ترحيب بدون حدود

[أبو حميد]

دائما ما أجد عدد الزوار يفوق عدد الأعضاء بضعف أو ضعفين وأتسائل لماذا لا يشتركون مش معقول مفيش ولا موضوع عاجبهم ومش معقول معندهمش حاجة واقفة على لسانهم عاوزين يقولوها أكيد عندهم كلام ومانعهم الخجل طب ومكسوف من أيه؟

إلى كل هؤلاء الزوار أقول أنتم جزء مهم من المحاورات فالمحاورات عبارة عن محاورين وقراء يا ريت تتنقلوا من القراء للمحاورين.

أدخل وأكتب وطلع اللي جواك هتلاقي اللي يقدر كلامك خايف محدش يفهمك مش مهم المهم تقول رأيك وتعبر عن نفسك المهم اتأكد أن مفيش حد هايقلل من شأنك ولا حد هايكسفك وزي ما أنت شايف كل المشتركين هنا محترمين. ولو شايف أنك مش هاتعرف تتكلم وتكتب زي الموجودين هنا هاقولك تبقى غلطان طالما عجبك الموقع يبقى ها تعرف تعبر عن نفسك بسهولة.

أنا عارف أول مشاركة صعبة. خلاص أدخل هنا وقول أنا بحبكم وعاوز اكون منكم وهتلاقينا بنرحب بيك كلنا.

سجل أسمك وهاتلقى نفسك بعد شوية بتنسى نفسك في محاورات ومغامرات وحاجات كتيرة ما بتتنسيش.

تم تعديل 10 فبراير 2007 بواسطة أبو حميد

[رمضان]

بالفعل اخي ابو حميد لقد لاحظت هذه الظاهرة وبالاخص في اليومين الاخيرين تشاهد اعضاء وزوار كثيرين ولكن دون ان يتفاعلوا في المنتدى فقط للمشاهدة .

لقد تغيبت يوم كامل عن المنتدى وفي اليوم التالي وجدت المواضيع كما هي بدون تغيير اللهم موضوع او موضوعين .

[inas]

فعلا انا لاحظة الظاهره دي كثرة عدد الزوار الذين يفوق عدد الاعضاء المتواجدين

يريت تشاركونا اكيد هيكون ليكم راي يا مؤيد او مخالف اهو نتفاعل معا لمعرفة وجهات نظر الجميع واكبر عدد ممكن

وهنرحب بيكم في محاوراتنا الجميله ولما تشاركونا عمركم مهتسيبونا :ninja: :huh:

بقول الكلام ده لان كنت زيكم في يوم من الايام من المتفرجين ودلوقتي بقيت من المتحاوريين :closedeyes:

وبجد الاحساس مختلف تماما :unsure:

جربوا ومش هتندموا وهنكسب اكيد اصدقاء نعتز بهم :lol:

اول خطوه سجل والي سجل اول خطوه ابداء راي في اي موضوع ولو بكلمه مش ممكن ميكنش في اي موضوع استفزكم وشجعكم على ان تشاركونا في بيتنا الكبير

اهلا بيكم وشكرا ليك يا ابو حميد على المبادره الحلوه دي

[nora]

والله انا شيفه حالة الركود بقت حاجه صعبه وحسه اني بكلم نفسي اصلا بس عامة اعتقد ان في كتير من الزائرين اعضاء وانا منهم لان عندي مشكله اصلا مبتسمحليش اني اكون مسجله الا وقت الكتابه بس على الاقل بدخل اشارك عقبال الباقين يارب

فياريت نشوف مشاركات سواء من الزائرين او من الاعضاء هل دي حالة ملل ام انشغال ام ماذا؟؟

[أبو حميد]

حتى لما فتحت موضوع جديد علشان الناس اللي مش مسجلين على الموقع وخايفين يدخلوا وعلشان الناس اللي سجلت وما بتشتركش كل اللي حصل أن الناس النشيطة بس هي اللي ردت عليا.

مواضيع جديدة يا عالماو ردود على المواضيع القديمة.

شوية نشاط علشان نمنع الإحباط.

[Scorpion]

اشكر ابو حميد علي المبادرة دي .. و اللي بصراحة كنت متوقع انها حتحفز الأعضاء الجداد علي المشاركة ...

يا جماعة ما هو مش معقولة مافيش حاجة واحدة ما بتشجعكومش علي انكم تشاركوا برأي .. بفكرة .. طب انت سجلت ليه من أساسه ؟ ما كنت تفضل زائر و خلاص ... بس كونك سجلت كعضو فده أكيد لأنك حبيت تقول حاجة ...

اتكلموا ...

اتكلموا .....

ده حتي محمد منير قالها ... اتكلموا .. قدموا نفسكم ... احكوا عن احلامكم ... عن مشاكلكم ...

طب انا بدعوكم لأول خطوة .. حاجة سهلة و مافيهاش اجهاد .. فيه موضوع اسمه سبب وجودي في المحاورات ... ( دوسوا علي العنوان الأزرق و هو حيوصلكم هناك )

ابتدوا بيه ... اهو حاجة تكسر الجليد في الأول و تشوفوا ان العملية مش صعبة قوي يعني ...

ياللا يا شباب .. ورونا الهمة

[عبده بيه]

المحاورات صديق وحبيب

نورتوا عليا

[memo2007]

الموضوع كله ان المشاركين الجدد بيحبوا يشوفو معظم المواضيع ويقوموا بعمليه القراءه ليها

عشان يعرفو كويس المكان اللى هما دخلوه بيتكلم عن ايه عشان يعرف شخصيه المحاوريين الموجودين

اعتقد ان ده بياخد وقت

[أبو حميد]

أحب متابعة الأرقام ولاحظت في الفترة الأخيرة تزايد تدريجي في عدد الزوار ووقت كتابة هذه المشاركة كان عدد الزوار 118 زائر ولأول مرة منذ شهرين أو ثلاثة "في أثناء وجودي بالمنتدى" يزيد عدد الزوار عن المئة والاحظ أيضا زيادة عدد المنضمين الجدد للمحاورات وإن كان قليل منهم من بدأ في الإشتراك في المواضيع المختلفة.

أجدد دعوتي لمن أنضم حديثا للمحاورات بالمشاركة ومن لم ينضم وينتظر أنصحه بسرعة الإنضمام.

[yacho]

شوف يا ابو حميد .. انا حقولك حاجه لازم احنا الاعضاء اللى عارفين بعض الى حد ما

وبنكلم بعض عادى وبنهزر مع بعض بكل موده واحترام .. نرد على مشاركات الاعضاء الجدد

ونهتم بها وان لم يكن هناك رد .. فنرحب بيهم .. ده شئ بيسعد اى عضو جديد انه يحس انه لفت

الانتباه له .. لان اى زائر بيستكشف لسه المنتدى بيلاحظ ان الاعضاء عارفين بعض كويس

فبيبقى متردد يدخل بينهم لحسن ماحدش يهتم بيه .. وده حصل معايا انا شخصيا وما افتكرش

ان انا لوحدى .

على سبيل المثال اثناء تصفحى لبعض الموضوعات القديمه .. لاحظت بعض الموضوعات لاعضاء

جدد واضح من عدد مشاركاتهم .. بتكون عن استفسار او طلب لمعرفه شئ .. تلاقى عدد الردود 0

ممكن مايكونش عندنا رد على السؤال .. لكن لو كل واحد عدى على الموضوع .. ترك ترحيب بالعضو

واعتذار عن عدم القدره على مساعدته .. حيكون بيضع اول حجر فى تثبيت عضو جديد مازال حاسس بالغربه

بيننا واعطائه الثقه اللى ممكن تظهر بعد كده فى شكل مشاركات او موضوعات ايجابيه وفعاله تثرى المنتدى

واعضاؤه ان شاء الله .

فتعالوا من موضوع ابو حميد نتفق ضمنيا اننا نحاول قدر المستطاع الرد بكلمه على اى عضو جديد

ومحاوله عدم اهمال مشاركاتهم .

تحياتى للجميع

تم تعديل 23 فبراير 2007 بواسطة yacho

[Scorpion]

أتفق جملة و حرفآ مع مداخلة العزيزة yacho ... لذلك علي قدر المستطاع فلنحاول معآ ( و سوف أبدأ بنفسي ) الا نجعل الأعضاء الجداد لا يشعرون بوحشة في اولي خطواتهم في محاورات المصريين .. بل بين أهل حقيقيين ...

yacho

[yacho]

أتفق جملة و حرفآ مع مداخلة العزيزة yacho ... لذلك علي قدر المستطاع فلنحاول معآ ( و سوف أبدأ بنفسي ) الا نجعل الأعضاء الجداد لا يشعرون بوحشة في اولي خطواتهم في محاورات المصريين .. بل بين أهل حقيقيين ...

yacho

ميرسى اخى العزيز سكوربيون عالورد الجميل.. :)

تحياتى لك

[أبو حميد]

YACHO الله ينور عليكي وأنا أقوم فعلا بذلك كلما رأيت مشاركة أولى أو ثانية لعضو جديد حسب ترددي على المنتدى وياريت اللي بيعملوا كده يزيدوا علشان نكسر الوحشة التي أشرتي إليها ونساعد من هم في بداية مشوارهم التدويني.

[رمضان]

فعلا يا استاذ ابو حميد لابد لنا من ان ندعم الاعضاء الجدد ولو حتى على سبيل التشجيع حتى يدخلوا في جو المنتدى سريعا

[yasserali]

يا جماعة ما هو مش معقولة مافيش حاجة واحدة ما بتشجعكومش علي انكم تشاركوا برأي .. بفكرة .. طب انت سجلت ليه من أساسه ؟ ما كنت تفضل زائر و خلاص ... بس كونك سجلت كعضو فده أكيد لأنك حبيت تقول حاجة ...

اتكلموا ...

اتكلموا .....

انا اعتبر عضو جديد و اعجبني المنتدي فعلا لفكرته و هدفه و لكن افسر ظاهره زياده الزوار و عدم مشاركاتهم بتفسير واحد فقط و هي انعدام روح المشاركه الهادفه فنجد منتديات الموسيقي و الافلام اكثر زورا و اعضاء و بها مشاركات كثيره و ذلك للحصول علي الاغاني و الافلام (للتحميل )

لذلك نجد هنا مواضيع كتابيه هادفه و لا يوجد افلام للتحميل او موسيقي (تامر حسني ) فنجد الزائر يهرب كالزئبق من الموقع بعد مشاهده مواضيع ثقيله مجلبه للتفكير و لكنها في النهايه هادفه و شكرا

[Dr.Know]

ثواني وواحدة واحدة واحنا هنعرف السبب

فيه مواضيع تهنئه للاعضاء القدامي اعياد ميلاد هيتجاوز حد الالف اي شئ من هذا القبيل شوف الترحيب بيوصل كام صفحة

تعالي لما واحد جديد يخش يعرف نفسه الصفحه بتكمل بالعافيه فيحس انه غريب في وسط الناس دي

ومش قادر يخش جوه الدايره القويه دي

في الحقيقة الواحد اول ما يخش المنتدي ده بيلاقي الكل هنا اصحاب بطريقه غريبه يتمني من اول مره يكون صديق ليهم كده

فيشترك يمكن من اول زياره للمنتدي ويقوم يشارك ويقول رأيه يلاقي الاعضاء ردوا علي المداخلات اللي قبله واللي بعده وهو اتنسي

يحاول تاني ومفيش حاجة بتحصل وهو اساسا مش متعود يخش كل يوم ممكن ينسي يوم او اثنين وميخشش ويرجع تاني لحد ما يمل وميكملش

وبعدين طبيعه المنتدي هنا ثقافي اكثر منه متعه يعني مش هيقصده كله يوم لينزل اغنيه ولا فيلم من اي مداخلة

لا اللي عاوز يتكلم هنا هيلاقي نفسه داخل في نقاش حاد لمواضيع مهمه ودي بتدي نوع من الهبه لان الواحد بيفكر نفسه مش هيقدر يكلم الناس دي لانه

فاكر ان الناس دي عباقره

مثقفين لاقصي درجة مع العلم انهم كذلك بس هو بيحس انهم مش هيخده بالهم من مداخلاته

بس بالعكس هناك البعض بياخد باله ويرد ويشجعه

وهنا بنطالبق بالتشجيع حتي لو غلط في الاول مش غلط بالمعني المعروف

يعني لو اقبس حاجة من موقع تاني عشان يخش بيهاميجيش واحد في الاول يتهمه انه هو حرامي والكل يهجم عليه ناقشه ممكن يفيد بحاجة او عاوز يقول حاجة

بس انت كده خوفته انه يتكلم

فكونوا رحماء بالاعضاء الجدد

[inas]

اكيد عندكم حق لازم نشجع الاعضاء الجداد ولو بكلمه شكر

وعدم احراجه بالنقد اللاذع او التجاهل وبدل منشجعه كاننا بنقوله امشي من هنا ملكش مكان وده غلط طبعا

شكرا ليك يا ابو حميد

[deemuck]

الرفع للاهمية.

[ليالي الغربة]

السلام عليكم .والله انا بقالي حوالي يومين مسجلة وبس وانا كنت من الناس الي بتتكلم عنهم يعني بدخل المنتديات فقط ليس هذا المنتدى بس ولكن العديد غيره ولكنني لا اشارك لأنني بصراحة كسلانة ومش بحب اكتب ولا اجد الوقت الكافي للقراءة والرد وكم من مرة جربت ان اسجل ولكن اغير رأيي واقول يعني ايه الي هزيدوا واضيفوا عن غيري من الموجودين ولكن هذا المنتدى شدني فعلا وقررت ان اشارك فيه ولكن انا برأيي ان سبب هذه الظاهرة وانا سأتكلم من واقع تجربتي فقط هو انني كما قلت كسولة قليلا كما ضيق الوقت عندي وسلبيتي او وحدتي التي تعلمتها من الغربة جعلتني احب الصمت وهو صمت قاتل . . على العموم ها قد كسرت حاجز الكسل والصمت والسلبية بس قلبي حاسس الحكاية مش هتستمر كتير :pasha:

تحياتي للجميع في هذا المنتدى وربنا يقويكم وجميل ان نرى اناس نشطين وايجابيين وعندهم افكار وطموحات كبعض الأعضاء النشطين هنا

[عازفه على أوتار الذهب]

أهلآ بيكي يا ليالي الغربه.....

واكيد هنا هتقدري مع الوقت تكسري كل الحواجز....

واكيد هنا مش هتحسي بالغربه بين اهل بلدك.....

عايزين نشوف مشاركاتك معانا وربنا يوفقك يارب....

********************************

واشكر الاستاذ الفاضل ابو حميد على اضافة هذا الموضوع

لانه ناس كتير لاحظت انهم بدؤا يسجلوا بعد اضافتك لهذا الموضوع من فتره......

لكن فعلآ واجب علينا التشجيع زي ما قال د.نو عشان العضو الجديد ميحسش بالغربه والملل....

وربنا يوفق الجميع......

تحياتي.....