أهل المحاورات .... ممكن تساعدوا سمبا أبو البنات

[Simba]

بداية كده ان مكسوف منكم لان كل مشاركاتي طلبات في طلبات بس حقيقي انتم ناس بتسفيد منها كتير

الحكاية كلها اني عندي بنتين 8 سنين و 6 سنين جه في بالي مرة واحدة موضوع الخصوصية ربنا يديكم طول العمر والصحة لما يكبروا يا تري من حقهم يكون لهم مساحة من الخصوصية

بمعني انهم يكون لهم ادارج مقفولة علي حاجتهم بعيدة عني

اكيد فهتموني ... ويارب تقدروا تساعدوني

تم تعديل 25 فبراير 2007 بواسطة سمبا

[nancy]

شوف يا سمبا

انا عندى بنتين 14 و11 سنه

سيباهم يعملوا الخصوصيه بتاعتهم بس ده تحت اشرافى

يعنى الصغيرة لسة متهمهاش اوى حتة الخصوصيه دى انما الكبيرة من سنه كده بقت بتكتب مذكرتها وبتكبها بالنجليزى على اعتبار ان ماما جهله .. بس بفتحها من وقت للتانى واعمل مراجع سريعه من غير ما قولها

باعمل نفسى بوضب لهم اوضتهم واعمل فرز للادراج والاوراق

باخد الموبيل من وقت للتانى كانى عوزة اصحى على المنبه بتاعه واراجع

احيانا بادخل على الاميل بتاعها واراجع نوعية الرسائل

وهى ملتزمه الى حد كبير بس انا لو شفت حاجه معجبتنيش بدخل الموضوع ده فى سياق الكلام

واحيانا ادى تنبيه ان احنا مش اب وام كنا خام فى فتره المراهقة لا ناس عادية بيعجبنا ناس وبنتاثر وممكن نحب بس امته الوقت المناسب

يعنى بحوار طويل عن ما مضى وافهم من كلامها هى دماغها فيها اية

بس عموما لازم مامتهم اكتر منك لازم تبقى صاحبتهم اوى وتهزر معاهم كتير ومتعملش عليهم ماما الكبيره الى مش عاجبها الجيل الصغير لا

انا ممكن اسمع معاهم مسارى واشوف استار اكاديمى ونتكلم على راينا سوى فى تصرفاتهم وهكذا

بالصداقة والحوار واللاهتمام بالصلاه والتاكيد ان ربنا شيفنا والقليل من التفتيش المنظم

[الحازم حسن]

انا مش داخل انصحك لاني لسه معنديش اولاد ولسه متجوزتش أصلا

انا بس داخل اقولك ربنا يخليهم لك

واوعدك اول ما اتجوز واخلف بنات ان شاء الله حبئه ابعت لك ع الخاص

[بنت النيل]

الاخ الفاضل سمبا

اعتقد ان اختنا نانسى جزاها الله كل خير قالت كل اللى فى الموضوع واللى كنت فعلا هقوله لك

وعلى فكره يا جماعة الحاجات دى مش المفروض انها تحصل مع البنات فقط ولكن مع الاولاد ايضا

لابد من ان يكون عليهم رقابه برده انا مثلا عندى محمود 11سنة وخلود 7سنوات هما صحيح يعتبرو لسه صغيرين على الحاجات دى لكن عندى الاستاذ محمود مكبر نفسه حبتين ولقيته بادء فى كتابه يومياته وفتلاقينى بعمل معاهم نفس الشىء مع اولاد نانسى فعلا يانانسى انا وانتى كأننا عايشين فى بيت واحد نفس طريقتى مع اولادى

وده فعلا شيىء جميل وبيجب نتيجة كويسه لابد من تحسسهم ان لهم خصوصيات وانها تحترم من جهتنا ولكن بمراقبه ومتابعة مننا بدون مايشعرو بذلك

ربنا يخليهم لك يا سمبا وتشوفهم عروسين منورين الكوشه وبرده هتفضل شايل همهم

مع تحياتى

[Simba]

الاخت نانسي و الاخت بنت النيل شكرا فعلا لاهتمامكم بالموضوع والرد عليه انا لما سألت كان من باب اني مش عايز ادخل في باب هز الثقة بيني وبينهم وكده وكلام انتم عارفينه اكتر مني بس كلامكم مفيد جدا جدا جدا شكرا ليكم

وشكرا للاستاذ الحازم حسين ربنا يخليك ويبارك فيك

[عازفه على أوتار الذهب]

الأخ الفاضل سمبا.....

اسمحلي اتدخل في الموضوع مع العلم اني غير متزوجه.......

لكن دائمآ عندي تخوف من فكرة انه يكون عندي بنات..

حاسه اني ها اخاف عليهم جدآ وخصوصآ في هذا الزمن الصعب...

لكن لابد من الإهتمام ووضع قواعد صحيحه للتربيه فإنجاب الاطفال في حد ذاته بعتبره مسؤليه كبيره....

والحمد لله دايمآ كنت بفكر في ان دي احسن الطرق للتعامل مع الاولاد فيمابعد

والحمد لله الاخوات الفاضلات نانسي وبنت النيل اكدوا صحة تفكيري........

لكن لابد وان يكون ذلك في شدة الحذر يعني مانسيبش اثار ورانا......

لان الابن لو حس ان في اي شئ متحرك من مكانه هيعمل احتياطاته فيما بعد......

ولو شاف الاب او الام وهما بيفتحوا اي حاجه تخصه هتعمل فجوه كبيره جدآ مابينهم.....

يارب تتقبلوا كلامي بصدر رحب لاني في الوسط يعني مش ام ولا بنت لسه محتاجه للنصيحه والحمد لله...

ربنا يوفقكم جميعآ ويحميلكم اولادكم من كل شر يارب........

تحياتي اخي الفاضل سمبا........

وربنا يحميلك بناتك وتشوفهم عرايس زي القمر يا رب.......

تم تعديل 26 فبراير 2007 بواسطة عازفه على أوتار الذهب

[nora]

معلش يا نانسي ومعلش يا بنت النيل انا عيزة اقول حاجه هنا عن تجربه مماثله للسن ده انا شفتو بعنيا محدش قالى وانا بقف في حيرة من الامر ده فانا على معرفه باسرة الام بتتبع اسلوب انها تدي مساحه من الثقه و مصحباهم وبتسمعهم وكل تمام زالام حسه ان كل شيء تمام وميت فل وعشرة وان صداقتها اثمرت كويس جدا لكن لاه انا الي شيفه الجانب الاخر البنت برضو بتخبي وبتداري وبتخرج وبتكلم وبتعمل كل حاجه وتقول لمامتها ان عندها درس او او او او انها بتكلم فولانه وده مش صحيح وانا الي ببقا شيفه بعيني وبسمع والبنت مش بتخاف مني وقفشتها كذا مرة ونصحت بس عمرى مستجريت اروح اقول للام لاني بعتبرها فتنه بس البنت عادي تقولك حاضر وتوعد وابص الاقي لسه مشيه مش مظبوط فالي عيزه اقولو ان الام متديش كل الثقه ولا تسيب الحبل على الخر وتقول دول خلاص صاحبوني الجيل ده صعب اوي بجد وغير كده لاه لازم نعرفهم اننا بنفتش وراهم وان لو معرفتش منك هعرف بطريقتي بلاش تقولو بفتش وراكي دي بس دايما فهموهم ان ليكم طريقتكم بس انا معنديش بنات انا كلهم صبيان ونفسي يكونلي بنات بس ساعتها ربنا يكون في عونهم مني لاني مش هرحمهم!!!!

[Dr.Know]

موضوع المراقبه ده من غير مهما يعرفوا ده وهم للامهات

أعزائي الامهات اليكم الخبر التالي وعن تجربه

هي مش شخصيه انا لسه متجوزتش ولا خلفت اساسا عشان مش متجوز

بس في البدايه مش كل الاولاد

الاولاد لو مش عوزنكم تشوفوا حاجة منتش هتشفوها ولو قلبتم الشقة كلها علي بعضها

دي بدايه وبعدين الحاجة اللي انتي بتشفيها وحاسه انهم ميعرفوش ده وهم او فخ هما حطينه لكم

عشان تحسوا انكم مرقبنهم كويس وعاملين اللي عليكم بس هما اساسا حطين الحجات دي مش في امان ميه في الميه عشان تحصلوا عليها

وتفتكروا خلاص كده اطمنتم

اما بخصوص الاميل فده اكبر وهم مين اللي عرفكم انهم عندهم اكيل واحد

ممكن يكونوا عملين اكثر من واحد بس انتم كتعرفوش الا واحد بس

بس اقدر اقول لكم ان ميه في ميه من البنات خصوصا اللي اهليهم مشددين عليهم وكتمين حريتهم اهم اكثر البنات انحرافا

ولهم علاقات بالبنين مهما كانت قوه هذه العلاقه

اما الاسر المفتوحه شويه وفيها مجال من الحريه ممكن يعملوا بطريقه الشرح السابقه

لهم سرين سر انت بذكائكم تعرفوه وتحصلوا عليه وسر بذكائهم هما انتم متعرفهوش خالص

اما الاسر الاصدقاء وهي ان تعطي الام الثقه الكامله للبنت ان تحكي لها عن جميع اسرارها دون خوف من رد فعل الام

فهؤلاء البنات الاقل وقوعا في الخطر

بس الطريقه دي صعبه جدا علي الام

وخصوصا لو جات البنت في يوم وقالت ماما انا بحب زميلي

هنا الام هتثور وتقول لها ابعدي عنه بدل معمل كذا وكذا وتبدأ بالتهديد

البنت هتقول لها خلاص هبعد عنه وهي اساسا مش هتبعد عنه لانها مش مقتنعه بالكلام ده

انما الام الصديقه هتكلمها شكل لو وحده صحبتك قلتلك انا بحب زميلي في الشغل

شوفي الحالتين هتقولي ايه

عوزين شويه حظر مع البنات وخصوصا في سن المراهقة

د/ نو

بيعرف في كل حاجة

[Alshiekh]

بداية وهذا هو رأيى وما أؤمن به فى تربية العيال ( ابناء وبنات ) على السواء

يجب ان نشعرهم بأننا جميعا كتب مفتوحة داخل المنزل الواحد ، بمعنى ان الكل ممكن يعرف عن الكل كل شيئ اذا اراد ، يعنى فى ادراج مقفولة بالمفتاح ومتاحة فى نفس الوقت ، كل واحد معاه تليفونه لكن لا يخبأه ولا يشعر بالضيق اذا لمسه شخص آخر من الأسرة.

يجب ان نقنع العيال بأن اسرارهم معنا اأمن من تركها مع الأصدقاء ، فلن نفشى اسرارهم فى يوم من الايام ، ولو رأينا ان هناك خطئا ، فسوف نقوم بالنصح والتوجيه بما لدينا من خبرة فى الحياة تفوق اصدقائهم.

أعلم ان بعضهم لن يتقبل الأمر بسهولة ، أو سيكون له اسرار يخشى او يخجل من البوح بها ، ولكن واجبنا ان نختلق القصص والاعذار لنصل الى اعماقهم كما قالت الأخت نانسى فى موضوع التليفون او المكتب والادراك والحاجات دى. ولابأس ان يكون هناك نسخو من مفاتيحهم الشخصية مع الأم.

أحيانا نخلق قصصا تلميحية عن اناس آخرين للفت نظرهم لخطأ يجب تصحيحه ، والأهم من ذلك أن نعلمهم ان الصدق ينجى ولا داعى للكذب إذا قام احدهم بخطأ ما.

[Simba]

شكرا لردودكم احرجتوني بجد وأن شاء الله أقدر أستفيد منها

ربنا يخليكم كلكم

[Folana]

السلام عليكم ورحمة الله ........

أخى الكريم سمبا.....مادام الكلام عن البنات...يبقى احب اضيف رائى..-_-

قبل مانتطرق لموضوع الخصوصية اللى حضرتك بتتسائل عنه...لازم الاول نستعرض عدة نقاط هامة ...أولها ..متعلقة بالاسرة نفسها باعتبارها المؤسسة الاولى لعملية التطبيع او التنشئة الاجتماعية...

أولادنا يكتسبوا اولى خبراتهم الحياتية منها...ويتشربوا القيم والمعايير والاتجاهات ....وكذلك تعليم قواعد السلوك ......ويكتسبوا مقومات السلوك الاجتماعى...

بمعنى ان الطفل يتعرض فى سياق اسرته الى ممارسات واتجاهات معينة فى تنشئته من قبل الوالدين ( بالكسرة تحت القاف)....وما يمارسون مع ابنائهم من طرق معاملة صريحة كانت أم ضمنية...مقصودة أم غير مقصودة فى توجيهم ونشكيل سلوكهم...

والاتجاهات دى تحدد اساليب التفاعل بين الاطفال من جهة وبين الوالدين من جهةاخرى...واذا كانت تتسم بالسوية او الايجابية يعنى...كالشورى والتفهم والتقبل والتشجيع...والحب والحنان والتأييد والمساواة...

يبقى احنا كده وضعنا اولادنا على اول سلمة فى الطريق الصحيح ...نضيف لكل ده عامل هام جدا..وهو زرع القيم الدينية فى نفس الاطفال وهم صغار...

ولكى تضمن سير نموهم سيرا صحيحا وفى الوجهة المنشودة لابد ان تكون بدايتك معهم صحيحة ......انت يهمك من الدرجة الاولى انهم يكونوا شخصيات اجتماعية معتمدة على نفسها...تستطيع ان تفرق بين الخطأ والصواب...لانك ببساطة شديدة مش حتقدر تتابعهم اينما ذهبوا...(بس انا باعمل كده :huh: :closedeyes: )

اذا لجأنا بقى للتسلط والتشدد والصرامة فى معاملتهم ...فاحنا كده بنعمل على انماء مشاعر التهديد والخوف والقلق ....وبنقتل روح المبادأة والاستقلالية لدى الابناء...ويبدأوا يستسلموا فيما بعد لقرناء السوء...ونبنى انماط سلوكية عدوانية ومضادة للمجتمع.

ولتعلم اخى الفاضل ان العلاقة بين الوالدين هى حجر الزاوية فى المناخ الاسرى.......يبقى بداية لازم نعودهم على الصراحة معانا فى كل شىء....بدون قهر ولا لوم ولا عقوبات...

القضية اكبر من اننا نطلع على خصوصياتهم..لان وارد جدا انهم ينقلوا خصوصياتهم دى عند احدى الصديقات مثلا...

لازم تكون سابقهم بخطوة...سابق تفكيرهم وتتوقع اى تصرف وتكون مجهز له رد الفعل...ولا تنتظر حدوث الموقف....

وحتى لا يتوه منى الحديث فى اساسيات وابعد عن تساؤلك.....

بالنسبة لى...مافيش حاجة يتقفل عليها بالمفتاح دى......وحبا لا أمرا...هم مقتنعين بكده لانى باسمعهم فى كل شىء..وباعيش سنهم...

لانهم اعتادوا من صغرهم انى موجودة فى حياتهم...كل حياتهم ...

والحاجة المستخبية بالضرورة تكون غلط.....وهم لو من صغرهم اعتادوا على هذا وعلى المصارحة بينك وبينهم...تأكد ان مافيش حاجة حتتقفل...لانهم حيبقوا عارفين الصح والغلط....

وللحديث بقية........

[نانو]

اخي سمبا

حتي لا يكون الكلام مكرر

احب اكأد علي نقطه مهمه جدا وهي القضوه من الاهل ... وخصوصا من سن مبكر جدا

ان مافيش اي داعي لاخفاء اي شئ او تفاصيل مهما كانت صغيره بطريقه متعمده

ثانيا التقرب للابناء ومصادقتهم بكل الاساليب الممكنه

ثالثا التفتيش المنظم المنتظم باقل اثار وراه

كل ده و برضه هايخبوا....يبقي فاضل نقطه نحاول نتابعها شويه والاخوه ما تطرقوش ليها

وهيا الاصحاب ....وخصوصا المقربين ....او اللي بيتواجدوا معاهم فترات طويله

زي مثلا الزملاء في الدروس ... ومتابعتهم كويس اوي في تحركاتهم....لان للاسف اصبح باب الدروس ده بيدخل منه شر كتير اوي .....فلوس مع البنت او الولد ....وقت متاح بره البيت .... ولو ما فيش متابعه ورقابه ممكن اوي يحصل مشاكل منه....

ربنا يحمي ولادنا ويبارك فيهم

[Simba]

بالنسبة لى...مافيش حاجة يتقفل عليها بالمفتاح دى......وحبا لا أمرا...هم مقتنعين بكده لانى باسمعهم فى كل شىء..وباعيش سنهم...

لانهم اعتادوا من صغرهم انى موجودة فى حياتهم...كل حياتهم ...

والحاجة المستخبية بالضرورة تكون غلط.....وهم لو من صغرهم اعتادوا على هذا وعلى المصارحة بينك وبينهم...تأكد ان مافيش حاجة حتتقفل...لانهم حيبقوا عارفين الصح والغلط....

فعلا ممكن يكون عندك حق ان الحاجات المستخبية دي تكون غلط ... بس ممكن تندرج تحت حاجات شخصية يحبوا يحافظوا عليها من الاهمال والضياع زي الادوات وكده او فلوسهم

[Simba]

وهيا الاصحاب ....وخصوصا المقربين ....او اللي بيتواجدوا معاهم فترات طويله

زي مثلا الزملاء في الدروس ... ومتابعتهم كويس اوي في تحركاتهم....لان للاسف اصبح باب الدروس ده بيدخل منه شر كتير اوي .....فلوس مع البنت او الولد ....وقت متاح بره البيت .... ولو ما فيش متابعه ورقابه ممكن اوي يحصل مشاكل منه....

فعلا اخت نانو دي مسألة مهمة جدا وبعتبرها مسالة مصيرية في تربية الأبناء

[Diab]

تم إلغاء المشاركة كليا ً بناء علي طلب الجماهير :huh:

آسف يا جماعة مقصدش والله

أنا عايز النسكافيه بتاعي

:blink:

تم تعديل 1 مارس 2007 بواسطة Diab