فيش حاجه إسمها العلاج بالقرآن .. وإلا كان سيدنا محمد اللي نزل على قلبه القرآن علم اصحابه العلاج بالقرىن وكل واحد فتح له عيادة عالج فيها بالقرآن وهم كانوا ومازالوا اعلاما ونجوماً تُضيء لنا الطريق .

القرآن ليس سراً أو كهنوتاً وعلومه او قراءته ليس مقتصرة على فئة أو طبقة معينه .. فما أسهل أن تُمسك أنت بالمصحف وتقرأ فيه بنفسك لكي تطمئن وتتدبر ما فيه من ايات .

واتحدى أي وحد سليم يجرب كده ويذهب إلى هذا الشاهين ويخترع له أي حاجه كأن يقول إن عليه جن أو بلا ازرق او إنه تعبان في حياته .. وإن ما أشتغلوش البتاع النصاب ده ما أبقاش أفهم حاجه في أي حجه ؟

هؤلاء مُدعون شاهدناهم وخصوصاً الشاهين ده في العديد من البرامج وكان بيبقى عرقه مرقه حينما يواجهه أي من علماء النفس أو رجال الدين الحاضرون في البرنامج ويسأله اي أسئلة عن طرق العلاج التي يتبعها فيجيب إن ده من عند ربنا وإنه لا يتقاضى أجر وإنه بيعمل كده لوجه الله ... لله وللوطن يعني وياكل طوب هو وعياله بقى

ناهيك بقى عن قلة الأدب اللي بتيجي من علاجه للنساء او لمسه لهن أثناء جلسات العلاج اللي مستحيل تنتهي عند جلسه او إتنين .. والست اللي بتعمل كده تستاهل اللي يجرا لها وزيادة .. والله لو كانت بتموت حتى ...

وأنا اسف يا أختي أم عبد الله

يعني حضرتك سايبه أساطين الطب النفسي المصريين ورايحه تجري ورا دجال قذر لا يتقي الله وهايبتزكو كمان وياخد فلوسكو واتحدى لو أختك خفت بل بالعكس ممكن تنتكس زيادة لو اتاخرتو في علاجها ؟

أنا عايز أفهم بقى

ليه لما الواحد بيجي له الزائدة الدودية أو متاعب في المعدة او ألم في الأذن .. ما بيدورش على حد زي شاهين ويسيبه بقى من الاطباء المحترمين اللي أفنوا حياتهم في العلم والعمل ... وتلاقينا عمالين نجري ونسأل عن جراح او طبيب عيون أو أو أو ؟

أما لما تيجي لحد المرض النفسي اللي كلنا معرضين له أياً كان نوعه .. ساعتها بس تتفتح سكة الدجالين والشهاينيين والمشعوذين أمثاله ؟

والله العظيم أنا على استعداد شخصي لمواجه أي حد من هؤلاء اللي بيقولوا إن ربنا مسخر لهم جن صالح بيساعدهم في علاج الناس .. وكلي إستعداد أقف قدامه وأخلع حذائي وأضربه هو والجن بتوعه امام الجميع .. ويبقى يوريني هايعمل إيه

يا اختاه اللي معاه ربنا عمره ما يتعب ولو قرتي القرأت هاتشوفي أية صغيرة بسيطة بتقول " الذين أمنوا وتطمئن قلوبهم بذكر الله .. ألا بذكر الله تطمئن القلوب "

حذاري من الذهاب إلى هؤلاء أو التعامل معهم .. بل بالعكس لو عرفنا اوكارهم لازم نبلغ عنهم عشان يترموا في السجن او تضرب اعناقهم ويعدموا في ميدان عام .. لإن السحر والشعوذة هو ثاني الكبائر بعد الشرك بالهل ومن اتي عرافً أو دجالاً فقد كفر بما نزل على محمد ... ولا تُقبل صلاته لمدة 40 يوم لو صلى لمجرد إنه راح لواحد منهم ....

وعندك مليون طريقة للعلاج تبدأ من الصلاة والعبادات وقراءة القرآن .. وتنتهي بالذهاب إلى الاطباء النفسيين المحترمين المتخصصين .

وسيبك بقى من الشيخ شاهين والشيخ عفريت .. فكلهم آفاقين ومصلحجية وبيعملوا ملايين من السُذج وضعاف الإيمان ...

ولا مؤخذه إحنا بنقول بالبلدي كده .. إنه شاهين كان نفع نفسه .... لما هو واد فركيكو قوي وبيعالج وبيسخر الجن ... ما كان نفع نفسه الأول ولا يعالج الناس ودوشه وناس خارجه وناس داخله وبوليس بيجري وراهم كل شويه .. وكان قعد كده حط رِجل على رِجل وحجرين معسل قدامه وجاب عيل من الجن دول نزل عليه ملايين زي عفركوش أبن برتكوش بتاع إسماعيل ياسين كده ونغنغو وراح عاش في سويسرا ياكل شوكولاته أو يروح يتزحلق على مرتفعات الهيمالايا ولا تعب ولا دياولو ...

آشتاتاً آشتوت .. وداستور يا مباركين مالكومش دعوه بسين سين ... ده واد مسكين .. وما بيحبش السمين ...

[نانو]

انا شوفت الراجل ده من حوالي سنتين في برنامج القاهره اليوم و كان مستضيفه حلقه كامله لوحده وطبعا في وجود شيخ خالد الجندي و الحوار كان مستمر بينهم طوال الحلقه و بدون ما الشيخ خالد ينطق كلمه واحده كل اللي شاف اللقاء ايقن وتأكد من حقيقه هذا الرجل المدعي

انه دجال وكذاب و بيستعين بالجن في حل مشاكل ضحاياه يعني بيستخدم الدجل والشعوذه ويستعين بالجن ...يبقي لو الكلام ده فعلا حقيقي ده يبقي كفر بيًن واعتقد انه من الحرام جدا جدا ان اي حد يتعامل مع هؤلاء الدجالين والمشعوذين ويديهم وضعهم في المجتمع و يسيب كتاب ربنا و الاخذ بالاسباب و الذهاب الي الطبيب ويلجأ للكفر ده

[DARWEEN]

حسين شاهين

خالد الجندي

اتنين نصابين وأرزقجيه بأسم الدين

[العمرلحظة]

الأخت الفاضلة أم عبدالله

موضوعك فى منتهى الأهمية وزى ما يكون كده جاء فى وقته

أمس شاهدت برنامج على قناة إقرأ بالصدفة الموضوع كان عن العلاج بالقران والسحر والزواج من الجن وغيره

الأغرب فى الموضوع إنهم إستضافوا علماء الدين على الهاتف من الأزهر ومن المدينة ومن مكة ومن بعض الدول العربية الأخرى

وعلشلن ما أطول عليكى كانت النتيجة ما يلى

1 مافيش حاجة إسمها العلاج بالقرأن

2 مافيش حاجة إسمها سحر

3 مافيش حاجة إسمها واحد متجوز من جنية أو العكس

باختصار جميع العلماء الأفاضل جزاهم الله خير أجمعوا على أن ده نصب وإحتيال على الناس

وللأسف بعضهم يطلق عليهم شيوخ

وبالتالى أرجوكى تنقذى أختك من النصب ده

وعلى فكرة أنا شاهدت البرنامج كله ولم يختلف أحد على ما ذكرت سابقا وطبعا ذكروا من الأيات القرأنية ما يكفى للإيمان التام بما قالوه

وذكروا أيضا كل الإختلافات التى تعارض الناس عليها وطريقة الفهم الخاطئ لها

واعتقد إن الموضوع لسه ليه بقية على قناة إقرأ فتابعى القناة يوم السب فى الثامنة صباحا وعسى أن تجدى ما يشرح قلبك

والسلام عليكم

تم تعديل 20 مايو 2007 بواسطة العمرلحظة

[Ghost]

مافيش حاجة إسمها العلاج بالقرأن

قال تعالى " وننزل من القران ما فيه شفاء و رحمة للمؤمنين" لكن الممارسة الخاطئه لا تستلزم انه لا يشفي

مافيش حاجة إسمها سحر

قال تعالى عن سحرة فرعون "و سحروا اعين الناس و استرهبوهم و جاءوا بسحر عظيم " السحر موجود و له تاثير بأذن الله و ممارسته من الكفر و الموبقات

[DARWEEN]

مافيش حاجة إسمها العلاج بالقرأن

قال تعالى " وننزل من القران ما فيه شفاء و رحمة للمؤمنين" لكن الممارسة الخاطئه لا تستلزم انه لا يشفي

أظن أن القصد هو من يستغل القرآن لأغراض الدنيا والمال والشهرة .. أمثال هؤلاء هم من يشوهون الدين بأفعالهم

يرتدون ملابس الشيوخ ويطلقون اللحى

يظهرون على شاشات الفضائيات مدعين الورع والصلاح وهم لا يسعون إلا إلى زخرف الدنيا من مال وشهرة وغيره

يعظون بما لا يفعلون ... ويمثلون علينا أدوار التقاة أمام الكاميرات ليقبضوا من الفضائيات الألاف

[المصرى اوى]

1 مافيش حاجة إسمها العلاج بالقرأن

نرجو ان تخبرنا ايها السيد الفاضل بما جاد اللة عليك من العلم الوفير

بما تراة من تفسير قولة تعالى

(وننزل من القران ما هو شفاء ورحمة للمؤمنين)

2 مافيش حاجة إسمها سحر

ظل الناس أمداً طويلاً يجهلون حقيقة السحر وطبيعته فشغفوا فيه وأحاطوا السحرة بالتقدير والتبجيل حتى تكشفت حقيقة السحر والسحرة، والسحر عبارة عن صناعة ولغة هو الأخذة. وسحره بمعنى خدعه، وقد ورد السحر في القرآن الكريم في آيات عديدة بلغ عددها أثنين وستين موضعاً. وقد كشف القرآن الكريم حقيقة السحر ولم يسلم بقدرة السحر الخارقة.

والرابط سيوضح المطلوب

http://www.fustat.com/reader/hamida_11_03.shtml

تم تعديل 3 يونيو 2007 بواسطة المصرى اوى

[se_ Elsyed]

1 مافيش حاجة إسمها العلاج بالقرأن

نرجو ان تخبرنا ايها السيد الفاضل بما جاد اللة عليك من العلم الوفير

بما تراة من تفسير قولة تعالى

(وننزل من القران ما هو شفاء ورحمة للمؤمنين)

2 مافيش حاجة إسمها سحر

ظل الناس أمداً طويلاً يجهلون حقيقة السحر وطبيعته فشغفوا فيه وأحاطوا السحرة بالتقدير والتبجيل حتى تكشفت حقيقة السحر والسحرة، والسحر عبارة عن صناعة ولغة هو الأخذة. وسحره بمعنى خدعه، وقد ورد السحر في القرآن الكريم في آيات عديدة بلغ عددها أثنين وستين موضعاً. وقد كشف القرآن الكريم حقيقة السحر ولم يسلم بقدرة السحر الخارقة.

والرابط سيوضح المطلوب

http://www.fustat.com/reader/hamida_11_03.shtml

يا أخ مصري

إنت ردودك في كل الموضوعات عنيفه ليه ؟

لا داعي أن تتهكم على أد .. وإذا كان إنت عندك هذا العلم .. فياريت تفيض علينا عشان ننهل منه ...

المقصود بالعلاج بالقرآن يا أخي هنا هو العلاج العضوي

يعني لو سيادتك عندك مغص كلوي لا قدر الله ... فبتوقم تقرأ لك آيتين أم بتذهب إلى الطبيب ؟

والمقصود بهذه الأية

وننزل من القران ما هو شفاء ورحمة للمؤمنين

هو شفاء الصدور ... فمستحيل تلقي حد بيقا القرآن ويتدبره وتلاقيه تعبان نفسياً .. أو يحقد على الأخرين .. أو ما يحبش أخوة الإنسان

أما التداوي فلقد أمرنا به الرسول نفسه .. وبأن نأخذ بالأسباب ونتعالج عند المختصين مش عند الدجالين ...

حتى السحر ... فما فيش شيء بيضر أو ينفع إلا بإذن الله

[medos]

{هَاأَنتُمْ هَؤُلاء حَاجَجْتُمْ فِيمَا لَكُم بِهِ عِلمٌ فَلِمَ تُحَآجُّونَ فِيمَا لَيْسَ لَكُم بِهِ عِلْمٌ وَاللّهُ يَعْلَمُ وَأَنتُمْ لاَ تَعْلَمُونَ }آل عمران66

يا جماعة, السحر موجود ومذكور في القرآن الكريم ولا يضر إلا باذن الله , وعلاج المسحور موجود في السنة والقرآن, وكذلك علاج الممسوس من شياطين الجن. والجن هم من علم الانسان السحر. انظروا معي في القرآن الكريم

{وَاتَّبَعُواْ مَا تَتْلُواْ الشَّيَاطِينُ عَلَى مُلْكِ سُلَيْمَانَ وَمَا كَفَرَ سُلَيْمَانُ وَلَـكِنَّ الشَّيْاطِينَ كَفَرُواْ يُعَلِّمُونَ النَّاسَ السِّحْرَ وَمَا أُنزِلَ عَلَى الْمَلَكَيْنِ بِبَابِلَ هَارُوتَ وَمَارُوتَ وَمَا يُعَلِّمَانِ مِنْ أَحَدٍ حَتَّى يَقُولاَ إِنَّمَا نَحْنُ فِتْنَةٌ فَلاَ تَكْفُرْ فَيَتَعَلَّمُونَ مِنْهُمَا مَا يُفَرِّقُونَ بِهِ بَيْنَ الْمَرْءِ وَزَوْجِهِ وَمَا هُم بِضَآرِّينَ بِهِ مِنْ أَحَدٍ إِلاَّ بِإِذْنِ اللّهِ وَيَتَعَلَّمُونَ مَا يَضُرُّهُمْ وَلاَ يَنفَعُهُمْ وَلَقَدْ عَلِمُواْ لَمَنِ اشْتَرَاهُ مَا لَهُ فِي الآخِرَةِ مِنْ خَلاَقٍ وَلَبِئْسَ مَا شَرَوْاْ بِهِ أَنفُسَهُمْ لَوْ كَانُواْ يَعْلَمُونَ }البقرة102

فيا ريت قبل ما تتكلموا , تتكلموا عن علم بالموضوع, في على فكرة كتاب رائع من طباعة مكتبة ابن سينا في مصر ممكن تلاقوه في الفجالة بالاسم : السحر والسحرة في القرآن الكريم والكتاب ده تاريخي مش تأليف معاصر..

وبالتوفيق