كنوز فنيه غنائيه موسيقيه نادره

[MZohairy]

نهارك سعيد يا موديست افندي :o

صضقني انت عفريت أوي خالص على الصور الحديثه بتاعة الفيلم الجديد اللي روحناله ديك النهار مع بعض

سعيده مبارك :)

[nancy]

محمود اولا انك تلاقى الصور دى صعبة والاغانى صعبة

انما الى يجنن بجد الحوار الى كتبتة دة اكتر من رائع

انت فعلا خيالك خصب جدا :o

احيك 3 مرات يا محمود

[Modest]

المداخلة الاخيرة دي بجد تستحق عليها اوسكار يا موديست :sad:

حُفِظت يا "واحد تاني" أفندي

في انتظارك عند سبق الخيل يوم السبت .. أنا حاجز تذكرتين على لاكي سترايك .. بيقولوا آخر مرة الريال كسب أربعة جنيه و نص

نهارك سعيد يا موديست افندي :)

صضقني انت عفريت أوي خالص على الصور الحديثه بتاعة الفيلم الجديد اللي روحناله ديك النهار مع بعض

سعيده مبارك :ninja:

أشكرك يا زهيري أفندي ياخويا

انت عارف من يوم ما كنا في التوجيهية سوى و أنا غاوي فوتوغرافيا و بعد ما اتخرجت بقيت أسرح على الكورنيش أصور الناس صور "مية" .. و أهي بتُرزَق

تاخدلكش صورة انت و المحروس الصغير سي إياد أفندي؟ :o

[مصري في الكويت]

والله يا موديست ما عارف اقولك ايه

اديك روحت ودعبست ورجعت لنا بكام صورة تمام ولسه بقولك دعبس كمان وكمان انا معاك وقاعد لكم في المكان ده مش رايح من هنا ومستني كل التحف اللي عندكم بجد

يا جماعة حد فاكر اغنية جوز الخيل والعربية ........ ويا حضرة العمدة ابنك حميدة ............ واي اوبريت لبلبة ايام ما كانت صغيرة .....

[Modest]

محمود اولا انك تلاقى الصور دى صعبة والاغانى صعبة

انما الى يجنن بجد الحوار الى كتبتة دة اكتر من رائع

انت فعلا خيالك خصب جدا :)

احيك 3 مرات يا محمود

ميغسي بوكو نانسي هانم المانسترلي

الصور و الأغاني صنعة إيديا و حياة عينيا.

الفيلم سجّلته عندي من كام يوم كان جاي على "روتانا زمان" و طلّعت منُّه الصور و الأغاني.

يعني الصور و الأغاني "حصرياً" على محاورات المصريين و مش هاتلاقيهم في أي مكان تاني :ninja:

أحييكي ألف مرّة... ميل ميغسي :o

[أبو محمد]

صاحب المقام الرفيع .. محمود باشا موديست

ميرسى ياباشا على هداياك العظيمة .. إسمح لى أشد على إيدك بحرارة ..

أنا لا يمكن أنسى البيكنيك الأخير فى عزبة معاليك .. يوم ما طلّعت الباكار بتاعة معاليك بالناظر والخولى على مصر مخصوص عشان يجيبوا الماكينة ال 8 ميللى على بال ما نخلّص بارتيتة الباكاراه .. الفيلم كان عامل كومبليه وموقّف عماد الدين على رجل .. حقيقى استمتعنا ياباشا

أرجوك تقبل الهدية البسيطة دى .. بنتنتيف يليق بمقام الهانم ..

أما معاليك فاسمح لى أقدم لك هدية جاية مخصوص من الخواجة " إيلى بيضا " .. صاحب شركة اسطوانات بيضافون .. دى آخر حاجة عملها صالح افندى عبد الحى .. بيقول فيها :

على خده ياناس ميت ورده

قاعـدين حراس فى مناهـده

ومنين ينباس ، ياخى دهـده

إسطوانات بيضافون - صالح افندى عبد الحى

[Folana]

السلام عليكم ورحمة الله....

والله انتم ناس زى السكر... :ninja: موديست...حاجة اوريجينال خالص..حابقى اعدى اخدها بعد ما ارجع من عند الخياطة..

تسلم ايديك ...(مين محمود ده؟؟؟ :) )

ابو محمد...اغنية جميلة جدا اكسلانس...تسلم ايدين اللى اشترا

زهيرى....لى عودة معك يازهيرى :o صضقنى زى ماباقول لحضرتك كده

ايييييووووففف..الدنيا حغ موت هنا..انا حاطلع التراسينة على ما يجى محمد افندى ياخدنى

[MZohairy]

تاخدلكش صورة انت و المحروس الصغير سي إياد أفندي؟ :o

سعيده بنفس :)

اياد أفندي يا سيدي من يوم ما خلصت الدراسه في مدرسة الخديويه الملكيه بالحلميه وادوله المسامحه و هو عاملي فيها ابن بارم ديله و هاتك يا لعب مع الأفنديه زوملاته

بقولك ايه

انا النهارده رايح اشتري طربوش جديد من عند سمعان أو شيكوريل لو تحب نتقابل هناك واعزمك على جلاس في جروبي فؤاد الأول :ninja:

داكور؟

فولانه

ادخلي ياختي من التراسينه احسن تستهوي :sad:

[واحد تاني]

حُفِظت يا "واحد تاني" أفندي

في انتظارك عند سبق الخيل يوم السبت .. أنا حاجز تذكرتين على لاكي سترايك .. بيقولوا آخر مرة الريال كسب أربعة جنيه و نص

وهواكذلك اذن اقابل معاليك في الموعد :ninja:

علاالله بس الحظ يكون بومب ونكسب كده وتبقى قشيتنا معدن

اتوتالير يا اكسلانس :o

يا جماعة حد فاكر اغنية جوز الخيل والعربية ........ ويا حضرة العمدة ابنك حميدة ............ واي اوبريت لبلبة ايام ما كانت صغيرة .....

وعندك طلب واحد مصري فى الكويييييت .... :)

الجوز الخيل

[Modest]

صاحب المقام الرفيع .. محمود باشا موديست

ميرسى ياباشا على هداياك العظيمة .. إسمح لى أشد على إيدك بحرارة ..

أنا لا يمكن أنسى البيكنيك الأخير فى عزبة معاليك .. يوم ما طلّعت الباكار بتاعة معاليك بالناظر والخولى على مصر مخصوص عشان يجيبوا الماكينة ال 8 ميللى على بال ما نخلّص بارتيتة الباكاراه .. الفيلم كان عامل كومبليه وموقّف عماد الدين على رجل .. حقيقى استمتعنا ياباشا

أرجوك تقبل الهدية البسيطة دى .. بنتنتيف يليق بمقام الهانم ..

أما معاليك فاسمح لى أقدم لك هدية جاية مخصوص من الخواجة " إيلى بيضا " .. صاحب شركة اسطوانات بيضافون .. دى آخر حاجة عملها صالح افندى عبد الحى .. بيقول فيها :

على خده ياناس ميت ورده

قاعـدين حراس فى مناهـده

ومنين ينباس ، ياخى دهـده

إسطوانات بيضافون - صالح افندى عبد الحى

اشكرك يا إكسلانس على الهدية القيمة .. البنتنتيف تحفة نادرة بصراحة شفت زيه مرّة واحدة بس في مزاد على مجوهرات فولانة هانم الخربوطلي و كانت المدام نفسها فيه بس ماكانش معايا دفتر الشيكات يومها :)

و الولد صالح عبد الحي ده موهبة أتنبأ لها بمستقبل باهر

إيه رأي معاليك ، و على سبيل التغيير ، أعزمك على تياترو الوردة المفتحة في شارع عماد الدين .. فيه ترابيزة هايلة على البيست بعيد عن الرعاع محجوزة بإسمي هناك طول السنة

فيه ولد مونولوجست جديد هايل إسمه محمود شكوكو

اسمع له حبيبي شغل كايرو .. مفيش في القلب غَيْرُه .. يموت هو في عذابي .. أموت أنا في ضفايرُه

إذا عجبك قول لي و أنا أبعت لك البونتياك الخضرا و السواق الفزدقي :o

[Folana]

السلام عليكم ورحمة الله ....

جميلة جدا .." وهوااا كذلك " دى:)..انتم بتفتكروا الحاجات دى ازاى ياجماعة.....

طيب حيث انكم بقى مش لاقين دوالايب الهوا بتاعة الاخت الفاضلة صباح..وحيث ان فلوس اللوتارية بتاعة سى الاستاذ حتروح علىّ لان السحب بكرة...يبقى اطلب حاجة تانية

كان فيه دويتو فى فرقة الموسيقى العربية ..بيغنى اغنية جميلة ..فيها مقطع بيقول

الست: ياه ه يادين النبى ...تانك سارح ...ما انا لسة مقابلاك امبارح

الرجل (لما افتكر ياعينى وزاح وشه الناحية التانية ): ماتفكرنيش..اما دى حقة كانت ليلة فى غاية الرقة...

ينفع تشوفهولى اااحياااااات ااانبى...

واغنية...الكشكش اكل الملوخية واكلها و لا سأل فىّ..هى شقاوة ولا دناوة ولا يكون مستهتر بىّ....

ما اعرفش مين كان بيغنيها بس كنت باسمعها من واحدة صاحبتى ايام الاسكولة...هى دى اغنية فعلا ولا تهديد ولا جُرسة ولا ايه موقعها من الاعراب ؟؟ :o

[Modest]

بقولك ايه

انا النهارده رايح اشتري طربوش جديد من عند سمعان أو شيكوريل لو تحب نتقابل هناك واعزمك على جلاس في جروبي فؤاد الأول -_-

داكور؟

داكور يا إكسلانس

طرابيش سيكوريل مش بطّالة خالص .. أفتكر نتقابل أحسن في المحل الجديد اللي اسمه الأمريكين اللي في شارع عماد الدين .. انت عارف أنا موجود في عماد الدين على طول اليومين دول :rolleyes: .. ممكن ناخد عنده تروا بوتي كوشون أو ناخد درينك عند باستوفلو أو راندوبلو و بعدين ندخل فيلم ليلى بنت الأغنياء.. لو الفكرة عجبتك ممكن تقابلني عند أول عماد الدين من ناحية شارع الملكة نازلي :closedeyes:

[واحد تاني]

يا جماعة حد فاكر اغنية جوز الخيل والعربية ........ ويا حضرة العمدة ابنك حميدة ............ واي اوبريت لبلبة ايام ما كانت صغيرة .....

آدي

حضرة العمدة وابنه حميدة

اما بخصوص لبلبة وهي صغيرة بقى ...

متعرفش كان عندها كام سنة بالظبط وقتها عشان البحث عن ( الاوبريط ) يكون اسهل شوية بس :closedeyes:

مدام فلانة ...

انا عارف الدويتو اللى تقصديه ده بتاع غاية الرقة ...

استنيني ... ليا عودة :rolleyes:

[Folana]

[quote name=مصري في الكويت'

مدام فلانة ...

انا عارف الدويتو اللى تقصديه ده بتاع غاية الرقة ...

استنيني ... ليا عودة :rolleyes:

فى انتظار معاليك يا باشــــــــا...حتروح من القدر فين :closedeyes:

على فكرة الاوبريت اللى عايزه مصرى فى الكويت مش بتاع لبلبة....مش تقصد البنت اللى كانت ماسكة فانوس وبتغنى على القهوة...وكان ابوها زكى رستم ؟

[أبو محمد]

كان فيه دويتو فى فرقة الموسيقى العربية ..بيغنى اغنية جميلة ..فيها مقطع بيقول

الست: ياه ه يادين النبى ...تانك سارح ...ما انا لسة مقابلاك امبارح

الرجل (لما افتكر ياعينى وزاح وشه الناحية التانية ): ماتفكرنيش..اما دى حقة كانت ليلة فى غاية الرقة...

ينفع تشوفهولى اااحياااااات ااانبى...

واغنية...الكشكش اكل الملوخية واكلها و لا سأل فىّ..هى شقاوة ولا دناوة ولا يكون مستهتر بىّ....

ما اعرفش مين كان بيغنيها بس كنت باسمعها من واحدة صاحبتى ايام الاسكولة...هى دى اغنية فعلا ولا تهديد ولا جُرسة ولا ايه موقعها من الاعراب ؟؟ :rolleyes:

فولانة هانم ..

ده دويتو من أوبريت العشرة الطيبة من تأليف محمد تيمور وبديع خيرى واتعرضت سنة 1920 ..

الأوبريت متسجل فى الإذاعة بطولة كارم محمود وشهرزاد .. والاسطوانة بصوت سيد درويش وحياة صبرى .. ودى عندى بس قديمة .. ياريت موديست باشا يقدر يجيب نسخة الإذاعة .. وكمان إسعاد يونس كانت بتغنيه فى الشريط الوحيد إللى طلعته مع بعض أغانى السيد مكاوى .. أنا حاسألك على تسجيل الإذاعة ولو لقيته يكون أحسن لأن فيه كلمات متغيرة عن الكلمات الأصلية اللى فيها بعض الكلمات الخادشة .. الكلمات المعدلة بتقول :

سيف الدين:

على قد الليل ما يطول

مسترضي بسهري ونوحي

في حبك ياللي من أول

ما شوفك تترد روحي

سنين وأيام دايب فيكي

بزمارتي أصحيكي

طول مانا وأنتِ في الدنيا دي

أفوت أهلي وأجدادي

حاروح على فين وأنت قصادي

نزهة:

يا ترى يا ربي داهوه والا لأ حبوبي

سيف الدين:

يا عين الحبوب من جوه

يا سبب وعدي ومكتوبي

ياكتاكيتها

نزهة:

ياننوسه

سيف الدين:

ياقطاقيطها

نزهة:

ياحنتوسه

سيف الدين:

أنا م النجمة في استنظارك

نزهة :

أديني نازله

سيف الدين:

أما نهارك أبيض من طبق القشطة

نزهة:

اوعى يكون حد شايف طيفي

سيف الدين:

حطي ف بطنك بطيخة صيفي

مهجتي ف إيديكي أنا ف عرضك

خليها يا روحي أمانة عندك

نزهة:

يوه يادين النبي تنك سارح

مش كنت معاك ليلة امبارح

سيف الدين:

ماتفكرنيش .. أما دي حقه كانت ليلة في غاية الرقة

نزهة:

فاكر وأنا حاطه إيديه في باطاتك قبلي الترعه

على غفلة وملت عليه ماقدرتش أقوللك اوعى

سيف الدين:

قمت أنا بصيت يمين وشمال

ساعة ما لقيت ما فيش عزال طبل طبلي وزمر زمري

وشقلي بقلي وعنها ودوغري ورحت أنا قاطف لك فله

نزهة:

من يومها عرفت الآخر إنك مستعبط ساهي

أيش قوله المثل الساير ياما تحت الساهي دواهي

سيف الدين:

آه عليها عيون ما تلتقيهاش

على منادمين يا كده يا بلاش

نزهة:

عليه مناخير فشر النبقة

سيف الدين:

أما قوامها زيه ماتلقى

دنا متبرجل يا حدقة

يا كتاكيتها يا حلاوتها

يا قطاقيطها يا لطافتها

قربي لي يانور عنيه قربي لي يانور عينيه

مهجتي ف إيديكي أنا ف عرضك

خليها يا روحي أمانة عندك

نزهة:

يوه يادين النبي تنك سارح

مش كنت معاك ليلة امبارح

سيف الدين:

ماتفكرنيش

الجميع: أما دي حقه كانت ليلة في غاية الرقة

وإلى اللقاء مع اللحن

أما بقى موضوع الكشكش والملوخية فدى بقى عاوزة أضرب لها بولطة فى بحرى أو كوم الدكة .. خللى عندك أمل :closedeyes:

[مصري في الكويت]

أهو كده الشغل بقي علي مية بيضا ..... واخاف الموضوع يتشفر بجد واتبهدل انا بعد كده

مع اني جبت اللحاف اللي مستلمه من الوزارة وفرشت ونمت لكم في الموضوع ده بالذات متشكر قوي قوي للناس الكبار اللي جابت لي جوز الخيل وحضرة العمدة مع ان اغنية حضرة العمدة للاستماع بس مش للتحميل انتم غيرتم مبدئكم ولا ايه ولسه برضه مستني الاوبريت بتاع البت الصغيرة اللي كانت بتغني علشان رمضان انا فاكر انها كانت بتلف علي الناس اللي شغالين في الحارة كلهم وكان في ايديها فانوس ................

خلي بالكم انا قولت انا لازق لكم هنا يعني لازق مش متحرك ومستني اي تحف للأسف معنديش اي حاجة اشارك بيها

مع اني فاكر مرة ابويا زمان زعق لي وقالي يا تحفة... بس مقدرش ارفع نفسي علي اي موقع تحميل ...

[أبو محمد]

اشكرك يا إكسلانس على الهدية القيمة .. البنتنتيف تحفة نادرة بصراحة شفت زيه مرّة واحدة بس في مزاد على مجوهرات فولانة هانم الخربوطلي و كانت المدام نفسها فيه بس ماكانش معايا دفتر الشيكات يومها

إيه يا فولانة هانم الخبر اللى موش ولا بد اللى انا سمعته من موديست باشا ده ؟

مزاد إيه ده اللى اتعمل على جواهر عصمتك ؟

إزاى ماعرفش عن الموضوع ده ؟ كان أقله كلمت فكرى بك أباظة يعمل لك بروتستو عقبال ما نتصرف :rolleyes:

إسمحيلى ياهانم ده كتير قوى .. إن ماكناش نقف جنب بعض فى المواقف اللى زى دى .. نقف إمتى امال .. على العموم حنزوركم أنا والهانم ونشوف إيه آخر موقف لك فى البورصة .. ما تتصرفيش لحد ما اتصل بمينا البصل واشوف أخبار أسهم القطن بتاع عصمتك إيه .. وما تنسيناش فى كام قنطار عشان تنجيد مراتب إنجى بنتنا :closedeyes:

[واحد تاني]

وإلى اللقاء مع اللحن

بونسوار ابو محمد بيه ...

آدي اللحن جنابك :closedeyes:

(على قد الليل مايطول)

[Folana]

السلام عليكم ورحمة الله...

ابو محمدددددددددددد...أبااا محمدددددددددد...ابىىىى محمدددددددددددد...هى دى ...والله هى دى فعلا...

الله يخليك ويبارك فيك ولا تتحرمش ابدا منى ياررررب....

بس الاغنية كان فيها جزء مختلف ...مش عارفة هو خارج ولا ايه ..بس كنت باسمعها عادى فى التليفزيون فى برنامج الموسيقى العربية ..

بس بجد الله ينور...رجالة وطول عمر ولادك يا بلدنااا رجااااااالة

بالنسبة للكشكش ..فعلا صاحبتى دى اسكندارنية ..يعنى ممكن تلاقى الاغنية فى بحرى فعلا:closedeyes:

باشكرك جدا ...حققت امنيتى فى اخر ايامىىىى....(دمعة امتنان وفرح)

تيتا الحاجة ..فلانة

مصرى فى الكويت ..دى مش لبلبة والاغنية دى بتيجى كتير فلى رمضان ..بس للاسف مش فاكراها دلوقت....وياسيدى كفاية تحفك الرائعة فى باب الشعر..بصراحة حاجات رائعة واحساس مرهف ..سلمت اناملك...

[واحد تاني]

فولانة هانم ..

ده دويتو من أوبريت العشرة الطيبة من تأليف محمد تيمور وبديع خيرى واتعرضت سنة 1920 ..

الأوبريت متسجل فى الإذاعة بطولة كارم محمود وشهرزاد .. والاسطوانة بصوت سيد درويش وحياة صبرى .. ودى عندى بس قديمة .. ياريت موديست باشا يقدر يجيب نسخة الإذاعة .. وكمان إسعاد يونس كانت بتغنيه فى الشريط الوحيد إللى طلعته مع بعض أغانى السيد مكاوى .. أنا حاسألك على تسجيل الإذاعة ولو لقيته يكون أحسن لأن فيه كلمات متغيرة عن الكلمات الأصلية اللى فيها بعض الكلمات الخادشة ..

كلام جنابك سليم ...

سيف الدين: حطي ف بطنك بطيخة صيفي

مهجتي ف إيديكي أنا ف عرضك

خليها يا روحي أمانة عندك

الجزء ده هو اللى متغير ...

اما بديع خيري ده ... كان خنزءووور كبير :rolleyes:

عموما التسجل اللى انا حطيته فوق ده بتاع سي السيد افندي البحر

وهتكون فيه للاسف شفة بديع افندي ... :closedeyes: