قضيت شهر العسل فين ؟ ...

[واحد تاني]

هقضي شهر العسل فين ؟

سؤال بيسأله كل واحد ناوي يدخل القفص الذهبي برجليه ...

وطبعا الاجابة محتاجة لاهل الخبرة و (السوابق) فى دخول القفص قبل كده ...

ايها السابقون ... افيدوا اللاحقون افادكم الله ...

ياريت يكون الموضوع ده بنك للمعلومات والافكار الخاصة بالاماكن المختلفة التى قضى بها الاعضاء ايام شهر العسل ...

ولا اراكم الله مكروها فى عريس لديكم ... :sad:

[نانو]

اولا الف مبروك الجواز و ربنا يسعدك يارب و تكون حياه سعيده باذن الله

بس انا ليا ملحوظه صغيره ....يعني لو فيها مضايقه ....تاخد بالك و تروح انت بنفسك الفرح يعني بلاش واحد تاني ده

علشان كده هتبقي مشكله :sad:

يعني ممكن تسيب التاني هنا في المحاورات و الاولاني هو اللي يروح ...اوكي علشان بس نلم :wub: الموضوع

شوف يا افندم انا عن نفسي اتجوزت من 6 سنين و كان شهر العسل في الغردقه

و بصراحه كان رائع جدا جدا انت عارف طبعا ان اليومين دول الجو هناك بيبقي جميل جدا و حتي لغايه شهر 11 و اول 12

بيكون لسه حلو و ممكن تنزل البحر

انا نزلت في اوتيل اسمه جولدن فايف

و الميزه فيه اولا هو خمس نجوم كبير جدا شيك اوي و الغرف جميله و طبعا مطله علي البحر

الشاطئ بتاعه حلو جدا جدا جدا و عريض

و ديه الميزه فيه عن غيره لان في اوتيلات كتيير هناك بس الشاطئ بتاعها ممكن ما يبقاش كويس

جوه الاوتيل فيه تليفريك....يعني شويه ساسبنس كده في شهر العسل هيبقوا كويسين برضه لما تتشعلق انت و المدام في الهوا

ديه الحاجات المميزه فيه عن غيره

فيه سهرات جوه الاوتيل

يعني من الاخر ممكن ما تحتاجش تطلع بره الاوتيل خالص و ديه ميزه في شهر العسل

و علي فكره احيانا كنا بنطلع بره الاوتيل و نروح اوتيلات تانيه زي سندباد مثلا و نقضي فيها (داي يوز) علي البحر و حاجات كده من باب التغير

ممكن كمان تروح شارم و فيها اوتيل جميل جدا نزلت فيه برضه هو هلنان مارينا شارم

و الفرق ما بين شارم و الغردقه حاجتين بس

اولا الغردقه هاديه اكتر من شارم

و ارخص في اسعار الاوتيلات وكمان في الطيران او الاوتوبيسات علي حسب ما تحب تروح

بس خلاص

و ربنا يوفقك يارب و يسعدلك ايامك

[واحد تاني]

اولا الف مبروك الجواز و ربنا يسعدك يارب و تكون حياه سعيده باذن الله

بس انا ليا ملحوظه صغيره ....يعني لو فيها مضايقه ....تاخد بالك و تروح انت بنفسك الفرح يعني بلاش واحد تاني ده

علشان كده هتبقي مشكله :ninja:

يعني ممكن تسيب التاني هنا في المحاورات و الاولاني هو اللي يروح ...اوكي علشان بس نلم -_- الموضوع

د. نانو اولا اشكر لك امنياتك الطيبة من كل قلبي وكمان المعلومات اللى اضفتيها لي ... :o

ثانيا ده انا اصلا فاتح الموضوع ده عشان خاطر "واحد تاني" ازاي بقى ميحضرش الفرح ... :ninja:

بس عاوز اسألك عن حاجة كده بيني وبينك (من غير ال 35 واحد اللى دخلوا الموضوع ده لغاية دلوقتي ما ياخدوا بالهم) ... تفتكري هما كلهم لسة ماتجوزوش؟ والا مش عايزين يفتكروا الذكريات الاليمة دي ؟ والا ايه حكايتهم ؟؟؟ :blink:

ايه يا شبيبة القبائل المحاوراتية ؟؟؟ كلكم بقيتوا عزاب دلوقتي والا ايه؟

فين المعومااات ؟ :rolleyes:

[نانو]

و الله يا اخي ما انا عارفه

انا شكيت في نفسي و قلوت اني كتبت في موضوع غلط ولا حاجه

مش عارفه ايه الحكايه مالهم كلهم مكتمين علي شهر العسل ليه :rolleyes:

تفتكر في نيه ورا الهروب الكبير ده

يعني فيه محاوراتيه كتير اوي متجوزين ...

طب ده احنا حتي ما فيش ورانا اليومين دول غير ان احنا نبارك يمين و نبارك شمال علي المولود الجديد

هو مش برضه المولود الجديد ده يبقي ابن ابو المولود الجديد اللي هو اصلا محاوراتي و صاحب ابو ابن المولود الجديد ده يبقي برضه محاوراتي و متجوز يعني عدي عليه الشهر اللي ربنا يعلم بيه ده ......اللي اسمه شهر العسل

مش عارفه ايه الحكايه :ninja:

عامه احنا نستني للصبح و.... ما تقلقش بكره المستخبي يبان

و بعدين بقولك ايه بلاش ازدواجيه المعايير ديه ....واحد تاني و اولاني ...خلينا في الشفافيه احسن ...انت بقي مين فيهم الاولاني ولا التاني :ninja:

[roca]

الناس في بلدي بينزلوا "مصر" عشان يقضوا فيها شهر العسل ، إنت بقى حتروح فين؟

مش المفروض إنه طالما إنت في "مصر" يعني يبقى حياتك حتكون سنين عسل مش شهر واحد بس!!!!!!!!!!!!!

:rolleyes:

[مصريه بالكويت]

اولا الف مبروك يا واحد تانى

ثانيا شكرا ليك لانك بجد رجعتنا لزكريات جميله قوى

مع ان مافاتش عليها غير 4 سنين لكن والله فاكراها لسببين الاول طبعا لحلاوة هذه الايام والثانى لانى قضيت شهر العسل اللى اختصرناه لاسبوع في شرم وانا بصراحه بحب اى حاجه تتعلق بالسياحة في مصر

والانطباع عن هذه البلد انه مكان فيه كل ما هو جميل بإستثناء بعض الملاحظات علي الناس السايحين (قصدى السياح)

المهم كل حته ف البلد دى تدعوك انك تتجنن من فرط اندهاشك بجمالها سواء ف البر او ف البحر . خليج نعمة وجماله ولا منطقة الف ليلة وليلة

وكمان الجلاس بوت اللى ركبناه وشوفت على الطبيعة الاسماك والشعب المرجانية الفظيعه قصدى شديدة الجمال

دا غير رحلة السفارى بجد متعه

مش قادره اقول غير بجد جميلة يا مصر .

وربنا يتمم بخير وعقبال كل شباب المنتدي وشاباته .

عقبال مصرية الهويه وتيجى تحكى لنا عن زكريات شهر علها الجميل بإذن الله

سااااااامع يا نسر يا رب تلاقيلك نسرايه بقا ونخلص ان شالله نحجزلك فى مودزريلا اوتيل بلازا بكفر ابو شملول بس

اعملها :rolleyes:

وان شالله

[mizo]

مش عارف اقوللك ايه مبدئياً مبروك اما عن شهر العسل صدقنى اى مكان المهم انك تكون ناوى تنبسط وتخليش اى

حاجه تعكنن عليك

انا امضيت شهر العسل فى سيشل 1994 هى مجموعه جزر عدد السكان 100000 نسمه فقط واااااه كانت ايام جميله

ومش هاتيجى تانى

علشان كده قلت لك انبسط بالعسل قبل ماتوفاجاء بل العسل التانى

[النسر المصري]

سااااااامع يا نسر يا رب تلاقيلك نسرايه بقا ونخلص ان شالله نحجزلك فى مودزريلا اوتيل بلازا بكفر ابو شملول بس

انتي يامصرية ناوية تكسري في مجدايفي وخلاص.... :ninja: ...... شمعنة انا العازب اللي عاملكم قلق :ninja:

مش كفاية اللي حصلي من ورا موضوع الجواز بتاعي اللي فتحتوه لي بقيادة ياسو وشركائه -_-

وهات يامراخيييري..... ولا البت سيتا ....وبعدين عضويتي ام الف مداخله......وعربيتي وبناطيلي وقمصااااني :blink:

الله يرحمك يالاغااااليييغووو

واحد تاني ياحبيب قلبي انت.....نصيحة من عازب اصيل معذب في ارض الله. :o ........ بلاش شهر عسل....عشان خاطري بلاش... :rolleyes:

ياعم اسمع بس اقوولككك. بس اس....طب اق...ياع......يااخي....سيب البنطلون ...بس اسمع اق......خلاث خلاث انت حر.......انا بس حاولت انثحك :o

[nancy]

اولا الف مبروك يا تانى وربنا يكون فى عونها :unsure:

ويا نسر اعملك اية بس مانا جبتلك عروسة وانت مقولتش ولا اة ولا لا

نعملك اية نلفهلك لفة هدية ونجبهالك ولا اية ياعم عمرو

:ph34r:

شوف يا واحد تانى احلى مكان تسافر فية هى مركب لو فى الشتاء يبقى نايل كروز مع رحلة فى الاقصر واسوان

ولو فى الصيف يبقى رحلة اسبوعين على الموانى فى البحر الابيض

متتخيلش اد اية الرحلات دى ممتعة وبما انك اسكندرانى يبقى حتعجبك الرحلة دى وحتدعيلى

انا رحت رحلة الموانى دى من 4 سنين بس دة كان تانى شهر عسل :blink:

من اشرف برضة.... :angry:

والف مبروك وعقبال مانديلك نصانح التعامل مع المولود الاول يا تانى العزيز :rolleyes:

[yasovinas]

لا حول ولا قوة الا بالله العلي العظيم

ليه بس كده بتفكرونا ليه وترجعولنا الذكريات دي ليه

انا بس هتكلم علشان الناس تتعظ وتفكر وتتدبر

شهر العسل قضيته كالآتي

اسبوع في شقتي في الاسكندرية

اسبوع في شقة عمة المدام في القاهرة { بس مش اي شقة ومش في اي مكان دي في عين شممممسسسسسس)

3 ايام في فندق في الاسماعيليه

وبعدين !!!!!!!!!!!!! مش فاكر

والله بجد نش فاكر

انا اخر حاجه فاكرها

نور لمع جامد قوي وصوت ريح شديد بيعمل فوووووووووووووو وبعدين

طاااااخ

ايييييييييييي

بوم

والكلام دا كان من 15 سنه فاتو

[علي البدري]

والله يا جماعه انا برضه منذ فتره كبيره ....... ذهبت الي العريش واخذت شاليه علي البحر ...... سكون وراحه وجمال و طبيعه ...... وربنا ما يوريك بعد الأسبوع حصل ايه ...... ربنا معاك والف مبروك واحنا حذرناك ..... ولا حول ولا قوه ال بالله ..... وحدوووووووووووووووووو