الشاعره إيمان بكري.....

[عازفه على أوتار الذهب]

الشاعره ايمان بكري....

شاعره مصريه شاهدت بعض اللقاءات لها وعجبتني جدآ كتاباتها وطريقة إلقائها فعلآ اسلوب جديد ورائع.....

كلماتها تتحدث عن كل شئ في منتهى السلاسه والجرأه وبطريقه تجذب الانتباه هي بتكتب عاميه باسلوب جميل....

اترككم مع احدى كتاباتها.....

مافيش حاجه

*************

مانيش عايز خلاص حاجة

ولا محتاج أنا لحاجة

ولو عايز صحيح حاجة مخليتوليش ولا حاجة

عموماً بصوا فيه حاجة ...هقولها بس محتاجه لعقول تفهم.. ولو حاجة

مهيش مفهومة او حاجة ....نفسرها بكام حاجة

نوضحها بكام حاجة وأهى حاجة مع حاجة هتظهر وتبان لنا حاجة

وانا ما بخفش من حاجة مانيش مسنودة ولا حاجة

لكن ما بخفش من حاجة

لكن فرضاً لو هقول حاجة هيحصل إيه ؟ ولا حاجة

هيعملوا إية ؟ ولا حاجة

ولو بعد الشر .. بعد الشر لو واحد من القاعدين من السامعين من الضالين فِهِم حاجة

هَيعملوا إيه ؟ اكيد برضُه ولا حاجة

فنتوكل على الستار لوجه الله نقول حاجة

فيه ناس بتعيش علشان حاجة و ناس بتموت علشان حاجة

و ناس بتموت على الحاجة

و ناس تديلك الحاجه وهى ليها محتاجه

و ناس تديلك الحاجه و تاخد قصادها ميت حاجه

و ناس تكبر تكون حاجه و ناس تصغر علشان حاجه

و ناس منظر ومش حاجة و تلقاه كبير حرس ونفير عليه منظر

وهو جبان وشيخ منصر ولا يبـنش عليه حاجة

كلامى يا خلق فيه حاجة .. لحد دلوقتى فيه حاجه

كلام عادى و بسيط جداً .. ولا فِهشِ ولا حاجة

ما انا ما أقدرش أقول حاجه صحيح نفسى أقول حاجه

وميت حاجه لكن مش قادرة اقول حاجة لأنى لو هقول حاجه

هييجى ناس بتوع حاجه وياخدونى ورا الحاجة

وهو لو سمع حاجه هيعملوهالى ميت حاجه

عموما ... بصو لو حد من القاعدين عايزنى أبلغه بحاجة يقول مايخفش من حاجة

نعم .. فيه إيه؟ ...لالأ مافيش سرقه ولا تهليب ولا تهريب ولا حاجة

وبتقول إيه...مصمصوا إيه.... وخصخصوا إيه....ده كله كلام مفيش حاجه

قضية إيه ..ياشيخ روح خلاص مافيش حاجه

حرامى إيه ... و لكح إيه ... و هرب إيه؟ شــفـافـيـه مافيش حاجة

وبتقول إيه .. لالآلأ عـــيب لافيه تدليس ولاترقيص ولا تدبيس ولا حاجه

سمع هوووس انا حاسس انه فيه حاجة

دقيقة سكات لَتبقى حداد انا حاسس انه فيه حاجه

زمنكوا ياخلق فيه حاجه ولازموا كام و ميت حاجه

ده لو يعنى إذا كان فيه حاجة

انا عن نفسى مش حاسس ولا بحاجة ولا متضايق و لا حاجة

سعادتك برضه مش زَيـىِ مافيش حاجة

أهـه بيقول مافيش حاجة جنابك برضه مش زَيـىِ وعلشان زَيـىِ مافيش حاجة

أهـه بيضحك بيقول مافيش حاجة

ما أنا قولتلكو من الأول مافيش حاجة

عليا النعمه يا اخوانّا مافيه حاجة

و رحمة ابويا ويّا أبوك على إللّى جابوك ما فيه حاجه

وعهد الله . وعهد الله. وعهد الله ما خللولنا ولا حاجه

بقولك إيه خـــلاص خلّص وفركش يلا اخوانا

ومفيش حاجه.............

****************************************

وهعرض لكم بقية كتاباتها ان شاء الله.........

تم تعديل 20 فبراير 2007 بواسطة عازفه على أوتار الذهب

[التونسى]

زين ما اخترتى من شعراء عاميه حاليين

دى لها قصيده رهيبه عن الحمار كمان ياريت تنزلى كلماتها

[لخبطه]

لو عندك خليفة عن السير ة الذاتيه بتاعتها اكتبيها

لانى شوفت لها مافيش حاجه وعجبتني بس للاسف ما عرفتيش دي مين

إلا من ذكرك لها دلوقتى

شكرا عازفه على الموضوع :)

[عازفه على أوتار الذهب]

الأخ الفاضل التونسي ......

اشكر تواجدك اخي الفاضل وان شاء الله الاقيلك القصيده

نا دورت عليها كتير وان شاء الله كتابها هيكون عندي قريب

واقدر انزلك كلمات القصيده.....

*************************************************

الأخ الفاضل لخبطه......

شكرآ على تواجدك...طلبت السيره الذاتيه للشاعره إيمان بكري....

إيمان محمد بكري محمود

شاعرة مصرية, ولدت في القاهرة 1955-01-03, وفيها تلقت علومها الابتدائية والإعدادية والثانوية, والجامعية..

إلى أن نالت شهادة الليسانس في اللغة العربية, والدراسات الإسلامية من جامعة القاهرة, كلية الآداب.(دار علوم 1978)

كتبت الشعر وهى يافعة, وكان لمكتبة والدها دورا رائدا في توسيع مدى رؤيتها, وإطلاعها على أشعار القدامى والمحدثين..

حتى صقلت موهبتها الشعرية, نشرت بعض قصائدها في المجلات والصحف المصرية, تعمل حاليا في تدريس اللغة العربية

للمرحلة الثانوية في مصر,وفى سنة 1990 التحقت بجامعة شعراء العروبة وأصبحت عضوا فاعلا فيها.

عملت بالتدريس ثم انتقلت إلى وزارة الثقافة منذ عام 1992.

الوظيفه الحاليه مستشار أدبي ومدير المكتب الفني بالهيئة العامة للكتاب

فازت سنة 1991 بالجائزة الأولى في مسابقة الشعر التي طرحتها الجامعة.

لإيمان بكرى عدة دواوين شعرية نذكر منها:

1. العزف على أوتار القلب :angry:

2. ومضات قلب يحترق. 3. امرأة في سجل الزمن. 4. عجايب يا زمن. 5. الليل وخصلات الشعر. 6. المصحصحاتي.

7. أعلنت العصيان عليك. 8. قصر الكلام. 9. ذاكرة الأنامل. 10. مختارات لمكتبة الأسرة. 11. الأعمال الكاملة جزء أول.

شاركت إيمان بكرى في العديد من اللقاءات الشعرية التي تحييها الجماعة.

تكتب إيمان بكرى الشعر بنوعيه الحر والعودى ويتميز شعرها بالرقة, وعذوبة الألفاظ, أما مواضيعه

فتتركز حول انشغالها بقضاياها الشخصية خاصة وقضايا المرأة بعامة..

يذكر أن العديد من النقاد والدارسين قد قاموا بالكتابة عن هذه الشاعرة المبدعة, من أمثال

(إبراهيم عيسى ) الذي قدم لها ديوانها (امرأة في سجل الزمان) الذي صدر سنة1993.

والشاعرة إيمان بكري لديها القدرة على الانتشاء بالقصيدة في صورتـــيها الفصـــحى والعامية،

كما انها تقرأ العامية بالمصرية والنوبية، وتحس بالكلمة في مدلولها الانساني الجذاب

وغمست خبز قناعتي

في ملح أيامي العجاف

أتقوت الأحزان ابتلع المرارة

وأرتوي ظمأ الجفاف.

**********************

يارب اكون وفيت طلبك يا استاذ لخبطه......

تحياتي.........

تم تعديل 20 فبراير 2007 بواسطة عازفه على أوتار الذهب

[أحمد رشاد شلبى]

شكرا لك ياعازفه

على هذا الملخص الوافى

عن الشاعره إيمان بكرى

وياريت تكتبى لنا عن موقعها

أو إيميلها لأنى أود مراسلتها

وشكرا لك مره ثانيه

[سهيلة]

شكرا ليكى جدا يا عازفة على اوتار الذهب

بصراحة الشاعرة ايمان بكرىىىى

سكر جدااااااااااااااااااااا

انا بموت فيها شوفت لها لقاءين على برنامج القاهرة اليوم

وكانت تحفة بجد

كلامها خفيف ولكنة يحمل معانى لاذعة قوية لها مدلولات كبيرة

على قضايا مهمة ف المجتمع

تحياتى للشاعرة الهايلة جداااااااااااااااااااااااااا

ايمان بكرى

ويا ريت تحاولى يا عازفة على اوتار الذهب انك تنزلى حاجة تانية من اعمالها

ولكى كل التحية

[عازفه على أوتار الذهب]

الاخ الفاضل احمد رشاد.....

اشكر تواجدك........

لكن للاسف ايمان بكري مالهاش موقع محدد عالانترنت......

*****************************************

الدكتوره سهيله..........

أولآ...حمد الله عالسلامه نورتي المنتدى ومتغيبيش عننا تاني..........

اما عن الشاعره الجميله ايمان بكري انا كمان شفت لقاءاتها على القاهره اليوم

وطريقة إلقاءها الرائعه....و هنزل لكم حلقات القاهره اليوم اللي استضيفت فيها ايمان بكري....

لانها فعلا شاعره رائعه وتستحق الاهتمام............

ودي احدى اعمالها........

تحياتي........

تم تعديل 25 فبراير 2007 بواسطة عازفه على أوتار الذهب

[عازفه على أوتار الذهب]

دستور يا أسيادنا

*************

دستور يا اخوانا يا بعدا

لأ سوري دستور م البعدا

محبوس حابس يا سيادنا

و بكاكي من فوق مدنة

و ورايا ديوك بيكاكو

حرصوا عالباقي معاكو

بركة مولانا هولاكو

حلت و علينا اللعنة

طرطور طرطر طراطير

بيغروا فالدساتير

و لا عاد فالحتة كبير

و يا وارث تورث مين

ما الورث إتباع و إتبعنا

نرجع تاني لموضوعنا

و بيان لديار الإفتا

من جمهورية زفتا

لعبو و عملوها إستفتا

صوت ياللي سامعنا

و قوللي ملك ولا كتابة

أسد شبل ف الغابة

و احلف وحياة راس بابا

زفة فمولد كدابة

و الله يجازي اللي خدعنا

للجوكر ألف تحية

ملعون خاش الحرية

يحيا قانون العبودية

و القوانين الوضعية

و الحكومات الشمولية

لها مني ألف تحية

وحياة أمي دي رجعية

و لو صوتنا و جعجعنا

واحد ولافيش غير هوه

قاعد متربع جوة

و بكيفك أو بالقوة

لو سوبر مان و فتوة

روح قله بقى يودعنا

عصابات شغل فتوات

و إستعباط على حركات

و السقا أبوه لو مات

حيقوم يسقي الشربات

و يكمل على مواجعنا

مزيكة و تراباتتو

و نفديك بالدم.. إفدوه

بس إحنا ورحمة أبوه

مين ده اللي حيلوي دراعنا

روح هاتلي لمون بالصودا

انا حاسة بريحة شوطة

حيصعدوا فصل الروضة

و الورث حيصبح موضة

لم الجدعان و اتبعنا

على قهوة ساقية مكي

نصرخ نلطم و حنبكي

ده ناويها و بيتكتكلي

قبل ما حتى يودعنا

ظقططوا يا عيال قولوا هيه

الحكم صبح تيك أواي

لو عايز قول أوكيه

و لو رافض قول أوكيه

في كلا الحالتين نوو واي

غير كودية و زار ينفعنا

لأنا عايزة بخور م الجاوي

و حمار أرمل و حصاوي

و دراع برغوت مش غاوي

تنطيط عفريت و مخاوي

شلة مقاطيع يقطعنا

حابس من شر الكرسي

من شر عزيزة و مرسي

من قرص النمل الفارسي

م الأحياء و الأموات

من كايرو إلى بغداد

أشتات أشتوت أشتات

حرصوا من لعب السيكا

م الحكشة و م البولوتيكا

و لا تشمت يوما فيكا

مارشيل بنت أم ماريكا

قول حاجة الله يهديكا

و ادعي معايا يخليكا

حلوا بقى عن أوجاعنا

و انصرفوا عليكوا اللعنة

انصرفوا عليكوا اللعنة

[inas]

شكرا يا دهب الشاعره ايمان بجد رااااااااااائعه

بعض المعلومات عنها

إيمان محمد بكري محمود

تاريخ الميلاد 1955-01-03

المؤهل الدراسى دار علوم 1978

المؤهل العلمى مستشار أدبي ومدير المكتب الفني بالهيئة العامة للكتاب الوظيفه الحاليه

• عملت بالتدريس ثم انتقلت إلى وزارة الثقافة منذ عام 1992. الوظائف والمناصب السابقه

الشعر ـ الشعر الغنائي التخصص الادبى

تاريخ الانضمام الى الاتحاد 1994-06-27

المؤلفات الأدبيه

1. العزف على أوتار القلب. 2. ومضات قلب يحترق. 3. امرأة في سجل الزمن. 4. عجايب يا زمن. 5. الليل وخصلات الشعر. 6. المصحصحاتي. 7. أعلنت العصيان عليك. 8. قصر الكلام. 9. ذاكرة الأنامل. 10. مختارات لمكتبة الأسرة. 11. الأعمال الكاملة جزء أول.

من أقوال الاعلام

ـ لهاحوالي 30 أغنية تذاع بالتليفزيون ـ هناك أوبريتات خاصة بالأطفال ـ مثلت مصر في كثير من المهرجانات الشعرية على المستوى المحلي والعربي.

هحاول اشارك معاك ببعض قصائدها ان استطعت

شكرا مره اخرى :rolleyes:

تم تعديل 25 فبراير 2007 بواسطة inas

[inas]

جبت ليكم قصيده بعنوان كلنا بحبك يا حمار

وصله

[inas]

ويلٌ للعاشقين

حبٌ على لهفِ شوقٍ يئنْ

قلبٌ يذوبُ منَ الهوى.. قدرٌ يضنْ

وأنا على شفتي الظمأ أهفو الى

نبعٍ جرى من جوفِ بركانٍ يَـجِنْ

فإلى متى يحيا الفؤادُ معذبا

متشوقاً يسعى إلى نبضٍ يَـحِنْ

قلبٌ أنا في العِشقِ يبغي رشفةً

أو قطرةً كي يستكينَ ويَطمَئنْ

وحبيبُ قلبي في هواه مقيدٌ

فمتى يفكُ قيودهُ كي لا أجَنْ

أنا في انتظارِ مواسمي وكأنني

لحنٌ شدا وغفا على وترٍ أغنْ

طرقَ المشاعرَ دون إذنٍ باللقاءِ

فتحتُ أبوابَ الهوى ما قلتُ مَنْ ؟

فغدا مليكا ثم بعد مَلكْتُهُ

وسقيتهُ نبعَ الحنانِ بغيرِ مَنْ

أهديتهُ عمري وأحلامَ الصبا

وإذا أرادَ بقيةً لا ..لن أضِنْ

ويلٌ للعاشقينَ جميعهم

ذاقوا العذابَ ليبدعوا في كل فنْ

وأنا أسارعُ باللقاءِ لأشتكي

منه .. إليه .. لأنه .. ولأن .. أن

فإلى متى أشقي بغلةِ لهفتي

والوقت طال ولن يجئ ولم يحن

فغرقت في بحر القصيد بحلم أن

مستفعلن .. متفاعلن ..مستفعلن

[inas]

تقول بكري في قصيدة أخرى:

فلتقرؤوا هذا الخبر

قبل انعقاد المؤتمر

فأنا الأكاليل·· العذاب

أنا الوجود

أنا الغياب

أنا النبوءة والمطر

نصر على كف الحروف

أنا النوازف والسيوف

أنا الوليد

أنا عمر

أنين سنبلة عوت بكفها

بعث لفجر منتظر

مدن الحصار مدائني

وأنا الدموع الشاخصات

أنا القصيدة والضجر··

وأنا الرمادي الموحد في الرماد

أنا الضياء المشرئب على شواطئ تفتقر

ديك الأساطير محنط

فوق أعلاف السنين

أنا تلال الياسمين

وأنا العجائز والصغار

وأنا بريد الانتظار

تحتل ذاكرتي الرياح

دمي تفقسه الرماح

أنا المباح لكل طاغية عبر

تم تعديل 25 فبراير 2007 بواسطة inas

[shahd]

شكرا عزيزتي على هذا الاختيار الرئع

[se_ Elsyed]

ها هي شاعرة أخرى تقف على خط النار في مواجهة السُلطة الديكتاتورية المباركية .... بلسان أقوى وأدق تصويباً من البندقية

إيمان البكري = واحده ست بمية راجل

دي مجموعة من القصائد الزجلية النارية لها

مكاريناا

ديك تا تور

البغبغان

زنزن

[nor fahmy]

ياحبايبنا ياحلوين

هذا الموضوع تم نقله من مدونه فاسكونيا

عيب عليكم النقل دون ذكر المصدر

مش كده ولا أيه

[kokomen]

شكرا عازفة الاوتار

شاعرة كبيرة جدا من العيار الثقيل وقصيدة رائعة جدا ومعبرة عن ما يعانيه المصريين

سؤالي هل الشاعرة لها صلة قرابة بالأستاذ الصحفي الكبير مصطفى بكرى المناضل العنيد ؟؟؟؟؟؟؟؟؟؟؟؟

شكرا لكى وللشاعرة الكبيرة

أبو أحمد الأسكندراني

:hearts: :blink: :huh: