أريد شراء سيارة بالكويت ..... أطلب مشورتكم

[مصري في الكويت]

السلام عليكم .. كيف الحال جميعا

يا جماعة انا فعلا محتاج استشارتكم في موضوع محدش عارف يفيدني فيه خالص

انا عايز اشتري سيارة جديدة اكون انا المالك الأول واخدها بعد كده معايا مصر بشكل نهائي لكن في ناس بتقولي فكرة كويسة والاغلبية بتقولي حرام عليك هتبقي غالية قوي وهتدفع اضعاف ثمنها في مصر دي حاجة

الحاجة التانية تقترحوا علية اني اشتري سيارة نوعها ايه بالظبط وايه الافضل وبالظبط بالظبط بقي هيكون مصاريفها قد ايه في الشهر ... انا عايز سيارة يكون قسطها في حدود 40 إلي 50 دينار ومش عايز اجيب سيارة كل يوم اروح أعمل لها صيانة علي فكرة انا معرفش اي حاجة عن السيارات خالص ولسه هبدأ اتعلم القيادة كمان وبلاش حد يقولي مشكلة الرخصة ان شاء الله هتيجي ومفيش مشكلة منها المشكلة اني مش عارف السيارة بقسطها وتكاليفها هتكلفني قد ايه ... وبلاش حد يبص لي علي اني بخيل الله يخليكم ومش عايز ادفع قسط كبير .... بس انا كمان مغترب مثلكم وفي الاخر عايز اوصل لأفضل النتائج لغربتي .... شكرا ليكم قوي ...

تم تغيير العنوان ليعبر عن محتوى الموضوع

تم تعديل 8 نوفمبر 2006 بواسطة Advisor

[النسر المصري]

ياصباحو الرايق ياسي مصري...انت عامل ايه!! انت كويس!!!

بس بقى ياسي مصري...انا احد المغرمين بعالم السيارات....ودائما ما اشتري السيارات التي يخاف منها الناس..الكبيره منها خاصة

كان عندي كاابريس وكاديلاك .وحبيبة العمر توتي ...دي بقى كانت بي ام دبليو بيضاء اللون وبيضاء لفرش وايضا من الفئة السابعه...وحاليا املك جراند ماركيز فل اوبشن ايضا.

ده لان عندي نظريه..كل ماتكبر السايره وتبقى اباشنها وامكانيتها اكبر...فخرابها بيبقى اقل

وده اثبت على يدي علميا ومعمليا

لكن نرجع ونتكلم في الاقتصادي والمظبوط سعرا ..مع قطع غيار معقوله ..وبنزين قليل..وماتشتكيش منها...وتنفع لمصر..وتبقى عائليه وعمليه...وشكلها حلو....

هنا يبقى هاجيبلك راي الأغلبيه العظمى من المصريين والاجانب حى ..بل والكثير جدا من الكويتيين

هما سيارتيين اجمعو الرأي عليهم

التويوتا كرولا..ودي على القد فعلا وحلوه ورائعه في مصر وسعرها رخيص وبنزين قليل لانها اربعه سلندر...بس عشان تستمتع بيها هات الفل اوبشن (ولو ان الفل اوبشن بتاعها مش اوبشن اساسا :sad: :wub:

والسياره الثانيه هي التويوتا كامري

ودي تحفه فنيه وعمليه جدا بردو وتعتبر الا حد ما من فئة العربيات المحترمه

دي عائليه بجد فعلا وحجمها حلو مش كبير ولا صغير وسعر مظبوط جد جدا...وبنزينها بردو مش مكلف لانها سته سلندر..وغير كده تعتيبر من فئة العربيات الفخمه في مصر

دول احسن عربيتيين ينفعو المصري بره وجوه...

على فكره النهارده في معرض سيارات هيتفتح في ارض معارض كشرف..روح اتفرج عليه .وانا اساسا رايح كمان

صباحو رااااااايق

[مصري في الكويت]

اهلا يا نسر يا مصري

استني بقي لما اخنقك الأول نيييييييييييييييييييهاع :sad:

ولا اقولك اخنقك لما تخلص باقي موضوعك

مش تقولي ياراجل قسط السيارة هيبقي كام بالظبط .... ولما اخدها مصر هدفع جمارك قد ايه بالظبط ...

[نانو]

يا صباح الخيرات يا مصري

انا شوفت موضوعك من بدري بس قولت لما نسر النسور يدلي بدلوه

و حصل فعلا

اكمل نقطه علي كلامه

ما فيش عربيه محترمه في الكويت قسطها 40 او 50 دينار

غير بقه الحاطات الصغيره اللي بتشوفها بيستعملوها في توصيل الطلبات...سوزوكي و دايهاتسو و الحاجات ديه

و ديه لا تنفع في الكويت...و لا هتستحمل و تنزلها معاك مصر

بالنسبه للتويوتا كورولا فعلا هي ممتازه بس القسط مش هيقل ابدا عن 90و انت طالع

اما الكامري الجديده فهي رائعه بجميع المقايس بس برضه قسطها هيبقي اعلي

فلازم تعرف ان السعر اللي انت حاطه ده خيالي و صعب اوي تلاقي بيه عربيه جديده محترمه

علي فكره يا شباب انا سمعت ان معرض مشرف ده علشان الفور باي فور و برضه كنا متفقين انا و جوزي نروح النهارده :sad:

الهي ياااااااااااااااااااااااااااااااااااااارب توعدنا كده بواحده هامر :wub:

[النسر المصري]

ياسيييدي ياسييييدي يابتاع الهامر انت يارااااااااايق ياست نانو

ايه الحلاوه دي...اي الطعامه دي ... ايه الجمال ده

هامر...

لييييييييييييييييييييييه.....داخله تحاربي :wub: :)

انا بهزر طبعا...انا فعلا من عشاق الهامر....بس بعشق اولا واخيرا بالسيارات الطويله الصالون الفخمه

وعمري ماجيبت غيرها

حتى ف مصر عندي مرسيدس صالون....بس قديمه شويه ـ(يادي الكسوف :sad: )

عموما ياسي مصري الكويت نانو جابيتلك من الآخر.....انت لازملك تغيير في فكرة الاقساط دي بدام نويت تشتري جديد عشان تجمركها...

بالنسبه للجمارك ياحلو...فانت بتتعامل هناك بفئة السي سي....يمش عارف سعرها هيكون كام...بس هسألك قبل ماتخنقني

صباجكم رااااايق

[مصري في الكويت]

يا جماعة اذا كان البرادو قسطها حوالي 100 دينار يبقي الكاميري هتوصل للقسط ده برضه

عموما ان شاء الله خير بس انا لسه في الأول ومش عايز اعمل حاجة اندم عليها بعد كده

طيب لو انا حبيت اجيب سيارة مستعملة علشان استعملهاهنا في الكويت لحد ما نشوف موضوع السيارة الجديدة دي تنصحوني بأيه ... بيقولوا شركة التسهيلات التجارية كويسة وبرضه شركة الملا

[النسر المصري]

الالالالالالالالالاالالا اوعى يامصري الكويت (الا بالحق انت اسمك ايه؟!!!)

التسهيلات دي او اي شركات تانيه زباله...وارخص فايده فيكي ياكويت هي بيت التمويل

ده غير انك لو حولت راتبك عليها بتديك خصم واحد ي الميه اكتر

تانيا كلام نانو مظبوط فعلا بالنسبه للقسط...وانت كمان كلامك مظبوط

بس هي كلامها مظبوط لما يبقى اقساط على سنتين ومقدم بسيط

وانت كلامك مظبوط لو على خمس سنين ومقدم حلو شويه...لا البرادو الجديد سعره من ثمانيه الاف وشويه فكه لغايه عشره وشويه فكة

واحسبها انت بقى ..خمس سنين وحط عليهم فوايد هيقو كام...الكرولا نفس الموضوع هي تقريبا باربعه وشويه فكه غير الاولانيين...والكامري من خمسه وشويه فكة تالتييين لغايه سته وشويه فكه رابعييين...ويمكن تكون غليت حبه....وشوية فكه خامسييين

صباحو فل عالرايقيييييييييين

[نانو]

برادو قسطها 100 دينار ....ديه فين ديه

ابعتلي و انا انزل اخدها حالا سيادتك

لا يا نسور

هو لازم الفضايح

يا سيدي ان عندي تويوتا كورولا 2006و كنت حاطه مقدم 500 دينار

و بدفع قسط 100و ده علي 5 سنين

و طبعا كنت شارياها علي الزيرو ساعتها من الساير و انت تعلم ان الساير شكره تسهيلاته منه فيه

و بعدين يا نسر بطل تقول علي الفول اوبشن في التويوتا مش فول اوبش اساسا

طب شوفت النافيجاتور اللي نازل في الكامري الجديده.....ماقولكش علي الاوبشن اللي فيها حضرتك ..سيادتك

يا جراند ماركيزك يااااااااااااااااااااااااااااااااااااااااااااااااا نسور

تم تعديل 8 نوفمبر 2006 بواسطة نانو

[مصري في الكويت]

انا اسمي سيف

وبرضه مصر اخنقك يا نسر

مش بقولك تنصحني بأي نوع في السيارات المستعملة اغلب زملائي جايبين مرسيدس بس فيه ناس بتقول اوعا تجيب حاجة قبل موديل 2002 علشان خاطر حكاية الفحص وعلشان ما توجعش قلبك بيقولوا هات اي سياردة بس تكون موديل سنة قريبة

شوف بقي يا نسر قول كل اللي عندك مرة واحدة مش تخليني كل شوية اسألك

[مصري في الكويت]

والله مرة شفت يافطة لسيارة برادو مكتوب عليها تملكها وادفع 99 دينار شهريا ........

وكمان انتي مش عاجبك الفول اوبشن بتاع التوياتا كورلا ...... اقولك احسن حاجة انصحيني اجيب كوتشي ماركة ايه علشان اما اتعبشي من المشي في حر الكويت هههههههههههههههه بلا سيارة بقي بلا بطيخ

[النسر المصري]

اتفضل ياسي سيف...اهي نانو جابتلك من الآخر للمره التانيه عالتوالي

اهي جايبه كرولا وعلى خمس سنين ودافعه 500 دينار مقدم وقسط مية دينار

اما موضوع البرادو اللي انت شفتها دي ...ف د اكيد فيها دفعه اخيره....يعني ادفع 99 دينار شهريا لمده خمس سنين...وبعدين دفعه اخيره 4000 دينار مثلا...وطبعا الدفعه الاخيره للكويتيين فقط

لو كنت عاوز سياره مستعمله فانصحك بنفس السياره كرولا 2002 او 2003 ودي هتكون معقوله يعني ف حدود الألفين والله أعلم....بس الألفين لما تقسطهم على ثلاث سنسن عن طريق بيت التمويل... بيبقو قسط 65 دينار شهريا

وعربية اخويا كده..هو جاب جراند ماركيز موديل 2000 بالفين دينار قسطها على ثلاث سنين طلعو 65 دينار تقريبا

يعني هيزيد عليك تقريبا 300 دينار

او تجيبلك جزمه كوتشي بتنور نور وليها مساحات من تحت...دي ظريفه بردو :unsure: :sad:

على فكره يانانو ...انا البي ام بتاعتي كانت موذديل 98 ..وكان فيها النيفاجيشن وتليفون ودبل جام وفاكس خلفي وطاولات للخلف وشاشات للخلف....تدفئة وتبريد وتدليك للكرسي...واحلى حاجة انها كانت بيضاء..وفرش ابيض بردو...وكانت بتاعت بنت الشيخ سعد

وكنت جايبها عشان هتجوز وقلت ازف فيها بقى وكده....بس بعيد عنك كل اللي رايح واللي جاي كان عينو عليها

جابو اجلها الله يرحمها....والله اني كنت بحبها اكتر من نفسي.......ومش هتصدقي اني قعدت سنه من غير عربيه...اتناشر شهر بالتمام والكمال...عشان كنت بدور على واحدة زيها....لكن واحد صاحبي عنده بي ام بس الاصغر....وبردو كانت فل اوبشن....اهو محتار مش عارف يصلحها وندم انو جابها...فانا قلت انا مش وش الحجات دي...رحت من واخدها من قاهرها وجايب العربيه البقره اللي انا راكبها دي......اهي كبيره وواسعه وظريفه وقطع غيار رخيصة جدا في البقالات

الله يرحمك يا توتي....كانت قمر والله

[ابن الصعيد]

انت لسة بتتعلم جديد

يعنى تخبط وتكسير ورزع

خد بعضك يوم الخميس والجمعة وروح دور على سيارة مستعملة

فى حدود 700 او 800 دينار تتعلم وتكسر فيها سنة

وبعد كدة بيعها واشترى تيوتا كرولا

على الدائرى الرابع فى الرى عند المشاتل السيارات المستعملة معروضة خميس وجمعة

ولا تنسى تفحص بالشويخ

واى خدمة

[مصري في الكويت]

والله انتم ناس دمكم زي العسل

[نانو]

بص يا سيدي

فيه خبر لسه واصلني حاااااااااالا

يعني تجري بسرعه يا واد يا حسين تشوفه

الساير عامل عرض علي تويوتا كامري ....موديل 2004 علي الزيرو علي قسط 65 دينار في الشهر

و العرض هيخلص بعد بكره

و التقسيط علي بيت التمويل

يعني حضرتك تجري تشوف ايه الحكايه...ديه كل المعلومات اللي عندي

و طبعا السعر ده خيالي و السبب ممكن يكون لان الكامري 2007 شكلها اتغير تماما عن الموديلات التانيه

مع ان كلام واحد تايه صح علشان التخبيط

ربنا معاك

بجد يا نسر عندك حق تزعل عليها

انا اصلا اول مره شوفت النافيجاتور كان في عربيه بي ام .....حتي المرسيدس ما كانش فيها

برضه البي ام كشخه

[النسر المصري]

سيف...من الآخر...العرض اللي جايباه نانو ليك ده لن يكررر..أؤكد .لن يكرر

انت دلوقتي يلوقتي تسيب اللي ف ايدك وتاخد معاك حمسمية دينار...وتروح تحجز اي واحده...والا والله هتندم

لان سبق ان صحاب لي كتير جابو العربيه دي لما ندل نفس العرض تقريبا

أؤكد عرض لن يكررررررررررررررر

يلا بسرعه قوام خد بعضك وروح ومش عايز اشوف اسمك موجود في المحاورات الا وانت شاريها

وابقى ادعي لخالتك نانو :unsure:

[mano]

يا صباح الجمال

نصحتي للاخ مصري بلاش تشتري عربيه بالاقساط ده من وجه نظري

عربيه صغيره ياباني كولت مثلا او اي حاجه صغيره نصحتي ليك ابعد كل البعد عن السيارات الفرنسيه

و على راى المثل (كولت كاش ولا حوت بالاقساط) :sad:

حاجه تاني لوعيز تشتري سياره وتنزلها مصر هتطلع اغلى بكتير من انك تشتريها من مصر

بالمناسبه انا عندي جراج في الراى متخصص في السيارات الفرنسيه :unsure:

تحياتي للجميع

[darker19]

مانوووووووووووووووووو انتا فين من زمان, يا راجل ده أنا عندي عربية بيجو 206 مطلعة عيني و الله, ومش لاقي حد يفهملها, لفيت الشويخ حارة حارة و جراج,مالقيتش غير محل قريب من التوكيل.

يعني انا صرفت على العربية دي في أحد المرات 110 دينار عشان تنك البنزين اتخرم و التصليح على حوالي 3 مراحل كل مره جراج وكل مره يقولي قصة شكل.

والوكيل حرامي بكل ماتحمل الكلمة من معنى. تخيل الرينج الواحد بتاع عربيتي ب 90 دينار واربع رينجات بتوع المرسيدس ب 120, العربية دي كرهتني في حاجة اسمها عربيات.

أخر مره من حوالي اسبوعين عملت معايا دقة نقص ويا ماكتر دقاتها, عطلت بيا في طريق الفحيحيل, سحبتها بكرين للجراج النصاب ده قالي طرمبة البنزين بايظة وتمنها مستعمله ب 35 والتركيب ب 20 و فحص الكمبيوتر ب 20 يعني الإجمالي 75دينار.

وعلى الحال ده كل شهر, لازم تعمل فيا مقلب, ويوم ما يبقى عندها أصل تسيبني في حالي شهرين.

أنا كرهت البيجو فعلا و خلاص ناوي أغيرها, بس مش لاقي حد يشتريها, شكلي كده كنت أخر المغفلين.

نصيحة بجد إبعدوا عن السيارات الفرنسية, وجع دماغ وقطع غالية, ومحدش بيعرفلها.

[mano]

انت اكيد واديت سيارتك عند سعيد الحرامي يلا معلش تعيش وتاخد غيرها

شوف السيارات الفرنسيه من احسن السيارات الي ممكن تركبها بس مشكلتها هنا في الكويت الوكيل بتعها فعلا حرامي

سواء كان الستروين او البيجو

على العموم انا تحت امرك

[متمردة]

هاى يا اخ سيف اما لما قريت عنوانك حبيت اشاركك بالراى لان من سنه واحده بس اشتريت عربية

انا من راى انك تشترى عربية حلوة مستعملة استعمال نضيف ونصيحه زى ما نسر قلك تويتا احسن فى حاجات كتير ( فى السعر - البنزين - الصيانه يعنى ممكن تلاقى الصبى الصغير يعرف لكل موديلاتها - البيع انشاء الله بعدين يعنى

خد واحده حلوة بسعر معقول جرب فيها سواقتك وبعدين ابقى بيع واشترى زى ما انت عايز

ومعرفش ازاى الرخصة انت مش قلقان منها ده دلوقتى بقت ب400 دينار

الا اذا كنت بتشعتل فى الحكومة :)

اما بقى انك تنزل عربية مصر فده لازم يكون معاك ميت الف جنية قبل ما تفكر فى اى حاجة

وربنا يوفقك

[بنت النيل]

السلام عليكم

كيفك يا اخ مصرى وعامل ايه فى جو الكويت اليومين دول

شوف ياسيدى بالنسبة لموضوعك ومعلش لسه شايفه دلوقت وهو شراء سيارة ،، اولا فكرة انك تشترى سيارة جديدة ماشى وعادى خالص ولكن تعمل حسابك على انها هتكون اقساط ذى ما قلت يعنى على الاقل هتفضل تدفع فى اقساطها مش اقل من 3 او 4 سنين وده راجع طبعا على قيمة القسط اللى هتدفعه دى حاجة وكمان لما تحب تنزلها مصر هتدفع لها جمارك لاتتوقع انها تكون اقل من 200الف او 250 الف جنيه

الحاجة التانية بالنسبة لمبلغ القسط اللى انت طالبه من 40 الى 50 دينار فده موجود بس تلاقيه مثلا فى هيونداى او ديهاتسو ذى ما قالت نانون كدا اما السيارات اللى قال عليهم النسر بالنسبة للتويوتا هى سيارة ممتازة وكمان مصروفها معقول اذا كانت 4 سلندر لكن برده هتقبلك مشكلة القسط لانه مش هيكون اقل شىء 90دينار او اكثر

شوفى ياسيدى انا حيرتك معاى شوية لكن هقولك فى سيارات مستعمله خفيف وبتكون بحالة ممتازة ونضيفه وبيكون سعرها معقول لكن ابعد عن التسهيلات والاماكن دى انت توصى عليها ناس معرفه ذى مثلا اخونا النسر وتاخدها وتعملها فحص قبل الشراء وتحولها اقساط وقسطها هيكون معقول يعنى ممكن نقول 60 او 65 مثلا بالكتير

وعلى فكره احنا عاملين كدا وبنتعامل مع شركة ممتازة فى الاقساط ومش بتاخد فوايد كتير بعكس شركات تانية

وعملتلنا القسط 63 دينار يعنى ممتازة حتى فى التعامل ومش معقده فى طلبتها ولا ضامن ولا الكلام ده

يعنى من الاخر النصيحه هى شراء سيارة مستعمله تكون بحاله جيدة ونضيفه وتعملها اقساط على سنتين مثلا معقول

وتكون لك هنا وربنا يوفقك